Kapitulo 17

Gahum sa Pagbugkos ug mga Panalangin sa Templo

“Si Elijah mianhi aron sa pagpahiuli nganhi sa kalibutan … sa kahingpitan sa gahum sa priesthood. Kini nga priesthood naghupot sa mga yawe sa paghiusa ug pagbugkos dinhi sa yuta ug didto sa langit sa tanang mga ordinansa ug baruganan kalabut sa kaluwasan sa tawo.”

Gikan sa Kinabuhi ni Joseph Fielding Smith

Niadtong 1902 si Joseph Fielding Smith mibiyahe ngadto sa estado sa Massachusetts, diin siya nakakaplag og impormasyon mahitungod sa iyang mga katigulangan nga Smith. Samtang didto siya, nahimamat niya ang usa ka batid sa pagtuon sa kaliwatan [geanealogist] nga ginganlan og Sidney Perley. Si Mr. Perley misulti kaniya, “Ambisyon ko kini, kon ako makahimo niini, sa pagsiksik og mga rekord sa matag indibidwal kinsa mianhi sa Essex County sa wala pa ang tuig 1700.”

Wala madugay miasoy si Presidente Smith: “Miingon ako ngadto kaniya, ‘Mr. Perley, gipili nimo ang pagbuhat og dako nga buluhaton, dili ba?’ Mitubag siya, ‘Oo, ug nahadlok ako nga dili gyud nako kini mahuman.’ Dayon miingon ako ngadto kaniya, ‘Ngano nga nagbuhat ka niini nga buluhaton?’ Naghunahuna siya sa makadiyot ug ingon og naglibug ug dayon mitubag, ‘Wala ako mahibalo og ngano, apan nasugdan ko na, ug dili ako makahunong.’ Miingon ako, ‘Makasulti ko nimo kon ngano nga nagbuhat ka niini ug nganong dili ka makahunong, apan kon akong buhaton, dili ka motuo kanako ug kataw-an ako.’

“‘O,’ miingon siya, ‘Wala ako mahibalo. Kon makasulti ka kanako, sigurado nga mainteresado ako.’ Dayon misulti ako kaniya sa panagna kalabut ni Elijah ug ang katumanan niini nga saad ngadto ni Propeta Joseph Smith ug Oliver Cowdery, niadtong Abril 3, 1836, sa Kirtland Temple, ug sa unsa nga paagi kini nga kadasig sa pagsiksik nag-impluwensya sa daghang mga tawo, ug ilang gipabalik ang ilang mga kasingkasing ngadto sa pagpangita sa mga patay agi og katumanan niining dako nga saad nga moabut sa dili pa ang ikaduhang pag-anhi, aron ang yuta dili pagahampakon uban sa tunglo. Karon ang mga anak nagpabalik sa ilang mga kasingkasing ngadto sa ilang mga amahan, ug kita nagbuhat sa ordinansa alang sa mga patay nga sila unta makakaplag og kaluwasan ug makabaton sa pribilehiyo nga makaadto sa gingharian sa Dios, bisan patay na.

“Sa nahuman na ako, mikatawa siya ug miingon, ‘Nindot kaayo kini nga istorya, apan dili ako motuo niini.’ Apan siya miangkon nga dihay usa ka butang nga nag-aghat kaniya sa pagpadayon sa pagsiksik, ug dili siya makahunong. Daghan na kaayo akong nahimamat nga ubang mga tawo kinsa misugod usab ug dili makahunong, kababayen-an ug kalalakin-an kinsa dili miyembro sa Simbahan. Busa atong makita karon nga ang liboan ka kalalakin-an ug kababayen-an nagsiksik sa mga rekord sa mga patay. Wala sila masayud kon ngano, apan kini aron kita makakuha niining gitigum nga mga rekord ug moadto sa atong mga templo ug himoon ang buluhaton alang sa atong mga patay.”¹

