Wase 15

E Dodonu Me Da Tamata Dauvakarokoroko

E uasivi cake mai na dua ga na ivakarau, na vakarokoroko sa ikoya e dua na itovo savasava ka dodonu me tiki ni noda ivakarau ni bula.

Na Bula nei Spencer W. Kimball

Ena yabaki 1955 e a vakatabuya kina o Peresitedi David O. McKay na imatai ni valetabu e Europe na Valetabu e Bern Switzerland. Ena nona a se lewe ni Kuoramu ni iApositolo Le Tinikarua tiko kina, o Elder Spencer W. Kimball, e a lesi me vosa ena soqoni ena yakavi ena imatai ni siga ni veivakatabui. E a vakayagataka e dua taucoko na auwa ena loma ni valetabu ena siga o ya e na “vakavakarau ni vakasama kei na yalo me baleta na yakavi, vakamalua, vakadirorogo, veidokai kei na vakarokoroko.“¹ Ena nona vosa e kaya kina: ”Niu yadra cake ena mataka edaidai ka tekivu meu kilai yaloqu tale ni oti na veika ena bogi, au raica ni sa toso sara tiko na mataka lailai, kau sa vakasamataka sara na valetabu ena vakatabui tiko edaidai. Au vakasamataka, ‘E sega na kana nikua. E dodonu me masi na ivava, me yani na isulu, ka me savasava tiko na noqu vakasama.’ Au nanuma meu sa na kakua sara ga ni vosa, ena ilakolako yani ki Zollikofen, ena gauna au curu yani kina ki na rumu ka dabe tikivi [Peresitedi McKay] e a qai vosa mai ena vakasolokakana vakalou, au kila ena gauna o ya niu a sa vakila tiko eso na ka e a vakila tale tikoga o koya. ‘Sa Tabu Me Nei Jiova, Sa tabu me veiganiti vata kei ira na Yalododonu ni Turaga.’ “²

E sega ni maroroya na nona vakarokoroko o Peresitedi Kimball me baleta walega na veigauna me vaka na vakatabui ni valetabu. E kaya ni vakarokoroko e dua na ivakarau ni bula, ka vakaraitaka na ivakavuvuli oqo, ena itavi qaravi lalai sara mada ga ni veisiga. E dua na kena ivakaraitaki, ena nona sikova yani e dua na valenisoqoni, e a curu yani vakamalua ki na dua na vale ni vakacegu, biuta ena benu na pepa ni iqusiqusi ka ra tu ena buturara, ka vakasavasavataka na siqi. E a raica sara na ivakaraitaki ni veidokai rawarawa vakaoqo e dua na iliuliu ni Lotu vakaitaukei. E na nona vakauqeti mai na ivakaraitaki oqo nei Peresitedi Kimball, e a vakatavulici ira kina eso tale me ra vakarokorokotaka vakalevu cake sara na veivanua kei na veika tabu.³

iVakavuvuli nei Spencer W. Kimball

Na vakarokoroko e sega ni dodonu me vagauna ka me qai dau taurivaki ga ena Sigatabu ia me dua na ivakarau ni sokalou kivua na Kalou ka me lako tu ga.

Na ivakamacala ni vakarokoroko sai koya e dua na “vakanananu se ivakarau ni bula ni veidokai titobu, loloma, kei na qoroqoro, me baleta e dua na ka tabu.“ Se na kena vakamacalataki me vaka e dua na sokalou kivua na Kalou sa ikoya oqori e dua tale na kena gaunisala me vakamacalataki kina na ibalebale ni vakarokoroko.

Era lewe vuqa sara na noda iliuliu era sa vakaraitaka na nodra nanuma me baleta na vakarokoroko sa ikoya ni vaka e dua na ituvaki cecere sara ni yalo, dusia tu ni tiko kina na vakabauta dina na Kalou kei na nona yalosavasava, ivakarau cecere, kei na lomana na veika vinaka sara ena bula.…

Me vaka na veivakavuvuli tale eso ni kosipeli, na vakarokoroko e tuberi keda ki na marau.

