Wase 9

Vosoti Ira na Tani mai Vu ni Yaloda

Sa vakaroti keda na Turaga me da dau vosoti ira na tani me rawa ni da qai vosoti kina mai na noda ivalavala ca ka vakalougatataki ena vakacegu kei na marau.

Na Bula nei Spencer W. Kimball

Ni vakavuvulitaka o Peresitedi Spencer W. Kimball na kena vakasaqarai na veivosoti, a vakabibitaka talega na ivakavuvuli bibi ni noda vosoti ira na tani. Ena nona kerekere, vakabibi vei ira na tamata kecega me ra dau segata me ra vakatorocaketaka na yalo ni veivosoti, a tukuna kina na veika a sotava oqo:

“Au a sotava tiko na dredre ena vuku ni dua na leqa ni bula vakaitikotiko ena dua na tabanalevu lailai … erau a veilecalecavi ena dua na veiba balavu ka kaukauwa e rua na turaga kilai, ka nodra iliuliu na tamata. Eso na duidui ni vakasama sa tawasei rau vakalevu sara ka sa yaco kina na veimecaki. Ni sivi yani na veisiga, veimacawa, kei na veivula, sa qai rabailevu ga na maliwa sa koto. Sa tekivu me ra curu yani ko ira na lewe ni nodrau dui matavuvale na lewe rua, ka sa voleka ni ra vakaitavi kina na lewe ni tabanalevu kece sara. Sa veikauyaki na kena vosa ka ceburaki na duidui ka sa yaco me yameyame ni bukawaqa na veikaseti me yacova ni sa tawasea na itikotiko lailai oqo e dua na ikeli titobu. Au qai talai meu laki walia na leqa.… Au yaco yani ki na itikotiko oqo rauta na 6 ena yakavi ni Sigatabu, kau dabe vata sara kei ira na tekivuna na leqa.

“Sa dua na ka na kena dredre! Au vakamamasu ka veivakasalataki ka vakatakekere ka veivakauqeti! E vaka me sega ni dua ena yavalati rawa. Erau dui vakadeitaki rau na veimecaki tiko ni rau dui dina ka vakadinadinataka ni na sega ni rawa ni rau yavalati.

“Sa toso tiko na gauna—sa sivi makawa na bogilevututu, ka sa vaka me yali yani na vakanuinui ena vanua ko ya; e se vakilai tu ga na veicudruvi ka rairai ca na draki ni veimaliwai. E sega ni rawa ni yali na veisaqasaqa kei na vakau yalona. E qai yaco mai. Au cereka tu ga vakaveitalia na noqu Vunau kei na Veiyalayalati ka mai tu sara yani e mataqu. Au sa wilika oti vakavica vata ena veiyabaki sa sivi ka sega ni vakaibalebale sara vei au ena gauna ko ya. Ia ena bogi nikua sai koya sara ga oqo na iwali. E dua na kerekere ka vakamamasu ka viavia vaka toka na veivakarerei e kena irairai ni gole sara ga vakadodonu mai vua na Turaga. Au wilika na [wase 64] mai na tikina e vitu ka lako yani, ia era sega vakadua ni via suka na veiba tiko oqo me yacova niu sa wilika na tikina e ciwa. Au qai raica na nodra yavala, era kidacala, ka vakatataro. E dina beka o ya? E kaya tiko na Turaga vei keda—vei keda kece sara—’Raica, au sa kaya vei kemudou, mo dou veivosoti vakai kemudou.’

“Oqo e dua na itavi. Era sa rogoca oti e liu. Era sa cavuta oti ena nodra dau cavuta na Masu ni Turaga. Ia oqo: ‘… ia ko koya sa sega ni vosota na wekana ena nona cala, ena cudruvi koya na Turaga…’

“E yalodra era na kaya tiko beka: ‘Io, au na vosota beka kevaka e veivutuni ka kerea na veivosoti, ia me cavuta o koya na imatai ni kalawa.’ Sa qai lutuki ira ena gauna ko ya na ibalebale taucoko ni iotioti ni laini: ‘Raica sa ivalavala ca vakalevu cake ko koya.’

