O le Talaiga a Polika Iaga

O Polika Iaga o le Peresitene lona lua o le Ekalesia a Iesu Keriso o le Au Paia o Aso e Gata Ai, o lå na faatuina ma fausia se setete o le Au Paia o Aso e Gata Ai i Amerika i Sisifo, ma o se tane ma se tama faamaoni. O ia o se soo ma se Aposetolo faatuatuaina a le Alii o Iesu Keriso. “O Iesu o lo tatou kapeteni ma le taitai,” o lana molimau lea (DNW, 24 Me 1871, 5). “Ua tuuina atu lo’u faatuatua i luga o le Alii o Iesu Keriso, ma sa ou maua mai lo’u atamai ma le malamalama mai ia te ia,” na ia faamautinoa mai ai (DNW, 21 Nov. 1855, 2). Na taulai atu lona soifua i le fausiaina ma le lagolagoina o le malo o le Alii o Iesu Keriso i le lalolagi.

O Aoaoga mai le soifuaga o Polika Iaga

Aoaoina e ala i le galue malosi

Na soifua mai Polika Iaga i Vermont i le 1801, o le lona iva o le fanau e 11 a Ioane ma Apikaila Howe Iaga. Na tuputupu ae o ia i le vaomatua i le totonugalemu o le setete o Niu Ioka, i le mea na avea ai le fale o lo latou aiga ma le fanua na siomia ai, ma ona faleaoga (tagai DNW, 22 Apr. 1857, 4). Sa matitiva ona matua, na ia saunoa mulimuli ane ai. “Matou te lei mauaina lava se avanoa mo ni aoaoga aloaia i lo matou talavou, peitai na matou maua se avanoa faamamaluina i le la’uina o lala laau, tatuuina i lalo o laau, faataavaleina o ogalaau, ma galulue i a’a o laau, ma totoulia ai tuasivi o o matou vae, o alofivae ma tamatamaivae” (DNW, 12 Aug. 1857, 4). Sa galue malosi Polika Iaga e fesoasoani i le faamamaina o le fanua, toto faatoaga, ma fesoasoani i feau i le fale. Na te lei faagaloina lava le aoaoga faavae lå masuia a lona tama, po o le ala na “aoaoina ai e lona tina lana fanau i taimi uma ina ia ava ma migao i le suafa o le Tama ma le Alo, ma ia faaaloalo i le [Tusi Paia]; sa ia faapea mai, Faitau i ai, tausisia ona mataupu, ma faaaoga i o outou olaga i le mea e gata mai ai lo outou mafai; ia faia mea uma e lelei; aua nei faia se mea leaga; ma afai tou te vaaia ni tagata o faanoanoa, ia galulue i mea o loo latou manaomia” (MSS, 1853, 55). Na maliu le tina o Polika ae faatoa 14 ona tausaga.

Ina ua atoa le 16 o Polika, sa avea o ia ma se kamuta faataitai, o se tasi e faamaeaina galuega faakamuta i totonu e pei o faitotoa, fasitepu, ma isi mea faapena, vali fale, ma tagata foi e tipiina ma faapipii tioata o faamalama. Sa mitamita o ia i galuega a ona lima ma sa ia faapea mai ai na ia manatu o le “faamaoni, galue faamoemoeina o mea ia e tatau ona manaomia e i latou sa faafaigaluegaina au” ina ia avea “o se vaega o la’u lotu” (Brigham Young to George Hickox, 19 Feb. 1876, BYP).

Ina ua atoa lona 23, sa ia faaipoipo atu ia Miriama Angeline Works. Na la fanauina ni tama teine se toalua. Sa tausia e Polika lona aiga i le faia ma faafou nofoa, o laulau, ma kapoti ma faapipii faamalama, o faitotoa, o fasitepu, ma afi faamafanafana i totonu o fale. I le faatoaga a lona tama i Mendon, i Niu Ioka, na ia fausia ai se fale ma se fale kamuta i tafatafa o se tamai vaitafe, sa faaaoga ai se vilivai e maua ai le malosiaga mo ana masini ili laupapa.

Ina ua faataotolia Miriama i le gasegase o le fatafata vaivai, sa tauaveina e Polika le tele o galuega a lona toalua e faaopoopo i ana lava foi galuega. Ina ua faateteleina lona gasegase ma ua le mafai ai ona tula’i, e saunia e le aunoa e Polika meaai i le taeao mo le aiga, fai lavalava o ona afafine, faamama le fale, ma “sii lona toalua i lona nofoa faalue i tafatafa o le afi faamafanafana, ma tuu ai iina seia oo ina toe foi ane i le afiafi,” ona ia kukaina lea o le meaai i le afiafi, faamomoe lona aiga, ma faauma feau i totonu o le fale (LSBY, 5). O ona tomai i lona talavou ma popofou o le la ulugalii i le tausiga o fanau ma taulimaina se aiga na aoaoina ai o ia i mea e tele e uiga i le fegalegaleiga faaleaiga ma le teuina o le fale. I tausaga mulimuli ane, na ia fautuaina ai le Au Paia e uiga i nei mataupu ma sa ia talasua ai e sili atu o ia “nai lo le tele o fafine o le [nuu] i le teuina o fale”(DNW, 12 Aug, 1857, 4).

