Lesona 1

“O le Aiga o le Totonugalemu lea o le Fuafuaga a Le Foafoa”

Faamoemoega

Ina ia faamamafaina le taua e faavavau o le aiga ma ia fesoasoani i tagata o le vasega ia iloa mea e tatau ona latou faia ina ia matua aoga ai le vasega o le Faaipoipoga ma Fegalegaleaiga Faaleaiga.

Sauniuniga

Iloilo mataupu faavae o loo i lalo o le “O Ou Tiutetauave o se Faiaoga” itulau x–xiii i lenei tusi lesona. Vaavaai mo ni auala e faaaogaina ai nei mataupu faavae i au sauniuniga e aoao atu.
Faitau autu o lesona o loo matamata tetele atu le tusiga, o loo otootoina atu ai aoaoga faavae ma mataupu faavae o le lesona. I le avea ma se vaega o au sauniuniga, ia mafaufau loloto i nei aoaoga faavae ma mataupu faavae i le vaiaso atoa, ma sailia le taitaiga a le Agaga i le filifilia o mea e tatau ona e faamamafaina e faafetaiaia ai manaoga o tagata o le vasega.
Suesue ma le agaga tatalo le “O le Aiga: O se Folafolaga i le Lalolagi,” o loo maua i le itulau ix) i le tusi lesona lenei ma le itulau iv i le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga.
Ia i ai ni kopi o le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga (36357) mo tagata uma o le vasega. E tatau ona e mauaina kopi nei mai le au peresitene o le Aoga Sa, o le failautusi o le uarota, po o le failautusi fesoasoani o loo tofia e gafa ma mea e faaaogaina.
Ia logo mamao atu i ni tagata se toalua o le vasega ina ia talanoa pupuu e uiga i o la lagona ina ua faaipoipoina i laua i le malumalu. Ia talosaga atu foi ia i laua ia sauni e talanoa e uiga i le olioli ma faamanuiaga ua laua maua i lenei olaga ona ua faamauina i laua i o la taitoalua mo le faavavau. Saili le taitaiga a le Agaga ao e mafaufau pe o ai e tatau ona e talosagaina e faataunuuina lenei tofiga.
Ae le’i amataina le vasega, tusi i luga o le laupapa le upu sii lenei (mai i le Stand Ye in Holy Places [1974], 255):

O le galuega sili ona taua a le Alii e faia e oe ma a’u o le galuega lea tatou te faia i totonu o puipui o o tatou lava fale.

Peresitene Harold B. Lee

Peresitene lona 11 o le Ekalesia

Faalautelega Fautuaina o le Lesona

Ua folafola mai e perofeta o aso e gata ai le taua e faavavau o le faaipoipoga ma le aiga.

Ia fetufaai atu le tala moni lenei:

Na foliga mai ua leiloloa mea uma a se alii i ni tafega ma lologa malolosi. Na tagi o ia, e le ona o le leiloloa o ana oa faalelalolagi, ae ona ua le mafai e ia ona maua lana ava ma lana fanau e toafa. Sa oo ifo se lagona mautinoa ua malelemo i latou. Ae le’i umi ae oo mai le tala o loo feola i latou ma o loo faatali mai ia te ia i se fale mo faalavelave faafuasei o loo latalata ane. E maeu le olioli o le taimi na toe faatasia ai lena aiga! Ao fiafia i latou, na faapea atu le tamaloa, “Ua ou toe maua mai lo’u aiga, ma e ui lava ina ou tu atu e aunoa ma se meatotino faalelalolagi o totoe ia te a’u, ae ua ou lagona ua pei a’u o se milionea” (siitia mai e Robert L. Simpson, i le Conference Report, Ocketopa 1980, 11–12; po o le Liahona, Novema 1980, 11).

