Lesona 11

O Matafaioi Paia a Tama ma Tina

Vaega 2: Matafaioi a Tina

Faamoemoega

Ina ia fesoasoani i tagata o le vasega ia malamalama i le auala e faataunuuina ai e tina a latou matafaioi paia ma le auala e fesoasoaniai ai tina ma tama o le tasi i le isi o ni paaga tutusa.

Sauniuniga

Iloilo mataupu faavae o loo i lalo o le “O Ou Tiutetauave o se Faiaoga” itulau x–xiii i lenei tusi lesona. Vaavaai mo ala e faaaoga ai mataupu faavae nei i au sauniuniga e aoao atu ai.
Mafaufau loloto i aoaoga ma mataupu faavae o loo otootoina atu i autu o loo matamata tetele atu le tusiga. Ia mafaufau i le gasologa o le vaiaso e uiga i ni auala e aoao atu ai nei aoaoga ma mataupu faavae. Saili le taitaiga a le Agaga i le filifilia o mea e tatau ona e faamamafaina e faafetaiaia ai manaoga o tagata o le vasega.
Faamanatu atu i tagata o le vasega e aumai a latou kopi o le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga i le vasega.

Faalautelega Fautuaina o le Lesona

E auai tina i le galuega a le Atua.

Ia faitau faatasi ma tagata o le vasega le manatu lenei mai se lauga a Elder Jeffrey R. Holland o le Korama a Aposetolo e Toasefululua e avea ma se faatomuaga i lenei lesona (itulau 49 i totonu o le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga ):

“O se tasi tina talavou sa tusi mai ia te au e faapea o lona popolega e auala mai i ni vaega se tolu. Muamua, soo se taimi lava e faalogo ai i tautalaga e faatatau i le avea ai ma tina i le Au Paia o Aso e Gata Ai, na te lagonaina ai lava le popole ona e le’i taitai lava ona latalata atu ia i le tulaga e tatau ona faataunuuina ai le galuega. Lona lua, na te lagonaina lava o loo faamoemoe mai le lalolagi ia te ia na te aoaoina lana fanau ina ia iloa ona faitau, tusitusi, tusiata, faaLatina, numera, ma le Initoneti—a o le’i tauina mai e le pepe se upu e masani ai e pei o le ‘ta, ta.’ Lona tolu, e masani lava ona ia lagona o nisi taimi e taufaalata ai tagata ia te ia, e toetoe lava a leai ma se uiga, aua o fautuaga na te mauaina po o faamatalaga faamalo na te mauaina e foliga mai e atagia mai ai le le tutusa ma le mea o loo i le mafaufau, o taumafaiga faaleagaga ma lagona, o po uumi, o aso uumi, o manaoga e le gata lea e manaomia ai i nisi taimi ina ia taumafai e avea ma manao ia avea ma tina e faamoemoe le Atua ina ia oo i ai.

“Ae o le mea e tasi, na ia fai mai ai, o loo alualu ai pea ia i luma: “E ui i le faigata ma le faigofie o lenei mea, ma loimata i taimi uma, ou te iloa ma lo’u loto atoa o loo ou faia le galuega a le Atua. Ou te iloa i le avea ai o a’u ma se tina o loo ou i ai lea i se Fegalegaleaiga e faavavau ma Ia. Ua matuai faagaeetia lava au ina ua mauaina e le Atua lona faamoemoega silisili ma le uiga o le avea ma se matua, e tusa lava pe afai o loo tutulu o Ia ona o nisi o Ana fanau.

“‘I le iloaina la o lenei mea,’ o lana tala mai lea, ‘o lea na ou taumafai ai e toe manatunatu i aso faigata e le mafai ona teenaina, lea e mafai ai ona lofituina ai. Atonu e sao lava o lo tatou le mafaia ma le popole lea e uunaiina ai i tatou ina ia tatou aapa atu ia te Ia ma faalauteleina Lona mafai ina ia toe aapa mai ia i tatou. Atonu o loo faalilolilo lona faamoemoe o le a tatou popole,’ o lana tala lea, ‘ma o le a ole atu mo Lana fesoasoani. Ona ou talitonu ai lea, e mafai ona Ia aoaoina sao nei fanau, e ala mai ia i tatou, e aunoa ma le teenaina. Ou te fiafia tele i lena manatu,’ sa ia faaiuina ai. ‘Ou te maua ai le faamoemoe. Afai ou te mafai ona tonu i luma o lou Tama oi le Lagi, atonu o le a le mafai ona faalavelavea lana taitaiga i a tatou fanau. Atonu o le a mafai ai ona avea ma Lana galuega ma Lona mamalu i lona uiga moni lava’ ” (i le Conference Report, Ape. 1997, 47; po o le Liahona, Iulai 1997, 41).

Ia valaaulia i latou o loo e aoaoina ina ia fetufaai atu o latou lagona e uiga i le auala o loo auai ai tina i le galuega a le Atua.

O le uluai matafaioi a tina o le faafaileleina lea o a latou fanau.

