គោលការណ៍នៃការងារបម្រើ

ការប្រមូលផ្ដុំវង្សអ៊ីស្រាអែលតាមរយៈការងារបម្រើ

ការងារបម្រើគឺជាឱកាសមួយដើម្បីធ្វើតាមដំបូន្មានរបស់ព្យាការីក្នុងការប្រមូលផ្ដុំវង្សអ៊ីស្រាអែល ។

ប្រធាន រ័សុល អិម ណិលសុន បានអញ្ជើញយើងឲ្យជួយប្រមូលផ្ដុំវង្សអ៊ីស្រាអែល—« ជារឿងដ៏សំខាន់បំផុតកំពុងតែកើតឡើងនៅលើផែនដីសព្វថ្ងៃនេះ » ។^១

សម្រាប់អ្នកទាំងឡាយណាដែលចង់ចូលរួមចំណែកនៅក្នុងកិច្ចការនៃការប្រមូលផ្ដុំវង្សអ៊ីស្រាអែលនេះ ការងារបម្រើអាចជាឱកាសដ៏អស្ចារ្យមួយ ។ ដោយសារកិច្ចការនៃសេចក្ដីសង្គ្រោះរបស់ព្រះអម្ចាស់គឺជាកិច្ចការទាំងអស់តែមួយ ដូច្នេះការងារបម្រើជារបៀបដ៏បំផុសគំនិតដើម្បីផ្លាស់ប្ដូរជីវិតមនុស្ស ។ មិនថាយើងកំពុងផ្ដល់ការងារបម្រើដល់សមាជិកដែលមិនសូវសកម្ម ឬអញ្ជើញពួកគេឲ្យជួយយើងកាលដែលយើងបម្រើដល់ពួកអ្នកមានជំនឿផ្សេងក៏ដោយ ក៏ការងារបម្រើផ្ដល់នូវឱកាសដើម្បីប្រមូលផ្ដុំវង្សអ៊ីស្រាអែលដែរ ។

ទទួលបន្ទុកគ្នាទៅវិញទៅមក

« ចៀមរបស់យើងអាចឈឺចាប់ បាត់បង់ ឬវង្វេងដោយចេតនា តែក្នុងនាមជាអ្នកគង្វាលរបស់ពួកគេ នោះយើងអាចនៅក្នុងចំណោមមនុស្សដំបូងគេដើម្បីមើលឃើញសេចក្តីត្រូវការរបស់ពួកគេ ។ យើងអាចស្តាប់ ហើយស្រឡាញ់ដោយគ្មានការវិនិច្ឆ័យ ហើយផ្តល់ក្តីសង្ឃឹម និងជំនួយដោយការណែនាំញែកឲ្យដឹងពីព្រះវិញ្ញាណបរិសុទ្ធ » ។ —ប៊ូនី អេច ខ័រឌុន^២

« ខ្ញុំបានសង្កេតមើលដោយស្ងៀមស្ងាត់ទៅស្ត្រីដែលកំពុងអង្គុយជិតខ្ញុំនៅជើងយន្តហោះម៉ោង ៧:០០ ព្រឹក ដែលហោះហើរទៅផ្ទះរបស់ខ្ញុំ ។ នាងបានទិញភេសជ្ជៈគ្រឿងស្រវឹងពីមុនយន្តហោះហោះហើរឡើង ហើយពេលនាងសួរខ្ញុំថាបើខ្ញុំរៀបការហើយឬនៅ នោះការវិនិច្ឆ័យអវិជ្ជមានរបស់ខ្ញុំចំពោះនាងចាប់ផ្ដើមគរជាគំនរកាន់តែច្រើនឡើងៗ ។

« ខ្ញុំបានឆ្លើយតបដោយអំណួតថា ‹ ចាស៎ ខ្ញុំមានកូនបួននាក់ និងមានចៅបួននាក់ › ។

បន្ទាប់មកនាងបានប្រាប់ខ្ញុំពីអ្វីមួយដែលបានផ្លាស់ប្ដូរអ្វីៗគ្រប់យ៉ាង ។ ស្វាមីនាងបានស្លាប់មួយថ្ងៃមុននោះ បន្ទាប់ពីសន្លប់អស់ប្រាំថ្ងៃ ។ ថ្វីបើនាងជាគ្រូពេទ្យសង្គ្រោះបន្ទាន់ ក៏នាងពុំអាចជួយសង្គ្រោះគាត់បានដែរ បន្ទាប់ពីគាត់បានដួលពេលកំពុងទៅវិស្សមកាល ។