Mauaina o se molimau i le Agaga

Na auai atu Polika ma Miriama i le Ekalesia Metotisi i le tausaga na la faaipoipo ai, peitai na faaauau pea ona tauivi Polika ma fesili faalelotu. Sa ia sailia se ekalesia e faatulagaina e tusa ai ma le faatulagaga na faatuina e Iesu, e pei o le Feagaiga Fou i le “faiga o sauniga” (DNW, 19 Iulai 1866, 3) ma meaalofa uma o le talalelei. Talu ai taumafaiga faafaifeautalai a Samuelu le uso o Iosefa Samita, o lea na maua ai e le aiga o Polika Iaga ni kopi se lua o le Tusi a Mamona i le masina o Aperila, 1830, ae faatoa tasi le masina talu ona lomia le tusi. Sa faitauina e nisi o uso ma tuafafine o Polika ma tautino atu lona moni, peitai e lei taliaina loa lava e Polika lava ia (tagai LL, 33).“‘Faatali,’ o la’u tala lea … ’Faatali sei toeitiiti; o le a le aoaoga a le tusi, ma faaaliga na tuuina mai e le Alii? Tuu mai sei ou suesue i ai ma lo’u loto.’ … Sa ou suesueina lea tulaga ma le malosi, mo le lua tausaga, a o lei tonu i lo’u mafaufau e talia lena tusi. Sa ou iloaina e moni, ma sa faapea foi ona ou iloa e mafai ona ou vaaia i o’u mata, pe lagona i le tago atu o o’u tamatamailima, po o soo se faaaogaina foi o soo se senisori. A na le o le tulaga lea, semanu ou te le taliaina lava e oo mai i le aso (MSS, 15:45).

Sa tatau ona silafia e Polika Iaga lava ia. Mulimuli ane sa ia aoao atu ai i le Au Paia, e lei faamoemoe le Atua ina ia “taitaiina atoatoa i latou e se tasi tagata, ma le faaaogaina ai lo latou malamalama, ma faapipii atu ai lo latou faatuatua i luga o se tauau o se tasi” (DNW, 24 Aug. 1854, 1). “O lo’u tiute lo’u iloa o le mafaufau o le Alii mo au lava ia,” na ia saunoa atu ai ia te i latou (DNW, 22 Sept. 1875, 4). “O la outou matafaioi ma le tiute ina ia outou iloa ai pe a fetalaia mai le afioga a le Alii ia te outou ma faaalia mai le finagalo o le Alii ia te outou” (DNW, 22 Sept. 1875, 4).

Sa i ai ni faifeautalai mai se paranesi o le Ekalesia i Columbia, i Pennsylvania, na malaga atu i Mendon i le 1831, ma folafola atu ua avanoa le lagi ma ua toefuataiina mai le talalelei ma le perisitua paia e ala mai ia Iosefa Samita. Ina ua maea se asiasiga a Polika ma isi tagata o le aiga ma uo i le Paranesi a Columbia, na talitonu o ia ua ia maua le lotu ua leva ona ia sailia, peitai sa ia tauivi e filifili pe mafai ona ia ositaulagaina mea uma mo lena. A o tuuina mai le molimau a se tasi o faifeautalai, sa “faasusulu mai i lena tagata lo’u atamai, ma sa tu mai i o’u luma le malamalama, mamalu, ma le tino ola pea,” na ia manatua ai. Fai mai a ia, na siomia o ia ma ua faatumuina ai, ma sa ia iloaina e ia lava, e moni le molimau a lea alii (DNW, 9 Feb. 1854, 4). I le aso 15 o Aperila 1832, na papatiso ai Polika Iaga i lona lava vaitafe itiiti o lana ili laupapa, sa faamauina, ma faauuina ai o se toeaina (tagai DNW, 2 Apr. 1862, 1). “E tusa ai ma afioga a le Faaola, sa ou lagonaina se agaga lotomaualalo, pei se tamaitiiti, o molimau mai ia te au ua faamagaloina a’u agasala,” na ia tomanatu ai (MHBY-1, 3). Na ulu ifo Miriama i le vai o le papatisoga pe tusa ma le tolu vaiaso mulimuli ane ai (MHBY-1, 3). Na papatisoina uma lava le aiga patino o Polika Iaga, ma sa tumau lo latou faamaoni o ni Au Paia o Aso e Gata Ai.

I le tau faaiuiu o le taumafanafana i le 1832, ina ua toe taliu mai i ni malaga faafaifeautalai i atunuu tau lalata ane, sa tausia e Polika ia Miriama i nai vaiaso mulimuli o lona gasegase. Na maliu o ia i le masina o Setema i le 1832.

Ositaulaga e atinae ma puipuia ai le malo o le Atua

Na liliu atu Polika Iaga ma lona malosi atoa i le Ekalesia. O lona naunau e feiloai atu i le Perofeta o Iosefa Samita, o lea na ia tuua ai loa lava mo Katelani, Ohio, ma lona uso matua o Iosefa ma lana uo mamae o Heber C. Kimball. Na latou maua atu Iosefa o tata fafie ma ona uso. Na matua “faatumulia [Polika] i le olioli ona o se avanoa maualuga ua ia faatalofa ai ma le Perofeta a le Atua” ma maua ai “le molimau moni, e ala i le Agaga o perofetaga, o ia lava o lå ua tatau ona talitonu i ai soo se tagata, o se Perofeta moni” (MHBY-1, 4). Ua faapine ai i lenei mea, le amataga o se tasi o fegalegaleaiga aupito taua a Polika Iaga. Ina ua toe taliu atu o ia i Niu Ioka, na ia foaiina atu le tele o ana mea totino ma faaitiitia lana pisinisi ina ia mafai ai ona tuuina atu le tele o lona taimi i le Ekalesia. Ina ua ia mautinoa o le a tausia e Vilate Kimball, le faletua o Heber, ona afafine, o lea na ia auauna atu ai i ni misiona . Na ia faia ni fonotaga po o sauniga ma faia papatisoga i nuu i tua o loo siomia ai Mendon. Na ia malaga foi i luga i Niu Ioka ma Onatario, i Kanata, e folafola atu le talalelei ma tuuina atu lana molimau o Iosefa Samita o se perofeta a le Atua.

