Wase 3

Jisu Karisito: Noqu iVakabula, Noqu Turaga

E Luve ni Kalou o Jisu Karisito ka sa iVakabula ni kawatamata, ka rawa me da ciqoma na veivakalougatataki e a bula ka mate kina o Koya, e solia vei keda.

Na Bula nei Spencer W. Kimball

Ena itekivu ni nona veiqaravi vaka-iApositolo e a tauvimate ni uto vakatolu ena loma ga ni rua na macawa o Elder Spencer W. Kimball. Ni oti toka e volekata na vitu na macawa na nona vakabulabula tiko e vale, e sa tekivu me vakaraica eso na sala me lako tani mai na bibi ni nona dodonu me tikoga e vale.” E a saga me laki vakabulabula ga vei ira na nona itokani na Navajo mai na vanua o New Mexico.¹

“Ena dua na mataka lailai ni nona laki tiko vakabulabula oqo, a kunei ni sa yali o Elder Kimball mai na nona idavodavo. Ena kena nanumi ga ni a taubale vakamataka lailai ka na qai donumaka mai na katalau, era sa mani dui cakava ga na nodra cakacaka o ira na nona dauveiqaravi. Era sa tekivu taqaya ni sa 10:00 na kaloko ena mataka o ya, ka se bera ga ni lesu mai, sa tekivu sara e dua na vaqaqara.

“E a qai laki kune sara o koya ena vica na maile yani ki liu ena dua na ruku ni vuni paini. A toka e yasana na iVolatabu, ka cegai toka ki na iotioti ni wase ni ivola i Joni na yalododonu. E a bobo toka o koya, ena gauna era sa yacovi koya yani kina ka a toka ga vakadua me vaka ga na imatai ni gauna era a kunei koya kina.

“E a kidacala o koya ena nodra ivosavosa taqaya, ia ena gauna e duri cake mai kina era raica na wai ni matana. Mai na nodra vakatataro, a sauma kina o koya, ‘Ena lima na yabaki sa oti ena siga vata nikua au a kacivi kina meu dua na iApositolo ni Turaga o Jisu Karisito, kau vinakata meu mai tiko vata kei Koya nikua kau sa vakadinadinataka tiko.’ ”²

E a vakadinadinataka “ena veigauna kecega” o Peresitedi Kimball na lagilagi vakalou ni iVakabula.³ A kaya o koya: “Se cava ga na vakaitamera ni veika eda tukuna me baleti koya, e se takiveiyaga tikoga.”⁴ Na vinaka ni nona bula o Peresitedi Kimball sa veiraurau vinaka kei na kaukauwa ni nona ivakadinadina. E a vakaraitaka o Elder Neal A. Maxwell ena Kuoramu ni iApositolo Le Tinikarua: “Sa tamata ni Turaga o Peresitedi Kimball ka sega ni nona tale e dua. Sa nona gagadre titobu me qarava na Turaga ka a cata sara me rawai ena veika tale eso.”⁵

iVakavuvuli nei Spencer W. Kimball

E sega walega ni dua na qasenivuli cecere o Jisu Karisito, sa Luvena na Kalou bula ka iVakabula ni kawatamata.

E a tabaki ena niusipepa na Time ena dua na gauna lekaleka sa oti, ka vakamacalataka kina vakamatata e dua na parofesa vakacegu mai na dua vei ira na noda univesiti levu na nona vakasama. E kaya ni dauveikauwaitaki ko Jisu na kai Nasareci ka sa tu vua na loloma vakaitamera, ka kilai keda vakavinaka. E vakatokai koya me dua na dauveiqaravi cecere duadua, e dua na qasenivuli levu, e dua na dau ni ivakaraitaki. E dua na kena ivakaraitaki, a vakamacalataka o koya ni ko Lasarusa e a sega ni mate ia a moce “… walega ka a ‘vakabulai tale’ mai vei Jisu, ena kaukauwa ni vakasama kei na vuli, kei na “veivakasavasavataki ni nona gugumatua vakaikoya!’ ”

