Faamalosia o le Au Paia e ala i Meaalofa a le Agaga

I le avea ai ma se alii talavou, sa saili atu ai ma le naunautai ia Polika Iaga i se talitonuga faalelotu o loo faaali uma atu i ai meaalofa o le talalelei e pei ona faamaumauina i le Feagaiga Fou. Ao lei papatisoina o ia, na ia mauaina se molimau mamana e uiga i le Ekalesia ina ua faapupulaina lona malamalama e le Agaga Paia (tagai i le DNW, 9 Feb. 1854, 4). I la laua feiloaiga muamua ma Iosefa Samita i Katelani, sa faamanuiaina ai Polika Iaga i le meaalofa o le tautala i gagana (tagai i le MHBY-1, 4–5). E ui lava o se mea e le masani ai lona olaga, ae masani lava ona ia fiafia i le eseese o meaalofa faaleagaga e liligiina ifo i ona luga ma le Au Paia o Aso e Gata Ai. “Afai ua ia te i tatou le lotu a le Faaola ua tatou aia foi i faamanuiaga tonu e pei ona i ai anamua. E le faapea o le a maua uma e tagata faaaliga vaaia, e le faapea o le a maua uma e tagata ia miti, e le faapea o le a maua uma e tagata le meaalofa o le tautala i gagana po o le faaliliuina o gagana, ae o le a mauaina e tagata uma e tusa ai ma lona tulaga ma faamanuiaga a le na te Foai mai” (DNW, 27 Feb. 1856, 3).

Aoaoga Polika Iaga

E tuuina mai e le Alii meaalofa a le Agaga ina ia faamalosia ma faamanuia ai i tatou, o o tatou aiga, ma le Ekalesia.

Omeaalofa o le Talalelei ua tuuina atu ina ia faamalosia le faatuatua o e ua talitonu (DBY, 161).

Ua fesiligia i matou pe mulimuli atu ni vavega ia i latou o e talitonu i o tatou aso e pei foi ona i ai i aso anamua. Matou te tali atu e i ai vavega. O le tauaso ua pupula, o le pipili ua savali, o le tutuli ua faalogo, o le meaalofa o valoaga ua faaalia, e faapea foi i le meaalofa o le faamalologa, o le meaalofa o faaaliga, o le meaalofa o le tautala i gagana ma le faaliliuina o gagana. Na fetalai mai Iesu o nei faailoga e tatau ona mulimuli atu ia i latou o e talitonu [vaai Mareko 16:17]. O Lana Ekalesia ma Lona Malo o loo i ai pea nei faailoga o loo mulimuli atu pea ia i latou o e talitonu i augatupulaga uma pe a i ai pea le Ekalesia moni (DNSW, 19 19 May 1868, 1).

Ua uma ona ou tauina atu na faatuina e Keriso i lana Ekalesia ia Aposetolo ma Perofeta; na ia faatuina foi i lana Ekalesia ia epikopo, aoao ma peteriaka; e faapea foi i meaalofa a le Agaga, e pei o le tautala i gagana eseese, faamaloloina o ma’i, o le iloatinoina o le agaga, ma isi meaalofa eseese. O lenei, ou te fia faapea atu ai i le lalolagi atoa, o ai ua ia mauaina se faaaliga faapea ua le toe faaauauina e le Alii nei tofiga ma nei meaalofa i lana Ekalesia? Ou te lei mauaina. Ua ou mauaina faaaliga e tatau ona i ai mo le Ekalesia, ma e leai se Ekalesia moni e aunoa ma na faaaliga (DBY, 136).

A faapea o loo e usiusitai i sauniga o le Talalelei, ma e te le o tautala i gagana eseese i aso nei, aua le amanaiaina lena mea. A faapea e te le o mauaina le agaga o valoaga, e leai se afaina. A faapea e te le o mauaina soo se meaalofa patino e aumai faatasi ma le agi malosi mai o le matagi, e pei ona i ai i le aso o le Penetekoso, e le o i ai se mafuaaga tonu e tatau ai ona e mauaina. I le aso o le Penetekoso sa i ai se manaoga faapitoa mo lena meaalofa, o se taimi sili lena ona faigata. O se faaaliga mamana ma le faapitoa o le mana o le Silisiliese na talafeagai ai ina ia faapupulaina ai mata o tagata ma ia faailoa atu ia te i latou ua totogiina e Iesu le tau o a latou agasala, ma sa latou faasatauroina lava o ia, ma o lona maliu, ua avea ai o ia ma Faaola o le lalolagi uma. Na manaomia lenei faailoaina atu i lena taimi ina ia faatalitonu ai tagata (DBY, 161–62).

