Lesona 7

O le Mana Faamalolo o le Faamagalo Atu

Faamoemoega

Ina ia fesoasoani i tagata o le vasega ia iloa le filemu e oo mai ia i latou o e fefaamagaloai ma uunaia tagata o le vasega e faafaileleina le agaga o le faamagalo atu i totonu o o latou fale.

Sauniuniga

Iloilo mataupu faavae o loo i lalo o le “O Ou Tiutetauave o se Faiaoga” itulau x–xiii i lenei tusi lesona. Vaavaai mo auala e faaaoga ai mataupu faavae nei i au sauniuniga e aoao atu.
Mafaufau loloto i aoaoga ma mataupu faavae o loo otootoina atu i autu o loo matamata tetele atu le tusiga. Ia mafaufau i le gasologa o le vaiaso e uiga i ni auala e aoao atu ai nei aoaoga ma mataupu faavae. Saili le taitaiga a le Agaga i le filifilia o mea e tatau ona e faamamafaina e faafetaiaia ai manaoga o tagata o le vasega.
Faamanatu atu i tagata o le vasega e aumai a latou kopi o le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga i le vasega. O le a aoga ia i latou e faatatau atu i ai i le taimi o le lesona.

Faaaliga: Ao e aoao atu lenei lesona, ia faaeteete i tulaga taitoatasi o tagata o le vasega. Afai e tuuina atu e tagata o le vasega ni fesili e uiga i le sailia po o le tuuina atu o le faamagaloga i faafitauli matuia e pei o le faasaunoa po o le le faamaoni i le va faaleulugalii, ia uunaia lemu i latou e talanoa taitoatasi ma le epikopo.

Faalautelega Fautuaina o le Lesona

O se agaga fefaamagaloai i le va o le tane ma le ava e fesoasoani lea i le aumaia o le filemu ma se lagona o le talitonuina ma le saogalemu.

Faitau atu le tala lenei na faamatalaina e Elder Hugh W. Pinnock o le Au Fitugafulu:

“O… se ulugalii sa faaipoipoina i se taimi mulimuli ane; o le ava lea sa faapea ona faaipoipoina muamua o ia, ae peitai o le faaipoipoga muamua lea a le tane. Ina ua mavae ni nai masina talu ona nonofo faaleulugalii, sa aliae ai se feeseeseaiga matautia sa tiga ai le loto o le tane ua tau le mafai ai ona faasagatonu ana galuega e faia i le aso.

“Ao faaletonu lona mafaufau mai feupua’iga e tusa ai ma lenei mafutaga, sa ia nofo ma fuafua le faafitauli ma sa ia iloa ai o le isi vaega o le faafitauli o ia lava. Sa ia alu atu i lana manamea ma faatoese i ai i le tele o taimi e faapea, ‘Ua ou sese, Lau Pele.’ Ona maligi ai lea o loimata o lana ava ma faamaulalo ifo faapea o le tele o le faafitauli o ia e pogai ai ma na ole atu ai ia faamagalo o ia. Ao laua feopoopoai, sa ia faamaulalo ma sa ia iloa ai i lona uiga masani o na upu faatoese sa lei faaaogaina muamua, ma ua ia iloa ai i le taimi nei e soo se faafitauli lava e tupu mai i se taimi o i luma e mafai lava ona foia. Sa oo ia te ia se lagona mausali aua sa ia iloa e mafai lava ona laua faapea atu, ‘Ua ou sese’; ‘Ou te faamagalo atu’” (Liahona, Fepuari 1982, 14–19).

Ia faatusatusa le tala lenei ma le faamatalaga a Peresitene Gordon B. Hinckley i se faatalanoaga na ia faia ma se tane ma lana ava o e na oo i ni tulaga faigata i le la faaipoipoga (itulau 28 i le Taiala Suesue a le Tagata O le Vasega O le Faaipoipoga ma Fegalegaleaiga Faaleaiga):