Au gadreva meu vakadinadinataka edaidai ni o Jisu e sega walega ni dua na qasenivuli cecere, se dua na dauveiqaravi cecere duadua, ka dua na dau ni ivakaraitaki cecere, ia sai koya vakaidina, na Luve ni Kalou Bula, na Dauveibuli, na Dauveivueti kei vuravura, na iVakabula ni kawatamata.⁶

Au kila ni ko Jisu e Karisito ka Luve ni Kalou bula. Au kila ni dina oqo.⁷

Sa vakaraitaka mai na Karisito ni sai koya na Turaga na Kalou Cecere, na ivakatekivu kei na ivakataotioti, na Dauveivueti kei vuravura, o Jisu Karisito, na Qaqa ni Isireli, na Dauveibuli, na Luvena na Kalou Bula, o Jiova.

Na Tamada o Iloimi sa vakaraitaka ni ko Jisu na Luvequ e Duabauga, na vosa ni noqu kaukauwa. Ia a vakaraitaka taumada vakarua, ena veipapitaisotaki ena Joritani ka vakakina ena Ulunivanua ni Veivakamataliataki:

“O iko na noqu Gone ni Toko; au sa dau vinakati iko vakalevu” (raica Marika 1:11; Luke 3:22) ka a vakaraitaka ni sa bulia na vuravura kecega ko Koya: io sa buli ira talega na tamata: Raica sa bulia na ka kecega ko Koya, era sa buli ena vukuna, ka sa buli ira ko Koya.” [Raica V&V 93:10.]⁸

Eda vakadinadinataka vata kei Joni na Dauveipapitaisotaki, o koya ka a kaya me baleta na Turaga ni sa toro voleka mai vua: “…Raica na Lami ni Kalou, ko koya sa kauta tani na nodra ivalavala ca na kai vuravura.” (Joni 1:29.) Sa sega walega ni dau veikauwaitaki, ia sa Lami ni Kalou.

Eda vakadinadinataka vata kei Nacanieli, e dua na kai Isireli sa sega vua na ka ca: “… Vakavuvuli, koi kemuni na Luve ni Kalou; koi kemuni na nodra Tui na Isireli.” (Joni 1:49.) Sa sega walega ni dua na qasenivuli cecere, ia sa ikoya na Luve ni Kalou.

Eda sa vakadinadinataka vata talega kei Joni na daulomani, o koya ka a raici Jisu e baravi, ka kaya mai e yalona dina, “Na Turaga bagi oqo!” [Raica Joni 21:7.] Sa sega walega ni dua na dau veikauwaitaki cecere, ia sa Turaga na Kalou ni lomalagi.

Io, kivei Saimoni Pita, ka a tarogi mai vua na Turaga, “Ia dou sa kaya se ko cei koi au?” ka kaya, “Oi kemuni na Karisito, na Luve ni Kalou bula,” (Maciu 16:15, 16), ka a rogoca oqo mai vua na iVakabula: “… O sa kalougata, Saimoni Pa-Jona: ni sa sega ni vakatakila vei iko na lewe kei na dra, na Tamaqu ga sa tiko mai lomalagi.” (Maciu 16:17.)

Ka kena itinitini, eda sa vakadinadinataka vata kei na Parofita o Josefa Simici o koya ka a tu vakarau me solia na nona bula ena vuku ni nona ivakadinadina.⁹

Au kila ni ko Jisu Karisito sa Luve ni Kalou bula ka a mate ena vuku ni ivalavala ca kei vuravura. Sai koya na noqu itokani, na noqu iVakabula, noqu Turaga, ka noqu Kalou.

Na nona cakacaka na iVakabula e curuma yani na veigauna tawamudu—ena gauna sa oti, ena gauna oqo, kei na gauna sa bera mai.