“Na cava? E kena ibalebale beka o ya ni dodonu meu vosota ga kevaka sara mada ga e vakaduiduile tikoga na kequ meca? E sega vakadua ni rawa ni cala.

“Eda dau vakacalai vakalevu ena vakasama ni dodonu me kere veivosoti ka vakamalumalumutaki koya me vaka na kuvu ni soso o koya e cala ni bera ni qai yaco na veivosoti. E dina sara, o koya e veivakamavoataki e dodonu me vakayacora na veisau, ia o koya e vakamavoataki, e dodonu me vosoti koya e vakamavoataki koya veitalia ga se vakacava tu na ivakarau ni nona rai o koya kadua. Ena so na gauna e qai dau logaloga vinaka ga na tamata ena nona raica ni sa lolovira sobu me vaka na kuvu ni soso o koya kadua, ia e sega ni o koya oqori na ivakarau vakosipeli.

“Ena kidacala, erau dabe vakadodonu na turaga e rua oqo, erau vakarorogo, vakasama vakalailai, ka tekivu me rau sa talairawarawa. Na ivolanikalou oqo ka vakaikuritaki ki na kena kece tale era a wiliki, e dui kauti rau ki durudrau. Sa rua na kaloko ena mataka caca, erau sa qai lululu, matadredredre, veivosoti ka kere veivosoti tiko e rua na veimecaki kaukauwa. Erau veimokomoko ena dua na imoko vakaibalebale e rua na Turaga. E savasava na auwa o ya. Sa vosoti ka guilecavi na veika makawa a rarawataki tu, ka sa yaco me ra veitokani tale na dau veimecaki. A sega tale ni bau tukuni e dua na ka me baleta na duidui. Sa bulu na sui, sa lokataki na kovate ni sui mamaca ka viritaki laivi na ki, ka vakalesui tale mai na sautu.”¹

Ena gauna taucoko ni nona veiqaravi, sa dau vakauqeti ira na lewe ni Lotu ko Peresitedi Kimball me ra dau veivosoti: “kevaka e tu na duidui ni vakasama, vakasavasavataka, vosota ka guilecava, kakua ni laiva me veisautaka ka tara na yalomu na veika makawa ko dau rarawataka, ka vakarusa na nomu loloma kei na nomu bula. Dou vakaivakarautaka na nomudou vale. Dou veilomani vakai kemudou ka lomani ira na wekamudou, na nomudou itokani, o ira era tiko volekati kemudou, ni sa solia vei kemudou na Turaga na kaukauwa oqo.”²

iVakavuvuli nei Spencer W. Kimball

Me da dau veivosoti me rawa ni da vosoti.

Me vaka ni sa gadrevi vakaidina sara ena kena rawati na bula tawamudu na veivosoti, sa dau vakanananu kina vakaoqo na tamata: Na sala cava au na rawata kina na veivosoti oqori? E dua na tikina e matata vinaka eke: Sa dodonu vua e dua me dauveivosoti me rawa ni qai vosoti.³

“Ia kevaka dou sa sega ni cudruvi ira na tamata sa caka cala, ena sega talega ni cudruvi kemudou na Tamamudou Vakalomalagi:

“Ia kevaka dou sa cudruvi ira na tamata sa caka cala, ena cudruvi kemudou talega ena vuku ni nomudou caka cala na Tamamudou.” (Maciu 6:14–15.)

E dredre me caka? Dina sara. E sega ni yalataka vei keda na Turaga e dua na gaunisala rawarawa, se dua na kosipeli rawarawa, se na ivakatagedegede lolovira, se na itovo. E cecere na kena isau, ia na veika e rawati mai sa ganita vakavinaka na kena isau. Na Turaga sara ga vakataki Koya e solia tale yani na baluna ka dua; a soli koya mokulaki ka vakanakuitataki ka sega ni bau vosa kina; e sotava na ivakarau vakamadua kecega ia e sega ga ni bau cavuta e dua na vosa ni veivakacacani. Ia na nona taro vei keda kece e vakaoqo: “Ia, a cava na ivalavala sa kilikili kei kemudou?” Kei na nona isau ni taro vei kemudou: “Mo dou vakataki au.” (3 Nif. 27:27.)⁴

Na noda veivosoti vei ira na tani e dodonu me vu mai yaloda ka taucoko.