“Ou te manatua lo’u faalogologo atu i se taimi umi lava i se ulugalii sa nonofo faatasi ma au i le isi itu o le kesi. Sa i ai se feitagai i lo la va. Ou te iloa e i ai se taimi na maua ai e i la’ua le alofa ma le faamaoni. Peitai sa faatupuina e i laua uma se amioga o le tautala i mea sese e uiga i le tasi. O lo tatou le loto e faamagalo atu ituaiga mea sese e faia e i tatou uma, faapea ma le le loto e faamagalo atu ia mea sese ma manumalo ai ma le onosai, o le mea lea ua faitioina ai e le tasi le isi se’ia oo ina mou ese atu le alofa sa iloa muamua e i la’ua. Sa liu efuefu lea alofa ona o le mea leaga ua tatou ta’ua o le tatala o faaipoipoga. Ona oo mai ai lea o le nofo to’atasi ma le agaga o le faitio. Ua ou ioe ana se’i faapea e i ai sina salamo ma le agaga faamagalo atu, semanu e faatasia pea i la’ua, ma ua olioli i le la mafutaga e pei ona sa matua faamanuiaina ai tausaga muamua o le la faaipoipoga” (Liahona, Novema 1991, 2–6).

O a mea e mafai ona tatou aoaoina mai i nei faataitaiga e lua?

Ia faamatala atu faapea, o lenei lesona e uiga i le manaomia ona sailia o le faamagaloga ma le taua o le fefaamagaloai o le tasi i le isi. Ia faamamafa atu e mafai e se ulugalii ona faatoilaloina luitau e tele i le la mafutaga pe afai e taumafai i laua ia maua le agaga o le faamagalo atu i le la faaipoipoga. Ao faia faapea e i laua, o le a aoaoina e i laua le moni o le folafolaga a Peresitene Gordon B. Hinckley ia i latou o e fefaamagaloai: “O le a oo mai le filemu i lou loto lea semanu e te le maua” (Liahona, Novema 1991, 5).

E tatau i tane ma ava ona saili le faamagaloga a le tasi mo o la vaivaiga ma ia faia se taumafaiga ma le loto faamaoni ina ia faaleleia atili.

Aisea e taua ai i tane ma ava ona faapea mai “Ua ou sese” ma talosaga atu mo le faamagaloga a le isi mo o la vaivaiga?
Aisea e faigata ai i nisi taimi ona talosaga atu mo le faamagaloga? (O tali e ono aofia ai o le manatu faapito ma le faamaualuga e taofia ai po o nisi taimi tatou te tuuaiina ai isi mo o tatou faafitauli.)
E mafai faapefea ona tatou maua le malosi e sailia ai le faamagaloga a isi?

Ia faamamafa atu ao tatou saili le faamagaloga, e taua le faia o taumafaiga faamaoni e suia ai ma, pe a talafeagai, ia salamo mo a tatou agasala. E le lava le na o na faaalia o le faanoanoa mo mea na tatou faia; e tatau ona tatou agavaa mo le faamagaloga a isi faapea foi le faamagaloga a le Alii.

O a tulaga matautia o le sailia o le faamagaloga e aunoa ma le faia o ni taumafaiga e faaleleia?

A o e faaiuina le vaega lenei o le lesona, mafaufau e fetufaai atu se tala se tasi po o tala moni uma nei e lua:

Ina ua mavae ona faaaluina se afiafi e tafafao ai ma lana ava ma nai uo toaitiiti, na maitauina e le alii ua ese lava le le fiafia o lana ava. Na fesili o ia i lana ava pe ua i ai se mea ua sese, ma sa faamatalaina e ia na lagona lona maasiasi ma le tiga i le tele o taimi i le afiafi ona sa ia faamatalaina ni tala na faasino tonu ia te ia. I le taimi muamua, na ia teenaina ai, ma faapea atu sa tausua o ia, ma na manao o ia ina ia fiafia tagata uma, ma ua fai si mateletele o lana ava. Ae peitai, ao talanoa i laua na ia iloaina ai e moni lava na faatiga e ia lagona o lana ava. Na matua lagona e ia lona sese ma o lana amio faavalevalea na faamasiasia ai lana ava i taimi e tele. Na faatoese o ia ma folafola atu e na te le toe faamasiasia o ia. Na tausisi o ia i lana folafolaga. Mai i lena taimi, na maua e ia ni auala e faaviivii ai o ia ma le faamaoni i luma o isi.

