Kapitulo 22
Pag-ampo—usa ka Sugo ug usa ka Panalangin
“Ang pipila ka butang sa kinabuhi sama ra kaimportante sa pagpakigsulti sa Dios pinaagi sa pag-ampo.”
Gikan sa Kinabuhi ni Joseph Fielding Smith
Gitudlo ni Presidente Joseph Fielding Smith nga kinahanglan natong himoon ang diwa sa pag-ampo nga “usa gayud ka bahin sa atong kaugalingon.”1 Mipakita siya og ehemplo niini nga baruganan pinaagi sa iyang pagpakabuhi ug pag-ampo—nga siya ra, nga kauban ang iyang pamilya, ug sa publiko.
Liwas sa pagkamatay sa una niyang asawa, nga si Louie, iyang gisulat ang malumo niyang pangaliya sa journal, nagpakita sa daklit sa personal niya nga mga pag-ampo: “Akong Amahan sa langit, tabangi ko, nag-ampo ko Kanimo, nga ako magpakabuhi nga takus sa pakighimamat sa akong asawa sa mahangturong himaya, aron ikauban siya pag-usab, dili na gayud magkabulag, sa walay katapusang katuigan sa kahangturan. Tabangi ko sa pagpaubos, sa pagsalig Kanimo. Hatagi ko sa kaalam ug kahibalo sa langitnong mga butang nga unta may kusog ko sa pagbatok sa tanang kadautan ug magpabiling makanunayon sa Imong kamatuoran. Ginoo, tabangi ko, itugot kanako ang kinabuhing dayon sa imong Gingharian. Giyahi ang akong dalan sa pagkamatarung, ihatag kanako ang Kinatibuk-an sa Imong Espiritu. Tabangi ko nga makaatiman sa bililhon nakong mga anak nga magpabilin silang putli ug walay buling sa tibuok nilang kinabuhi, ug kon mahuman na ang among buhat, dad-a kami sa imong Celestial nga Gingharian, kini among giampo. Sa pangalan sa among Manunubos, unta imong dunggon, Amen.”2
Ang anak ni Presidente Smith si Joseph Jr. miasoy sa halandumong pag-ampo nga gihalad ni Presidente Smith dihang silang duha padulong mopauli sa ilang balay sa Siyudad sa Salt Lake human magbiyahe sa eastern Utah. Sila “nalaming sa kusog nga ulan ug unos ug sayop ang ilang naagian,” miabut sila sa dapit nga gitawag og Indian Canyon. “Ang unos nagkakusog ug lapok kaayo ug dangog ang dalan, ingon og dili lang peligro apan imposible ang pagpadayon sa biyahe. Ang baga nga gabon mitabon sa lawom nga kimba sa usa ka agianan nga dili sementado, ug ang mga misakay nga sila si Joseph Jr. ug Dr. David E. Smith misulay sa pagpugong sa sakyanan sa kahadlok nga maligid kini sa lawom nga kimba sa ubos. Ang mga ligid miruyda sa lapok, ug sa katapusan ang sakyanan napahimutang ra. … [na]hinumdom si Joseph nga miingon ang iyang papa, ‘Nahimo na nato ang tanan. Atong tawagon ang Ginoo.’ Miduko siya sa pag-ampo, mitawag sa Ginoo sa pag-andam og paagi nga unta mahusto ang iyang sayop ug makagawas sa peligro nga kimba ug makapadayon sa pagpauli. Giingnan niya ang Ginoo nga may importante siya nga buluhaton nga nagkinahanglan sa iyang pagtagad sa sunod adlaw, ug importante gayud nga makabalik siya sa Siyudad sa Salt Lake. Sa dakong milagro, mihunong ang unos, dayon mihuros ang hangin nga mipauga sa dalan igo nga sila nakabalik … sa katapusan ngadto sa highway. Wala madugay sa amo gyung pag-abut sa ubos ang unos ug ulan mibundak ug mihuros na usab, nga naghimog ka-traffic sa mao gayud nga dapit sulod sa pipila ka oras. Sa ilang pagpadayon sa Canyon ngadto sa Siyudad sa Salt Lake, human sa daghang oras sa dugay nga pagbiyahe, gipahunong sila sa highway patrolman nga nangutana kon diin sila gikan. Dihang nahibalo siya nga gikan mi sa Indian Canyon miingon ang opisyal, ‘Imposible kana! Gireport nga ang tulay sa maong dapit tanan nangabungkag.’ Sa ilang katingala, ang ulohan sa mga balita pagkasunod adlaw nagreport nga 200 ka sakyanan ang nalaming sa dapit diin sila nakalingkawas.”3
Sa 62 ka tuig nga apostolikanhong pangalagad ni Presidente Smith, daghan sa iyang mga wali naglakip sa publiko nga pag-ampo diin nangayo siya og mga panalangin sa langit alang sa mga miyembro sa Simbahan ug mga tawo sa tibuok kalibutan. Sama pananglit, sa una niya nga kinatibuk-ang komperensya isip Presidente sa Simbahan, nangaliya siya, “nag-ampo ko nga ang Dios nga atong Langitnong Amahan moabli sa mga bintana sa langit ug ibu-bu nganha sa iyang mga anak sa tibuok kalibutan ang talagsaon ug mahangturong mga panalangin nga makapalambo sa ilang kahimtang sa temporal ug sa espiritwal.”4
Ang mga pag-ampo ni Presidente Smith nagpadayag sa kadako sa iyang pagpamatuod ug gugma alang sa iyang Amahan sa Langit ug iyang Manluluwas. Si Presidente Boyd K. Packer, kinsa gitawag nga moserbisyo sa Korum sa Napulog Duha ka mga Apostoles dihang si Joseph Fielding Smith ang Presidente sa Simbahan, miingon: “Nindot nga kasinatian ang makadungog ni Presidente Joseph Fielding Smith nga mag-ampo. Bisan lapas na siya sa nubenta anyos mag-ampo siya nga siya ‘makatuman sa mga pakigsaad ug obligasyon ug makalahutay sa katapusan.’”5
Mga Pagtulun-an ni Joseph Fielding Smith
1
Gisugo kita sa pagpaduol sa Langitnong Amahan pinaagi sa pag-ampo.
Sugo sa Ginoo nga tinguhaon nato siya kanunay pinaagi sa mapaubsanong pag-ampo. Dihang ang Manluluwas kauban sa iyang mga disipulo siya mitudlo nila sa pag-ampo ug mipakita siya og ehemplo kanila pinaagi sa kanunay nga pag-ampo ngadto sa iyang Amahan. Tingali makasiguro kita, kay sugo man kini sa Ginoo, nga hiyasnon ang pag-ampo, ug kon magtinguha kita sa Ginoo kinahanglan nga himoon kini sa diwa sa pagpaubos ug balaang pagtahud. …
… Katungdanan sa mga ginikanan ang pagtudlo sa ilang mga anak sa pag-ampo kon makasabut na sila. Paanaron sila sa pagduol sa Amahan sa langit, ug sa panabut nganong kinahanglan ang pag-ampo. Kon kini nga kinaiya maandan sa bata pa, magpabilin kini hangtud sa pagkahingkod, ug ang tawo nga matinguhaon sa pagpangita sa Ginoo ug pagpasalamat kaniya sa mga panalangin, makalaum nga ang Ginoo dili motalikod kaniya sa oras sa panginahanglan.6
“Katungdanan sa mga ginikanan ang pagtudlo sa ilang mga anak sa pag-ampo kon makasabut na sila.”