Na ivakaro ni veivosoti kei na cudruvi ena muria mai na kena sega ni rawati ena sega ni rawa ni cavuti vakamatata cake mai na ivakatakila ni gauna oqo vua na Parofita ko Josefa Simici:

“Raica ko ira na noqu tisaipeli ena gauna e liu era a veibeitaki vakaiira, ka ra sega ni veivosoti vakaidina; a ka oqo era sa cala kina, a ra sa cudruvi ka kune rarawa kina.

“Raica au sa kaya vakaidina vei kemudou, mo dou veivosoti vakai kemudou; ia ko koya sa sega ni vosota na wekana ena nona cala, ena cudruvi koya na Turaga; raica sa ivalavala ca vakalevu cake ko koya.

“Ia koi au na Turaga, au na vosoti ira ga kau sa lewa; ia koi kemudou sa kilikili mo dou vosota na tamata kecega.” (V&V 64:8–10.) …

Sa tu na lesoni oqori me baleti keda nikua. E vuqa na tamata, ni ra sa kau mai me ra vakaduavatataki kei ira tale eso, era kaya ni ra sa vosota, ia era qai maroroya tu ga eso na yalo ca, se tikoga vei ira na lomatarotaro me baleti ira na ito kadua, se sega tikoga ni vakabauti ira. Oqori na ivalavala ca, ni sa vakayacori e dua na veivakaduavatataki ka kainaki ni sa yaco na veivutuni, sa dodonu vei ira ena ito ruarua me ra veivosoti ka guilecava, me taraicake sara na bai sa kabasu, ka vakalesui mai na duavata a dau tu e liu.

Era a cavuta na tisaipeli taumada na vosa ni veivosoti, ka ra vakayacora na veisau e gadrevi, ia “era sa sega ni veivosoti e yalodra.”E sega ni veivosoti oqori, ia na veivakaisini kei na veicavilaki kei na ilawaki. Me vaka e tukuni ena nona masu na Karisito, e dodonu me cakacaka ni yalo kei na vakasavasavataki ni nona vakasama e dua [raica Maciu 6:12; raica talega na tikina e 14–15]. Na veivosoti e kena ibalebale na guilecavi. E dua na marama “a oka” ena dua na cakacaka ni veivakaduavatataki ena dua na tabana a vakayacora na veicakacaka vakayago kei na veimalanivosa e vakaraitaki kina, e cavuta na vosa mai gusuna ni veivosoti. Ena waqawaqa ni matana, e qai kaya, “Au na vosoti koya, ia na noqu vakasama e vaka e dua na elefadi. Au na sega sara ni guilecava.” E sega ni yaga ka sega ni vakaibalebale na veisau e via lasutaka. E se maroroya voli ga na nona rarawa. Na nona vosa ni veitokani e vaka na viritalawalawa, na nona bai e qai tara vou sa vaka ga na co madu, sa mani sotava tikoga kina ko koya na rarawa ka sega ni vakacegu na nona vakasama. Ia e cala vakalevu cake, ni se tu ga ena nona “itutu ni cudruvi ena mata ni Turaga,” ka tiko vata kei koya na ivalavala ca levu cake mai vei koya, e kaya tiko, ni a vakamavoataki koya.

Na ka e sega ni kila na marama dauveisaqa oqo ni a se sega sara ga ni veivosoti. E a cakava walega eso na ivukivuki. A vaqiqica tiko na nona qiqi ka sega ni dua na vanua e yaco rawa kina. Ena ivolanikalou e cavuti e cake, na vosa, e yalodra e titobu na kena ibalebale. Sai koya beka na vakasavasavataki ni yaloda kei na noda vakanananu kei na noda rarawa. Na vosa walega e sega na betena.

“Raica sa ka ni voraki vua na tamata ca me soli iloloma, ka na okati me vaka e sa tiko ga vua; a sa okati me ivalavala ca ko koya ena mata ni Kalou.” (Moro. 7:8.)

