Kapitulo 14

Ang Gasa sa Espiritu Santo

“Kita human sa bunyag ug pagkumpirmar makauban ang Espiritu Santo kinsa magatudlo kanato sa pamaagi sa Ginoo, molamdag sa atong hunahuna ug motabang nato sa pagsabut sa kamatuoran.”

Gikan sa Kinabuhi ni Joseph Fielding Smith

Gitudlo ni Presidente Joseph Fielding Smith nga ang matag matinud-anong miyembro sa Simbahan “may katungod nga makadawat og pagpadayag nga gikinahanglan alang sa iyang kaugalingong giya.”¹ Kanunay niyang gitinguha kini nga giya, ilabi na sa iyang paningkamot nga makatudlo sa iyang mga anak. Si Elder Francis M. Gibbons, nga nagserbisyo isip secretary sa Unang Kapangulohan, miasoy sa mosunod nga kasinatian, sumala sa gisugilon kaniya sa anak ni Presidente Smith nga si Reynolds (gianggaan og Reyn).

“Si Reyn mitug-an nga nakapanigarilyo lang siya kausa sa iyang kinabuhi, ug kadto kadiyot ra kaayo. Nahitabo kadto sa estudyante pa siya sa Roosevelt Junior High School sa Siyudad sa Salt Lake. Ang agianan [sa eskwelahan] naa sa usa ka kilid nga diyutay ra kaayo ang sakyanang mangagi. Niining adlawa, si Reyn bag-o pa lang migawas sa atubangan nga agianan sa eskwelahan kauban sa higala nga nanigarilyo ug miaghat kaniya, kanunay siyang ingnon nga, ‘sulayi lang kausa.’ Niini nga okasyon, milampos ang iyang higala. Mikuha si Reyn og usa ka sigarilyo ug gidagkutan. Sa pipila ka pagpabulhot sa aso, dunay mihunong nga sakyanan ang papa ni Reyn. Giablihan ang bintana, miingon si Elder Smith sa nakalitan niyang anak, ‘Reynolds, makig-istorya ko nimo karong gabii human sa panihapon’ ug mipadagan. Miingon si Reyn, ‘Kon tawagon na ko ni papa og Reynolds, nahibalo kong lahi na kana.’ Gipasagdan ni Elder Smith si Reyn nga maghunahuna sa iyang sala sa tibuok hapon ug atol sa panihapon, dihang siya walay daghang ikasulti. Pagkahuman, milingkod siyang dili komportable sa kwarto sa iyang papa, … si Reynolds pagahukman. Ang iyang nadawat puro mabination, mahigugmaon nga pahimangno bahin sa kadautan sa ‘mao nga buhat’ ug pagpahinumdom si kinsa siya ug sa unsang paagi moapektar ang iyang gihimo sa tibuok pamilya. Gitapos kini sa hangyo nga mosaad si Reyn nga dili na gayud siya manigarilyo. Nanumpa si Reyn. ‘Wala na gyud kadto mausab,’ miingon siya. Sukad niadtong mga tuiga, lakip sa panahon sa United States Navy atol sa World War II diin ang pagpanigarilyo nagkatap, iyang gituman ang iyang panaad sa iyang amahan.”

Sa paghunahuna niini nga kasinatian, nakabantay si Elder Gibbons: “Ang gibuhat ni Joseph Fielding Smith didto sa dapit diin nasakpan niyang midagkot ang iyang anak sa mao ra gayud nga sigarilyo hilabihan kaepektibo. Bisan wala niya kini isulti, ang kinaiya ug lihok ni Reyn nagpasabut nga ang panghitabo nagkombinser kaniya sa dili ordinaryo nga espirituhanong gahum sa pagbati sa iyang amahan, ilabi na kon alang sa kaayohan sa iyang pamilya.”²

Mga Pagtulun-an ni Joseph Fielding Smith

Ang misyon sa Espiritu Santo mao ang pagsaksi sa Amahan ug sa Anak ug sa tanang kamatuoran.

