Wase 10

Taqomaki Keda Mai na Veivakayarayarataki Ca

Na kosipeli i Jisu Karisito e solia vei keda na kaukauwa kei na itataqomaki mai na ca ni gauna oqo.

Na Bula nei Spencer W. Kimball

Evakavuvulitaka o Peresitedi Spencer W. Kimball ni veivala kei Setani kei ira na nona mataivalu “e sega ni dua na ivalu lailai ka lomalomarua o koya na kena meca, ia e dua na ivalu levu ka vakaitamera na kaukauwa e tu vua na meca, ni taqomaki ka tuvalaki tu vakavinaka, eda na vakadrukai dina kevaka eda sega ni vakaukauwa, tuberi vakavinaka, ka yadra tiko.”¹

Me vaka e dua na daukaulotu gone ka veiqaravi voli ena Tabana ni Kaulotu ena Central States, a vola ena nona ivolaniveisiga e dua na ka a sotava ka vakaraitaki kina na nona sa yalataka tu me na vorata na veitemaki. E a vodo tiko ena dua na sitimanivanua ki Chicago e Illinois, qai lako mai vua e dua na tamata. “A tovolea ko [koya] me wilika e dua na ivola ca vata kei na kena iyaloyalo vakasisila. Au tukuna vua niu sega ni taleitaka. Sa tekivu me temaki au meu na lako vata tiko kei koya e lomai Chicago, kau kila ni na kauti au sobu ki eli. Au a vagalui koya ia ni sa lako au vakila na noqu madua ena dua na auwa. Au vakasamataka—’Sa dua na ka na nona sasaga ko Setani ena nona ivadi, me kauti ira vakatani na itabagone.’ Au vakavinavinaka vua na Turaga ni tu vei au na kaukauwa meu lako sivita kina.”²

iVakavuvuli nei Spencer W. Kimball

E ka dina ko Setani ka na vakayagataka na sala kecega me tovolea me vakarusai keda.

Ena veigauna dredre kei na cala oqo sa dau duatani na ivakarau ni rai ni tamata e sega walega ni baleta na Kalou ia na tevoro talega. Ena vuku ni vakasama oqo sa ivakaraitaki walega ko Setani, ka kena yaga me vakadodonutaki ira tiko na tamata ena veigauna butobuto, ia sa madra mai ena noda gauna ni rarama oqo. E sega ni dua na ka me yawa cake mai na dina. O Setani e kabula vakataki koya ia e yalo, e sega ni vakayago. Na nona gagadre me vauci keda vua me nona, e sega ni lailai cake ena ca mai na nona gagadre na Tamada ena dodonu me dreti keda yani ki na nona matanitu tawamudu.³

Me da kila na vanua e koto kina na veika rerevaki kei na noda rawa ni kila ena kena ivakatakilakila kece sara, sai koya eda na taqomaki kina. Ena yadra tiko e veigauna kece o koya na vu ni ca. Sa dau vakarau tu ena veigauna kece sara me cavilaki keda ka kaya ni nona ko ira kece sara era sega ni vakarautaki ira tu, ko ira kece sara era sega ni qaqarauni, ko ira kece era dau talaidredre.⁴

Veitalia se o cei ga e vakanamata tiko kina na nona sasaga na vu ni ca ena dua na gauna, sa nona sasaga me ra “rarawa me vakataki koya” (2 Nif. 2:27). Io sa dina sara, sa dau segata ko koya “me ra rarawa na tamata kecega” (2 Nif. 2:18). E sega ni veigoleyaki ena nona inaki, ka sa vuku sara ka sega ni loloma ena nona vakasaqarai ira.⁵

Sa vakasalataki keda ko Pita: “Dou yalomatua, dou vakatawa; sa veilakoyaki voli na nomudou meca na tevoro, me vaka na laioni sa tagi, a sa vakasaqara eso me tiloma” (1 Pita 5:8).