Tuu atu i tagata o le vasega e sue i le itulau e iv i totonu Taiala Suesue a le Tagata o le Vasega O le Faaipoipoga ma Fegalegaleaiga Faaleaiga. Ia faasino i latou i le saunoaga lenei o loo i le parakalafa lona fitu o le folafolaga i le aiga: ”O le uluai matafaoi a tina o le faafaileleina lea o a latou fanau.“

O a ni auala o loo faafaileleina ai e tina a latou fanau? (Ia valaaulia tagata o le vasega e fetufaai atu ni mea na latou oo i ai e faaalia ai aafiaga o tina mo le lelei. Ona fetufaai atu lea o faamatalaga nei.)

Na saunoa mai ia Elder Richard G. Scott o le Korama a Aposetolo e Toasefululua e faapea: “O le avea ma se tina e taitaiina e le Alii, ua e lalagaina ai se ie o uiga lelei i lau fanau ma filo o le upumoni, e ala i faatonuga e faia ma le faaeteete ma faataitaiga lelei. E te totoina uiga o le faamaoni, faatuatua i le Atua, tiute, faaaloalo mo isi, agalelei, o lou mautinoa, le naunau e tuuina atu, ia aoao, ia foai atu, i mafaufau ma loto o lau fanau faatuatuaina. E leai se nofoaga e vaaia ai e isi tagata ia fanau a isi tagata e mafai ona faia lena mea. O lau lava aia tatau ma le matafaioi paia lena” (Liahona, Ian. 1997, 89).

Na faaalia e Peresitene Boyd K. Packer, le Sui Peresitene o le Korama a Aposetolo e Toasefululua,“E leai lava se aoaoga e tutusa, pe sili atu ona faamanuiaina faaleagaga, pe sili atu foi ona faaeaina nai lo se tina e aoaoina lana fanau” (“Aoao Atu i Tamaiti,” Liahona, Me 2000, 22).

Ina ia fetufaai atu nisi manatu e uiga i auala e mafai ai e tina ona faafaileleina a latou fanau, ia fai i tagata o le vasega e sue i le itulau e 51–53 i totonu o le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga . Fai i ai e vaai ia fautuaga e 10 a Peresitene Ezra Taft Benson i mea e mafai e tina ona fai ina ia faaaluina ai lona taimi aoga faatasi ma a latou fanau. A o sailia e tagata o le vasega ia nei fautuaga, ia lisiina i luga o le laupapa e pei ona faaalia i lalo. Ia talanoaina ia faamanuiaga o fautuaga taitasi.

Ia faaavanoa oe lava i le olaga atoa o lau tama.
Ia avea ma uo moni.
Faitau atu tusi i lau fanau.
Tatalo faatasi ma lau fanau.
Ia faia afiafi faaleaiga i vaiaso taitasi.
Ia faatasitasi i taimi o taumafataga.
Faitau tusitusiga paia i aso taitasi.
Ia faia faatasi mea i le tulaga o se aiga.
Aoao atu i lau fanau.
Ia alofa faamaoni i lau fanau.

Ia faailoa atu faapea na faamamafaina e perofeta o aso e gata ai le taua o le nonofo o tina i le fale faatasi ma a latou fanau nai lo le o atu e faigaluega. Ia fetufaai atu le saunoaga lenei mai ia Peresitene Gordon B. Hinckley, le Peresitene lona 15 o le Ekalesia:

“E i ai ni tamaitai (e moni ua faateleina atili) ua tatau ona galulue mo mea ua manaomia e o latou aiga. Ia te outou na ou te faapea atu, fai le mea sili tou te mafaia. Ou te faamoemoe a faapea ua e galue i le aso atoa, ua e faia lena mea ina ia maua ai e lou aiga mea faavae latou te manaomia, ae le mo se fale taugata, taavale taugata, po o nisi mea ua tuinanau i ai. O le galuega silisili e faia e soo se tina, o le tausia, ma le aoaoina, siitiaina, faamalosiauina, ma le aoaiina lea o lana fanau i le amiotonu ma le upumoni. E leai se tasi e mafai ona suitulaga lelei ia te ia” (Liahona, Ian. 1997, 82).

O a ni osigataulaga e moomia ona fai e aiga ina ia mulimuli ai i lenei fautuaga?

A o e faaiuina lenei vaega o le lesona, ia fetufaai atu se tasi o faamatalaga nei po o faamatalaga uma foi:

A o auauna atu e avea o se Fesoasoani Muamua i le Au Peresitene Sili, na saunoa ai ia Peresitene Gordon B. Hinckley: “Ou te faamanatu atu i tina i soo se mea le paia o lo outou valaauga. E leai se isi lava e mafai ona ia tauaveina lelei lou tulaga. E leai se matafaioi ua sili atu, leai se tiute ua taua atu, nai lo lou tausi i le alofa ma le filemu ma le faamaoni o i latou o e ua e aumaia i le lalolagi” (Liahona, Ian. 1994, 69).

