Kapitulo 19
Ania sa Kalibutan apan Dili Iya sa Kalibutan
“Samtang kita ania sa kalibutan, dili kita iya sa kalibutan. Kita gipaabut nga mobuntog sa kalibutan ug mopuyo sa paagi nga mahimong santos.”
Gikan sa Kinabuhi ni Joseph Fielding Smith
Niadtong Disyembre 29, 1944, si Lewis ang anak nga lalaki ni Presidente Joseph Fielding Smith namatay samtang nagserbisyo sa Kasundalohan sa Estados Unidos. Bisan sa kaguol nga nasinati ni Presidente Smith, nahupay siya sa panumduman sa maayong kinabuhi ni Lewis. “Kon si Lewis mibuhat o misulti og ngil-ad nga butang wala gyud ako makadungog niini,” misulat si Presidente Smith diha sa iyang journal. “Ang iyang mga hunahuna limpyo ingon man sa iyang mga lihok. … Sa ingon kagrabe nga kasakit kami nakabaton sa kalinaw ug kalipay sa kahibalo nga siya limpyo ug luwas gikan sa mga bisyo nga nagdagsang sa kalibutan ug makita diha sa kasundalohan. Matinuoron siya sa iyang pagtuo ug takus sa mahimayaong pagkabanhaw, sa panahon nga kami pagahiusahon pag-usab.”1
Mga 11 ka tuig ang milabay, si Presidente Joseph Fielding Smith ug ang iyang asawa nga si Jessie nakakita og susama nga mga kinaiya diha sa laing sakop sa militar. Milibut sila sa mga misyon sa Simbahan sa silangang Asia ug mibisita usab sa mga Santos sa Ulahing mga Adlaw gikan sa Estados Unidos kinsa nagserbisyo sa militar. Si Presidente ug Sister Smith nakadayeg niining batan-ong mga lalaki, kinsa, bisan sa mga tintasyon sa kalibutan, nagpuyo og maayo, limpyo nga mga kinabuhi. Niadtong Oktubre 1955 nga kinatibuk-ang komperensya, mireport si Presidente Smith:
“Kamong mga amahan ug mga inahan kinsa adunay anak nga mga lalaki nga nagserbisyo sa kasundalohan, magmapagarbuhon kanila. Sila buotan nga batan-ong mga lalaki. Ang pipila sa atong mga sundalo mga kinabig, kinsa nadala diha sa atong Simbahan pinaagi sa mga pagtulun-an, pinaagi sa mga baruganan ug pinaagi sa ehemplo—ilabi na pinaagi sa ehemplo sa mga miyembro sa Simbahan kinsa nagserbisyo usab uban kanila diha sa kasundalohan.
“Nahimamat nako ang daghang batan-ong mga lalaki kinsa miingon, ‘Mipasakop kami sa Simbahan tungod sa paagi sa pagpakabuhi niining batan-ong mga lalaki ug tungod kay sila mitudlo kanamo sa mga baruganan sa ebanghelyo.’
“Naghimo sila og maayong buhat. Tingali adunay usa o duha kinsa wala mosunod, apan kadtong batan-ong mga lalaki kang kinsa ako may pribilehiyo sa pakighimamat, pakigsulti, mopamatuod sa kamatuoran ug naglihok nga mapainubsanon.
“Ug samtang nakighimamat ako sa mga opisyales ug mga pangulo sa relihiyon diha sa militar … , tanan sila miingon, ‘Nagustohan namo ang inyong batan-ong mga lalaki. Limpyo sila. Kasaligan sila.’”2
Mitambag si Presidente Smith sa mga miyembro sa Simbahan nga—mahisama niining batan-ong mga sundalo—“lahi sa uban dinhi sa kalibutan.”3 Sa ingon nga mga wali, kasagaran niyang isulti ang mahitungod sa pagbalaan sa Adlaw nga Igpapahulay, pagsunod sa Pulong sa Kaalam, pagtahud sa mga ngalan sa Langitnong Amahan ug ni Jesukristo, sa pagsinina sa ligdong nga paagi, ug sa pagsunod sa balaod sa kaputli. Gipasaligan niya ang mga Santos sa Ulahing mga Adlaw nga ang mga panalangin nga ilang madawat kon sila mobiya sa mga dautan sa kalibutan ug mosunod sa mga sugo “molabaw sa bisan unsa nga atong masabtan karon.”4
Bisan sa panahon sa gubat, kita makapuyo sa kalibutan apan dili iya sa kalibutan.