Sa kaya na iVakabula ni na temaki ira ko Lusefa, kevaka e rawa, o ira na digitaki [raica Josefa Simici—Maciu 1:22]. [Ko Lusefa] ena vakayagataka na nona ivadi me veilecayaki kina na tamata kei na nona dau kalasitaka na ivalavala ca me veivakarusai kina. Ena vakabuwawataka na ibalebale ni ka, ena dolava vakalalai ena veigauna na katuba, ka mua yani mai na vulavula serau, me curubasikata na kabukabu ki na butobuto.⁶

Sa vulica na veisala kece sara me rawata kina na lomana o koya na nodra iliuliu na dau veitemaki, e vakayagataka na iyaragi kece sara, na veika kecega e rawata. E taura vakaukauwa, moica na kena irairai, veisautaka ka vakamatavulotaka na veika kecega a buli me yaga vua na tamata, … me rawa kina ni lewa na nodra vakasama ka vakayagataka na yagodra, ka kaya ni ra sa nona.

E sega ni dau moce—e dau gugumatua ka dau sasaga. E dau vakasamataka vakamalua na nona leqa ka qai toso vagumatua, ena kena iwalewale duidui me rawata kina na nona inaki. E vakayagataka na wakilakila limalima ni tamata kei na nona gadreva na kakana kei na gunu me kauti ira tani kina. Sa dau namaka na veisaqasaqa ka vakarautaki koya kina. E dau vakayagataka na gauna na vanua kei na galala ni vakasama. E dau lako mai vakawasoma ka dau veivakauqeti ka maqosa. E dau vakayagataka na veiyaya yaga me vaka na retio, retioyaloyalo, na itukutuku tabaki, na waqavuka, kei na motoka me veivakacacani kina ka veivakarusai. E dau vakayagataka na nona gagadre ni veitokanitaka na tamata, na nona galili, kei na nona gagadre kecega me kauti koya tani kina. E dau cakava na nona cakacaka ena gauna vinaka duadua ena vanua veivakauqeti duadua mai vei ira na tamata kaukauwa. Ena sega vakadua ni ulabaleta e dua na ka e rawa ni veicavilaki, veivakacacani ka veivakalolovirataki. E dau vakayagataka na ilavo, na kaukauwa kei na veivakasaurarataki. E dau vakayarayarataka na tamata ka qai bololaka na vanua e malumalumu kina. E dau taura na ka vinaka ka biuta na irairai e vakasisila.… E dau vakayagataka na ilawaki kecega ni veituberi me vakamalumalumutaka kina na tamata.⁷

Sa rui qaseqase na meca. E lawaki ca. E kila ni na sega ni rawa me temaki ira na tagane kei na yalewa vinaka me ra cakava na veika ca lelevu, o koya ena toso kina vakamalua, ka vakasolokakanataka na veika e dina vakatikina me yacova ni ra sa muri koya tiko o ira e vinakata me rawai ira.⁸

Sa rawa ni da vorata na inaki ca, ena veivuke ni Turaga

Kevaka eda vinakata me da drotaka rawa na sasaga rerevaki nei koya na vu ni ca ka vagalalataka ka taqomaka vakaukauwa na noda vale kei na noda matavuvale mai na kaukauwa veivakarusai ka ra sa cakacaka tiko vakaukauwa sara e yasada, sa dodonu me na tiko vata kei keda na nona veivuke na … Dauveibuli sara ga vakataki koya. E dua ga na kena sala mana sai koya ena kosipeli ni Turaga ko Jisu Karisito kei na noda talairawarawa ki na kena ivakavuvuli bibi ka veivakauqeti.⁹

Ena dau basika ki na noda bula kece sara na veisaqasaqa ni vinaka kei na ca, ena kedrau maliwa ko Setani kei na Turaga. Na tamata kece sara sa yacova na yabaki ni vakatulewa o ya na yabaki walu, ni sa veivutuni vakaidina ka papitaisotaki ena kena sala dodonu, ena rawata vakaidina na Yalo Tabu. Kevaka eda na vakarorogo vua, ena veidusimaki, veivakauqeti, ka veivakasalataki, ka na vakamalumalumutaka na veivakauqeti ni vu ni ca na iKatolu ni Lewetolu Vakalou oqo.¹⁰

