Kapitulo 11

Pagpasidungog sa mga Yawe sa Priesthood nga Gipahiuli pinaagi ni Joseph Smith

“Mahimo ba nakong isulti karon—sa yano ug klaro kaayo nga paagi—nga anaa kanato ang balaang priesthood ug ang mga yawe sa gingharian sa Dios. Makaplagan lang kini sa Ang Simbahan ni Jesukristo sa mga Santos sa Ulahing mga Adlaw.”

Gikan sa Kinabuhi ni Joseph Fielding Smith

Si Presidente Joseph Fielding Smith mideklarar: “Ako adunay hingpit nga kahibalo sa balaanong misyon ni Propeta Joseph Smith. Walay pagduha-duha sa akong hunahuna nga ang Ginoo miandam kaniya ug mihatag kaniya og pagpadayag, kasugoan, mibukas sa langit para kaniya, ug mitawag kaniya sa pagdumala niining mahimayaong dispensasyon.”¹ Gilakipan ni Presidente Smith kining “hingpit nga kahibalo” og balaanong pagtahud alang sa mga yawe sa priesthood nga gipahiuli pinaagi ni Propeta Joseph. Kanunay niyang gitahud ug gisuportahan kadtong naghupot sa mga yawe, ug iyang gitambagan ang tanang miyembro sa Simbahan sa pagbaton nianang sama nga pagtahud. Siya miingon, “Tanang kalalakin-an nga hustong gipili sa pagdumala sa bisan unsang kapasidad diha sa Simbahan kinahanglang tahuron sa iyang calling.”²

Kausa sa pagserbisyo ni Joseph Fielding Smith isip Apostol, ang Unang Kapangulohan ug ang Korum sa Napulog Duha ka mga Apostoles naghisgot kabahin sa lisud nga pangutana. Si Elder Smith mipahayag og lig-ong ideya kabahin sa isyu. Usa ka adlaw si Presidente Heber J. Grant, kinsa Presidente sa Simbahan niadtong higayuna, misulod sa opisina ni Elder Smith. Si Presidente Grant mipasabut nga human sa mainampoong konsiderasyon kabahin sa isyu, siya mibati sa pagrekomendar og aksyon lahi sa panglantaw ni Elder Smith. Diha-diha dayon mipahayag si Elder Smith sa iyang suporta sa desisyon ni Presidente Grant. Sa wala madugay siya mideklarar, “Alang kanako, kon ang Presidente sa Simbahan moingon nga ang Ginoo mipakita o midasig kaniya sa pagbuhat og bisan unsang butang, hingpit nako siyang suportahan nianang buluhaton.”³

Si Joseph Fielding Smith misuporta sa tanan niyang mga lider sa priesthood, dili lang sa Presidente sa Simbahan. Sama pananglit, si Nathan Eldon Tanner gitawag sa pagserbisyo isip sakop sa Korum sa Napulog Duha niadtong Oktubre 1962. Usa ka tuig ang milabay, siya gitawag isip Magtatambag sa Unang Kapangulohan, nga nakapahimutang kaniya sa posisyon nga mas labaw ni Presidente Smith, kinsa Presidente sa Korum sa Napulog Duha ka mga Apostoles. Sa wala madugay mipahayag si Presidente Tanner sa iyang pasalamat sa suporta ni Presidente Smith: “Sa dihang gitawag ko nga masakop sa Unang Kapangulohan, bisan siya senior nga sakop sa Napulog Duha ug anaa na sa katungdanan sulod sa singkwenta ka tuig, siya mipakita og dakong pagtahud ngari kanako niana nga posisyon ug hingpit nga misuporta ug misalig kanako.”⁴

Si Presidente Smith mitahud usab sa mga lider sa priesthood sa iyang ward. Sa dihang siya nagserbisyo isip sakop sa Napulog Duha ka mga Apostoles, siya miingon: “Ako walay awtoridad … sa pagbunyag sa akong mga anak nga dili una moadto sa bishop sa ward diin ko nagpuyo ug mananghid kaniya, tungod kay siya naghupot sa mga yawe niana nga ward diin ko nasakop. Wala ko magbunyag bisan kinsa sa akong mga anak … gawas kon miadto na ko sa bishop ug gitugutan niya sa pagpahigayon niana nga ordinansa ug pagkumpirma kanila isip mga miyembro sa Simbahan.”⁵

Mga Pagtulun-an ni Joseph Fielding Smith

Ang mga yawe sa priesthood mao ang gahum ug awtoridad sa pagdumala sa buhat sa Ginoo dinhi sa kalibutan.