Faatuatua: Afai e te talitonu i mataupu faavae o le Talalelei ma e maua le faatuatua, o se meaalofa lea a le Atua, o le a ia faaopoopoina mai le faatuatua, o le faaopoopo atu lea o le faatuatua i le faatuatua. Na ia tuuina atu le faatuatua i mea uma na ia foafoaina e avea o se meaalofa; ae ua umiaina e ana foafoaga le avanoa o le talitonu i le talalelei pe moni pe sese (DBY, 154).

O le Meaalofa o le Faamalologa: Ua ou i ai iinei e molimau atu i le faitauselau o alii, tamaitai, ma fanau ua faamaloloina e le mana o le Atua, e ala lea i le faaee atu o lima, ma e toatele ua ou vaai i ai ua toe faatutuina mai faitotoa o le oti, ma toe aumaia mai le vanu o le ata o le oti; ma o nisi na tuua e o latou agaga o latou tino, ua toe foi mai i ai. Ou te molimau atu na ou vaai i e mama’i ua faamaloloina e ala lea i le faaee atu o lima, e tusa ai ma le folafolaga a le Faaola (DBY, 162).

Pe a ou faaee o’u lima i luga o le ua ma’i, ou te faamoemoeina le mana o le faamalologa ma le aafiaga o le Atua ina ia auala mai ia te au ma oo atu ai i le ma’i, ma ia aveesea ai le ma’i. Ou te le faapea atu ua ou faamaloloina tagata uma na faaee atu i ai o’u lima; ae e toatele ua faamaloloina i lalo o la’u faamalologa (DBY, 162).

Pe afai tatou te saunia, pe afai o i tatou o ni ipu paia i luma o le Alii, o se ala lea o le mana mai le Silisiliese e mafai ona ui atu i le tino o le tagata o loo tuuina atu le faamanuiaga i le tino o le tagata ma’i, ma o le a faamaloloina ai le ma’i; o le ulu tiga, fiva po o isi faama’i o le a aveesea (DBY, 162).

Ua auina soo atu au, e ui lava e seasea ona ou alu atu, aua o se avanoa lea mo soo se tama, o le ua avea ma se Toeaina i Isaraelu, o le i ai lea o le faatuatua e faamaloloina ai lona aiga, e pei lava foi ona i ai o lo’u avanoa ina ia i ai lo’u faatuatua e faamaloloina ai lo’u aiga; ma afai na te le o faia, e le o ola o ia e tusa ai ma lona avanoa. E pei lava o le fai mai ia te au ou te tataina a latou fafie ma tausia lona aiga, aua ana i ai lona faatuatua, semanu na te laveaiina au mai le pagatia o le tuua lea o isi o’u tiute ae auai atu e tusa ma lana talosaga (DBY, 163).

Afai tatou te mama’i, ma ole atu i le Alii ina ia faamaloloina i tatou, ma faia mea uma e talafeagai ai mo i tatou, e tusa ai ma lo’u malamalamaaga i le Talalelei o le faaolataga, e mafai foi ona ou ole atu i le Alii ina ia galueaiina la’u sana ma la’u saito ina ia ola, e aunoa ma lo’u suotosinaina o le eleele ma togi i ai fatu. E atagia mai pea lava ia te au ina ia faia soo se fofo e oo i ai lo’u malamalama, ma ia ole atu i lo’u Tama o i le Lagi, i le suafa o Iesu Keriso, ina ia faapaiaina lena faiga ina ia faamaloloina ai lo’u tino (DBY, 163).