Ena rawa ni tokoni keda tiko ena gauna ni veivakatovolei levu, o koya sa kaukauwa cake mai vei Lusefa, o koya na noda isasabai ka noda kaukauwa. Ena sega ni kauta tani vakasaurara na Turaga e dua mai na ivalavala ca se mai na ligai koya na dauveitemaki, ia ena solia na Yalona me vakauqeta na tamata ivalavala ca me vakayacora ena veivuke vakalou. Ia na tamata ena soli koya ki na kaukauwa kamikamica kei na vakatakekere ni Yalotabu ka solia na nona kaukauwa kece me veivutuni tikoga sa yalataki tu vua na veitaqomaki, na kaukauwa, na galala kei na reki.¹¹

A veiqatitaka o Setani … na talairawarawa nei Mosese.…

“Mosese, na luve ni tamata, vakarokoroko vei au,” a veitemaki na tevoro, ka yalataka na vuravura kei na iyau talei kei na kaukauwa.…

… A vakarota vakaoqo na parofita: “Mo lako tani vei au Setani.…” (Mosese 1:16.) Ena nona sega ni vinakata na daulasulasu, dauveitemaki, na tevoro me laiva e dua ka rawa ni yaco me nona, ni sa rarawa “sa qoqolou ena domo levu, ka kuretaki vuravura kina, a sa kaya: Koi au na nona Le Duabau, mo vakarokoroko vei au.” (Mosese 1:19.)

A raica ka kila ko Mosese na ivadi o ya ka raica na kaukauwa ni butobuto kei na “rarawa ni mate.” Oqo e dua na kaukauwa ena sega ni rawarawa na nona saqata se vakaseva tani. Ena rere, a masu tale kina vua na Kalou ka veivakaroti tale ena dua na kaukauwa vou:

“Au na dau qarava tikoga na Kalou… ia sa vakasinaiti au na nona iserau, kau sa kila kina na kemudrau duidui.… Ena yacai Koya na Le Duabau ga, au sa vakaroti iko Setani mo lako tani eke” (Mosese 1:18, 21.)

O Lusefa mada ga, … o koya na meca ni kawatamata, e sega ni rawa ni vorata na kaukauwa ni matabete ni Kalou. E lako tani mai vei Mosese ena sautaninini, ena vosavosa ca, ena tagi, ena tagiyaso, kei na vakasequruquru bati.¹²

Sa dodonu me da vakarau me da tu doudou ena matai Setani… ka vorata na ivakavuvuli kei na kaukauwa ni butobuto. Eda na gadreva na iyaragi taucoko ni Kalou me rawa ni da veivorati kina. [Raica Efeso 6:12–13.]¹³

“Dou vakaiyaragi ena iyaragi kecega ni Kalou,” me vaka e veivakasalataki kina o Paula [Efeso 6:11]. Ena kaukauwa kei na veitaqomaki vakalou oqo, sa na rawa kina me da kila na ilawaki ni meca ena veivosa cava ga ni mari kei na veicavilaki ka na rawa kina vei keda “me da vorata kina ena siga ca, ia ni dou sa kitaka kece mo dou tudei.” [Raica Efeso 6:13.]¹⁴

Me da kakua ni soli keda ki na veitemaki, io na kena e lailai duadua sara mada ga.

Ena qai dau curuma ga na noda bula na ivalavala ca lelevu ni da sa soli keda taumada ki na veitemaki lalai. E dau vakavudua na nona cakava na ivalavala ca lelevu e dua ke sega mada ni a soli koya ki na kena e lalai, na kena oqori sa qai dolava na katuba ki na kena e lelevu cake. Ni solia na ivakaraitaki ni dua na mataqali ivalavala ca, e kaya kina vakaoqo e dua, “Ena sega ni vakasauri na nona yaco me sega ni dina e dua na tamata dina me vaka na kena tubua vakasauri e dua na lomanibai savasava vinaka.”

Sa na bau dredre sara, kevaka e sega ni rawa, me curuma na tevoro e dua na katuba e sogo tu. E kena irarai ni sega tu vua na ki me dolava kina na katuba e loka tu. Ia kevaka e laqa toka vakalailai na isogo, ena vakacuruma yani na iqaqalo levu ni yavana, sega ni dede sa na muria yani na yavana, ka tarava yani na tolo ni yavana taucoko kei na yagona kei na uluna, ka yacova sara ni sa curu yani ko koya.