Ang Espiritu Santo ikatulo nga sakop sa Dios nga Kapangulohan. Usa siya ka Espiritu, sa porma sa usa ka tawo. Ang Amahan ug ang Anak mga personahe nga may lawas; may lawas sila nga unod ug bukog. Ang Espiritu Santo usa ka personahe sa Espiritu, ug may espiritu nga lawas lamang [tan-awa sa D&P 130:22]. Iyang misyon ang pagsaksi sa Amahan ug sa Anak ug sa tanang kamatuoran [tan-awa sa 2 Nephi 31:18; Moroni 10:5].³

Nakig-ambit siya sa mga butang sa Amahan ug sa Anak ug ipadayag kini ngadto sa matinud-anong nagserbisyo sa Ginoo. Pinaagi sa mga pagtudlo sa Maghuhupay, o Espiritu Santo, nga ang mga pagtulun-an ni Jesukristo nahinumduman sa mga apostoles [tan-awa sa Juan 14:26]. Pinaagi sa pagpanudlo sa Balaang Espiritu nga ang panagna miabut [tan-awa sa 2 Pedro 1:21].⁴

Ang Espiritu sa Dios nga namulong sa espiritu sa tawo dunay gahum sa paghatag sa kamatuoran sa mas dakong epekto ug panabut kay sa kamatuoran nga gihatag pinaagi sa personal nga kontak bisan sa langitnong mga binuhat. Pinaagi sa Espiritu Santo ang kamatuoran modulot sa kinahiladman ug sa kaugatan aron kini dili gayud hikalimtan.” ⁵

Ang Espiritu Santo mopakita sa kamatuoran ngadto sa mga matinud-anon.

Mituo kita nga ang Espiritu Santo mao ang tigpadayag ug siya mopamatuod sa matinuorong mga tawo nga si Jesukristo ang Anak sa Dios, nga si Joseph Smith usa ka propeta, ug kini nga simbahan “mao lamang ang tinuod ug buhi nga simbahan diha sa ibabaw sa tibuok yuta.” (D&P 1:30.)

Wala kinahanglana ni bisan kinsa nga magpabilin sa kangitngit; ang kahayag sa walay katapusang ebanghelyo ania na; ug ang matag sinsero nga nagpangita sa kamatuoran dinhi sa kalibutan makaangkon og personal nga saksi gikan sa Balaang Espiritu bahin sa kamatuoran ug balaang kinaiyahan sa buhat sa Ginoo.

Miingon si Pedro: “… Ang Dios wala diay pinalabi sa mga tawo; hinonoa nga sa matag usa ka nasud, iyang pagakahimut-an ang bisan kinsa nga magakahadlok kaniya ug magabuhat sa matarung” (Mga Buhat 10:34–35), buot ipasabut nga ang Ginoo mobu-bu sa iyang Espiritu ngadto sa matinud-anon aron masayud sila sa ilang kaugalingon sa kamatuoran niini nga relihiyon.⁶

Ang Espiritu Santo mabati ni bisan kinsa nga mangayo sa kamatuoran, sama sa Iyang gibuhat kang Cornelio [tan-awa sa Mga Buhat 10]. Gipamahayag kini ni Moroni diha sa Basahon ni Mormon, dihang gitapos niya kini nga rekord, kapitulo 10, bersikulo 4:

“Ug kon kamo makadawat niini nga mga butang, ako moawhag kaninyo nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo.”

Ang matag tawo makadawat og impluwensya sa Espiritu Santo, bisan dili siya miyembro sa Simbahan, kon matinguhaon ang iyang pagpangita sa kahayag ug kamatuoran. Ang Espiritu Santo moanha ug mohatag sa tawo sa pagpamatuod nga iyang gitinguha, ug dayon mopahawa.⁷

Human sa bunyag, ang gasa sa Espiritu Santo ihatag pinaagi sa pagpandong sa mga kamot.

Ang saad gihimo sa karaan pa nga panahon sa simbahan ni Jesukristo nga ang tanang maghinulsol, mabunyagan alang sa kapasayloan sa mga sala ug magmatinud-anon, makadawat sa gasa sa Espiritu Santo pinaagi sa pagpandong sa mga kamot. Ang sama nga saad gihimo ngadto sa tanan nga modawat sa Ebanghelyo niini nga dispensasyon, kay ang Ginoo nag-ingon:

“Ug kinsa kadto nga adunay hugot nga pagtuo kamo mokumpirma diha sa akong simbahan, pinaagi sa pagpandong sa mga kamot, ug Ako motugyan sa gasa sa Espiritu Santo diha kanila.” [D&P 33:15.]⁸

Paiting of the Apostle Paul conferring the Gift of the Holy Ghost . — “Ug sa napandungan na sila ni Pablo sa iyang mga kamot, ang Espiritu Santo mikunsad kanila” (Mga Buhat 19:6).