Ona o le manao e usitai i le fautuaga a le Perofeta e faapotopoto faatasi ma le Au Paia, o lea na siitia atu ai Polika Iaga ma lona aiga ia Setema i le 1833 mai Mendon i Katelani. O iina, na maua ai e Polika “le avanoa maualuga e faalogologo ai i aoaoga a le Perofeta ma fiafia ai i le faalapotopotoga a le Au Paia, ma galue malosi i [lana] matata masani” (MHBY-1,7). Na fesoasoani o ia e fausia fale, le Malumalu o Katelani, ma le tele o fale o tagata lautele.

I le aso 18 o Fepuari i le 1834 sa ia faaipoipo atu ai ia Mary Ann Angell, ma i le sefulu tausaga na sosoo ai sa fanauina ai se fanau e toaono i lo latou aiga. O Mary Ann e pei ona faamaumauina e Polika, “e galue faamaoni mo le lelei o lo matou aiga ma le malo” (MHBY-1, 8).

I lona i ai i Katelani (1833–38), sa iloa ai e Polika o le faatuina o le malo o le Atua e manaomia ai le usiusitai ma le ositaulaga. I le tautotogo o le 1834, sa ia ofoina atu ai e savavali ma le vaega e taua o le Tolauapiga a Siona, o se vaega o ni alii e 205 sa sailia e Iosefa Samita e aveina atu fesoasoani mo le Au Paia ua tulia ese mai o latou aiga i Jackson County, Missouri.“Sa matou savalia le lua afe maila,” sa taua e Polika Iaga (DNW, 8 Oct. 1856,2). Sa ia manatua, ona o le faigata naua ma lo latou mamai, “o lea sa i ai tagata faitio i lena tolauapiga.” Sa manaomia le aoaoina o alii i le onosai ma le galulue faatasi ma o lea, sa faapea mai ai Polika , “O Iosefa (Samita) sa taitai, aoao, ma fautuaina le aumalaga,” aemaise alii ua iai le agaga lå mautonu, lå fiafia ma le musua” (DNW, 3 Dec. 1862, 1). O le faigata o le faigamalaga sa faamalosia ai le faamaoni o Polika ia Iosefa Samita ma maua mai ai aoaoga lå mafaatauina o le usiusitai i le Atua ma Lana perofeta (tagai DNW, 3 Aug. 1854, 2).

E toaiva tagata matutua o le vaega ua taua o le Tolauapiga a Siona, e aofia ai ma Polika Iaga, sa filifilia e avea ma uluai Korama o Aposetolo e Toasefululua i se konafesi faapitoa i le aso 14 Fepuari 1835 (vaai MFF 18:26–32). Sa faauuina Polika Iaga i le faaee atu iai o aao ma tuuina atu ina ia “ia alu atu ma faapotopoto e ua filifilia, e saunia ai mo le aso sili o le afio mai o le Alii.” O ia ma isi sui o le Korama, sa valaauina e talai le Talalelei a le Alo o le Atua i nuu uma o le lalolagi” (HC, 2:196), sa tuua ia Me i le 1835 mo se misiona e fa masina i setete i sasae o Amerika. Sa ia toe foi atu i setete i sasae, o se faifeautalai i le vaitaimi o le taumafanafana o le 1836 ma le 1837.

Sa vaavaaia e le Susuga a Iaga le valiina ma galuega faaiu o le malumalu i Katelani. Sa i ai o ia ina ua tuuina atu e Iosefa Samita uluai sauniga iina, ma sa ia auai i sauniga o le faapaiaga ia Mati 1836 faatasi ai ma le selau o le Au Paia o e na faia ni osigataulaga tele mo le fausiaina o le uluai malumalu i lenei tisipenisione (vaai MHBY-1, 12; HC, 2:428).

Ao le i loloto le lagona o Elder Iaga e faatatau i le galulue faatasi e tulai mai i nei aoaoga, e toatele e sa le fiafia ma e sa leotetele lo latou tetee i le Perofeta ma taumafai e aveese faamalosi mai ia te ia le taitaiga o le Ekalesia. Ia Ianuari 1838 sa faafetaiaia ai o ia e nei tagata liliuese i le Malumalu i Katelani: “Sa ou tulai, ma i se lagona faigofie ae malosi sa ou ta’u atu ai ia te i latou o Iosefa Samita o se Perofeta, ma sa ou iloa, o le a latou tetee malosi ma faaleaga ia te ia i le malosi latou te mafaia, ae le mafai ona latou faaleagaina le filifiliga o le Perofeta a le Atua, ua na ona latou faaleaga i lo latou mamalu, vavaeeseina mai la latou sootaga ma le Perofeta a le Atua ma faagotoina i latou i seoli” (MHBY-1, 16).

Tauamoina o le tiutetauave.

