Wase 7

Na iVakadinadina Yadua

Sa katuba rabailevu ki na veicocovi cecere kei na reki e sega ni vakamacalataki rawa na kila ka tudei me baleta na dina ni kosipeli.

Na Bula nei Spencer W. Kimball

Ena 1947 a ciqoma kina o Elder Spencer W. Kimball e dua na ivola mai vei Andrew, na luvena tagane, ka a kaulotu tiko. A vola mai vakaoqo o Andrew: “Au a tukuna vua e dua na tamata … niu kila na dina ni veika au wasea vua, kau kaya ni a vakadinadinataka vei au na Yalo Tabu.… Niu qai vakasamataka e muri au a kauwaitaka vakalailai na noqu cakava e dua na ka vakaoqori.” Ena vuku ni nona kauwai a kaya kina, “Au sa dau qarauna sara vakavinaka na noqu wasea na noqu ivakadinadina vua e dua, meu dau tukuna ga ‘Niu vakila, Au vakabauta, kei na so tale.’ ”

E a volavola lesu o Elder Kimball vei luvena. “Au vakabauta niu kila vakavinaka na lomamu,” e kaya kina, “niu a sotava na veika vata oqori ena noqu kaulotu. Au vinakata meu dina vei au ka vakakina ki na parokaramu vata kei na Turaga. Au a tovolea meu tuvalaka vakamatau na noqu vosa meu vakauqeti ira kina na tani ka kakua ni yalataka e dua na ka ena noqu cavuta niu kila. Au a lomalomaruataka talega vakalailai, ena gauna au talairawarawa kina ka qarava tiko na noqu itavi au vakila na Yalotabu. Au vinakata dina sara meu tukuna ni veika au vakila dina tu, niu sa kila, ia au lomalomarua. Niu sotava e dua na gauna vinaka ni vunau, e vakarerei au, ia ni taucoko tu na noqu bula kau vakauqeti vakayalo, au vinakata meu wasea na noqu ivakadinadina. Au nanuma ni sa dina tiko, niu sa dina sara, ia au qai kila niu a vakalialiai au tikoga.…

“E sega ni vakataratutu ena siga ko a vakadinadinataka kina vei koya e vakadikeva tiko na lotu ni o KILA ni dina, sa tovolea tiko kina vakaukauwa na Turaga me vakatakila vei iko na dina oqo mai na kaukauwa ni Yalo Tabu. Ena gauna a tiko vata kina kei iko na Yalotabu ka tokona tiko na parokaramu tabu, o a vakila sara tiko vakatitobu, ia ni sa ‘yali vei iko na Yalotabu’ ka tekivu mo vakasamataka, ka vakadodonutaki iko ka vakatarogi iko, o sa vinakata mo tu vakasuka.…

“E sega ni dua na lomatarotaro e tiko ena noqu vakasama me baleta na nomu ivakadinadina. Au kila ni solegi iko tu (me vakataki au) na wa lalai koula ni ivakadinadina ka ra waraka tu ga na ligana na Kenadau ni Talitali me tuvalaka ka talia ki na dua na isulu vakamatana totoka. Ia na luvequ, rogoca na noqu ivakasala KAKUA NI BOKOCA NA YALOTABU, ni vakasolokakana na Yalotabu, muria na kena veivakauqeti tabu. Mo bulabula tiko vakayalo ka vakarorogo ki na veivakauqeti ia ena gauna o vakauqeti kina, tukuna ena yalodoudou na lomamu. Ena vakalevulevuya na Turaga na nomu ivakadinadina ka tara na yalomu. Au nuitaka ni o na kila ni sega ni dua na veivakacacani e koto eke, ia au vinakata ga meu veivuke.…

“Au na sega ni sa tinia mada na noqu ivola vei iko ka sega ni wasea yani na noqu ivakadinadina. Au kila ni dina —ni o Jisu na Dauveibuli ka Dauveivueti; ni kosipeli e daru vakavuvulitaka tiko vata kei ira na daukaulotu e le 3,000 e sa vakalesui mai ka vakatakilai mai vua na Parofita dina ko Josefa Simici, ka sa mai vua na Kalou, au sa vakatabuya na vo ni noqu bula meu ‘vunautaka kina na veika ni matanitu.’ Au [sa dau wasea] ena yalodoudou na noqu ivakadinadina… kau sa baci vakadeitaka tale. Au kila ni dua tiko na nomu ivakadinadina, ia de rairai na nomu wa lalai koula ga e gadrevi me tali ki na dua na isulu vakamatana e taucoko vinaka, oqori ena rawa sara vakatotolo ena nomu veiqaravi vakadaukaulotu ena nomu sereka na yalomu ka laiva me lewa na nomu vakasama.