Fetufaai atu faapuupuu ou talitonuga ma le molimau e uiga i le faaipoipoga ma le aiga. Pe a talafeagai ai, fetufaai atu ou lagona e uiga i lou lava aiga. Ona faitau lea o le faamatalaga lenei mai ia Elder Boyd K. Packer o le Korama a Aposetolo e Toasefululua:

“O le nofoaga tutotonu o le Ekalesia e le o le [fale autu] o le siteki; e le o le falelotu… . O le nofoaga pito sili ona paia i le lalolagi atonu e le o le malumalu i lona tulaga talafeagai ai. O le falelotu, o le [fale autu] o le siteki; ma le malumalu e paia ao latou tuuina atu le sao i le fausiaina o le faalapotopotoga pito sili ona paia i le Ekalesia—o le aiga le fale lea—faapea le faamanuiaina o Fegalegaleaiga pito sili ona paia i le Ekalesia, o le aiga lea” (”That All May Be Edified“ [1982], 234–35).

Tuu atu i tagata taitasi o le vasega se kopi o le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga. Fai atu i tagata o le vasega e susue i le itulau iv. Faamatala atu na tuuina atu i le 1995 e le Au Peresitene Sili ma le Korama o Aposetolo e Toasefululua se folafolaga i le lalolagi atoa e tusa ai ma le faaipoipoga ma le aiga. O le tele o aoaoga faavae ma mataupu faavae o loo aoaoina i le folafolaga o le a talanoaina i le gasologa o lenei vasega. Faitau faatasi ma le vasega le folafolaga, ma valaaulia tagata eseese o le vasega e faitau faaleotele parakalafa taitasi.

O a nisi o aoaoga faavae ma mataupu faavae o loo aoaoina i le folafolaga i le aiga? (Mafaufau e lisiina tali a tagata o le vasega i luga o le laupapa.) Aisea e manaomia ai e le lalolagi lenei apoapoaiga ma le lapataiga?

Na faamatalaina e Peresitene Gordon B. Hinckley, le Peresitene lona 15 o le Ekalesia: “Aisea ua tatou mauaina ai lenei folafolaga i le aiga i le taimi nei? Aua ua osofaia ai le aiga. Ua malepelepe le tele o aiga o le lalolagi. O le nofoaga e amata ai le faaleleia o nuu o totonu o le aiga. E fai e fanau, i le tele o taimi, mea ua aoaoina ai i latou. O loo tatou taumafai e faia le lalolagi ma se nofoaga e sili atu le lelei e ala lea i le faia o le aiga ia sili atu le malosi” (“Mafaufauga Musuia,” Liahona, Aokuso1997, 5).
E faapefea ona faamalolosia oe ma lou aiga e ala i le mulimuli i apoapoaiga o loo i lenei folafolaga?

O le faaipoipoga e faavavau e mafai ona aumaia ai le olioli ma faamanuiaga silisili o lenei olaga ma le faavavau atoa.

Ia faamamafa atu o le faaipoipoga o le totonugalemu lea o le fuafuaga sili o le fiafia a le Tama Faalelagi. E mafai ai e aiga ona maua le olioli moni i lenei olaga ma faaauau pea ma alualu i luma i le faavavau atoa.

O a faamanuiaga e mafai ona tatou maua i lenei olaga pe afai ua faaipoipoina i tatou mo le faavavau?

Ia valaaulia tagata na tofiaina o le vasega e talanoa puupuu e uiga i o laua lagona ina ua faaipoipoina i laua i le malumalu faapea le olioli ma faamanuiaga ua latou maua i lenei olaga ona ua faamauina i laua i o la taitoalua mo le faavavau (tagai “Sauniuniga,” nu. 5).

Mafaufau e fetufaai atu se tasi pe sili atu foi o faamatalaga nei:

Na aoao mai Peresitene James E. Faust o le Au Peresitene Sili: “E tele feagaiga e maua ai le fiafia iinei ma le olaga a sau. Ma o se tasi e sili ona taua, o feagaiga ia o le faaipoipoga i le va o le tane ma le ava. Mai nei feagaiga e puna mai ai le olioli sili o le olaga” (Liahona, Iulai 1998, 19).

Na faapea mai Elder Boyd K. Packer “o le alofa i le va o le alii ma le tamaitai, o le alofa, o le faaipoipoga, ma le avea ma matua” o mea ia e “sili ona mama, sili ona matagofie ma faatosina i mea e fai e tagata i le olaga (Liahona, Ianuari 1994, 24–27).

