Kapitulo 8
Ang Simbahan ug Gingharian sa Dios
“Ipaniguro ngadto sa tanang tawo nga kini ang Simbahan sa Ginoo ug siya ang nagdumala sa tanang kalihokan niini. Pagkanindot nga pribilehiyo nga mahimong miyembro sa ingon ka balaan nga institusyon!”
Gikan sa Kinabuhi ni Joseph Fielding Smith
Ang pagserbisyo ni Joseph Fielding Smith isip Presidente sa Simbahan, sugod Enero 23, 1970, hangtud Hulyo 2, 1972, mao ang lintunganay sa tibuok kinabuhi nga kamaunungon sa gingharian sa Dios. Nangomedya siya nga ang una niyang buluhaton sa Simbahan miabut sa masuso pa siya. Sa siyam pa ka bulan iyang edad, siya ug iyang papa, si Presidente Joseph F. Smith, mikuyog ni Presidente Brigham Young ngadto sa St. George, Utah, aron motambong sa pagpahinungod sa St. George Temple.1
Sa batan-on pa, nagserbisyo og full-time mga misyon si Joseph Fielding Smith ug wala madugay gitawag nga presidente sa korum sa priesthood ug sakop sa general board sa Young Men nga Mutual Improvement Association (ang gitawag karon nga organisasyon sa Young Men). Nagtrabaho sab siya isip klerk sa opisina sa Church Historian, ug pribadong mitabang sa iyang papa isip dili opisyal nga secretary niadtong Presidente ang iyang papa sa Simbahan. Pinaagi niining mga oportunidad sa pagserbisyo, si Joseph Fielding Smith nakadayeg sa dinasig nga organisasyon sa Simbahan ug sa tahas niini sa paggiya sa matag indibidwal ug mga pamilya ngadto sa kinabuhing dayon.
Na-orden nga Apostol ni Ginoong Jesukristo si Joseph Fielding Smith niadtong Abril 7, 1910. Nagserbisyo siya isip sakop sa Korum sa Napulog Duha ka mga Apostoles dul-an sa 60 ka tuig, lakip ang dul-an sa 20 ka tuig nga pagka-Presidente niana nga Korum. Isip Apostol, mitabang siya sa pagdumala sa Simbahan sa tibuok kalibutan. Apil siya sa daghang aspeto sa misyon sa Simbahan, nagserbisyo isip Church Historian, presidente sa Salt Lake Temple, presidente sa Utah Genealogical Society, ug Magtatambag sa Unang Kapangulohan.
Si Presidente Joseph Fielding Smith, mapahinunguron nga sulugoon sa gingharian sa Ginoo
Usa ka yano ug ordinaryo nga tawo, si Joseph Fielding Smith wala gayud magtinguha niini nga mga posisyon. Apan dihang gitawag siya sa Ginoo sa pagserbisyo, andam ug mahinamon siyang mihimo. Hilom niyang gipakita ang iyang kamaunungon dihang sa edad nga 89, miadto siya sa miting. Sa iyang paglakaw gikan sa balay, nadakin-as siya ug nahulog gikan sa pipila ka ang-ang. Bisan sakit ang iyang tiil, gilakaw niya ang hapit tunga sa milya—“nagtakiang sama sa usa ka tigulang,” miingon siya—aron lang mahimo ang iyang mga responsibilidad. Human sa miting, naglakaw siya pauli, diin sa katapusan miuyon ra siya nga magpahiling sa doktor. Nakita sa doktor nga miliki ang iyang mga bukog sa tiil. Miingon si Presidente Smith wala madugay kabahin sa kasinatian. “Morag dugay nahuman ang miting,” miingon siya. “Apan, ingon man niana ang tanang miting.”2
Sa usa ka mensahe ngadto sa kabatan-onan sa Simbahan, si Presidente Smith nakigbahin sa iyang katarungan sa iyang kamaunungon sa buluhaton sa Simbahan:
“Nasayud ko nga ang Dios buhi. Nasayud ko nga si Jesukristo ang Bugtong nga Anak sa atong Amahan. May hingpit ko nga pagtuo sa misyon ni Propeta Joseph Smith ug sa mga nanagsunod kaniya.