O se tane ma o se tamã na matua masani i ata mataga ao talavou o ia ua le mafai ona taofia lea faiga. Na faavaivai o ia ona sa ia le iloaina pe faapefea ona suia o ia. I le taimi mulimuli, na tatalo o ia ma le naunautai mo se fesoasoani, na faamaualaloina o ia lava, ma amata ona suesue i le soifuaga ma aoaoga a le Faaola. Ao malamalama atili o ia e uiga i faamanuiaga e tuuina mai e ala i le Togisala a le Faaola, na ia iloaina ai e mafai e ia ona suia lana amio. Na ia iloaina e faatamaiaina ai o ia lava, o lana faaipoipoga, ma lona aiga i lana amioga. O lona malamalamaaga fou i le misiona a Iesu Keriso na mafai ai e ia ona faia ni suiga manaomia ma faasaoina ai lana faaipoipoga.

Ia fetufaai atu le saunoaga lenei na faia e Elder Spencer W. Kimball ao galue o ia i le Korama a Aposetolo e Toasefululua:

“Soo se faamagaloga lava e i ai ni tulaga e faaautu i ai. E tatau ona fuafua tatau le lapoa o le mea faapipii i le lapoa o le manua e faapipii ai. O le anapogi ma tatalo, ma le lotomaualalo e tatau ona tutusa po o le sili atu nai lo le agasala. E tatau ona i ai le loto momomo ma le agaga salamo. E tatau ona faaalia ai le agaga o le ‘ofu talatala ma le lefulefu’. E tatau ona faaalia ai le maligi o loimata ma le suia moni o le loto. E tatau ona i ai le iloa moni o le agasala, lafoai o le leaga, ma le faaali atu o le agasala i taitai tatau a le Alii. E tatau ona toe totogi atu mea ua faaleagaina ma ia faamautuina le mafaufau, ma ia suia tulaga sa masani ai, le itu e agai atu i ai ma le taunuuga. O tulaga uma e tatau ona pulea lelei ma au mea e ao ona faasaoina, po o le suia foi. E ao ona faamamaina lavalava ina ia mama ma sinasina, ma e tatau foi ona i ai se tautinoga fou, ina ia ola ai ma le faamaoni i tulafono uma a le Atua. I le faapuupuuga la, e tatau ona faatoilaloina e le tagata o ia lava, le agasala, ma le lalolagi” (O le Vavega o le Faamagalo Atu [1969], 357).

E tatau i tane ma ava ona saili ina ia faamagalo e le tasi le isi.

Ia faamatala atu faapea, e faaopoopo atu i le sailia o le faamagaloga mo a tatou agasala ma mo mea sese ua tatou faia, e tatau ona tatou faamagalo atu. O nisi taimi tatou te feita ma tiga ai i mea laiti e faia e tagata, ae peitai ua poloaiina i tatou e le Alii e fefaamagaloai o le tasi i le isi. Faitau faatasi ma le vasega le Mataupu Faavae ma Feagaiga 64:8–10 ma le Mataio 6:14–15.

O a auala o loo faamalosia ai faaipoipoga pe a naunau tane ma ava e fefaamagaloai e le tasi ia le isi?

Na apoapoai mai Peresitene Gordon B. Hinckley: “Afai o i ai nisi o teu i o latou loto se ava oona o le feitagai o le tasi i le tasi, ou te aioi atu ia te outou ia ole atu i le Alii mo se malosi e faamagalo atu ai. O le faaalia o lea faanaunauga, o le faatinoga moni lea o lo outou salamo. Atonu o le a le faigofie, ma e atonu foi o le a le vave ona oo mai. Peitai afai tou te sailia ma le faamaoni ma atinae lena uiga, o le a maua… . O le a oo mai le filemu i lou loto lea semanu e te le maua” (Liahona, Novema 1991, 3–6; tagai foi i le itulau 28 i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga).
Aisea e faigata ai i nisi taimi ona faamagalo atu? (O tali e ono aofia ai o le saili o tagata ina ia puipuia i latou lava mai mea e tiga ai i le lumanai, e manatu i latou o le faamagalo atu e tutusa ma le lagolagoina o mea faatiga e faia, po o le faafaigata ona latou faamagaloina se tagata e faamoemoe e faamagaloina e aunoa ma le faia o ni taumafaiga e faatoilaloina ai amioga sese.)
O a tulaga matautia o tane ma ava pe a mumusu e faamagalo atu?
O a auala i le faamagaloga e faamanuiaina ai i latou o e ua faamagaloina? E mafai faapefea i le faamagaloga mai i isi ona fesoasoani i se tagata ina ia suia amioga e le manaomia?
O a auala e mafai ai i le agaga o le faamagaloga ona faamanuia le tagata e faamagalo atu?