Nakapamalandong na ba kita kon nganong gihangyo kita sa Ginoo sa pag-ampo. Kita iya bang gihangyo sa pag-ampo kay gusto niya nga moyukbo kita ug mosimba kaniya? Kana ba ang pinakarason? Wa ko magtuo nga mao kana. Siya ang atong Langitnong Amahan, ug gisugo kita sa pagsimba kaniya ug pag-ampo sa pangalan sa iyang Hinigugmang Anak, si Jesukristo. Apan ang Ginoo makapadayon ra bisan wala ang atong mga pag-ampo. Ang iyang buhat magpadayon sama sa gihapon, mag-ampo man kita o dili. … Ang pag-ampo butang nga atong gikinahanglan, dili kay ang Ginoo nagkinahanglan. Nahibalo Siya unsaon paghimo sa iyang buluhaton ug unsaon sa pag-atiman niini bisan walay tabang gikan nato. Mag-ampo kita dili aron sultihan siya unsaon sa paghimo ang iyang buluhaton. Kon ingon niana ang atong hunahuna, nan dayag kaayo nga sayop kita. Mag-ampo kita alang sa atong kaayohan, sa paglig-on ug paghatag og kaisug, ug pagpalambo sa atong pagtuo kaniya.
Ang pag-ampo usa ka butang nga magpaubos sa kalag. Mopalapad sa atong pagsabut; mopalantip sa hunahuna. Makapaduol kini kanato sa atong Amahan sa langit. Atong gikinahanglan ang iyang tabang; walay pagduda bahin niana. Atong gikinahanglan ang giya sa iyang Balaang Espiritu. Atong gikinahanglan nga mahibalo unsang baruganan ang gihatag kanato aron makabalik kita sa iyang presensya. Atong gikinahanglan ang pagpalantip sa atong hunahuna pinaagi sa inspirasyon nga naggikan kaniya; ug tungod niini kita mag-ampo kaniya, aron siya motabang kanato aron masayud kita sa iyang kamatuoran ug magpakabuhi sa kahayag niini, aron kita, pinaagi sa atong kamatinud-anon ug kamasulundon, makabalik sa iyang presensya.7
Ang pipila ka butang sa kinabuhi sama ra kaimportante sa pagpakigsulti sa Dios pinaagi sa pag-ampo. Ang Ginoo mipalimot nato aron dili kita makahinumdom sa atong pagpakig-uban kaniya isip mga sakop sa iyang pamilya sa kinabuhi sa wala pa dinhi sa yuta. Ang pag-ampo mao ang paagi sa pagpakigsulti nga iyang gihatag aron kita makapakigsulti og balik kaniya. Sa ingon, usa sa mahinungdanong katuyoan sa atong mortal nga pagsulay mao ang pagsuta kon makakat-on ba kita nga may makanunayong pag-ampo sa atong kasingkasing aron kon pilion man sa Ginoo ang pagpamulong, atong madungog ang iyang tingog diha sa atong kalag.8
2
Kanunay nga maayong panahon ang pag-ampo.
“Ug ang sugo nga Ako mihatag ngadto kanila (nga mao, ngadto sa mga ginikanan sa Zion), nga siya nga wala mag-ampo sa atubangan sa Ginoo diha sa panahon niana, himoa nga siya mahinumduman sa atubangan sa maghuhukom sa akong mga katawhan.” [D&P 68:33.]
Di ko motuo nga gibasa nato kanunay kini nga bersikulo niini nga seksyon, ug usahay maghunahuna ko kon nakaamgo ba kita unsa kaimportante kini nga sugo. Walay tawo nga makabaton kanunay sa Espiritu sa Ginoo, gawas kon siya mag-ampo. Walay tawo nga makabaton sa inspirasyon sa Balaang Espiritu, gawas kon anaa sa iyang kasingkasing ang diwa sa pag-ampo. …
Karon gusto nakong hisgutan kini nga kasulatan sa makadiyot. … Unsay ipasabut sa maayo nga panahon sa pag-ampo?