Sa manatua e Polika Iaga le nofonofo ma Iosefa Samita “i le tele o po e faatalitali osofaiga a tagata faatupu faalavelave o å sa saili e fasioti i le Perofeta” (DNSW, 15 May 1877, 1). Sa lei faaluafesasi lona lagolagoina o le Perofeta, ma sa faapea ai foi ona taumafai ia tagata liliuese, e pei ona ia taua, “sa faamatau ina ia faaumatia au” (MHBY-1, 23–24). Sa ia tuua Katelani ma alu atu i sisifo o Misuri, ma faatasi atu ia Iosefa Samita ma isi taitai o le Ekalesia ua lamatia lo latou soifua. Ae peitai, ao gasolo atu pea le tele o uso o le Au Paia e nonofo i sisifo o Misuri, sa le manofonofo isi sa nonofo ai iinei, ona o le matatau i tulaga faaupu fai ma le faateleina o le tamaoaiga o le Au Paia. Sa faateleina le feitagai i le taumafanafana ma le tautoulu o le 1838 ma na oo ai i se faaiuga ogaoga na faatonuina ai e le Kovana le militeli e faaumatia le Au Paia o Aso e Gata Ai pe tuliesea mai le setete. O le faafalepuipuiina o Iosefa Samita ma isi taitai iloga ma le liliuese mai o tagata poo le maliliu o nisi o uso o le Korama a le Toasefululua, ua pau atu ai nei ni tiutetauave fou i luga o Polika Iaga, ua avea nei ma Peresitene o le Korama. Ua na o ia ma le Aposetolo o Heber C. Kimball uso o le korama pulefaamalumalu a le Ekalesia o loo totoe e fesoasoani e taitaia le Au Paia i le taimi faigata o le o ese mai Misuri i le taumalulu. I lalo o la laua taitaiga, sa osi feagaiga le Au Paia e fesoasoani i e matitiva, aveese tagata uma o le Au Paia mai le setete, ma saunia e toe faapotopoto.

Sa fausia e le Au Paia na faatafea se aai fou i Commerce, Ilinoi, ma sa latou faaigoaina mulimuli ane o Navu. Sa iai iina Peresitene Iaga mo ni nai masina, ae peitai, ona sa maua e le Perofeta o Iosefa se faaaliga o lea sa valaaulia ai le Korama a le Toasefululua e faia ni misiona i Egelani.

I le tautoulu o le 1839, sa tuua ai e Peresitene Iaga Ilinoi ma le faamoemoe e faataunuuina le valaauga fou e ui ina sa maua o ia ma lona aiga i mai. Sa mulimuli ona ia tau mai, sa le mafai ona ia savali mamao e aunoa ma se fesoasoani, ma sa aioi atu lona tuafafine o Fanny e aua nei alu. Sa ia tali atu:“‘Lou tuafafine Fanny, ou te lei maua muamua se lagona lelei faapenei i lou olaga.’ O ia o se tamaitai uiga ese, ua ia vaai mai ia te au, o loimata i ona fofoga, ma faapea mai ‘ua e pepelo.’ Sa ou le tali atu, ae sa ou naunau e alu i Egelani poo le oti a o taumafai pea. O lau tautinoga maumaututu o le faia o mea e manaomia ai au i le Talalelei o le ola ma le faaolataga, poo lou oti o taumafai pea e faia” (DNSW, 2 Aug. 1870, 1).

E toavalu uso o le Korama a le Toasefululua sa auauna atu faamisiona i Motu o Peretania i le 1840 ma le 1841, ma o Polika Iaga, ao avea ma Peresitene o le Korama, sa taitaiina la latou galuega. I lena tausaga e le galo, sa maualuga le tauleleia o le galuega a le Toasefululua. Ao sauni atu Polika Iaga e tuua ia Liverpool ia Aperila 1841, sa ia manatua ma le agaga faafetai le Atua ma lana “galuega ia te au ma ou uso o le Toasefululua i le tausaga ua tea o lou olaga… . E moni e pei o se vavega i le vaai atu i le eseesega o le matou toai taunuu ma le malaga ese atu ma Liverpool. Sa matou toai taunuu i le tautotogo o le 1840, o ni tagata aumau i nuu ese e leai se tupe, ae ona o le alofa tunoa o le Atua sa matou maua ai le tele o uo, faatuina le Ekalesia i le toeitiiti o aai uma ma taulaga taua i le malo o Peretania Tele, papatiso i le va o le fitu i le valu afe tagata, lomia le 5,000 Tusi a Mamona,3,000 Tusi Pese, 2,500 vaega o le Millennial Star, ma le 50,000 tusi laiti o lesona a faifeautalai, ma fesoasoani e la’u atu tagata e tusa ma le 1,000 i Siona… . ma sa totoina le fatu o le upumoni e faavavau i le faitau afe o agaga, e fua mai ai fua i le paia ma le mamalu o le Atua, e ui ina sa leai se meaai, meainu poo lavalava: o nei mea uma ou te faafetai ai i le aao o le Atua” (MHBY-1, 96–97).

I le tauamoina ma le agaga atoa o tiutetauave fou, e le gata ina sa faateleina ai le atamai faaletagata o Peresitene Iaga ma uso Aposetolo, ae faapea ma le tomai o le korama e galulue faatasi ai ma le atoatoa mo le Ekalesia. Sa faatuatuaina e Iosefa Samita lo latou “tofa mamao tuufaatasi” ma sa faasilasila atu ai i Navu ia Aokuso 1841 “ua oo mai le taimi ua valaauina ai le Toasefululua e tutu mai i o latou tulaga e sosoo ma le Au Peresitene Sili” (HC, 4:403). Sa tuuina atu i le Toasefululua matafaioi sili atu, e aofia ai ma le talaiga o le Talalelei, fesoasoani i le siitia mai o tagata fou, faatauina o fanua, ma le fausiaina o le Malumalu i Navu.

Ao lei maea le fausiaina o le malumalu, sa faailoa atu e Iosefa Samita ia Peresitene Iaga ma isi uso o le Toasefululua e aunoa ma le faalauteleina o sauniga o le malumalu, e aofia ai ma le papatisoga mo e ua maliliu, o faaeega paia, ma faamauga o aiga, e fuafua e aoao atu e le Toasefululua nei sauniga i tagata o le Ekalesia. Sa feiloai le Perofeta ma le Toasefululua i le tautotogo o le 1844 ma tuuina ia i latou uma ki ma le pule e tatau ai e tauave ai i luma le galuega o le malo. “Ua ou tulei ese atu le avega ma le matafaioi o le taitaiina o lenei Ekalesia mai ou tauau i o outou tauau,” sa saunoa atu ai le Perofeta. “O lenei ia outou talia le galuega ma tutulai e pei o ni alii; aua o le Alii o le a ia faamalolo ia te au mo se taimi” (undated Certificate of the Twelve, BYP).