E dodonu me da nanuma tiko ni vakarokoroko e sega ni dua na yalomalua, ivakarau vinaka me vagauna ga ka me qai dau taurivaki ga ena Sigatabu. Na vakarokoroko dina e wili kina na mamarau, e vaka talega kina na loloma, na veidokai, na vakavinavinaka, kei na rerevaka na Kalou. E sa kilikili sara me dua na tiki ni ivakarau ni noda bula. E dodonu me ra tamata dau vakarokoroko duadua ena vuravura taucoko o ira na Yalododonu Edaidai.⁴

E dodonu me da vakarokorokotaka na Tamada kei na Luvena kei na Yalotabu.

Na vakarokorokotaki ni Tamana kei na Luvena sa ikoya e dua na itagede yaga se nodra ivakarau o ira era sa rawata na matanitu vakasilesitieli. Ena wase 76 ni Vunau kei na Veiyalayalati, ka kilai tu me “Na Raivotu,” ka a soli ena Feperueri 1832 kivei Josefa Simici kei Sidney Rigdon, eda raica ni:

“Keirau sa raica talega na iserau ni vuravura vakasilesitieli, ni sa uasivia sara na ka kecega—mai kea na Kalou ko Tamada, ena nona itikotiko vakaturaga me tawamudu;

“Ia era sa cuva ka vakarokoroko vua na ka kecega, ena nona itikotiko vakaturaga; io era sa vakarokorokotaki Koya tikoga me tawamudu.

“Ia ko ira sa tiko vata kei Koya era sa lewe ni nona lotu na Ulumatua; io era sa raica me vaka era sa laurai, ka kila me vaka era sa kila; io era sa vakasinaiti ena nona iserau kei na nona loloma.

“A sa solia vei ira ko Koya me ra taura vata ga ena kaukauwa, kei na lewa kei na lagilagi.” (V&V 76:92–95.)

E dua tale na ivakatakila ni gauna oqo e dusimaki keda me da taura matua ena vakarokoroko na yaca sara mada ga Vakalou; e tukuni vei keda me da kakua ni vakakcacana na yaca ni Tamada, ka me da muduka talega na kena vakayagataki wasoma. (V&V 107:2–4.) …

E irairai ni vakarokoroko me baleta na Kalou kei na yacana sa ikoya e dua na ka bibi duadua ena kena ivakatagedegede e rawa me da vakatubura.⁵

Ena dua na siga e valenibula e a vaqiqici au tani mai na rumu ni veisele e dua na dauveiqaravi ka a qai tarabe, e a lutu mai tebenigusuna ena cudru na ruru ca vata kei na nodra cokoti vata na veiyaca eso ni iVakabula. E dina ga niu sa sega tu ni vakilai yaloqu vakavinaka, ena mosi au vakamasuta: “Yalo vinaka! Yalo vinaka! Oqori sara ga na noqu Turaga o vosa vakacacataka tiko na yacana.”

E qai yaco e dua na vakanomodi titobu sara, oti o ya e a qai vakasolokakana mai e dua na domo malumalumu, “Vosoti au.” E a guilecava ena gauna o ya ni Turaga e a vakaroti ira vakaukauwa na nona tamata, “Mo kakua ni cavuta walega na yaca i Jiova na nomu Kalou; ni na sega ni vakadonui koya ko Jiova sa cavuta wale na yacana” (Lako Yani 20:7).…

Ena vanua ni vakatasuasua, ena talevoni, na daliga kei na mata dau ririko era vakasosataki e veisiga e na vakayagataki vakalolovirataki ni yaca ni Turaga na noda Kalou. Ena kalavo, ena were, ena veilasamaki vakailawalawa, ena bisinisi, kei na veitutu cava ga era vakayagataka na veiyaca ni Dauveivueti ena lecaika kei na ivalavala ca. Oi keda eda sega ni vakasamataka ka sega ni kauwaitaka, kei keda eda itovo ca ka dau talaidredre, e dodonu me da nanuma tiko ni sega ni rawa me da taura na yaca ni Turaga ena qaciqacia ka sega ni totogitaki. Eda sega beka ni sureta tiko me yaco na veivakarusai ena noda vakatara na veika taucoko e tabu ka vakalou, ena kena vakayagataki vakawaleni ka sega ni dokai ena noda veivosaki ena veisiga na veiyaca Vakalou? …

