Wase 24

Wasea na Kosipeli

E dodonu me da vakabalavutaka na noda ikalawa ena noda wasea na kosipeli vei ira na tani.

Na Bula nei Spencer W. Kimball

Ena dua na ilakolako ki Quito e Ecuador, ni se lewena tiko na Kuoramu ni iApositolo Le Tinikarua, a tiko voli kina ena dua na valenikana ni otela ko Elder Spencer W. Kimball, vata kei na dua na ilawalawa ka ratou okati kina e va na daukaulotu gone. “A tukuna vei ira na vo ni ilawalawa ni o koya na dauveiqaravi ni valenikana e qaravi ira tiko e dua na cauravou musudonu ka rawa ni yaco me dua na daukaulotu vinaka ni Lotu. E a otataka sara o Elder Kimball na madrai kei na sucu, ka taroga na dauveiqaravi ni se tiko mai vale e dua na luvena. ‘E dua na tagane,’ e sauma yani na dauveiqaravi. ‘Ena vakabulabulataki koya na madrai kei na sucu,’ e kaya ko Elder Kimball, ‘ia ena bulabula cake sara kevaka o na vakani koya ena kakana eratou na solia na cauravou daukaulotu oqo.’ E veilecayaki na kena irairai na dauveiqaravi oqo. E qai vakamacalataka ko Elder Kimball ni o iratou na cauravou eratou daukaulotu ka tu vei iratou na kosipeli i Jisu Karisito me ratou vakatavuvulitaka. E vakaraitaka na dauveiqaravi na nona vinakata me ratou vakavulici koya na daukaulotu.”¹

Sa dau veivagolei vakalevu ko Peresitedi Kimball ki na ivakaro me kau yani na kosipeli ki “vuravura taucoko” (Marika 16:15). E kerea me vakalevutaki cake na daukaulotu, vakauasivi ko ira na cauravou kei ira na veiwatini qase, ka taleva vei ira kece na lewe ni Lotu me ra vakaitavi ena cakacaka ka ilesilesi vakalou oqo. “Na noda gagadre cecere, ka noda ilesilesi cecere,” e vakavuvulitaka,“sai koya me da kauta yani vei ira na tamata kece e vuravura na kadrala ni kila ka me vakararamataka na nodra sala mai na tawakilai kei na butobuto ki na reki, na vakacegu, kei na dina ni kosipeli.”²

iVakavuvuli nei Spencer W. Kimball

Sa yalataka tu vei keda na Turaga na veivakalougatataki cecere ena noda wasea na kosipeli.

Sa koto na ogaoga vakayalo ena qaravi ni cakacaka ni kaulotu, ena soli ni yaca, ena veitokani vei ira na daukaulotu ni ra soli lesoni. E ka talei ka veivakaiyautaki. Na gauna na sasaga, na vakatataro, era yaga vakalevu ni sa vakaraitaka e dua na yalo na nona sa veivutuni ka vakabauta kei na nona sa gadreva me papitaiso. Vakasamataka mada na kena vakasakiti ni ra kaya, “Ni dou tiko eke, ka da veivosakitaka tiko na veika oqo, e vaka niu nanuma lesu na veika au dau kila tu e liu,” se, “Ena sega ni rawa ni dou lako me yacova ni dou sa tukuna vei keitou na veika kece dou kila tu me baleta na Lotu vakalesui mai”³

E kauta mai na vakacegu kei na reki ki na noda bula na wasei ni kosipeli, vakalevutaka na yaloda ena vukudra na tani, vakalevutaka na noda dui vakabauta, vaqaqacotaka na noda veiwekani kei na Turaga, ka vakalevutaka na noda kila na dina ni kosipeli.⁴