Au gadreva meu … vakadinadinataka ni ko [Jisu Karisito] e a sega walega ni bula ena gauna cecere duadua ni tolusagavulu katolu na yabaki, ia a bula tu ga mai o koya ena veitabagauna tawamudu taumada, ka na bula tawamudu tikoga; kau sa vakadinadinataka ni a sega walega ni a mai tauyavutaka na matanitu ni Kalou e vuravura, ia e Dauveibuli kei vuravura, ka Dauveivueti ni kawatamata.¹¹

O Jisu Karisito na Kalou ena Veiyalayalati Makawa, ka sai Koya ka a veivosaki kei Eparaama kei Mosese. Sai Koya ka a vakauqeti Aisea kei Jeremaia; sai Koya ka a parofisaitaka vei ira na Nona tamata na veika ena yaco ena veisiga ni mataka, ka yacova sara na iotioti ni siga kei na auwa.¹²

O Jisu Karisito, sai Koya na noda iVakabula, ka a vakatakilai vei ira era vakarorogo tu e kea e Joritani (raica Maciu 3:13–17), ena Ulunivanua tabu ni Veivakamataliataki (raica Maciu 17:1–9), ena nodra valetabu na Nifai (raica 3 Nifai 11–26). Kei na veikau mai Palmyra, e New York [raica Josefa Simici—Ai Tukutuku 1:17–25]; kei Koya sara ga na tamata e veivakilaitaki, ka ni a sega tale ni dua, ka sai koya na Tamana dina, na Iloimi tabu, ka sai koya ka ucuya o koya ka sa ikoya talega ka a vakayacora na lomana o koya.¹³

Au kila ni bula tiko na Turaga kau kila ni sa vakatakila tiko mai ena veisiga yadua na nona lewa, ka me rawa kina me da vakauqeti ki na salatu me da muria yani.¹⁴

Sai Koya na ivakadei ena tutu ni vale. Sai Koya na iliuliu ni matanitu—sai ira oqo na nona tisaipeli—oqo na nona Lotu—oqo na nona vunau kei na cakacaka tabu vakalotu—oqo na nona vunau.¹⁵

Eda sa nanamaki tiko oqo ki na ikarua ni nona lesu mai me vaka ga a yalataka o koya. Na yalayala oqo ena yaco vakaidina me vaka ga e vuqa na nona yalayala tale eso, ia ena gauna oqo, me da vakacaucautaka na yacana tabu ka qaravi koya, ka vakadinadinataka vata kei ira na parofita ki na veitabagauna na vakalou ni nona ilesilesi! …

Au kila ni ko Jisu sai koya na Dauveibuli, na Dauveivueti, na iVakabula, na Luve ni Kalou, ena loma ni veigauna tawamudu sa oti kei na veigauna sa bera mai.¹⁶

Mai na Nona Veisorovaki, sa vakabulai ira kece kina na tamata o Jisu Karisito mai na ca ni Lutu ka vakabulai ira sa veivutuni mai na nodra ivalavala ca.

Kemuni na taciqu kei na ganequ daulomani, e bula tiko na Kalou, kau sa vakadinadinataka. E bula tiko o Jisu Karisito, ka sai koya na ivurevure ni salatu dina ni bula kei na veivakabulai.

Oqo na itukutuku ni Lotu i Jisu Karisito ni Yalododonu Edaidai. Sai koya na itukutuku bibi duadua e vuravura edaidai. Sa Luve ni Kalou o Jisu Karisito. E a digitaki Koya o Tamana me iVakabula kei vuravura.¹⁷

Ena gauna a digitaka ka lewa kina vakamatau o Atama me kania na vuanikau vakatabui mai na Were ko Iteni, e a vakadewataka kina vei keda kece sara, na nona kawa, e rua na mate— na kena e vakayago se “mate vakayago,” kei na mate vakayalo se na muduki tani mai na itikotiko ni Turaga.¹⁸

Ena nona ituvatuva vakalou na Kalou, sa vakarautaki kina na ituvatuva me sereka kina na ivau ni mate e dua na dauveivueti, ka rawa ga ena tucaketale, na cokoti vata tale ni yalo kei na yago ni tamata kecega ka a bula voli e vuravura.