Mga Pagtulun-an ni Joseph Fielding Smith
1
Kita gilauman sa Ginoo nga mobiya sa mga dautan sa kalibutan ug sa pagpuyo sa paagi sama sa mga Santos.
Nagpuyo kita sa usa ka dautan ug makasasala nga kalibutan. Apan samtang kita ania sa kalibutan, dili kita iya sa kalibutan. Kita gipaabut nga mobuntog sa kalibutan ug mopuyo sa paagi nga mahimong santos. … Kita adunay mas dako nga kahayag kay sa kalibutan, ug mas labaw ang gilauman sa Ginoo kanato kay sa kanila.5
Sa ikanapulog pito nga kapitulo sa Juan—maglisud ako sa pagbasa niini nga kapitulo nga dili motulo ang akong mga luha— … ang atong Ginoo, sa pag-ampo ngadto sa iyang Amahan diha sa kalumo sa tibuok niyang kalag tungod kay nahibalo siya nga ang takna miabut na alang kaniya sa paghalad sa iyang kaugalingon isip usa ka sakripisyo, nag-ampo alang sa iyang mga disipulo. Diha niana nga pag-ampo miingon siya,
“Dili ako mangamuyo nga kuhaon mo sila gikan sa kalibutan, kondili hinoon nga imo unta silang ilikay gikan niadtong dautan.
“Sila dili iya sa kalibutan, maingon nga ako dili iya sa kalibutan.
“Balaana sila pinaagi sa kamatuoran: ang imong pulong mao ang kamatuoran.” (Juan 17:15–17.)
Kon kita nagsunod sa relihiyon nga gipadayag sa Ginoo ug diin atong gidawat, kita dili iya sa kalibutan. Kita kinahanglan nga dili moapil sa tanan niini nga kabuang. Kita kinahanglan nga dili moambit sa mga kasal-anan ug mga kasaypanan niini—mga kasaypanan sa pilosopiya ug mga kasaypanan sa doktrina, mga kasaypanan kalabut sa panggobyerno, o bisan unsa pa tingaling mga kasaypanan—kita walay labut niini.
Ang ato mao lamang ang pagsunod sa mga sugo sa Dios. Mao ra kana, ang magmatinuoron sa matag pakigsaad ug matag obligasyon nga atong gisudlan ug gidala diha sa atong mga kaugalingon.6
Ayaw paghunahuna gikan sa unsay akong nasulti nga ako mibati nga kita kinahanglang magpalayo sa tanang tawo nga dili miyembro sa Simbahan ug dili makig-uban kanila. Wala ako mosulti niana, apan gusto ko nga kita magmakanunayon nga mga Santos sa Ulahing mga Adlaw, ug kon ang katawhan sa kalibutan maglakaw diha sa kawalay alamag ug kasal-anan ug batok sa kabubut-on sa Ginoo, diha niana nga dapit kita magpalayo.7
Sa dihang kita mipasakop sa Simbahan … , gilauman kita nga mobiya sa daghang mga paagi sa kalibutan ug mopuyo sa paagi sama sa mga santos. Dili na kita magsinina o magsulti o maglihok o gani maghunahuna sama sa kanunay nga gibuhat sa uban. Daghan sa kalibutan naggamit og tsa, kape, tabako, ug ilimnong makahubog, ug nalakip sa paggamit sa drugas. Daghang panamastamas ug mga bulgar ug law-ay, imoral ug hugaw sa ilang mga kinabuhi, apan kining tanan nga mga butang kinahanglan nga dili nato buhaton. Kita mga Santos sa Labing Halangdon. …