Adunay kalainan tali sa pagdawat sa katungdanan sa priesthood ug sa pagdawat sa mga yawe sa priesthood. Kini kinahanglan klaro natong masabtan. …

… Samtang ang tanang mga lalaki makahupot sa priesthood, sa katungdanan diin sila naordinahan, apan adunay espesyal, o naggiya, mga awtoridad, nga gitugyan niadtong gitawag sa pagdumala. Kini nga mga awtoridad gitawag og mga yawe.⁶

Ang mga yawe sa [priesthood] mao ang mga awtoridad sa pagpangulo; kini ang gahum ug awtoridad sa pagdumala ug paggiya sa tanang buluhaton sa Ginoo dinhi sa kalibutan. Kadtong naghupot niini may gahum sa pagdumala ug pagkontrolar sa paagi diin ang tanan mahimong moserbisyo diha sa priesthood.⁷

Kon ang mga tawo gisangunan sa usa ka tawo nga naghupot niining yawe, ang ilang mga buhat balido. Ang ilang gipangbuhat nasilyohan ug napahayag nga balido sa Simbahan dinhi sa kalibutan ug sa kalangitan.⁸

Ang Ginoo mipadala og balaanong mga mensahero gikan sa Iyang presensya sa pagpahiuli sa mga yawe sa priesthood.

Kita nagtuo nga human sa dugayng panahon sa kangitngit, walay pagtuo, ug pagkawala sa mga kamatuoran sa lunsay ug hingpit nga Kristiyanismo, ang Ginoo sa iyang walay kinutuban nga kaalam mipahiuli pag-usab dinhi sa kalibutan sa kahingpitan sa mahangturong ebanghelyo.

Kita nasayud nga si Joseph Smith propeta; nga ang Amahan ug Anak mipakita kaniya sa tingpamulak niadtong 1820 sa pagpasiuna niining katapusang dispensasyon sa ebanghelyo; nga iyang gihubad ang Basahon ni Mormon pinaagi sa gasa ug gahum sa Dios; nga iyang nadawat ang mga yawe ug awtoridad gikan sa mga anghel nga gipadala alang niining katuyoan; ug gipadayag sa Ginoo ngadto kaniya ang mga doktrina sa kaluwasan.⁹

Ang Ginoo dili modawat og bisan unsang ordinansa o seremonya, bisan pa kini gihimo o gipahigayon sa iyang ngalan, gawas kon kini nahiuyon sa iyang kabubut-on ug gipahigayon sa usa ka tawo nga giila isip iyang sulugoon. Tungod niana nga rason nga iyang gipadala ang iyang mga balaanong mensahero ngadto nilang Joseph Smith ug sa uban gikan sa iyang presensya, sa pagpahiuli niadtong nawala sa kalibutan, bisan ang kahingpitan sa ebanghelyo, ug ang kahingpitan ug mga yawe sa priesthood.¹⁰

Ang mga yawe sa priesthood kinahanglang ipahiuli. Dili paigo nga si Juan Bautista mianhi uban sa yawe sa Aaronic Priesthood, ug sila si Pedro, Santiago ug Juan uban sa mga yawe sa Melchizedek Priesthood, pinaagi niini ang Simbahan naorganisar, apan kinahanglang mabuksan ang kalangitan ug mapahiuli ang mga yawe nga gihuptan sa tanang propeta nga nangulo sa mga dispensasyon gikan sa panahon ni Adan hangtud sa panahon nila ni Pedro, Santiago ug Juan. Kining mga propeta tagsa-tagsang mianhi ug mitugyan sa awtoridad nga ilang gihuptan.¹¹

Study sketch with grid for Melchizedek Priesthood restoration. Peter, James and John are ordaining a kneeling sandy haired Joseph while Oliver, dressed in brown kneels at the side. — Sa dihang sila si Pedro, Santiago, ug Juan mikumpirma sa Melchizedek Priesthood ngadto nila ni Joseph Smith ug Oliver Cowdery, ilang gitugyan usab ang mga yawe sa priesthood.

