Kapitulo 7
Sila si Joseph ug Hyrum Smith, mga Saksi ni Jesukristo
“Among ipalanog ang among tingog sa pasalamat sa kinabuhi ug pangalagad ni Propeta Joseph Smith, ni Hyrum Smith ang Patriyarka, ug sa mga propeta ug apostoles ug sa matarung nga mga tawo kinsa maoy nagtukod sa pundasyon.”
Gikan sa Kinabuhi ni Joseph Fielding Smith
Sukad niadtong bata pa, si Joseph Fielding Smith nasayud nga ang iyang pamilya adunay espesyal nga koneksyon ngadto kang Propeta Joseph Smith. Siya nadasig sa ehemplo sa iyang apohan nga si Hyrum Smith, ang maguwang ug maunungong higala ni Propeta Joseph. Si Hyrum matinud-anong miserbisyo sa iyang igsoon isip lider sa Simbahan. Mitabang usab siya sa pagmantala sa Basahon ni Mormon ug gitawag nga mahimong usa sa Walo ka mga Saksi sa libro. Niadtong Hunyo 27, 1844, sila si Joseph ug Hyrum gimartir sa Carthage, Illinois, gisilyo ang ilang pagpamatuod sa Manluluwas ug sa Iyang ebanghelyo. “Sa kinabuhi sila wala mabahin, ug sa kamatayon sila wala mabulag!” (D&P 135:3).
Si Joseph Fielding Smith wala makakita sa iyang mga apohan. Sa wala pa siya matawo, ang iyang apohang lalaki nga si Hyrum gimartir. Ang asawa ni Hyrum nga si Mary Fielding Smith batan-on pa usab nga namatay. Si Joseph Fielding Smith miingon: “Wala gyud ko kakita sa akong Apohang Babaye. Kanunay gyud kong naguol niana, kay usa siya sa labing halangdon nga babaye nga nabuhi dinhi sa kalibutan, apan akong nakaila ang iyang buotang igsoong babaye, si Tiya Mercy Thompson, ug isip usa ka bata moadto ug mobisita ko sa ilang panimalay ug magpasabak niya, diin siya mosaysay nako og mga istorya kabahin ni Propeta Joseph Smith, ug dako kaayo akong pasalamat niining kasinatian.”1
Si Joseph Fielding Smith nakakat-on usab gikan sa ehemplo sa iyang amahan, si Joseph F. Smith, kinsa personal nga nakaila ni Propeta Joseph Smith. Kabahin sa iyang amahan, si Joseph Fielding Smith miingon: “Wala gyuy pagduha-duha o dili kasiguroan sa iyang pagpamatuod. Ilabi na kon siya maghisgot kabahin sa kabalaan sa atong Manluluwas o sa misyon ni propeta Joseph Smith.”2
Kini nga mga ehemplo ug mga pagtulun-an nakapabaton ni Joseph Fielding Smith og pagpamatuod sa gipahiuli nga ebanghelyo sa iyang pagkabata. “Wala koy mahinumduman nga higayon diin wala ko motuo sa misyon sa atong Ginoo ug Manluluwas nga si Jesukristo ni sa misyon ni Propeta Joseph Smith,”3 siya miingon. Kon siya motudlo sa ebanghelyo, usahay iyang ipadayag ang iyang pagpamatuod kabahin sa iyang pamilya: “Gihigugma ba nako si Propeta Joseph Smith? Oo, sama sa paghigugma sa akong amahan. Gihigugma nako siya tungod kay sulugoon siya sa Dios ug tungod sa pagpahiuli sa ebanghelyo ug tungod sa mga benepisyo ug mga panalangin nga nadawat nako ug sa akong pamilya, ug kaninyo ug sa inyong pamilya, pinaagi sa mga panalangin nga gitugyan diha kaniya ug sa iyang mga kaubanan.”4