Sa yalataka tu na Turaga na veivakalougatataki cecere vei keda me veiraurau kei na ivakarau ni noda wasea na kosipeli. Eda na rawata na veivuke mai na yasa kadua ni ilati ni yaco na cakamana vakayalo. Sa kaya vei keda na Turaga ni na vosoti vakarawarawa na noda ivalavala ca ni da vakalesuya mai na yalo vei Karisito ka tudei ena noda wasea na noda ivakadinadina ki vuravura, ia sa dina sara ni oi keda kece eda sa vakasaqara tiko na ikuri ni veivuke ena noda vosoti ena noda ivalavala ca. (Raica V&V 84:61.) Ena dua vei ira na ivolanikalou cecere me baleta na cakacaka ni kaulotu, na wase 4 ni Vunau kei na Veiyalayalati, e tukuni kina vei keda ni kevaka eda na qarava na Turaga ena veiqaravi vakaulotu “ena yalomudou taucoko, na nomudou kaukauwa taucoko kei na nomudou nanuma kecega,” me rawa kina ni da “kunei ni dou sa sega ni cala ena mata ni Kalou ena siga mai muri” (tikina 2).

E vakuria na Turaga ena nona kaya:

“Ia kevaka drau sa vunau tiko ena nomudrau bula taucoko ka sa saumaki mai kina e dua na tamata, sa na vuabale sara na nomudrau marau ena matanitu i Tamaqu!

“Ia kevaka sa vuabale na nomudrau marau ni drau sa vakabula mai e dua ki na matanitu i Tamaqu, sa na uasivi sara na nomudrau marau kevaka drau sa vakabula rawa e lewevuqa!” (V&V 18:15–16.)

Kevaka e cakacaka tiko e dua ena nona bula taucoko ka kauta mai ke dua mada ga na yalo! Sa dua na marau! E dua na yalo! Sa dua na ka talei! Io, ena solia vei keda na Kalou na mataqali loloma me baleta na yalo!⁵

Sa vakacolata na Turaga vei ira kece vakayadua na lewe ni Lotu e dua na itavi me ra Nona italai.

Au diva me rawa ni da tauyavutaka ena yalodina e yalodra na lewe ni Lotu kece sara na kila ni kevaka sa rawa ni lewe ni lotu e dua, sa rawa talega me daukaulotu; ka na sega ni gadreva me vakatikori vakatabakidua ena veikacivi ko ya. Sa nodra icolacola ka nodra ilesilesi me ra kauta na kosipeli ki vei ira era tu vakavolivoliti ira. Eda vinakata na tagane yadua, na yalewa, kei na gone me ra kila na nodra itavi dodonu. Sa rui ka bibi. Ni sai koya oqo na itukutuku ni kosipeli: Eda na rawata na veivakalougatataki mai na kosipeli, ka da qai lako yani ka wasea na veivakalougatataki oqori vei ira na tani.

Eda tamata osooso; ia a sega ni kaya na Turaga, kevaka e rawa vei kemudou, e rawa beka ni dou vunautaka na kosipeli.” E kaya o koya, “Sa kilikili ki na tamata yadua me vulica ka kila na nona itavi” (V&V 107:99) ia “sa nodra itavi na tamata yadua era sa rogoca na nomudou ivunau, me ra vunauci ira na wekadra.” (V&V 88:81.)

Me da na nanuma tiko ni sa noda tiko eke na Kalou. O koya na noda ivukevuke. Ena dolava na sala, ni a solia ko koya na ivakaro.⁶

Sa dua na ka talei, kemuni na taciqu kei na ganequ ko ni lewena vata kei au na matanitu ni Kalou, me da vakacolati mai vua na Turaga me da italai ni Nona vosa vei ira na tacida kei na ganeda era se bera ni lewe ni Lotu. Me da vakasamataka mada kevaka me veisautaki na itavi—ni o sega ni lewe ni Lotu ia e Yalododonu Edaidai na nomu itokani sega ni lewenilotu. O na vinakata beka me wasea vei iko na kosipeli? O na qai reki beka ena vuku ni dina vou o sa vulica? Ena levu cake beka na nomu lomana ka rokova na nomu itokani ka wasea vata kei iko na dina oqo? Io, na isau ni veitaro kece oqo na: Io!⁷

Kemuni na taciqu kei na ganequ, au taroga kevaka eda sa cakava tiko na ka taucoko eda rawata. Eda sa rawata tiko beka vakavinaka na noda ilesilesi me da vakavuvulitaka na kosipeli vei ira na tani? Eda sa vakarau tu beka me da vakabalavutaka na noda ikalawa? Me da vakarabailevutaka na noda rai?⁸