I se saunoaga i tina, na saunoa atu ai Elder Jeffrey R. Holland: “O outou o se faataitaiga aoao o Eva, le tina o tagata ola uma, o le na malamalama o ia ma Atamu e ao ona pauu ‘ina ia i ai tane [ma fafine]’ [2 Nifae 2:25] ma ia i ai le fiafia. O outou o se faataitaiga aoao o Sara ma Repeka ma Rasela, ana le seanoa i latou semanu e leai ni folafolaga faapeteriaka matagofie na tuuina atu ia Aperaamo, Isaako, ma Iakopo lea ua faamanuiaina ai i tatou uma. O outou o se faataitaiga aoao o Loi ma Eunike [tagai 2 Timoteo 1:5] ma tina o le autau talavou e 2,000. O outou o se faataitaiga aoao o Maria, lea na filifilia ma muai faauuina talu mai le amataga o lenei lalolagi na te mauaina, ma tauaveina, ma fanauina le Alo o le Atua lava Ia. Matou te faafetai ia te outou uma, e aofia ai o matou lava tina, ma tau atu ia te outou e leai se isi mea i le lalolagi e sili atu lona taua nai lo le auai tonu i le galuega ma le mamalu o le Atua, i le faataunuuina lea o le tino ma le ola i Ona afafine ma atalii, ina ia mafai ona oo mai le tino ola pea ma le ola e faavavau i na mamalu faaselesitila i luga” (Liahona, Iulai 1997, 42; tagai foi i itulau 50 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga).

E ao i tama ma tina ona fesoasoani le tasi i le isi o ni paaga tutusa.

Faaaliga: Afai o loo e aoaoina atu na o le lesona lenei ae le aoaoina le lesona e 10, ia mafaufau i le amataina o lenei vaega o le lesona i le saunoaga lenei mai ia Peresitene Boyd K. Packer o loo i le itulau e 54 o le tusi lesona lenei.

Faasino atu tagata o le vasega i le faamatalaga lenei o loo i le folafolaga i le aiga: “I o [la’ua] matafaioi paia, e ao i tama ma tina ona fesoasoani le tasi i le isi o se paaga tutusa.”

O le a le uiga o le paaga tutusa o se tane ma se ava i o laua tiutetauave?

Ia faamanino atu faapea o tane ma ava e galulue faatasi o ni paaga tutusa e lotogatasi foi i a latou taumafaiga. O le a lagolagoina e le tasi le isi ma taulai atu i malosiaga ma taleni a le isi. E mafai e ulugalii faaipoipo ona mauaina le taitaiga a le Alii i le fuafuaina pe faapefea ona lagolagoina e le tasi le isi i o latou tiutetauave. E mafai ona latou faia ia faaiuga e faavae i mataupu faalelagi na faaalia mai ma malosiaga ma mea e mafaia e le isi paaga.
O le a se mea e mafai e se tane ona fai e lagolagoina ai lana ava i ona tiutetauave ina ia tausia ai le fanau?
O le a se mea e mafai e se ava ona fai ina ia lagolagoina ai lana tane i ona tiutetauave e pulefaamalumalu ma tuuina atu ai mea mo le aiga?
O a faataitaiga ua e vaaia i tane ma ava o lagolagoina ai le isi i le tausiga ma le aoaoga o a latou fanau?

Faaiuga

Faitau faatasi ma tagata o le vasega le Mataupu Faavae ma Feagaiga 64:33–34.

E faapefea ona faatatau lenei mau i tiutetauave o tama ma tina?

Ia faamamafa atu faapea o loo faataatia moni lava e tina ma tama “le faavae o se galuega tele.” O galuega i aso uma o le tausiga o fanau e mafai ona vaaia i nisi taimi e foliga mai e laitiiti ma faaletaua, ae “o mea iti e tupu mai ai mea tetele.” A o galulue faatasi tama ma tina i le faataunuuina o o latou tiutetauave paia, o le a faapea ona mauaina e o latou aiga ia faamanuiaga silisili mai le Alii.

Ia fetufaai atu ou talitonuga i upumoni na talanoaina i le lesona e pei ona musuia ai e le Agaga.

Faasino atu i itulau 48–50 i totonu O le Faaipoipoga ma Fegalegaleaiga Faaleaiga Taiala mo Suesuega a le Tagata o le Vasega. Ia uunaiina tagata o le vasega ina ia iloiloina ia aoaoga ma mataupu faavae o loo i lenei lesona e ala lea i le (1) mulimuli ia le itiiti ifo ma le tasi o fautuaga o loo i totonu o le “Manatu mo le Faatinoga” ma le (2) faitauina o tala “Aua o Ia o se Tina,” mai ia Elder Jeffrey R. Holland, ma le “I Tina o Siona,” mai ia Peresitene Ezra Taft Benson. Ia faamamafa atu faapea e mafai e ulugalii ua faaipoipo ona mauaina ia faamanuiaga silisili mai le faitauina ma le talanoaina faatasi o tala i totonu o le taiala suesue.