Ang uban kanato tingali dunay ideya nga ang maayo nga panahon sa pag-ampo mao kanang inigmata sa buntag, ug sa dili pa kita matulog kon human na ang trabaho, ug wala nay laing maayo nga panahon sa pag-ampo. Apan moingon ko kaninyo, ug may ebidensya ko niini nga, kini ang maayo kanunay nga panahon sa pag-ampo. Akong basahon. Ganahan nakong pamatud-an unsay akong gisulti; gusto kong dunay mahatag nga saksi sa butang nga akong gisulti, ug di ko mohangyo sa mga tawo nga dawaton ang akong gisulti gawas kon kini nahiuyon, sa tukma gayud, sa unsay gisulti sa Ginoo direkta o pinaagi sa iyang mga propeta. Atong mabasa sa Basahon ni Mormon ang pulong ni [Amulek] ngadto sa kabus nga mga Zoramite kinsa mitalikod sa kamatuoran, ug kay gipalayas sa ilang mga sinagoga, tungod kay sila kabus, ug mibati nga makaampo lang sila inigkahuman sa usa nga mosaka sa tinduganan, sigon sa tawag niini [tan-awa sa Alma 31:12–23], wala sila masayud unsay buhaton. Gitudloan sila ni [Amulek] sa mosunod:
“Oo, pangamuyo ngadto kaniya alang sa kalooy; kay siya gamhanan sa pagluwas; oo, pagpaubos sa inyong mga kaugalingon, ug padayon sa pag-ampo ngadto kaniya; pangamuyo ngadto kaniya samtang kamo anaa sa inyong mga umahan, oo, sa tanan ninyo nga mga panon; pangamuyo ngadto kaniya sa inyong mga balay, oo, sa tanan nga sulod sa inyong panimalay, sa buntag, sa udto, ug sa gabii; oo, pangamuyo ngadto kaniya batok sa gahum sa inyong mga kaaway; oo, pangamuyo ngadto kaniya batok sa yawa, kinsa ang kaaway sa tanan nga pagkamatarung. Pangamuyo ngadto kaniya alang sa mga abut sa inyong mga umahan, nga kamo mouswag diha; pangamuyo alang sa inyong mga panon sa umahan, nga sila mosanay. Apan dili kini ang tanan; kamo kinahanglan mobu-bu sa inyong mga kalag diha sa inyong mga lawak alampoan, ug diha sa inyong wala hibaloi nga mga dapit, ug diha sa inyong kamingawan; oo, ug kon kamo dili mangamuyo ngadto sa Ginoo, himoa nga ang inyong mga kasingkasing puno, magpadayon sa pag-ampo ngadto kaniya sa kanunay alang sa inyong kaayohan, ug usab alang sa kaayohan niadto kinsa naglibut kaninyo. Ug karon tan-awa, akong hinigugma nga mga kaigsoonan, ako moingon nganha kaninyo, ayaw pagdahum nga mao kini ang tanan; kay human ninyo mahimo kining tanan nga mga butang, kon kamo mosalikway sa timawa, ug sa hubo, ug dili moduaw sa masakiton ug sa may balatian, ug mohatag sa inyong kabtangan, kon kamo aduna, ngadto sa nanginahanglan; ako moingon nganha kaninyo, kon kamo dili mobuhat sa bisan hain niini nga mga butang, tan-awa, ang inyong pag-ampo makawang, ug dili ninyo mapahimuslan, ug kamo ingon sa mga nagpakaaron-ingnon kinsa naglimud sa hugot nga pagtuo.” [Alma 34:18–28.]
Sa akong pagtuo maayo kaayo kini nga doktrina, ug kini akong gibasa aron masilsil sa inyong hunahuna ang maayo nga panahon sa pag-ampo. Ang maayo nga panahon sa pag-ampo mao kanang inigkabuntag sa dili pa magbulag sa pagpanglakaw ang pamilya. Ang maayo nga panahon sa pag-ampo mao ang panahon sa dili pa mamahaw diha sa lamesa ug magpuli-puli ang pamilya sa pag-ampo. Mao kana ang maayo nga panahon sa pag-ampo. Ang maayo nga panahon sa pag-ampo sa usa ka negosyante mao kanang inigkabuntag kon siya moadto na sa iyang negosyo ug sa dili pa magsugod sa inadlaw nga negosyo. Ang oras sa pag-ampo sa tigbalantay sa karnero, mao ang panahon nga nagbantay siya sa iyang panon. Ang oras sa mag-uuma sa pag-ampo mao ang panahon nga moadto siya sa pagdaro, sa pagpugas, ug sa pag-ani. Ug kon ang tawo mag-ampo sigon sa gisugo niini nga kasulatan nga akong gibasa, nan anaa siya kanunay sa katarung nga nagatuman sa mga sugo sa Ginoo.9
Si Amulek, gihulagway dinhi uban ni Alma, miawhag sa mga tawo sa “pagpangamuyo ngadto [sa Ginoo] alang sa kalooy, kay siya gamhanan sa pagluwas” (Alma 34:18).