Bisan tuod si Presidente Smith mapasalamaton sa mga pagtulun-an ug mga panulundon sa iyang pamilya, ang iyang pagpamatuod iyaha mismo. Siya miingon, “Kanunay kong mapasalamaton sa akong pagpamatuod nga akong naangkon pinaagi sa Espiritu sa Ginoo nga si Joseph Smith, ang Propeta sa Dios, gitawag nga mahimong lider sa Dispensasyon sa Kahingpitan sa Kapanahonan.”5 Sa laing higayon siya mipamatuod: “Kini akong nasayran, pinaagi sa gasa sa Dios, nga si Joseph Smith sa tuig 1820 nakakita sa Amahan ug Anak; nga gipaila sa Amahan ang iyang Anak; nga ang Anak namulong ngadto kaniya, nangutana kaniya unsay iyang gusto nga masayran, ug gitambagan siya; giingnan siya unsay angayng buhaton, uban sa saad nga sa dili madugay laing kahibalo ang ipadayag ug ang kahingpitan sa ebanghelyo, nga nawala sa kalibutan, ipahiuli.” Dayon misiguro siya sa tanang katawhan nga sila makadawat sa samang pagpamatuod: “Tanang kalag dinhi sa kalibutan nga may tinguha nga masayud adunay pribilehiyo, ang matag kalag nga magmapainubsanon, ug sa ilang dakong pagpaubos ug hugot nga pagtuo, inubanan sa mahinulsulon nga espiritu, moduol sa Ginoo, makadawat nianang kahibalo ingon nga siya siguradong buhi.”6
Mga Pagtulun-an ni Joseph Fielding Smith
1
Duha ka tema ang mahinungdanon kaayo: nga si Jesukristo Anak sa Dios ug si Joseph Smith usa ka propeta.
Atong hibaloan ang kalabutan tali sa ngalan ni Jesukristo ug ni Joseph Smith. Si Kristo mao ang Ginoo; iyang gihimo ang pag-ula; siya ang pagkabanhaw ug ang kinabuhi; pinaagi kaniya ang tanang katawhan mahimong imortal, samtang kadtong nagtuo ug nagsunod sa iyang mga balaod makaangkon usab og kinabuhing dayon.
Si Joseph Smith usa ka propeta, gitawag niining katapusang mga adlaw nga maoy modawat sa makaluwas nga mga kamatuoran sa ebanghelyo pinaagi sa pagpadayag ug mobarug isip legal nga tigdumala, adunay gahum gikan sa kahitas-an, sa pagpahigayon sa mga ordinansa sa ebanghelyo.
Tungod kay kining mga kamatuoran nga gipadayag ngadto kaniya mao ang isangyaw sa tanang nasud sa dili pa ang Ikaduhang Pag-anhi, dili kaayo nato ikatingala nga si Moroni miingon kang Joseph Smith nga ang iyang “ngalan pagagamiton alang sa maayo ug sa dautan diha sa tanan nga mga kanasuran, mga kaliwatan, ug mga pinulongan, o nga kini pagalitukon sa maayo ug sa dautan taliwala sa tanan nga mga katawhan.” [Joseph Smith—Kasaysayan 1:33.]
Ni angay ikatingala nga sa wala madugay ang Ginoo miingon ngadto sa Propeta: “Ang lumulupyo sa yuta magpakisayud sa imong ngalan, ug ang mga buang mobiaybiay kanimo, ug ang impyerno makig-away batok kanimo;
“Samtang ang putli og kasingkasing, ug ang maalamon, ug ang bantugan, ug ang buotan, mangayo og tambag, ug pagtugot, ug mga panalangin gikan sa imong kamot sa kanunay.” (D&P 122:1–2.)
Ang tanang nasud sa kalibutan karon nagpangutana kabahin sa ngalan ni Joseph Smith, ug ang mga katawhan sa daghang mga nasud nagmaya sa gipahiuli nga ebanghelyo tungod kaniya.