Na ka oqo e tautauvata kei na italanoa ni kameli kei na tamata yauvoli ena nodrau lako kosova tiko na vanua dravuisiga veinukunuku ka qai liwa e dua na cava. A tara vakatotolo o yauvoli na nona valelaca ka curu sara ki loma, e sogota na katuba me vakaruru mai na mataninuku mosimosi ka cagina yani ena cava cudrucudru o ya. Io, a biu tu e tautuba na kameli, ia ni sa ceburaka yani na cagi kaukauwa oqori na mataninuku ka roba na yagona, na matana, kei na qara ni ucuna, sa sega talega ni taura rawa na kena mosi ka sa mani kerea kina me curu talega yani ki loma ni vale laca.

“Sa rauti au ga na vale oqo,” e kaya ko yauvoli.

“Ia e rawa beka me curu ga yani na ucuqu me rawa niu ceguva kina na cagi e sega kina na nuku?” e kerea na kameli.

“Io, au kila ni rawa oqori,” e kaya mai ko yauvoli, sa qai dolava vakalailai sara na katuba ka curu yani na ucuna balavu na kameli. Sa logaloga vinaka cake sara na kameli! Ia e sega ni dede sa tekivu me vakila na kameli na matani nuku e matana kei na daligana… :

“Na caroba ni nuku cagina sa vaka e dua na ikuita ki uluqu. E rawa beka niu biuta yani ki loma na uluqu?”

E vakasamataka na tamata yauvoli oqo kevaka e vakadonuya tale ena sega ni dua na kena leqa vua, ni na rawa ni tawana na ulu ni kameli na vanua e lala tu e cake ka sega ni vakayagataka o koya. Sa mani curumaka yani na uluna na kameli ka mai logavinaka sara koto yani na manumanu oqo—ia ena dua walega na gauna lekaleka.

“Na iwase ni yagoqu ga e liu,” e vakamasuta, ka solia na tamata yauvoli, e sega ni dede sa tu e loma ni valelaca na tabana kei na yavana e liu na kameli. Sa qai yaco, ena iwalewale vata ga o ya ni kerekere ka soli, sa curu yani kina ki na loma ni valelaca na yagona e loma, kei na yagona e muri. Ia ena gauna oqo sa sega ni rauti rau, sa mani caqeti koya na tamata yauvoli yani ki tautuba na kameli me liwavi cava tu kina.

Me vaka na kameli, sa dau totolo sara na vakatulewa nei Lusefa ni sa vakamalumalumu e dua ki na nona veitemaki taumada. Sega ni dede mai na gauna o ya sa na galu vakadua na lewa e loma, ka lewa tu na toso na kaukauwa ni ca, sa na tasogo na katuba ni veivakabulai me yacova na gauna ena qai tadolavi tale kina ena dua na veivutuni e taucoko.

Na bibi ni noda kakua ni vakadonuya na veitemaki ena dua na kena ivakatagedegede lailai e vakatakilai ena nona ivakaraitaki na iVakabula. A sega beka ni raica ka kila na leqa ena nona tiko ena ulunivanua vata kei koya na tacina sa lutu tani, ko Lusefa, ena nona vakatovolei vakaca mai vua na dau ni veitemaki? A rawa me dolava na katuba ka vaqitora na leqa ena nona kaya, “Sa vinaka, Setani, Au na vakarorogo ki na nomu vakatutu. Au na sega ni vakamalumalumu kina, au na sega ni soli au kina, au na sega ni ciqoma —ia au na vakarorogo.”

A sega ni vakakina na Karisito. A sogota vakadodonu ka vakatotolo na veivosaki, ka vakarota: “Mo lako tani Setani,” e rairai kena ibalebale, “Lako tani eke—lako tani mai mataqu—au na sega ni vakarorogo—au sega ni via kilai iko.” Eda qai wilika ni oti o ya, “sa qai biuti koya na tevoro.” [Maciu 4:10–11.]