Na siga me da kauta yani kina na kosipeli ki na veivanua e vuqa kei ira na tamata e vuqa sai koya oqo. Me da vakasamataka vakabibi cake na noda itavi me da wasea na kosipeli ka kakua soti na veika ga eda dui taleitaka. Na veikacivi ni Turaga e sega soti ni dau vinaka vei keda. Sai koya oqo na gauna me tiki bibi kina ni Lotu na solibula. Sa dodonu me da vakalevutaka cake na noda yalodina me rawa kina ni da cakava na cakacaka sa vakarautaka na Turaga.… Na nona vosa ni veitalatala na iVakavuvuli vei iratou na Nona iAposito ni vakarau me lako cake sai koya, “Dou lako yani ki vuravura taucoko, ka vunautaka na itukutuku vinaka ki vei ira na tamata kecega.

“O koya sa vakabauta ka sa papitaisotaki ena bula; ia ena cudruvi ga ko koya sa sega ni vakabauta.” (Marika 16:15–16.)

Me da kakua ni guce se oca ena caka vinaka. Me da vakabalavutaka na noda ikalawa. E sega walega ni koto kina na noda tiko vinaka tawamudu, ia sa koto talega kina na nodra tiko vinaka tawamudu e vuqa na tacida kei na ganeda era se bera ni lewena na Lotu dina oqo. Au dau taleitaka na nona vosa na Parofita ko Josefa Simici ena dua na ivola ka a vola ki na Lotu mai Nauvoo ena ika 6 ni Sepiteba, 1842: “Dou gumatua sara me da vakuria tikoga na inaki uasivi oqo? Dou yaloqaqa ka ia tikoga ki liu.… dou ia tikoga mo dou rawata na qaqa!” (V&V 128:22.)⁹

Eda na vukei ira na tani me ra ciqoma na kosipeli vakalesui mai, ena noda veivakauqeti vinaka kei na noda sasaga.

Na nodra cakacaka ni kaulotu na lewenilotu sa idola ni tubucake ni Lotu ena veigauna mai muri.¹⁰

Au vakila ni Turaga e sa biuti ira tu ena loma ni noda veitokani kei na veikilai e vuqa sara na tamata era sa vakarau tu me ra curuma mai na Lotu oqo. Eda sa kerea kina mo ni masulaki ira me ra kilai ka qai kerea na veivuke ni Turaga mo ni vakaveikilaitaki ira ki na kosipeli.¹¹

Me matata tiko vei keda ni dodonu me da vakatakatai ira mada na wekada ni bera ni da qai rawa ni vakasalataki ira vakavinaka. E dodonu me ra vakila taumada na wekada na noda veitokani dina kei na noda veikauwaitaki. Eda na vinakata me da sureti ira na wekada, e sega ni da cudruvi ira se vakarerei ira.¹²

E dina na kosipeli. Ena noda vulica ka bulataka na kena ivakavuvuli ka vakasaqara na veivuke ni Yalo Tabu, ena rawa kina vua e dua e dau vakasaqaqara vagumatua me kila vakataki koya ni dina. Ia ena vakaevei na kena rawarawa me kilai ka ciqomi kevaka e rawa talega ni raica o koya e vakasaqara tiko na dina na cakacaka ni ivakavuvuli ni kosipeli ena nodra bula na vakabauta. E sega tale ni dua na veiqaravi cecere cake e rawa ni soli ki na ilesilesi ni kaulotu ni Lotu oqo mai na noda ivakaraitaki ni bula va-Karisito.¹³

Na ivakarau ni kena kacivaki vinaka duadua na Lotu, sai koya na nodra bulataka na kosipeli ko ira na lewenilotu bula dodonu.¹⁴

Na ka e dodonu me ra cakava na lewenilotu, ena ivakaraitaki vinaka kei na wasei ni ivakadinadina, sai koya me ra vakaraitaka vei ira na sega ni lewenilotu na marau e kauta mai na bulataki ni kosipeli kei na kena kilai ka me ra vukei kina me ra laveti cake ki na dua na ivakatagedegede era na ciqoma kina vakalevu cake na veivakavulici vakavosa.¹⁵