Sa dua na ka torosobu vua e dua na tamata bula me vakayagataka wale tu ga na veiyaca Vakalou ka sega ni doka. Kei na kena oqo e okati kina na kena vakayagataki wale tu ga na yaca ni Turaga ni sega na kena lewa, ka ra lewe vuqa na tamata era kaya ni ra sa ciqoma na ivakatakila ka vakakina na lewa ka ra sega ni taukena vakadodonu sara ga mai vua na Turaga.

Ena veiyabaki, era sega vakadua ni muduka na nodra cudruvaka na ivalavala ca bibi oqo o ira na parofita. E a kacivaka o Aisea na parofita me ra lewai ka veivutuni o ira era “sa bubului ena yaca i Jiova, ka sa dau cavuta na Kalou ni Isireli, ka segai ena yalodina, se na yalododonu” (Ais. 48:1).…

E dodonu me tiki ni noda bula me vaka ni da lewe ni Lotu me da cavuta tiko na yaca ni Turaga ena vakarokoroko. Me kena ivakaraitaki, eda sega ni dau vakatavako oi keda me vaka e dua na Yalododonu Edaidai vinaka. Eda sega ni dau gunu. Eda sega ni gunu ti kei na kofe. Ena gaunisala vata ga, eda sega ni vosataka na vosa dukadukali. Eda sega ni dau veirukaki se daukakase. Eda sega ni vakayagataka wale tu ga ena viavialevu na yaca ni Turaga. E sega ni dredre me da yaco me da daumaka sara ena noda muduka na ivakarau ni veirukaki, baleta ni kevaka e dua e sa qamu gusu ga ena gauna e rukaki kina ena veivosa caca kecega, e sa muria sara tikoga na gaunisala me vinaka mai kina ena veika o ya na nona bula.

Ia e sega ni mai cava ga e kea na noda itavi. Ena kena ibalebale o ya me da kua ga ni valavala ca. Ni da ivalavala dodonu, e dodonu me da cavuta na yaca ni noda Turaga ena vakarokoroko kei na yalosavasava ena noda masumasu, noda vunau, kei na noda veivosaki.…

E a yaco me noda Karisito o Jisu ena nona vakataucokotaka na nona bula. Na dra talei ni dua na kalou ka a dave, sa yaco kina o koya me noda iVakabula; e a solia kina nona bula ka taucoko tu, sa mani yaco kina o koya me noda Dauveivueti; na nona veisorovaki me baleti keda ka rawa kina me da lesu tale kivua na Tamada Vakalomalagi, ia e a sega ga ni bau vakasamataki, sega ni bau vakavinavinakataki mai vei ira era vakayagataka! E dua na ivalavala ca ni veitabagauna na sega ni dau vakavinavinaka.

Era lewe levu sara era vakatusa na nodra vakabauti koya kei na nona cakacaka, ka lewe lailai sara era dokai koya. E milioni vei keda eda vakatokai keda me da Lotu Vakarisito, ia e dau vagauna ga na noda tekiduru ena vakavinavinaka me baleta na nona isolisoli cecere duadua, na nona bula.

Me da soli keda tale mada ki na ivakarau ni vakarokoroko, vaka ki na cavuti ni vakavinavinaka kivua na noda Turaga me baleta na nona solibula e sega ni vakatautauvatataki rawa. Me da nanuma na ivakaro ni gauna oqo, “Ia me ra qarauna na tamata kecega me ra kakua ni cavuta wale na yacaqu” (V&V 63:61).⁶

E dodonu me ra vanua ni vakarokoroko na veivaletabu, na veivale ni soqoni, kei na veivale.