Sugod sa sinugdanan niining dispensasyon, ang pagpamatuod ni Jesus, nga gipadayag ngadto kang Joseph Smith, gisangyaw sa Estados Unidos, Canada, Great Britain, kasagaran sa Europe, ug sa mga isla sa Pasipiko.
Sa bag-ohay nga katuigan adunay hapit di katuohan nga pagpalapad sa buhat diha sa Mexico, sa mga nasud sa Central America, ug sa South America.
Ug ang Asia karon [niadtong 1971] gibuksan alang sa mensahe sa ebanghelyo sa paagi nga milapas pa kay sa nangagi. Ang Simbahan giestablisar sa Japan ug Korea, sa Taiwan ug Hong Kong, ug kita nagsugod sa Thailand, Singapore, ug Indonesia.
Ug moabut ang panahon, pinaagi sa kalooy sa Ginoo, nga ang ubang mga nasud, nga karon wala modawat sa mensahe sa kamatuoran, mouyon nga makasulod ang atong mga misyonaryo, ug ang mga elder sa Israel mosangyaw niadtong matinuoron sa kasingkasing kabahin ni Kristo ug sa ebanghelyo sa iyang gingharian nga anaa na sa kalibutan karon pinaagi ni Propeta Joseph Smith.7
Si Joseph Smith mao ang tigpadayag sa kahibalo kabahin ni Kristo ug sa kaluwasan sa kalibutan karong panahona ug henerasyon.8
Duha ka tema ang mahinungdanon kaayo sa akong hunahuna. Nga si Jesukristo Anak sa Dios, nga gilansang sa krus alang sa mga sala sa kalibutan, ug si Joseph Smith usa ka propeta nga gitawag ug gitudlo sa pagpasiuna sa kapaigoan sa kahingpitan sa kapanahonan. Kini ang akong mensahe ngadto sa kalibutan.9
2
Gitawag sa Ginoo si Joseph Smith nga mahimong lider niining mahimayaong dispensasyon.
Si Joseph Smith … miabut ug ubos sa direksyon sa balaang mga mensahero miandam sa gingharian sa Dios ug niining katingalahan ug kahibulongan nga buhat aron ang kalibutan maandam sa pag-anhi sa Ginoo.10
“Si Joseph Smith usa ka propeta nga gitawag ug gitudlo sa pagpasiuna sa kapaigoan sa kahingpitan sa kapanahonan.”
Nasayud ko nga [si Joseph Smith] gitawag, ug gitudlo sa atong Amahan sa langit; nga siya nakadawat og pagpadayag ug paggiya gikan sa Anak sa Dios nga makahatag og kaayohan ug panalangin sa tanang katawhan kon ila kining dawaton.11
Walay pagduha-duha sa akong hunahuna nga ang Ginoo mipadako kaniya ug mihatag kaniya og pagpadayag, kasugoan, mibukas sa langit para kaniya, ug mitawag kaniya sa pagdumala niining mahimayaong dispensasyon. Ako hingpit nga nakombinser nga sa iyang kabatan-on, dihang siya nag-ampo, siya nakakita ug nagbarug mismo sa atubangan sa Dios nga Amahan ug sa iyang Anak nga si Jesukristo; wala ko magduha-duha niini—nasayud ko nga kini tinuod. Nasayud ko nga sa wala madugay siya kadaghan bisitahi ni Moroni, nakadawat sa Aaronic Priesthood ubos sa mga kamot ni Juan Bautista, sa Melchizedek Priesthood ubos sa mga kamot nila ni Pedro, Santiago, ug Juan ug Ang Simbahan ni Jesukristo sa mga Santos sa Ulahing mga Adlaw naorganisar niadtong Abril 6, 1830, sumala sa sugo sa kahitas-an.12