I totonu o le tolu masina sa maliu ai le Perofeta o Iosefa Samita. Ao talai Peresitene Iaga i le taumafanafana i Boston, sa ia iloa ai ua tagatavaleina Iosefa Samita ma Ailama Samaita e se vaega o tagata faatupu faalavelave i Carthage, Ilinoi. Ina ua ia faalogo i le tala, sa ia fesili ia te ia lava “pe ua malaga Iosefa ma ave ki o le malo mai le lalolagi,” ae sa le pine ona ia lagona le faamaoniga o ki o le malo o lo o i ai i le Toasefululua (MHBY-1,171). Sa ia foi vave atu loa i Navu, sa ia iloa ai o le fesoasoani muamua o Iosefa, o Sidney Rigdon, ua ia folafolaina atu na te faaauauina le taitaiga o le Ekalesia, ma ua maea ona valaauina se fono tuufaatasi mo le Au Paia e lagolagoina ai se taitai fou. Sa saunoa manino Peresitene Iaga i le faapotopotoga o le Au Paia ma le malosi:

“I se taimi muamua o lo’u olaga, o se taimi muamua i o outou olaga, o se taimi muamua i le malo o le Atua i le seneturi e 19, ua leai ai se Perofeta i o tatou luma, o lea ou te tulai atu ai i luma e galue i lo’u valaauga e tusa ai ma le Korama o le Toasefululua, o ni Aposetolo a Iesu Keriso i lenei augatupulaga – o Aposetolo ua valaauina e le Atua i faaaliga e ala i le Perofeta o Iosefa, o e ua faamanuiaina ma faauuina e tauaveina ki o le malo o le Atua i le lalolagi atoa.

“ … O lenei, afai tou te mananao ia Sidney Rigdon poo William Law e taitaia outou, poo se isi lava, faitalia outou ma lena mea; ae ou te fai atu ia te outou, i le suafa o le Alii e le mafai e se tagata ona tuu se isi tagata i le va o le Toasefululua ma le Perofeta o Iosefa. Aisea? Aua o Iosefa o le taitai sili, ma ua ia tuuina atu atoatoa i o latou lima ki o le malo o le Atua i lenei tisipenisione mulimuli, mo le lalolagi atoa” (HC, 7:232, 235).

E toatele e na molimau sa latou maitauina o Peresitene Iaga sa foliga ma leo mai e faapei o le Perofeta o Iosefa a o ia saunoa, o se tautinoga malosi o se faamaoniga faaleatua. Sa taliaina e le 5,000 o le Au Paia le Toasefululua o le korama e pulea le Ekalesia. I le tolu aso talu ona mavae le fonotaga sa saunoa ai Peresitene Iaga i le Au Paia ua ia “manao i se avanoa e tagi ma faavauvau ai mo se tolusefulu aso pe a itiiti” (HC, 7:232), sa ia faaalia lemu lona faanoanoa: “O se taimi o se faavauvau [talu mai] le taimi na aumai ai Iosefa ma Ailama mai Carthage i Navu. Sa maitauina e le toatele e auai, ma lå auai foi i le Ekalesia, e tusa e sili atu ma le lima paelo o loifofoga maligi. Ou te le lavã ona mafaufau i ai i lenei mea” (MHBY-1, 177).

I le vaitaimi toeitiiti atoa le sefulu tausaga o le auaunaga faa-Aposetolo a Iesu Keriso, sa aoao ai Polika Iaga i ala o le Alii. O lona naunau e galue malosi, usiusitai, ositaulaga, ma talia valaauga ma lona tomai e talia ma faataunuu e tusa ma musumusuga a le Agaga, ua saunia ai o ia e pulefaamalumalu i le Au Paia o Aso e Gata Ai. Muamua o le Peresitene o le Korama a le Toasefululua ma ina ua mavae Tesema 1847, ua avea ma Peresitene o le Ekalesia. I lalo o lana taitaiga maoae, e aofia ai le tusa ma le 33 tausaga, sa ia aoao atu i le Au Paia le ala e atinae ai Siona i Amerika i Sisifo ma i totonu o o latou lava loto, aiga, ma uarota. “O le Uso o Iosefa, le Perofeta na ia faatuina le faavae mo le galuega tele, ma o le a tatou fausia i luga o lena faavae,” sa ia tautino atu ai i le Au Paia ia Aokuso 1844. “E mafai ona tatou fausia se malo e le i iai muamua i le lalolagi” (HC, 7:234). O lona faatuatua tumau i le Atua; o lona faamaoni, poto masani, ma aga malie; o lona alofa mo aoaoga faavae ma sauniga o le talalelei; ma lona malamalama i le faatulagaga o le perisitua ma le Ekalesia ua saunia ai o ia e taitaiina le Au Paia ina ia tasi le agaga, tasi foi le mafaufau.

Faapotopotoina o le Au Paia e Faatuina le Malo o le Atua

Sa taitaiina e Peresitene Iaga ia le aumalaga tele o le Au Paia mai Navu e agai atu i le Vanu i Sate Leki i Mauga Papa. O lea na mafai ai e le Au Paia ona faapotopoto i se auala sa le i mafai ona faia i Ohio, Misuri, poo Ilinoi. Ina ua silasila atu Peresitene Iaga i le vanu Tele o Sate Leki i le aso 24 Iulai 1847, sa ia mautinoa ua ia maua le nofoaga o le saogalemu sa muai vaai i ai Iosefa Samita mo le Au Paia i Sisifo, ma o ia lava foi na vaai ai i ni faaaliga o le nofoaga sao lea. “Sa i o’u luga le agaga o le malamalama ma sa faamalumalu i luga o le vanu, ma sa ou lagona ai o iina o le a maua ai e le Au Paia le puipuiga ma le saogalemu,” sa tusia e Polika Iaga (MHBY-2, 564). O iinei o le a mafai ona maua ai e le Au Paia le taimi ma le avanoa e manaomia, e faamautuina ai i latou lava o ni tagata e ese mai i le lalolagi.

