Lesona 8

Pulea o Tupe a le Aiga

Faamoemoega

Ina ia fesoasoani i tagata o le vasega e faataitai ona faaaogaina mataupu faavae o le pulea o mea tautupe i o latou aiga.

Sauniuniga

Mafaufau i auala e mafai ona e faaaogaina ai mataupu faavae o loo i lalo o le “O Ou Tiutetauave o se Faiaoga” itulau x–xiii i le tusi lesona lenei.
Faitau autu o le lesona lenei o loo matamata tetele atu le tusiga. O loo tuuina atu ai i nei autu se aotelega o aoaoga faavae ma mataupu faavae o loo i le lesona. E faaopoopo atu i ai, ia suesue ma le faaeteete le tala o le “Tumau i le Faatuatua e Ui Lava i Suiga,” na saunia e Peresitene N. Eldon Tanner, o loo i itulau 30–34 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga. O mataupu faavae i lenei tala o mea autu na o loo taulai atu i ai le lesona. I le avea ma se vaega o au sauniuniga, mafaufau loloto i nei mataupu faavae i le vaiaso atoa. Saili le taitaiga a le Agaga i le filifiliina o mea e tatau ona e faamamafaina atu e fefaataiaia ai manaoga o tagata o le vasega.
Faamanatu atu i tagata o le vasega e aumai a latou kopi o le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga i le vasega. E manaomia latou te faatatau atu i le saunoaga a Peresitene Tanner i le taimi o le lesona.
Afai e te faaaogaina isi mea e maua mai ai le fesoasoani o loo maua i itulau 44–45, ona aumai lea i le vasega se fasi pepa ma se peni po o se penitala mo tagata uma o le vasega.

Faalautelega Fautuaina o le Lesona

O le puleaina lelei o tupe e taua tele mo se faaipoipoga fiafia.

Ia valaaulia se ulugalii ua faaipoipoina e o mai i luma o le vasega (ia faaeteete i lagona ma tulaga o i latou o e e te valaauliaina). Faamatala atu o le a e faaalia atu le auala e mafai ai e sina mea itiiti lava ona faamalosia se faaipoipoga pe faatupuina ai foi se faafitauli matuia i se mafutaga faaleulugalii. Ona tuu ane lea i luga o se tupe.

Tuu atu le tupe i se tasi o tagata ua e valaauina e o atu i luma o le vasega.

E faapefea ona aafia se mafutaga faaleulugalii pe a na o le tane po o le ava e pulea mea tau tupe a le aiga?

A maea ona talanoaina e tagata o le vasega lenei fesili, toe faafoi mai le tupe.

E faapefea ona aafia se mafutaga faaleulugalii pe a leai se isi e pulea mea tau tupe a le aiga pe pulea foi e tului o aitalafu?

A maea ona talanoaina lenei fesili, toe faafoi atu le tupe. Fai atu i le tane e uu i lona lima le tupe, ma fai atu i lana ava e tuu lona lima i luga o le lima o lana tane. Ia faamatala atu, o le pulea o tupe e le o se mea autu lea e pito sili ona taua i se mafutaga alofa faaleulugalii. Ae peitai, pe a galulue faatasi le tane ma le ava e pulea mea tautupe, e tuufaatasia ai i laua i se taumafaiga taua e faatulagaina lelei lo laua aiga. E taofia ai foi e i laua luitau faigata. O nisi o faafitauli pito sili ona matuia i se faaipoipoga e tulai mai pe a le pulea lelei mea tau tupe i tulaga pito sili ona manaomia o le aiga.

O a auala e faamalosia ai se faaipoipoga pe a galulue faatasi le tane ma le ava e pulea a laua mea tautupe?

E tatau i tane ma ava ona galulue faatasi ina ia mulimuli i mataupu faavae o le puleaina o tupe.

Fai atu i tagata o le vasega e sue i itulau 30–34 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga. Fai atu ia i latou e toe tilotilo i le tala ua faaautuina “Tumau i le Faatuatua e Ui Lava i Suiga “ ma vaavaai mo “mataupu faavae e lima o le faatumauina o le tamaoaiga.” Pe a maua e tagata o le vasega ia mataupu faavae, ia lisiina mea na i luga o le laupapa:

Totogi se sefuluai faamaoni.

