Lesona 2

Faatupuina o le Lotogatasi i le Faaipoipoga

Faamoemoega

Ina ia fesoasoani i ulugalii ua faaipoipoina ia faateleina le lotogatasi ma ina ia fesoasoani i tagata nofofua e saunia ia olioli i le lotogatasi i le faaipoipoga.

Sauniuniga

1. Ao e saunia oe lava e te aoao atu, vaavaai mo ni auala e mulimuli ai i mataupu faavae o loo i lalo o le “O Ou Tiutetauave o se Faiaoga” itulau x–xii i le tusi lesona lenei.

2. Mafaufau loloto i aoaoga ma mataupu faavae o loo otootoina atu i autu o loo matamata tetele atu le tusiga. Ia mafaufau i le gasologa o le vaiaso e uiga i ni auala e aoao atu ai nei aoaoga ma mataupu faavae. Saili le taitaiga a le Agaga i le filifilia o mea e tatau ona e faamamafaina e faafetaiaia ai manaoga o tagata o le vasega.

3. Afai e maua le Tusi Faavae o Afiafi Faaleaiga, suesue le “O le Avea ma Tino e Tasi o le Ulugalii” o loo i le itulau 275. Mafaufau e faatatau atu i le faamatalaga lenei i le taimi o le lesona.

4. Aumai ni fasi pepa ma ni peni mo tagata uma o le vasega.

Faalautelega Fautuaina o le Lesona

Ua poloai mai le Alii i tane ma ava ina ia tasi.

Ina ia amataina le lesona, tusi i luga o le laupapa le 1+1=1.

• E faapefea ona faamatalaina e lea mea le Fegalegaleaiga o le faaipoipoga?

Pe a mae’a ona talanoaina e tagata o le vasega lenei fesili, faitau le Kenese 2:24 faatasi ma i latou. Ia faamamafa atu ua poloaiina e le Atua tane ma ava ina ia tasi.

• O le a le uiga ia tasi le tane ma le ava?

  Fai atu i tagata o le vasega e faitau le saunoaga lenei a Elder Henry B. Eyring o le Korama a Aposetolo e Toasefululua (itulau 8 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga):

  “Mai le foafoaga o le tane ma le fafine, o le lotogatasi mo i laua i le faaipoipoga sa le’i tuuina atu o se faamoemoe, a’o se poloaiga! ‘O le mea lea e tu’ua ai e le tane lona tama ma lona tina, ae faatasi ma lana ava: ona avea ai lea o i la’ua ma tino e tasi’(Kenese 2:24). E finagalo lo tatou Tama Faalelagi ia fusifusia faatasi o tatou loto i le lotogatasi ma le fealofani. O lena faatasiga i le alofa e le na o se sini. E matua manaomia lena mea (Liahona, Iulai 1998, 76–78).

Ia faamatala atu o loo talanoaina i le lesona lenei auala e tele e mafai ai ona lotogatasi tane ma ava.

E tatau i tane ma ava ona faatauaina e le tasi le isi e avea o ni tagata e tutusa.

Ia faamatala atu o se mataupu faavae taua o le lotogatasi i le faaipoipoga o le tatau lea i tane ma ava ona faataua e le tasi le isi o ni paaga tutusa. Ao auauna atu o se Fesoasoani Muamua i le Au Peresitene Sili, na saunoa Peresitene Gordon B. Hinckley:

“O le mafutaga faaipoipo i lona tulaga moni lava, o se soa lea e tutusa, e le faaalia le fia pule o le tasi i le tasi, ae faamalosiau atu ma fesoasoani le tasi i le tasi i soo se tiutetauave ma soo se taumafaiga lava e faia e le tane po o le ava” (Liahona, Mati 1993, 3–9).

• Aisea e tatau ai i tane ma ava ona faataua e le tasi le isi o ni paaga tutusa ina ia tasi?

• O a nisi o amioga po o tulaga masani e taofia ai tane ma ava mai le avea ma ni paaga tutusa i a latou mafutaga o le faaipoipoga? O a mea e mafai ona faia e tane ma ava e faatoilaloina ai na luitau?

  Na aoao mai Elder Boyd K. Packer o le Korama a Aposetolo e Toasefulua:

  “Sa le’i tuuina atu e na o le fafine e fetuutuunai o ia lava i tiute faaleperisitua o lana tane po o ona alo tama. E moni lava o ia e lagolago atu ma fesoasoani ma faamalosiau ia i latou.

  “I lea tulaga fetuutuunai, e tatau ai i e umia le perisitua ona fetuutuunai i latou lava e tusa ai ma manaoga ma tiutetauave o le ava ma le tina. E ao ona tuu atu le faamuamua i le ava i lona tulaga maloloina faaletino ma faalelagona ma faalemafaufau ma faaleaganuu ma lona tulaga atiae faaleagaga mai o [latou] tiute uma faaleperisitua.

