Kapitulo 10
Ang Atong Pagpangita sa Kamatuoran
“Kini gikinahanglan, isip mga miyembro niini nga Simbahan, nga masinati niana nga gipadayag sa Ginoo, nga kita dili mahisalaag. … Unsaon nato paglakaw diha sa kamatuoran kon kita wala masayud niini?”
Gikan sa Kinabuhi ni Joseph Fielding Smith
Sa dihang si Joseph Fielding Smith otso anyos pa ang panuigon, gihatagan siya sa iyang amahan og kopya sa Basahon ni Mormon, ug gisugo siya sa pagbasa niini. “Gidawat ko kining rekord sa mga Nephite uban sa pagkamapasalamaton,” misulti siya sa kadugayan, “ug akong gihuman ang buhat nga gisugo kanako.” Ang iyang pagkagusto sa libro nag-awhag kaniya sa paghuman og dali sa iyang mga buluhaton sa balay ug usahay gani mobiya sa dula sa baseball og sayo aron siya makakita og hilom nga mga lugar sa pagbasa. Wala abti og duha ka tuig human madawat ang regalo gikan sa iyang amahan, nabasa niya ang libro og kaduha. Kabahin nianang sayo nga pagtuon, miingon siya sa wala madugay, “adunay pipila ka mga bersikulo nga napatik sa akong hunahuna ug wala ko gayud kini kalimti.”1 Nagbasa usab siya og ubang mga libro. “Naanad ako sa pagbasa sa mga libro nga giandam alang sa kabataan sa Primary ug alang sa kabataan sa Sunday School niadtong unang mga panahon,” miingon siya, “ug kasagaran magkupot ko og libro kon ako anaa sa panimalay. … Sa kadugayan gibasa ko ang History of the Church ingon nga girekord diha sa Millennial Star. Gibasa ko usab ang Biblia, ang Basahon ni Mormon, Perlas nga Labing Bililhon, ang Doktrina ug mga Pakigsaad, ug ubang mga literatura nga akong makuptan.”2
Gipadayon ni Presidente Smith kining hugot nga tinguha alang sa kahibalo sa ebanghelyo sa tibuok niyang kinabuhi. Kon siya makakat-on og mga kamatuoran sa ebanghelyo, iya kining ipakigbahin ug, kon gikinahanglan, panalipdan kini. Tulo ka tuig human siya giorden nga Apostol, iyang nadawat ang usa ka panalangin sa priesthood nga milakip sa mosunod nga tambag: “Ikaw napanalanginan og abilidad sa pagsabut, sa pagtuki, ug pagpanalipod sa mga baruganan sa kamatuoran labaw kay sa daghan nimong mga kauban, ug ang panahon moabut nga ang natigum nga mga ebidensya nga imong nakuha mobarug isip lig-on nga panalipod batok niadtong kinsa nangita ug mangita sa pagguba sa ebidensya sa pagkabalaan sa misyon ni Propeta Joseph, ug niini nga pagpanalipod dili gayud ikaw malibug, ug ang kaalam ipadayag nganha sa imong kalag pinaagi sa gahum sa Espiritu sama sa yamog nga gikan sa langit, ug kini mopadayag nganha sa imong pagsabut og daghang mga kamatuoran kalabut niini nga buhat.”3 Natuman kining propetikanhong mga pulong sa iyang kinabuhi. Isip usa ka batid sa ebanghelyo, magtutudlo, ug tigsulat, mitrabaho siya nga makugihon sa pagpasabut ug pagpanalipod sa mga doktrina sa kaluwasan. Si Presidente Heber J. Grant makausa mitawag kaniya ang “tawo nga labing maalamon sa mga kasulatan” taliwala sa mga General Authority.4
Paingon na sa katapusan sa iyang kinabuhi, si Presidente Smith kanunay nga namalandong sa mga panalangin nga iyang nadawat pinaagi sa iyang pagtuon sa ebanghelyo:
“Sa akong tibuok nga kinabuhi akong gitun-an ug gipamalandong ang mga baruganan sa ebanghelyo ug gitinguha ang pagpuyo sa mga balaod sa Ginoo. Agi og resulta dihay miabut sa akong kasingkasing nga usa ka dakong gugma alang kaniya ug sa iyang buhat ug alang niadtong tanan kinsa nagtinguha sa pagpadayon sa iyang mga katuyoan sa kalibutan.”5
“Sa tanan kong mga adlaw akong gitun-an ang mga kasulatan ug gitinguha ang paggiya sa Espiritu sa Ginoo sa pagsabut sa tinuod nga kahulugan niini. Ang Ginoo maayo kanako, ug ako nagmaya diha sa kahibalo nga iyang gihatag kanako ug ang pribilehiyo nga anaa kanako sa pagtudlo sa iyang makaluwas nga mga baruganan.”6
Si Elder Joseph Fielding Smith sa Korum sa Napulog Duha ka mga Apostoles ug si Presidente Joseph F. Smith, 1914
Mga Pagtulun-an ni Joseph Fielding Smith
1
Kita kinahanglan nga mangita sa kamatuoran diha sa daghang mga hilisgutan, apan ang labing importante nga kahibalo mao ang kahibalo sa ebanghelyo.