Ang tanang mga yawe sa dispensasyon ipahiuli aron matuman ang mga pulong sa mga propeta ug mga katuyoan sa Ginoo sa pagpahinabo sa hingpit nga pagpahiuli sa tanang mga butang. Busa ang amahan sa tawhanong pamilya, ang unang tawo sa kalibutan, si Adan, kinahanglang moanhi, ug siya mianhi uban sa iyang gahum. Si Moises mianhi ug ang uban pa. Ang tanan nga naghupot og mga yawe mianhi ug mitugyan sa ilang mga awtoridad. … Wala kitay petsa kon kanus-a kining pipila ka mga awtoridad napahiuli, apan ang sulat ni Propeta Joseph Smith ngadto sa mga Santos sa Nauvoo mideklarar kabahin sa kaluwasan sa mga patay, sama nga kini narekord sa seksyon 128 sa Doktrina ug mga Pakigsaad [mga bersikulo 17–21], nga tanang propeta mianhi karong dispensasyon uban sa ilang mga yawe.¹²

Human maorganisar ang Simbahan ang Ginoo mimando sa Iyang mga Santos sa pagtukod og balay diha sa Iyang ngalan. Ang mga Santos wala dayon makaamgo sa kaimportante niini, ug wala dayon nila buhata ang pagtukod sa balay, busa nasuko ang Ginoo kanila [tan-awa sa D&P 95:1–4]. Human sila nakasab-an nagkugi sila ug bisan pa sa ilang kalisud mitukod sa Kirtland Temple. Nganong ila kining gitukod? Isip balaanong balay diin si Jesus makabisita, dapit diin Iyang paadtoon ang Iyang mga sulugoon, ang mga propeta, uban sa ilang mga yawe sa awtoridad. … Kita nasayud nga tulo sa bantugang karaang mga propeta kinsa naghupot sa mahinungdanong yawe mianhi niadtong Abril 3, 1836.

Unang mianhi si Moises [tan-awa sa D&P 110:11]. Iyang gihatag ngadto kang Joseph Smith ug Oliver Cowdery ang mga yawe sa pagpundok sa Israel. … Iyang gipundok ang Israel, ug samtang wala siyay pribilehiyo sa pagtabang kanila aron mapanag-iya ang yuta, bisan pa niini ang mga yawe sa pagpundok anaa sa iyang kamot. Siya mipakita nilang Pedro, Santiago, ug Juan sa bukid sa transpigurasyon ug didto gitugyan kanila ang samang yawe sa pagpundok sa Israel sa ilang panahon. Siya gipadala ngadto nila ni Propeta Joseph Smith ug Oliver Cowdery sa pagtugyan sa mga yawe sa pagpundok sa Israel sa dispensasyon sa kahingpitan sa kapanahonan. …

Si Elias mianhi human mahatag ni Moises ang iyang mga yawe ug midala sa ebanghelyo sa dispensasyon panahon ni Abraham [tan-awa sa D&P 110:12]. Ang tanang butang nga may kalabutan niadto nga dispensasyon, ang tanang panalangin nga gitugyan ngadto kang Abraham, ang mga saad para sa iyang kaliwatan, ang tanan kinahanglang ipahiuli, ug si Elias, kinsa naghupot sa mga yawe niadtong dispensasyon, mianhi.

Dayon si Elijah, ang katapusang propeta kinsa naghupot sa mga yawe sa gahum sa pagbugkos sa karaang Israel, mianhi ug mitugyan niana nga gahum, ang gahum sa pagbugkos [tan-awa sa D&P 110:13–16]. Pipila sa mga miyembro sa Simbahan naglibug nga si Elijah mianhi uban sa mga yawe sa pagbunyag alang sa mga patay o ang kaluwasan alang sa mga patay. Ang yawe ni Elijah labaw pa niini. Kini mga yawe sa pagbugkos, ug kadtong mga yawe may kalabutan sa buhi ug madawat sa mga patay nga andam maghinulsol.¹³

Si Elijah ang propeta … mitugyan kanila [Joseph Smith ug Oliver Cowdery] sa gahum sa pagbugkos, ang gahum sa paggamit sa priesthood nga ang nabugkos dinhi sa yuta, nabugkos sa langit.¹⁴

[Ang] gahum sa pagbugkos naghatag og pagtugot sa tanang ordinansa nga gipahigayon niini nga Simbahan ug ilabi na niadtong gipahigayon didto sa mga templo sa Ginoo.¹⁵

A painting by Dan Lewis showing Elijah in a white robe, standing by a window inside the Kirtland Temple and talking to Joseph Smith and Oliver Cowdery. — Sa Kirtland Temple, si Elijah mipakita ngadto nila ni Joseph Smith ug Oliver Cowdery ug gitugyan ang mga yawe sa pagbugkos.