Ena dua tale na ka ka sa rui bibi dina sara, sa ikoya na nona vakasalataka na Turaga mai na ivakatakila ni gauna oqo ni sa dodonu me tu vei keda na ivakarau dina ni vakarokoroko me baleta na nona vale tabu. Ena ivakatakila bibi ka a soli kivei Josefa Simici ka kilai tu me masu ni vakatabui ni Valetabu e Kirtland, e dua na ivakasala e a soli ni oqo, me vaka na veivaletabu kece tale eso era a tara me baleta na Turaga, e dodonu me dua na vanua ka me vakarokorokotaki kina o Koya. (Raica V&V 109:13, 16–21.)

Na kena dodonu dina sara ga, na ka e tukuni me baleta na veivaletabu ni Lotu e dodonu me tukuni talega me baleta na “vale ni Turaga” yadudua, se na vale ni soqoni se vanua cava ga era sokalou kina na Yalododonu, se, ke dua sara mada ga na vale ni Yalododonu Edaidai.⁷

Kivei kemuni na Yalododonu Edaidai na vale ni sokalou e sega ni vanua ni vakacagicagi, se ena dua na rumu, ena dua na kacidrala, e sega ni dua na vanua e tiko kina na icabocabo ni isoro ni koula kei na veivatu talei. E sega ni dua na vanua ni vakaraitaki ka se sarasara, sega na matakau ceuceu ka sega soti sara na itaba, e ukutaki wale sara tu ga vakarawarawa ka vakadodonu, savasava ka rarama ka ganita na sokalou. Sa ikoya na vanua era dabe kina ena vakacegu na tamata, vakaveitacini dina, na vanua e vakatavulici kina na veilesoni, era lagasere kina na matasere, era masu ka vunau kina na lewenilotu, ka vanua era rawata taucoko mai kina na kila ka kei na veivakauqeti—kei na vanua era ciqoma kina na sakaramede na qase kei na gone. E vakasucumi, vakacaudrevi ka vakasavasavataki talega eke na vakabauta.

E a sega ni vakatabui na vale ni sokalou kivei ira na dausokalou vakafarisi ka ra kunei kina na mata ni yalobibi, yaloqa, se vakadigagalu batabata ka lala, ia na vakarokorokotaki ni veivanua vakalou, veinaki tabu, kei na tamata vakalou e dodonu me dau kunei e kea ena veigauna taucoko sara.⁸

Eda tamata dau vakarokoroko li? Na veika eda vakayacora ena noda vuvale kei na valenilotu e vakaraitaka tiko beka na noda vakarokorokotaka na noda Dauveibuli?

Eda lomatarotarotaka ena so na gauna. Ena noda dau tiko ena veisoqoni ni sakaramede kei na koniferedi ka ra dau veilakoyaki tu ga vakaveitalia na gone ena loma ni valenilotu. Ena gauna e vakayacori tiko kina na lotu, eda dau raica ni ra veitalanoa na uabula vata kei ira era dabe veitikivi, era moce na tamata ka ra vakasoqoni vata na itabagone ena veirumu e liu. Eda raica na veimatavuvale ni ra yaco bera mai ka lako vakasausa yani ki na nodra dui idabdabe, ka ra veitalanoa tu vakailawalawa ena domolevu ena loma ni valenilotu ni sa dau suka na soqoni.

E gole na noda vakasama kivei ira na dau vakadidike, itokani, kei ira era se malumalumu ka se qai tubu tiko na nodra ivakadinadina. Era sa iyaragi kaukauwa tiko beka ni kaulotu na noda veisoqoni me vaka na kena dodonu, na vanua e veiliutaki kina na Yalo ni Turaga ka laubasikata yani na uto? Se e dodonu beka me da vakatikitikitaka taumada e vuqa na lomaleqa sega na betena me rawa ni da vakila rawa kina na Yalotabu?⁹

