Pasiuna

Ang Unang Kapangulohan ug ang Korum sa Napulog Duha ka mga Apostoles mihan-ay sa sunod-sunod nga Mga Pagtulun-an sa mga Presidente sa Simbahan aron sa pagtabang nimo nga mahiduol sa imong Langitnong Amahan ug pagpalawom sa imong pagsabut sa gipahiuli nga ebanghelyo ni Jesukristo. Samtang ang Simbahan magdugang og mga basahon dinhi niini nga han-ay, makakolekta ka og mga basahon sa pakisayran sa ebanghelyo diha sa imong balay. Ang mga basahon niini nga han-ay gihimo aron gamiton alang sa personal nga pagtuon ug alang sa Dominggo nga pagpanudlo. Kini makatabang usab kanimo sa pagpangandam og uban nga mga leksyon o mga pakigpulong ug sa pagtubag sa mga pangutana mahitungod sa doktrina sa Simbahan.

Kini nga libro naghulagway sa mga pagtulun-an ni Presidente Joseph Fielding Smith, kinsa nagserbisyo isip Presidente sa Ang Simbahan ni Jesukristo sa mga Santos sa Ulahing mga Adlaw gikan niadtong Enero 23, 1970, hangtud Hulyo 2, 1972.

Personal nga Pagtuon

Samtang ikaw magtuon sa mga pagtulun-an ni Presidente Joseph Fielding Smith, pagmainampoon sa pagtinguha sa inspirasyon sa Espiritu Santo. Ang mga pangutana diha sa katapusan sa matag kapitulo motabang kanimo nga makasabut sa mga pagtulun-an ni Presidente Smith ug magamit kini diha sa imong kinabuhi. Samtang ikaw magtuon niini nga mga pagtulun-an, mahimong maghunahuna ka og mga paagi sa pagpakigbahin niini uban sa mga sakop sa pamilya ug sa mga higala. Kini mopalig-on sa imong pagsabut sa unsay imong gibasa.

Pagtudlo gikan Niini nga Libro

Kini nga libro gidesinyo nga gamiton diha sa balay ug didto sa simbahan. Sa mga grupo sa mga high priest, mga elders quorum, ug mga Relief Society, duha ka mga leksyon sa Dominggo kada bulan ang itudlo gikan sa mga kapitulo niini nga libro. Tungod kay ang libro adunay mas daghang mga kapitulo kay sa 12 ka bulan, ang mga lider sa ward ug stake modeterminar unsa nga kapitulo ang labing makatubag sa mga panginahanglan sa mga miyembro nga ilang gialagaran.

Ang mosunod nga mga sumbanan makatabang nimo sa pagtudlo gikan sa libro:

Pangandam sa Pagtudlo

Tinguhaa ang giya sa Espiritu Santo samtang ikaw nangandam sa pagtudlo. Tun-i sa mainampoong paagi ang kapitulo aron mahimong masaligon diha sa imong pagsabut sa mga pagtulun-an ni Presidente Smith. Ikaw makatudlo uban sa mas labaw nga sinseridad ug gahum kon ang iyang mga pulong nakaimpluwensya kanimo mismo (tan-awa sa D&P 11:21).

Kon ikaw nagtudlo og usa ka leksyon sa Melchizedek Priesthood o Relief Society, kinahanglan nga ikaw dili mohiklin niini nga libro o mag-andam og mga leksyon gikan sa uban nga mga materyal. Pilia sa mainampoong paagi kadtong mga pagtulun-an gikan niini nga kapitulo nga imong gibati nga labing makatabang sa imong gitudloan. Ang pipila ka mga kapitulo naglangkob og mas daghan nga materyal kay sa imong mahimo nga hisgutan atol sa oras sa klase.

Awhaga ang mga partisipante sa pagtuon sa kapitulo sa dili pa ang leksyon ug sa pagdala sa libro. Kon sila mohimo sa ingon, sila mas mahimong andam sa pag-apil diha sa panaghisgot ug makahatag og kaayohan sa usag usa.

Sa imong pagpangandam sa pagtudlo, hatagig espesyal nga pagtagad ang “Mga Sugyot alang sa Pagtuon ug Pagtudlo” sa katapusan sa kada kapitulo. Ubos niini nga ulohan, makita nimo ang mga pangutana, may kalabutan nga mga kasulatan, ug mga tabang sa pagtudlo. Ang mga pangutana ug may kalabutan nga mga kasulatan haum gayud sa kapitulo diin kini makita. Ang mga tabang sa pagtudlo makagiya nimo sa tanan nimong paningkamot sa pagtabang sa uban nga makakaplag og kalipay sa pagkat-on ug pagsunod sa ebanghelyo.

Pagpaila sa Kapitulo

Samtang ikaw nagpaila sa kapitulo, ug sa tibuok nga leksyon, paningkamot sa pagmugna og usa ka kahimtang diin ang Espiritu makatandog sa mga kasingkasing ug mga hunahuna niadtong imong gitudloan. Sa pagsugod sa leksyon, tabangi kadtong imong gitudloan nga mo-focus diha sa mga pagtulun-an sa kapitulo. Ikonsiderar ang mosunod nga mga ideya:

Basaha ug hisguti ang seksyon nga giulohan og “Gikan sa Kinabuhi ni Joseph Fielding Smith” sa sinugdanan sa kapitulo.
Hisguti ang usa ka litrato o kasulatan gikan sa kapitulo.
Manganta og dungan sa usa ka himno nga may kalabutan sa hilisgutan.
Pagpakigbahin sa daklit og usa ka personal nga kasinatian mahitungod sa hilisgutan.