Na faaalia mai e Elder Joseph B. Wirthlin o le Korama a Aposetolo e Toasefululua: “O le mafutaga matagofie o le faaipoipoga e faavavau o se tasi lea o faamanuiaga silisili ua tuuina mai e le Atua i Ana fanau. O le mea moni, o tausaga e tele ua ma faatasi ai ma la’u soa lalelei ua aumaia ai ia te au le olioli pito sili ona loloto i lo’u olaga. Mai lava i le amataga o taimi, o le mafutaga o le faaipoipoga o le tane ma le ava ua avea ma faavae o le fuafuaga sili o le fiafia a lo tatou Tama Faalelagi. Ua i ai aafiaga lelei i o tatou olaga, ma e taufai faamalamalamaina ma siitiaina i tatou ao tatou olioli i le suamalie o faamanuiaga o Fegalegaleaiga ma tagata e pele o le aiga” (i le Conference Report, Oketopa 1997, 42; po o le Ensign, Novema 1997, 32).

I lana uluai saunoaga i tagata aoao o le Ekalesia i le avea ai ma Peresitene o le Ekalesia, na saunoa ai Peresitene Gordon B. Hinckley: “I lo’u toalua pele mo le limasefuluvalu tausaga i se taimi o lenei masina, ou te momoli atu i ai la’u faafetai… . Ou te faafetai tele mo lenei tamaitai taua, o le na savali i o’u tafatafa i taimi o le lagilelei ma afa. E le o toe aulelei nei i maua e pei ona i ai i le amataga. Peitai o loo tumau pea le alofa o le tasi i le tasi” (Liahona, Iulai 1995, 77).

Faamatala atu e toatele tagata e talitonu o le faaipoipoga ma le olaga faaleaiga ua na o ni mea e tutupu i le olaga faitino. Ae peitai i le avea ai ma tagata o le Ekalesia, ua tatou iloa e mafai e se ulugalii agavaa ona ulu atu i le malumalu ma faamauina faatasi o le tane ma le ava mo le faavavau e ala i se sauniga paia o le perisitua. Pe a faaipoipoina se alii ma se tamaitai i lea ala, ua faapea ona amataina se iunite faaleaiga e faavavau.

O a faamanuiaga e faavavau o loo folafolaina i ulugalii faaipoipo o e ua faamauina i le mana o le perisitua ma tutumau ai lea ma le faamaoni i a la feagaiga? (Faitau le Mataupu Faavae ma Feagaiga 131:1–4; 132:19–24, 30–31 faatasi ma tagata o le vasega. O nisi tali o loo aofia ai i le lisi lenei, e mafai ona tusia i luga o le laupapa.)
1. O le a faaeaina i laua i le tikeri pito sili ona maualuga o le malo selesitila faatasi ma le Tama Faalelagi ma Iesu Keriso (MFF 131:1–3; 132:20–24).
2. O le a faatasia i laua i “lenei olaga, e oo lava i le faavavau” (MFF 132:19). O a laua fanau o le a avea foi ma vaega o lo laua aiga e faavavau. (Faamatala atu o le Agaga Paia o le Folafolaga, lea o loo ta’ua i le MFF 132:19, o le Agaga Paia lea. E tusa ai ma lo tatou faatuatua, e faamauina e le Agaga Paia lena sauniga o le perisitua ua tatou mauaina ma taliaina e le Atua feagaiga ua tatou osia.)
3. O le a laua “mautofi foi i nofalii ma malo, o itumalo sili, ma pulega” (MFF 132:19).
4. O le a faaauau ona maua e i laua fanau, po o fanau agaga, i le faavavau atoa (MFF 132:19, 30–31; tagai foi i le MFF 131:4).
E faapefea ona fesoasoani lena mea ia te oe i le iloaina e mafai ona faavavau aiga?