Sai Jisu Karisito ga na kai Nasareci, ni se bera ni buli o vuravura, a digitaki me tadu mai ki vuravura me mai vakayacora na cakacaka oqo, me mai valuta mate na mate vakayago. Na cakacaka ni solibula oqo ena sorovaka na nodrau lutu o Atama kei Ivi ka sa rawa kina vua na yalo ni tamata me taura tale na yagona, ka sa na duavata kina na yago kei na yalo.¹⁹

Na tucake tale ka tukuni tiko oqo sai koya na cakacaka i Jisu Karisito, na iVakabula, me baleta ga ni a tamata o koya (na luvei Meri) ka vakalou (na Luve ni Kalou), sa rawa kina me vorata rawa na kaukauwa e lewa na yago. E a solia vakaidina na Nona bula ka taura talega vakataki koya me “kena isevu,” vei ira na yalo yadudua era a bula voli [raica 1 Korinica 15:22–23]. Ni sa Kalou, a solia kina na nona bula. Ena sega ni rawa me dua e kauta tani mai vua. Sa tara cake o koya, mai na nona rawa ni vorata na veika kecega; na kaukauwa me taura lesu tale na nona bula. Sa iotioti ni nona meca o mate, e a vorata talega na ka o ya ka tauyavutaka na tucaketale.²⁰

Ena vuku ni isolisoli nei Tamada Vakalomalagi o ya na Luvena sa rawa kina vua na tamata kecega—ena veigauna sa oti, na gauna oqo, kei na veigauna sa bera mai—me ra lesu tale ka laki bula vata kei Koya na Tama ni yaloda. Ia ni vakadeitaki na kena rawa ni yaco, sa dodonu taumada me tadu mai ki vuravura o Jisu ena yago me mai vakatavulici ira na tamata ena Nona ivakaraitaki ni sala dodonu ni bula ka sa lomana dina me solia na Nona bula ka ciqoma ena so na sala veivakurabuitaki na icolacola bibi ni ivalavala ca ni kawatamata.²¹

Ena sega ni rawa me vakasavasavataki na ivalavala ca vakavo ga ena taucoko ni nona veivutuni e dua na tamata kei na loloma vakalou ni Turaga o Jisu Karisito ena nona solibula ni veisorovaki. Ena ituvatuva duadua ga oqo ena rawa ni vakabulai kina na tamata, me bula mai na mate ka vakasavasavataki ka vakavinakataki, ka se rawa tikoga me taukena na lagilagi ni bula tawamudu. Ena Nona itavi na iVakabula ena ka oqo, e a vakavotuya kina o Ilamani vei rau na luvena na nona vosa o Penijamini naTui:

“ … Sa sega tale e dua na sala se kaukauwa me bula rawa kina na tamata, na isoro duadua ga i Jisu Karisito, o koya ena lako mai; io mo drau nanuma ni na lako mai ko Koya me vakabulai ira na kai vuravura.” (Ilamani 5:9.)

Kei na nona nanuma na vosa i Amuleki vei Sisoromi, a vakamatatataka kina o Ilamani na itavi ni tamata me rawata kina na veivosoti—o ya me veivutunitaka na nona ivalavala ca:

“ … Sa kaya vua ni na lako vakaidina mai na Turaga me vakabulai ira na nona tamata; ia e sega ni lako mai me mai vakabulai ira ena nodra ivalavala ca; ia me mai vakabulai ira ga mai na nodra ivalavala ca.

“A sa solia vua ko Tamana na kaukauwa me vakabulai ira kina mai na nodra ivalavala ca kevaka era sa veivutuni.…” (Ilamani 5:10–11. Vakuri ena vosa kala.)²²

Sa mai mate (na iVakabula) me ivoli ni noda ivalavala ca me dolava kina na sala ki na noda tucaketale, ka vakaraitaka e dua na sala me da vinaka sara, me vakaraitaka na salatu ki na bula vakalou. E a vakainaki na Nona mate, ka Nona digidigi ga. E a sucu mai vakaloloma ka uasivi sara na nona bula, e a veivakauqeti na nona ivakaraitaki, na nona mate e dolava na veisalatu, ka solia vua na tamata na isolisoli kei na veivakalougatataki vinaka.²³

Me da ciqoma na taucoko ni veivakalougatataki ni nona Veisorovaki na iVakabula, e dodonu me da duavata kei Koya ena cakacaka.

Na tamata yadua e tiko na nona galala ni digidigi. Sa rawa vua me taukena na veivakalougatataki e a mai bula ka mate kina na Karisito me rawa kina ni solia vua. Ia na nona mate kei na ituvatuva i Karisito ena tawayaga ka sega na betena kevaka eda na sega ni saga me da taukena: “Raica koi au na Kalou, au sa vosota oti na veika oqo, me ra bula kina ko ira era sa veivutuni” (V&V 19:16).