Nagtawag ako sa Simbahan ug sa tanang mga miyembro niini sa pagbiya sa mga dautan sa kalibutan. Kinahanglan gayud nga likayan nato ang pagkadili putli ug ang matag matang sa imoralidad sama nga atong likayan ang usa ka sakit nga midagsang …
Isip mga sulugoon sa Ginoo, ang atong katuyoan mao ang paglakaw diha sa dalan nga iyang gihan-ay alang kanato. Dili lamang kita magtinguha ug magsulti unsay mopahimuot kaniya, apan atong tinguhaon ang pagpuyo nga ang atong mga kinabuhi mahisama sa iya.8
Ang pagbalaan sa adlaw nga Igpapahulay
Buot akong mosulti og diyutay nga mga pulong kabahin sa pagsunod sa adlaw nga Igpapahulay ug sa pagbalaan niini. Kini nga sugo gihatag sa sinugdanan, ug ang Dios misugo sa mga Santos ug sa tanang katawhan sa kalibutan nga kinahanglan silang mosunod sa adlaw nga Igpapahulay ug sa pagbalaan niini—usa ka adlaw sa pito ka adlaw. Niana nga adlaw kinahanglan kita nga mopahulay gikan sa atong mga kahago, kita kinahanglan nga moadto sa balay sa Ginoo ug mohalad sa atong mga sakramento diha sa Iyang balaan nga adlaw. Kay kini adlaw nga gitakda ngari kanato diin kita kinahanglan nga mopahulay gikan sa atong mga kahago ug mohatag og mga paghalad sa atong mga pag-ampo ngadto sa Labing Halangdon. [Tan-awa sa D&P 59:9–10.] Niini nga adlaw kita kinahanglan nga mohalad ngadto Kaniya sa atong mga pasalamat ug mopasidungog Kaniya diha sa pag-ampo, sa pagpuasa, sa pag-awit, ug sa paglig-on ug pagtudlo sa usag usa.9
Ang adlaw nga Igpapahulay nahimong adlaw sa lingaw-lingaw, sa hudyaka, bisan unsa gawas sa adlaw sa pagsimba, … ug gikaguol nako ang pagsulti nga daghan kaayo—ang usa gani daghan na—nga miyembro sa ang Simbahan ni Jesukristo sa mga Santos sa Ulahing mga Adlaw miuban niana nga pundok, ug ang adlaw nga Igpapahulay alang sa ubang mga miyembro gitan-aw isip usa ka adlaw sa hudyaka, sa lingaw-lingaw, kay sa usa ka adlaw diin kita makaalagad sa Ginoo nga atong Dios sa tibuok natong mga kasingkasing, uban sa tibuok natong mga gahum, hunahuna, ug kusog. …
Tan-awa, kini mao ang balaod sa Simbahan karon sama nga kini balaod sa karaang Israel, ug ang pipila sa atong katawhan nasagmuyo tungod kay ilang gibati nga ang pagsunod sa adlaw nga Igpapahulay nagpugong sa ilang mga kalihokan.10
Kita walay katungod sa paglapas sa adlaw nga Igpapahulay. … Naguol ako pag-ayo nga, bisan diha sa mga komunidad sa mga Santos sa Ulahing mga Adlaw, kini nga doktrina wala tumana ingon nga kini kinahanglan nga tumanon sa pipila, nga adunay uban kanato kinsa ingon og mibati nga husto gayud ang pagsunod sa kinaiya sa kalibutan kabahin niini. Sila ang mga tig-ambit sa mga ideya ug mga hunahuna sa kalibutan sa paglapas sa mga sugo sa Ginoo. Apan kon ato kining buhaton ang Ginoo mopatubag kanato, ug kita dili makalapas sa iyang pulong ug makadawat sa mga panalangin sa matinud-anon.11
Pagsunod sa Pulong sa Kaalam