Ia faamatala atu e toatele tagata o le Au Paia o Aso e Gata Ai o loo faamaoni o e, ona e le o ni o latou lava masei, ua le maua ai le avanoa e maua ai faamanuiaga o le faaipoipoga e faavavau i lenei olaga. Ia faamamafa atu ua folafolaina mai e le Alii o Au Paia faamaoni uma o le a mauaina i le taimi mulimuli nei faamanuiaga. Afai e te manatu e tatau ona malamalama tagata o le vasega i lenei mataupu faavae, faitau le saunoaga lenei mai ia Elder Dallin H. Oaks o le Korama a Aposetolo e Toasefululua:

“Ua matou iloa e toatele uso ma tuafafine lelei ma agavaa o le Au Paia ua latou le maua i le taimi nei avanoa lelei ma tatau ai mo lo latou alualu i luma i lea itu. O le nofo toatasi, o le [leai o se] fanau, maliu ma le tetea ua le taulau ai faamoemoega ma tolopo ai le faataunuuina o faamanuiaga folafolaina. E le gata i lea, e i ai nisi tina ua mananao e tuuina atu lo latou taimi atoa e avea ai ma tina ma fatu aiga, [ae] ua i ai i se tulaga manaomia e tatau ai ona o atu e faigaluega. Ae o ia toatuga, e le tumau. Ua folafola mai le Alii, i le faavavau, e leai se faamanuiaga o le a toesea mai ona atalii ma afafine o e latou te tausia poloaiga, ma faamaoni ia latou feagaiga, ma moomoo i mea tonu.

“O le tele o mea sili ona taua e toesea i la le tino, o le a faasa’oina i le Meleniuma, le taimi lea o le a faataunuuina ai mea uma ua le atoatoa i le fuafuaga sili o le fiafia mo fanau agavaa uma a lo tatou Tama. Ua tatou iloa le moni o lena mea e faatatau i sauniga o le malumalu. Ou te talitonu foi e moni foi lena e faatatau i tulaga faaleaiga. (Liahona, Ianuari 1994, 84–88).

Ina ia faamatalaina tulaga o tagata taitoatasi o le vasega, atonu e fesoasoani le faitau o se faamatalaga se tasi pe lua foi o loo i le “O Isi Mea e Maua ai le Fesoasoani” i le itulau xiii.

O le vasega O le Faaipoipoga ma Fegalegaleaiga Faaleaiga ua fuafua e fesoasoani ia i tatou ina ia maua le olioli i Fegalegaleaiga faaleaiga.

Valaaulia se tagata o le vasega e faitau leotele le faamatalaga lenei:

Na saunoa Peresitene Harold B. Lee, o le Peresitene lona 11 o le Ekalesia, “O le galuega sili ona taua a le Alii e faia e oe ma a’u o le galuega lea tatou te faia i totonu o puipui o o tatou lava fale” (Stand Ye in Holy Places, 255).

O a auala o le a ese ai le lalolagi pe afai e ola tagata uma e tusa ai ma lenei tautinoga faigofie?

Faamatala atu ua fuafuaina lenei kosi e fesoasoani ai ia i tatou ina ia faamalolosia faaipoipoga ma aiga ma maua le olioli i a tatou Fegalegaleaiga faaleaiga. O loo faavaeina lesona i aoaoga faavae ma mataupu faavae o loo aoaoina i tusitusiga paia ma perofeta o aso e gata ai.

Faamatala atu o le filifili e auai i lenei vasega, ua faailoa mai ai e tagata o le vasega se manao e faamalosia o latou aiga. E tolu mea e tatau ona latou faia ina ia matua aoga ai lenei vasega:

Ia auai i le vasega.

Ia faamatala atu o i latou uma o e auai i lenei vasega e mafai ona aoao le tasi mai le isi, e tusa lava pe o a tulaga eseese e oo i ai i le faaipoipoga po o le tausia o tamaiti. Valaaulia tagata o le vasega e molimau i mea moni na latou talanoaina ma fetufaai atu mea na tutupu ia i latou e talafeagai ma lesona.
Faaaoga le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga.