Oqo na kena ivalavala dodonu vei keda, kevaka me da na levea na ivalavala ca ka sega ni da qai tovolea tiko na cakacaka dredre ni kena valuti ni sa yaco. Niu vulica na kena italanoa na Dauveivueti kei na nona temaki, au kila ni a solia na nona igu ena nona taqomaki koya tiko mai na veitemaki ka sega ni qai valuta tiko me rawata.¹⁵

Na dodonu ni vakatulewa ena gauna oqo ena rawa ni vukea na noda vorata na veitemaki ena gauna mai muri.

E dua na itavi taumada ni tamata yadua sai koya na vakatauci ni lewa. Ena vica vata na gauna ena dua na siga eda na yacova yani kina e dua na ilesu ni sala ka me da na lewa kina se evei me da na goleva. Eso na digidigi ena balavu ka dredre, ia era na kauti keda vakadodonu ki na vanua e dodonu me da yaco kina; eso tale era leleka, rabailevu, ka logaloga vinaka, ia era na gole cala. Sa bibi kina me matata tiko ena noda vakasama na vanua eda gole tiko kina me da kakua kina ni vagolei tani ena veilesu ni sala yadua e gaunisala ena veitaro duidui: Evei beka na gaunisala rawarawa se logalogavinaka? se, evei beka na vanua era goleva na kena vo?

Ena rawarawa duadua na kena vakatauci na lewa dodonu ni da vakatauca taumada, ni tiko ena noda vakanananu na vanua eda vakanamata kina; oqori ena sega kina na mosi ni yalo ena ilesu ni sala, ena gauna eda sa oca ka vakatovolei kina vakaukauwa.

Niu se gone, au sa vakadeitaka kina ena noqu vakasama ka sega ni veisautaka niu na sega sara ni tovolea na ti, kofe, tavako se gunu ni veivakamatenitaki. Au qai raica ni lewa kaukauwa oqori a vakabulai au ena vuqa na gauna ena veika duidui au sotava. Ena vuqa sara na gauna a rawa meu ceruma se tara se tovolea, ia na lewa sega ni veisau au a sa vakadeitaka tu a solia vei au na kaukauwa meu vorata kina.

… Na gauna me da lewa kina ni da na sega ni vakacegui ena dua na ka e lailai sobu mai na noda rawa ni rawata me da laki bula tawamudu vata kei na Tamada, sai koya sara ga oqo, me rawa kina ni tatara tiko na mana ni lewa oqori ki na digidigi kece sara eda vakayacora me kakua kina ni dua na ka e vakalatilati ki na noda rawata na sasaga oqori.¹⁶

Tara cake na nomu vakaivakarautaka na nomu bula, me levu cake kina vei iko na kaukauwa mo kakua kina ni dau veiveisautaka na nomu lewa ena veika mo vakayacora ena gauna o temaki kina vakavica ena dua ga na veitemaki. O na gadreva mo vakatulewa ga vakadua ena so na ka!

Sa dua na veivakalougatataki levu me da galala mai na kena rarawataki ka baci rarawataki e dua na veitemaki. Na kena yaco na veika vakaoqo e rui vakaoti gauna ka rerevaki sara.¹⁷

E rawa ni da biliga laivi ga vei keda vakadua ka guilecava yani eso na ka! E rawa ni da vakatauca ga vakadua e dua na lewa me baleta na veika eso me tiki ni noda bula ka taura sara me noda—ka sega ni vakadeuca tiko vakaduanadrau se cava me da cakava kei na cava me da kakua ni cakava.

Na lomalomarua kei na yalolailai sai koya na draki ena bula ka cakacaka kina na Vunica, baleta ni rawa ni veivakamavoataki vakalevu cake kina ki na kawatamata ena gauna oqori.… Kevaka o se bera ni vakayacora vakakina, lewa mo vakatulewa!¹⁸

Sa dua na ka vakasakiti kevaka ena rawa vei ira yadua na goneyalewa kei na gonetagane Yalododonu Edaidai me ra lewa rawa ena nodra vakasama ena nodra gauna ni gone me ra kaya, “Au na sega vakadua ni soli au vei Setani se vua e dua e vinakata me vakarusai au.”¹⁹

Na gauna me da lako tani kina mai na veitovo ca sai koya ni se bera ni vakayacori. Na tarabu ni bula vinaka sai koya na tataqomaki kei na tatarovi. O ira era soli ira ki na ivalavala ca e vakavuqa ni sai ira era biuti ira tu ena dua na itutu yavavala.²⁰

Eda sa vorata tiko na meca ena noda vakadinadinataka na noda malumalumu ka segata me da lako sivita.

