Lesona 5

O le Tali Atu i Luitau e Ala i Fesootaiga Lelei

Faamoemoega

Ina ia aoao atu i tagata o le vasega le ala e taofia ma foia ai faafitauli i mafutaga faaleulugalii e ala i fesootaiga alofa.

Sauniuniga

1. Ao e saunia oe lava e aoao atu, vaavaai mo auala e mulimuli ai i mataupu faavae o loo i lalo o le “O Ou Tiutetauave o se Faiaoga” itulau x–xiii i totonu o le tusi lesona lenei.

2. Mafaufau loloto i aoaoga ma mataupu faavae o loo otootoina atu i autu o loo matamata tetele atu le tusiga. Ia mafaufau i le gasologa o le vaiaso e uiga i ni auala e aoao atu ai nei aoaoga ma mataupu faavae. Saili le taitaiga a le Agaga i le filifilia o mea e tatau ona e faamamafaina e faafetaiaia ai manaoga o tagata o le vasega.

Faalautelega Fautuaina o le Lesona

E oo i ulugalii uma ua faaipoipoina ni nai eseesega o manatu.

Fai atu i tagata o le vasega e faitau le saunoaga lenei a Elder Joe J. Christensen o le Au Fitugafulu (itulau 19 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga):

“E i ai nisi taimi tatou te faalogo atu ai i se mea e pei o le, ‘Aisea, ua limasefulu tausaga talu ona ta faaipoipo, ma e le’i i ai lava se eseesega o manatu.’ Afai o le tulaga moni lena, o lona uiga o se tasi o le ulugalii ua pulea faamalosi e le isi po o le, e fou ia te ia le mea ua tupu. Soo se ulugalii atamamai e i ai lava se taimi e feeseeseai ai. O lo tatou lu’i o le mautinoa lea ua tatou iloa le auala e foia ai. O le vaega lena o mea e fai mo le avea o se faaipoipoga ia sili atu ona lelei” (Liahona, Iulai 1995, 70–72).

Faamatala atu o loo talanoaina i le lesona lenei ia ni mataupu faavae patino e mafai ona fesoasoani ai i se tane ma se ava e taofia ma foia ai faafitauli i le la mafutaga.

E tatau i tane ma ava ona saili mo uiga lelei ma le moomia o loo i ai i le isi.

Ia faamatala atu faapea, pe a vaavaai tane ma ava mo uiga lelei o le isi o i laua, e mafai atili ai e i laua ona foia faafitauli. E mafai foi e i laua ona galulue faatasi e foia faafitauli e tulai mai. Ia fetufaai atu le tala lenei:

Sa alu atu faalua se tasi tamaitai i lona epikopo e faaalia ona faanoanoaga e uiga i lana tane. I le taimi mulimuli na fesili atu ai le epikopo ia te ia, “Aisea na e faaipoipo ai i lenei alii ua e manatu e le ano mai ma e le mafai ona e onosaia?” Na mafaufau le tamaitai mo sina taimi ma faapea atu, “Oi, ou te manatu sa i ai ni ona uiga lelei, ae ua ou le manatuaina. Atonu ua suia o ia.” Na faapea atu le epikopo ia te ia e alu i le fale ma tatalo ina ia faamaluluina lona loto ina ia amata ai ona ia manatua uiga na ia maitauina muamua i lana tane. Na ia iloaina i le aluga o aso, na mafai e ia ona iloa ma taulai atu i uiga lelei ma matagofie o lana tane. I le taimi muamua, sa matua matele ina tilotilo o ia i ona sese ma ua ia le vaaia ai uiga lelei o lana tane.

• O a auala ua e vaaia ai le taua ma le aoga o le vaavaai mo uiga lelei ma le matagofie i isi? E mafai faapefea ona fesoasoani i tane ma ava le vaavaai mo uiga lelei ma le matagofie o le isi ona faamalosia ai le la faaipoipoga?