E vakamacalataka vakaoqo na vakasama oqo ko Henry Ward Beecher: Na kena cavuti “Au rawa ni vosota ia au sega ga ni rawa ni guilecava; sai koya e dua tale na kena itukutukuni ni Au sega ni rawa ni vosota.”

Au na vakuria ena noqu kaya, ni vakavo sara kevaka e sa vosota na nona cala na wekana e dua ena yalona taucoko sa sega ni kilikili me vakaivotavota ena sakaramede.⁵

Me da laiva na vakatulewa vua na Turaga.

Me da dodonu tu, sa dodonu me da dau vosota, ia me da vakayacora oqori ka kakua ni via kila se sa veivutuni se sega o koya eda veisaqasaqa kaya, se vakaevei beka na dina ni nona sa veisau, se kevaka e sa kere veivosoti vei keda se sega. Sa dodonu me da muria na nona ivakaraitaki na iVakavuvuli, o koya e a kaya: “… Mo dou kaya e lomamudou —Me lewa mada vei kedaru na Kalou, ka sauma vei iko na nomu ivalavala ca.” (V&V 64:11.) Ia e vakavuqa, ni da dau sega ni vinakata na tamata me da laiva vua na Turaga, ena noda nanuma de na yalololoma na Turaga, ka sega soti ni bibi na itotogi e solia me sega ni ganita kina na cala e vakayacori.⁶

Eso na tamata e sega walega ni rawa se ni ra na sega ni vosota ka guilecava na nodra ivalavala ca na tani, ia era na segata me ra vakasasataki koya e cala. Sa yaco mai vei au e vuqa na ivola mai vei ira eso era sa nakita me ra taura e ligadra na iseleiwau ni lewa dodonu ka raica me totogitaki o koya e ivalavala ca. “Na tamata oqori e dodonu me muduki tani,” e kaya vakaoqo e dua na marama, “kau na sega ni cegu me yacova ni rau sa sota na bici kei na kena iula.” E kaya tale e dua, “Au na sega ni cegu, kevaka ena lewena tikoga na Lotu na tamata ko ya.” E dua tale e kaya: “Au na sega ni curuma tale na valenilotu kevaka ena vakatarai tiko na tamata ko ya me curuma. Au vinakata me veilewaitaki me baleta na nona lewena na Lotu.” E dua na turaga e lako vakavica vata ki Salt Lake City ka vola e vica na ivola babalavu me saqati rau kina na bisopi kei na peresitedi ni iteki ka rau a sega ni veilewaitaka e dua na tamata, ka kaya o koya, ni voroka tiko na lawa ni Lotu.

Kivei kemuni ko ni dau vinakata mo ni taura e ligamuni na lawa, eda na wilika tale na nona ivakaro vinaka na Turaga: “… raica sa ivalavala ca vakalevu cake ko koya.” (V&V 64:9.) E tomani na ivakatakila: “Ia sa kilikili talega mo dou kaya e lomamudou —me lewa mada vei kedaru na Kalou, ka sauma vei iko na nomu ivalavala.” (V&V 64:11.) Ni sa tukunikataki oti na ivalavala ca e kilai ki vei ira na veiliutaki vakabete dodonu ni Lotu, sa dodonu vei koya oqori me laiva na itavi vei ira na vakaitutu ni Lotu. Kevaka era na vosota ga na ivalavala ca na vakaitutu oqori ena ivakatagedegede ko ya, sa na dua na icolacola vakaitamera vei ira ka ra na tarogi kina.⁷

Na Turaga ena vakatulewa ena kena ivakarau vata ga eda solia yani. Kevaka eda sa rui kaukauwa me da kakua ni namaka e dua na ka e sega ni kaukauwa. Kevaka eda na yalololoma vei ira era vakamavoataki keda, ena yalololoma vei keda ko koya ena noda cala. Kevaka eda sega ni veivosoti, ena laivi keda me da coriti tu ena noda ivalavala ca.