Me vaka niu tubu cake ena vanua ni teitei, au kila ni gauna era basu bai kina na vuaka, au na vakaraica taumada na vanua era a curu kina e liu. Ni lako tani mai na kena bai na bulumakau yalewa me vakaraica na veico vinaka ena veivanua tale eso, au kila na vanua meu vakasaqaqara taumada kina ni ra dau dro. E vakavuqa ni na dau lako ga ki na vanua a lade kina e liu, se ena vanua a kabasu kina na bai. Sa vakakina na nona kila na tevoro na vanua me veitemaki kina, na vanua me vakatauca kina na nona ivacu kaukauwa. E dau raica o koya na vanua malumalumu. Na vanua a malumalumu kina e dua e liu, ena rawarawa ni temaki tale kina.²¹

E kena irairai ni sa dau tiko vakavolivoliti keda ga na ca ena veigauna.… O koya sa dodonu kina, me da na yadra tiko ena veigauna. Me da kila na noda malumalumu ka qai tosovi ira yani me da rawai ira.²²

E vuqa vei keda e tu na tikidra malumalumu ka na rawa ni toboki keda kina na veileqa sega ni namaki vakavo ga kevaka eda sa taqomaki vinaka ka cula ena icula ni tatarovi.…

Na itukutuku makawa e vakarautaki kina e vuqa na… ivakaraitaki ni igu kei na isakisaki, ni tamata yadua kei na vanua, ka ra rawai ena nodra bololaki ena veivanua era malumalumu kina. Na veivanua oqori e vakavuqa ni dau laurai tu ga, e kila vinaka tu ko Lusefa kei ira na nona ilawalawa na itovo, na malumalumu, kei na tikidra malumalumu na tamata kecega ka na dau vakayagataka me kauti keda yani kina ki na veivakarusai vakayalo. Vua beka e dua na tamata sai koya na nona gadreva tu na gunu ni veivakamatenitaki, e dua tale sa rui dau gadreva beka vakalevu na kakana; e dua tale beka e dau vakatara me rawai koya na nona gagadre ni duavata vakayago; e dua tale sa rui dau lomana beka vakalevu na ilavo, kei na iyau talei kei na iyaya vinaka e rawa ni volia; e dua tale ena dau vinakata beka na kaukauwa; kei na so tale.²³

Me dina ka vakadinadinataka na nona malumalumu o koya e dau gadreva tu na veika ca. Au na tukuna vei kemuni ni sega ni a biuta ki na noda bula na Turaga e dua na ivalavala ca. A sega ni cakava e dua na tamata me ca.… A vakacurumi mai ki vuravura na ivalavala ca, ka vakatarai vei Setani me temaki keda, ia e dui tu na noda galala ni digidigi. E rawa ni da ivalavala ca se bula dodonu, ia eda na sega ni drotaka rawa na kena icolacola. Me da bilitaka na noda ivalavala ca vua na Turaga, ka kaya ni isolisoli vei keda ka sega ni rawa ni levei, sa ka vakaloloma ka ivakarau dadatuvu. Me da bilitaka na noda ivalavala ca vei ira na noda itubutubu kei na ivakarau eda susugi cake mai kina sa ivakarau ni tamata dau dro. Erau druka beka na nona itubutubu e dua; a sega beka ni vinaka na nona susugi cake mai e dua, ia ni da luvena tagane kei na yalewa na Kalou bula e tu vei keda na kaukauwa me da tubu sivita na veika eda sota kaya mai, me da veisautaka kina na noda bula.²⁴

Eda sa vakatakekere kina vei ira na noda ena veivanua kecega, “O koya mo dou qai vakamalumalumutaki kemudou vua na Kalou. Vorata na tevoro ena dro tani kina vei kemudou ko koya.” (Jemesa 4:7.) …