Ia faamanatu atu i tagata o le vasega faapea, e ui ina tulaga ese tagata uma taitoatasi, o i tatou uma o fanau a le Atua. Ia valaaulia se tagata o le vasega e faitau le faamatalaga lenei mai le “O le Aiga: O se Folafolaga i le Lalolagi (itulau ix i le tusi lesona lenei ma le itulau iv i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga):

“O tagata soifua uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine faaleagaga faapelepele a ni matua faalelagi ma, o lea ua tofu ai i latou taitoatasi ma se natura ma se taunuuga paia.”

• E mafai faapefea ona fesoasoani i tane ma ava le manatuaina o lenei mea moni i a latou taumafaiga e malamalama ai le tasi i le isi?

  Ia faamatala atu faapea, ao saili tane ma ava ina ia vaavaai i mea uma e matagofie ma paia o loo i ai i le isi, e maua atili e i laua le olioli i le faaaumeaga a le tasi ma mafai atili ai ona fesoasoani le tasi i le isi e faataunuu o la tulaga paia.

  A o galue i le Korama a Aposetolo e Toasefululua, na saunoa Elder Gordon B. Hinckley “i le ituaiga o faaaloalo e tatau ona tuuina atu i lau soa o se uo pito sili ona faapelepele i le lalolagi.” Na faapea mai o ia: “O le fegalegaleaiga faaleulugalii e mafuli atu ina avea ma mea masani ma oo ai ina le malie. Ou te le iloa se isi auala e sili atu ona mautinoa e tausisia ai le tulaga aloaia ma le uunaia nai lo se alii e taulai atu pea i le mea moni o le ua tuuina atu e fai ma ona fesoasoani i ona autafa o se afafine o le Atua, ua galulue faatasi ma le [Atua] i le tulaga sili o le foafoaga o le faataunuuina o Ana faamoemoega e faavavau. Ou te le iloa se isi auala e sili atu ona aoga mo se tamaitai e faatumauina le susulu o le alofa mo lana tane nai lo lona faatauaina ma vaavaai mo uiga lelei faaleatua lea o loo avea ma se vaega o atalii taitasi uma o le Tama ma e mafai ona faatumauina pe a i ai le faaaloalo ma le agaga talisapaia ma le uunaiga. O le faataunuuina o ia lava tulaga o le a atiaeina ai pea lava pea le tauia o le loto faafetai o le tasi i le isi” (i le Conference Report, Aperila 1971, 81–82; po o le Ensign, Iuni 1971, 71–72).

O fesootaiga lelei e fesoasoani lea i le puipuia ma le foiaina o faigata.

Ia faamatala atu faapea, e faaopoopo atu i le iloaina o uiga lelei o le tasi, e tatau i tane ma ava ona fesootai lelei le tasi i le isi. E taua fesootaiga i le fausiaina o le alofa ma le lotogatasi ma le foiaina o faafitauli e ono tulai mai.

Tusi mataupu faavae nei i luga o le laupapa:

Faalogo atu le tasi i le isi.

Ia tatala le talanoaina o luitau ma le toafilemu.

Fesootai i auala lelei ma alofa.

Ia faamatala atu faapea, e mafai ona fesoasoani nei mataupu faavae i ulugalii e faaleleia ai a latou fesootaiga. Faaaoga mea nei e faia ai se talanoaga e uiga i mataupu faavae taitasi:

Faalogo le tasi i le isi.

Fetufaai atu le apoapoaiga lenei mai ia Elder Russell M. Nelson o le Korama a Aposetolo e Toasefululua:

“Ia aoao tane ma ava ina ia faalogo, ma faalogo ina ia aoao mai le tasi i le isi… .O le faaavanoaina o taimi e talanoa ai e taua ina ia tausisia ai le vavalalata o laina o fesootaiga. Afai o le faaipoipoga o se Fegalegaleaiga autu o le olaga, e tatau ona tuuina atu i ai le faamuamua! Ae peitai, e masani ona tuuina atu le faamuamua i mea e sili atu ona itiiti le taua, ae o taimi o loo totoe mai ai ua faalogo atu ai i taitoalua faapelepele” (i le Conference Report, Ape. 1991, 28; po o le Ensign, Me 1991, 23).