Fai atu i tagata o le vasega e susue a latou kopi o le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga. Ia faamatala atu o lesona taitasi, o loo i ai i le taiala ia “Auala Mo Le Faatinoga” o fautuaga ia e fesoasoani ai i tagata o le vasega ina ia faaaoga aoaoga faavae ma mataupu faavae ua latou aoaoina. E faaopoopo atu i ai, o loo tuuina faatasi atu ai i lesona taitasi ia se tala se tasi pe lua mai i Pulega Aoao o le Ekalesia. Pe a mae’a lesona taitasi, e tatau i tagata o le vasega ona faamae’aina se tasi pe sili atu o gaoioiga fautuaina ma suesue i faamatalaga po o saunoaga taitasi. E mafai ona matua aoga tele i ulugalii faaipoipo le faitauina ma talanoaina faatasi ia tala.

Ia faatatau atu i itulau 3–7 i le taiala suesue. Ia uunaia tagata o le vasega e iloilo aoaoga faavae ma mataupu faavae i le lesona lenei e ala i le (1) mulimuli i se tasi pe sili atu foi o fautuaga i le “Auala Mo Le Faatinoga” ma le (2) suesue i le tala ua faaautuina “Mo le Taimi Nei ma le Faavavau Atoa” na saunia e Elder Boyd K. Packer.

Ia uunaia tagata o le vasega e aumai a latou taiala suesue i le vasega mo lesona taitasi.
Ia taumafai e ola ai e tusa ma aoaoga faavae ma mataupu faavae o loo i lesona.

Faamamafa atu e le lava le na ona aoao o le talalelei. Ina ia aoga le talalelei i o tatou olaga, e tatau ona tatou ola ai e tusa ma mea o loo tatou aoaoina. Sa fautua mai Peresitene Harold B. Lee, “E le mafai ona tatou iloa se mea e uiga i aoaoga o le talalelei sei vagana ua tatou tofo i faamanuiaga e oo mai e ala i le ola i mataupu faavae taitasi” (Stand ye in Holy Places, 215).

O o tatou aiga e mafai ona avea “o se vaega o le lagi” ao tatou atina’e “i luga o le papa o lo tatou Togiola.”

Ia faamamafa atu faapea, i le lalolagi i aso nei, o le aiga ua na o le pau lea o le nofoaga e tasi e mafai ona tatou maua ai le filemu. Ona faitau lea o le saunoaga lenei a Peresitene Thomas S. Monson o le Au Peresitene Sili:

“Ae a tatou taumafai malosi, e mafai ona avea o tatou aiga ma vaega itiiti o le lagi i le lalolagi. O o tatou mafaufauga, o mea tatou te faia, o olaga tatou te ola ai, e le na o le manuia o la tatou malaga faaletino e aafia ai; ae e faailoga ai foi le ala i la tatou sini e faavavau” (Liahona, Ianuari 1989, 72–76).

O a ni auala e mafai ai ona avea le aiga ma “se vaega o le lagi”?

Pe a maea ona tali atu tagata o le vasega i lenei fesili, ia fetufaai atu ou lava talitonuga e uiga i le ala e mafai ai e le aiga ona avea ma se vaega o le lagi. Pe a talafeagai ai, fetufaai atu se mea se tasi pe lua foi na tupu ia te oe e fai ma vaega o lau molimau.

Ia fetufaai atu le saunoaga lenei a Peresitene Spencer W. Kimball, o le Peresitene lona 12 o le Ekalesia:

“E tele tulaga o le vafealoai ma aiaiga sa faia i aso ua mavae sa fesoasoani atu ai mo le faamalolosia ma le lagolagoina o le tulaga faaleaiga—ua faaleaogaina nei ma ua mou malie atu. O le a oo mai le taimi mo i latou o e e talitonu ma le faamaoni ma galulue punouai i le aiga, o le a mafai ona faasaoina o latou aiga mai le totonugalemu o faiga leaga faatiapolo o loo siomia ai i tatou” (Liahona, Aperila 1981, 6–9).