Era tu beka eso era sega soti ni logaloga vinaka ena vuku ni ituvaki ni vuravura kei na kena sa levu cake tikoga na butobuto ni ivalavala ca, sa kaya na Turaga, “… kevaka dou sa vakarau vakavinaka tu, dou na sega sara ni rere” (V&V 38:30), ka vakadua tale, “Au sa laiva vei kemudou na vakacegu.… Me kakua ni rarawa na yalomudou se rere.” (Joni 14:27.)²⁵

Me vaka ni da Yalododonu Edaidai sa dodonu me da na yadra tiko ena veigauna. Na sala me na taqomaki koya kina na tamata yadua kei na veimatavuvale mai na nona irabo kei na moto na Meca ka vakarautaki koya ki na siga sa levu ni Turaga sai koya me na tautauri matua tiko ki na ititoko kaukamea, me vakatovotovotaka na vakabauta levu cake, me veivutunitaka na nona ivalavala ca kei na nona talaidredre, ka vakaitavi vagumatua ena cakacaka ni Nona matanitu e vuravura, sai koya na Lotu i Jisu Karisito ni Yalododonu Edaidai. Sa koto kina na marau dina me baleti ira kece sara na luvena na Tamada.²⁶

Vakatutu ni Vuli kei na Veivakavulici

Vakayagataka na vakasama eso oqo ena nomuni vulica na iwase oqo se ena nomuni vakavakarau mo ni veivakavulici. Raica na tabana e v–ix, me baleta na ikuri ni veivuke.

Na ivakavuvuli cava nei Peresitedi Kimball me baleti Setani kei na nona iwalewale o ni kunea ni veivuke, na cava na vuna? (Raica tabana e 121–22.)
Raica lesu na iwase ka tekivu ena tabana e 122. Na sala cava e rawa ni vukei keda kina na Turaga me da vorata na ca? (Me kena ivakaraitaki, raica na italanoa ena tabana e 121.) Ena gauna cava beka o ni sa bau ciqoma kina na mataqali veivuke vakaoqo?
Wilika na italanoa ena tabana e 125. Na cava na nomuni nanuma e vakatara kina na tamata yauvoli oqo me curu yani ki na nona valelaca na kameli? Vakasamataka na sala e vorata kina na veitemaki na iVakabula (raica tabana e 125–26). Na cava beka eso na sala e rawa ni ra veivuke kina na itubutubu vei ira na luvedra me ra kila ka vorata na veitemaki lailai duadua sara mada ga?
Raica lesu na ikarua ni parakaravu taucoko ena tabana e 127. Veidutaitaka na iwalewale ni kena tarovi na ivalavala ca ki na iwalewale ni kena valuti.
E kaya ko Peresitedi Kimball, “Ena rawarawa duadua na kena vakatauci na lewa dodonu ni da vakatauca taumada” (tabana e 127). Na sala cava beka ena tara kina na noda bula na noda lewa taumada me da muria na ivakaro me vaka na Vosa ni Vuku? (Ena kena ivakaraitaki, raica na tabana e 127.) Na cava beka eso na lewa e veiwekani kei na bulataki ni kosipeli o ni sa vakatauca ka sega ni veisautaka?
Vakasamataka na nona vakadidike o Peresitedi Kimball me baleta na nona vuaka kei na nona bulumakau (tabana e 128–29). Na cava eda na rawata ena noda vakadinadinataka na noda malumalumu ka ciqoma na kena icolacola?

iVolanikalou Veiwekani: 1 Korinica 10:13; 1 Nifai 15:23–25; Ilamani 5:12; Ica 12:27; V&V 10:5

woman thinking — “ Kevaka eda na vakarorogo vua,[Yalo Tabu] ena veidusimaki, veivakauqeti, ka veivakasalataki, ka na vakamalumalumutaka na veivakauqeti ni vu ni ca.”

family studying scriptures — E kaya ko Peresitedi Kimball kevaka me da qarauni keda mai vei koya na vu ni ca, e dodonu “me da tautauri matua ki na ititoko kaukamea.”