Sa pagpili og representante sa pagdumala niining “kahibulongan nga buhat hapit na moabut diha sa mga katawhan,” [tan-awa sa D&P 4:1] ang Ginoo wala mopili og tawo nga eksperto sa kinaadman ug tradisyon sa kalibutan. Ang Iyang mga pamaagi dili pamaagi sa tawo, ni ang iyang hunahuna dili sama sa hunahuna sa mga tawo [tan-awa sa Isaias 55:8]. Ang usa ka tawo nga natudloan sa kinaadman sa kalibutan kinahanglan pa nga magkat-on sa pagsalikway sa mga tradisyon ug pilosopiya sa tawo. Sa iyang dakong kaalam ang Ginoo mipili og simple nga bata—usa ka batang lalaki nga katorse ang edad. Ang Ginoo mipadayag sa kahingpitan sa ebanghelyo niining batan-ong lalaki, nga dili dawaton sa kalibutan tungod sa pagkawalay pagtuo. Sa mga katuigan uban sa langitnong paggiya—siya gitudloan sa mga mensahero gikan sa presensya sa Ginoo—kining batan-ong lalaki, si Joseph Smith, giandam sa pagdumala sa buhat sa pagpahiuli sa Ebanghelyo ug sa pagtukod sa Gingharian sa Dios.13
3
Ang Ginoo miingon nga kining henerasyon makadawat sa Iyang pulong pinaagi ni Propeta Joseph Smith.
Sa matag kapanahonan nga ang ebanghelyo anaa sa kalibutan, kinahanglang ipadayag kini ngadto sa mga propeta sa Ginoo, ug sila kinahanglang tawagon nga moserbisyo isip legal nga mga tigdumala sa pagpahigayon ug pagdumala sa mga ordinansa sa kaluwasan alang sa ilang isigka-tawo.
Si Joseph Smith mao ang propeta nga gitawag sa Ginoo niining panahona sa pagpahiuli sa mga kamatuoran sa kaluwasan ug sa pagdawat sa mga yawe ug gahum sa pagpahigayon niining makaluwas nga mga kamatuoran.
Ang Ginoo miingon ngadto kaniya: “… kini nga kaliwatan makabaton sa akong pulong pinaagi kanimo.” (D&P 5:10.) Ug dayon, nagpasabut sa ebanghelyo nga gipahiuli pinaagi ni Joseph Smith, ang Ginoo miingon: “Kini nga Ebanghelyo sa Gingharian isangyaw diha sa tibuok nga kalibutan, alang sa usa ka saksi ngadto sa tanan nga mga nasud, ug unya ang katapusan moabut, o ang kalaglagan sa mga dautan.” [Joseph Smith—Matthew 1:31.]14
Karon ako moingon—
Nga si Joseph Smith mao ang kinahanglang lantawon sa tanang tawo karong panahona aron makat-on sa kamatuoran kabahin ni Kristo ug sa iyang ebanghelyo;
Nga moabut ang panahon nga ang ngalan niining propeta mahibaloan sa tanang dapit niining kalibutan ug sa tanang katawhan;
Nga kadtong matinud-anon og kasingkasing modawat kaniya isip propeta ug mosimba sa Ginoo kinsa maoy iyang gipadayag;
Nga ang simbahan nga iyang gitukod pinaagi sa balaanong sugo molambo tungod kay nagsunod kini sa mga pinadayag nga iyang nadawat;
Ug nga ang tanan nga nagtuo ug nagsunod sa mga pagtulun-an ni Joseph Smith masayud nga si Jesukristo mao ang Anak sa Dios kinsa gilansang sa krus alang sa mga sala sa kalibutan.