Gitudlo ni Presidente Smith nga ang family history labaw pa kay sa mahitungod sa pagpangita sa mga ngalan, mga petsa, ug mga dapit ug pagtigum og mga istorya. Kini mahitungod sa paghatag og mga ordinansa sa templo nga naghiusa sa mga pamilya sa kahangturan, nagbugkos sa matinud-anong mga tawo sa tanang henerasyon isip mga sakop sa pamilya sa Dios. “Ang mga ginikanan kinahanglan nga mabugkos ngadto sa usag usa,” ug ang mga anak ngadto sa mga ginikanan aron madawat ang mga panalangin sa celestial nga gingharian,” miingon siya. “Busa ang atong kaluwasan ug pag-uswag nag-agad sa kaluwasan sa atong takus nga mga patay kang kinsa kita kinahanglan nga isumpay diha sa mga higot sa pamilya. Matuman lamang kini diha sa atong mga Templo.”² Sa wala pa ihalad ang pagpahinungod nga pag-ampo didto sa Ogden Utah Temple, miingon siya, “Pahinumduman ko kamo nga kon kita magpahinungod og usa ka balay sa Ginoo, unsa gayud ang atong buhaton mao ang pagpahinungod sa atong mga kaugalingon ngadto sa serbisyo sa Ginoo, uban sa pakigsaad nga atong gamiton ang balay sa paagi nga iyang gusto nga kini pagagamiton.”³

Mga Pagtulun-an ni Joseph Fielding Smith

Gipahiuli ni Elijah ang gahum sa pagbugkos, o paghiusa, dinhi sa yuta ug didto sa langit.

Si Malaquias, ang katapusang propeta sa Daang Tugon, mitapos sa iyang mga panagna uban niini nga mga pulong:

“Ania karon, akong ipadala kaninyo si Elias ang manalagna, sa dili pa moabut ang dako ug makalilisang nga adlaw sa Ginoo:

“Ug iyang pabalikon ang kasingkasing sa mga amahan ngadto sa mga bata, ug ang kasingkasing sa mga bata ngadto sa ilang mga amahan, tingali unya ako moanhi ug samaran ko ang yuta pinaagi sa usa ka panghimaraut.” (Mal. 4:5–6.)

Kini ingon og labing angay nga ang katapusan sa karaan nga mga propeta motapos sa iyang mga pulong uban sa usa ka saad ngadto sa umaabut nga mga henerasyon, ug diha niana nga saad nagtagna og panahon nga moabut nga adunay pagsumpay sa mga dispensasyon nga milabay ngadto sa ulahing mga adlaw. …

Kita adunay mas tin-aw nga paghubad sa mga pulong ni Malaquias nga gihatag sa Nephite nga propeta nga si Moroni, kinsa mipakita ngadto ni Joseph Smith sa pagka-Septyembre 21, 1823. Kini ang paagi nga ang anghel mikutlo niini:

“Tan-awa, Ako mopadayag nganha kaninyo sa Pagkapari, pinaagi sa kamot ni Elijah ang propeta, sa dili pa moabut ang mahinungdanon ug makalilisang nga adlaw sa Ginoo.

“Ug siya motanom diha sa mga kasingkasing sa mga anak sa mga saad nga gihimo ngadto sa mga amahan, ug ang mga kasingkasing sa mga anak mobalik ngadto sa ilang mga amahan.

“Kon kini dili mao, ang tibuok yuta sa hingpit malaglag sa iyang pag-anhi.” (D&P 2:1–3.)