ខ្ញុំមានការខ្មាសអៀនដែលការវិនិច្ឆ័យឆាប់រហ័សរបស់ខ្ញុំគឺខុសឆ្ងាយណាស់ ។ តើខ្ញុំត្រូវនិយាយអ្វីទៅកាន់នាង ? កាលដែលខ្ញុំបានប្រមូលអារម្មណ៍ខ្ញុំឡើងវិញ នោះខ្ញុំទទួលអារម្មណ៍ថាព្រះវរបិតាចាក់ព្រះវិញ្ញាណរបស់ទ្រង់មក ដើម្បីខ្ញុំអាចធ្វើការងារបម្រើដល់ស្ត្រីរូបនេះ និងចែកចាយសេចក្ដីពិតដ៏មានតម្លៃខ្លះៗជាមួយនាង ។

ខ្ញុំបានរៀនថា ថ្វីបើនាងពុំចូលរួមនឹងសាសនាចក្រណាមួយក៏ដោយ តែនាងក៏ជឿលើព្រះយេស៊ូវគ្រីស្ទ និងអានព្រះគម្ពីរប៊ីបដែរ ។ ពេលខ្ញុំសួរថាបើនាងបានដឹងអំពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នាងបានឆ្លើយថា នាងបានដឹងតិចតួចណាស់ ។ ខ្ញុំបានចែកចាយជាមួយនាងនូវសារលិខិតពីសន្និសីទទូទៅដែលថ្លែងដោយអែលឌើរ រីឆាដ ជី ស្កត ( ១៩២៨-២០១៥ ) ដែលមានចំណងជើងថា ‹ ពរជ័យដ៏អស់កល្បនៃអាពាហ៍ពិពាហ៍ › ហើយបន្ទាប់មកបានថ្លែងទីបន្ទាល់អំពីក្រុមគ្រួសារដ៏អស់កល្ប ព្រមទាំងរបៀបដែលព្រះវរបិតាសួគ៌ស្គាល់ និងស្រឡាញ់យើងម្នាក់ៗ ។ ខ្ញុំបានដឹងថា នាងកំពុងធ្វើដំណើរទៅរដ្ឋហាវ៉ៃ ស.រ.អា. ជាកន្លែងដែលនាងបានធំលូតលាស់ ហើយខ្ញុំបានលើកទឹកចិត្តនាងឲ្យទៅទស្សនាព្រះវិហារបរិសុទ្ធ ឡាអ៊ីអេ ហាវ៉ៃ ។

យើងបានបែកគ្នានៅព្រលានយន្តហោះទីក្រុង សលត៍ លេក ។ ថ្វីបើខ្ញុំមានកំហុសក្ដី ខ្ញុំមានអំណរគុណដែលព្រះអម្ចាស់អាចប្រើប្រាស់ខ្ញុំ ដើម្បីជួយដល់ប្អូនស្រីម្នាក់ដែលកំពុងត្រូវការក្ដីស្រឡាញ់ និងការលួងលោម » ។

ចន ធីបភិតស៍ រដ្ឋយូថាហ៍ ស.រ.អា

គោលការណ៍ដែលត្រូវពិចារណា

« ការវិនិច្ឆ័យអវិជ្ជមាន »

ការឆាប់វិនិច្ឆ័យអាចរារាំងយើងពីការមើលឃើញសក្ដានុពលដ៏ទេវភាព ( សូមមើល ម៉ាថាយ ៧:១ ) ។

« ចាក់ព្រះវិញ្ញាណរបស់ទ្រង់មក »

សូមទុកចិត្តដល់ការសន្យារបស់ព្រះដែលប្រទានដល់យើងនូវអ្វីដែលត្រូវនិយាយនៅក្នុងគ្រានោះឯង ( សូមមើល គោលលទ្ធិ និងសេចក្ដីសញ្ញា ១០០:៥–៦ ) ។

« បានរៀន »