  “E leai lava se galuega, e ui ina faatauvaa, e ogatasi ma le tausiaina o pepe, o le faafaileleina o fanau, po o le faatumauina o le tulaga lelei i le aiga, e le tutusa foi i ai ia matafaioi a [se tane]” (“A Tribute to Women,” Ensign, Iulai 1989, 75).

  Na apoapoai atu Elder Richard G. Scott o le Korama a Aposetolo e Toasefululua i e o loo umia le perisitua: “O le avea ai ma se tane ma se perisitua agavaa, o le a e manao e mulimuli i le faataitaiga a le Faaola, o lana perisitua lea e te umia. O le a e faia na uluai mea e taulai i ai lou olaga, le tuuina atu o oe lava i lau ava ma le fanau…. E i ai nisi taimi e taumafai ai se alii e pulea le taunuuga o tagata taitoatasi o le aiga. Na te faia faaiuga uma. E tatau ona gauai atu le ava i ona manatu uma. Pe o se tu ma aga lena mea pe leai, e le afaina. E le o se auala lea a le Alii. E le o se auala lea a se tane o le Au Paia o Aso e Gata Ai e tausia ai lana ava ma lona aiga” (Liahona, Iulai 1999, 29–31).

• O a nisi mea e faia e tane ma ava pe a latou faataua e le tasi le isi o ni paaga tutusa? (Mafaufau i le aoteleina o tali a tagata o le vasega i luga o le laupapa. Pe a manaomia, ia fetufaai atu manatu o loo lisiina i lalo ma valaaulia tagata o le vasega e fetufaai atu mea na oo ia i latou e talafeagai ma manatu na.)

  1. E fetufaai o laua tiutetauave ina ia mautinoa o loo tatalo faatasi le aiga, faia afiafi faaleaiga, ma suesue faatasi i tusitusiga paia.

  2. E galulue faatasi i laua i le fuafuaina o auala e faaaogaina ai mea tau tupe a le aiga.

  3. E talanoa ma malilie faatasi i tulafono i totonu o le aiga ma le ala e pulea ai amioga a le fanau. E vaai le fanau o loo lotogatasi o latou matua i faaiuga faapena.

  4. E fuafuaina faatasi e i laua ia gaoioiga a le aiga.

  5. E taufai fesoasoani i laua i feau ma galuega i le fale.

  6. E auai faatasi i laua i le lotu.

E tatau i tane ma ava ona faaaoga o latou uiga lelei ma mea e mafai ona faia e faaatoatoa ai e le tasi le isi.

Faitau faatasi ma tagata o le vasega le 1 Korinito 11:11. Ona fetufaai atu lea o le saunoaga lenei a Elder Richard G. Scott:

“I le fuafuaga a le Alii, e manaomia le toalua—o se tane ma se fafine—e gaosia ai se mea atoa…. Ina ia mauaina le fiafia sili ma fua mai ai mea sili, e manaomia uma le tane ma le ava. La te galulue faatasi ma felagolagoma’i. E tofu le tagata ma uiga e fetaui lelei ma le matafaioi ua tuuina atu i ai e le Alii mo le fiafia o le tane po o le fafine. Pe a faaaogaina e pei ona fuafuaina e le Alii, o na uiga e faatagaina ai se ulugalii ua faaipoipo ina ia mafaufau, galulue ma olioli o se tino e tasi—e taulimaina luitau ma faatoilaloina faatasi—ia tuputupu ae i le alofa ma le malamalama e ala i sauniga o le malumalu ina ia fusia faatasi ai e avea ma tino e tasi e faavavau. O le fuafuaga lena (Liahona, Ianuari 1997, 88–91).

Fai le gaoioiga lenei ina ia faapupulaina ai le mataupu faavae na aoao mai e Elder Scott:

Ia tuu atu i tagata taitasi o le vasega se fasi pepa ma se peni po o se penitala. Fesili i tagata taitasi o le vasega o e ua faaipoipo e lisi nisi o ona uiga ma malosiaga ma nisi o uiga ma malosiaga o lona toalua. Fesili atu i tagata taitasi o le vasega o loo nofofua e mafaufau i se ulugalii ua faaipoipoina ma lisi nisi o uiga ma malosiaga o le tane ma le ava. Pe a mae’a ona tuuina atu ni nai minute i tagata o le vasega e tusitusi ai, fai atu fesili nei:

• O a ni ala e mafai ai ona fesoasoani uiga ma malosiaga ua e lisiina e faalotogatasiina ai ulugalii ua faaipoipoina? (Fai atu i tagata o le vasega e fetufaai mai ni faataitaiga patino.)

• O a ni ala ua e vaaia ai ni eseesega o tane ma ava ua avea ma ni malosiaga i la laua mafutaga?