Mga kaigsoonan, kini usa ka mahimayaong dispensasyon. Ang ubang mga dispensasyon nahimong kabahin niini. Tanang awtoridad, tanang gahum, nakasentro niining dispensasyon nga kita nagpuyo. Atong pribilehiyo nga makaambit niining mga panalangin pinaagi sa atong pagkamatinud-anon.¹⁶

Mahimo ba nakong isulti karon—sa yano ug klaro kaayo nga paagi—nga anaa kanato ang balaang priesthood ug ang mga yawe sa gingharian sa Dios. Makaplagan lang kini sa Ang Simbahan ni Jesukristo sa mga Santos sa Ulahing mga Adlaw.¹⁷

Ang Presidente sa Simbahan naghupot sa mga yawe para sa tibuok Simbahan.

Sa hapit na ang iyang pagka-martir, gitugyan sa Propeta [si Joseph Smith] ngadto sa Napulog Duha ka mga Apostoles —kinsa naglangkob sa ikaduhang korum sa Simbahan—ang tanang yawe ug tanang ordinansa ug priesthood nga ilang gikinahanglan sa pagpadayon niining dako ug mahimayaong buhat sa pagtubos sa tanang katawhan.¹⁸

Kining priesthood ug mga yawe … gihatag sa tanang kalalakin-an nga gi-set-apart isip sakop sa Konseho sa Napulog Duha. Tungod sila adunay awtoridad sa pagpangulo, kini hingpit nga magamit lang sa senior nga apostol sa Ginoo dinhi sa kalibutan, nga mao ang presidente sa Simbahan.¹⁹

Ang Presidente sa Simbahan naghupot sa tanang yawe para sa Simbahan. … Naa kaniya ang tanang gahum sa Priesthood. Siya naghupot sa mga yawe sa tanang matang sa priesthood, nga may kalabutan sa dispensasyon sa Kahingpitan sa Kapanahonan. Ang tanang mga yawe sa nanglabay nga mga dispensasyon nga napadayag na, anaa na kaniya.²⁰

Kinahanglan natong tahuron kadtong kinsa gitugyanan sa Presidente sa Simbahan sa mga yawe sa awtoridad.

[Ang Presidente sa Simbahan] adunay awtoridad sa pagtugyan sa awtoridad ug pagtangtang sa awtoridad kon iyang nakita nga angay ug nakadawat og inspirasyon sa pagbuhat niini.²¹

Hinumdumi nga usa ra dinhi sa kalibutan ang naghupot sa gahum sa priesthood sa pagbugkos, ug mahimo ni niyang idelegar sa uban, aron sila makahimo ug makabugkos dinhi sa kalibutan ug kini balido, kini adunay epekto, kon kini may pagtugot kaniya; kon iya kining kuhaon, walay tawo ang makagamit niining gahum.²²

Walay tawo ang makapahigayon ug makahatag sa mga panalangin sa templo kon walay pagtugot nga gitugyan gikan sa Presidente sa Simbahan. Walay tawo ang makabuhat sa bisan unsang buluhaton sa Simbahan kon walay pagtugot sa paglihok niini, kay kini maangkon lang pinaagi sa gahum ug mga yawe nga gihuptan sa Presidente sa Simbahan. … Pinaagi sa awtoridad sa mga yawe nga iyang gihuptan kon siya moingon nga kon ang piho nga pribilehiyo tangtangon gikan sa katawhan, walay tawo ang may awtoridad sa pagpahigayon niadtong partikular nga pribilehiyo. Kon may tawo nga mangahas sa pagbuhat niini, kini dili balido, ug ang tawo nga nagpahigayon niini manubag sa atubangan sa Dios, kon dili diha sa Simbahan, ug mapahamtangan nga may kalapasan. …

… Kon ang mga apostoles o ubang kaigsoonan mobisita sa mga stake sa Zion ug gitudlo sa pagpahimutang sa bisan unsang nagkinahanglan og pagtagad didto, ila kining gibuhat nga may pagtugot, o may awtoridad, nga gitugyan ngadto kanila sa Presidente sa Simbahan. Kining sama nga baruganan magamit sa ginagmay nga problema diha sa mga stake ug ward.²³