Ae faapea o loo tatou faimalaga i luga o mauga, … ma ua ma’i se toatasi po o se toalua, e aunoa ma se mea i lena ogalalolagi e mafai ona tatou aapa atu i ai mo se togafitiga faafomai, o le a le mea e tatau ona tatou faia? E tusa ai ma lo’u faatuatua, ia ole atu i le Alii Silisiliese ina … ia faamaloloina le ma’i. O lo tatou avanoa lenei, pe afai tatou te oo i se tulaga faapea e le mafai ai ona tatou maua se fesoasoani mo i tatou. Ona mafai lea e le Alii ma ana auauna ona faia mea uma. Ae o lo’u tiute lea o le faia, pe afai e tusa ai ma lo’u mana (DBY, 163).

Tatou te faaee o tatou lima i luga o e mamai ma mananao ina ia faamaloloina, ma tatalo i le Alii ina ia faamaloloina i latou, ae le mafai lava ona tatou faapea atu o le a ia malolo (DBY, 162).

Valoaga, Faaaliga, ma le Malamalama. So o se alii lava ma so o se tamaitai e mafai ona avea ma tali faaaliga, ma maua le molimau ia Iesu, o le agaga lea o valoaga, ma iloa atu le mafaufau ma le finagalo o le Atua e faatatau ia i latou, e aloese ai mai le leaga, ma filifili mea e lelei (DBY, 131).

O lo’u malamalama, afai o le a e mulimuli i aoaoga a Iesu Keriso ma ana Aposetolo, e pei ona faamaumauina i le Feagaiga Fou, o le a faapea ona mauaina uma e alii ma tamaitai le Agaga Paia… . O le a latou iloaina mea e pei ona i ai, o le a oo i ai, ma mea sa i ai. O le a latou malamalama i mea i le lagi, o mea i le lalolagi, ma mea o loo i lalo o le lalolagi, o mea o taimi, ma mea o le faavavau, e tusa ai ma o latou valaauga eseese ma o latou tomai [vaai MFF 88:78–79] (DBY, 161).

Saili ma le maelega ina ia iloa le finagalo o le Atua. E mafai faapefea ona e iloaina? I ni mataupu e faatatau ia te outou lava taitoatasi, e mafai ona outou mauaina sao mai lava i le Alii; ae o mataupu e faatatau i le lautele [o le Ekalesia], o le a tuuina mai lona finagalo i le faasologa sa’o lava, ma o le a faailoaina mai e ala i le fautuaga lautele e tuuina atu ia te outou i le puna sa’o (DBY, 136).

Afai e tatau i le Alii Silisiliese ona faaali atu i e Faitaulaga Sili, poo so o se isi lava e ese mai le ulu o le Ekalesia, ia mea e moni, po o mea ua i ai ma o le a i ai, ma faaali atu ia te ia le taunuuga o nei tagata i le luasefululima tausaga mai le taimi nei, po o se aoaoga fou o le a avea ma se aoaoga a lenei Ekalesia ma le Malo i le lima, sefulu, po o le luasefulu tausaga talu mai lena taimi, ae o le leo foi lena e tasi, o le mana foi lava lena e tasi na tuuina atu faaaliga ia Iosefa ao soifua o ia, o se faamanuiaga lava lea i lena Faitaulaga Sili, po o lena tagata; ae e tatau ona le faaali atu soo i se isi tagata i luga o le fogaeleele, seiloga lava e faaali mai e le Atua i le auala sa’o ina ia avea ma meatotino a tagata lautele. O lea la afai tou te faalogo i Toeaiina o faapea mai e le faaalia mai e le Atua e ala mai i le Peresitene o le Ekalesia mea latou te iloa, ma latou faamatala mai ni mea ofoofogia, e mafai ona outou manatu faapea ua pei o se upu moni a le Atua ma o le faaaliga ua latou maua e mai le Tiapolo, ae le mai le Atua. Afai latou te mauaina mai le auala sa’o, o lena lava mana e tasi na faaalia atu ia te i latou o le a faailoa atu ia te i latou e tatau lava ona latou taofia mea na faaalia atu i o latou lava loto, ma e seasea lava ona latou maua le faanaunauga e faailoa atu ai i se isi tagata (DBY, 338).

Isi Meaalofa: O le meaalofa o le vaai lea i mata e pei lava o le meaalofa o le tautala i gagana. Ua tuuina mai e le Alii lena meaalofa ma e mafai ona tatou faia e pei ona tatou fiafia i ai e pei lava o le vaai; e mafai ona tatou faaaogaina le vaai o le mata i le mamalu o le Atua, pe mo lo tatou faatafunaina.