3
Ang tanan natong buhaton kinahanglang mahiuyon sa mga pagpadayag sa atong mga pag-ampo.
Dili kita mag-ampo sa pulong lamang; apan sa matag buhat, sa atong pagpakigsulti, sa tanan natong gihimo, kinahanglan nga maningkamot kita nga buhaton ang gipahayag sa atong mga pag-ampo, ug mahiuyon sa mga hunahuna nga atong gipahayag sa Ginoo sa inadlaw natong mga pangamuyo.10
Anaa ba kanato ang diwa sa pag-ampo? Gihimo ba ni nato nga kabahin sa atong kaugalingon? Duol ba kanato ang atong langitnong Amahan pinaagi sa Balaang Espiritu, o dili?11
4
Sa atong mga pag-ampo kinahanglang ibu-bu nato ang atong kalag sa pagpasalamat.
Kinahanglan kitang magmainampingon sa pag-ugmad, pinaagi sa pagpakabuhing mainampoon, mapasalamatong kinaiya. Mituo ko nga ang pinakadakong sala sa mga lumulupyo sa kalibutan karon mao ang sala sa pakadili mapasalamaton, wala sila mopasidungog, sa Ginoo ug sa iyang katungod sa pagdumala ug pagkontrolar.12
Sa atong mga pag-ampo kinahanglang ibu-bu nato ang atong kalag sa pagpasalamat sa kinabuhi ug sa atong pagkatawo, sa matubsanong sakripisyo sa Anak sa Dios, sa ebanghelyo alang sa kaluwasan, kang Joseph Smith ug sa talagsaong buhat sa pagpahiuli nga nahinabo tungod kaniya. Kinahanglan natong pasidunggan ang kamot sa Ginoo sa tanang butang ug pasalamatan siya sa tanan nga temporal ug espiritwal.13
5
Kinahanglan kitang mangaliyupo sa Langitnong Amahan sa tanan natong matarung nga tinguha.
Kinahanglan kitang mangaliyupo sa [Langitnong Amahan] tungod sa pagtuo ug integridad ug sa tanang diosnong kinaiya, sa kadaugan ug kalampusan sa iyang buhat, sa giya sa iyang Balaang Espiritu, ug sa kaluwasan diha sa iyang gingharian. Kinahanglan kitang mag-ampo alang sa atong mga pamilya, sa atong asawa ug mga anak, sa pagkaon ug kasilongan ug mga saput, sa atong mga negosyo, ug sa tanan natong matarung nga tinguha.14
Mag-ampo ko nga ang mga panalangin sa langit moabut ug maanaa kanato ug sa tanan.
Unta ang kalangitan mobu-bu sa pagkamatarung ug kamatuoran sa tibuok kalibutan!
Unta ang tanang tawo bisan asa maminaw, ug mopatalinghug sa mga pulong sa kamatuoran ug kahayag gikan sa mga sulugoon sa Ginoo!
Unta ang mga katuyoan sa Ginoo alang sa tanang katawhan sa matag nasud matuman dayon!
Mag-ampo ko alang sa mga miyembro sa Simbahan, kinsa mga santos sa Labing Halangdon, nga sila malig-on sa ilang pagtuo, ug ang mga tinguha sa pagkamatarung molambo sa ilang kasingkasing, ug ilang lihukon ang ilang kaluwasan uban ang kahadlok ug pagpangurog atubangan sa Ginoo [tan-awa sa Mga Taga-Filipos 2:12; Mormon 9:27].
Mag-ampo ko alang sa kaayohan ug katarung sa tanang tawo, nga sila magiyahan sa pagpangita sa kamatuoran, sa pagpaluyo sa tanang husto nga baruganan, ug pagpadayon sa kawsa sa kagawasan ug kaangayan.