Nagtuo kita sa edukasyon. Isip usa ka katawhan kita nagtinguha kanunay sa pagkat-on sa tanang hilisgutan, ug isip usa ka Simbahan naggasto kita og dagko nga mga kantidad ug naghimo og ubay-ubay nga sakripisyo sa paghimo og mga oportunidad sa edukasyon nga maanaa sa mga miyembro sa Simbahan. Ug ilabi na niini nga panahon sa siyentipiko nga pagsiksik ug pagpalambo. Kita naghunahuna nga ang atong kabatan-onan kinahanglan nga makakab-ot og daghang edukasyon ug teknikal nga pagbansay ingon nga gikinahanglan ug maalamon.
Apan atong hunahunaon nga kining pagtinguha og kalibutanong pagkat-on kinahanglan nga ubanan og sama nga tinguha sa espirituhanong pagsabut. Kini mas importante, kaliboan pil-on, nga makabaton og kahibalo sa Dios ug sa iyang mga balaod, aron nga kita makabuhat sa mga butang nga magdala og kaluwasan, kay sa magbaton sa tanang kalibutanong kaalam nga maangkon.7
“Kamo mahibalo sa kamatuoran, ug ang kamatuoran magahatag kaninyog kagawasan” (Juan 8:32).
Kada usa kinahanglan nga magkat-on og bag-ong butang kada adlaw. Kamong tanan adunay masusihong mga hunahuna ug nagpangita og kamatuoran diha sa daghang mga hilisgutan. Ako sinserong nanghinaut nga ang inyong labing importanting pagsiksik may kalabutan diha sa espirituhanong mga butang, tungod kay diha niana kita makaangkon og kaluwasan ug makahimo sa pag-uswag nga mogiya ngadto sa kinabuhing dayon diha sa gingharian sa atong Amahan.
Ang labing importanting kahibalo dinhi sa kalibutan mao ang kahibalo sa ebanghelyo. Kini usa ka kahibalo kalabut sa Dios ug sa iyang mga balaod, kalabut niadtong mga butang nga kinahanglan nga lihokon sa mga tawo ang ilang kaluwasan uban sa kahadlok ug pangpangurog diha sa atubangan sa Ginoo [tan-awa sa Mga Taga- Filipos 2:12; Mormon 9:27].8
Dili tanang kamatuoran managsama og bili o importansya. Pipila ka mga kamatuoran mas importante kay sa uban. Ang labing importanting kamatuoran, o ang labing importanting mga kamatuoran, atong makita diha sa mga sukaranan sa ebanghelyo ni Jesukristo. Una sa tanan, nga si Jesukristo mao ang Anak sa Dios, ang Manunubos sa kalibutan, kinsa mianhi sa kalibutan sa pagpakamatay aron ang mga tawo mabuhi. Kana nga kamatuoran kinahanglan nga atong mahibaloan. Kini mas importante pa kaayo nga mahibaloan nga si Jesukristo mao ang atong Manunubos, nga iyang gihatag kanato ang mga baruganan sa kinabuhing dayon, kay sa mahibalo sa tanan nga mahimong maangkon sa sekular nga edukasyon.9
Sa butang nga may kalabutan sa pilosopiya ug kaalam sa kalibutan, kini walay kahulugan gawas kon kini mahisubay sa gipadayag nga pulong sa Dios. Bisan unsa nga doktrina, nagagikan man kini sa ngalan sa relihiyon, siyensya, pilosopiya, o bisan unsa pa man kini, kon kini sukwahi sa gipadayag nga pulong sa Ginoo, dili molampos. Kini daw katuohan. Kini mahimong ibutang sa inyong atubangan sa pinulongan nga makadani ug diin kamo tingali dili makatubag. Kini ingon og giestablisar pinaagi sa ebidensya nga kamo dili makalimud, apan ang tanan nga inyo lamang nga pagabuhaton mao ang paghulat sa inyong panahon. Ang panahon motubag sa tanang mga butang. Inyong