“Nasayud ko nga anaa kanato ang kamatuoran sa walay katapusang ebanghelyo ni Jesukristo, sama sa akong kasayuran nga siya buhi. Kon wala pa ko kahibalo niini, wala unta ko dinhi o mobuhat niini nga buhat. Apan nahibalo ko niini sa matag ugat sa akong lawas. Ang Dios mipadayag niini ngari kanako.”3
Mga Pagtulun-an ni Joseph Fielding Smith
1
Human sa mga siglo sa espirituhanong kangitngit ug apostasiya, gipahiuli sa Ginoo ang Iyang ebanghelyo ug giorganisar ang Iyang Simbahan dinhi sa kalibutan.
Ang Ginoo [mi]pahiuli sa ebanghelyo ug miorganisar og usab sa iyang Simbahan dinhi sa kalibutan. Ang hinungdan sa pag-organisar ug pagpahiuli mao ang kamatuoran nga ang kalibutan anaa sa espirituhanong kangitngit sulod sa mga siglo, walay awtoridad, ug walay panabut; wala sila masayud unsaon sa pagsimba ang Dios. …
Ang walay katapusang pakigsaad nabugto; ang husto nga panabut sa mga baruganan sa ebanghelyo nawala tungod sa apostasiya; ang katungod sa pagdumala sa mga ordinansa sa ebanghelyo nahunong tali sa katawhan. Kinahanglanon ang pagpahiuli niining tanan, ug ang pagtuo molambo tali sa katawhan pinaagi sa pag-abli sa kalangitan ug pagpahiuli sa ebanghelyo.
Mao nga gipadala sa Ginoo ang iyang mga sinugo, uban sa kahingpitan sa ebanghelyo, ug sa gahum, ug awtoridad sa priesthood para itugyan ngadto sa katawhan, ug gihatagan sila sa mga sugo … kay nasayud ang Ginoo sa mga kalamidad nga moabut sa kalibutan, ug iya kadto nga kabubut-on nga ang usa ka tukma nga pasidaan, ug ang oportunidad sa pagdawat sa ebanghelyo mahatag ngadto sa mga tawo aron sila maghinulsol ug mobiya sa dautan nilang mga buhat ug moserbisyo sa Ginoo [tan-awa sa D&P 1:17–23].4
Among ipahibalo nga Ang Simbahan ni Jesukristo sa mga Santos sa Ulahing mga Adlaw mao ang gingharian sa Dios dinhi sa kalibutan, ang bugtong dapit diin ang mga tawo makakat-on sa tinuod nga mga doktrina sa kaluwasan ug makakaplag sa awtoridad sa balaang priesthood.5
Akong mga kaigsoonan: Walay sukod ang akong pasalamat sa mga panalangin nga gihatag kanako sa Ginoo, ug sa matinud-anong mga miyembro sa iyang simbahan sa lain-laing kanasuran, ug sa tanan niyang anak sa tibuok kalibutan.
Siya akong gipasalamatan sa matag adlaw sa akong kinabuhi nga iyang gipahiuli niining ulahing adlaw ang walay katapusan niyang ebanghelyo alang sa kaluwasan sa tanan nga motuo ug mosunod sa mga balaod niini.6
2
Ang Ginoo Mismo midumala niini nga buhat sa Simbahan, ug atong pribilehiyo ang pagkamiyembro niini.
Ang Simbahan ni Jesukristo sa mga Santos sa Ulahing mga Adlaw sa pagkatinuod mao ang gingharian sa Dios dinhi sa kalibutan.7
Moingon ko nga walay tawo nga makabuot sa pagpangulo niini nga simbahan. Simbahan kini ni Ginoong Jesukristo; siya ang nangulo. Ang simbahan nagdala sa iyang ngalan, duna sa iyang priesthood, nangalagad sa iyang ebanghelyo, nagsangyaw sa iyang doktrina, ug naghimo sa iyang buluhaton.
Mipili siya og mga tawo ug gitawag sila nga himoong instrumento sa iyang mga kamot aron matuman ang iyang katuyoan, ug siya migiya ug mitudlo kanila sa ilang mga paghago. Apan ang katawhan instrumento lang sa mga kamot sa Ginoo, ug ang pasidungog ug himaya sa tanan nga natuman sa iyang mga sinugo gipasidungog ug ipasidungog ngadto kaniya sa hangtud.
