Lesona 13

O le Aoaoina Atu o Mataupu Faavae o le Talalelei i Fanau

Vaega 1

Faamoemoega

Ina ia fesoasoani i tagata o le vasega e faateleina lo latou naunau ma le mafaia ona aoaoina fanau e uiga i mataupu faavae ma sauniga o le talalelei.

Sauniuniga

Iloilo mataupu faavae o loo i lalo o le “O Ou Tiutetauave o se Faiaoga” itulau x–xiii i lenei tusi lesona. Vaavaai mo ala e faaaoga ai mataupu faavae nei i au sauniuniga e aoao atu.
Mafaufau loloto i aoaoga ma mataupu faavae o loo otootoina atu i autu o loo matamata tetele atu le tusiga. Ia mafaufau i le gasologa o le vaiaso e uiga i ni auala e aoao atu ai nei aoaoga ma mataupu faavae. Saili le taitaiga a le Agaga i le filifilia o mea e tatau ona e faamamafaina e faafetaiaia ai manaoga o tagata o le vasega.

Faalautelega Fautuaina o le Lesona

O aoaoga a matua e mafai ona fesoasoani i fanau ina ia tumau ai le malosi i le faatuatuaga.

Tusi ata nei i luga o le laupapa:

Ata

two trees

O le a se mea o loo faatusa i ai nei ata? O le a se mea o loo aoao mai e ata e uiga i le tausiga o fanau?

Afai e faafaigata i tagata o le vasega ona taliina ia nei fesili, ia faamanatu atu ia i latou le tala a Peresitene Hinckley e uiga i le totoina o se laau, mai le lesona 12. (Afai o loo e aoaoina atu na o le lesona lenei ae le aoaoina atu le lesona e 12, ia fetufaai atu le tala o loo i le itulau e 64 ae tou te le’i talanoaina ia ata o loo i luga o le laupapa.)

O le laau o loo i le itu tauagavale e faatusa lea i se tamaitiiti ua alu ese mai le talalelei aua e le’i aoaoina o ia e ona matua e ola i le talalelei i totonu o le aiga. O le laau o loo i le itu taumatau e faatusa lea i se tamaitiiti o loo aoaoina le talalelei ona o faataitaiga ma upu a matua. Afai e agi mai matagi malolosi, o se tamai laau o loo nonoaina i se manoa o le a tupu sa’o. E faapea foi ona tutumau ia fanau ma malolosi i le faatuatuaga pe afai e aoaoina atu e o latou matua ia te i latou ia mataupu faavae faigofie o le talalelei.

Faitau faatasi ma tagata o le vasega le Mataupu Faavae ma Feagaiga 68:25–28.

E tusa ai ma le mau, o le a le mea o loo moomia mai e le Alii e ao i matua ona aoao atu i a latou fanau? (Ia lisi tali a tagata o le vasega i luga o le laupapa e pei ona faaalia atu i lalo.)

Faatuatua ia Iesu Keriso

Salamo

Papatisoga

Mauaina le meaalofa o le Agaga Paia

Tatalo

Savavali tonu i luma o le Alii
Aisea e taua ai ona aoao atu e matua nei mataupu faavae ma sauniga i a latou fanau a o laiti le fanau?

A o avea ma se Epikopo Pulefaamalumalu, sa faamatalaina mai ai e Epikopo Robert D. Hales e faapea: “O fanau e aoaoina ia tatalo ma tatalo faatasi ma o latou matua a o iti i latou, o le a mafai ona tatalo pe a matutua. O i latou na aoaoina a o iti ia alolofa i le Atua, ma talitonu o loo soifua o Ia, o le a faaauau pea lo latou faatupuina faaleagaga, ma faateleina o latou lagona o le alofa, a o faasolo ina matutua” (Liahona, Ian. 1994, 10).

E tatau i matua ona aoao a latou fanau ia uluai mataupu faavae ma sauniga o le talalelei.

Ia faaaoga fesili nei e talanoaina ai auala e mafai e matua ona fesoasoani atu ai i a latou fanau i le faaaogaina o mataupu faavae o le faatuatua ma le salamo ma saunia ai ina ia papatisoina ma mauaina le meaalofa o le Agaga Paia. A o e taitaia le talanoaga, ia uunaia tagata o le vasega ina ia fetufaai atu ni faataitaiga mai o latou lava olaga.