Sa samang paagi nasayud ko nga si Jesus mao ang Kristo—ug kini akong nadawat pinaagi sa pagpadayag sa Balaang Espiritu—nasayud ko nga si Joseph Smith propeta sa Dios gikan kaniadto ug hangtud sa kahangturan. …
Sa diwa sa pagpamatuod ug pasalamat, akong [ipakigbahin] kining dinasig nga mga pulong gikan sa Doktrina ug mga Pakigsaad: “Si Joseph Smith, ang Propeta ug Manalagna sa Ginoo, nakahimo og daghan pa, gawas lamang kang Jesus, alang sa kaluwasan sa mga tawo niini nga kalibutan, kay ni bisan kinsa nga tawo nga nakapuyo dinhi.” (D&P 135:3.)15
4
Si Joseph Smith ug ang iyang igsoong si Hyrum nagkahiusa sa kinabuhi ug sa kamatayon.
Ako mapasalamaton sa pagpahiuli sa mahangturong kamatuoran niining katapusan nga dispensasyon sa ebanghelyo; sa misyon ug pagpangalagad ni Joseph Smith, ang Propeta, ug sa akong apohan, si Hyrum Smith, ang Patriyarka; ug sa katinuod nga ang mga yawe sa gingharian sa Dios napahiuli na pag-usab dinhi sa kalibutan.16
Sila si Joseph ug Hyrum Smith: “Sa kinabuhi sila wala mabahin ug sa kamatayon sila wala mabulag!” (D&P 135:3).
“Ug usab, sa pagkatinuod, Ako moingon nganha kaninyo, bulahan ang akong sulugoon nga si Hyrum Smith, kay Ako, ang Ginoo, nahigugma kaniya tungod sa kaligdong sa iyang kasingkasing, ug tungod kay siya nahigugma niana nga matarung diha sa akong atubangan, miingon ang Ginoo.” [D&P 124:15.]
Kinsa man ang dili malipay nga mahatagan og pagsalig ug pagdayeg sama niini, ug nagagikan pa sa Ginoo? Si Hyrum Smith mao ang usa sa unang nabunyagan niining dispensasyon. Sa tibuok kinabuhi siya anaa sa kiliran sa iyang igsoon nga si Joseph ug milig-on kaniya pinaagi sa pagdasig, hugot nga pagtuo ug maunungong gugma. Si Hyrum usa ka tawo nga may talagsaong malumo nga kasingkasing. Siya mapainubsanon gayud ug gihigugma ang iyang igsoon kay sa iyang kaugalingong kinabuhi. Kini nakita diha sa iyang kamatayon diin siya gimartir. Siya wala mahadlok sa pagpanalipod sa kamatuoran. Sa pagkatinuod siya “nahigugma niana nga matarung.”
Si Hyrum Smith natawo niadtong ikasiyam nga adlaw sa Pebrero, 1800, ug hapit unom ka tuig ang iyang pagkamagulang sa Propeta. Walay pasidungog nga nadawat ni Joseph Smith nga wala maapil si Hyrum kinsa nagmaya uban sa iyang igsoon sa tanang panalangin nga gihatag sa Ginoo ngadto kaniya. Kining sama nga kalidad sa inigsuong gugma nga gipakita ni Propeta Joseph para sa iyang igsoon nga si Hyrum. Sila dungang misinati sa samang mga kaguol ug kalipay. Susamang pagpanggukod ang ilang nasinati. Sila kauban sa samang bilanggoan tungod sa Ebanghelyo, ug sa dihang miabut ang panahon nga isilyo ang ilang pagpamatuod, sila dungan nga gimartir. “Sa kinabuhi sila wala mabahin ug sa kamatayon sila wala mabulag.” [D&P 135:3.] …
Kini ang pasidungog gikan sa Propeta: “Brother Hyrum, unsa ka maunungong kasingkasing ang anaa kanimo! O hinaut ang Mahangturong Jehova mopurong-purong og walay katapusang mga panalangin diha sa imong ulo, isip ganti alang sa pag-amuma nga anaa kanimo alang sa akong kalag! O unsa ka daghan nga mga kasakit ang atong giambitan; ug ato na usab nga nakaplagan ang atong mga kaugalingon nga gikadenahan sa walay kalooy nga kamot sa pagdaug-daug. Hyrum, ang imong ngalan mahisulat diha sa libro sa Balaod sa Ginoo, alang niadto kinsa magsunod kanimo, nga sila makakita, nga ilang sundon ang imong mga buhat.”