Ang Pulong sa Kaalam usa ka importanting balaod. Kini nagtudlo sa paagi ug naghatag kanato og igo nga instruksyon kalabut sa pagkaon ug sa mainom, nga maayo alang sa lawas ug ang makadaot usab. Kon sa kinasingkasing atong sundon unsay nasulat uban sa panabang sa Espiritu sa Ginoo, kita wala na magkinahanglan pa og laing tambag. Kining maayo kaayong instruksyon naglangkob sa mosunod nga saad:
“Ug ang tanan nga mga santos kinsa nahinumdom sa pagsunod ug sa pagbuhat niini nga mga panultihon, maglakaw nga masulundon sa mga sugo, makadawat og maayo nga panglawas ug uyok sa ilang mga kabukogan;
“Ug makakita og kaalam ug dako nga mga bahandi sa kahibalo, gani ang mga tinago nga mga bahandi;
“Ug modagan ug dili maluya, ug molakaw ug dili makuyapan.” [D&P 89:18–20.]12
Bilyon ka mga dolyares gigasto kada tuig alang sa makahubog nga mga ilimnon ug tabako. Ang pagkapalahubog ug ang kahugaw nga gidala niining dautan ngadto sa tawhanong pamilya nagguba, dili lamang sa panglawas, apan sa moral ug espiritwal nga mga proteksyon sa katawhan.13
Ang mga pamilya nagkabuwag pinaagi sa nagkadaghan nga naggamit sa ilegal nga drugas ug ang pag-abuso sa legal nga drugas.14
Kinahanglan dili gayud kita maminaw [sa] mga pagpangdani ug sa ngil-ad nga pagpasundayag sa mga butang nga makadaot sa lawas ug gipanghimaraut sa atong Amahan sa langit ug sa iyang Anak nga si Jesukristo, nga supak sa ebanghelyo nga ilang gihatag kanato. …
Ang atong mga lawas kinahanglan gayud nga limpyo. Ang atong panghunahuna kinahanglan gayud nga limpyo. Kinahanglan gayud anaa sa atong mga kasingkasing ang tinguha sa pagserbisyo sa Ginoo ug sa pagsunod sa iyang mga sugo; sa paghinumdom sa atong mga pag-ampo, ug mapaubsanong maningkamot sa pagbaton sa mga tambag nga moabut pinaagi sa paggiya sa Espiritu sa Ginoo.15
Ang Ginoo mipadayag sa Pulong sa Kaalam ngadto ni Propeta Joseph Smith sa pagtabang sa mga Santos sa pagdawat og pisikal ug espirituhanon nga kalig-on.
Pagtahud sa ngalan sa Dios
Kinahanglan nga atong huptan ang ngalan sa Dios sa labing sagrado ug ligdong nga pagtahud. Walay labaw nga makapaguol o makapahugno sa mga pagbati sa usa ka may pamatasan nga tawo kay sa makadungog og pipila ka ngil-ad, ignorante, o bastos nga tawo nga nagsulti nga walay pagtahud sa ngalan sa Dios. Ang pipila ka mga indibidwal nahimong law-ay kaayo nga ingon og imposible alang kanila sa pagsulti og duha o tulo ka sentence nga walay paghatag og gibug-aton—sama sa ilang paghunahuna —og usa ka bulgar o panamastamas nga panumpa. Adunay pipila usab ka indibidwal nga ingon og naghunahuna … nga kini kalampusan sa tinuod nga lalaki ug mas maayo sila tan-awon kay sa uban, kon makagamit sila og mapanamastamason nga pinulongan. … Ang kahugaw bisan unsa pa kini nga matang makapaminus ug makadaot sa kalag, ug kinahanglang likayan sama sa makamatay nga hilo sa tanang miyembro sa Simbahan.