Ia ola e tusa ma mea ua e maua.

Ia iloa le eseesega o mea e manao moni i ai ma mea e faananau i ai.

Ia fuafua ma ola e tusa ai ma se fuafuaga o mea tautupe.

Ia faamaoni i a outou feutagaiga uma o mea tautupe.

Pe a e lisiina mataupu faavae uma e lima i luga o le laupapa, ona faaaoga lea o mea nei e faia ai se talanoaga e uiga i mea na:

Totogi se sefuluai faamaoni.

Ia valaaulia se tagata o le vasega e faitau le saunoaga lenei a Peresitene Tanner (itulau 31 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga):

“O le totogiina o le sefuluai o se poloaiga, o se poloaiga faatasi ma se folafolaga. Afai tatou te usiusitai i lenei poloaiga, ua folafola mai ia i tatou o le a tatou “manuia i le nuu.” E aofia ai i lenei manuia se tulaga e sili atu nai lo oa faalelalolagi—atonu e aofia ai le maua o le soifua maloloina ma le matala o le mafaufau. E aofia ai le mautu o le aiga ma le faatuputupulaia i mea faaleagaga. Ou te faamoemoe o outou o e e le o totogiina nei a outou sefuluai atoatoa o le a outou sailia le faatuatua ma le malosi e fai ai lea mea. A o outou faataunuuina lenei tiutetauave i Le na faia outou, o le a outou maua le fiafia tele na’ua, ma e na o i latou o e faatuatua i lenei poloaiga ua latou iloa” (i le Conference Report, Oketopa 1979, 119; po o le Ensign, Novema 1979, 81).

E faapefea ona aumaia faamanuiaga i lou aiga po o isi e te iloaina i le totogiina o le sefuluai?

Ia ola e tusa ma mea ua e maua.

Fai atu i se tagata o le vasega e faitau le saunoaga lenei a Peresitene Tanner (itulau 31–32 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga):

“Ua ou iloa e leai se auala e mafai ai ona e maua ni tupe e sili atu nai lo le mea e mafai ona e faaaluina. Ua ou talitonu e le o le aofai o tupe e mafai ona maua e se tagata e aumaia ai le filemu o le mafaufau a o le pulea lelei o ana tupe. E mafai ona avea le tupe ma se auauna usiusitai ae peitai o se pule saua. O i latou o e e fuafuaina lo latou olaga autu ina ia faaavanoa sina faasiliga, o i latou ia e pulea tulaga e oo i ai. O i latou o e faaaluina e sili atu nai lo mea latou te maua ua pulea e i latou le tulaga e oo i ai. E nofo pologa i latou. Sa faapea mai Peresitene Heber J. Grant: ‘Afai e i ai se mea e tasi e aumaia ai le filemu ma le lotomalie i le loto o le tagata, faapea ma le aiga, o lea mea o le ola lea e tusa ma mea ua tatou maua. Peitai afai e i ai se mea e tasi e le lelei, o lea mea o le faia lea o ni aitalafu e le mafai e se tasi ona totogi’ (Gospel Standards, filifilia e G. Homer Durham [1941], 111).

“O le ki i le faaaogaina o mea ia itiiti ifo nai lo mea tatou te maua e faigofie lava—ua ta’ua lea o le pulea lelei. Pe iloa vave i le olaga pe tuai foi, e tatau ona tatou iloa uma i le taimi mulimuli ona aoao e pulea lelei i tatou lava, o tatou tuinanau, ma o tatou manaoga o le tamaoaiga. E maeu le faamanuiaina o se tasi o le e iloa ma aoao ia itiiti ifo mea e faaaluina pe faaaogaina nai lo mea e na te maua ma tuueseina se mea mo aso leaga”(tagai i le Conference Report, Oketopa 1979, 119; po o le Ensign, Novema 1979, 81).

Mafaufau e fetufaai atu le saunoaga lenei a Peresitene Gordon B. Hinckley, le Peresitene lona 15 o le Ekalesia:

“Ua oo mai le taimi e faatulagaina lelei ai o tatou aiga.

“Ua toatele naua o tatou tagata e faaaoga uma a latou tupe maua e ola ai. O le mea moni, o nisi o loo ola i tupe nono… .