Faitau le Helamana 5:12 faatasi ma tagata o le vasega. Ona faitau lea o le saunoaga lenei a Elder Joseph B. Wirthlin o le Korama a Aposetolo e Toasefululua:

“A outou atinae o outou fale i luga o le faavae o le papa o lo tatou Togiola ma le talalelei, o le a mafai ona avea ma maluapapa e mafai e o tou aiga ona malutia ai mai matagi louloua o le olaga” (Liahona, Iulai 1993, 80–83).

O le a le uiga ia te oe o le fausia o lou aiga “i luga o le papa o lo tatou Togiola”? O a nisi o mea patino o le a faia e aiga pe afai o le a latou mauaina ni aiga e faaautu ia Keriso?

Ia faamamafa atu o loo talanoaina i lenei aoaoga ia mataupu faavae e fesoasoani i le faamalolosia o faaipoipoga ma aiga. E tatau ona tatou faaaogaina nei mataupu faavae ina ia mafai ona tatou faalatalata atili atu ai i le Tama Faalelagi ma Iesu Keriso i o tatou aiga. E le tatau ona aveesea ia i tatou le vaaiga o le Togisala le mafaatusalia a le Faaola, lea e mafai ai e i tatou ona mau faatasi ma o tatou aiga e faavavau.

Faaiuga

Ia faamatala atu lou naunautaiga i lenei vasega, ma faailoa atu i tagata o le vasega mea e mafai ona latou faamoemoe ia te oe e faia i le avea ai ma faiaoga. Mo se faataitaiga, e mafai ona e faamautinoa atu o le a e saunia oe lava ia faaleagaga e aoao atu ma o le a e auai faatasi ma i latou i le faaaogaina o mataupu faavae i lesona taitasi ma faaaoga le Taiala Suesue a le Tagata o le Vasega O le Faaipoipoga ma Fegalegaleaiga Faaleaiga. Ia uunaia i latou o e o loo e aoaoina atu e faia se tautinoga e auai i talanoaga i le vasega, e faaaoga le taiala suesue, ma faaaoga aoaoga faavae ma mataupu faavae o loo latou aoaoina.

Ia molimau atu i le matua taua tele o le aiga e pei ona uunaia ai e le Agaga. Faamatala atu lou loto faafetai ina ua e iloaina e mafai ona faavavau lou aiga.

O Isi Mea e Maua ai le Fesoasoani

O saunoaga e faamatalaina ai manaoga o i latou o e e le o i ai i ni tulaga masani faaleaiga.

Ina ia faamatalaina tulaga o tagata o le vasega o e e le o i ai i ni tulaga masani faaleaiga, faitau se faamatalaga se tasi pe lua foi o saunoaga nei:

Na saunoa Peresitene Ezra Taft Benson, le Peresitene lona 13 o le Ekalesia, i tuafafine nofofua o le Ekalesia: “Ua matou vaai ia te outou o se vaega taua o le tino o le Ekalesia. Matou te faamoemoe ia le avea lo matou faamamafa atu soo o le taua o le aiga, ma mea tou te manatu ai ua le manaomia outou, pe faapea foi ua le taua outou i le Alii po o le Ekalesia. O fusi paia o le avea ma se tasi o le Ekalesia, e mamao lava lona taua nai lo le tulaga faaipoipo, po o le matua, po o le tulaga o loo e i ai i le taimi nei. Ua sili atu lou taua o se afafine o le Atua, nai lo mea uma“ (Liahona, Ianuari 1989, 104–07).

Na aoao mai Peresitene Iosefa Filitia Samita, le Peresitene lona 10 o le Ekalesia: “Afai ae agasala se alii po o se tamaitai o e ua faamauina i le malumalu mo le olaga nei ma le faavavau ma le maua ai le aia tatau i le faaeaina i le malo selesitila, e le mafai e ia ona faavaivaia ai le alualu i luma o le soa ua faamanu’aina o le sa faamaoni. O le a faamasinoina tagata uma e tusa ma a latou [lava] galuega, ma o le a leai lava se faamasinoga tonu i le ta’usalaina fua o e e le’i agasala ona o agasala a le ua ta’usalaina” (Doctrines of Salvation, tuufaatasia e Bruce R. McConkie, 3 voluma [1954– 56], 2:177).