E tamata cecere o koya e dau vakarokoroko. Ena dau veidokai o koya ena dua na lomanivale ni sokalou kevaka sara mada ga o koya duadua ga na tamata e tiko e lomanivale. E a sega na ivavakoso e soqoni ena gauna e a vakarota kina na Turaga vei Mosese: “Mo kakua ni toro voleka mai ki ke: mo luvata tani na nomu ivava mai na yavamu, ni sa qele tabu na tikina ko sa tu kina!” [Raica Lako Yani 3:5.] E dodonu me ra tuva vakamatau o ira na vakailesilesi vakatulewa ka me kakua sara ni dua na vakasolokakana me rogo se me laurai ena idabedabe mai cake. E dodonu me ra tuberi ira na luvedra o ira na itubutubu ka me ra bula vakaivakarau ka dabe vata kei ira (vakavo walega ena gauna era qaravi tiko kina ena nodra iwasewase vakalasi). E dodonu me ra liutaki ira na tamata ka kauti ira ena vakadigagalu ki na nodra idabedabe o ira era dau tu e matanikatuba ka me vakarauta ga na yavavala. E dodonu me ra yaco mai vakatotolo o ira na mai tiko ena soqoni, veikidavaki kei ira na itokani ena domo malumu, lako vakamalua, vakasaqarai ni idabedabe ena iyatu e liu, ka dabe sobu ena vakadigagalu ka me vakasama sara vakatitobu na itovo ni yalona. E dodonu me da vakaitavi taucoko sara ena kena levu ga e rawa—laga sere vata kei ira na dausere, masu vata kei koya e masu, vakaivotavota vata ena sakaramede ena yalo ni vakavinavinaka ka soli keda tale ki na veiyalayalati ka a vakayacori taumada. Sa soli tu e dua na gauna donu me da vakamuria vakavinavinaka kina na veilesoni era a vakatavulici, na veivunau ka ra vunautaki kei na veivakadinadina era wasei, e sega ni vakalewai ena kedra tukuni vakamatau ia ena kedra dina. Oqo sara ga e dua na gauna vinaka me da gunu vakatitobu kina mai vei ira na ivurevure iliuliu ni ivakavuvuli, ni na solia na qasenivuli se daunivosa yalomalua na vakasama ka rawa me veivakatuburi cake. Ni da curu yani ena vakadigagalu ena matanikatuba ni vale ni lotu e rawa ni da biuta laivi tu mai e tautuba na vakalelewa kece sara, na lomaleqa, kei na lomaocaoca—na veitavi taucoko, vakapolitiki, vakaveimaliwai, kei na veituvatuva ni veivakalasai—ka soli keda ena yalomalua ki na vakanananu kei sokalou. Ka rawa me da vakaivotavota ena veika vakayalo e vakavolivoliti keda tu. Ka rawa me da soli keda ki na vuli ka, veivutuni, veivosoti, vakadinadinataka, vakavinavinaka, kei na dauloloma.¹⁰

Me tekivu mai vale na vakarokoroko.

Ia, evei beka na vanua, me tekivu kina na vakarokoroko, ka na rawa vakacava me da vakatubura?

Na vuvale sa ikoya na iusutu ki na vakarokoroko, ka sa vakakina ki na veitovo savasava yadua vakalou tale eso.

Meu vakabibitaka mada na bibi ni nodra vakatavulici na gone me ra dau masu. Na masumasu vakayadua kei na matavuvale sa ikoya na gauna era dau vulica kina na gone me ra cuva sobu, roqota na ligadra, ka bobo na matadra ni da vosa tiko ki vua na Tamada mai lomalagi. Na itovo e vulici mai vale e vakaraitaka na ivakarau ena veisoqoni ni Lotu. E dua na gone e vakavulici ena masumasu e vale ena kila vakatotolo sara ni dodonu me dau vakadigagalu ka tiko vakadua ena gauna ni masumasu ena qaravi ni sokalou.

E vakakina, ena gauna ni lotu vakamatavuvale era tiki ni bula vakavuvale, era kila na gone ni tiko eso na gauna vakamareqeti, e sega walega ena lotu ia e vale sara mada ga, ena noda vulica na veika me baleta na Tamada Vakalomalagi kei na gauna e gadrevi kina me uasivi sara na nona ivakarau na tamata vakayadua.

E dua na ka marautaki ka vakamareqeti kivei ira na gone na ivakatagi. E rawa me yaco me kilai vakavinaka sara e vale na veisere ni lotu ka dau lagati vakawasoma e valenilotu. Ena rawa me yaga sara vei ira na gonelalai kevaka era vukei mai vale mai vei ira na nodra itubutubu me ra vulica na veisere ni lotu rawarawa. Ena gaunisala oqo, era na vakaitavi sara ena yalogu o ira na gone ena lagasere ena veisoqoni ni sakaramede kei na veisoqoni tale eso.