• O a mea lelei e mafai ona oo mai i se tane ma le ava pe a faalogo ma le faaeteete ma le alofa ia le tasi i le isi? (E ono aofia ai tali na o loo lisiina i lalo.)

  1. E aoao atili i laua e uiga i lagona moni ma uunaiga a le tasi i le isi.

  2. E saili i laua ina ia femalamalamaa’i ao le’i faia ni faaiuga pe tuuina atu fautuaga.

  3. E oo i tagata taitasi le lagona faatauaina ma le alofagiaina.

  4. E oo i tagata taitasi le faaitiitia o le lagona maitaita ma o le a mananao e fesootai ma le loto femalamalamaai.

• O a mea e mafai ona faalavelave i ulugalii mai le matua faalogo lelei o le tasi i le isi? (O tali e ono aofia ai le pisi o fuafuaga, o le le faaavanoaina o taimi e faalogo ai, ma le le amanaiaina o tiutetauave a le isi.)

• O a mea e mafai ona faia e ulugalii faaipoipo ina ia avea ai ma tagata faalogo lelei? (E faaopoopo atu i le sailia o manatu o tagata o le vasega, mafaufau e fetufaai atu mea na o loo lisiina i lalo.)

  1. Ia faaavanoa taimi e talanoa faatasi ai. Ia aveese mea e fai ma faalavelave, ma tuu atu atoa le mafaufau o le tasi i le isi.

  2. Faalogo ina ia malamalama. Aua le faalavelave i le tagata o loo tautala. Afai e talafeagai, fai atu fesili e pei o le “E mafai ona e tauina mai nisi mea e uiga i lena mea?” po o le “Ou te manatu ou te le o malamalama. Po o le uiga ea o lau tala e… ?”

  3. Aloese mai le ita po o le le fiafia. Manatua o le tele lava o tulaga, e sili atu ma le tasi ia manatu e mafai ona sa’o.

Ia tatala le talanoaina o luitau ma le toafilemu.

• Aisea e taua ai le tatala o le talanoa o le ulugalii e uiga i luitau o loo la feagai i la la’ua mafutaga?

Ia faamatala atu faapea, o talanoaga e uiga i luitau e tatau ona faia i se auala faaaloalo, e aunoa ma ni fefinauaiga leotetele po o le feupuai. Ao galue i le Korama a Aposetolo e Toasefululua, na aoao mai Elder Gordon B. Hinckley:

“E seasea ona tatou oo i ni faafitauli pe a tatou tautatala ma le leo lemu. Seiloga lava ua siisii i luga o tatou leo ona oo mai ai lea o fefinauaiga ma ua avea ai ni fefinauaiga faatauvaa ma ni fefinauaiga tetele… . O le leo o le lagi e tumau pea o le leo itiiti ma le filemu; e faapena foi le leo o le filemu i le aiga o le leo filemu lea” (i le Conference Report, Aperila 1971, 82; po o le Ensign, Iuni 1971, 72).

Na saunoa mai Peresitene Tavita O Makei, “ia aua lava ne’i talanoa le tane ma le ava i ni leo avaavau, se’i vagana ua mu le fale’” (Stepping Stones to Abundant Life, tuufaatasia e Lewelyn R. Mckay [1971], 294).

Fesootai i auala lelei ma alofa.

• O a auala e aafia ai se mafutaga faaleulugalii i le faaalia o le loto faafetai, felagolagomai, ma le lagona felata’i? E faapefea ona aafia se mafutaga faaleulugalii i fesootaiga le lelei—e pei o le faitio, o le oteote, ma le vaavaai masei?