O le meaalofa o le fesootai ma le isi o le meaalofa lea a le Atua, e pei lava foi o le meaalofa o valoaga, o le iloatinoina o agaga, o le tautala i gagana, o le faamalologa, po o soo se isi lava meaalofa, e ala mai i le vaai, tofo, ma le tautala, ua tuuina mai i le lautele ma e le ofoofogia e pei o meaalofa na o loo taua i le Talalelei.

E mafai ona tatou faaaogaina nei meaalofa, ma soo se isi lava meaalofa ua tuuina mai e le Atua ia i tatou, mo le viiga ma le mamalu o le Atua, ina ia auauna atu ai ia te Ia, pe mafai foi ona tatou faaaogaina e faatauvalea ai o Ia ma Lana galuega… . O nei mataupu faavae e sao lelei e tusa ai ma meaalofa o loo tatou mauaina mo le faamoemoega tonu o lo latou faaaogaina, ina ia mafai ai ona tatou tutumau ma ia faaeaina, ma o le tino ma le agaga ua tatou mauaina o le a le mafai ona i ai sona taunuuga, ae ia tumau i le faavavau atoa.

I se faatatauga latalata i ai o meaalofa ua tuuina mai ia i tatou, e mafai ona tatou mautinoa le toetutu o nei tino ua tatou mauaina nei, lea o loo mau ai o tatou agaga, ma afai o le a latou toetutu o le a faamamaina i latou ma paia; ona latou tutumau ai lea i le faavavau atoa (DNW, 27 Aug. 1956,2).

O vavega e faamalosia ma faamautuina ai le faatuatua o i latou e alolofa ma auauna i le Atua.

O vavega, po o nei faaaliga uiga ese o le mana o le Atua, e le mo i latou e le talitonu; ua tuuina mai e faamafanafanaina ai le Au Paia, ma ina ia faamalosia ma faamautuina ai le faatuatua o i latou e alolofa, matatau, ma auauna i le Atua, ae le mo i latou e le talitonu i le Atua.

Ua outou mauaina mai ia te au le manatu faapea e le o vavega e faia i luma o mata o se tagata e faatalitonuina ai o ia pe mai le Atua, pe mai le Tiapolo; ae peitai, afai ua fuafuaina e le Alii o le a tatau i se tagata ona faamaloloina le ma’i, o le a mafai loa e lea tagata ona faia; ae pe o le mea ea lena na auina mai ai e le Atua le tagata na faia le faamalologa ina ia faatalitonu ai le tagata amioleaga? E leai, o se faamanuiaga i le Au Paia, ae leai ma se mea e tasi a le tagata amioleaga e faia i ai, e leai ma sa latou aia e faalogo fua i ai; ua faia mo le Au Paia, ua faapitoa mo lo latou faamanuiaina, ma mo i latou lava (DBY, 340).

O le fuafuaga o le Talalelei ua matuai fuafuaina lelei, ma o se vavega ina ia faatalitonuina ai tagata, o le a avea ua na o se faafanoga ia i latou. Afai e te faalogo i tagata o faamatala mai mea na latou vaai i ai—ua latou vaai i ni vavega maoae ma silisiliese ua oo mai, ma ua le mafai ona tatali lo latou talitonu i ai, ia manatua o “e amioleaga e talitonu ma gatete,” aua foi latou te le mafai ona tatalia [vaai Iakopo 2:19]. Afai e faalogoina le siufofoga o le Leoleo Mamoe Lelei, o le ua faamaoni i lona loto o le a talitonu ma taliaina. O se mea lelei e oo i ai ma ia mafai ona iloaina i le agaga, ia vaai ma mata faaleagaga, ma ia olioli i le matagofie o le agaga e ola pea. E leai se tagata, sei vagana ai o ia o se mulilua [vaai Mataio 12:39], o se faitaaga, o se tagata e manao fua, po o se ifo i tupua, o le a ia matuai manao lava i se vavega; i se isi faaupuga, e leai se tagata lelei, ma faamaoni o le a ia faia lena mea (DBY, 340).