Matag tawo nga hustong gipili sa pagdumala sa bisan unsang buluhaton diha sa Simbahan kinahanglang tahuron sa iyang calling. Kon ang tawo giordinahan pagka-bishop, siya gihatagan sa mga yawe sa pagdumala sa ward diin siya nagpuyo ug kinahanglang tahuron ang iyang calling sa mga miyembro sa ward, bisan unsa pa nga katungdanan ang iyang gihuptan. Mao sab ni sa presidente sa stake, presidente sa usa ka korum, o bisan unsa pa. Sa paghulagway unsay pasabut niini kita gitudloan nga walay amahan ang may awtoridad, bisan pa siya naghupot sa Melchizedek Priesthood, nga mobunyag sa iyang anak nga walay pagtugot sa iyang bishop. Kon tugutan na, ang amahan gihatagan og awtoridad sa pagpahigayon niini nga ordinansa alang sa iyang anak. Kon adunay amahan nga magbuot-buot sa pagpahigayon og bunyag, o pag-orden sa iyang anak nga lalaki, nga walay pagtugot sa nangulo sa ward o stake, kon kini mahitabo, kinsa naghupot sa awtoridad, siya nakalapas. Mao sab ni ngadto sa apostol ingon man sa usa ka elder diha sa ward. Gani ang Presidente sa Simbahan dili gayud mobuhat og sama niini nga dili ilhon ang bishop sa iyang ward o presidente sa iyang stake ug ang awtoridad nga gitugyan ngadto sa bishop o sa presidente sa stake.²⁴

Ang hiniusang tingog niadtong naghupot sa mga yawe sa gingharian kanunayng mogiya nato asa gusto sa Ginoo kita moadto.

Sa akong hunahuna adunay usa ka butang nga kinahanglang klaro gyud sa atong hunahuna. Dili ang Presidente sa Simbahan, ni ang Unang Kapangulohan, ni ang hiniusang tingog sa Unang Kapangulohan ug sa Napulog Duha mopahisalaag sa mga Santos o motambag sa mga tawo nga sukwahi sa hunahuna ug kabubut-on sa Ginoo.

Ang indibidwal mahimong mahisalaag, o may panglantaw, o motambag nga sukwahi sa intensyon sa Ginoo. Apan ang tingog sa Unang Kapangulohan ug sa hiniusang tingog niadtong uban nga naghupot sa mga yawe sa gingharian kinahanglang mogiya sa mga Santos ug sa mga tawo niadtong dalan nga gusto sa Ginoo nga sila maanaa. …

Ako mopamatuod nga kon kita molantaw sa Unang Kapangulohan ug mosunod sa ilang tambag ug direksyon, walay gahum sa kalibutan ang makapahunong o makausab sa atong padulngan isip simbahan, ug isip indibidwal kita makasinati og kalinaw niining kinabuhia ug mahimong makapanunod sa mahangturong himaya sa sunod nga kinabuhi [tan-awa sa D&P 59:23].²⁵

Mga Sugyot alang sa Pagtuon ug Pagtudlo

Mga Pangutana

Sa unsang paagi kita makasunod sa ehemplo ni Presidente Smith samtang kita mopaluyo niadtong naghupot sa mga yawe sa priesthood? (Tan-awa sa “Gikan sa Kinabuhi ni Joseph Fielding Smith.”)
Sa unsang paagi ang seksyon 1 makatabang ninyo nga makasabut sa kalainan tali sa paghupot sa katungdanan sa priesthood ug sa paghupot sa mga yawe sa priesthood? Sa inyong hunahuna nganong importante man kini nga kalainan?
Sa unsang paagi nga napanalanginan mo tungod kay ang mga yawe sa priesthood napahiuli dinhi sa kalibutan? (Tan-awa sa seksyon 2.)
Sa inyong hunahuna sa unsang paagi nalig-on ang Simbahan pinaagi sa mga organisasyon nga gihulagway sa mga seksyon 3 ug 4? Sa unsang paagi ang indibidwal nga mga miyembro sa Simbahan malig-on?
Unsa ang inyong gibati samtang inyong gikonsiderar ang mga pulong ni Presidente Smith kabahin sa panaghiusa sa Unang Kapangulohan ug sa Korum sa Napulog Duha ka mga Apostoles? Kanus-a kamo nakadawat og giya pinaagi sa ilang “hiniusang tingog”? (Tan-awa sa seksyon 5.)

May Kalabutan nga mga Kasulatan

Mateo 16:13–19; Mga Buhat 3:21; D&P 21:4–6; 27:5–13; 65:2; 128:8–21; 132:7

Tabang sa Pagtudlo

“May panahon … nga ikaw wala makahibalo sa tubag sa usa ka pangutana. Kon mahitabo kini, sulti lang nga wala ka mahibalo. Mahimong mosulti ka nga paninguhaon nimo nga makakita sa tubag. O mahimo nimong imbitaron ang mga estudyante sa pagpangita sa tubag, maghatag kanila og panahon sa lain pa nga leksyon sa pagreport sa unsay ilang nakat-unan” (Pagtudlo, Walay Labaw ka Mahinungdanon nga Tawag, [1999], 64).