Fautua atu pe a tatou lagona ua faia e isi ni mea e sese ia i tatou, e tatau ona tatou fesili ia i tatou lava pe o le a le auala e finagalo le Faaola tatou te tali atu ai. E pei ona sa apoapoai mai Peresitene Howard W. Hunter, o le Peresitene lona 14 o le Ekalesia: “E tatau ona tatou mafaufau atili i mea paia ma ia galulue atili ia faapei o le mea o loo faamoemoe ai le Faaola i ona soo e galulue ai. E tatau ona tatou fesili ifo ia i tatou lava i mea uma, ‘O le a le mea o le a faia e Iesu?’ ona galue atili lea ma le loto tele i le auala e tali atu ai” (i le Conference Report, Oketopa 1994, 118; po o le Ensign, Novema 1994, 87).

Faitau le apoapoaiga lenei mai ia Peresitene Iosefa F. Samita, o le Peresitene lona 6 o le Ekalesia:

“E tofu i tatou ma vaivaiga ma faaletonu. O nisi o taimi ua iloa atu e le tane se faaletonu i lana ava, ona ia osofaia lea o ia i lena mea. O nisi o taimi e lagona ai e le ava ua le faia e lana tane le mea tonu, ona ia osofaia lea o ia. O le a le mea lelei e maua mai ai? E le sili ea le faamagalo? E le sili ea le alofa mama? E le sili ea le alofa? E le sili ea le aua le tautala i faaletonu, aua le faalauteleina vaivaiga e ala i le talanoa i ai i taimi uma? E le sili ea lena? E le avea ea le faatasiga ua faamauina i le va o oulua ma le fanau mai o ni fanau ma le faatasiga o le feagaiga fou e faavavau, e sili atu ona mausali pe a galo ona e tautau atu vaivaiga ma faaletonu o le tasi ma le isi? E le sili ea ona faagalo ma aua nei talanoaina—tanumia i latou ma ta’uta’u atu na o mea lelei ua e iloa ma lagona, o le tasi i le isi, ma tanumia ai faaletonu o isi ma lå faalauteleina; e le sili ea lena?” (”Sermon on Home Government,“ Millennial Star, 25 Ianuari 1912, 49–50).

Faaiuga

Ia fetufaai atu le saunoaga lenei a Elder Spencer W. Kimball:

“O se mapusaga sili! O se faamafanafanaga maoae! O se olioliga taua! O latou uma o loo mafatia i le solitulafono ma le faanoanoa ma le agasala, e mafai ona faamagaloina ma faamamaina pe afai latou te foi mai i lo latou Alii, ma faaaoao ia te ia ma tausi i ana poloaiga. O tatou uma lava o e o loo manaomia le salamo i o tatou sese ma vaivaiga i aso taitasi, e mafai foi ona tatou auai i lenei vavega” (O le Vavega o le Faamagalo Atu, 372).

Ao musuia ai e le Agaga, ia tautino atu faapea, afai e fefaamagaloai ulugalii faaipoipo i sese o le tasi, e maua e i laua le filemu. E maua atili ai e i laua le lotogatasi ma mafai atili ai ona feagai ma luitau o le faaipoipoga ma le avea ai ma matua. Ia valaaulia tagata o le vasega e faafailele se agaga o le faamagalo atu i o latou aiga.

Ia faatatau atu i itulau 27–29 i le Taiala Suesue a Tagata o le Vasega O le Faaipoipoga ma Fegalegaleaiga Faaleaiga. Ia uunaia tagata o le vasega e iloilo aoaoga faavae ma mataupu faavae i le lesona lenei e ala i le (1) mulimuli i se fautuaga e tasi pe sili atu foi o loo i le “Auala Mo Le Faatinoga” ma le (2) faitauina o le tala o le “A o Outou e Ao Ina Outou Faamagalo Atu,” na saunia e Peresitene Gordon B. Hinckley. Ia faamamafa atu faapea, e mafai ona matua aoga tele i ulugalii le faitauina ma talanoaina faatasi tala o loo i le taiala suesue.

Ia faamanatu atu i tagata o le vasega e aumai a latou taiala suesue i le vasega mo le lesona o le a sosoo