O tagata ua latou vavalo mai faapea na latou vaai i mea silisili, ua latou iloa ma malamalama i mea e tele, i lenei Ekalesia, ma ua latou molimau atu i luma o faaotopotoga toatele, i le suafa o le Atua o Isaraelu, ua latou vaai ia Iesu, ma isi, o tagata lava foi na ua latou o ese mai lenei Malo, ao ola pea isi i le faatuatua [vaai Alema 32:21] (DBY, 342).

O mea ua saunia e le Atua o ni vavega uma lava i tagata seia oo ina latou malamalama i ai. E leai ni vavega, e na o vavega mo i latou e le malamalama. O se vavega e faapea o se taunuuga e aunoa ma sona mafuaaga, ae e leai se mea faapena. E i ai se mafuaaga mo soo se taunuuga lava tatou te vaai i ai; ma afai la tatou te vaai i se taunuuga e aunoa ma lo tatou malamalama i lona mafuaaga, ona tatou taua lea o lena mea o se vavega (DBY, 339).

Ou te talitonu lava au i ai i lena mea, afai ou te suotosinaina le eleele ma lulu i ai le saito, i le vaitau e talafeagai ai o le a tatau ona ou seleseleina ai se fuataga o le saito; o se taunuuga lava lena e i ai. E matuai sa’o lelei foi lava lena mea i vavega na faia e Iesu ao i ai o ia i le lalolagi. I le faaipoipoga i Kana i Kalilaia [vaai Ioane 2:1–11], ina ua latou inuina uma le uaina, sa latou o atu i le Faaola ma fesili atu ia te ia po o le a se mea e tatau ona latou faia. Na ia faatonuina i latou ina ia faatumuina a latou kate i vai, ma ina ua mavae ona faia o lena mea sa latou ligi ese le vai ma latou iloa ai o le uaina. Ou te talitonu o le uaina moni lava lena; ou te le talitonu na faia i le fuafuaga lea ua faia ai mea faapena i aso nei e tagata leaga, o e, ua latou faaaogaina le poto faalemafaufau, faasaienisi, faalauatau, ma isi, e faaaafia ai tagata ma ia faatalitonu ai i latou o le vai o le uaina, ma isi mea e tali uiga tutusa faapena. Na faaliliuina e le Faaola le vai e avea ma uaina. Na ia silafina pe faapefea ona valaau atu i elemene uma e talafeagai ai ina ia mafai ona faatumuina ai le vai i mea uma e gaosia ai le uaina. O nei elemene o loo i ai faatasi ma i tatou; tatou te aai, inu ma manavaina na elemene, ma na malamalama lelei Iesu i le fuafuaga i le valaauina lea o nei elemene, ma e lei faia ai se vavega sei vagana ai lava i latou e le i malamalama i lena fuafuaga. E faapena foi i le fafine na faamaloloina ina ua pai atu i le pito o lona ofu [vaai Mataio 9:20–22]; sa faamaloloina o ia i le faatuatua, ae le o se vavega lena mea ia Iesu. Na ia malamalama lelei i le fuafuaga, ma e ui lava sa lolofi atu le motu o tagata ia te ia, i luma ma tua, ma ona autafa uma, ma sa matuai faigata ai ona maua sona auala, ae o le taimi lava na pa’i atu ai le tamaitai lea ia te ia na ia lagonaina ua alu ese atu le mana na ia te ia ma na ia fesiligia ai po o ai na pa’i atu ia te ia. E le o se vavega lea mea ia te ia. O loo ia te ia mana o le ola ma le oti; sa ia te ia le mana e tuu atu ai lona ola ma lona mana ina ia toe maua ai [vaai Ioane 10:17–18]. O le mea lenei na ia fetalai i ai, ma e tatau ona tatou talitonu i lenei mea pe afai tatou te talitonu i le talafaasolopito o le Faaola ma upu a le Au Aposetolo o loo faamaumauina i le Feagaiga Tuai. Na iai ia Iesu lenei mana; na tuuina atu e le Tama ia te ia; o lona tofi lea, ma sa ia te ia le mana e tuu atu ai lona ola ma toe maua mai ai. Sa ia te ia mana o le ola i totonu ia te ia ma ina ua ia fetalai atu i tagata taitoatasi ina ia “Ola”, sa latou ola (DBY, 340–41).