Kon buhat man kini sa tawo, mapakyas kini, apan buhat kini sa Ginoo, ug siya dili mopakyas. Ug anaa kanato ang kasiguroan nga kon tumanon nato ang mga sugo ug magmaisugon sa pagpamatuod kang Jesus ug matinuoron sa matag pagsalig, ang Ginoo mogiya kanato ug sa iyang simbahan sa mga dalan sa pagkamatarung, alang sa katumanan sa tanan niyang katuyoan.8
Ngadto sa tanang miyembro sa Simbahan sa tibuok kalibutan moingon ko nga adunay balaang misyon kini nga simbahan ubos sa pagdumala ug pagpangulo ni Jesukristo, atong Manluluwas, ug walay makapugong sa iyang mga plano kabahin niini. Kini ang katumanan sa mga plano sa atong Amahan sa langit. Unta ang mga Santos sa tibuok kalibutan kanunay nga magpasalamat sa Ginoo sa ilang pagkamiyembro sa simbahan ug sa misyon ni Propeta Joseph Smith sa pagpahiuli sa ebanghelyo alang sa atong hingpit nga kalipay.9
Ngadto sa mga matinuoron og kasingkasing sa tanang nasud moingon kami: Gihigugma kamo sa Ginoo. Iyang gusto nga makadawat kamo sa kinatibuk-ang panalangin sa ebanghelyo. Karon nagdapit siya kaninyo sa pagbasa sa Basahon ni Mormon, sa pagdawat ni Joseph Smith isip propeta, ug sa pag-adto sa yutan-on niyang gingharian ug mamahimong tagapanunod sa kinabuhing dayon sa langitnon niyang gingharian.10
Wala gayud mahitabo sukad maorganisar ang Simbahan nga gipangulohan ang Simbahan og tawo. Wala usab sa kapanahonan ni Joseph Smith bisan sa kang Brigham Young; wala gayud sukad. Buhat kini sa Ginoo, ug ayaw kalimti nga ang Labawng Makagagahum ang magahimo niini nga buhat, ug dili ang tawo.11
Nasayud ko nga Ang Simbahan ni Jesukristo sa mga Santos sa Ulahing mga Adlaw mao ang gingharian sa Dios dinhi sa kalibutan, ug nga karon giorganisar ug gidumala nga may pagtugot sa Ginoo ug naglihok subay sa husto nga dalan.
Ipaniguro ngadto sa tanang tawo nga kini ang Simbahan sa Ginoo ug siya ang nagdumala sa tanang kalihokan niini. Pagkanindot nga pribilehiyo nga mahimong miyembro sa ingon ka balaan nga institusyon!12
3
Ang Simbahan giorganisar aron matabangan ang mga miyembro nga makakaplag og kalipay niini nga kinabuhi ug kinabuhing dayon sa umaabut nga kinabuhi.
Ang Ginoo miestablisar sa tanang butang ug mihatag kanato sa hingpit nga pamaagi. Dili kini mahimo sa tawo. Kon atong lihukon kanang gipadayag sa Ginoo, sigon sa iyang gipadayag, nan ang tanang butang mahingpit, kay ang organisasyon usa ka hingpit nga organisasyon; ang teyoriya niini—ang plano niini—walay sayop.13
Gipahimutang sa Ginoo diha sa iyang simbahan ang organisasyon sa priesthood nga gipangulohan sa mga apostoles ug mga propeta. Ug mihatag sab siya og uban pang organisasyon … sa pag-abag sa priesthood.