O le faapotopotoina i Sisifo, na amataina i le taunuu o Peresitene Iaga ma paionia ia Iulai 1847, sa faaauauina mo le tele o tausaga. E 80,000 le Au Paia sa latou faia le faigamalaga faigata agai i sisifo i luma mai o le 1869 ao faigofie femalagaaiga ona o taavaleafi. E oo lava ina ua mavae lena taimi, sa faaauau pea ona tuua e le Au Paia o latou fale ma aiga ina ia faapotopoto i Siona. O la latou malaga ua faatusaina lea i le malaga faaleagaga e o ese mai i le lalolagi. Sa saunoa Peresitene Iaga ua valaaulia e le Atua le Au Paia “faatasi mai itu uma o le lalolagi … ina ia maua le agaga e tasi ma le manatu e tasi ia tatou galuega uma ma taumafaiga e faatuina le malo faaleagaga ma le faaletino o Keriso i luga o le fogaeleele, ina ia saunia ai mo le afio mai o le Alo o le Atua i le mana ma le mamalu sili” (DNSW, 21 Jan,1868, 2). Sa ia naunau ma manaomia le toatele o ona tagata i le faatuina o Siona faaletino ma le faaleagaga. E le gata ina latou malaga atu i tumutumu o mauga ae tuuina atu foi a latou fesoasoaniga i nisi o le Au Paia e mulimuli atu ia i latou i le mea o faapotopoto i ai.

I lalo o le taitaiga a Peresitene Iaga, sa tuua e le Au Paia Sate Leki ma nofoia le 400 o nofoaga i Amerika i Sisifo. Sa galulue e toto a latou lava meaai, sui o latou lavalava, ma faatuina fale gaosimea ina ia lava le tamaoaiga e tausia ai i latou lava. Sa latou aoao e faalagolago i le Alii ma le tasi i le isi.

E le o gaioiga uma e atinae ai le tamaoaiga i lalo o le taitaiga a Peresitene Iaga mo le Au Paia sa faamanuiaina. O le faamanuiaina o le tamaoaiga, e le o lona faamoemoega sili lea. Mulimuli ane sa faaitiitia lona manatu i le faateleina o mea toto ma tupe ae tele i le fesoasoani atu i ona tagata ina ia avea ma nuu paia. Sa ia silafia mai lona poto masani o le a latou atiae pe a galulue malosi ma talia valaauga. “O le nofoaga sili lenei mo le aoao ai o le Au Paia,” sa ia tau atu lea mea i se faapotopotoga o uso o le Ekalesia i le Aai o Sate Leki i le 1856 (DNW, 10 Sept. 1856, 5).

I le tele o tausaga, sa auauna atu ai Polika Iaga i le nofoaga e taua o Tesereta, (mulimuli ane ua taua o le setete o Iuta) o se kovana faaitumalo ma faatonu o mataupu tau tagata Initia. I se taimi mulimuli ane, sa suia ai o ia e se tasi o le malo. Sa faaalu le tele o tausaga e taumafai ai e foia faafitauli i le va o le Au Paia ma le malo o le Iunaite Setete, ona o le manao o le Au Paia ina ia tutoatasi i latou mai faiga faalemalo. Sa ia onosai i faitioga ma tauemuga mai minisita, tusitala, tagata o loo mananao i ni suiga fou, ma tagata faapolotiki o loo faasagatau mai ia te ia ma ona tagata ona o lo latou talitonuga faalelotu, va faaletagata, faatulagaga ma le tamaoaiga o loo latou ola ai. Ae o na faafitauli e lei suia ai lona malamalama manino i le manaomia o le “faia o se Au Paia” ma le faatuina o Siona. Na saunoa Polika Iaga:“Ua ou iloa atu le faapotopotoga o le Au Paia i se faaaliga, ma faatuina i latou i se faatulagaga o se aiga tele e tasi o le lagi; o tagata taitasi ua faia o latou tiute e tele ia latou lava galuega, galulue ai mo le lelei atoa ae le mo tagata taitoatasi; ma o lena ua ou maua ai se faatulagaga matagofie e mafai e le mafaufau o le tagata ona faatulaga, ma o le faaiuga sili mo le atinaeina o le malo o le Atua ma le faalauteleina o le amiotonu i luga o le fogaeleele”(DNSW, 21 Jan, 1868, 2).

Faatuina o Siona e ala i sauniga faale-perisitua ma le faatulagaga

Na silafia e Peresitene Iaga e le mafai ona faatuina Siona i le na o le galue malosi. E ao ona taitaiina Siona e le perisitua, aua ua ia silafia o le “Malo o le Alo o le Atua” (DNW, 10 Aug, 1864, 2). Sa ia silafia e mafai e le Au Paia ona “tasi le agaga ma tasi le manatu i mea uma … galuega ma taumafaiga”(DNSW, 21 Jan. 1868, 2), e mafai ona o le “mama ma le mana o le malo”(DNSW, 8 Nov. 1870, 3). Na ia aoao atu e mafai ona faaolaina tagata o le Ekalesia e ala i le auai i sauniga o le perisitua; o lea, o sauniga o le perisitua ma faatulagaga sa avea ma ogatotonu o ana aoaoga ma le taitaiga.