Usab ang Propeta miingon: “Nag-ampo ko sa akong kasingkasing nga unta ang tanan nakong kaigsoonan sama sa akong pinalanggang igsoon nga si Hyrum, kinsa ingon ka kalma sama sa nati nga karnero, ug may integridad sama ni Job, sa ato pa, ang kaaghup ug kamapainubsanon ni Kristo ug gihigugma nako siya nga molapas sa kamatayon, kay walay panahon nga ako nasuko kaniya, ni siya nasuko nako.”17
5
Gisilyohan ni Joseph ug Hyrum Smith ang ilang mga pagpamatuod pinaagi sa ilang dugo.
Ang akong apohan, ang Patriyarka nga si Hyrum Smith, gitawag sa paghupot sa mga yawe niining dispensasyon kauban ni Propeta Joseph, ang iyang manghud. Ang Ginoo miingon nga sa duha ka mga saksi ang tanang butang maestablisar [tan-awa sa 2 Mga Taga-Corinto 13:1]. …
Dili mahimo ni Joseph Smith nga mag-inusara lang, kay ang iyang buhat mapakyas gayud, sama sa buhat sa Manluluwas nga nanginahanglan og kumpirmasyon sa laing saksi, ug kinsa pa man ang makapamatuod kang Kristo gawas sa iyang Amahan? [Tan-awa sa Juan 8:12–18.] Ug busa ang Ginoo mitawag og laing tawo nga mobarug kauban ni Joseph Smith ug mohupot sa mga yawe sa kaluwasan niining dispensasyon isip saksi uban kaniya. …
… Wala lang gitawag [si Hyrum] nga mahimong Patriyarka sa Simbahan, nga mao ang iyang katungod sa pagkatawo, apan ang Ginoo miingon usab ngadto kaniya:
“Ug gikan niini nga takna Ako motudlo kaniya nga mahimo nga usa ka propeta, ug usa ka manalagna, ug usa ka tigpadayag ngadto sa akong simbahan, ingon man usab sa akong sulugoon nga si Joseph;
“Aron siya makahimo usab diha sa pag-uyon sa akong sulugoon nga si Joseph; ug aron usab siya makadawat og tambag gikan sa akong sulugoon nga si Joseph, kinsa mopakita kaniya sa mga yawe diin siya makapangutana ug makadawat, ug makoronahan uban sa sama nga panalangin, ug himaya, ug dungog, ug pagkapari, ug mga gasa sa pagkapari, nga sa makausa gihatag sa akong sulugoon nga si Oliver Cowdery;
“Aron ang akong sulugoon nga si Hyrum magpamatuod sa mga butang diin Ako mipakita ngadto kaniya, nga ang iyang ngalan makabaton og madungganon nga paghinumdom gikan sa kaliwatan ngadto sa kaliwatan, hangtud sa kahangturan.” [D&P 124:94–96.]
Sumala niini nga calling ug kasugoan, gitugyan ni Propeta Joseph Smith ngadto kang Hyrum Smith ang tanang yawe, awtoridad, ug mga gasa sa priesthood, nga gihuptan sa Propeta, ug gihuptan kaniadto ni Oliver Cowdery. Gipadayag usab sa Ginoo ngadto kang Hyrum Smith ang tanang kinahanglanon aron siya mahimong kompleto ug hingpit, nga saksi uban sa iyang igsoon nga si Joseph, isip usa ka propeta, manalagna, tigpadayag ug presidente sa Simbahan, ug modumala sa tanang panahon ug sa kahangturan niini nga dispensasyon uban sa iyang igsoon nga si Joseph, usa ka saksi ni Jesukristo.18
Uban sa iyang igsoon, nga akong apohan, ang Patriyarka nga si Hyrum Smith, siya [si Joseph Smith] misilyo sa iyang pagpamatuod pinaagi sa iyang dugo sa Bilanggoan sa Carthage. Ug ako mismo, gustong mahimong instrumento sa mga kamot sa Ginoo sa pagpahibalo sa tibuok kalibutan nga ang kaluwasan anaa na usab tungod ang Ginoo miandam og talagsaong manalagna niining panahon sa pag-establisar og usab sa iyang gingharian dinhi sa kalibutan.19
Nag-uban, gisilyohan ni Joseph ug Hyrum Smith ang ilang mga pagpamatuod pinaagi sa ilang dugo.