Sa matag dispensasyon sa ebanghelyo dunay panginahanglan nga kinahanglang makab-ot, problema nga sulbaron, ug tabang nga angayang ihatag sa pag-abag sa mga miyembro sa paglihok sa ilang kaluwasan “uban sa kahadlok ug pagkurog” atubangan sa Ginoo. (Tan-awa sa Mga Taga-Fil. 2:12.) Mao nga duna kitay mga organisasyon sa auxiliary [Relief Society, Young Men, Young Women, Primary, ug Sunday School] sa pag-abag sa priesthood. Maayo ang pagkaorganisar niini aron makab-ot ang panginahanglan sa katawhan sa bisan unsang kahimtang. Kabahin kini sa panggobyerno sa Dios ug gipahimutang aron makatabang sa mga miyembro sa Simbahan nga mahingpit ang ilang kinabuhi ug mohimo sa mga butang nga makahatag og kalipay niining kinabuhia ug sa kinabuhing dayon. …
Ang Simbahan ug mga ahensya niini usa ka organisasyon sa pagserbisyo aron makatabang sa pamilya ug indibidwal. Mga home teacher, lider sa priesthood, ug mga bishop gipili nga mangulo sa ilang mga sakop nga naningkamot alang sa kinabuhing dayon sa gingharian sa atong Amahan, ug ang mga organisasyon sa auxiliary gipili aron moabag niining talagsaong buhat sa kaluwasan.
Dili namo mapahingusgan nga kami lang ang dakong panginahanglan sa paggamit niining tanang programa alang sa kaayohan ug panalangin sa tanang anak sa atong Amahan. …
Kon tanan kita mohimo sa tanang butang nga gikinahanglan aron magpadayon ang mga programa sa Simbahan, panalanginan ug palamboon kita sa Ginoo nga molampos sa atong mga paghago, ug gikan niini ang tanang kalinaw ug kalipay ang atong ganti dinhi ug ang mahangturong himaya human dinhi.14
4
Ang atong panerbisyo sa Simbahan nagpahayag sa atong gugma sa uban ug pasalamat sa walay utlanang pagserbisyo alang sa Ginoo.
Ang Ginoo nagsuporta sa Simbahan. Siya naggiya kanato. Ang iyang Espiritu mikunsad sa iyang katawhan. Ang iyang gikinahanglan gikan nato mao ang mapaubsanong pagserbisyo kaniya ug kahiusahan sa kasingkasing ug kalag.15
Ang atong Manluluwas mianhi sa kalibutan sa pagtudlo kanato nga maghigugmaay kita, ug kana nga mahinungdanong leksyon gipakita pinaagi sa labihan niyang pag-antus ug kamatayon aron kita mabuhi, di ba angayan nga ipakita nato ang gugma sa atong isigka-tawo pinaagi sa pagserbisyo kanila? Di ba angayan natong ipakita ang pasalamat sa walay utlanang serbisyo nga gihatag niya kanato, pinaagi sa pagserbisyo alang sa iyang katuyoan?
Ang tawo nga mobuhat niini diha sa Simbahan alang lamang sa iyang kaugalingon dili gayud makaangkon og kahimayaan. Sama pananglit, ang tawo nga andam sa pag-ampo, pagbayad sa iyang ikapulo ug mga halad, ug pagbuhat sa ordinaryong mga katungdanan para lang sa iyang kaugalingon, ug walay lain, dili gayud makakab-ot sa kahingpitan.16
Ayaw balibari ang pagserbisyo. Kon ang nangulo mohangyo sa inyong tabang, ikalipay ang pagdawat ug himoa ang tanan alang niana. Naglaum ang Ginoo niini ngari kanato, ug ubos kita sa pakigsaad sa paghimo sa ingon. Magdala kini og kalipay ug kalinaw, ug sa samang higayon ang mga nagserbisyo makadawat sa labing mahinungdanong panalangin. Ang magtutudlo mas daghan og makat-unan kay sa gitudloan; ang panalangin nga ibalik kanato kon modawat kita sa calling sa pagtrabaho sa Simbahan mas dako kay sa panalangin nga atong ikabahin sa uban. Ang mobalibad sa paghago o molikay sa responsibilidad kon ihatag kini kaniya sa Simbahan namiligro kaayo nga mawad-an sa giya sa Espiritu. Sa katapusan mabugnaw siya ug dili ganahan sa tanang katungdanan, ug sama sa tanom nga dili maatiman ug mabu-buan, malawos ug mamatay sa espirituhanong kamatayon.17
Ang inyong pagserbisyo mamatikdan gayud sa Dios kinsa inyong giserbisyuhan ug kansang buhat kamo nahiapil.18
“Ang inyong pagserbisyo mamatikdan gayud sa Dios kinsa inyong giserbisyuhan ug kansang buhat kamo nahiapil.”