Mipahibalo si Moroni ni Joseph Smith nga kini nga panagna hapit na matuman. Ang pagkatuman miabut mga dose ka tuig sa wala madugay, niadtong Abril 3, 1836. Niining adlawa mipakita si Elijah ngadto ni Joseph Smith ug Oliver Cowdery sa Kirtland Temple ug didto gitugyan diha kanila … ang gahum sa paghiusa, o pagbugkos, dinhi sa yuta ug didto sa langit. Ang mga yawe niini nga priesthood gihuptan ni Elijah, ngadto kang kinsa ang Ginoo mihatag sa gahum ibabaw sa mga elemento ingon man ibabaw sa katawhan, uban sa awtoridad sa pagbugkos alang sa karon ug sa kahangturan diha sa matarung sa tanang mga ordinansa kalabut sa kahingpitan sa kaluwasan.⁴

Ang pipila sa mga miyembro sa Simbahan naglibug sa paghunahuna nga si Elijah mianhi uban sa yawe sa pagbunyag alang sa mga patay o sa kaluwasan alang sa mga patay. Ang mga yawe ni Elijah mas labaw pa niana. Kini mao ang mga yawe sa pagbugkos, ug kadto nga mga yawe sa pagbugkos may kalabutan sa buhi ug naglakip sa mga patay kinsa andam sa paghinulsol.⁵

Si Elijah mianhi aron sa pagpahiuli nganhi sa kalibutan, pinaagi sa pagtugyan diha sa buhi nga mga propeta nga takus nga gisugo sa Ginoo, sa kahingpitan sa gahum sa Priesthood. Kini nga Priesthood naghupot sa mga yawe sa paghiusa ug pagbugkos dinhi sa yuta ug didto sa langit sa tanang mga ordinansa ug baruganan kalabut sa kaluwasan sa tawo, nga sila sa ingon mahimong angay sa celestial nga gingharian sa Dios. …

Pinaagi kini sa awtoridad nga ang mga ordinansa gipahigayon diha sa mga templo alang sa mga buhi ug sa mga patay. Kini mao ang gahum nga naghiusa sa mga bana ug mga asawa sa kahangturan kon sila mosulod sa kaminyoon sumala sa mahangturong plano. Kini mao ang awtoridad diin ang mga ginikanan makabaton og pag-angkon sa pagkaginikanan kabahin sa ilang mga anak ngadto sa kahangturan ug dili lamang alang sa karon, nga naghimo og mahangturong pamilya diha sa Gingharian sa Dios.⁶

Ang pagpahiuli sa awtoridad sa pagbugkos nagluwas sa kalibutan gikan sa hingpit nga pagkalaglag sa pag-anhi ni Jesukristo.

Kon wala pa moanhi si Elijah atong masabtan nga ang tanan nga mga buhat sa miaging mga panahon wala kaayoy kapuslanan, kay ang Ginoo miingon nga ang tibuok kalibutan, ubos sa ingon nga kahimtang, hingpit nga malaglag sa iyang pag-anhi. Busa ang iyang misyon mahinungdanon kaayo sa kalibutan. Dili lamang kini kabahin sa bunyag sa mga patay, apan usab sa pagbugkos sa mga ginikanan ug mga anak ngadto sa mga ginikanan, aron adunay “tibuok ug walay kulang ug hingpit nga pagkahiusa, ug pagkasumpay sa mga kapaigoan, ug mga yawe ug mga gahum ug mga himaya,” gikan sa sinugdan ngadto sa katapusan sa panahon [tan-awa sa D&P 128:18]. Kon kining gahum sa pagbugkos wala dinhi sa kalibutan, nan ang kalibug mohari ug kagubot mopuli sa kahusay niana nga adlaw nga ang Ginoo moanhi, ug, sa tinuod, dili kini mahimo, kay ang tanang mga butang gidumala ug gipugngan sa hingpit nga balaod diha sa gingharian sa Dios.⁷

Nganong pagalaglagon ang kalibutan? Tungod lamang kay walay pagkasumpay tali sa mga amahan ug sa mga anak—nga mao ang buluhaton alang sa mga patay—nan tanan kita magbarug nga isalikway; ang tanang buhat sa Dios mapakyas ug hingpit nga malaglag. Ang mao nga kahimtang, sa tinuod, dili mahitabo.⁸

Ang pagpahiuli niining awtoridad sa [pagbugkos] mao ang panalangin nga nagluwas sa kalibutan gikan sa hingpit nga pagkalaglag inig anhi ni Jesukristo. Kon atong masabtan og maayo kini nga kamatuoran ug isilsil sa atong mga hunahuna, dali kining mahibaloan nga adunay kalibug ug kalisdanan lamang kon ugaling si Kristo moanhi ug ang gahum sa pagbugkos wala dinhi.⁹

Aron sa pagpangandam alang sa kaluwasan sa kahingpitan niini, kinahanglan gayud nga kita modawat og mga ordinansa sa templo pinaagi sa gahum sa pagbugkos.