Among ipalanog ang among tingog sa pasalamat sa kinabuhi ug pangalagad ni Propeta Joseph Smith, ni Hyrum Smith ang Patriyarka, ug sa mga propeta ug apostoles ug sa matarung nga mga tawo kinsa maoy nagtukod sa pundasyon.20
Mga Sugyot alang sa Pagtuon ug Pagtudlo
Mga Pangutana
-
Mihisgot si Presidente Smith sa mga sakop sa iyang pamilya kinsa mitabang sa pagpalig-on sa iyang pagpamatuod sa bata pa siya kabahin sa misyon ni Joseph Smith (tan-awa sa “Gikan sa Kinabuhi ni Joseph Fielding Smith”). Unsay atong mahimo aron makaangkon ang mga bata og pagpamatuod sa misyon ni Propeta Joseph Smith?
-
Sa unsang paagi nga may kalabutan ang ngalan ni Jesukristo ug ni Joseph Smith? (Tan-awa sa seksyon 1.) Sa unsang paagi nga ang pagpangalagad ni Propeta Joseph Smith nakaimpluwensya sa inyong pagpamatuod sa Manluluwas ug sa Iyang ebanghelyo?
-
Pamalandungi ang obserbasyon ni Presidente Smith sa pagtawag sa Ginoo ni Joseph Smith kay sa “tawo nga eksperto sa kinaadman ug tradisyon sa kalibutan” (seksyon 2). Sa unsang paagi nga ang pagsabut niini makatabang nato kon kita mobati nga dili angay sa pagtuman sa atong mga responsibilidad?
-
Sa seksyon 3, si Presidente Smith nagkutlo sa Doktrina ug mga Pakigsaad 5:10 ug 135:3. Sa unsang paagi nga inyong mapasabut kining mga bersikulo sa usa ka tawo kinsa dili pamilyar sa misyon ni Joseph Smith?
-
Unsay inyong nakat-unan sa relasyon nila ni Joseph Smith ug iyang igsoon nga si Hyrum? (Tan-awa sa seksyon 4.)
-
Unsay inyong gibati samtang kamo naghunahuna kabahin nila ni Joseph ug Hyrum Smith nga gisilyohan ang ilang pagpamatuod pinaagi sa ilang dugo? (Tan-awa sa seksyon 5.) Sa unsang paagi nga atong mapasidunggan ang ilang sakripisyo?
May Kalabutan nga mga Kasulatan
Hubad ni Joseph Smith, Genesis 50:30–31; 2 Nephi 3:5–15; D&P 11:11–26; 76:22–24; 135
Tabang sa Pagtudlo
Usa ka paagi sa pag-awhag nga makat-on pag-ayo mao ang pagpaminaw og maayo kon ang usa ka tawo mangutana o mokomentaryo. “Ang pagpaminaw usa ka pagpakita sa gugma. Sa kasagaran nagkinahanglan kini og sakripisyo. Kon tinud-anay kitang maminaw sa uban, dili kita mosulti sa atong gustong isulti aron sila makapadayag sa ilang mga kaugalingon” ( Pagtudlo, Walay Labaw ka Mahinungdanon nga Tawag, 66).