E lako mai na iVakabula “me ra tucaketale mai na mate na tamata kecega” (Mosese 1:39). Na Nona sucu, mate kei na tucaketale era a kunea kina na kena imatai. Ia e dodonu me da duavata kei Koya ena cakacaka me yaco kina na kena ikarua, me ra rawata na bula tawamudu.²⁴

Ni da vakasamataka na solibula cecere ni Turaga o Jisu Karisito kei na rarawa a vosota me baleti keda, eda na vakawalena kevaka eda na sega ni taleitaka ka vaka me da a vakayacora ga vakataki keda. E a vakararawataki ka mate ena vukuda, ia kevaka eda na sega ni veivutuni, sa na qai sega ni yaga na nona rarawa kei na mosi me baleti keda.²⁵

Na Nona vakararawataki taumada ka vakakina ena kauveilatai kei na Nona solibula cecere ena takiveiyaga se sega ni yaga vei keda vakavo ga ke da bulataka na nona vunau. Ni a kaya o koya:

“ … ka vakaevei ni dou sa vakatokai au me Turaga, ka sega ni cakava na ka kau sa kaya?” (Luke 6:46.)

“Kevaka dou sa lomani au, dou talairawarawa ki na noqu vunau.” (Joni 14:15.)²⁶

O ira na tamata era kila na Kalou ka lomani koya ka bulataka na nona vunau ka vakayacora na nona cakacaka tabu vakalotu dina, sa rawa me ra raici koya ka kila ni bula tiko o koya ena bula oqo, se ena bula sa roro tiko mai ka ra na veiwekani vata kaya tiko.²⁷

Eda sa vakabauta, ka sa noda ivakadinadina, ka da sa vakatakila vakakina ki vuravura ni “sa sega tale ni dua na yaca se na sala se ivakarau sa soli me ra bula rawa kina na luve ni tamata na yaca duadua ga i Karisito na Turaga Kaukauwa Sara” (Mosaia 3:17).

Eda sa kila, ka sa noda ivakadinadina, ka da sa vakatakila talega vakakina ki vuravura ni dodonu vua na tamata me “vakabauta ni sa rawa duadua ga na bula ena vuku ni dra ni soro i Karisito na Turaga Kaukauwa Sara” (Mosaia 3:18) me rawa kina na nona vakabulai.

Sa vakakina vei Nifai “eda sa cakacaka vagumatua me da vola na veika oqo, me da vakauqeti ira kina na noda kawa kei ira talega na wekada me ra vakabauti Karisito ka veivinakati tale kei na Kalou, ia eda sa kila ni da sa vakabulai ena loloma walega, ka segai ena vuku ni cakacaka.…

“Ia eda sa tukuni Karisito, rekitaki Karisito, ka vunautaki Karisito, ka parofisaitaki Karisito, ia eda sa vola na ka sa vakatakilai vei keda, me ra kila kina na noda kawa na sala me bokoci kina na nodra ivalavala ca.” (2 Nifai 25:23, 26; vakuri ena vosa kala.)²⁸

Eda na vakalomavinakataka na Turaga ni da bulataka na Nona kosipeli.

Au rawa ni raitayaloyalotaka na Turaga o Jisu Karisito [ena gauna ni nona veiqaravi e vuravura,] ni mata mamarau vei ira na nona tamata ni ra veiqaravi tiko ena yalodina.…

… Au vakabauta ni mata mamarau na Turaga o Jisu Karisito ni raica yani na nodra vuvale na tamata oqo ni ra tekiduru ena masu vakavuvale ena veibogi kei na mataka lailai, ka ra vakaitavi talega na gone. Au vakabauta ni dau mata mamarau ni raici ira na veiwatini gone kei na qase era veivinakati dina vakaiira, ka ra tomana tikoga na nodra veimusumusuki … ka ra tomana tikoga na nodra veilomani ena yalodra taucoko me yacova na siga era na mate kina ka toroya cake tikoga yani ki na veigauna tawamudu.