Ang Ginoo [naka] hatag ngari kanato og mga pribilehiyo ug mga panalangin, ug oportunidad sa pagsulod ngadto sa mga pakigsaad, modawat og mga ordinansa nga may kalabutan sa atong kaluwasan dugang sa unsay gisangyaw dinhi sa kalibutan, dugang sa mga baruganan sa hugot nga pagtuo diha ni Ginoong Jesukristo, paghinulsol sa sala ug bunyag alang sa kapasayloan sa mga sala ug pagpandong sa mga kamot alang sa gasa sa Espiritu Santo; ug kini nga mga baruganan ug mga pakigsaad dili madawat bisan asa apan diha lamang sa templo sa Dios.¹⁰

Ang buhat sa templo may kalambigitan gayud sa plano sa kaluwasan, nga ang usa dili mahimo nga wala ang usa. Sa ato pa, walay kaluwasan kon walay [mga] ordinansa sa templo nga iya ra sa templo.¹¹

Adunay liboan ka mga Santos sa Ulahing mga Adlaw … kinsa andam sa pagtambong og miting, andam sa pagbayad sa ilang ikapulo ug pagbuhat sa naandang mga katungdanan sa Simbahan, apan sila ingon og wala mobati o makasabut sa importansya sa pagdawat sa mga panalangin diha sa templo sa Ginoo nga modala nila ngadto sa kahimayaan. Katingad-an kini nga butang. Ang katawhan ingon og kontento og sayon nga kinabuhi nga wala magpahimulos sa mga oportunidad nga gihatag kanila ug wala dawata kining gikinahanglan nga mga pakigsaad nga modala kanila og balik ngadto sa presensya sa Dios isip anak nga mga lalaki ug mga babaye.¹²

Kon gusto kamo og hingpit nga kaluwasan, nga kahimayaan diha sa gingharian sa Dios, … kinahanglan nga kamo moadto sa templo sa Ginoo ug modawat niining balaan nga mga ordinansa nga iya niana nga balay, nga dili madawat bisan asa. Walay lalaki nga makadawat sa kahingpitan sa kahangturan, sa kahimayaan nga siya lamang; walay babaye nga makadawat niana nga panalangin nga siya lamang; apan ang bana ug asawa, kon sila modawat sa gahum sa pagbugkos diha sa templo sa Ginoo, mouswag ngadto sa kahimayaan, ug magpadayon ug mahimong sama sa Ginoo. Ug kana ang padulngan sa katawhan, kana mao ang mga tinguha sa Ginoo alang sa Iyang mga anak.¹³

Pahibalo: Aron mabasa ang pipila sa mga pulong sa paglaum ug saad alang sa matinud-anong mga tawo kinsa dili makahimo sa pagdawat sa tanang mga ordinansa sa templo sa ilang tibuok nga mga kinabuhi, tan-awa sa kapitulo 15 niini nga libro.

Tungod sa gahum sa pagbugkos, kita makapahigayon og makaluwas nga mga ordinansa alang niadtong kinsa namatay nga wala makadawat niini.

Kinsa ang mga amahan nga gipamulong ni Malaquias, ug kinsa ang mga anak? Ang mga amahan mao ang atong mga patay nga mga katigulangan kinsa namatay nga walay pribilehiyo sa pagdawat sa Ebanghelyo, apan kinsa nakadawat sa saad nga ang panahon moabut nga kana nga pribilehiyo ihatag ngadto kanila. Ang mga anak mao kadtong karon nga mga buhi kinsa nag-andam sa mga impormasyon sa kaliwatan ug kinsa nagpahigayon sa pagpuli nga mga ordinansa diha sa mga Templo.¹⁴

A family at a computer. — Ang tanang sakop sa pamilya makaapil sa buhat sa family history.