Na sasaga dina ni tukituki e katuba ena kaulotu sai koya me ra vakasaqaqara na lewenilotu ka ra veituberi na daukaulotu.… Ni ra vakasaqaqara na lewenilotu era na dau kauwaitaka me ra ia tikoga na veiwasei, ka na lailai sara na dauvakadikeva na lotu era na sega ni papitaiso, ia ko ira era papitaiso e vakavuqa ni ra na dau bulabula tikoga ena lotu.¹⁶

Na noda sasaga sai koya me da raica ena kena totolo duadua e rawa, o cei vei ira na luvena na Tamada e sa vakarau tu vakayalo me papitaisotaki ki na matanitu. E dua na sala vinaka me da kila kina sai koya me da vakaraitaki ira yani na noda itokani, o ira na semati vakadra vei keda, o ira na wekada, kei ira na noda veikilai vei ira na daukaulotu ena kena gauna totolo duadua.¹⁷

Ena so na gauna eda dau guilecava ni vinaka cake me da vosota na kena vakacacani na noda veiwekani vata kei na dua na itokani mai na noda vakuwai koya ki na bula tawamudu ena noda galu tu ga.¹⁸

Kakua ni waraka na veiwasei babalavu se na gauna dodonu ka uasivi. Na ka o na gadreva mo cakava sai koya mo kila se sai koya oqo na digitaki. “Raica era na rogoca na domoqu na noqu tamata digitaki, ka sega ni vakaukauwataka na yalodra.” (V&V 29:7.) Kevaka era na rogoca ka dolava na yalodra ki na kosipeli, ena vakatakilai ena gauna vata ga. Kevaka era na sega ni vakarorogo ka vakaukauwataka na yalodra ena vakatitiqa kei na vosa tawakilikili, era se bera ni vakarau. Ena mataqali gauna vakaoqori kakua ni mudu ni lomani ira tiko ka dau veiwasei vata kei ira ka waraka na gauna ka tarava mo kila kina kevaka era sa vakarau. Ko na sega ni vakayalia na nodra veitokani. Era na rokovi iko tikoga.

Io, era tu dina na ka dau veivakayalolailaitaki, ia ena sega ni dua na ka ena yali. E sega ni dua ena vakayalia na nona itokani me baleta ga ni sa sega ni vinakata me tomana tiko na nona vakarorogo vei rau na daukaulotu. E rawa ni tomana tikoga na lewenilotu na nona veitokani ka sega ni tagutuva na kena isema ni veiwekani ki na matavuvale ko ya. Ena so na gauna e dau balavu cake na gauna me ra qai curu mai kina ki na Lotu eso, ni vakatauvatani vei ira eso tale. Sa dodonu me na tomana tikoga na nona veitokani na lewenilotu ka tovolea tale ena dua na gauna me veisautaka. Kakua ni yalolailai ena vuku ga ni kena sega beka ni toso na cakacaka. E drau vakadrau na italanoa e tu me baleta na yaga ni vosota vakadede ena veiqaravi vakadaukaulotu.¹⁹

Na cakacaka ni kaulotu e okati kina na nodra lomani ka vakaitokanitaki tikoga na curuvou mai ena lotu kei ira era qai vakabulabulataki walega mai.

Ni da papitaisotaka e dua e cala vakalawa me da laiva me ra sisi laivi tale yani vakamalua mai na Lotu ka vakatalega kina mai na kosipeli ena vuku ni nodra sega ni vakaitokanitaki. E dua na itavi bibi na vakaveitokanitaki. E dodonu me rawa vei keda me da vakaitokanitaki ira na tamata kecega era curu mai. Oqori na vuna eda vinakata kina me ra cakava na lewenilotu na cakacaka ni kaulotu ka vakakina me ra vukei mai vei ira na daukaulotu. Eda vinakata me ra lako na tamata ka cakava na cakacaka oqo baleta ni ra na tikoga vakaveivolekati ni sa papitaiso oti na tamata oqori. Era na rawa ni vakaitokanitaki ira tikoga; era rawa tikoga ni kacivi ira ka lako vata ki na soqoni ni matabete; e rawa tikoga ni ra vakayaloqaqataki ira ka vukei ira ena nodra lotu vakamatavuvale.²⁰