Afai e i ai lo tatou faatuatua tatou te lagonaina ai o malosiaga o le ola ma le oti o loo i ai lea i o tatou mana, e mafai ona tatou faapea atu i faamai, “Ia aoaiina oe i le suafa o Iesu Keriso, ma ia oo atu le ola ma le maloloina i le tino o lenei tagata mai le Atua, ina ia tetee atu ai i lenei faamai”; ma o lo tatou faatuatua o le a taunuu ai lenei mea e ala lea i le faaee atu o lima e ala lea i le tuuina atu o le sauniga o le Talalelei paia (DBY, 342).

O le Agaga Paia e faaalia maia mea lilo o le malo ia i latou o e saili i meaalofa sili ma tausia poloaiga.

O le a se mea lilo? Tatou te leiloa, e sili atu nai lo lo tatou iloa. A tatou talanoa e uiga i mea lilo, o loo tatou talanoa i mea o le faavavau e le o iloa atu; aua o mea ua iloa, e le mafai ona avea ma se mea lilo; ma o le a mafai ona tatou iloa mea uma o loo mafai ona iloa ao tuputupu ae pea lo tatou malamalama. Ae o mea e faavavau e sili atu nai lo lo tatou iloa ma lo tatou malamalama uma o mea lilo na (DBY, 338–39).

Afai o le a tatou matuai suesue lelei i le mataupu, e tatau ona tatou aoaoina ai ua na o sina vaega itiiti lava o mea o le Malo ua faaalia, i le au soo. Afai tatou te saunia e tulimatai atu i mea lilo o le Malo, e pei ona i ai i le Atua, ona tatau ai lea ona tatou iloa ua na o sina vaega itiiti o na mea lilo ua tuuina mai iinei po o iina. O le Atua, e ala lea i lona Agaga, na faaali mai ai le tele o mea i tagata, ae i le tele lava o tulaga, na ia faafuaseia ai ona tapunia le vaaiga e oo mai i le mafaufau. O le a ia tuuina atu i ana auauna latou te tepa taulai atu i mea o le faavavau mo sina taimi, ae o le a faafuaseia lava ona tapunia le vaaiga ma tuua ai i latou e pei ona i ai, ae ina ia latou aoao ma galulue i le faatuatua, e pei ona i ai i le Au Aposetolo, latou te le savavali i le vaai o mata, ae o le faatuatua [vaai 2 Korinito 5:7] (DBY, 339).

E pei ona vave ona e faamaonia atu oe i luma o le Atua ua e agavaa ina ia mauaina ia mea lilo, [ma afai o le igoa lena e te manao e ta’u ai], o le Malo o le lagi— ia tumu oe i le faatuatua i le Atua—o le a le faalataina lava soo se mea e tau atu e le Atua ia te oe—o le a e le faaalia atu lava i lou tuaoi mea e le tatau ona faaali atu, e pei ona vave ona e saunia ina ia tausia mea a le Atua, o le a faavavau se taimi e aoaoina ai ina ia tuuina atu ai ia te oe [vaaiAlema 26:22] (DBY, 93).

O lea uso e, ia talai atu mea tatou te matuai talitonu lava i ai, ma afai tatou te oo mai i vaega o aoaoga tatou te leiloa, e tusa lava pe i ai sa tatou mafuaaga lelei ina ia talitonu i ai, [e tusa lava] pe aoaoina i tatou e o tatou mafaufau e moni na mea, ia faatea na mea ae aoao atu i tagata na o mea tatou te iloa (DBY, 338).

Afai o le a latou ola ina ia agavaa mo le mauaina o se mea, o le a lava pea aoaoga a tagata o le Ekalesia o e na ola iinei mo le tele o tausaga ina ia saunia ai i latou e ulu atu i le faitotoa vaapiapi ma le Ierusalema Fou, ma ia saunia e fiafia i le faatasiga ma au agelu paia (DBY, 339).