mahibaloan nga ang matag doktrina, matag baruganan, bisan pa og gituohan sa tanan, kon kini wala mahiuyon sa balaang pulong sa Ginoo ngadto sa iyang mga sulugoon, dili molampos. Ni kini kinahanglan nga kita maninguha sa paghubad sa pulong sa Ginoo sa kawang nga pagsulay aron mahisubay kini sa mga teyoriya o mga pagtulun-an. Ang pulong sa Ginoo dili molabay nga dili matuman, apan kining bakak nga mga doktrina ug mga teyoriya tanan dili molampos. Ang kamatuoran, ug ang kamatuoran lamang, ang magpabilin human ang tanan mahanaw.10
2
Ang Ginoo nagmando kanato sa pagsiksik sa mga kasulatan.
Ang Ginoo mimando sa mga miyembro sa Simbahan karon sa pagsiksik kaniya pinaagi sa pag-ampo, hugot nga pagtuo ug pagtuon. Kita gimandoan sa pagtuon sa mga sugo nga iyang gihatag kanato diha sa Doktrina ug mga Pakigsaad, diha sa Basahon ni Mormon, ug diha sa tanang mga kasulatan, uban sa saad nga “Bisan unsa nga baruganan sa salabutan nga kita makakab-ot niini nga kinabuhi, kini madala uban kanato sa pagkabanhaw. Ug kon ang usa ka tawo makaangkon og daghan pa nga kahibalo ug salabutan dinhi niini nga kinabuhi pinaagi sa iyang kakugi ug pagkamasulundon kay sa uban nga tawo, siya adunay daghan nga kahigayunan didto sa kalibutan nga umaabut.” [D&P 130:18–19.] … Ang Manluluwas miingon ngadto sa mga Judeo: Kamo magasusi sa mga kasulatan kay nagahunahuna man kamo nga pinaagi niini makakaplag kamo sa kinabuhing dayon; ngani kini mao ang nagapanghimatuod mahitungod kanako.” [Juan 5:39.] Pila ka mga miyembro sa Simbahan naghunahuna sa ingon usab, apan napakyas sa pag-andam sa ilang mga kaugalingon pinaagi sa pagtuon ug sa hugot nga pagtuo?11
Ako naghunahuna nga ang usa ka miyembro sa Simbahan dili makapahulay sa kalinaw ug kalipay ug adunay limpyo nga konsensya nga walay kahibalo pinaagi sa pagtuon ug pinaagi sa hugot nga pagtuo sa sumbanan nga mga kasulatan sa Simbahan. Kini nga mga rekord bililhon. Ang kalibutan nagbiay-biay niini, apan pinaagi sa mga pagtulun-an niini gitugutan kita nga mas mapaduol ngadto sa Dios, maangkon ang mas maayong pagsabut sa atong Langitnong Amahan ug sa iyang Anak nga si Jesukristo, mas masinati og maayo kanila ug mahibalo pa kalabut sa nindot kaayo nga plano sa kaluwasan nga ilang gihatag kanato ug sa kalibutan.12
Ang karaang mga propeta, kinsa nakakita sa atong mga panahon, namulong, dili lamang alang sa kaayohan sa katawhan sa ilang panahon, apan alang sa kaayohan sa katawhan nga nagpuyo sa mga panahon nga kining maong mga panagna gipamulong.13
Ako moingon nganha kaninyo, akong mga kaigsoonan, dili kamo makasunod sa mga sugo sa Ginoo ug maglakaw sa pagkamatarung gawas kon kamo nahibalo unsa kini. Ang Ginoo nagmando kanato sa pagsiksik sa mga kasulatan, tungod kay ang mga butang nga anaa niini tinuod ug matuman [tan-awa sa D&P 1:37]. … Siksika ang mga kasulatan, himoa nga masinati ang inyong mga kaugalingon sa gipadayag sa Ginoo alang sa inyong kaluwasan, sa kaluwasan sa inyong pamilya, ug sa kalibutan.14
3
Kita adunay dako nga responsibilidad sa pagpamati sa mensahe sa kamatuoran nga gipadayag sa Ginoo karon ngadto sa Iyang mga sulugoon.