Akong pag-ampo nga kitang tanan, kinsa nagtambayayong isip tinuod nga managsoon sa gingharian sa Ginoo, unta maghago sa pagtuman sa talagsaong buhat nga anaa sa unahan.19
5
Niini nga dispensasyon, ang gingharian sa Dios ug buhat sa Ginoo mokatap sa tibuok kalibutan.
Ang dispensasyon sa Ebanghelyo nangahulugan nga paghatag sa gahum ug awtoridad ngadto sa balaanong pinili nga mga opisyal, ubos sa pagtugot sa Dios sa pagsabwag sa pulong sa Dios, ug pagpangalagad sa tanang ordinansa niini. …
May mga panahon nga ang Ebanghelyo gikuha gikan sa katawhan tungod sa ilang kalapasan. Sama sa panahon ni Noe. Ang Israel mitalikod sa Ginoo ug gipasagdan sila sa kangitngit sulod sa daghang henerasyon sa wala pa ang pag-anhi ni Jesukristo, ug dihang nakig-uban siya sa katawhan iyang gipahiuli ang kahingpitan sa Ebanghelyo. Gipadala Niya ang iyang mga disipulo sa pagsangyaw sa iyang mensahe sa tibuok kalibutan, apan wala madugay sa katuigang milabay ang mga tawo nagpakasala na usab ug nawala kanila ang awtoridad sa paglihok sa ngalan sa Ginoo. Hinungdan nga gikinahanglan ang pagbukas sa kalangitan ug pagpaila sa bag-ong dispensasyon aron pag-andam sa ikaduhang pag-anhi sa atong Ginoo diha sa kapanganuran sa langit aron maghari dinhi sa kalibutan uban sa himaya sulod sa usa ka libo ka tuig, nga haduol na, gani hapit na gayud.20
Ang ebanghelyo mao ra gihapon sa tanang dispensasyon; ang plano sa kaluwasan mao ra gihapon alang sa tanang anak sa Amahan sa tanang kapanahonan. Sa nagdagan ang panahon nawala kini tungod sa apostasiya, apan kon kanus-a may katawhan sa kalibutan, gitanyagan sila sa samang mga balaod ug kamatuoran sa kaluwasan nga iyang gipadayag kanato.
Apan dunay gidugang nga talagsaong butang nga atong nadawat niini nga kapanahonan nga wala pa kaniadto. Niini nga dispensasyon ang Ginoo mipahayag nga ang Simbahan dili na gayud mawala; niining panahona ang ebanghelyo magpabilin. Niining panahona ang gipadayag nga kamatuoran gituyo aron pag-andam sa katawhan sa ikaduhang pag-anhi sa Anak sa Tawo, ug ang Simbahan maestablisar sa tanang bahin sa kalibutan kon ang Ginoo moanhi sa pagpasiugda sa milenyal nga katuigan sa kalinaw ug pagkamatarung.21
Mga miyembro kita sa tibuok kalibutan nga simbahan, simbahan nga may plano sa kinabuhi ug kaluwasan, simbahan nga gipahimutang sa Ginoo mismo niining ulahing mga adlaw sa pagdala sa iyang mensahe sa kaluwasan ngadto sa tanang anak sa tibuok kalibutan. …
Atong nakab-ot ang gidak-on ug kalig-on nga naghimo natong makatuman sa sugo nga gihatag sa Ginoo pinaagi ni Propeta Joseph Smith nga kinahanglan natong isangyaw ang malipayong balita sa pagpahiuli ngadto sa tanang nasud ug katawhan.