“Me vukei iko na Kalou mo talia ki na dua na matanisulu totoka na wa lalai koula ni veika o sa vulica rawa kei na veika o sa vakauqeti kina ka mo bulataka ka vakavuvulitaka tikoga na dina tawamudu … ena kaukauwa e vakaikuritaki.”¹

iVakavuvuli nei Spencer W. Kimball

Ena rawa vei keda yadua me da ciqoma e dua na ivakadinadina—e dua na ivakatakila mai vua na Tamada Vakalomalagi ena Yalo Tabu.

A tarogi Pita vakaoqo na iVakabula, “Ia dou sa kaya se ko cei koi au?” Ia ko Pita, ni vosa ena vukudratou na nona itokani, ko iratou na vo ni iApositolo, sa kaya, “Oi kemuni na Karisito na Luve ni Kalou bula.” Na vosa e cavuta tarava na iVakabula sa vosa bibi sara. E kaya kina vakaoqo, “O sa kalougata Saimoni Pa-Jona: ni sa sega ni vakatakila vei iko na lewe kei na dra, na Tamaqu ga sa tiko mai lomalagi” (Maciu 16:13–17).

O cei e vakatakila vua na dina veivakurabuitaki oqo? Na Tamada mai Lomalagi. E cakava vakacava? Ena ivakatakila. Na kena kilai oqo ni o Jisu na Karisito, na Dauveivueti, na iVakabula, e sega ni vu mai vua e dua na tamata se mai na dua na ivola se mai na dua na koronivuli. A ciqoma vakadodonu sara ga mai vei Tamada Vakalomalagi o Pita ena cakacaka ni Yalo Tabu.…

… Na tamata kece beka ena vuravura oqo sa dua oti na nona ivakatakila, me tautauvata kei na kena a rawata o Pita. Ena yaco me ivakadinadina na ivakatakila oqori, na kena kilai ni bula tiko na Karisito, ni o Jisu Karisito na Dauveivueti ni vuravura oqo. Ena rawata na tamata kece sara na veivakadeitaki oqo, ena gauna e rawata kina na ivakadinadina oqo, ena yaco mai vua na Kalou ka sega ni yaco ga mai ena vuku ni vuli. Na vuli e ka bibi, ia sa dodonu me na sala vata kei na masumasu kei na veikauwaitaki, ena qai yaco mai na ivakatakila oqo.

Ena gauna o kila kina vakataki iko ni a sega walega ni dua na tamata vuku o Jisu ia ni a Luve ni Kalou sara ga, ni a lako mai ki vuravura ena sala vata ga eda dau tukuna ni a vakakina, ka ni a lako tani mai vuravura ena inaki vata ga eda tukuna—ni o sa kila vakaidina oqori, ka kila ni sa parofita dina ni Kalou ko Josefa Simici sai koya oqo na Lotu vakalou ka tauyavutaka ko Jisu Karisito, ko sa rawata kina e dua na ivakatakila.²

Era tu eso na tamata era dau vakalevulevui ira ena vuku ni nodra kila ka, era nanuma ni rawa ni ra tara yani na veika vuni, ia e sega ni rawa ni ra vakaduiduitaka se vakamacalataka se me ra kila na veika vakayalo mai na nodra kila ka se na cakacaka ni nodra vakasama. E rawa ni kilai na veika vakayalo ena Yalotabu duadua ga. Me lako mai yaloda ka sai koya oqori na vanua e dodonu me vakaitikotiko kina.³

Na kilai deivaki ni veika vakayalo sa katuba e tadola tu ki na icocovi cecere kei na reki e sega ni tukuni rawa. Na kena vakawaleni na ivakadinadina sa tautauvata kei na noda vakayayamo voli ena butobuto sega ni rai basikati rawa, na noda qasi voli ena loma ni kabukabu ena gaunisala rerevaki. Me lomani na tamata ko ya ka lako voli ena butobuto ena sigalevututu, ka tarabe ena veika e rawa ni vagalalataki, sa tiko voli ga ena rarama kataremoremo ni cina kadrala ni veilecayaki kei na lomalomarua ena gauna e rawa me lako tani mai kina. Na kilai vakayalo ni ka dina sai koya na cina livaliva ka vakararamataka tiko na loma ni qara; na cagi kei na matanisiga ka vakaseyavutaka na kabukabu; kei na misini ni cakacaka ka cumuta ka vagalalataka na vatu lelevu mai gaunisala.⁴

Ena rawati ka vakabulabulataki tiko na ivakadinadina ena sasaga vakaukauwa.