Ena sega ni rawa ni da vakabibitaka cake tale na gadrevi ni kena qaravi na cakacaka ni kaulotu ena matabose ni matabete me rawa kina ni ra vakaitokanitaki ka vakaveikilaitaki ki na veiparokaramu ni Lotu ko ira era vakadikeva tiko, ena dua na sala me rawa ni totolo kina na nodra yaco me ra lewenilotu yalodina ka bulabula. Sai koya oqo e dua tale na sala ena rawa kina vei ira kece na lewe ni Lotu me ra vakaitavi ena veigauna ena veiqaravi vakadaukaulotu—ena nodra veiwasei, veitokani ka veivakayaloqaqataki vei ira na lewe ni Lotu vou.²¹

Sa ka bibi sara me dau lesi na nodra dauveituberi ni matavuvale na saumaki mai ki na Lotu ni oti ga na nodra papitaiso, me ra na vakaitokanitaki ira ena sala ni veikauwaitaki dina. O ira na dauveituberi ni matavuvale oqo, ena nodra cakacaka vata kei ira na nodra vakaitutu ni matabete, me ra raica ni soli vei ira kece na saumaki mai ena yalomatua e dua na itavi me ra bolei kina ka vakakina e dua na gauna kei na veivakayaloqaqataki me vakalevutaka na nona kila ka vakosipeli. E dodonu me vukei ena nona tauyavutaka na veiwekani ena bula veimaliwai vata kei ira na lewe ni Lotu me kakua kina ni galili ena nona tekivuna na nona bula me vaka e dua na Yalododonu Edaidai bulabula.²²

Sa dua na ka veivakauqeti ka marautaki me da raica… na nodra karona ka vukea ka tubera ka masulaka na Yalododonu o ira era dau curu mai e veisiga ki na matanitu ni noda Turaga. Ni tomana tiko na nomuni veilaveti vakataki kemuni—ka vakakina vei ira na lewevuqa tale era na qai curuma mai na Lotu. Kidavaki ira ka lomani ira ka veitokani vata kei ira.²³

Na noda itavi vakaveitacini ena Lotu me da vukei ira era lako sese voli me ra kunea na nodra sala, ka vukei ira era sa vakayalia na veika vakamareqeti me ra kunea tale na nodra iyau talei. E vakatavuvulitaka vakamatata vei keda na ivolanikalou ni sa icolacola ni lewenilotu yadua me vaqaqacotaka na wekana lewenilotu.

E vakabibitaka ena yalololoma ia e dusia sara toka vakadodonu na iVakabula na veika oqo ena nona kaya vei Pita, “Ia ni ko sa saumaki tale, mo vakataudeitaki ira na wekamu” (Luke 22:32). Meu tukuna mada vei kemuni na veika vata oqori: Ni dou sa saumaki tale, dou yalovinaka ka vakataudeitaki ira na wekamudou. Era lewevuqa era viakana tu, ena so na gauna era sega tu ni kila na cava na vuna. Era tu na dina vakayalo kei na ivakavuvuli ka rawa ni vaka na yavu ki na nodra bula, ivakaruru ni yalodra, vakacegu ki lomadra kei na nodra vakanananu kevaka walega me da vagoleya na noda masu kei na noda kauwai vei ira.…

Ena dua beka e kaya, “Eda kila e dua na turaga se dua na marama ka na sega sara ni rawa ni tarai.” Io e rawa sara ga ni tarai. E rawa ni vakalougatataki ka vukei o koya! E tu na yalayala ni ivolanikalou. E vakaoqo, “Sa sega ni mudu na loloma.” (1 Kori. 13:8.) E sega sara! Na loloma, e vakavotukanataki vakabalavu, ena sega sara ni mudu na kena mana se ki na tamata yadua, vei keda, vei kedaru ruarua, se vei ira era vakavolivolita na tamata yadua.