Dumalaha ang Panaghisgot kabahin sa mga Pagtulun-an ni Presidente Smith

Samtang magtudlo ka gikan niini nga libro, dapita ang uban sa pagpakigbahin sa ilang mga hunahuna, sa pagpangutana, ug sa pagtudlo sa usag usa. Kon aktibo silang moapil, mas andam silang makat-on ug modawat og personal nga pagpadayag. Tuguti nga magpadayon ang mga panaghisgot kay sa humanon ang tanang mga leksyon. Sa pag-awhag og panaghisgot, gamita ang mga pangutana diha sa katapusan sa kada kapitulo. Makahimo usab ikaw og imong kaugalingong mga pangutana alang gayud niadtong imong gitudloan.

Ang mosunod nga mga opsyon mahimong makahatag kanimo og dugang nga mga ideya:

Hangyoa ang mga partisipante sa pagpakigbahin sa unsay ilang nakat-unan gikan sa ilang personal nga pagtuon sa kapitulo.Makatabang tingali ang pagkontak og pipila ka mga partisipante nianang semanaha ug sa paghangyo kanila sa pag-anha sa klase nga andam nga mopakigbahin sa unsay ilang nakat-unan.
Sanguni ang mga partisipante sa pagbasa og pinili nga mga pangutana gikan sa katapusan sa kapitulo (mahimong indibidwal o diha sa ginagmay nga mga grupo). Hangyoa sila sa pagpangita sa mga pagtulun-an diha sa kapitulo nga may kalabutan sa mga pangutana. Dayon dapita sila sa pagpakigbahin sa ilang mga hunahuna ug mga panglantaw ngadto sa uban nga mga grupo.
Basaha og dungan ang pinili nga mga pamahayag ni Presidente Smith gikan sa kapitulo. Hangyoa ang mga partisipante sa pagpakigbahin og mga ehemplo gikan sa mga kasulatan ug gikan sa ilang kaugalingon nga kasinatian nga naghulagway sa unsay gitudlo ni Presidente Smith.
Hangyoa ang mga partisipante sa pagpili og usa ka seksyon ug basahon kini sa hilom. Dapita sila sa paggrupo sa duha o tulo ka mga tawo kinsa mipili sa sama nga seksyon ug mohisgot unsay ilang nakat-unan.

I-awhag ang Pagpakigbahin ug Paggamit

Ang mga pagtulun-an ni Presidente Smith mas labing makahuluganon alang sa mga partisipante nga mopakigbahin sa uban ug mogamit niini sa ilang mga kinabuhi. Ikonsiderar ang mosunod nga mga ideya:

Pangutan-a ang mga partisipante sa unsang mga paagi nga ilang magamit ang mga pagtulun-an ni Presidente Smith sa ilang mga responsibilidad sa panimalay ug sa simbahan. Pananglit, mahimo nimo silang tabangan sa pagpamalandong ug paghisgot sa unsa nga paagi sila makagamit sa iyang mga pagtulun-an isip mga bana, mga asawa, mga ginikanan, mga anak, mga home teacher, o mga visiting teacher.
Awhaga ang mga partisipante sa pagpakigbahin sa pipila ka mga pagtulun-an ni Presidente Smith uban sa mga sakop sa pamilya ug mga higala.
Dapita ang mga partisipante sa paggamit unsa ang ilang nakat-unan ug pagpakigbahin sa ilang mga kasinatian sa pagsugod sa sunod nga klase.

Tapusa ang Panaghisgutan

I-summarize og daklit ang leksyon o hangyoa ang usa o duha ka partisipante sa paghimo sa ingon. Ipamatuod ang mga pagtulun-an nga imong gihisgutan. Mahimo usab ikaw nga modapit sa uban sa pagpakigbahin sa ilang mga pagpamatuod.

Impormasyon mahitungod sa mga Tinubdan nga Gikutloan Niini nga Libro

Ang mga pagtulun-an niini nga libro mao ang direkta nga mga kinutlo gikan sa mga sermon, mga artikulo, mga libro, mga sulat, ug mga journal ni Presidente Joseph Fielding Smith. Ang mga kinutlo gikan sa namantala nga mga tinubdan mipabilin sa punctuation, spelling, capitalization, ug paragraphing sa orihinal nga mga tinubdan gawas kon ang editoryal o tipograpikal nga mga kausaban gikinahanglan aron sayon basahon. Tungod niini nga katarungan, makamatikod ka og ginagmay nga kausaban diha sa teksto. Pananglitan, ang pulong ebanghelyo anaa sa gamay nga letra diha sa pipila ka mga kinutlo ug anaa sa dagko nga letra sa uban.

Si Presidente Smith usab kasagaran mogamit og mga termino sama sa mga tawo, o katawhan nga nagpasabut ngadto sa tanang mga tawo, lalaki ug babaye. Kanunay siya nga mogamit sa mga pronoun siya, iya, ug kaniya nga nagpasabut sa lalaki ug babaye.Komon kini sa pinulongan sa iyang panahon. Bisan pa sa kalainan tali niining maong pinulongan ug sa bag-o nga paggamit, ang mga pagtulun-an ni Presidente Smith magamit sa mga babaye ug mga lalaki.