គោលការណ៍នៃការងារបម្រើ
ការងារបម្រើតាមរយៈកម្មវិធីកុមារ និងយុវវ័យ
ការអញ្ជើញអ្នកផ្សេងទៀតឲ្យលូតលាស់ និងការជួយពួកគេនៅតាមផ្លូវ គឺសំខាន់ណាស់នៅក្នុងការងារបម្រើ ។
រូបថតដោយ ថម ហ្កាន័រ
ឱកាសជាច្រើនសម្រាប់ការផ្ដល់ការងារបម្រើតាមរយៈកម្មវិធីកុមារ និងយុវវ័យ ។ ប្រហែលជាបងប្អូនមានកូនៗជាកុមារ ឬជាយុវវ័យរបស់បងប្អូនផ្ទាល់នៅផ្ទះ ។ ប្រហែលជាបងប្អូនជាអ្នកដឹកនាំម្នាក់នៅក្នុងកម្មវិធីនោះ ឬបងប្អូនផ្ដល់ការងារបម្រើដល់គ្រួសារដែលមានក្មេងតូចៗ និងយុវវ័យ ។ ឬប្រហែលជាបងប្អូនស្គាល់កុមារ និងយុវវ័យមួយចំនួន ( សរុបទៅគឺស្ទើរតែយើងទាំងអស់គ្នា ) ។ មិនថាស្ថានភាពរបស់បងប្អូនបែបណានោះទេ មានរបៀបជាច្រើនក្នុងការប្រើប្រាស់កម្មវិធីនេះ ឬគោលការណ៍របស់វាដើម្បីផ្ដល់ពរជ័យដល់ជីវិតរបស់មនុស្សដទៃទៀត ។
ការអភិវឌ្ឍខ្លួនយើងជាមួយគ្នា
ចំនុចសំខាន់នៃកម្មវិធីកុមារ និងយុវវ័យ គឺផ្ដោតទៅលើការព្យាយាមជារៀងរាល់ថ្ងៃ ដើម្បីក្លាយឲ្យកាន់តែដូចជាព្រះអង្គសង្គ្រោះ ដែលបានផ្ដល់ការងារបម្រើយ៉ាងល្អឥតខ្ចោះ ។ មនុស្សជាច្រើនក្នុងចំណោមពួកអ្នកដែលបានចូលរួមក្នុងកម្មវិធីនេះបានរៀនថា បងប្អូនកាន់តែរីកចម្រើនក្នុងចំណុចនានាក្នុងជីវិតរបស់បងប្អូនច្រើនប៉ុណ្ណា នោះបងប្អូនត្រូវបានរៀបចំកាន់តែប្រសើរឡើងប៉ុណ្ណោះដែរ ដើម្បីជួយ ឬផ្ដល់ការងារបម្រើដល់អ្នកដទៃទៀត ។
ប៉ុន្តែជាមួយនឹងកម្មវិធីកុមារ និងយុវវ័យ ការផ្ដល់ពរជ័យដល់មនុស្សដទៃទៀត ពុំចាំបាច់ចាំទាល់តែបងប្អូនបានរៀនអ្វីមួយហើយនោះទេ ។ ទង្វើនៃការរៀនសូត្រផ្ទាល់ផ្ដល់នូវឱកាសទាំងឡាយដើម្បីផ្ដល់ការងារបម្រើ ។
សម្រាប់យុវជនម្នាក់ឈ្មោះប្រូហ្វីត រស់នៅប្រទេសហ្កាណា ដែលដាក់គោលដៅនៅក្នុងកម្មវិធីកុមារ និងយុវវ័យ ដើម្បីរៀនពីរបៀបលេងព្យាណូ គឺគ្រាន់តែជាការចាប់ផ្ដើមប៉ុណ្ណោះ ។ ប្រូហ្វីតនិយាយថា « វាជាគោលដៅរបស់ខ្ញុំផងដែរ ដើម្បីជួយមនុស្សដទៃទៀតឲ្យដឹងពីអ្វីដែលខ្ញុំកំពុងរៀន » ។
ទោះបីជាគាត់មិនទាន់ជាគ្រូបង្រៀននៅឡើយ ក៏គោលដៅរបស់គាត់បានលូតលាស់ជាអ្វីមួយដែលកាន់តែធំជាងការដែលគាត់បានស្រមៃរួចទៅហើយ ។ ឥឡូវនេះមានសិស្ស ៥០នាក់កំពុងរៀនព្យាណូនៅសាលជំនុំជាមួយនឹងប្រូហ្វីតដែរ ។ ហើយនរណាកំពុងបង្រៀនប្រូហ្វីត និងសិស្ស ៥០នាក់នោះ ? អាឡិចសាន់ឌឺ អិម និង ខេវិន អិម ទាំងពីរនាក់អាយុ ១៣ ឆ្នាំ ។ ខេវិននិយាយថា « យើងចង់បង្ហាញទង្វើសប្បុរសដល់មនុស្សដទៃទៀត » ។