Dili ninyo madawat ang gasa sa Espiritu Santo pinaagi sa pag-ampo alang niini, sa pagbayad sa ikapulo, sa pagtuman sa Pulong sa Kaalam—bisan gani sa pagpabunyag alang sa kapasayloan sa mga sala. Kinahanglang makompleto ninyo kana nga bunyag pinaagi sa bunyag sa Espiritu. Ang propeta miingon sa usa ka okasyon nga tingali sama ra nga kamo nagbunyag og usa ka bag nga balas kon wala ninyo kaniya ihatag ang gasa sa Espiritu Santo pinaagi sa pagpandong sa mga kamot. Dili ninyo kini makuha sa ubang paagi.⁹

Mituo ko sa doktrina sa pagpandong sa mga kamot alang sa gasa sa Espiritu Santo, diin kita dalhon ngadto sa pakig-uban sa atong Amahan sa langit ug magkat-on sa Iyang mga paagi, aron magasubay kita sa Iyang dalan.¹⁰

Pinaagi sa gasa sa Espiritu Santo, ang mga miyembro sa Simbahan padayon nga makig-uban sa Espiritu Santo.

Ang Espiritu Santo ang Mensahero, o Maghuhupay, nga gisaad sa Manluluwas nga ipadala sa iyang mga disipulo human siya gilansang sa krus. Kini nga Maghuhupay, pinaagi sa iyang impluwensya, mao ang mahimong padayon nga kauban sa matag binunyagan, ug mangalagad sa mga miyembro sa Simbahan pinaagi sa pagpadayag ug giya, kahibalo sa kamatuoran aron sila magpakabuhi sa kahayag. Ang Espiritu Santo ang molamdag sa hunahuna sa tinuoray nga miyembro nga nabunyagan. Pinaagi kaniya ang indibidwal nga pagpadayag moabut, ug ang kahayag sa kamatuoran maestablisar sa atong kasingkasing.¹¹

Human sa atong bunyag, gikumpirmahan kita. Unsay tuyo sa pagkumpirmar? Aron atong ikauban ang Espiritu Santo; aron mahatagan kita sa pribilehiyo nga magiyahan sa ikatulong sakop sa Dios nga Kapangulohan—pagpakig-uban, aron mahayagan ang atong mga hunahuna, aron kita malamdagan sa Balaang Espiritu sa pagpangita sa kahibalo ug panabut kabahin sa tanan mahitungod sa kahimayaan.¹²

Kita human sa bunyag ug pagkumpirmar makauban ang Espiritu Santo kinsa magatudlo kanato sa pamaagi sa Ginoo, molamdag sa atong hunahuna ug motabang nato sa pagsabut sa kamatuoran.¹³

Gisaaran kita nga kon kita mabunyagan, kon kita magmatinud-anon, maangkon nato ang giya sa Espiritu Santo. Unsa ang katuyoan niini? Sa pagtudlo kanato, sa paggiya, sa pagsaksi ngari kanato bahin sa makaluwas nga mga baruganan sa ebanghelyo ni Jesukristo. Ang matag bata nga igo na ang pangidaron nga mabunyagan, ug kinsa nabunyagan, may katungod sa giya sa Espiritu Santo. Nakadungog ko nga dunay miingon nga ang bata nga walo ang edad dili pa kasabut. Ako makasabut na. May pagpamatuod na ko sa kamatuoran dihang otso anyos ko, pinaagi sa Espiritu Santo. Naa na ni kanako sukad niadto.¹⁴

Pagkamahiyaon niini nga kahigayunan nga magiyahan kanunay sa Espiritu Santo ug makita ang mga misteryo sa gingharian sa Dios.¹⁵

Ang pakig-uban sa Espiritu Santo moabut lang niadtong nangandam sa pagdawat niini.