Si Elijah mianhi, nagdala sa mga yawe sa pagbugkos, ug ang gahum gihatag ngari kanato pinaagi diin kita makahatag og tabang sa mga patay. Kini nga gahum sa pagbugkos naglakip niadtong kinsa patay kinsa andam sa paghinulsol ug sa pagdawat sa Ebanghelyo kinsa namatay nga wala niana nga kahibalo, sama lamang nga kini nagtabang niadtong mga buhi kinsa naghinulsol.¹⁵

Ang Ginoo nagmando nga ang tanan niyang espiritu nga mga anak, matag kalag kinsa nakapuyo o mopuyo sa kalibutan, adunay makatarunganon ug makiangayong oportunidad sa pagtuo ug pagsunod sa mga balaod sa iyang mahangturong ebanghelyo. Kadtong kinsa modawat sa ebanghelyo ug mopuyo uyon sa mga balaod niini, lakip ang bunyag ug celestial nga kaminyoon, makabaton og kinabuhing dayon.

Kini tataw nga gamay lamang nga bahin sa katawhan ang nakadungog sa pulong sa gipadayag nga kamatuoran gikan sa tingog sa usa sa mga tinuod nga sulugoon sa Ginoo. Diha sa kaalam ug kaangayan sa Ginoo, ang tanan kinahanglan gayud nga mobuhat sa ingon. Sumala sa gisulti ni Pedro:

“Kay kini mao ang hinungdan ngano nga ang ebanghelyo giwali hangtud ngadto sa mga patay, aron bisan tuod sila nahinukman na diha sa lawas ingon sa mga tawo, sila mabuhi sa espiritu ingon sa Dios.” (1 Pedro 4:6.)

Kadtong kinsa walay oportunidad sa pagpaminaw sa mensahe sa kaluwasan dinhi niini nga kinabuhi apan modawat unta niini uban sa tibuok nilang mga kasingkasing kon ang mao nga oportunidad miabut nganha kanila—sila mao kinsa ang mga modawat niini didto sa kalibutan sa mga espiritu; sila mao kang kinsa atong ipahigayon ang mga ordinansa diha sa mga templo, ug sila mao kinsa, niini nga paagi, mahimong mga manununod uban kanato sa kaluwasan ug sa kinabuhing dayon.¹⁶

Ang pagpabalik sa mga kasingkasing sa mga amahan ngadto sa mga anak ug ang mga anak ngadto sa amahan, mao ang gahum sa kaluwasan alang sa mga patay, pinaagi sa pagpuli nga buhat nga ipahigayon sa mga anak alang sa ilang mga amahan, ug kini sa tanang paagi makatarunganon ug makanunayon. Nadungog ko kining gisulti og kadaghan niadtong kinsa mibatok niini nga buhat nga kini imposible alang sa usa ka tawo sa pagbarug puli sa lain. Kadtong mipahayag sa ilang mga kaugalingon niini nga paagi nakalimtan ang kamatuoran nga ang tibuok buhat sa kaluwasan usa ka pagpuli nga buhat, si Jesukristo nagbarug isip ang halad-pasig-uli, nagtubos kanato gikan sa kamatayon, diin kita dili na responsable, ug usab sa pagtubos kanato gikan sa responsibilidad sa atong kaugalingon nga mga sala, sa kondisyon sa atong paghinulsol ug pagdawat sa ebanghelyo. Siya mibuhat niini sa labing makapahinuklog nga paagi nga walay kinutuban ug tungod sa samang baruganan iyang gitugyan ang awtoridad ngadto sa mga miyembro sa Simbahan sa pagbuhat alang sa mga patay kinsa dili makahimo sa pagpahigayon sa makaluwas nga mga ordinansa alang sa ilang mga kaugalingon.¹⁷