សូមសួរពីអ្វីដែលអ្នកផ្សេងទៀតជឿ ស្ដាប់ដោយមេត្តាធម៌, ហើយនិយាយពីជំនឿរបស់ពួកគេដោយសេចក្តីថ្លៃថ្នូរ ។

« បានថ្លែងទីបន្ទាល់ »

ចូរស្វែងរកឱកាសនានាដើម្បីចែកចាយទីបន្ទាល់អំពីរបៀបដែលព្រះអម្ចាស់ធ្វើការក្នុងជីវិតអ្នក ( សូមមើល ម៉ូសាយ ២៤:១៤ ) ។

« បានលើកទឹកចិត្ត »

អញ្ជើញពួកគេឲ្យធ្វើសកម្មភាពលើសេចក្ដីពិត ដើម្បីឲ្យព្រះវិញ្ញាណបរិសុទ្ធអាចថ្លែងទីបន្ទាល់ដល់ពួកគេ ( សូមមើល យ៉ូហាន ៧:១៧, មរ៉ូណៃ ១០:៥ ) ។

ការជួយសង្គ្រោះដល់សមាជិកដែលត្រឡប់មកវិញ

« ដោយមានសេចក្ដីស្រឡាញ់ជាការជំរុញទឹកចិត្ត នោះអព្ភូតហេតុជាច្រើននឹងកើតមានឡើង ហើយយើងនឹងរកឃើញវិធីជាច្រើនដើម្បីនាំបងប្អូនប្រុសស្រី ‹ ដែលបានវង្វេង › របស់យើងឲ្យមករួមចំណែកក្នុងការឱបក្រសោបនៃដំណឹងល្អរបស់ព្រះយេស៊ូវគ្រីស្ទវិញ » ។ —ជីន ប៊ី ប៊ីងហាំ^៣

« ខ្ញុំបានអសកម្មយ៉ាងហោចណាស់ប្រាំមួយឆ្នាំ ពេលដែលស្វាមីខ្ញុំ និងខ្ញុំបានផ្លាស់ប្ដូរទៅក្រុងថ្មីមួយ ។ ប្រធានសមាគមន៍សង្គ្រោះថ្មីរបស់ខ្ញុំបានមកលេងខ្ញុំ ហើយសួរខ្ញុំប្រសិនបើគាត់អាចបញ្ជូនបងស្រីម្នាក់មកសួរសុខទុក្ខខ្ញុំ ។ ខ្ញុំបានយល់ព្រមដោយមានការភិតភ័យបន្តិចផង ។ បងស្រីនេះបានមកសួរសុខទុក្ខខ្ញុំជារៀងរាល់ខែ ទោះគាត់មានប្រតិកម្មនឹងឆ្កែក្ដី—ហើយខ្ញុំមានឆ្កែមួយដែលចូលចិត្តប្រឡែងលេងណាស់ ! ការងារបម្រើរបស់គាត់បន្តអស់ពីរឆ្នាំ ហើយវាមានឥទ្ធិពលដ៏ធំធេងមកលើខ្ញុំ ។

ទោះបីការសួរសុខទុក្ខរបស់គាត់ជានិច្ចកាលគឺជាការនិយាយលេងក្ដី ក៏ម្ដងម្កាលគាត់បានសួរខ្ញុំនូវសំណួរទាំងឡាយដែលនាំយើងទៅកាន់ការសន្ទនាខាងវិញ្ញាណ ។ វាធ្វើឲ្យខ្ញុំមានអារម្មណ៍មិនស្រណុកចិត្តបន្តិចដែរ តែវាបានបំផុសខ្ញុំឲ្យសម្រេចចិត្តថាតើខ្ញុំចង់ឈានទៅមុខជាមួយនឹងដំណឹងល្អ ឬនៅនឹងកន្លែងដែលខ្ញុំនៅ ។ ការសម្រេចចិត្តនេះគឺជាការលំបាកមួយសម្រាប់ខ្ញុំ ប៉ុន្តែខ្ញុំបានជ្រើសរើសយកការជួបជាមួយនឹងពួកអ្នកផ្សព្វផ្សាយសាសនាជាស៊ីស្ទើរ ។