Ang maayo nga mga istorya kanunay nga nadaot tungod kay ang mga tigsulat wala makasabut sa pamatasan sa paggamit sa sagradong mga ngalan. Kon ang mapanamastamason nga mga pulong ibutang sa mga ba-ba sa dili ka respetohang mga tawo, kay sa paninduton ang istorya ilang gitipas gikan sa hiyas ug interes niini. … Unsa kini ka kahibulongan nga pipila sa mga tawo, ug maayo pa gyud nga mga tawo, nagtuo nga ang paggamit og pipila ka mga pulong nga naglakip sa ngalan sa Ginoo, nagdugang og interes, kahimuot, o gahum, ngadto sa ilang mga istorya! …
Labaw sa tanang katawhan sa kalibutan, ang mga Santos sa Ulahing mga Adlaw kinahanglang mohupot sa labing sagrado ug balaang pagtahud ang tanang mga butang nga balaan. Ang katawhan sa kalibutan wala mabansay sama kanato sa maong kahimtang, bisan pa man nga adunay daghang matinuoron, relihiyuso, ug edukado nga katawhan dinhi sa kalibutan. Apan kita adunay paggiya sa Balaang Espiritu ug sa mga pagpadayag sa Ginoo, ug Siya mitudlo kanato sa ligdong nga paagi sa atong katungdanan sa atong panahon kalabut sa tanan niana nga mga butang. 16
Pagsinina sa ligdong nga paagi ug pagsunod sa balaod sa kaputli
Ang mga Santos sa Ulahing mga Adlaw kinahanglan nga dili mosunod sa mga uso ug sa pagkalaw-ay sa kalibutan. Kita katawhan sa Ginoo. Gilauman kita niya nga magpuyo og limpyo, mahiyason nga kinabuhi, sa pagpabilin sa atong mga panghunahuna nga limpyo ug putli nga hunahuna ug matinud-anon sa pagsunod sa tanan niyang mga sugo. Nganong sundon nato ang kalibutan, nganong dili kita mahimong ligdong, nganong dili kita makahimo sa mga butang nga gusto sa Ginoo nga atong buhaton?17
Samtang ako naglakaw sa mga kadalanan padulong o gikan sa Church Office Building, akong makita ang batan-on ug mas hingkod nga kababayen-an, daghan kanila “anak nga mga babaye sa Zion,” kinsa law-ay nga nagsinina [tan-awa sa Isaias 3:16–24]. Akong naamguhan nga ang mga panahon ug uso mausab. … [Apan] ang baruganan sa pagkaligdong ug hustong pamatasan mao lamang gihapon. … Ang sumbanan nga gipahayag sa mga General Authority sa Simbahan mao nga ang mga kababayen-an ingon man sa kalalakin-an, kinahanglan nga magsinina sa ligdong nga paagi. Gitudloan sila og husto nga paglihok ug pagkaligdong sa tanang panahon.
Kini, sa akong paghukom, usa ka subo nga pamalandong bahin sa “anak nga mga babaye sa Zion” kon sila magsinina og law-ay. Dugang pa, kining gisulti adunay kalabutan ngadto sa kalalakin-an ingon man sa kababayen-an. Ang Ginoo mihatag og mga sugo ngadto sa karaang Israel nga ang kalalakin-an ug kababayen-an kinahanglan nga motabon sa ilang mga lawas ug mosunod sa balaod sa kaputli sa tanang panahon.
Nangamuyo ako alang sa kaligdong ug kaputli ug alang sa tanang miyembro sa Simbahan, lalaki ug babaye, nga magpakaputli, magpakalimpyo sa ilang mga kinabuhi, ug magmasulundon sa mga pakigsaad ug mga sugo nga gihatag sa Ginoo. …
… Ang pagsul-ob og law-ay nga sinina, nga ingon og gamay ra nga butang, nagkuha [og] usa ka butang gikan sa atong batan-ong kababayen-an o batan-ong kalalakin-an sa Simbahan. Kini yanong mas nakapalisud sa pagsunod niadtong mahangturong mga baruganan diin kitang tanan kinahanglan nga mosunod kon kita mobalik ngadto sa presensya sa atong Amahan sa langit.18
2
Ang gisaad nga mga panalangin ngadto sa matinud-anon mas dako pa kaayo kay sa temporaryo nga kalipay sa kalibutan.
[Usa ka miyembro sa Simbahan sa makausa miingon nga siya] dili kaayo makasabut nga nagbayad siya sa ikapulo ug nagsunod sa Pulong sa Kaalam, nagmainampoon, ug naningkamot nga magmasulundon sa tanang mga sugo nga gihatag sa Ginoo kaniya, ug sa gihapon kinahanglan nga manlimbasug sa panginabuhi; samtang ang iyang silingan milapas sa adlaw nga Igpapahulay, ako nagtuo nga siya mosigarilyo ug moinom; aduna siya sa unsay gitawag sa kalibutan og malipayong panahon, wala magtagad sa mga pagtulun-an sa atong Ginoo ug Manluluwas nga si Jesukristo, ug sa gihapon siya miuswag.