Kon kita mamati sa mga pulong sa Ginoo ug mosiksik alang sa atong mga kaugalingon ug magbaton og kahibalo gikan sa Basahon ni Mormon, sa Biblia, sa Doktrina ug mga Pakigsaad, sa Perlas nga Labing Bililhon, ug gikan sa mga instruksyon nga gihatag ngari kanato matag karon ug unya sa mga kadagkoan sa Simbahan, ug maningkamot sa pagbuhat sa kabubut-on sa Ginoo, naghinumdom sa atong mga pag-ampo ug atong mga pakigsaad diha sa iyang atubangan, kita dili mahisalaag.15
Sa ikasiyam nga Artikulo sa Hugot nga Pagtuo kita nagpahayag nga “Kami nagtuo sa tanan nga gipadayag sa Dios, sa tanan nga gipadayag Niya karon, ug kami nagtuo nga Siya mopadayag pa og daghan nga dagko ug mahinungdanon nga mga butang kalabut sa Gingharian sa Dios.” Kini ingon nga tinuod, nahimo kini nga kinahanglan alang kanato sa pagsabut sa tanan nga Iyang napadayag, ug nianang Iyang gipadayag karon; kay kon dili, kita dili kauban sa Iyang buhat ug dili makahibalo sa iyang kabubut-on kalabut kanato, tungod kay kita dili makasabut niini.16
Ang mga Santos sa Ulahing mga Adlaw kinahanglan nga mosalig sa ilang mga lider, ug mosunod sa mga pagtulun-an sa mga kadagkoan sa Simbahan, tungod kay sila namulong ngadto kanila uban sa tingog sa panagna ug inspirasyon. Ang Ginoo nagpadayag diha sa una gayud nga seksyon sa Doktrina ug mga Pakigsaad, nga bisan pinaagi sa iyang kaugalingon nga tingog o pinaagi sa tingog sa iyang mga sulugoon, kini managsama ra [tan-awa sa D&P 1:38]. Busa, kita anaa ubos sa ingon ka dako nga responsibilidad ug obligasyon sa pagpamati ngadto sa tingog sa usa kinsa nagbarug nga pangulo sa pagtudlo sa katawhan, o sa pagpamati ngadto sa tingog sa mga elder sa Israel, samtang ilang gidala taliwala sa katawhan ang mensahe sa kamatuoran, sama [kon] ang Ginoo mopadala og anghel gikan sa iyang presensya o siya mismo ang moanhi sa pagpahayag niining mga butanga ngari kanato.17
4
Kita masayud sa kamatuoran sa ebanghelyo pinaagi sa pagtuon, hugot nga pagtuo ug kamasulundon ug pinaagi sa giya sa Espiritu Santo.