Io, e dodonu me ra dau tiko na itubutubu vata kei ira na luvedra ena veisoqoni vakalotu ena vei-Sigatabu.

E dodonu me rau cakacaka vata o tama kei tina ena nodrau vakadeitaka ni vakavakarau me baleta na veisoqoni sa ikoya e dua na ka taleitaki me ra dau vakayacora vata vakamatavuvale. Na veivakatotolotaki ena nodra vakasoqoni vata na gone, me ra vakaisulu, ka vakusakusa ki na soqoni e sa vakarusa sara tikoga na vakarokoroko.

Ni ra yacova na iwalewale oqo na veimatavuvale era na bera vakawasoma ki lotu, era sa dau cavuti kina na veivosa ni cudru ka vakamosi yalo, ka ra dau rarawa kina na gone ena veigauna ka ra tiko yavalavala kina ena gauna ni lotu. E sa wacava na levu ni vakarokoroko ena dua na matavuvale ka vakavakarau vakavinaka ni se bera na gauna ni soqoni, o ira era yaco ki na vale ni sokalou ni se bera na gauna me tekivu kina na soqoni, ka ra dabe vata ka vakarorogo ki na imatai ni sere ni lotu ka biuta tani kece tu mai na nodra vakasamataka na veika vakavuravura.

Ena so na gauna e sa dau dredre sara ga vei ira na itubutubu ka ra vakaluveni lalai me ra vukei ira na luvedra me ra marautaka na veisoqoni ka taqomaki ira mai na nodra veivakasosataki. Na yalo ni dauvakarorogo, yalodei, kei na vakavakarau mai vale era gadrevi sara vakalevu me rawa kina na ka oqo. Kevaka me ra lomaleqataka na nodra qarauni na luvedra e valenilotu, e rawa vei ira na itubutubu gone me ra taro ivakasala mai na dua na veiwatini ka ra sa lakova oti na veika oqo ena loma ni tabanalevu.

E dau vakawasoma, me ra dau sota vata na lewe ni Lotu ena vale ni lotu ka veivakabulataki, ni se bera na soqoni kei na gauna e sa dau oti kina. E so era raica ni tubu sega ni nakiti mai na veika tawayaga ena noda ivalavala vakatamata dauveitokani ka ni sai koya na Sigatabu sai koya e dua na gauna vinaka ni noda veisiko, veitokani, ka sotavi ira eso na tamata vou. E dodonu me ra ivakaraitaki na itubutubu ki vei ira na nodra matavuvale ena nodra cakava na nodra veisiko ena rumu e liu se ena veivanua eso ena taudaku ni vale ni sokalou ni bera na soqoni se ena gauna e sa oti kina. Ni oti e dua na soqoni, e rawa me ra veivuke na itubutubu ena kena kau na vakasama vakayalo mai na soqoni ki na vuvale ena kena veivosakitaki e vale vata kei ira na luvedra e dua na vakasama, e dua na sere ni lotu, se so tale na tikina veivakauqeti ena soqoni.¹¹

Na noda ivakaraitaki ni vakarokoroko e rawa me dua na veivakaukauwataki yaga kivei ira na tani.

Eda sa veivosakitaka oti na bibi ni vakarokoroko ka vakadikeva eso na kena ibalebale. Eda sa solia talega e vica na vakatutu me baleta na kena vakayacori na vakarokoroko e vale ka vakakina e valenilotu. Ia, na vakavinakataki ni nodra cakacaka na tamata, ena yaco mai ena gauna era sa cokotavata kina ena nodra sasaga me ra walia na nodra veileqa me baleta na vakarokoroko o ira na iliuliu vakaitaukei kei ira na matavuvale. Me da vakasamataka mada e dua na sasaga ena loma ni Lotu me vakatoroicaketaki kina na vakarokoroko.…