Abi ninyo, kita adunay daghan kaayong miyembro sa Simbahan nga namalandong niana diha sa ilang mga kasingkasing ug nahibulong kon ngano. Ngano nga kining tawhana ingon og napanalanginan sa tanang nindot nga mga butang sa kalibutan— unsang pagkahitaboa, daghan nga dili maayong mga butang iyang gihunahuna nga maayo— ug gani daghang miyembro sa Simbahan ang nanlimbasug, makugihong naningkamot nga makalahutay sa kalibutan.
Ang tubag yano ra. Kon ako usahay, ug panagsa akong himoon, ang pag-adto og dula sa football o baseball o sa ubang lain nga dapit sa kalingawan, sa tinuod ako pagaliyokan og kalalakin-an ug kababayen-an kinsa magpabuhot og mga sigarilyo o mga tabako o hugaw nga mga kuwako. Kini makasamok kaayo, ug madisturbo ako og gamay. Molingi ako ngadto ni Sister Smith, ug mosulti ako kaniya, ug siya moingon, “Maayo, karon, nahibalo ka na unsay imong gitudlo kanako. Ikaw ania sa ilang kalibutan. Mao kini ang ilang kalibutan.” Ug kana ingon og nakapahigmata kanako sa kamatuoran. Oo, ania kita sa ilang kalibutan, apan kita dili kinahanglan nga panag-iyahon niini.
Busa, ingon nga kini mao ang ilang kalibutan nga atong gipuy-an, mouswag sila, apan, akong maayong mga kaigsoonan, ang ilang kalibutan nagsingabut sa katapusan niini. …
Ang adlaw moabut nga dili nato maangkon kini nga kalibutan. Pagausbon kini. Makaangkon kita og mas maayong kalibutan. Makakuha kita og usa nga matarung, tungod kay kon si Jesus moanhi, limpyohon niya ang kalibutan.19
Kon kita mangita nga makugihon, mag-ampo kanunay, magmatinuohon, ug maglakaw nga matarung, anaa kanato ang saad sa Ginoo nga ang tanang mga butang maghiusa sa paglihok alang sa atong kaayohan [tan-awa sa D&P 90:24]. Kini dili usa ka saad nga kita luwas gikan sa mga pagsulay ug mga problema sa kinabuhi, kay kining kahimtang sa pagsulay gitakda aron sa paghatag kanato og kasinatian ug malisud ug nagkasukwahi nga mga sitwasyon.
Ang kinabuhi wala planoha nga masayon, apan ang Ginoo nagsaad nga himoon niya ang tanang mga pagsulay ug mga kalisud nga moresulta sa atong kaayohan. Hatagan kita niya og kalig-on ug abilidad sa pagbuntog sa kalibutan ug sa pagbarug nga lig-on diha sa hugot nga pagtuo bisan pa sa tanang mga pagsupak. Kini usa ka saad nga kita makabaton og kalinaw diha sa atong mga kasingkasing bisan pa sa mga kagubot ug mga kasamok sa kalibutan. Ug labaw sa tanan, kini usa ka saad nga kon kining kinabuhia matapos, kita makasarang sa mahangturong kalinaw diha sa presensya Niya kansang nawong atong gipaninguha, kansang mga balaod atong gisunod, ug kinsa atong gipili nga serbisyohan.20
3
Samtang atong gibutang og una ang gingharian sa Dios diha sa atong mga kinabuhi, kita naglihok isip mga kahayag ngadto sa kalibutan ug naghimo og ehemplo alang sa uban nga sundon.