E matata vinaka tu na ivakaro ni ivolanikalou ni na soli vua na tamata na ivakarau vata ga e solia vei ira na kai nona, na kena tau mada ga na lewa e dodonu me tau e sega ni noda na lewenilotu, ia e nodra o ira e tu vei ira na kena dodonu ena lotu kei na vanua. Na Turaga ena qai vakayacora na iotioti ni vakatulewa.…

Na Turaga e rawa ni lewa na tamata ena nodra vakanananu ka vakakina ena veika era kaya ka cakava, ni kila vinaka tu o koya na inaki sara mada ga ni yalodra; ia oqo e sega ni dina me baleta na tamata. Eda rogoca na ka era tukuna na tamata, eda raica na veika era cakava, ia ni da sega ni rawa ni kila na veika era vakasamataka kei na inaki ni lomadra, eda sa dau vakatulewa cala kina kevaka eda tovolea me da kila na ibalebale kei na inaki ni nodra ivalavala ka vakatauca vei ira me vaka na noda ivakavakadewa.⁸

E dina ni na dredre, e rawa ni da vosota.

A tarogi au e dua na turaga vinaka me baleta na yalo ni veivosoti, “Io oqori na ka e dodonu me vakayacori, ia eda na cakava vakacava? Oqori ena rawata ga e dua na tamata e tu vua na kaukauwa tani?”

“Io,” Au kaya, “ia eda sa vakaroti me tu vei keda na kaukauwa tani. E kaya na Turaga, ‘O koya mo dou qai vinaka sara, me vaka sa vinaka sara na Tamamudou sa tiko mai lomalagi.’ (Maciu 5:48.) Eda a kalou ni da se qai kunekunetaki, ka sa vinakata kina na Turaga me da vinaka sara.”

“Io, a vosoti ira era a vakamavoataki koya na Karisito, ia o koya e uasivi cake sara mai na tamata,” e semata mai o koya.

Na noqu isau ni taro e vakaoqo: “Ia e vuqa na tamata era sa rawata me ra vakayacora na itovo vakalou oqo.”

E matata ni lewe levu na tamata, era tautauvata kei na turaga vinaka oqo, era nanuma ni yalo ni veivosoti… e vaka ga na italanoa buli era tu ena ivolanikalou ka na sega ni rawa ni namaki me ra rawata na tamata ena vuravura ni gauna nikua. E sega ni vakakina.⁹

Au kila e dua na tina gone ka a mate na watina. Eratou a matavuvale dravudravua ka $2,000 walega na dola na ilavo ni inisua e tu, ia oqo e vaka e dua na isolisoli mai lomalagi. A totolo na nodratou vakarautaka na jeke na kabani ena gauna ga e soli yani kina na ivakadinadina ni mate. Sa lewa na marama yada gone oqo me sa na maroroya me baleta na gauna ni leqa sega ni namaki, sa mani vakacuruma ki na baqe. Era kila tu eso na ilavo e maroroya tiko, a mani cavilaki koya e dua na wekana ka kaya me solia vakadinau vua na $2,000 na dola ena dua na kena tubu levu sara.

Sa toso na veiyabaki, ka sega ni bau ciqoma na tinana se na kena tubu. A raica ni sa levei koya tiko o koya e dinau ka levu na ka e kaya me nona iulubale ena gauna e taroga kina vua na ilavo. Sa gadreva tu ena gauna oqo o koya na yada na ilavo, ia sa sega.

“Au sa cati koya dina!” e kaya vei au ko koya, ka da vakila e domona na paisoni kei na rarawa ka waqa na matana. Me da vakasamataka e dua na tagane bulabula me lawakitaka e dua na yada ka tiko e dua na matavuvale me qarava! “Au sa sevaki koya dina!” e kaya ka baci kaya tale. Au qai talanoataka vua e dua na talanoa me baleta na tamata ka a vosoti koya e labata na tamana. A vakarorogo sara toka vakavinaka. Au raica ni sa tarai koya na italanoa. Ni sa cava e a tonawanawa na matana, ka vakasolokakana: “Vinaka. Vinaka vakalevu sara. Sa dina, o au talega e dodonu meu vosoti ira na noqu meca. Au sa na vakasavasavataka ena gauna oqo na yaloqu ena kena rarawa tu. Au sega sara ni qai namaka tale me na soli vei au na ilavo, ia au sa biuti koya ga e cala vei au ki na ligana na Turaga.”