Kini maayo kon kita mosunod sa tambag nga gihatag sa Ginoo kanato, nga mao: “Ug kinsa kadto nga magmahal sa akong pulong, dili malingla.” [Joseph Smith—Mateo 1:37 ] Ang pagmahal sa iyang pulong labaw pa kay sa pagbasa lamang niini. Sa pagmahal niini ang tawo kinahanglan gayud nga dili lamang mobasa ug motuon, apan maningkamot nga mapainubsanon ug masulondong mobuhat sa mga sugo nga gihatag, ug mobaton sa inspirasyon nga ihatag sa Balaang Espiritu.18
Usahay kita makadungog sa bagulbol, “Wala akoy panahon.” Apan kitang tanan adunay panahon sa pagbasa ug pagtuon nga maoy atong sagradong katungdanan. Dili ba kita makagahin og labing minus kinse minutos matag adlaw sa paghatag og may sistema nga pagbasa ug pagpamalandong? Kini usa ka gamay nga panahon, apan mahimong usa ka oras ug kwarenta y singko minutos sa usa ka semana; pito ka oras ug tunga sa usa ka bulan nga traynta ka adlaw, ug nubenta y uno ka oras ug kinse minutos sa usa ka tuig. …
… Gamay ra kaayo kanato ang mobasa og maayo; kasagaran kanato dili kaayo mobasa. Ang Ginoo nag-ingon: “Ug sa ingon sa tanan nga walay hugot nga pagtuo, pangitaa ninyo nga makugihon ug magtudlo sa usag usa sa mga pulong sa kaalam; oo, pangitaa ninyo gikan sa labing maayo nga mga basahon ang mga pulong sa kaalam; pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo.” [D&P 88:118; 109:7.]19
Kita gilauman nga magtuon ug magkat-on sa tanan nga atong mahimo pinaagi sa pagsiksik ug pagtuki. Apan adunay mga limitasyon sa atong abilidad sa pagkat-on nga may kalabutan sa katarungan ug pagtuon. Ang mga butang sa Dios mahibaloan lamang pinaagi sa Espiritu sa Dios. Kinahanglan gayud nga kita makaangkon og kahibalo pinaagi sa hugot nga pagtuo.20
Ang mga tawo mahimong magsiksik, mahimo silang magtuon, mahimo silang magkat-on, sa tinuod, sa daghang mahinungdanong mga butang, sila mahimong magtigum og daghang impormasyon, apan dili gayud sila modangat ngadto sa kahingpitan sa kamatuoran … gawas kon sila giyahan pinaagi sa Espiritu sa kamatuoran, ang Espiritu Santo, ug mosunod sa mga sugo sa Dios.21
Ang tinuod nga hugot nga pagtuo inubanan sa diwa sa pagpaubos mogiya sa katawhan ngadto sa kahibalo sa kamatuoran. Walay maayo nga rason ngano nga ang katawhan bisan asa dili mahibalo sa kamatuoran nga naghimo sa katawhan nga gawasnon. Walay maayo nga rason ngano nga ang tanang katawhan dili makadiskubre sa kahayag sa kamatuoran ug mahibalo kon ang Ginoo namulong ba pag-usab o wala niining ulahing mga adlaw. Gipahayag ni Pablo nga ang katawhan kinahanglan nga “mangita sa Ginoo, basin pag ila siyang mahikapan ug makaplagan, bisan tuod nga siya dili ra halayo gikan sa matag usa kanato.” [Mga Buhat 17:27.] Bisan diha taliwala sa espirituhanong kawalay alamag ug kakulang sa hugot nga pagtuo, nga nagtabon sa yuta, ang gahum sa Ginoo wala mokunhod. Dunggon niya ang kinasingkasing nga pangamuyo sa matinud-anong nangita sa kamatuoran; ug walay tawo nga kinahanglang magpuyo nga walay kahibalo sa balaang kamatuoran ug asa pangitaon ang Simbahan ni Jesukristo. Ang gikinahanglan lamang sa tawo mao ang mapainubsanong hugot nga pagtuo ug mahinulsulong espiritu uban sa determinasyon nga magpuyo sumala sa tinuod nga mga baruganan, ug ang Ginoo mopadayag niini ngadto kaniya.22
Unta kitang tanan mahibalo sa kamatuoran; dili kita ingon nga walay mahimo. Ang Ginoo mihimo niini nga posible alang sa tanang tawo nga mahibalo pinaagi sa pagsunod sa [Iyang] mga balaod, ug pinaagi sa paggiya sa Iyang Balaang Espiritu, kinsa gipadala sa katuyoan nga motudlo kanato kon kita mosunod sa balaod, aron kita mahibalo sa kamatuoran nga naghatag kanato og kagawasan [tan-awa sa Juan 8:32].23
5
Samtang atong gibutang ang atong mga kinabuhi nga nahiuyon sa kamatuoran, ang Ginoo modugang sa atong kahayag ug panabut.