Na ivakadinadina e ivakatakila ni tamata yadua—e dua na solisoli bibi—ka ra na marautaka na tamata kecega era na sotava na kena isau.⁵

Oqo e dua na taro vinaka era sa taroga e milioni vakamilioni na tamata me tekivu mai na gauna a cavuta kina ko Josefa Simici: Au na kila vakacava se o cei vei ira kece, kevaka e dua vei ira na veisoqosoqo oqo e ka dina, vakalou, ka kila na Turaga?

Sa solia tu o Koya na idola. E rawa ni o kila. Mo kakua ni lomalomarua tiko.… Na kena iwalewale sai koya: na vuli, vakasama, masu, ka cakacaka. Na ivakatakila e kena idola. Ena vakaraitaka vei iko na Kalou ena gauna ga o sa yalomalumalumu ka dau veiciqomi kina. Ni ko sa biuta laivi na nomu qaciqacia ena vuku ni nomu kila ka, ka vakadinadinataka ena mata ni Kalou na nomu veilecayaki, ka veisautaka na nomu dau nanumi iko ga, ka soli iko vakadua ki na veituberi ni Yalo Tabu, o sa na vakarau tu kina mo tekivu vuli.⁶

E rawa ni da vakadeitaka ena dua na kena ivakarau vinaka na dina ni dua na Kalou e bula vakataki Koya; na nona bula tiko na Karisito, ni duatani mai vei Tamana, ia erau tautauvata ga; na vakalou ni veivakalesuimai vei Josefa Simici kei ira na parofita tale eso me baleta na kena tauyavutaki kei na ivunau ni lotu ni Kalou e vuravura; kei na kaukauwa ni matabete vakalou ka soli vua na tamata ena ivakatakila mai vua na Kalou. Na veika oqo e rawa ni kila deivaki e dua na tamata nuitaki me vaka na nona kila ni na cila mai na matanisiga. Na noda sega ni rawata na kila oqo sai koya na noda vakadinata ni da se bera ni sauma rawa na kena isau. Me vaka ga na koroi ni vuku, ena rawati ga ena sasaga vakaukauwa. Na yalo ko ya ka sa savasava tu ena veivutuni ka ciqoma na cakacaka vakalotu kevaka e gadreva ka sasagataka yani, vakasaqaqara matua, vuli, ka masu ena yalodina.⁷

E kaya kina na Dauveivueti:

“Sa sega ni noqu na noqu ivakavuvuli, sa nona ga ka talai au mai.

“Kevaka e dua na tamata sa via cakava na lomai koya, ena kila se sa ka mai vua na Kalou na ivakavuvuli, seu vosa vakai au ga.” (Joni 7:16–17.)

Na cava me da kila me baleta na ivakavuvuli? E dua na veivakadeitaki sa sega ni veivukiyaki. Sa solia tu na Turaga na icocovi uasivi sara ia sa vakarautaka ni na qai rawati ga ena kena sa sotavi na veika eso e gadrevi kina. Eke na veivakalougatataki e yalataki sai koya na kilai ni kena vakalou na ivunau. Eke talega na lawa se na veika e gadrevi sai koya me da “cakava na lomana”…

… Ena sega ni solia mai na ivakadinadina na kena ciqomi walega vakavosa na ivunau; ena sega talega ni kauta mai na veivakadeitaki ko ya na kena caka tu ga me rawa ka veimamataka wale tu ga na parokaramu, ia na kena sasagataki ena noda igu taucoko me da muria na ivakaro.

Eda dau raica vakawasoma oqo ena nodra bula na lewe ni Lotu. E dua a kaya vakaoqo vei au ena dua na iteki au a veisiko kina, “Au dau qarauna sara vakavinaka meu levea na veisoqoni kece sara ni soli ivakadinadina. Au sega ni rawa ni taura na veimalanivosa ni loloma kei na luluvu era dau cakava eso. Au sega ni rawa ni ciqoma na ivunau eso oqo vakavo ga kevaka au na vakadinadinataka ena veikalawa yadua ena noqu vakasama.”Au kilai ira na mataqali tamata vakaoqo niu sa sotavi ira oti eso me vakataki koya. E sega ni rawa ni ra solia na veika kece e tu vei ira me ra bulataka na ivakaro: e lailai se sega sara ga na ikatini, dau lakova ga vagauna na soqoni, ena so na gauna e dau vakacacana na ivunau, na isoqosoqo, kei ira na veiliutaki, ka da kila vinaka tu na vuna era na sega ni rawata kina e dua na ivakadinadina. Nanuma ni tukuna na Turaga:

“Raica, koi au na Turaga, au na vakayacora na noqu yalayala kevaka dou sa muria na noqu ivakaro; ia kevaka dou sa sega ni muria na noqu ivakaro, dou na sega ni rawata na ka sa yalataki” (V&V 82:10).

O ira na tamata vakaoqo era sa “sega ni muria na nona ivakaro,” o koya sa dina sara, ena sega ni dua na nodra yalayala.…

… E sega ni yalodina vakamataboko ia na vakadidigo ena yalodina kei na vakayagataki ni idola ka na dolava na lololo ni kila ka vakayalo. Ena sega ni veivakaduiduitaki vei keda na luvena na Turaga ia ena marau me taukeni keda ka vakalougatataki keda kece sara, kevaka eda na vakatara vua.⁸

Na cava ko na cakava ena nomu ivakadinadina? Eda na vakatara tikoga me vaka na isele ni musu bulumakau nei nana? O na laiva beka me mumucu mai ka veveka? … E viavia vaka tu na se ni rosi. Kakua ni laiva me tauci uca; tarova toka mada vakalailai na wai vakadrodroi yani, na cava ena yaco ki na nomu se ni rosi? Ena mate. Ena mate na nomu ivakadinadina. Ena mate na nomu loloma. Na veika taucoko me vakani. O dau vakania vakatolu na yagomu ena dua na siga. E kaya na Turaga mo maroroya na nomu ivakadinadina, mo vakabulabulataka na yalomu, mo vakania e veisiga.… Oqori na vuna e kaya kina o koya mo dau masu ena veibogi kei na veimataka. Oqori na vuna e kaya kina mo dau masu tikoga me tadola tiko kina na wa ni veivosaki.⁹

Eda gadreva me da vakaitavi ena soqoni ni soli ivakadinadina.

Na soqoni ni soli ivakadinadina sa dau soqoni uasivi duadua ena [Lotu] ena loma ni vula taucoko, kevaka e tiko vei iko na Yalotabu. Kevaka o sa vucesa mai ena dua na soqoni ni soli ivakadinadina, e dua na ka e leqa tiko vei iko, ka sega ni o ira na kena vo. E rawa ni o tucake ka wasea na nomu ivakadinadina ka vakasamataka ni oqori na soqoni vinaka duadua ena vula o ya; ia kevaka o dabe toka ga ka wilika na vosa cavuti cala ka dredrevaka na turaga ka sega tu ni rawa ni vosa vakavinaka, o na vucesa mai.… Kakua sara ni guilecava! Mo na vala me baleta e dua na ivakadinadina. Mo na vala tikoga!

E kaya na Turaga ena ika 60 ni wase ni Vunau kei na Veiyalayalati, “Ia au sa cudruva talega eso vei kemudou; raica era sa sega ni vakayagataka na taledi au sa solia vei ira; io era sa sega ni doudou me ra vunau yani” (V&V 60:2). Na cava e tukuna tiko o koya? E kaya o Koya kevaka era na sega ni vakayagataka, ena kau tani vei ira na veika sa solia vei ira ko koya. Sa na kau tani vei ira na yalodra. Sa na kau tani vei ira na nodra ivakadinadina. Ka na rawa ni cawadru tani mai na nomu bula na ka kunekunei dredre oqo ka tiko vei iko.

Ena veivula eratou dau sota kina vata kei ira kece na Vakaitutu Raraba ena valetabu ko iratou na Mataveiliutaki Taumada kei iratou na Le Tinikarua. Era dau wase ivakadinadina ka ra veitukuniyaka na levu ni nodra veilomani vakataki ira me vakataki kemuni. Na cava na vuna era gadreva kina na Vakaitutu Raraba e dua na soqoni ni wase ivakadinadina? Na vuna vata ga o ni gadreva kina e dua na soqoni ni ivakadinadina. O ni nanuma beka ni rawa ni o ni toso tiko me tolu, qai ono, ciwa, ka tinikarua sara na vula ka sega ni wasea na nomu ivakadinadina me qai tiko vata ga kei iko na kena yaga? …