Ina ia faatinoina le faatuatua ia Iesu Keriso, e tatau ona i ai so tatou malamalama sao i Lona tagata ma uiga. O le a se mea e mafai e matua ona fai ina ia fesoasoani ai i a latou fanau ina ia malamalama i le ituaiga tagata e i ai le Faaola faapea ma Ona uiga?
Ia iloiloina faapuupuu ia tala i le faamaloloina e Iesu o le afafine o Iairo (Mareko 5:21–24, 35– 43) ma le tali atu a Nifae i le poloaiga ina ia alu atu ma aumai ia papatusi apamemea (1 Nifae 3:1–7). E mafai faapefea e nei tala faatusi paia ona fesoasoani i le fanau ina ia faatinoina le faatuatua ia Iesu Keriso?
E mafai faapefea e le fetufaai atu o mea na oo i ai o tatou olaga ona fesoasoani i le faatuatua o se tamaitiiti?

Ia faamanino atu faapea e moomia e matua ona sailia ia avanoa e aoao ai a latou fanau e faapea o le faatuatua e fesoasoani ia i tatou i luitau ma faigata o le olaga. Mo se faataitaiga, a faapea o loo maua e se tamaitiiti se taimi faigata i le aoga po o le va foi ma sana uo, e mafai e matua ona faitauina faatasi ma le tamaitiiti se mau, fesoasoani ia te ia ina ia tatalo mo le taitaiga ma le faamafanafanaga, ona fesoasoani lea i le tamaitiiti ina ia malamalama i le auala e tuuina mai ai e le Alii ia le fesoasoani.

A o taumafai matua e aoaoina fanau e uiga i le salamo, aisea e taua ai mo i latou le vaavaaia o ni taimi o le olaga i aso faisoo e aoao atu ai?

Ia faamatala atu faapea afai e vaaia e matua a latou fanau o loo faia ni faaiuga e le poto, e mafai ona latou fesili atu i a latou fanau po o a ni o latou lagona e uiga i faaiuga ae o le a foi se mea ese e mafai ona latou faia. E mafai ona latou faatagaina le fanau e faasa’oina ia mea sese, ma afai e moomia ai, ia faaali atu le faanoanoa i le Alii ma i latou na latou faaonoono pe sa faatiga i ai. E mafai foi e matua ona fesoasoani i a latou fanau ia iloaina le fiafia ma le filemu e oo mai i le salamo moni.
Ia iloiloina faapuupuu le liuaina o Alema le Itiiti (Mosaea 27; Alema 36) ma Aneti-Nifae-Liae (Alema 23). E mafai faapefea e nei tala faatusi paia ona fesoasoani i fanau ia faatauaina ia faamanuiaga o le salamo ma le faamagaloga?
Ia iloiloina le feagaiga o le papatisoga e ala lea i le faitauina o le Mosaea 18:8–10 ma le Mataupu Faavae ma Feagaiga 20:37 faatasi ma tagata o le vasega. E mafai faapefea e matua ona fesoasoani i a latou fanau ina ia saunia e osia ma tausia le feagaiga o le papatisoga?
O a ni auala e mafai ai e matua ona fesoasoani i a latou fanau ina ia tulimatai atu i le papatisoina ma le mauaina o le meaalofa o le Agaga Paia?

E tatau i matua ona “aoao atu a latou fanau ia tatalo, ma savavali tonu i luma o le Alii.”