Kini gikinahanglan, isip mga miyembro niini nga Simbahan, nga masinati niana nga gipadayag sa Ginoo, nga kita dili mahisalaag. … Unsaon nato paglakaw diha sa kamatuoran kon kita wala masayud niini?24
Ang atong bugtong katuyoan kalabut sa mga kamatuoran sa kaluwasan mao ang pagkasayud unsa ang gipadayag sa Ginoo ug dayon sa pagtuo ug pagbuhat sumala niana.25
Kon kita mosunod sa diwa sa kahayag, sa diwa sa kamatuoran, sa diwa nga gitakda diha sa mga pagpadayag sa Ginoo; kon kita, pinaagi sa diwa sa pag-ampo ug pagpaubos, magtinguha sa giya sa Espiritu Santo, ang Ginoo modugang sa atong kahayag ug sa atong panabut; aron kita makabaton sa diwa sa pag-ila, kita makasabut sa kamatuoran, kita makaila sa bakak kon atong makita kini, ug kita dili malingla.
Sa Simbahan kinsa ang pwedeng malingla? Dili ang tawo kinsa matinud-anon sa pagbuhat sa iyang katungdanan, dili ang tawo kinsa naghimo sa iyang kaugalingon nga masinati sa pulong sa Ginoo, dili ang tawo kinsa mituman sa mga sugo nga gihatag niini nga mga pagpadayag; apan ang tawo kinsa wala masinati sa kamatuoran, ang tawo kinsa anaa sa espirituhanong pagkawalay alamag, ang tawo kinsa wala makatugkad ug makasabut sa mga baruganan sa Ebanghelyo. Ang mao nga tawo malingla, ug kon kining mini nga mga espiritu moabut taliwala kanato dili siya makasabut o makaila tali sa kahayag ug sa kangitngit.
Apan kon kita maglakaw diha sa kahayag sa mga pagpadayag sa Ginoo, kon kita mamati sa mga tambag nga gihatag pinaagi niadtong kinsa nagbarug diha sa mga konseho sa Simbahan, gihatagan og gahum sa paghatag og mga instruksyon, kita dili mahisalaag.26
Siksikon nato [ang] mga kasulatan, hibaloan nato unsa ang gipadayag sa Ginoo, ibutang nato ang atong mga kinabuhi nga mahiuyon sa Iyang kamatuoran. Niana kita dili malingla, apan kita makabaton og gahum sa pagbuntog sa dautan ug sa tintasyon. Ang atong mga hunahuna madan-agan ug masabtan nato ang kamatuoran ug molahi kini gikan sa kasaypanan.27
“Siksikon nato [ang] mga kasulatan, hibaloan nato unsa ang gipadayag sa Ginoo, ibutang nato ang atong mga kinabuhi nga mahiuyon sa Iyang kamatuoran.”
Kon adunay bisan unsa nga doktrina o baruganan nga may kalabutan sa mga pagtulun-an sa Simbahan nga dili nato masabtan, nan mag-ampo kita. Modangop kita sa Ginoo diha sa diwa sa pag-ampo, sa pagpaubos, ug mangayo nga unta ang atong mga hunahuna malamdagan nga kita makasabut.28
“Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios”—kana ang sulbad sa sitwasyon—“makadawat og labaw pa nga kahayag, ug kana nga kahayag mag-anam og labaw ka hayag hangtud sa hingpit nga adlaw.” [D&P 50:24.]
Busa atong nasabtan gikan niini nga ang tawo kinsa nangita sa Dios ug [sa ingon] gigiyahan pinaagi sa Espiritu sa kamatuoran, o sa Maghuhupay, ug nagpadayon diha sa Dios, motubo sa kahibalo, sa kahayag, sa kamatuoran, hangtud sa kadugayan moabut kaniya ang hingpit nga adlaw sa kahayag ug kamatuoran.