Mai le 1844 seia oo i le 1846, sa ave le faamuamua e Peresitene Iaga ma le Toasefululua i le faamaeaina o le Malumalu i Navu. Sa faataunuuina iina ia faaeega paia ma faamauga e ui ina le i maea le galuega. “O lena le naunautaiga e pei ona molimauina e le Au Paia ina ia maua sauniga, ma o lo matou naunautaiga foi lena ia i matou, ina ia faataunuuina ia sauniga mo i latou; o lea sa ou tuuina atu ai a’u atoa i le galuega a le Alii i le Malumalu i le po ma le ao, e le sili atu i le fa itula e moe ai, i lona averesi, i le aso, ma alu i le fale faatasi i le vaiaso,” sa lipotia mai e Peresitene Iaga i lana tusi (MHBY-2, 10). I le va o le aso 10 o Tesema 1845 ma le aso 7 o Fepuari 1846, e tusa ma le 5,615 le Au Paia ua maua o latou sauniga o le faaeega paia ma le tele o aiga ua uma ona faamauina. I le sili laitiiti atu i le tausaga, e tolu aso talu ona taunuu i le Vanu o Sate Leki, sa faailogaina ai e Peresitene Iaga le nofoaga e fausia ai le Malumalu o Sate Leki. O le ogatotonu o le aai ma o le ogatotonu o olaga o le Au Paia. O le malumalu tele na fausia i le 40 tausaga, sa le i faamaeaina seia oo i le taimi na maliu ai Polika Iaga, ae sa ia faailogaina isi nofoaga paia e faia ai sauniga o le faaeega paia ma faamauga mo e o loo soifua ao faatalitali mo le faamaeaina o le malumalu. I le faapaiaga o fogafale i lalo o le Malumalu i St. George i le aso muamua o Ianuari 1877, i ni nai masina a o lei maliu, sa saunoa ma le malosi Peresitene Iaga e faatatau i le toe faaauauina o galuega mo e ua maliliu: “A o ou mafaufau i lenei mataupu, sa ou manaomia se leo malosi ina ia malamalama ai tagata. Pe mafai ea ona faaolaina tuaa e aunoa ma i tatou? Leai. Pe mafai ea ona faaolaina i tatou e aunoa ma i latou? Leai” (MS, 39:119).

O galuega i le malumalu e taua tele i le faatasia o augatupulaga ma le faaauauina o upumoni paia mai le tasi augatupulaga i le isi. O le Au Paia sa soifua pe na liliu mai i le afa mulimuli o le senituri e 19, sa latou le malamalama i sauaga i Misuri, pe manatua foi e le tagata lava ia o le Perofeta o Iosefa Samita. I le tuanai o le taimi, e toaitiiti i latou sa malamalama i le au paionia ma le faato’aina o nuu, ae ao foi ona latou aoaoina upumoni paia e uiga i le atinaeina o Siona. Sa faamalosia e Peresitene Iaga le taumafaiga e aoao ai le talalelei i le tupulaga talavou o le Ekalesia ma galulue e faaleleia le faatulagaga o le Ekalesia, faaalia le manaoga e aoaoina se tupulaga o alii ma tamaitai o e alolofa ma faatumauina le upumoni ma le amiotonu i le lalolagi” (MFP, 2:288). O Aoga Sa a Uarota mo tamaiti, sa muai faatuina i le 1849, ma amata ona galulue faatasi i lalo o le pulega tutotonu i le 1867. I le talosaga a Peresitene Iaga, ma sa amata mai i ona lava alo tamaitai, sa amata ona faatulaga faalapotopotoga i le 1869 e faamalosia ai tamaitai talavou i lo latou malamalama i le talalelei ma tautinoga ina ia ola magafagafa. I le 1875, e i ai isi faapotopotoga faapenei na faatuina e aoao ai alii talavou ma latou maua ai le tomai faaletaitai.

I le malamalama e le mafai ona fausiaina Siona e aunoa ma tamaitai, o lea sa toe faatuina ai e Peresitene Iaga le Aualofa i le 1867 e pei ona sa faatuina ai i Navu e le Perofeta o Iosefa Samita. Sa fesoasoani tamaitai i Epikopo i le tuuina atu o fesoasoani i e matitiva ma e mamai, faamalosia aiga e gaosia mea latou te manaomia, aoaoina e le tasi le isi i le talalelei, ma fesoasoani i le aoaoina o tamaitai talavou laiti ma tamaiti.

I le tausaga mulimuli o lona soifua, sa faatulaga ai e Peresitene Iaga ia Korama a Perisitua. Sa ia vaevae ma toe faatulagaina siteki, faateleina le numera o siteki mai le valu i le sefuluvalu. Sa ia taitaiina le faatulagaga o korama a toeaiina ma faatonuina ia toeaiina i o latou tiute faaletino ma le faaleagaga. Sa ia faamamafa atu, o uarota o iunite faavae ia o gaoioiga a le Ekalesia ma faalauteleina le valaauga o le epikopo o le taitai o le uarota. O uso o le Korama a le Toasefululua, o e sa pulefaamalumalu i iunite, sa faamalolo mai na valaauga ina ia faataunuuina o latou tofiga o ni molimau faapitoa a Iesu Keriso i nuu. I le taimi o lona maliu i le aso 29 Aokuso 1877, ua maea ona faatulaga le Ekalesia e pei ona silafia ai e le toatele o le Au Paia i aso nei.