Na vakarokoroko dina sa ikoya e dua na itovo yaga sara vakalevu, ia e sa yali sara tikoga yani vakatotolo ena vuravura me vaka ni ra sa vakarabailevutaka na nodra veivakayarayarataki na kaukauwa ni ivalavala ca. E sega ni rawa me da vakasamataka rawa na kaukauwa ni vinaka e rawa me da rawata kevaka me da ivakaraitaki ni vakarokoroko oi keda na milioni na lewenilotu dina oqo i Karisito. Eda na sega ni raitayaloyalotaka rawa na ikuri ni iwiliwili ni bula e rawa me da tara. Ia, e bibi cake sara, sa ikoya na noda na sega ni raica rawa na levu ni rawa ka vakayalo ena noda matavuvale kevaka eda yaco me da tamata dauvakarokoroko me vaka na ka eda kila ni dodonu me da vakakina.¹²

Vakatutu ni Vuli kei na Veivakavulici

Vakayagataka na vakasama eso oqo ena nomuni vulica na iwase oqo se ena nomuni vakavakarau mo ni veivakavulici. Raica na tabana e v–ix, me baleta na ikuri ni veivuke.

Raica lesu na veivakaraitaki ni vakarokoroko ena tabana e 181 Na cava e vakatututaka e rua na italanoa oqo me baleta na ibalebale ni vakarokoroko? Na veivakaraitaki ni vakarokoroko cava soti o ni sa bau raica ena nomuni bula? Na cava o ni sa bau vulica mai na veika o ni sotava oqo?
Raica lesu na imatai ni va na parakaravu ena tabana e 183, vakasaqara ena ivakavuvuli nei Peresitedi Kimball se cava na vakarokoroko kei na cava na sega ni vakarokoroko. Na cava na vuna e dodonu kina “me ra tamata dau vakarokoroko duadua ena vuravura taucoko” o ira na Yalododonu Edaidai?
Na cava na nomuni nanuma me baleta na noda raica e dua ka cavuta wale na yaca ni Turaga? Na cava o ni vulica mai na ivakaraitaki nei Peresitedi Kimball? (Raica na tabana e 185. Na cava e rawa ni da cakava me dokai kina na yaca ni Turaga?
Raica lesuva na tabana e 186–89, vakasaqara tiko na vei ivalavala kei na ivakarau ni vakarokoroko kei na ivalavala kei na ivakarau tawayaga. Ena veigaunaisala cava soti e rawa me vakayarayarataki keda yadua kina na ivalavala kei na ivakarau vakaoqo? E rawa vakacava me ra vakayarayarataki ira na noda veimatavuvale kei ira tale eso? Vakasamataka na cava e rawa mo ni cakava vata kei ira na nomuni matavuvale me rawati kina na vakarokoroko e valenilotu.
Na cava o ni nanuma e rawa me ra cakava na itubutubu e vale me vukei ira na luvedra me ra vinakata me ra vakarokoroko ena gauna ni soqoni ni sakaramede? ena veisoqoni tale e so kei na itavi qaravi ni Lotu? (Raica na veivakaraitaki ena tabana e 188–91.)
Vulica na iotioti ni rua na parakaravu ena iwase (tabana e 192). Ena veigaunisala cava soti e rawa me vakatorocaketaka na vakayarayarataki ni vakarokoroko ena noda veimatavuvale? noda itikotiko?

iVolanikalou Veiwekani: 1 Tui 6:1, 7; Maciu 21:12–14; Alama 37:14–16; V&V 63:61–62, 64

celestial room — Na rumu vakasilesitieli ena Valetabu mai Mount Timpanogos Utah. E vakatavulica o Peresitedi Kimball ni valetabu “e dodonu me dua na vanua ni vakarokoroko.”

sacrament meeting — E vakatavulica o Peresitedi Kimball ni “sucu mai kina na vakabauta, veivakauqeti, ka veivakasavasavataki ”ena veivale ni sokalou ni Yalododonu Edaidai.

mother and children praying — “Na itovo e vulici mai vale e na vakaraitaki ena ivakarau ena veisoqoni ni Lotu.”