Faitau le saunoaga lenei a Sister Marjorie P. Hinckley, le faletua o Peresitene Gordon B. Hinckley, e uiga i le tausaga muamua o lana faaipoipoga:

“Sa ma fealofani, sa tau le masalomia lena mea, ae peitai sa tatau foi ona matua masani le tasi i le isi. Ou te manatu e tatau i ulugalii taitasi ona matua masani le tasi i le isi. E le’i leva ae ou iloaina e sili atu ona lelei pe afai e ma te galulue malosi atili ina ia matua masani le tasi i le isi nai lo le taumafai pea lava pea e suia le tagata lava ia” (Church News, 26 Setema 1998, 4).

• O a ni ala atonu e eseese ai ni taunuuga pe a taumafai ulugalii e “matua masani le tasi i le isi” nai lo le “taumafai pea lava pea e suia le tagata lava ia”?

E tatau i tane ma ava ona faamaoni le tasi i le tasi.

Ia fetufaai atu le apoapoaiga lenei mai ia Peresitene Gordon B. Hinckley, o le Peresitene lona 15 o le Ekalesia:

“Ia fuafua o le a leai lava se mea e tulai mai i lo oulua va, o le a faavevesi ai la oulua ulugalii. Ia faia mea uma e tatau ai ina ia manuia la oulua ulugalii. Ia faia se tonu e faia ina ia manuia. Ua matua tele naua faaipoipoga ua tatala ua mafua ai le loto nutimomoia, ma ua faatamaia ai ola i nisi o taimi. Ia matua faamaoni a’ia’i le tasi i le isi” (Liahona, Me 1999, 3–7).

• O le a le uiga ia te oe o le upu faamaoni a’ia’i? (O tali atonu e aofia ai o le faamaoni, o le sa’o, ma le faatuatuaina i totonu o se mafutaga.)

Faamatala atu na faamamafaina e le Alii le tatau i tane ma ava ona faamaoni a’ia’i le tasi i le isi. Faitau faatasi ma le vasega le Mataupu Faavae ma Feagaiga 42:22. Faailoa atu o lenei poloaiga e tutusa lava lona aoga i tane ma ava.

• O le a le uiga o le pipii atu i le tane po o le ava ae le o se isi?

  Na aoao mai Peresitene Spencer W. Kimball, le Peresitene lona 12 o le Ekalesia: “O upu ae le o se isi ua aofia ai tagata uma ma mea uma. O lona uiga ua sili atu le toalua i le olaga o le tane po o le ava, ma e le tatau lava ona faamuamua faafiafiaga, galuega, se tofi faalemalo po o se isi lava mea po o se tagata i luma atu o le toalua” (Faith Precedes the Miracle [1972], 143).

• E mafai faapefea e se tagata ona tuueseina tulaga o faafiafiaga, o galuega, ma le Ekalesia mai le faalavelave i lona faamaoni a’ia’i i lona toalua?

• O a nisi o auala patino e mafai ai e ulugalii ona faaalia le faamaoni a’ia’i o le tasi i le isi? (Afai e faafaigata ona taliina e tagata o le vasega lenei fesili, fetufaai atu ni nai faataitaiga, e pei o mea o loo lisiina i lalo.)

  1. E mafai e se tane ona toe fetuutuunai galuega, o ni mea e tafafao i ai, po o nisi mea ua uma ona faatulagaina, ina ia faamanatu ai le aso fanau o lana ava.

  2. E mafai e se ava ona tatalo i aso taitasi mo le manuia o lana tane i ana galuega.

  3. E mafai ona faalogo le tasi i le isi, e tusa lava pe atonu e le fetaui ma le talafeagai.

  4. E mafai ona la tautatala ma le alofa ma le faaaloalo e uiga i le tasi i talanoaga faatasi ma tagata o aiga ma uo.

Faaiuga

Ia faamamafa atu ua poloaiina e le Alii ma Ana perofeta ia tane ma ava ina ia lotogatasi i le alofa ma galulue faatasi o ni paaga tutusa. E mafai e tane ma ava ona faaalia lo la faamaoni a’ia’i o le tasi i le isi i aso uma e ala i o la manatunatuga, o upu, ma mea e faia.

Ia molimau atu i upumoni sa talanoaina i le gasologa o le lesona e pei ona uunaia ai e le Agaga.

Ia faasino i itulau 8–11 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga. Ia uunaia tagata o le vasega ina ia iloilo aoaoga faavae ma mataupu faavae i le lesona lenei e ala i le (1) mulimuli i se fautuaga e tasi pe sili atu foi i le “Auala Mo Le Faatinoga” ma le (2) faitauina o le saunoaga a Elder Henry B. Eyring o le “Ina Ia Tasi i Tatou Uma.” Faailoa atu e mafai ona matua aoga tele i ulugalii ua faaipoipoina le faitau ma talanoaina faatasi saunoaga o loo i le taiala suesue.

Faamanatu i tagata o le vasega e aumaia a latou taiala suesue i le vasega mo le lesona e sosoo ai.