នៅថ្ងៃដែលខ្ញុំបានទៅចូលរួមការប្រជុំសាក្រាម៉ង់ជាលើកទីមួយក្នុងរយៈពេលប្រាំមួយឆ្នាំ ខ្ញុំមានការភ័យខ្លាចនឹងដើរចូលទៅខាងក្នុង ។ នៅពេលខ្ញុំបានដើរចូលទៅក្នុងព្រះវិហារ បងស្រីដែលផ្ដល់ការងារបម្រើដល់ខ្ញុំបានរង់ចាំខ្ញុំ ហើយគាត់បានដើរជាមួយខ្ញុំចូលទៅក្នុងរោងជំនុំ ។ ក្រោយមកទៀត គាត់បានដើរទៅឡានជាមួយខ្ញុំ ដោយសួរខ្ញុំថាតើគាត់អាចធ្វើអ្វីសម្រាប់ខ្ញុំដើម្បីជួយខ្ញុំឲ្យបានល្អបំផុត កាលដែលខ្ញុំខិតទៅកាន់តែជិតព្រះអង្គសង្គ្រោះ ។

ពេលវេលា និងក្ដីស្រឡាញ់របស់បងស្រីដែលផ្ដល់ការងារបម្រើដល់ខ្ញុំ បានជួយដឹកនាំខ្ញុំឲ្យត្រឡប់ទៅសកម្មវិញ ហើយខ្ញុំចាត់ទុកកិច្ចខិតខំរបស់គាត់ថាជាអំណោយដ៏អស្ចារ្យបំផុតមួយដែលបានផ្ដល់ដល់ខ្ញុំ ។ ខ្ញុំមានអំណរគុណដែលគាត់បាននៅទីនោះក្បែរខ្ញុំ នៅលើផ្លូវត្រឡប់ទៅកាន់សាសនាចក្ររបស់ព្រះអង្គសង្គ្រោះវិញ ។

ឈ្មោះត្រូវបានដកចេញ ប្រ៊ីធីស កូឡុំបៀ កាណាដា

គោលការណ៍ដែលត្រូវពិចារណា

« បានមកសួរសុខទុក្ខខ្ញុំជារៀងរាល់ខែ ទោះគាត់មានប្រតិកម្មនឹងឆ្កែក្ដី »

តើអ្នកបង្ហាញថាអ្នកខ្វល់ខ្វាយចំពោះពួកអ្នកដែលអ្នកផ្ដល់ការងារបម្រើជាអ្វីៗផ្សេងទៀតដោយរបៀបណា ? ( សូមមើល គោលលទ្ធិ និងសេចក្ដីសញ្ញា ១២១:៤៤ ) ។

« សំណួរ »

ការសួរសំណួរត្រឹមត្រូវអាចជួយបណ្ដាលឲ្យមានការវ៉ាស់វែងផ្ទាល់ខ្លួន ។ ចូរចងចាំថា ការងារបម្រើរបស់យើងមានគោលបំណងមួយដែលហួសពីការគ្រាន់តែនិយាយលេង ។^៤

« រង់ចាំខ្ញុំ »

គ្រប់គ្នាគួរមានអារម្មណ៍ថាត្រូវបានស្វាគមន៍ ( សូមមើល នីហ្វៃទី៣ ១៨:៣២ ) ។

« នៅទីនោះក្បែរខ្ញុំ នៅលើផ្លូវត្រឡប់ »

ការគាំទ្ររបស់យើងអាចធ្វើឲ្យមានការផ្លាស់ប្ដូរដ៏សំខាន់មួយដល់អស់អ្នកដែលមានការលំបាកក្នុងការត្រឡប់មកកាន់ព្រះអង្គសង្គ្រោះ ហើយបានជាសះស្បើយវិញ ( សូមមើល ហេព្រើរ ១២:១២–១៣ ) ។

ការងារបម្រើ និងការប្រមូលផ្ដុំ

« តាមវិធីណាក៏ដោយដែលវាងាយស្រួលសម្រាប់បងប្អូន សូមចែកចាយជាមួយនឹងមនុស្សអំពីមូលហេតុដែលព្រះយេស៊ូវគ្រីស្ទ និងសាសនាចក្ររបស់ទ្រង់សំខាន់ចំពោះបងប្អូន ។ …