Niining samok ug lisud nga mga panahon, mag-ampo ko nga ang tanang tawo magiyahan sa kahayag nga nagsanag sa matag tawo nga moanhi sa kalibutan [tan-awa sa Juan 1:9; D&P 93:2], ug sila makaangkon sa kaalam sa pagsulbad sa mga problema nga naghasol sa katawhan.
Mangamuyo ko sa manggiloy-ong Amahan nga ibu-bu ang iyang panalangin sa tanang tawo, sa mga bata ug tigulang, sa tanang nagbangutan, sa gigutom ug nanginahanglan, sa nag-antus sa dili maayong mga kahimtang ug dili maayong palibut, ug sa tanan nga nagkinahanglan ug tabang, ug kaalam, ug kadtong tanan nga maayo ug talagsaong butang nga siya lang ang makahatag.
Kaninyong tanan, ako may gugma ug kabalaka ug kalooy sa tanang anak sa Amahan sa tibuok kalibutan, ug mag-ampo nga ang ilang mga kahimtang mas momaayo sa temporal ug espiritwal; mag-ampo ko nga magpaduol sila kang Kristo, ug magkat-on kaniya, ug mopas-an sa iyang yugo diha kanila, aron makakaplag sila og kapahulayan sa ilang mga kalag, kay ang iyang yugo ug palas-anon magaan [tan-awa sa Mateo 11:29–30].
Mag-ampo ko nga ang mga Santos sa Ulahing mga Adlaw ug tanan nga moapil kanila sa pagtuman sa mga sugo sa Amahan natong tanan magpakabuhi sa pag-angkon og kalinaw niini nga kinabuhi ug sa kinabuhing dayon sa kalibutan nga umaabut [tan-awa sa D&P 59:23]—tanan kini akong pangayoon sa kamapainubsanon ug pasalamat, ug sa pangalan sa Ginoo nga si Jesukristo. Amen.15
Mga Sugyot alang sa Pagtuon ug Pagtudlo
Mga Pangutana
-
“Gikan sa Kinabuhi ni Joseph Fielding Smith” naglangkob sa upat ka ehemplo sa pag-ampo nga gihalad ni Presidente Smith. Unsay atong makat-unan gikan sa matag usa niini nga ehemplo?
-
Pamalandungi ang inyong personal nga pag-ampo. Unsay atong mahimo aron ang atong mga pag-ampo makatabang nga kita “maduol sa atong Amahan sa langit”? (Tan-awa sa seksyon 1.)
-
Gitudlo ni Presidente Smith, “Kanunay nga maayong panahon ang pag-ampo” (seksyon 2). Sa unsang paagi kita makasunod sa tambag sa kanunay nga pag-ampo?
-
Unsay ipasabut diha kaninyo nga “buhaton ang gipahayag sa atong mga pag-ampo”? (Tan-awa sa seksyon 3.) Hunahunaa unsay inyong mahimo aron molambo niining dapita.
-
Sa unsang paagi mausab ang atong kinaiya kon “ibu-bu nato ang atong kalag sa pagpasalamat” sa atong Langitnong Amahan? (Tan-awa sa seksyon 4.)
-
Samtang magtuon kamo sa pag-ampo ni Presidente Smith sa seksyon 5, hunahunaa ang kaugalingon ninyong pag-ampo. Pamalandungi sa hilom kini nga pangutana: Unsa nga mga tawo ug butang ang kinahanglan ninyong iapil kanunay sa inyong pag-ampo?
May Kalabutan nga mga Kasulatan
Mateo 7:7–8; Mga Taga-Filipos 4:6; 1 Mga Taga-Tesalonica 5:17–18; Santiago 1:5–6; 2 Nephi 32:8–9; Alma 34:38–39; 3 Nephi 18:18–21; D&P 10:5
Tabang sa Pagtudlo
“Sa pag-awhag og panaghisgot, gamita ang mga pangutana diha sa katapusan sa kada kapitulo. Makahimo usab ikaw og imong kaugalingong mga pangutana alang gayud niadtong imong gitudloan” (gikan sa pahina ix niini nga libro).