Ang mga Santos sa Ulahing mga Adlaw sama sa usa ka siyudad nga nahimutang sa ibabaw sa bungtod nga dili masalipdan, ug sama sa kandila nga naghatag og kahayag sa tanan nga anaa sa balay. Kini atong katungdanan sa pagpasiga sa atong kahayag isip usa ka ehemplo sa pagkamatarung, dili lamang ngadto sa katawhan nga kauban nato sa pagpuyo, apan ngadto sa katawhan sa tibuok kalibutan. (Tan-awa sa Mateo 5:14–16.]21
Atong tinguha nga makita ang mga Santos sa tanang nasud nga modawat sa hingpit nga mga panalangin sa ebanghelyo ug mobarug isip espirituhanong mga lider sa ilang mga nasud.22
Mga kaigsoonan, sundon nato ang mga sugo sa Dios ingon nga kini gipadayag. Ipakita nato ang ehemplo sa atubangan sa katawhan sa kalibutan, aron sila, sa pagkakita sa atong maayong mga buhat, mahimong mobati sa paghinulsol ug modawat sa kamatuoran ug sa plano sa kaluwasan, nga unta ilang madawat ang kaluwasan didto sa celestial nga gingharian sa Dios.23
Nag-ampo ako nga ang mga Santos mobarug nga lig-on batok sa mga pagpamugos ug mga pagtintal sa kalibutan; nga ilang unahon sa pagbutang diha sa ilang mga kinabuhi ang mga butang sa gingharian sa Dios; nga sila magmatinuoron sa matag pagsalig ug mosunod sa matag pakigsaad.
Nag-ampo ako alang sa tanang batan-on ug sa nagtubo nga henerasyon nga ilang ipabilin nga limpyo ang ilang mga hunahuna ug mga lawas —luwas gikan sa imoralidad, gikan sa abuso sa drugas, ug gikan sa pagbati nga mosukol ug mosupak sa kaligdong nga naglukop sa kalibutan.
Among Amahan, ibu-bu ang imong Espiritu dinhi niining imong mga anak nga sila unta mapanalipdan gikan sa mga kakuyaw sa kalibutan ug magpabiling limpyo ug putli, takus nga mga pilionon nga mobalik diha sa imong presensya ug mopuyo uban kanimo.
Ug himoa nga ang imong mapanalipdanong pag-amuma maanaa sa tanan niadtong kinsa nagtinguha nga makakita sa imong nawong ug kinsa naglakaw diha sa imong atubangan sa kaligdong sa ilang mga kalag, nga sila mahimong mga kahayag sa kalibutan, mga himan sa imong mga kamot sa pagpahinabo sa imong mga katuyoan dinhi sa kalibutan.24
Mga Sugyot alang sa Pagtuon ug Pagtudlo
Mga Pangutana
-
Samtang inyong basahon ang “Gikan sa Kinabuhi ni Joseph Fielding Smith,” paghunahuna mahitungod sa mga hagit nga giatubang sa mga kabatan-onan karon kon ang ilang mga ginikanan o hamtong nga mga lider dili nila kauban. Unsa ang atong mabuhat sa pagtabang sa kabatan-onan nga magpabilin nga matinud-anon sa mao nga mga sitwasyon?
-
Unsa ang pipila ka mga panalangin nga moabut kanato samtang kita nagsunod sa mga sugo nga gihisgutan sa seksyon 1?
-
Unsaon kaha ninyo paggamit ang mga pagtulun-an sa seksyon 2 sa pagtabang sa usa ka tawo kinsa nalinga sa mga butang sa kalibutan? Sa unsa nga paagi kita makakaplag og “kalinaw diha sa atong mga kasingkasing bisan pa sa mga kagubot ug mga kasamok sa kalibutan”?
-
Sa unsang paagi nga ang atong mga ehemplo makatabang sa uban sa pagbiya sa mga paagi sa kalibutan? (Tan-awa sa seksyon 3.) Kanus-a ninyo nakita ang gahum sa matarung nga ehemplo? Paghunahuna mahitungod sa unsay inyong mahimo sa pagpakita og matarung nga ehemplo alang sa inyong pamilya ug sa uban.
May Kalabutan nga mga Kasulatan
Mateo 6:24; Marcos 8:34–36; Juan 14:27; Mga Taga-Filipos 2:14–15; Moroni 10:30, 32
Tabang sa Pagtudlo
“Makapadayag ka og gugma alang sa imong gitudloan pinaagi sa pagpaminaw og maayo ngadto kanila ug kinasingkasing nga mainteresado sa ilang mga kinabuhi. Ang Kristohanon nga gugma adunay gahum sa pagpahumok sa mga kasingkasing ug sa pagtabang sa mga tawo nga maminaw sa mga paghunghong sa Espiritu” (Pagtudlo, Walay Labaw ka Mahinungdanon nga Tawag, [1999], 46).