Sa akong hunahuna dunay daghang miyembro niini nga Simbahan nga nabunyagan alang sa kapasayloan sa ilang mga sala, ug napandungan sa mga kamot alang sa gasa sa Espiritu Santo, apan wala gayud makadawat sa gasa—nga mao, ang timailhan niini. Ngano? Kay wala nila andama ang ilang kaugalingon aron makadawat niini. Wala sila magpaubos sa ilang kaugalingon. Wala sila mangandam alang sa pakig-uban sa Espiritu Santo. Busa, nagpakabuhi sila nga wala niana nga kahibalo; kulang sila sa panabut. Kon moabut ang mga maliputon ug batid sa pagpamakak, mangita og sayop sa mga may awtoridad sa Simbahan ug sa mga doktrina sa Simbahan, kining huyang nga mga miyembro walay igo nga panabut, impormasyon, ug walay igong giya sa Espiritu sa Ginoo nga ikabatok sa sayop nga mga doktrina ug pagtulun-an. Maminaw sila ug magtuo nga tingali sila sayop, ug mopalayo sila sa Simbahan, kay sila wala makasabut.¹⁶

Sugo kini gikan sa Ginoo nga ang mga miyembro sa Simbahan kinahanglang magkugi sa ilang mga kalihokan ug magtuon sa sukaranang mga kamatuoran sa ebanghelyo sigon sa gipadayag. Ang Espiritu sa Ginoo dili makig-uban sa tawong walay pagpakabana, sa masupilon kinsa pakyas sa pagpakabuhi ubos sa balaang kahayag. Pribilehiyo sa matag nabunyagan nga tawo nga makaangkon og malungtaron nga pagpamatuod sa gipahiuli nga ebanghelyo, apan kini nga pagpamatuod magkaawop ug sa katapusan mapalong gawas kon padayon kitang makadawat og espirituhanong kaayohan pinaagi sa pagtuon, kamasulundon, ug makugihong tinguha nga mahibalo ug makasabut sa kamatuoran.¹⁷

A man sitting at a table with his scriptures open looking out the window. — “Sugo kini gikan sa Ginoo nga ang mga miyembro sa Simbahan kinahanglang magkugi sa ilang mga kalihokan ug magtuon sa sukaranang mga kamatuoran sa ebanghelyo.”

May katungod kita sa giya sa Espiritu Santo, apan dili kita magiyahan kon dili nato hatagan og pagtagad ang mga pagpadayag nga gihatag aron matabangan kitang makasabut ug magiyahan sa kahayag ug kamatuoran sa walay katapusang ebanghelyo. Dili kita makalaum nga magiyahan kon dili nato hatagan og pagtagad kining mahinungdanong mga pagpadayag nga may dakong kahulugan kanato sa temporal ug sa espiritwal. Karon kon anaa kita niini nga kahimtang sa kawalay pagtuo o kawalay tinguha sa kahayag ug kahibalo nga gibutang sa Ginoo sa atong duol, niana manubag kita o mamiligro nga malingla sa dautang mga espiritu, sa doktrina sa mga panulay, ug mga pagtulun-an sa tawo [tan-awa sa D&P 46:7]. Ug kon kining sayop nga mga impluwensya moabut kanato, wala kitay katakus sa pag-ila ug pagkahibalo nga dili diay kini sa Ginoo. Nan mamahimo kitang mga biktima sa mga dili diosnon, sa mga bangis, sa lipat-lipat sa mga tawo nga batid sa pagmugna og kasaypanan.¹⁸

Ang Espiritu sa Ginoo dili mopuyo sa mga templo nga hugaw, ug kon ang usa ka tawo mobiya sa kamatuoran ngadto sa kadautan, dili mosunod kaniya kana nga Espiritu ug mopalayo, ug mopuli ang espiritu sa kasaypanan, espiritu sa kamasinupakon, ang espiritu sa kadautan, ang espiritu sa mahangturong kalaglagan.¹⁹

Kon pabilin kitang matinud-anon, mopadayag kanato ang Espiritu Santo ug mogiya sa tibuok natong kinabuhi.

Misaad ang Ginoo sa tanang maghinulsol ug magpabiling matinud-anon, uban sa diwa sa pagpaubos ug kakugi, aron may katungod sila sa giya sa Espiritu sa Dios. Kini nga Espiritu mogiya kanila sa tibuok nilang kinabuhi.²⁰

Ang matag miyembro sa Simbahan gipandungan sa mga kamot sa ilang ulo alang sa gasa sa Espiritu Santo. Siya dunay katungod nga makadawat sa mga pagpadayag nga mahinungdanon alang sa indibidwal nga giya; dili para sa Simbahan, apan sa iyang kaugalingon. Siya may katungod pinaagi sa kamasulundon, pinaagi sa pagpaubos, nga makadawat og kahayag ug kamatuoran kay kini ipadayag pinaagi sa Espiritu sa Kamatuoran, ug siya nga magpatalinghug sa Espiritu ug magtinguha sa gasa sa Espiritu uban sa pagpaubos ug sa pagtuo dili malingla.²¹