Naghunahuna ako nga usahay atong gitan-aw kini nga butang alang sa kaluwasan sa mga patay ingon og dili kaayo importante. Kini sayop nga hunahunaon nga ang mga tawo kang kinsa kita naghimo og buhat diha sa templo sa Ginoo mga patay na. Ato silang hunahunaon nga mga buhi, ug ang puli nga buhi nagrepresentar lamang kanila sa pagdawat sa mga panalangin nga kinahanglan unta ilang madawat ug madawat unta niini nga kinabuhi kon sila buhi pa sa dispensasyon nga ang ebanghelyo gitudlo. Busa ang matag patay nga tawo kang kinsa ang buhat gihimo diha sa templo gihunahuna nga buhi sa panahon nga ang ordinansa gihatag.¹⁸

Kini nga doktrina sa kaluwasan alang sa mga patay maoy usa sa labing mahimayaon nga mga baruganan nga gipadayag sukad ngadto sa tawo. Kini mao ang paagi nga ang ebanghelyo itanyag ngadto sa tanang katawhan. Kini nagtukod sa kamatuoran nga ang Dios walay pinalabi nga mga tawo [tan-awa sa Mga Buhat 10:34]; nga ang matag kalag bililhon sa Iyang panan-aw; ug nga ang tanan nga mga tawo, sa pagkatinuod, pagahukman sumala sa ilang mga buhat.

Karon, ako nagpasalamat sa Ginoo nga Iyang gipahiuli ang Iyang mahangturong ebanghelyo ngari kanato karong panahona. Nagpasalamat ako Kaniya alang sa gahum sa pagbugkos nga giuli nganhi sa kalibutan pinaagi ni Propeta Elijah. Nagpasalamat ako Kaniya alang sa unit sa mahangturong pamilya, alang sa pribilehiyo nato nga mabugkos diha sa iyang balaan nga mga templo, ug niana naghimo niini nga mga panalangin nga mahatag ngadto sa atong mga katigulangan kinsa namatay nga walay kahibalo sa ebanghelyo.¹⁹

Ang buhat sa family history ug buhat sa templo alang sa mga patay mga buhat sa gugma.

Adunay daghang maayo, mapainubsanong mga kalag kinsa naghikaw sa ilang mga kaugalingon sa mga kaharuhay, ug usahay sa mga panginahanglan, sa kinabuhi, aron ilang maandam ang mga rekord ug mapahigayon ang trabaho alang sa ilang mga patay nga ang gasa sa pagluwas unta madala ngadto kanila. Kining mga buhat sa gugma dili makawang, tungod kay ang tanan nga nagbuhat niining maayo nga kawsa makakaplag sa ilang bahandi ug mga katigayunan didto sa celestial nga gingharian sa Dios. Dako ang mahimo nilang ganti, oo, gani lapas sa gahum sa mga mortal nga sabton.²⁰

Walay buhat nga konektado sa ebanghelyo nga mas matinabangon ang kinaiyahan kay sa buhat diha sa Balay sa Ginoo, alang sa atong mga patay. Kadtong kinsa nagbuhat alang sa mga patay wala magpaabut nga modawat og bisan unsa nga yutan-ong bayad o ganti. Kini, labaw sa tanan, usa ka buhat sa gugma, nga namugna diha sa kasingkasing sa tawo pinaagi sa matinud-anon ug kanunay nga pagtrabaho niining makaluwas nga mga ordinansa. Walay kwarta nga makuha, apan adunay dako nga kalipay didto sa langit niadtong mga kalag kinsa atong natabangan sa ilang kaluwasan. Kini usa ka buhat nga nagdugang sa pagka-espirituhanon sa tawo, nagpalambo sa iyang mga panan-aw kalabut sa kaayohan sa iyang isigka-tawo, ug nagtanom diha sa iyang kasingkasing og usa ka gugma alang sa tanang mga anak sa atong Langitnong Amahan. Walay buhat nga makatumbas niana nga anaa sa templo alang sa mga patay nga nagtudlo sa tawo sa paghigugma sa iyang silingan sama sa iyang kaugalingon. Gihigugma gayud ni Jesus ang kalibutan nga andam siya sa paghatag sa iyang kaugalingon isip sakripisyo alang sa sala aron ang kalibutan unta maluwas. Kita usab adunay pribilehiyo, sa gamay nga paagi, sa pagpakita sa atong dakong gugma alang Kaniya ug sa atong mga isigka-tawo pinaagi sa pagtabang kanila sa mga panalangin sa ebanghelyo nga sa karon dili nila madawat kon wala ang atong panabang.²¹