O le tautinoga a Peresitene Iaga i le faatuina o Siona e ala i le faato’aina o nuu, fausiaina o pisinisi mo le tamaoaiga, sauniga paia o le malumalusa, ma le faatulagaga o le perisitua, ua lalagaina faatasi i totonu o le ie o ana saunoaga. E le mafai e se lauga e tasi ona pu’e le loloto o lana tofa mamao.“Ua na ona ou faatepa i se vaega itiiti o le Lauga sili o le Talalelei”, sa ia faapea mai ai i se faaiuga o se tasi o ana saunoaga (MSS, 15:49). O le atoatoaga o le talalelei, ua ia talitonu, ua na ona mafai ona aoaoina atu o lea fuaiupu ma lea fuaiupu, lea mataupu ma lea mataupu. “O le talalelei a le Alo o le Atua,” ua ia saunoa mai ai, “ … e mai le vavau e oo i le faavavau. A matala le mata o le mafaufau, o le a e vaai i se vaega tele o lea mea, ae o le a e vaai i ai e faapei ona vaai atu le failauga i fofoga o se faapotopotoga. O le vaai atu ma le talanoa i tagata taitoatasi, ma le mafaufau e faamasani atoa ma i latou, o le faaaluina o se lima minute ma i latou taitoatasi o le a faaalu ai se taimi tele, e le faigofie ona fai. E faapena le vaai mamao atu i le faavavau; e mafai ona tatou iloa ma malamalama, ae faigata ona faamatalaina”(DNW, 26 Oct. 1854, 2). E ala i ana aoaoga ma lana taitaiga, sa taumafai pea lava pea Polika Iaga e fesoasoani i le Au Paia ina ia iloa ma malamalama i le upumoni e faavavau o le talalelei.

Sa taulai atu le soifuaga o Polika Iaga i le aoaoina o le talalelei ma faatuina ma faatumauina le malo o le Atua. “O le malo o le lagi e muamua ma sili ona taua ia i tatou,” sa ia tau atu i le Au Paia (DNW, 27 July 1864, 2).

Atonu o le taitaiga sa tuuina atu e Peresitene Iaga ua faamatalaina e Aposetolo o e sa galulue i le taimi o lona maliu: I le tolusefulu tausaga sa ia pulefaamalumalu ai i le Ekalesia, amata mai le tagatavaleina o le Perofeta o Iosefa, sa leai sona masalosalo; sa le fefe pe solomuli. E tusa poo le a le tau faamatau o le siosiomaga poo mea e tutupu mai, sa ia le faanoanoa; ae o na taimi sa ia faaalia ai se talitonuga maumaututu ma le faatuatua, ma saunoa i ni upu faalaeiau, ma faamalosi ma faatutumau ai tagata uma, ma aumaia ai lo latou alofa ma saafiafiga. O le Alii, e le gata ina faamanuia ia te ia i le toa, ae sa faapaiaina o ia i le atamai maoae. O ana fautuaga, afai e usitaia, o le a maua le faaolataga, ma i le avea ai o se faatonutonu ma taitai e leai se isi e sili ae i lo ia… .

“O ana galuega sa faapaleina e le Alii i le manuia sili, o ana upu sa ia faamamalu ma faataunuuina, ma o i latou uma sa usiusitai i ana fautuaga, na faamanuiaina i latou e le Alii ma faatumauina. O le a oo mai le taimi o le a faasino ai lana taitaiga i le Ekalesia a Iesu Keriso o le Au Paia o Aso e Gata Ai, o se vaitaimi sa tele ni mea matagofie na tutupu ai” (MFP, 2:298).

Fautuaga mo Suesuega

Na faapefea ona iloa e Polika Iaga e moni le Ekalesia?
Na faapefea ona avea le naunautai o Polika Iaga e usiusitai ma faia osigataulaga e fesoasoani ai ia te ia i le atinaeina ma le puipuia o le malo o le Atua?
O a ni mea ua aoao mai e tagata o le Ekalesia i aso nei mai ia Polika Iaga e uiga i lona lagolago malosi i le Perofeta o Iosefa Samita?
O a nisi mea na tutupu i le olaga o Polika Iaga na saunia ai o ia e pulefaamalumalu i le Ekalesia? E faapefea ona saunia e le Alii i tatou taitoatasi e auauna atu i le malo o le Atua?
O le a le saunoaga a Polika Iaga i le mafuaaga patino o le faapotopotoina o le Au Paia? O a ni auala sa faatuina ai e Polika Iaga le malo o le Atua?
O le a le mea na faatatau i ai le saunoaga a Polika Iaga o “le Malo o le Alo o le Atua”? Na faapefea ona faalauteleina e Polika Iaga lona perisitua?
O le a se mea e manaomia e “tausia ai se augatupulaga o alii ma tamaitai o e alolofa ma faatumauina le upumoni ma le amiotonu i le lalolagi”? O le a le mea na faia e Polika Iaga na mafai ai ona maua lenei mea? O le a le mafuaaga ua taua tele ai lenei mea i aso nei?
Na faapefea ona fesoasoani Polika Iaga i le Au Paia ia iloa ma malamalama i le upumoni e faavavau o le talalelei? Aisea e te lagona ai e ao ona suesue ma mafaufau loloto i aoaoga a Polika Iaga i le isi lua tausaga?

President Brigham Young — O Polika Iaga pe tusa o le 1847–50. “Sa ou manao ou te alaga atu ma le leotele e folafola atu le talalelei i atunuu. Na mu i o’u ponaivi e pei o se afi ua le mafai ona taofia … E leai se mea e faamalieina au, ae ua na o le folafola atu i le lalolagi o le mea o loo faia e le Alii i nei aso e gata ai” (DNW, 24 Aug. 1854, 1).

pioneers crossing river — O le faatusa a le tusiata i le Au Paia o loo sopoia le vaitafe o le Misisipi ua malo i le aisa i le taimi o le faigamalaga mai Navu, Ilinoi, ia Fepuari 1846.