Ena vica na macawa ki muri, a mai raici au tale ka vakatusa ni vica na macawa oqori sa gauna marautaki dina ena nona bula. Sa vakaruguti koya e dua na vakacegu vou ka rawa vua me masulaki koya e cala vua ka vosoti koya, e dina ga ni a sega ni bau dua bulu na dola me bau soli lesu yani vua.¹⁰

Ni da vosoti ira na tani, eda sa sereki keda kina mai na cudru kei na rarawa.

Na cava na vuna e kerei iko kina na Turaga mo lomana na nomu meca ka sauma ena vinaka na ca? Me rawa ni takavi iko na kena mana. Ena sega ni vakamavoataki koya o cata tiko na nomu cata e dua na tamata, vakabibi kevaka e drau veiyawaki ka sega ni drau dau veitaratara, ia na cudru kei na rarawa ena vakarusa na yalomu sega ni veivosoti.…

E rairai sa dau sotavi ira tiko beka na tamata era dau ivalavala ca vua ko Pita, ka taroga kina:

“Noqu Turaga, me ivalavala ca mada vakavica vei au na wekaqu, kau kakua ga ni cudruva? …”

A sa kaya na Turaga:

“Au sa sega ni kaya vei iko me vakavitu walega: me vakavitusagavulu na vitu.” (Maciu 18:21–22.) …

… Ni ra sa veivutuni ka lako mai e durudra me ra kere veivosoti, e vuqa vei keda e rawa ni veivosoti, ia na Turaga e vinakata me da veivosoti kevaka sara mada ga era sega ni veivutuni se kere veivosoti vei keda.…

Sa dodonu kina me matata tu vei keda, ni sa dodonu me da veivosoti ka sega ni sauma lesu se veisosomitaka na ca, ni na qai cakava ena vukuda na Turaga na veika e kilikili me vakayacori.… Na rarawa ena vakamavoataki ga kina o koya e kauta voli; ena wadakau, ena waqoqo ka veivakarusai.¹¹

E dau yaco ena so na gauna ni dau vakayacori na cala ka sega ni kila o koya e vakayacora. E dua beka na ka e tukuna qai tauri cala se duatani kina na nanuma. Sa qai katona tu e yalona o koya e vakacalai na cala o ya, ka vakuria ena veika eso ka na vakawaqara vakalevu na buka ka vakadonuya na veika sa nanuma tiko o koya. Oqo beka na vuna e vinakata kina na Turaga me na liutaka na veisaututaki o koya e vakacalai.

“Ia kevaka sa caka cala vei iko e dua na wekamu, mo segata sara mo drau veivosakitaka na cala oqori; ia kevaka sa vakatusa na nona cala, mo vosoti koya sara.” (V&V 42:88.) …

Me da muria na ivakaro oqo se me da tiko voli ga ena noda rarawa, ka waraka me kila o koya e cala vei keda ka tekiduru vei keda ena kere veivosoti?¹²

Eda na cudru beka vei ira na noda itubutubu, se dua na qasenivuli, se na bisopi, ka da kinoci keda yani ki na tawakilai ena noda vakalailaitaki keda ka kino ena paisoni ni rarawa kei na veicati. Ena welewelei o koya e cati tiko ena nona qarava na nona itavi, ia e sega ni kila na nona kune rarawa tiko o koya e veicati, sa lawakitaki koya tikoga o koya e muri.…

… Me da yalana na noda vakaitavi ena Lotu me da vakaraitaka kina na noda sega ni taleitaki ira na iliuliu se me da vakalevutaka na ca ni yalo sai koya na noda lawakitaki keda tikoga.¹³

Ena loma ni rorogo velavela ni cudru, rarawa kei na saumi ni ca ka dau vakaraitaki vakavuqa ena gauna oqo, sa dau yaco mai me vaka na drega ni veivakabulai na rorogo malua ni veivosoti.¹⁴

Eda na vakalougatataki ena reki kei na vakacegu, ni da vosoti ira na tani.