Pinaagi sa buhat sa family history ug buhat sa templo, atong nakompleto ang organisasyon sa pamilya gikan sa usa ka henerasyon ngadto sa laing henerasyon.

Ang doktrina sa kaluwasan alang sa patay ug buhat sa templo naghatag kanato og mahimayaong potensyal nga mapadayon ang relasyon sa pamilya. Pinaagi niini atong makat-unan nga ang relasyon sa pamilya kinahanglan nga dili maputol, nga ang mga bana ug mga asawa sa kahangturan adunay pag-angkon diha sa usag usa ug diha sa ilang mga anak hangtud sa kinaulahiang henerasyon. Hinoon, aron madawat kini nga mga pribilehiyo ang mga ordinansa sa pagbugkos diha sa templo sa atong Dios kinahanglan gayud nga maangkon. Ang tanan nga mga pakigsaad, mga kasabutan, mga katungdanan ug mga kauyonan nga gihimo sa katawhan matapos, apan ang mga katungdanan ug mga kauyonan nga gihimo diha sa balay sa Ginoo, kon matinud-anong sundon, magpabilin sa kahangturan [tan-awa sa D&P 132:7]. Kini nga doktrina naghatag kanato og mas tin-aw nga konsepto sa mga katuyoan sa Ginoo ngadto sa iyang mga anak. Kini nagpakita sa iyang buhong ug walay kinutubang kalooy ug gugma sa tanan kinsa nagsunod kaniya, oo, gani bisan niadtong mga mosukol, kay diha sa iyang kaayo ihatag niya ang dagkong mga panalangin bisan ngadto kanila.²²

Gitudloan kita sa ebanghelyo ni Jesukristo nga ang organisasyon sa pamilya kon may kalabutan sa celestial nga kahimayaan, usa nga kompleto, usa ka organisasyon nga gisumpay gikan sa amahan ug inahan ug mga anak sa usa ka henerasyon ngadto sa amahan ug inahan ug mga anak sa sunod nga henerasyon, ug sa ingon naglambo ug nagkaylap hangtud ngadto sa katapusan sa panahon.²³

A father and son looking through a photo album at the Joseph Smith Memorial Building. — Ang gahum sa pagbugkos sa priesthood “naghiusa sa mga bana ug mga asawa sa kahangturan kon sila mosulod sa kaminyoon sumala sa mahangturong plano.”

Kinahanglan nga adunay pagdugtong, usa ka pagsumpay sa mga henerasyon gikan sa panahon ni Adan hangtud sa katapusan sa panahon. Ang mga pamilya sumpayon ug idugtong, mga ginikanan ngadto sa mga anak, mga anak ngadto sa mga ginikanan, usa ka henerasyon ngadto sa lain, hangtud kita mahiusa sa dakong hamili nga pamilya kauban sa atong amahan nga si Adan maoy nangulo, diin ang Ginoo ang mibutang kaniya. Busa dili kita maluwas ug mahimaya diha sa gingharian sa Dios gawas kon sa atong mga kasingkasing kita adunay tinguha sa paghimo niini nga buhat ug ipahigayon kini kutob sa atong mahimo alang sa atong mga patay. Kini usa ka mahimayaong doktrina, usa sa nindot kaayo nga mga baruganan sa kamatuoran nga gipadayag pinaagi ni Propeta Joseph Smith. Kinahanglan atong pahimuslan ang atong mga oportunidad ug ipakita nga kita takus ug madawat sa panan-aw sa Ginoo, nga unta atong madawat kini nga kahimayaan alang sa atong mga kaugalingon, ug didto magmaya sa gingharian sa Dios uban sa atong mga paryente ug mga higala dinhi niining dako nga panaghiusa og balik ug pagpundok sa mga Santos sa Simbahan sa Unang Natawo, kinsa nagpabilin sa iyang kaugalingon nga walay lama gikan sa mga sala sa kalibutan.