O kila ni ivakadinadina oqo e dua na ka vakasakiti, e dua na ka bibi sara. Na italatala se na bete e rawa ni ra cavu vosa mai na ivolanikalou ka vunau. Ia e sega ni rawa ni ra dau wasea kece na nodra ivakadinadina na bete kei na italatala. Kakua ni dabe toka ga ena nomu soqoni ni lolo ka qai lawataki iko ka kaya, “Au kila niu na sega ni wasea na noqu ivakadinadina nikua. Au kila ni na sega ni vinaka vei ira na vo ni lewenilotu oqo baleta ni sa levu sara na veigauna vinaka au donumaka.” Wasea na nomu ivakadinadna. Sa rauta vinaka e dua na miniti mo wasea kina na nomu ivakadinadina.

E tiko e dua na nomu ivakadinadina! E gadreva me tarai cake ka laveti ka vakalevulevui, e dina sara; sai koya oqori na ka eda cakava tiko. Ena vaqaqacotaki cake na nomu ivakadinadina ena veigauna kece o wasea kina.¹⁰

Na ivakadinadina e dau tukuni ena veivosa rawarawa ka qaqa.

“Au kila ni dina.” Me vaka ni sa tukuni vakabilioni na vosa oqori mai vei ira e milioni vakamilioni na tamata ena sega ni sa na laki madra kina. Ena sega vakadua ni rawa ni vuca se madra yani. Au lomani ira na tamata era dau via vakamaqosataka ena veivosa tale eso, baleta ni sega tale ni dua na vosa me vaka na “Au kila.” E sega tale na vosa me rawa ni vakamacalataka vakavinaka na vakanananu titobu e lako mai na yalo ni tamata me vaka na “Au kila.”¹¹

Eso na noda tamata vinaka era sa rui dau rerevaka vakalevu na rogorogo madra ka ra dau tovolea kina me ra ulia wavoki ka gole tani yani mai na nodra ivakadinadina ena nodra goleva na veika e sega soti ni bibi. Kakua sara ni leqataka na kena madra na ivakadinadina. Ni wasea na nona ivakadinadina na Peresitedi ni Lotu, e kaya, “Au kila ni kacivi mai vua na Kalou ko Josefa Simici, e dua na mata vakalou. Au kila ni o Jisu na Karisito, na Luve ni Kalou bula.” Sa raica, na veika vata ga o ni dau cavuta kece sara. Oqori na ivakadinadina. E sega ni na makawa mai, e sega ni na qase mai! Dau tukuna vakawasoma vua na Turaga na levu ni nomu lomani koya.

Na ivakadinadina e sega ni ivakasala; na ivakadinadina e sega ni ivunau (o ni sega ni tu e kea mo ni vakasalataki ira na kena vo); e sega ni itukutuku ni veilakoyaki. O tu e kea mo wasea na nomu ivakadinadina vakataki iko. E vakasakiti na veika e rawa ni o tukuna ena loma ni 60 na sekodi me nomu ivakadinadina, se 120, se 240, se ena gauna cava ga e soli vei iko, kevaka o ni vakatabakidua toka ga ena ivakadinadina. Keimami vinakata me keimami kila na veika e tu e lomamu. O taleitaka beka na cakacaka, e dina sara? O marau tiko beka ena nomu cakacaka? O lomana li na Kalou? O marautaka beka ni o lewena na Lotu?¹²

Tukuna ga na veika o vakila tu e lomamu. Sai koya oqori na ivakadinadina. Ena gauna o sa tekivu vunau kina vei ira na ivavakoso, sa yala e kea na nomu ivakadinadina. Tukuna ga vei keimami na lomamu, na cava e tukuna vei iko na nomu vakanananu kei na yalomu kei na veitiki ni yagomu kecega.¹³

Niu kila vinaka tu ni sega soti ni dede na gauna, au sa na tu kina ena mata ni Turaga ka soli itukutuku ena noqu vosa, au sa vakuria kina oqo na noqu ivakadinadina tabu vakataki au ni rau a rairai dina vua na gonetagane ko Josefa Simici, na Kalou na Tamada Tawamudu, kei na Turaga ko Jisu Karisito sa vakaturi cake tale. Au vakadinadinataka ni iVola i Momani e ivakadewa ni dua na itukutukuvolai ni gauna makawa ni veimatanitu era a bula ena ra ni vuravura, ena vanua era a vakasaututaki ka qaqa kina ena veigauna era dau muria kina na ivakaro ni Kalou, ia era a vakarusai vakalevu ena ivalu ni vanua baleta ni ra sa dau guilecava na Kalou. E tu ena ivola oqo na ivakadinadina bula ni Turaga ko Jisu Karisito ni sai Koya na iVakabula ka Dauveivueti ni kawatamata.