… Au vakabauta ni sega ni dua na tamata e sega ni rawa ni saumaki—se meu kaya beka me vakabulabulataki—kevaka e vakayacora na kena ivalavala dodonu na tamata dodonu ena kena gauna dodonu kei na kena yalo dodonu. Au kila ni na teguva na noda sasaga na nona veivakalougatataki na Tamada Vakalomalagi kevaka eda sa vakarautaki keda, ka vakakina kevaka eda bulataka ena marau na ivakavuvuli ni kosipeli, ka vakasaqara na nona veivuke na Tamada Vakalomalagi.…

Me ra vuki ena vuku ni loloma kei na veivakauqeti na dauveituberi ni matavuvale ena kuoramu ni matabete, na dausiko vuvale ena iSoqosoqo ni Veivukei, na turaga kei na marama veiwatini, na veiluveni, kei ira na lewenilotu kecega ena veivanua era lomana na Turaga ka gadreva me ra cakava na nona lewa ka cakava na cakacaka dodonu e gadrevi ena nodra vukei ira era vakaleqai tu. Na kena dau basika mai vagauna na yalo e taleitaka ena sega ni kune kina na vuana e gadrevi. Ia e rawa ni yaco mai na vuana eda vinakata, ka na yaco wasoma mai ka levu cake mai na veika eda rawa ni vakasamataka, kevaka eda na vakalevutaka ena yalomasumasu na noda sasaga. Ena sega walega ni teguva kina na noda bula kei na nodra bula na tani na veivakalougatataki digitaki ni Turaga, ia eda na voleka yani vua na Turaga ka vakila na Nona loloma kei na Yalona.²⁴

E dodonu me ra vakarautaki ira na luvedra ki na kaulotu na itubutubu.

Eda gadrevi ira na cauravou ka tu na nodra bula ena itabayabaki ni kaulotu me ra kalawa mai ki liu vakalewe levu cake mai na kena ena gauna oqo me ra taura kina na nodra itavi dodonu, na nodra galala, kei na veivakalougatataki me vaka ni ra italai ni Kalou ena inaki ni kaulotu. Sa na vakaevei na noda vakaukauwataki vata kei ira kevaka era sa vakarautaki ira na cauravou kece ki na cakacaka ni Turaga!²⁵

Niu kerea vakalevu cake na daukaulotu, au sega ni kerea tiko na daukaulotu dravuisiga ena ivakadinadina se daukaulotu sega ni kilikili. Au kerea me da tekivu kusarawa ka tuberi ira na daukaulotu vinaka cake ena veitabana kei na veitabanalevu yadua e vuravura taucoko. Oqori e dua tale na bolebole—era na kila na itabagone ni sa dua na galala cecere me da lako ena kaulotu ka sa dodonu me taucoko tu na nodra bula vakayago, taucoko na nodra vakasama, ka taucoko na nodra bula vakayalo, ka ni “sa sega sara ni vakadonuya na Turaga e dua sa ivalavala ca.” [Alama 45:16.]

Au kerea tiko na daukaulotu sa vakavulici tu vakavinaka ena ivunau ka tuberi mai na matavuvale kei na veisoqosoqo ena Lotu, ka ra lako ki na kaulotu ena gagadre levu. Au kerea tiko… me da tuberi ira vakavinaka cake, kusarawa, ka vakabalavu cake, me rawa kina ni ra nanamaki ki na nodra kaulotu ena marau.²⁶

Me da vakasamataka na iwiliwili lelevu. Me da vakarautaki ira vakavinaka cake na noda daukaulotu, e sega walega ena vosa ia ena ivolanikalou ka qai kena ilutua e dua na ivakadinadina kei na dua na buka caucaudre ka solia na kaukauwa ena nodra vosa.²⁷

Talai ira yani na nomu cauravou ki na kaulotu. Ena gauna ga era yaco yani kina ki ligamu, sa tekivu sara mo vakavulici ira. Era na rogoca na nomu masu ena bogi kei na mataka. Era na rogoci iko ena nomu masu vua na Turaga me veivuke ena kena dolavi na katuba ki na veimatanitu kecega. Era na rogoca me baleta na cakacaka ni kaulotu. Era na rogoca na nomu masulaka na nomu bisopi kei na nomu peresitedi ni kaulotu kei ira kece era qaravi iko tiko, ia ena yaco me kadre ka tubu e yalodra.²⁸