“Ua ou popole i aitalafu o loo tulai mai e tatau ona toe totogi i vaega, lea o loo faamalumalu mai i luga o tagata o le atunuu, e aofia ai ma o tatou tagata… .

“Ou te uunaia outou … e tagatagai i tulaga o a tou mea tau tupe. Ou te uunaia outou e faautauta i a outou tupe faaalu, ia pulea lelei outou lava pe a faia a outou faatauga ina ia aloese mai le aitalafu i le mea e gata mai ai. Ia totogi uma aitalafu i se taimi vave e te mafaia, ma faasaoloto oe lava mai le nofo pologa” (Liahona, Ianuari 1999, 63–66).

O a auala e avea ai le nofo aitalafu ma mea e nofo pologa ai?
O a ni faiga ua fesoasoani ia te oe e te alu ese ai mai le nofo aitalafu pe aloese mai ai i le ola aitalafu? O a mea ua e faia e mafai ai ona sefe sina vaega itiiti o au tupe maua?

Ia iloa le eseesega o mea e manaomia moni ma mea e faananau i ai.

Fai atu i se tagata o le vasega e faitau le saunoaga lenei a Peresitene Tanner (itulau 32–33 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga):

“O le faaloloto ma le le lelei o le puleaina o tupe e tuu atu ai i luga o Fegalegaleaiga i le faaipoipoga ia ni avega mamafa. E foliga mai, o le tele lava o faafitauli i faaipoipoga, e mafua mai i le tamaoaiga—a le o le le lava o tupe maua e tausi ai le aiga po o le le puleaina lelei o tupe e maua mai” (i le Conference Report, Oketopa 1979, 119–20; po o le Ensign, Novema 1979, 81).

O a mea e mafai ona tatou faia ina ia iloa ai mea e manaomia ma mea e faananau i ai? Aisea e taua ai i tane ma ava ona faia faatasi lenei mea?

Ia fuafua ma ola e tusa ai ma se fuafuaga o mea tautupe.

Ia faamatala atu faapea, tusa lava pe o a risosi po o mea latou te maua, e tatau i ulugalii taitasi ona galulue faatasi e fuafua ma faia se paketi. O le paketi o se otootoga lea o tupe maua ma tupe faaalu fuafuaina mo se vaitaimi. E fesoasoani i aiga ina ia mautinoa ia aua ne’i sili atu a latou tupe faaalu i a latou tupe maua. E tatau i ulugalii ona talanoaina la laua paketi ao faatulagaina e i laua mea e manaomia, mea e le manaomia, ma a la sini o mea tautupe. Mo se faataitaiga, a maea ona fuafuaina a la tupe maua mo vaiaso e lua o loo sosoo ai, e mafai ona la faatulagaina pe fia se tupe o le a la faaaogaina i vaega eseese, e pei o le sefuluai ma isi foai a le Ekalesia, o faaputuga tupe, o meaai, ma le mokesi po o le totogiina o le nofo mautotogi i le fale. I le vaitaimi o vaiaso e lua, e faamaumauina uma e i laua a la tupe maua ma tupe faaalu. E fefautuaai faatasi i laua ao le’i faia ni faatauga tetele po o le faia o nisi mea e aafia ai le paketi ua la faatulagaina. Pe a mavae vaiaso e lua e mafai ona faatusatusaina e i laua le la tupe maua ma tupe faaalu i lona tulaga moni i le la paketi fuafuaina.

Ina ia fesoasoani i tagata o le vasega ia malamalama i le auala e faatulagaina ma faia ai se paketi, fai atu ia i latou e sue i le faataitaiga lenei o le paketi, o loo maua foi i le itulau 34 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga.

Paketi mai ia aso e oo ia aso

Tupe Maua	Fuafuaina	Aofaiga Tonu
Totogi pe a uma ona aveese lafoga
Isi tupe maua
Aofai o Tupe Maua
Tupe Fa’aalu	Fuafuaina	Aofaiga Tonu
Sefuluai
Isi foai i le Ekalesia
Tupe teu mo se vaitaimi umi
Tupe teu mo faalavelave faafuasei
Meaai
Mokesi po o le Lisi
Eletise, vai, kesi ma isi mea faapena
Fela’uaiga
Totogi o aitalafu
Inisiua
Totogi mo le fomai
Lavalava
Isi
Isi
Isi
Aofai o tupe fa’aalu