Ni vakauqeti mai vua na Turaga ko Jisu Karisito, sa solia kina vei keda ko Paula na iwali ni leqa ena bula ka gadrevi kina na duavata ni vakasama kei na veivosoti. “Ia mo dou veilomani vakai kemudou, dou lomavinaka, dou kakua ni veicudruvi, me vaka sa sega talega ni cudruvi kemudou na Kalou ena vuku i Karisito.” (Efe. 4:32.) Kevaka e rawa ni kau yani ki na veivale na yalo ni veilomani, lomavinaka, kei na sega ni veicudruvi, ena seyavu yani na kocokoco, sega ni veivakabauti, kei na rarawa ka sa vorolaka e vica vata na vale kei na matavuvale ka na bula sautu na tamata.¹⁵

Na veivosoti sai koya na isaluwaki mana ka na vakadeitaka na veilomani kei na loloma e vale se na tabanalevu. Kevaka e sega ena tiko na veiqati. Ni sega na veinanumi kei na veivosoti ena basika na duidui, ka muria na sega ni veilomani, oqori ena susuga cake na sega ni yalodina e vale, ena tabana kei na tabanalevu. Ena yasana kadua, na veivosoti erau sala vata kei na yalo ni kosipeli, kei na Yalo i Karisito. Oqo na yalo e dodonu me tu kece vei keda kevaka eda vinakata me vosoti na noda ivalavala ca ka laurai ni da sa sega ni cala ena mata ni Kalou.¹⁶

Ena veigauna eso sa dau basika ena noda sala na qaciqacia ka yaco me noda itatarabe. Ia eda na gadreva me da tarogi keda ena taro: “E bibi cake beka na nomu qaciqacia mai na nomu vakacegu?”

Sa dau vakavuqa, na nona dau laiva e dua e sa vakayacora e vuqa na veika vakasakiti ena nona bula ka cau ena veika talei, me vakavuna na nona sega ni rawata na icocovi talei e dodonu me nona na qaciqacia ni yalona. Sa dodonu me da dau daramaka tiko e veigauna na isulutaga kei na dravusa ni yalo dauveivosoti ka raramusumusu, ena nomu dau lomasoli tikoga mo yalomalua, me vaka na dau kumuni ivakacavacava [raica Luke 18:9–14], ka kerea na Turaga me vukei keda me da dau veivosoti.¹⁷

Ena veigauna kece sara ni bula vakayago eda na bula ka cakacaka vata tiko kei na tamata ka sega ni taucoko sara na nodra vinaka; ka na basika na duidui ni vakasama, na veivakacudrui, kei na mavoa ki na yalo dau kauwai. E vakavuqa ni dau sega ni tauri vakavinaka na veinaki vivinaka. Sa vakavinavinakataki ni da raica e lewe vuqa, ena levu ni yalodra era sa vakadodonutaka na nodra vakasama, kauta laivi na qaciqacia ni lomadra, vosota na malumalumu lalai ni tamata yadua. O ira na kena vo era dau lakova na sala dredre, galili, ka drakidrakita ena rarawa levu, sa yaco me ra ciqoma na veivakadodonutaki, era vakadinadinataka ni ra sa cala, vakasavasavataka na yalodra mai na rarawa, ka kunea tale na vakacegu, na vakacegu gadrevi ka dau kilai levu ni sa yali. Kei na yalorarawa ni veivakacacani, na mosi ni yalo, kei na veitawasei e sa basika kina na yalovinaka kei na rarama kei na vakacegu.¹⁸

E rawa ni caka. E rawa vua na tamata me rawai koya vakaikoya. E rawa ni veirawai na tamata. E rawa vua na tamata me vosoti ira kece era caka cala vua ka lako yani me rawata na vakacegu ena bula oqo kei na bula tawamudu ena bula sa bera mai.¹⁹