Ena veigauna kecega au raica kina e dua na cauravou lailai, au na kaya, “Ko na yaco mo dua na daukaulotu cecere, se sega beka?” Mo bucina ki na nona vakasama e dua na sorenikau. E vaka ga e dua na itei kei na kau tale eso. Ena tubu ka tubu, ia kevaka erau na vosa tiko e dua na tama kei na tina vei ira na nodrau cauravou lalai… me baleta na lako ki na kaulotu—ena gauna era se dramidrami kina,—ena tubu ka tubu na sorenikau lailai oqori.²⁹

Ena vinaka vei ira na itubutubu me ra vakarautaki ira na luvedra me ra maroroi ilavo ni ra se gone sara. Me ra rawata na yalo ni mamaroroi. Me ra rawata talega na yalo ni vuli kei na masu ena vuku ni kosipeli, me ra raica vakataki ira na sala e cakacaka kina na kosipeli ena nodra dui bula kei na nodra bula o ira era tu vakavolivoliti ira. Me ra rawata na yalo ni veiqaravi ena gauna kece ni nodra tubu cake tiko ka vukei ira na tani me ra dau veivosakitaka na reki ni itukutuku ni kosipeli ki na nodra bula. Me ra vakayagataka me dua na buturara ni veituberi me rawati kina na kila ka vakayalo ka na yaga vakalevu sara vei ira ka vakatalega kina vei ira na tani na kalasi kei na veika era sotava ena semineri kei na yavulotu. Me ra vakavakarau ena nodra raica me savasava ka kilikili tu na nodra bula ena nodra vinakata mai vu ni yalodra me ra vukea na Turaga ena kena kau yani na kosipeli vei ira era sa vakarau tu me ra ciqoma.³⁰

Au nuitaka ni ra na dau lotu vakamatavuvale ena veibogi ni Moniti ka me kakua sara ni cala. Me dua na tikina bibi e veitalanoataki kina na cakacaka ni kaulotu, ia ko ira na tama kei na tina kei ira na gone ena nodra gauna ni masu me ra na cabora na masu ka na itakele ni qaqana na tikina bibi oqo—me na tadola na katuba ni veimatanitu vei keda ka me kena ikarua, o ira na daukaulotu, o ira na cauravou kei na goneyalewa ena Lotu me ra gadreva me ra vakatawana na veitabana ni kaulotu oqori ka kauti ira mai na tamata ki na Lotu.³¹

E gadreva na Lotu me ra veiqaravi vakadaukaulotu na veiwatini.

Kevaka ena vakatara na bula kei na veika tale eso, sa rawa ni ra tuvalaka yani na itubutubu na gauna me ra na lako talega kina ki na kaulotu.³²

Eda sa guilecava, o keda na tamata qase cake, o keda eda sa vakacegu mai na cakacaka ka kunea e dua na vanua rawarawa me da lako kina vata kei na noda iyaya ni keba kei na veigauna vinaka tale eso. Eda sa kunea e dua na sala rawarawa me da vakamamautaka kina na noda vakasama kei na lomada ni dodonu me toso tikoga na cakacaka—eda kaya, ni da na talai ira yani na noda gonetagane.

E noda kece na itavi oqo. E sega ni o keda kece eda na rawata, ia e vuqa, e vuqa sara vei keda e rawa.³³

E rawa ni da vakayagataka e drau vakadrau na veiwatini, na itabaqase me vakataka eso vei kemuni, oi kemuni era sa susugi oti na nomuni matavuvale, o kemuni o ni sa vakacegu mai na nomuni bisinisi, o kemuni e rawa ni ko ni lako… me vakatavuvulitaka na kosipeli. E rawa ni da vakayagataka e drau vakadrau na veiwatini. Mo ni lako ga ka veitalanoa vata kei na nomuni bisopi—oqori ga na ka e gadrevi mo ni cakava. Tukuna vua, “Keirau sa vakarau tu me keirau lako, kevaka e rawa ni ko vakayagataki keirau.” Au kila ni rawa ni dua na nomuni ilesilesi.³⁴