O mea lilo nei o le Malo o le Atua i le lalolagi, ina ia iloa pe faapefea ona faamamaina ma faapaiaina o tatou lagona, o le laueleele o loo tatou tutu ai, o le ea o loo tatou manava ai, o le vai o loo tatou inu ai, o fale o loo tatou nonofo ai ma aai o loo tatou fausia, ina ia oo mai ai tagata ese i totonu o lo tatou atunuu ma mafai ona latou lagonaina se aafiaga paia ma latou iloaina se mana i le avea ai o i latou ma tagata ese (DBY, 339).

Afai tou te faapea mai tou te mananao i mea lilo, poloaiga, ma faaaliga, ou te toe tali atu e toetoe lava o Aso Sapati uma e liligi atu ai faaaliga i o outou luga ae tou te le mauaina, o outou na e o mai iinei, aua a aunoa ma lo outou mauaina o faaaliga a Iesu Keriso e liligi atu i o outou luga e pei o le vai i le laueleele (DBY, 343).

Fautuaga mo Suesuega

E tuuina mai e le Alii meaalofa a le Agaga ina ia faamalosia ma faamanuia ai i tatou, o o tatou aiga, ma le Ekalesia.

O a meaalofa a le Agaga? Aisea e taua ai le tatau ona i ai i totonu o le Ekalesia toefuataiina a Iesu Keriso? (Vaai foi 1 Korinito 12:4–11; MFF 46:10–26.)
E mafai faapefea ona tatou iloa ua faaalia mai meaalofa a le Agaga i o tatou olaga? E mafai faapefea ona tatou faaaogaina na meaalofa ina ia faamanuiaina ai isi?
O ai e gafa ma le iloatinoina o meaalofa a le agaga ma lo latou faaaogaina i totonu o le Ekalesia? (Vaai foi MFF 46:27; 107:18.) E faapefea ona eseese le faaaogaina o meaalofa faaleagaga i se valaauga faaleEkalesia mai le faaaogaina o meaalofa na i se tulaga faaletagata lava ia po o le faaleaiga?

O vavega e faamalosia ma faamautuina ai le faatuatua o i latou e alolofa ma auauna i le Atua.

O a vavega? O le a lo latou faamoemoega?
O le a le uiga o le faalogo “i le siufofoga o le Leoleo Mamoe Lelei” ma ia “olioli i le matagofie o le agaga e ola pea”? E mafai faapefea e vavega ona faamautuina o tatou faatuatua ma molimau? Aisea e sili ai le faatalitonuina e musumusuga a le Agaga nai lo faataitaiga vaaia o le malosiaga? E mafai faapefea ona tatou matuai gauai atu i vavega uma i o tatou olaga?(Vaai 2 Nifae 27:23; Eteru 12:12.)

O le Agaga Paia e faaalia maia mea lilo o le malo ia i latou o e saili i meaalofa sili ma tausia poloaiga.

E tusa ai ma le saunoaga a Peresitene Iaga, aisea e faaali mai ai e le Atua “na o sina vaega itiiti o mea o le Malo”? (Vaai foi MFF 78:17–18.)
E mafai faapefea ona tatou faamaonia atu i tatou lava ua tatou “agavaa mo le mauaina o mea lilo”? (Vaai foi MFF 76:5–10.)
E tusa ai ma le saunoaga a Peresitene Iaga, o a mea lilo o le malo o le Atua? (Vaai MFF 84:19–22.) E mafai faapefea ona avea se mea lilo i se tasi tagata ma se upu moni faigofie ma manino i le isi tagata? Aisea e faaosoosoina ai i nisi taimi le taumatemate i se mea tatou te le o iloa?
Na saunoa mai Peresitene Iaga e faapea, “E toetoe lava o Aso Sapati uma e liligi atu ai faaaliga i o outou luga ae tou te le mauaina … aua a aunoa ma lo outou mauaina o faaaliga a Iesu Keriso e liligi atu i o outou luga e pei o le vai i le laueleele.” E mafai faapefea ona tatou saunia lelei i tatou lava ina ia mauaina na faaaliga e pei ona tatou mauaina o le faamanatuga ma tausia le Aso Sapati ia faapaiaina?

pioneers camping — O tolauapiga a tagata matitiva na faatulagaina i le Vaitafe o le Misisipi mai Navu i le 1847, e pei ona faaalia ai i lenei ata vali. Na laveaiina tagata matitiva ina ua auina ifo e le Alii salu mai le lagi e fafagaina ai i latou.