បីថ្ងៃក្នុងមួយសប្ដាហ៍ យុវជនទាំងពីរនាក់នេះបង្រៀនមេរៀនព្យាណូជាមូលដ្ធានចាំបាច់ដោយឥតគិតថ្លៃដល់អ្នកទាំងអស់ណាដែលមករៀន ។ វាមាននូវអត្ថប្រយោជន៍បន្ថែមលើមេរៀនព្យាណូនោះ ។ សិស្សមួយចំនួនដែលត្រូវបានណែនាំឲ្យស្គាល់សាសនាចក្រតាមរយៈមេរៀនព្យាណូ ក្រោយមកបានសិក្សាដំណឹងល្អ ហើយបានសម្រេចចិត្តទទួលបុណ្យជ្រមុជទឹក ។
កាលដែលយើងខិតខំអភិវឌ្ឍខ្លួនយើង នោះយើងអាចផ្ដល់ការងារបម្រើដល់មនុស្សដទៃទៀតដោយការអញ្ជើញពួកគេឲ្យចូលរួមនឹងយើង ។
រូបថតដោយ ចូណាស រេប៊ីកគី
រូបមន្ដដ៏ជោគជ័យមួយសម្រាប់ការងារបម្រើ
ពេលដែល សាប៊្រីណា ស៊ីមួយស៍ ដេអ៊ូស អ័រហ្គូស្តូ នៅទីក្រុងឃើរីទីបា ប្រទេសប្រេស៊ីល ជាប្រធានអង្គការបឋមសិក្សាប្រចាំស្តេកម្នាក់បានមើលឃើញពីរបៀបដែលទស្សនៈវិស័យនៃការអភិវឌ្ឍផ្ទាល់ខ្លួនរបស់កម្មវិធីផ្ដល់ពរជ័យដល់កុមារ និងយុវវ័យនៅក្នុងស្តេករបស់គាត់ ។ ប៉ុន្តែគាត់ក៏បានឃើញរបៀបជាច្រើនទៀត ដើម្បីប្រើប្រាស់នូវអ្វីដែលគាត់បានរៀនអំពីការអភិវឌ្ឍផ្ទាល់ខ្លួននៅក្នុងការចាត់តាំងរបស់គាត់ ក្នុងនាមជាបងប្អូនស្ត្រីដែលផ្ដល់ការងារបម្រើម្នាក់ផងដែរ ។
ស៊ីស្ទើអ័រហ្គូស្តូយាយថា « ពេលខ្ញុំអភិវឌ្ឍទេពកោសល្យមួយ ខ្ញុំអាចប្រើប្រាស់ទេពកោសល្យនោះដើម្បីផ្ដល់ពរជ័យដល់មនុស្សម្នាក់ដែលខ្ញុំផ្ដល់ការងារបម្រើ » ។
ស៊ីស្ទើអ័រហ្គូស្តូនបង្រៀនប្អូនស្រីម្នាក់ក្នុងចំណោមបងប្អូនស្រីដែលគាត់ត្រូវបានចាត់តាំងឲ្យ បម្រើអំពីរបៀបធ្វើនំសូកូឡា ។ ឥឡូវនេះ ប្អូនស្រីនោះធ្វើ និងលក់នំដើម្បីជួយរកចំណូលបន្ថែមដល់គ្រួសារគាត់ ។ ស៊ីស្ទើរអ័រហ្គូស្តូននិយាយថា « ប៉ុន្មានខែក្រោយមក ខ្ញុំត្រូវបានប្រទានពរ ពេលដែលប្អូនស្រីម្នាក់ទៀតបានបង្រៀនខ្ញុំឲ្យធ្វើនំប៉័ងទឹកឃ្មុំដែលខ្ញុំអាចលក់បាន » ។ « ការអភិវឌ្ឍ និងការចែកចាយទេពកោសល្យរបស់យើង អាចផ្ដល់ពរដល់ជីវិតគ្នាទៅវិញទៅមក និងពង្រឹងដល់ចំណងទាក់ទងរបស់យើង នៅក្នុងនាមជាបងប្អូនស្រីដែលផ្ដល់ការងារបម្រើ » ។ ◼