Au vakabauta ni marautaka o koya na matavuvale era solibula ka ra lomasoli.… Au vakabauta ni dau mata mamarau na Turaga o Jisu Karisito ni rai sobu mai ka raici ira na [udolu] era a luluqa tu ena dua na yabaki sa oti, ia edaidai era sa tiko marau ena matanitu, ka vuqa vei ira era sa lesu mai na valetabu ni Kalou ka ra sa vakaedaumeni ka vauci vata, ka ra a vakavinavinakataka na Turaga ena tagi ni marau me baleta na nona parokaramu.

Au vakabauta niu raica e matana na tagi ni marau ka a matadredredre ni raici … ira na yalovou era sa lako mai vua ena yabaki oqo, o ira era sa dau tukuna na yacana, o ira era sa sudra yani ki na wai ni papitaiso, kau vakabauta ni lomani ira ka vukei ira me ra saumaki mai.

Au a raica ni matamamarau ni raici ira yani e vuqa na nona tamata ni ra tekiduru ena veivutuni, veisautaka na nodra bula, me rarama ka savasava cake, me vakataka na Tamada Vakalomalagi kei na tuakadra o Jisu Karisito.

Au vakabauta ni a lomavinaka ka mata mamarau ni raici ira na itabagone ena nodra vakarautaka na nodra bula ka taqomaka ka vaqaqacotaka mai na itovo ca ni veisiga. Au vakabauta ni a rarawa taumada ka qai lomavinaka, ena gauna sa raica kina, me vaka e a vakayacora ena noqu valenivolavola ena vica na siga sa oti, vei rau e rua na veiwatini gone erau a cala bibi ka rau sa mai tekiduru vata ka rau qumia vata sara vakaukauwa na ligadrau. E a rairai kune e matana na marau ni raica sobu mai na yalodrau ka raica ni rau sa vakayacora eso na veisau, ena gauna vata e luvuci kina na ligaqu ena wainimatadrau kau a vakataqara yani vakamalua e ligadrau.

Au sa lomana vakalevu na Turaga o Jisu Karisito. Kau nuitaka niu na rawa ni vakaraitaka ka vakatakila vua na noqu dina kei na gugumatua. Au vinakata meu tikoga e yasana. Au vinakata meu vakataki koya, ka sa noqu masu ni na vukei keda kece na Turaga me rawa kina me da vakataka na nona a kaya vei iratou na nona tisaipeli na kai Nifai, “Ia a cava na ivalavala sa kilikili kei kemudou?” a qai sauma ga na nona taro vakaoqo, “Mo dou vakataki au.” (3 Nifai 27:27.)²⁹

Na Veisorovaki sa noda inuinui ena bula oqo kei na bula tawamudu sa roro tiko mai.

Sa noda inuinui eke kei na gauna oqo o Karisito. A mate o Koya ena vuku ni noda ivalavala ca. Ena vukuna ga kei na nona kosipeli sa boko laivi kina na noda ivalavala ca ena wai ni papitaiso; sa tagutuvi tani mai na yaloda na ivalavala ca kei na caka cala me vaka ga e vakamai; sa yaco kina me da savasava, makare na vakasama, ka rawati na vakacegu sa uasivia na ka kecega e kilai rawa. (Raica Filipai 4:7.)

Eda na kune vinaka eke ka tuvaki vinaka na yagoda ka qaqaco na noda vakasama ena kena bulataki na ivakaro ni Kosipeli. Sa vakalougatataki keda tiko edaidai na kosipeli.

Ia edaidai sa dua ga na mata ni nuku ena veitabagauna tawamudu. Sa noda inuinui talega o Karisito ena vuku ni veitabagauna tawamudu sa tu mai liu; kevaka e sega eda na yaco me vaka a kaya o Paula ni da sa “vakaloloma vakalevu cake vei ira kecega na tamata” (1 Korinica 15:129).

Ena vakaitamera na noda rarawa—ka na yaco vakaidina— kevaka e a sega na tucaketale! Sa na vakacava na levu ni noda veilecayaki kevaka me a sega na inuinui ni bula tawamudu! Kevaka me na takali yani na noda inuinui me da vakabulai ka votai ena veika tawamudu, eda sa na qai rarawa vakalevu cake mai vei ira era a sega tu ni namaka na veika oqo.