« … តួនាទីរបស់បងប្អូនគឺចែកចាយនូវអ្វីដែលមានក្នុងចិត្តបងប្អូន ហើយរស់នៅតាមដោយខ្ជាប់ខ្ជួននឹងជំនឿរបស់បងប្អូន » ។ —អែលឌើរ ឌៀថើរ អេស្វ អុជដូហ្វ^៥

ការងារបម្រើ និងការចែកចាយដំណឹងល្អដើរជាមួយគ្នា ។ នេះជារបៀបមួយចំនួនដែលយើងអាចប្រមូលផ្ដុំមិត្តភក្ដិ និងអ្នកជិតខាងយើងខណៈពេលយើងផ្ដល់ការងារបម្រើ—ឬផ្ដល់ការងារបម្រើខណៈពេលយើងប្រមូលផ្ដុំមិត្តភក្ដិ និងអ្នកជិតខាងយើង ៖

បម្រើជាមួយគ្នា ។ ស្វែងរកឱកាសនានាដើម្បីអញ្ជើញមិត្ត ឬអ្នកជិតខាងម្នាក់ឲ្យចូលរួមជាមួយអ្នកក្នុងការងារបម្រើដល់នរណាម្នាក់ដែលត្រូវការជំនួយ ។ សួរពួកគេឲ្យជួយអ្នករៀបចំអាហារមួយពេលសម្រាប់ម្ដាយថ្មីម្នាក់ ជួយថែទីធ្លារបស់អ្នកជិតខាងជរាមួយរូប ឬសម្អាតផ្ទះនរណាម្នាក់ដែលឈឺ ។
បង្រៀនជាមួយគ្នា ។ ពិចារណាពីការអញ្ជើញមិត្តភក្ដិ ឬអ្នកជិតខាងម្នាក់ដែលពុំចូលរួមញឹកញាប់ឲ្យផ្ដល់កន្លែងសម្រាប់បង្រៀនមេរៀនអ្នកផ្សព្វផ្សាយសាសនានៅក្នុងផ្ទះរបស់ពួកគេសម្រាប់នរណាម្នាក់ដែលជួបជាមួយពួកអ្នកផ្សព្វផ្សាយសាសនា គាំទ្រដល់អ្នកក្នុងការបង្រៀនមេរៀនមួយនៅផ្ទះអ្នក ឬក៏ទៅបង្រៀនមេរៀនមួយជាមួយអ្នកនៅផ្ទះអ្នកផ្សេងទៀត ។
ឈោងទៅជួយ ។ បន្ថែមលើការងារបម្រើដល់ពួកអ្នកដែលអ្នកត្រូវបានចាត់ឲ្យផ្ដល់ការងារបម្រើ អ្នកក៏អាចឈោងទៅជួយអ្នកផ្សេងទៀតពេលអ្នកឃើញថាត្រូវការជំនួយដែរ ។ ឲ្យពួកគេជិះជាមួយទៅប្រជុំនៅព្រះវិហារ ។ អញ្ជើញកូនៗរបស់ពួកគេឲ្យចូលរួមសកម្មភាពយុវវ័យ ឬកុមារ ។ តើមានវិធីអ្វីផ្សេងទៀតដែលអ្នកអាចផ្ដល់ការងារបម្រើ និងប្រមូលផ្ដុំបានទេ ?
ប្រើប្រាស់ធនធានដែលសាសនាចក្របានផ្ដល់ឲ្យ ។ សាសនាចក្រផ្ដល់នូវធនធានជាច្រើនសម្រាប់សមាជិកដើម្បី ជួយពួកគេក្នុងការចែកចាយដំណឹងល្អ ។ អ្នកអាចរុករកផ្នែក « អ្នកផ្សព្វផ្សាយសាសនា » នៅក្នុងកម្មវិធី បណ្ណាល័យដំណឹងល្អ មើលវីដេអូ « Come and See » ( នៅគេហទំព័រ ChurchofJesusChrist.org/go/12011 ) និងចូលមើលគេហទំព័រ ComeUntoChrist.org សម្រាប់គំនិតអំពីរបៀបដើម្បីប្រមូលផ្ដុំវង្សអ៊ីស្រាអែលនៅក្នុងសហគមន៍អ្នក ។