Ia valaaulia se tagata o le vasega e faitau le saunoaga lenei a Peresitene Tanner (itulau 30 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga):

“Ua ou maitauina i le faatalanoaina o le tele o tagata i le tele o tausaga e to’atele na’ua tagata e le faia se fuafuaga lelei o tupe ma ua le pulea lelei i latou lava ina ia tausisi i lea fuafuaga. E toatele tagata ua manatu o le i ai o se fuafuaga o mea tautupe e aveesea ai mai ia i latou le saolotoga. I se tasi itu, ua aoaoina e le tele o tagata faamanuiaina o se fuafuaga o mea tau tupe e maua ai le saolotoga tau le tamaoaiga” (i le Conference Report, Oketopa 1979, 121; po o le Ensign, Novema 1979, 82).

Ia faamaoni ia outou feutagaiga uma o mea tautupe.

Fai atu i se tagata o le vasega e faitau le saunoaga lenei a Peresitene Tanner (itulau 33–34 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga):

“O le uiga lelei o le amio sa’o e le mafai lava ona uma. E faatatau lea i mea uma tatou te faia. E tatau ona taulamua i tatou ona amio sa’o i le avea ai ma taitai ma tagata o le Ekalesia” (i le Conference Report, Oketopa 1979,121; poo le Ensign, Novema 1979, 82).

Aisea ua avea ai le faamaoni ma se vaega taua o a tatou feutagaiga uma o mea tau tupe? Aisea e taua ai le faamaoni i le va faaleulugalii i mea tau tupe a le aiga?

Faaiuga

Ia faamamafa atu faapea, e tatau i tane ma ava ona galulue faatasi e pulea a latou mea tau tupe. Fai atu i le vasega e mafaufau pe o lelei faapefea lo latou mulimuli i mataupu faavae na talanoaina i le lesona. Valaaulia i latou e faia ni fuafuaga e faaleleia ai le puleaina o a latou tupe.

Ia molimau atu i upumoni sa talanoaina i le gasologa o le lesona e pei ona uunaia ai e le Agaga.

Ia faatatau atu i itulau 30–34 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga. Ia uunaia tagata o le vasega e iloilo aoaoga faavae ma mataupu faavae o loo i le lesona lenei e ala i le (1) mulimuli i se fautuaga e tasi pe sili atu foi o loo i le “Auala Mo Le Faatinoga” ma le (2) faitauina o le ”Tumau i le Faatuatua e Ui Lava i Suiga,” na saunia e Peresitene N. Eldon Tanner. Faamatala atu e mafai ona matua aoga tele i ulugalii le faitauina ma talanoaina faatasi tala o loo i le taiala suesue.

O Isi Mea e Maua ai le Fesoasoani

Iloiloga o lesona o loo i le vaega A o le vasega O le Faaipoipoga ma Fegalegaleaiga Faaleaiga

O le lesona lenei e faaiuina ai le vaega A o le vasega O le Faaipoipoga ma Fegalegaleaiga Faaleaiga. Afai o loo e aoaoina atu le vasega atoa, ia mafaufau e faaaoga le faatinoga lenei:

Tuu atu i tagata taitasi o le vasega se fasi pepa ma se peni po o se penitala. Fai atu i tagata o le vasega e faaalu ni minute se tolu e lisiina ai i lalo aoaoga faavae ma mataupu faavae o loo manatua e i latou mai lesona muamua e valu o lenei aoaoga. Fai atu ia i latou e vase lalo o aoaoga faavae ma mataupu faavae ua pito sili ona aoga ia i latou. Ia uunaia i latou ia saunia e talanoa e uiga i nisi o mea o loo latou vaseina. Afai e manaomia e i latou le fesoasoani, faaaoga le faasino mataupu o loo i itulau v–viii i le tusi lesona lenei po o le aotelega o le aoaoga o loo i itulau vii– viii i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga.

A mavae minute e tolu, fai atu i tagata taitasi o le vasega e faitau se mea se tasi mai lana lisi ma faamatala pe aisea ua taua ai ia te ia. Ia aoteleina manatu o tagata o le vasega i luga o le laupapa, ma faailoa atu le taua o tali taitasi. Ona fetufaai atu lea o sou lava manatu. A lava le taimi, ia toe faia le faatinoga lenei.