“Ia ka sa qai tucake tale mai na mate na Karisito, a sa yaco me kedra isevu era sa moce tu” (1 Korinica 15:20).

Ia na mana ni nona tucaketale ena yaco vei ira na tamata kecega, “ni sa qai mate kecega ena vuku i Atama, ena vakabulai kece talega ena vuku i Karisito” (1 Korinica 15:22).

Ia oqo “ni da sa vakataki koya sa vakavuravura, eda na vakataki koya talega sa vakalomalagi” (1 Korinica 15:49).

Ia oqo sa vakarautaki na kena ituvatuva me “sa vakaisulu oti … me kakua tale ni vuca rawa, ka sa vakaisulu oti na yago mate oqo … me kakua tale ni mate rawa, ena qai vakayacori kina na vosa sa volai, Sa guce ko mate, a sa muduki sara” (1 Korinica 15:54).…

Eda sa vakanuinui tawamudu vua na Karisito. Eda sa kila ni sa soli vei keda na bula oqo me da vakarautaki keda ki na bula tawamudu, ka “na laki dei tale tu ga mai kea na ivakarau ni noda veimaliwai tu eke; ia sa na uasivi ka lagilagi sara mai kea; oqori na ka e sega ni yaco tiko qo vei keda” (V&V 130:2).³⁰

Vakatutu ni Vuli kei na Veivakavulici

Vakayagataka na vakasama eso oqo ena nomuni vulica na iwase oqo ena nomuni vakavakarau mo ni veivakavulici. Raica na tabana e v–ix, me baleta na ikuri ni veivuke.

Wilika na italanoa ena tabana e 27. Ena sala cava eda na rawa ni toro voleka kina vua na Turaga ka “tiko vata kei Koya nikua” me vaka a vakayacora o Peresitedi Kimball?
Raica lesu na tabana e 28–29, ka vakasaqara na yaca kei na itutu i Jisu Karisito a vakayagataka o Peresitedi Kimball. Na yaca kei na itutu cava i Jisu Karisito e vakaibalebale vakalevu cake vei kemuni kei na vuna? Na cava mo ni na kaya vua e dua e tukuna ni ko Jisu e a dua walega na qasenivuli?
Tugana na ivakadinadina i Peresitedi Kimball me baleta na ilesilesi ni iVakabula ena bula taumada, bula oqo, kei na bula sa roroa mai tabana e 30–31. Vakasamataka na veika o ni na rawa ni cakava mo ni vaqaqacotaka kina na nomuni ivakadinadina me baleta na ilesilesi ni iVakabula.
Vulica na tabana e 31–33, ka vakasaqara na vuna eda gadreva kina e dua na iVakabula. Na veisau cava sa vakayacora na Veisorovaki i Jisu Karisito ena nomuni bula?
Ena tabana e 31–33 e vakadinadinataka kina o Peresitedi Kimball na veika ena vakayacora vei keda na iVakabula. Ena tabana e 33–37, eda vulica kina na veika me da cakava me da ciqoma kina na taucoko ni veivakalougatataki ni Veisorovaki. Na cava o ni nanuma ni ko ni veidutaitaka na veika sa vakayacora vei keda na iVakabula ki na veika e sa kerea o Koya vei keda me da vakayacora?
Raica lesu na ivakamacala nei Peresitedi Kimball me baleta na sala ena rawa ni vakalomavinakataki kina na Turaga (tabana e 35–36. Vakasamataka na ituvaki ni yalomu ni ko ni kila ni sa marautaki kemuni na Turaga.
E vakavulica o Peresitedi Kimball ni da rawa ni vakanuinui ga vei Karisito ena gauna oqo kei na veitabagauna tawamudu sa roro tiko mai (tabana e 36–37. E dau veisau vakacava na bula ni tamata ni ra sa vakanuinuitaka na Karisito?

iVolanikalou Veiwekani: Joni 14:6, 21–23; 2 Nifai 9:5–13, 21–23; Moronai 7:41; 10:32–33; V&V 19:15–19

Jesus Christ — “Au kila ni Luve ni Kalou Bula, ko Jisu na Karisito.”

resurrected Christ — “Sa iotioti ni nona meca o mate, e a vorata rawa talega na ka o ya ka tauyavutaka na tucaketale.”