Kevaka me da veilewai ena vuku ni vakacegu, ka da raica me wali na duidui—kevaka me da na veivosoti ka guilecava mai vu ni yaloda—kevaka eda na vakasavasavataka na yaloda mai na ivalavala ca, na rarawa, kei na kila na noda cala ni bera ni da qai viritaka e dua na vatu se beitaki ira na tani—kevaka eda na vosota na cala kece sara, na kena e dina kei na kena e vakasamataki walega ni bera ni da qai kerea na veivosoti ena vuku ni noda ivalavala—kevaka eda na sauma taumada na noda dinau, kevaka e levu se lailai, ni bera ni da tarogi ira era dinau vei keda—Kevaka eda rawata me da leuta mada e liu na kau mai na matada ni bera ni da qai raica na malamala mai na mata ni wekada—sa na dua na vuravura lagilagi oqo! Ena vakalailaitaki sara na veisere; era na vagalalataki na valeniveilewai mai na kena cakacaka vakatubu rarawa, ena yaco me vakalomalagi na bula vakamatavuvale; ena vakatotolotaki ki liu na cakacaka ni kena tara na matanitu; kei na vakacegu o ya ka sega ni vakasamataki rawa [raica Filipai 4:7] ena kauta mai ki vei keda kece na reki kei na marau ka dau dredre ni “curu ki na loma ni tamata.” [Raica 1 Korinica 2:9.]²⁰

Me vakalougatataki keda kece na Turaga me da na kauta tikoga kina e yaloda na yalodina ni veivutuni kei na veivosovosoti me yacova ni da sa vakataucokotaki keda, ka raica tiko na lagilagi ni bula vakacerecerei e waraki ira tu na yalodina.²¹

Vakatutu ni Vuli kei na Veivakavulici

Vakayagataka na vakasama eso oqo ena nomuni vulica na iwase oqo se ena nomuni vakavakarau mo ni veivakavulici. Raica na tabana e v–ix, me baleta na ikuri ni veivuke.

Raica lesu na italanoa ena tabana e 104–06. Na cava na vuna sa rui dau dredre kina vei keda na tamata me da veivosovosoti? Na cava na kena ibalebale vei kemuni na vosa “Sa ivalavala ca vakalevu cake ko koya ”? (V&V 64:9)
Raica lesu na Maciu 6:14–15, ka cavuta ko Peresitedi Kimball ena tabana e 107. Na cava na nomuni nanuma e dodonu kina me da vosoti ira mada e liu na tani me rawa kina ni da qai rawata na nona veivosoti na Turaga?
Na cava eso na ivakarau ni bula kei na ivalavala e dau vakaraitaka ni vu dina mai yaloda ka taucoko na noda veivosoti? (Raica na tabana 107–110.) Na cava na vuna e dodonu kina me “cakacaka ni yalo” na veivosoti?
Raica lesu na iwase ka tekivu ena tabana e 110. Na ivakavuvuli cava ni kosipeli e rawa ni vukei keda me da lomasoli ka laiva ga na vakatulewa vua na Turaga?
Ni o ni wilika na italanoa me baleta na tina ena tabana e 112–115, vakaraica na veika a vakataotaka na nona veivosoti e liu, kei na veika a qai vukei koya e muri me veivosoti. E rawa vakacava me da lako sivita na itatarabe ka dau takosova na noda gagadre kei na noda sasaga me da vosoti ira na tani?
Na cava eso na isau ni noda sega ni vinakata me da veivosoti? (Raica na tabana e 115–116.) Na veivakalougatataki cava o ni sa sotava ena nomuni vosota e dua? Vakasamataka na sala eso e rawa ni o ni vakayagataka kina na yalo ni veivosoti ena nomuni veimaliwai.

iVolanikalou Veiwekani: Maciu 5:43–48; Luke 6:36–38; Kolosa 3:12–15; V&V 82:23

President Kimball speaking — Sa vakasalataki ira na lewe ni Lotu ko Peresitedi Kimball: “kevaka e tu na duidui ni vakasama, vakasavasavataka, vosota ka guilecava, kakua ni laiva me veisautaka ka tara na yalomu na veika makawa ko dau rarawataka, ka vakarusa na nomu loloma kei na nomu bula..”

Sermon on the Mount — E vakavuvulitaka ko Jsu Karisito, “Kevaka dou sa sega ni cudruvi ira na tamata sa cakacala, ena sega talega ni cudruvi kemudou na Tamamudou Vakalomalagi” (Maciu 6:14).

mother and daughter hugging — “ Na veivosoti sai koya na isaluwaki mana ka na vakadeitaka na veilomani kei na loloma e vale se na tabanalevu.”