Oqo na cakacaka ni Turaga. Eda cakacaka tiko ena vukuna. Sa vakaroti keda vakatabakidua ko Koya, ia eda sega tu ni kilai vei ira e lewevuqa na tamata e vuravura. Sa kena gauna me da vakadreta na ivau ni toloda ka toso ki liu ena kaukauwa vakavoui ena cakacaka cecere oqo. Eda sa veiyalayalati, o iko kei au, me daru cakava. Me da na cavuta vata kei koya na cauravou ko ya, ka a kunei ena valetabu mai vei rau na nona itubutubu, ni dabe maliwai ira na vuniwai, “Meu tiko ena vale nei Tamaqu.” [Luke 2:49.]³⁵

Vakatutu ni Vuli kei na Veivakavulici

Vakayagataka na vakasama eso oqo ena nomuni vulica na iwase oqo se ena nomuni vakavakarau mo ni veivakavulici. Raica na tabana e v–ix, me baleta na ikuri ni veivuke.

Ena sala cava e “ogaoga vakayalo” kina na cakacaka ni kaulotu? (tabana 302). Ni da wasea na kosipeli, na veika “talei ka veivakaiyautaki” vakacava e rawa ni da rawata? (Me kena ivakaraitaki, raica na italanoa ena tabana e 301)
Raica lesu na tabana e 302–03, ka vakaraica na veivakalougatataki eda na rawata ni da wasea na kosipeli. Ena gauna cava o ni sa bau sotava kina e dua na veivakalougataki vakaoqo?
Wilika na ikava ni parakaravu taucoko ena tabana e 304. Na cava o ni nanuma ni kena ibalebale “vakabalavutaka na noda ikalawa” ka “vakarabailevutaka na noda rai”? Eda na muria vakacava na ivakasala oqo ena cakacaka ni kaulotu?
Raica lesu na iwasewase ka tekivu ena tabana e 305. Vakasamataka se veivosakitaka na ivakasala o ni kunea me baleta na kena wasei na kosipeli vei ira na matavuvale kei ira na itokani. Me vaka beka oqo: (a) Na cava e rawa ni da cakava me da “vakatakatai ira kina na wekada ”? (b) Na sala cava beka e rawa ni da yaco kina me da “kacivaka” na Lotu? (c) Na cava eso na ka e rawa ni yaco ena noda dau waraka na “gauna dodonu ka uasivi” me wasei kina na kosipeli? (d) Me na vakacava beka na ivakarau ni noda raici ira na noda matavuvale kei ira na itokani era sega ni ciqoma na noda veisureti me ra vulica na kosipeli?
Na cava beka eso na nodra gagadre na lewenilotu vou? Na lewenilotu luluqa vakalotu? Na cava e rawa ni da cakava me da vukei ira kina? (Raica tabana e 308–10.)
Na ivakarau ni bula vakacava beka era na vakasaqara na veiliutaki ena Lotu mai vei ira na daukaulotu? (Me baleta eso na kena ivakaraitaki, raica na tabana 310–12.) Na cava e rawa ni ra cakava na itubutubu kei ira tale eso me ra vakatorocaketaka kina na ivakarau ni bula oqori? Na cava eso na sala e rawa kina vei ira na itubutubu kei ira na luvedra me ra muria na ivakasala nei Peresitedi Kimball me ra maroroi ilavo me baleta na kaulotu?
A vakauqeti ira na veiwatini qase cake o Peresitedi Kimball me ra lako ki kaulotu (tabana e 312–13). Na cava eso na digidigi kei na madigi e solia na Lotu vei ira na daukaulotu veiwatini? Na cava e rawa ni ra cakava na veiwatini me ra vakavakarau kina ki na veiqaravi? Na sala cava o ni sa vakayacora tiko kina na cakacaka ni kaulotu ena gauna oqo?

iVolanikalou Veiwekani: Mosaia 3:20; Alama 26:1–16; Ilamani 6:3; Moronai 6:3–4; V&V 84:88