Ang Ginoo mopanalangin kanato ug mohatag nga unta kita adunay tinguha diha sa atong mga kasingkasing sa pagpalambo sa atong calling ug sa pagserbisyo Kaniya nga matinud-anon sa tanang mga butang, mao ang akong pag-ampo.²⁴

Mga Sugyot alang sa Pagtuon ug Pagtudlo

Mga Pangutana

Sa “Gikan sa Kinabuhi ni Joseph Fielding Smith,” basaha ang tambag ni Presidente Smith mahitungod kon “unsa gayud ang atong buhaton” sa usa ka pagpahinungod sa templo. Unsa ang atong mabuhat sa pagsunod niini nga tambag?
Sa unsa nga paagi nga ang pagtulun-an diha sa seksyon 1 may kalabutan sa atong mga paninguha sa pagtabang sa atong mga katigulangan kinsa nangamatay na? Sa unsang paagi nga kini nga mga pagtulun-an may kalabutan sa atong mga relasyon uban sa buhi nga mga sakop sa pamilya?
Samtang inyong basahon ang seksyon 2, pangitaa ang pagpasabut ni Presidente Smith kon ngano nga ang gahum sa pagbugkos “nagluwas sa kalibutan gikan sa hingpit nga pagkalaglag sa pag-anhi ni Jesukristo.” Unsa ang gitudlo niini mahitungod sa dapit sa mga pamilya diha sa plano sa kaluwasan?
Sa unsa nga mga paagi ang buhat sa templo “may kalambigitan gayud sa plano sa kaluwasan”? (Tan-awa sa seksyon 3.) Sa unsang paagi nga kini nga baruganan nakaimpluwensya sa atong mga pagbati mahitungod sa buhat sa templo?
Si Presidente Smith mitambag nga kon kita maghimo og buhat sa templo alang sa mga patay, kinahanglan nga kita maghunahuna nga ang mga tawo buhi (tan-awa sa seksyon 4). Unsa ang kahulugan niini nganha kaninyo? Sa unsa nga paagi kaha kini nga ideya moimpluwensya sa paagi sa inyong pagserbisyo sa templo?
Samtang inyong ribyuhon ang seksyon 5, pangitaa ang mga panalangin nga gisulti ni Presidente Smith nga moabut ngadto niadtong kinsa naghimo og family history. Sa unsa nga paagi inyong nahibaloan nga kining mga butanga tinuod?
Tun-i ang seksyon 6, ug handurawa ang kasinatian sa pagmaya kauban sa inyong mga katigulangan diha sa usa ka “dako nga panaghiusa og balik.” Paghunahuna mahitungod sa unsay inyong mahimo sa pag-andam sa inyong kaugalingon ug inyong pamilya alang niana nga pribilehiyo.

May Kalabutan nga mga Kasulatan

1 Mga Taga-Corinto 15:29; D&P 95:8; 97:15–16; 128:16–19

Tabang sa Pagtudlo

“Kon ang usa ka tawo mangutana, imbitara ang uban sa pagtubag imbis ikaw mismo ang motubag niini. Pananglit, makasulti ka, ‘Nindot kana nga pangutana. Unsa ang hunahuna sa uban’ o ‘Aduna bay makatabang niini nga pangutana?’” (Pagtudlo, Walay Labaw ka Mahinungdanon nga Tawag [1999], 64).