Ug dili lang magsangyaw kita sa ebanghelyo sa matag nasud sa dili pa ang ikaduhang pag-anhi sa Anak sa Tawo, apan kinahanglang makakabig kita ug makaestablisar og mga kongregasyon sa mga Santos tali kanila.22
Ang gingharian sa Dios ug ang buhat sa Ginoo mas mokatap pa gayud; dali kini nga molambo sa kalibutan sa umaabut kay sa nahimo kaniadto. Ang Ginoo miingon niini, ingon man ang Espiritu; ug nagpamatuod ako niini, kay nasayud gayud ako nga kini tinuod. Ang gingharian sa Dios nia aron motubo, masangyaw, makagamut sa kalibutan, ug makasugakod kon asa kini gitanom sa Ginoo sa kaugalingon niyang gahum ug pulong, dili na mawala, apan magpadayon hangtud ang katuyoan sa Labawng Makagagahum matuman—matag baruganan nga napamulong sa mga propeta sukad sa sinugdanan sa kalibutan. Buhat kini sa Dios, diin siya mismo, sa iyang kaalam ug dili sa kaalam sa tawo, ang mipahiuli niini sa kalibutan niining ulahing mga adlaw.23
Ang ebanghelyo para sa tanang tawo, ug ang Simbahan maestablisar bisan asa, sa tanang nasud, gani sa tibuok kalibutan, sa dili pa ang ikaduhang pag-anhi sa Anak sa Tawo.24
Nahibalo ko ug mopamatuod nga ang katuyoan sa Ginoo dinhi sa kalibutan mopatigbabaw. Ang Simbahan ni Jesukristo sa mga Santos sa Ulahing mga Adlaw magpabilin. Magmadaugon ang buhat sa Ginoo. Walay gahum sa kalibutan ang makababag sa pagkatap sa kamatuoran ug pagsangyaw sa ebanghelyo sa tanang kanasuran.25
Akong ibilin ang akong panalangin kaninyo ug kasiguroan nga ang Dios magauban sa iyang katawhan, ug ang buhat diin kita naapil magmadaugon ug magpadayon hangtud ang mahangturong katuyoan sa Ginoo matuman.26
Mga Sugyot alang sa Pagtuon ug Pagtudlo
Mga Pangutana
-
Sa unsang paagi atong masunod ang ehemplo ni Presidente Smith sa atong pagserbisyo sa Simbahan? (Tan-awa sa “Gikan sa Kinabuhi ni Joseph Fielding Smith.”)
-
Pamalandungi ang mga pagtulun-an ni Presidente Smith kabahin sa Pagpahiuli sa ebanghelyo (tan-awa sa seksyon 1). Unsa ang inyong mga pagbati kon maghunahuna kamo nga nagpuyo sa panahon nga ang Simbahan sa Ginoo napahiuli na sa kalibutan?
-
Mipamatuod si Presidente Smith nga si Jesukristo ang nangulo sa Simbahan (tan-awa sa seksyon 2). Unsaon ninyo sa pagpakigbahin ang inyong pagpamatuod niini nga kamatuoran ngadto sa dili miyembro sa Simbahan?
-
Sa unsang paagi ang organisasyon ug mga programa sa Simbahan nakatabang kaninyong makadawat sa mga panalangin nga gihisgutan sa seksyon 3? Sa unsang paagi kini nakatabang sa inyong pamilya?
-
Miingon si Presidente Smith, “Ang atong Manluluwas mianhi sa kalibutan sa pagtudlo kanato nga maghigugmaay kita” (seksyon 4). Sa unsang mga paagi ang ehemplo sa gugma sa Manluluwas atong masunod isip mga home o visiting teacher?
-
Samtang magribyu kamo sa seksyon 5, tan-awa sa unsang paagi kini nga dispensasyon lahi kay sa uban. Sa unsang paagi kini nga panabut nakaimpluwensya sa atong panerbisyo sa Simbahan? Unsa ang inyong mga pagbati samtang maghunahuna kamo sa pag-andam sa kalibutan alang sa Ikaduhang Pag-anhi sa Manluluwas?
May Kalabutan nga mga Kasulatan
Tabang sa Pagtudlo
“Kon mogamit ka og lain-laing mga kalihokan sa pagkat-on, ang mga estudyante mas makasabut sa mga baruganan sa ebanghelyo ug mas daghan ang mahinumduman. Ang gipili pag-ayo nga pamaagi mas makapaklaro sa usa ka baruganan, mas maanindot, ug mas mahinumduman” (Pagtudlo, Walay Labaw ka Mahinungdanon nga Tawag, 89).