Au vakadinadinataka ni matabete tabu ruarua, na Eroni kei na Melikiseteki, kei na veivakadonui me da cakacaka ena yaca ni Kalou, sa vakalesui mai ki vuravura mai vei Joni na Dauveipapitaisotaki, kei Pita, Jemesa, kei Joni; na idola kei na dodonu tale eso era a qai vakalesui veitaravi mai, ka vakakina na kaukauwa kei na dodonu ka ra a soli mai ena veisala vakalou oqori era sa tu ena keda maliwa ena gauna oqo. Ena veika oqo au sa solia kina na noqu ivakadinadina vei ira kece era rogoca tiko mai na domoqu. Au yalataka ena yaca ni Turaga ni ko ira kece era rogoca na neitou itukutuku, ka ciqoma ka bulataka na kosipeli, era na tubu cake ena vakabauta kei na kila ka. Ena vakaikuritaki na vakacegu ena nodra dui bula kei na nodra dui itikotiko ia ena kaukauwa ni Yalo Tabu era na tukuna kina na veivosa ni ivakadinadina kei na dina.¹⁴

Vakatutu ni Vuli kei na Veivosaki

Vakayagataka na vakasama eso oqo ena nomuni vulica na iwase oqo se ena nomuni vakavakarau mo ni veivakavulici. Raica na tabana e v–ix, me baleta na ikuri ni veivuke.

Raica lesu na ivola a vola o Elder Spencer W. Kimball ki vei Andrew na luvena (tabana e 80–81), raica na kena vakatauvatani na ivakadinadina ki na dua na isulu vakamatana. Na veika cava soti o ni sa sotava kei na nomuni nanuma era tara cake na nomuni “wa ni tali koula ni ivakadinadina”? Vakasamataka na veika sa vakayacora na Turaga me vukei kemuni kina ena nomuni talia na nomuni wa ni tali ni ivakadinadina ki na dua na isulu vakamatana.
Na sala cava o ni nanuma e vukei Andrew Kimball kina na nona ciqoma na ivola nei tamana? Na veigauna vinaka cava beka e tu vei ira na itubutubu me ra wasea kina na nodra ivakadinadina vei ira na luvedra? Ena rawa vakacava ni da vukei ira na itabagone me ra ciqoma ka kila na veivakauqeti vakayalo ka na vakavuna na ivakadinadina?
Raica lesu vakalekaleka na tabana e 82–88, vakasaqara na vosa kei na malanivosa e vakayagataka ko Peresitedi Kimball me vakamacalataka kina na noda sasaga me da rawata ka vaqaqacotaka na noda ivakadinadina. Kevaka e dua na tamata e vakila ni sa tekivu me yavavala na nona ivakadinadina, na cava e rawa ni cakava na tamata oqori?
Vulica na ivakasala nei Peresitedi Kimball me baleta na soqoni ni lolo kei na soli ivakadinadina (tabana e 87–88). Na cava o ni nanuma e vuna na kena dau vakayacori na veisoqoni vakaoqo? Na cava na vuna e dau kaukauwa cake kina na noda ivakadinadina ena gauna eda wasea kina? Na cava e rawa ni da cakava me da vakadeitaka kina me soqoni vinaka duadua ena dua na vula na soqoni ni soli ivakadinadina?
Raica lesu na ivakasala nei Peresitedi Kimball ena sala me da wasea kina na noda ivakadinadina (tabana e 88–89). Na cava na vuna e koto kina ena vosa “Au kila” e dua na kaukauwa levu?

iVolanikalou Veiwekani: 1 Korinica 12:3; 1 Pita 3:15; Alama 5:45–46; Moronai 10:4–7; V&V 42:61; 62:3

Christ and Peter — Me isau ni ivakadinadina nei Pita, e kaya kina na iVakabula, “O sa kalougata Saimoni Pa-Jona: ni sa sega ni vakatakila vei iko na lewe kei na dra, na Tamaqu ga sa tiko mai lomalagi” (Maciu 16:17).

woman reading scriptures — Ki vei ira era vakasaqara tiko e dua na ivakadinadina, “na kena iwalewale e vinakati sai koya: na vuli, vakasama, masu, ka cakava.”