Aisea e avea ai faataitaiga a matua ma faiaoga sili i le fesoasoani atu i fanau ina ia avea le tatalo ma se vaega e le aunoa o o latou olaga?
I le faaopoopo atu i le faia o se faataitaiga o le tatalo, o a nisi mataupu faavae e uiga i le tatalo e mafai e matua ona aoaoina atu i a latou fanau? (A o tali mai ia tagata o le vasega i lenei fesili, ia faitau ma talanoaina ia mau nei ma le upusii. Ia uunaiina tagata o le vasega e fetufaai atu ni mea na oo i ai e faatatau i nei aoaoga.
1. Iakopo 1:5–6 (O le a tuuina mai e le Atua ia i tatou le poto pe afai tatou te ole atu ia te Ia i le faatuatua.)
2. 2 Nifae 32:9 (E tatau ona tatou tatalo e le aunoa. Tatou te tatalo atu i le Tama i le suafa o Iesu Keriso.)
3. Alema 37:37 (Afai tatou te filifili ma le Alii i mea uma tatou te faia, o le a Ia taitaiina i tatou i mea lelei.)
4. 3 Nifae 18:19–21 (Afai tatou te tatalo atu i le Tama i le suafa o Iesu Keriso, o le a tatou mauaina mea tatou te ole atu ai pe afai e tonu. E tatau ona tatou tatalo i totonu o o tatou aiga.)
5. Mataupu Faavae ma Feagaiga 112:10 (Afai tatou te lotomaualalo, o le a taliina mai e le Alii a tatou tatalo.)
Na saunoa ia Elder Dallin H. Oaks o le Korama a Aposetolo e Toasefululua e uiga i le taua o le faaaogaina o le “gagana o le tatalo.“ E aofia ai le faaaogaina o upu e pei o le Afio, Afioga, e suitulaga i le oe ma le lou. Na ia saunoa mai faapea e mafai e fanau ona aoaoina lenei gagana mai o latou matua:

“Tatou te aoaoina la tatou gagana i le faalogo atu ia te i latou o loo tautatala ai. E faapea foi ona moni lea tulaga i le gagana lea tatou te tautala atu ai i lo tatou Tama Faalelagi. O le gagana o le tatalo e faigofie ma suamalie e aoaoina nai lo se isi lava gagana. E tatau ona tatou tuuina atu i a tatou fanau le avanoa e aoao ai lenei gagana i le faalogo atu i o latou matua o faaaogaina lenei gagana i tatalo eseese e faia i o latou aiga i aso taitasi” (Liahona, Iulai 1993, 20).
E mafai faapefea e matua ona faaaogaina le tatalo faaleaiga e avea o se taimi e aoaoina ai a latou fanau?
O le a se mea e mafai ona faia e matua ina ia uunaiina ai a latou fanau ina ia tatalo taitoatasi?
Ua fetalai mai le Alii faapea e tatau i matua ona aoaoina a latou fanau ina ia “savavali tonu” i Ona luma (MFF 68:28). O a ni auala e mafai ai e matua ona faaaogaina ia faatulagaga o le fale ma le aiga e uunaiina ai a latou fanau ina ia “savavali tonu i luma o le Alii”? (O tali e mafai ona aofia ai le mafaia e matua ona aoaoina a latou fanau ina ia usiusitai i tulafono ma sauniga o le talalelei ma tutu atu e avea ma molimau a le Atua i taimi uma ma nofoaga uma.)
O a mea e mafai ona faia e matua matutua ma isi tagata o le aiga lautele ina ia fesoasoani ai i matua ina ia aoaoina atu ia mataupu faavae o le talalelei i a latou fanau? O a ni auala ua e vaaia ai le mafai ona fesoasoani ia faataitaiga lelei a tagata o le aiga lautele i fanau?

Faaiuga

Ia faamamafa atu faapea ua tuuina mai e le Atua i matua le tiutetauave ina ia aoaoina a latou fanau i mataupu faavae o le amiotonu. Ia uunaiina tagata o le vasega ina ia taumafai e ola i mataupu faavae sa aoaoina i lenei lesona ma fuafua ai ni auala e mafai ona lelei ai lo latou aoaoina atu o nei mataupu faavae i le fanau.

Ia molimau atu i upumoni sa talanoaina i lenei lesona e pei ona musuia ai e le Agaga.

Ia tagai i itulau e 60–64 i totonu o le Taiala mo Suesuega a le Tagata o le vasega O le Faaipoipoga ma Fegalegaleaiga Faaleaiga. Ia uunaiina tagata o le vasega ina ia iloiloina ia aoaoga ma mataupu faavae o loo i lenei lesona e ala lea i le (1) mulimuli ia le itiiti ifo ma le tasi o fautuaga o loo i totonu o le “Manatu mo le Faatinoga” ma le (2) ia faitau le tala ”Faamalosia o le Aiga: O Lo Tatou Tiute Maoa’e,“ mai ia Elder Robert D. Hales. Ia faamamafa atu faapea e mafai e ulugalii ua faaipoipo ona mauaina ia faamanuiaga silisili mai le faitauina ma le talanoaina faatasi o tala i totonu o le taiala suesue.