Karon, dili nato makuha kanang tanan niini nga kinabuhi. Imposible kini alang sa usa ka tawo sa pagkab-ot sa katuyoan sa mubo nga katuigan sa mortal nga pagpuyo. Apan unsay atong makat-unan dinhi, kana nga mahangturon, kana nga gidasig sa Espiritu sa kamatuoran, mopadayon uban kanato human kita mamatay ug unya kita mopadayon, kon sa gihapon nagpadayon diha sa Dios, sa pagdawat og kahayag ug kamatuoran hangtud sa kadugayan moabut kita nianang hingpit nga adlaw.29
Ang saad gihimo ngadto sa tanan kinsa modawat sa kahayag sa kamatuoran ug pinaagi sa ilang pagsiksik ug pagkamasulundon naningkamot sa pagsinati sa ilang mga kaugalingon sa Ebanghelyo, nga ilang madawat ang pagtulun-an ngadto sa lain nga pagtulun-an, lagda ngadto sa lain nga lagda, diyutay dinhi ug diyutay didto, hangtud ang kahingpitan sa kamatuoran mao ang ilang bahin, gani ang mga tinagoan nga mga misteryo sa gingharian masayran ngadto kanila; “kay ang tanan nga magapangayo makadawat, ug ang magapangita makakaplag; ug ang magatuktok pagaablihan.” [Mateo 7:8; 3 Nephi 14:8; tan-awa usab sa Isaias 28:10; D&P 76:1–10; 98:11–12.] Tanan niini mga manununod sa kaluwasan ug sila pagakoronahan uban sa himaya, imortalidad, ug kinabuhing dayon, isip anak nga mga lalaki ug anak nga mga babaye sa Dios, uban sa kahimayaan diha sa Iyang celestial nga gingharian.30
Mga Sugyot alang sa Pagtuon ug Pagtudlo
Mga Pangutana
-
Samtang kamo nagbasa mahitungod sa mga paninguha ni Presidente Smith sa pagkat-on sa ebanghelyo (tan-awa sa “Gikan sa Kinabuhi ni Joseph Fielding Smith”), pamalandunga ang inyong kaugalingong mga paninguha. Unsa nga mga panalangin ang miabut kaninyo samtang kamo nagtuon sa mga kasulatan ug sa ubang mga pagtulun-an sa ebanghelyo?
-
Unsa ang atong makat-unan sa seksyon 1 mahitungod sa pagbalanse tali sa espirituhanong pagkat-on ug sekular nga pagkat-on? Unsaon nato pagtabang ang mga sakop sa pamilya ug sa uban sa paghatag og prayoridad sa espirituhanong kahibalo samtang sila naninguha og mga katuyoang pang-edukasyon?
-
Sa unsa nga paagi ang mga kasulatan mitabang kaninyo nga “mas masinati” sa Langitnong Amahan ug ni Jesukristo? (Tan-awa sa seksyon 2.) Paghunahuna unsay inyong mabuhat sa pagpalambo sa inyong pagtuon sa mga kasulatan.
-
Human mabasa ang seksyon 3, paghunahuna sa mga panalangin nga inyong nadawat samtang kamo nagsunod sa tambag sa mga lider sa Simbahan. Sa unsa nga paagi atong ipakigbahin ang mga pagtulun-an sa buhing mga propeta ngadto sa atong mga pamilya ug sa uban?
-
Unsa ang kahulugan niini nganha kaninyo nga mahalon ang pulong sa Ginoo? (Alang sa pipila ka mga ideya, tan-awa sa seksyon 4.) Sa unsa nga mga paagi kaha nga ang “labing minus kinse minutos matag adlaw sa paghatag og may sistema nga pagbasa ug pagpamalandong” nag-impluwensya sa atong mga kinabuhi?
-
Pamalandunga kon sa unsa nga paagi ang tambag diha sa seksyon 5 magamit sa inyong mga kinabuhi. Samtang ang sayop nga impormasyon mas nagkaagresibo ug kusog nga mikatap, unsaon nato nga “makaila tali sa kahayag ug sa kangitngit”? Unsay atong mabuhat sa pagtabang sa kabataan ug sa kabatan-onan?
May Kalabutan nga mga Kasulatan
Salmo 119:105; Juan 7:17; 2 Timoteo 3:15–17; 2 Nephi 4:15; 32:3; Helaman 3:29–30; D&P 19:23; 84:85; 88:77–80
Tabang sa Pagtudlo
“Bisan og nagtudlo ka og daghang mga tawo sa samang higayon, ikaw makatabang sa tagsa-tagsa. Sama pananglit, makatabang ka sa mga indibidwal kon imong abi-abihon og maayo ang matag tawo sa sinugdanan sa klase … Makatabang usab ka kon imong himoon ang pagpaapil nga madanihon ug luwas” (Pagtudlo, Walay Labaw ka Mahinungdanon nga Tawag [1999], 35).