  Fai atu i tagata e mulimuli i apoapoaiga nei mai ia Elder Joe J. Christensen (itulau 19 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga):

  “Aloese i le ‘sailiili masei e le aunoa.’ Aua le soona sailiili pona le tasi i le tasi. Ia e iloa e leai se tasi o i tatou e atoatoa. E tau fai umi uma lava le auala tatou te savavali ai ia avea faapei o Keriso e pei ona uunaiina ai i tatou e o tatou taitai.

  “ O le ‘sailiili masei e le aunoa,’ e pei ona taua ai e Peresitene Spencer W. Kimball, e mafai ona faavaivaia ai e toetoe lava o soo se faaipoipoga. I le aoao lava, o loo iloa e i tatou taitoatasi ma le tiga o tatou vaivaiga, ma e tatou te le mananao e faamanatu mai. E toaitiiti tagata ua suia mo le lelei o se iuga o le sailiili aleu e le aunoa po o le faitio. Afai tatou te le faaeteete, o nisi o faitioga tatou te faia e atinae ai, e avea moni ma faitioga e lepetia ai” (Liahona, Iulai 1995, 70–72; tagai foi i le Spencer W. Kimball, “Marriage and Divorce,” 1976 Devotional Speeches of the Year [1977], 148).

• O a ni taunuuga e mafai ona oo mai ona o ni faitioga faifai pea?

• O se tasi ituaiga o faitioga o le faatusatusa lea o vaivaiga o se tagata i malosiaga po o itu e lelei ai isi. E mafai faapefea ona aafia ai se faaipoipoga i lea faiga?

• O a ni mea ua e oo i ai e faaalia ai le taua ma le aoga o le faaviivii ma le faamalosiau atu i isi nai lo le faitioina pea lava pea o i latou? O a auala e mafai ona faamalolosia ai faaipoipoga i uiga ma amioga lelei?

  Na faamatalaina e se tasi tamaitai e masani ona faaviiviiina o ia e lana tane i ana taleni i le avea ai ma se ava ma se tausiaiga, e le gata pe a i ai i laua i le aiga, ae pe a faatasi foi i laua ma uo. E le ta’ua lava e ia ona vaivaiga. Ae ua filifili o ia e taulai atu i ona malosiaga po o itu e lelei ai o ia. Na faapea mai e aumaia e ana faamatalaga ia te ia le faamoemoe ma le uunaiga e faaleleia ai.

Faaiuga

Ia fetufaai atu le apoapoaiga lenei mai ia Elder Marvin J. Ashton o le Korama a Aposetolo e Toasefululua:

“I talanoaga faaleaiga, e le tatau ona le amanaiaina feeseeseaiga, ae e tatau ona silasila totoa i ai ma iloiloina ma le filemu. O le manatu po o le taofi o le tasi e le taua atu nai lo se mafutaga e sologa lelei pea lava pea. O le ava ma le faaaloalo e faalogo ai ma tali atu i taimi o talanoaga o ni mea autu ia i se talanoaga lelei. …E matua taua le iloa ona tali atu e le auai ai ou manatu e aunoa ma le teenaina o ou manatu” (i le Conference Report, Aperila 1976, 79; po o le Ensign, Me 1976, 52).

Ia iloiloina faapuupuu mataupu faavae na outou talanoaina. Ia uunaia tagata o le vasega e faaaoga nei mataupu faavae i o latou olaga. Ia tuuina atu lau molimau e pei ona uunaia ai e le Agaga.

Ia faatatau atu i itulau 19–22 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga. Ia uunaia tagata o le vasega e iloilo aoaoga faavae ma mataupu faavae o loo i totonu o le lesona lenei e ala i le (1) mulimuli i se fautuaga e tasi pe sili atu foi o loo i le “Auala Mo Le Faatinoga” ma le (2) faitauina o le tala o le “Faaipoipoga ma le Fuafuaga Sili o le Fiafia” na saunia e Elder Joe J. Christensen. Faamamafa atu e mafai ona matua aoga tele i ulugalii le faitauina ma talanoaina faatasi tala o loo i le taiala suesue.