Kinahanglang magpakabuhi kita sa kabalaan sa kinabuhi sa kahayag ug kamatuoran uban sa tukmang panabut nga moabut pinaagi sa gasa ug gahum sa Espiritu Santo nga gisaad sa tanang magatuo ngadto sa paghinulsol ug makadawat sa mga pulong sa kinabuhing dayon. Kon atong kauban ang Espiritu nan magpakabuhi kita sa kahayag ug pakig-uban sa Dios.²²

Pribilehiyo sa matag miyembro sa Simbahan nga masayud sa kamatuoran, mamulong sa kamatuoran, makabaton sa pagdasig sa Espiritu Santo; kini atong pribilehiyo, sa tinagsa, … nga makadawat ug magpakabuhi sa kahayag; ug kon magpadayon kita diha sa Dios, nga mao ang pagtuman sa Iyang mga sugo, atong madawat ang dugang nga kahayag hangtud moabut kanato ang hingpit nga adlaw sa kahibalo. [Tan-awa sa D&P 50:24.]²³

Makabalik kita sa presensya sa Dios nga atong Amahan, sa katapusan, pinaagi sa giya sa Espiritu Santo.²⁴

Mga Sugyot alang sa Pagtuon ug Pagtudlo

Mga Pangutana

Unsa ang gitudlo sa asoy diha sa “Gikan sa Kinabuhi ni Joseph Fielding Smith” kabahin sa Espiritu Santo? Kanus-a ang Espiritu miaghat kaninyo sa pagtabang og usa ka tawo?
Si Presidente Smith mipasabut sa “Espiritu sa Dios nga namulong sa espiritu sa tawo” (seksyon 1). Sa unsang paagi ang komunikasyon sa atong espiritu lahi kay sa komunikasyon sa atong mga dalunggan o mga mata? Sa unsang paagi nga mas gamhanan kini?
Unsa ang mga kalainan tali sa pagkadawat og timailhan sa Espiritu, sama sa gibuhat ni Cornelio, ug sa pagkadawat sa gasa sa Espiritu Santo? (Tan-awa sa seksyon 2.)
Gitudlo ni Presidente Smith nga ang bunyag dili kompleto kon wala ang gasa sa Espiritu Santo (tan-awa sa seksyon 3). Sa unsang paagi nga dili kompleto ang inyong kinabuhi kon wala ang gasa sa Espiritu Santo?
Pamalandungi ang mga pagtulun-an ni Presidente Smith sa seksyon 4 kabahin sa unsay ipasabut sa padayong pakig-uban sa Espiritu Santo. Sa unsang mga paagi kamo napanalanginan pinaagi niini nga pakig-uban?
Unsay atong mahimo aron maandam sa pagdawat sa pakig-uban sa Espiritu Santo? (Alang sa pipila ka sanglitanan, tan-awa sa seksyon 5.)
Sa inyong pagribyu sa seksyon 6, hatagi og pagtagad ang giya nga atong madawat pinaagi sa Espiritu Santo. Sa unsang paagi nga ang mga ginikanan makatudlo sa ilang mga anak sa pag-ila ug pagdawat niini nga giya?

May Kalabutan nga mga Kasulatan

Juan 16:13; Mga Buhat 19:1–6; 1 Mga Taga-Corinto 12:3; 1 Nephi 10:17–19; 2 Nephi 31:15–20; 3 Nephi 19:9; D&P 46:13; Mga Artikulo sa Hugot nga Pagtuo 1:4

Tabang sa Pagtudlo

“Ayaw kabalaka kon ang mga estudyante naghilom sa pipila ka segundo human ka makapangutana. Ayaw tubaga ang imong kaugalingong pangutana; hatagi og panahon ang mga estudyante sa paghunahuna sa mga tubag. Hinoon, ang taas nga kahilom mahimong magpasabut nga sila wala makasabut sa pangutana ug kinahanglan nga imong usbon ang pangutana” (Pagtudlo, Walay Labaw ka Mahinungdanon nga Tawag, 69).