Wase 5

Na Masu, sa iDewadewa ni Kaukauwa Vakayalo

Ni da masu vakayalo ka vakaidina, eda na lomani, vakaukauwataki, ka vaqaqacotaki mai vua na Tamada Vakalomalagi.

Na Bula nei Spencer W. Kimball

“Sa dau taleitaka vakalevu na yaloqu na veika e baleta na masu, na kaukauwa kei na veivakalougatataki ni masu,” a kaya o Peresitedi Spencer W. Kimball. “Ena noqu bula taucoko au sa ciqoma kina e vuqa sara na veivakalougatataki kau na sega ni rawa meu vakavinavinakataka rawa. Sa rui vinaka vei au na Turaga. Au sa sotava talega e vuqa na tauvimate kei na bula vinaka kau sega ni lomalomaruataka ena yaloqu kei na noqu vakasama ni sa tiko dina e dua na Kalou mai lomalagi ka sai Koya na Tamada, ka sa dau rogoca ka sauma na noda masu.”¹

E a yaco e dua na ka oqo ena gauna erau a lako kina ki Niu Siladi o Peresitedi Kimball vata kei Camilla, na marama watina. Ni rau yaco yani ki na korolevu o Hamilton, erau a tauvimate bibi sara ka a kerea sara o Peresitedi Kimball vei Peresitedi N. Eldon Tanner, iMatai ni Daunivakasala ena Mataveiliutaki Taumada me matataki koya ena dua na soqoni vakavanua me a vakayacori ena yakavi o ya. Ni oti toka e vica na auwa, e a “yadra cake mai vakasauri o Peresitedi Kimball ka tarogi Dr. Russell Nelson, ka yadravi koya tiko. ‘Baraca Nelson, na gauna cava e dodonu me tekivu kina na soqo o ya ena yakavi nikua?’

“ ‘Ena vitu na kaloko, Peresitedi Kimball.’

“ ‘Sa vica na kaloko qo?’

“ ‘Sa voleka na vitu.’

“Sa buno levu tu o Spencer. Sa takali na nona tauvimate.… A kaya, ‘Tukuna vei Sisita Kimball ni tou sa na lako.’

“E a duri mai o Camilla, erau a vakaisulu sara vakatotolo ka vodo yani vakalekaleka ki na vanua ni soqo e se qai tekivu walega. E a se qai vakamacalataka oti toka ga o Peresitedi Tanner ena itekivu ni soqo ni rau sa na sega ni yaco mai ena vuku ni tauvimate. A cabora na idolamasu e dua na lewe ni vanua itabagone ka a kerea vakabibi, ‘Keimami sa mai soqoni vata oqo e lewe tolu na udolu na itabagone e Niu Siladi ka keimami vakarau lagasere ka meke vua na nomuni parofita. Sa kerei mo ni vakabulai koya ka kauti koya mai ke.’ Ni cava na masu, sa yaco yani na nodrau motoka o Spencer kei Camilla ka vadugu na vanua ni qito o ya ena kaila ni sa rogoci na nodra masu.”²

iVakavuvuli nei Spencer W. Kimball

Sa noda itavi me da masu, me vaka ga ni sa noda itavi me da muria na vunau tale eso.

Na masu e sega ni dua na itavi qaravi me na digitaki se sega; ia sa yavu ni noda vakabauta.³

A cava na vuna me da masu kina? Baleta ni da sa luvena tagane kei na yalewa na Tamada Vakalomalagi, o koya eda sa vakararavi kina ena veika kece eda taukena—na keda kakana kei na isulu, na noda bula vinaka, na bula sara mada ga, na matada kei na daligada, na voqa ni domoda, na noda yavavala, ka vakakina na noda mona.

… O a solia beka vei iko na nomu icegu, na nomu bula, kei na kemu ituvaki? Ena rawa beka mo vakabalavutaka na nomu bula me dua na auwa? Ko sa kaukauwa cake beka ni yali na isolisoli mai lomalagi? Ko a bulia beka na nomu mona, ko a qai vakavukuya beka? Ena rawa beka mo solia na bula se vakabalavutaka? E tiko beka vei iko na kaukauwa mo vakayaco ka kina ka sega kina na nomu Turaga? Ia au raica ni vuqa era sega ni dau masu.…

Vei kemuni ko ni masu tikoga ena so na gauna, e rawa mo ni masu vakawasoma, vakavuqa, ka vakaidina? Sa iyau talei beka na gauna, ka lekaleka na bula, se sa takiveiyaga na vakabauta?

Sa vakaitamera sara na veika me da vakayacora vua na Turaga. E se bera ni dua vei keda sa uasivi sara. E sega ni dua sa galala mai na caka cala. Sa dodonu vua na tamata me masu me vaka ga na bula savasava, kei na vakatabuya na Siga ni Vakacecegu, na saumi ikatini, kei na bulataka na Vosa ni vuku, tiko ena veisoqoni, ka curuma yani na vakamau vakasilesitieli. Me vaka ga na dina ni vunau eso, oqo na ivakaro ni Turaga.⁴

Ena gauna au a dau sikova voli kina na veiteki kei na tabana ni kaulotu ena Lotu ena veiyabaki taumada, au dau sotavi ira na tamata era vakaleqai tu se era gadreva vakalevu tu na veivuke. Na imatai ni noqu taro vei ira o ya, “Sa vakacava tiko na nomuni masu? E vakawasoma? O dau yalodina beka ena nomu masu?” Au sa vulica rawa ni dau yaco mai vakamalua na ivalavala ca ni sa luluqa mai na sala ni veitaratara. Ena vuku ni ka oqo a kaya kina na Turaga vua na Parofita ko Josefa Simici, “Raica na ka au sa vakarota vua e dua sa baleta na tamata kecega; dou daumasu tikoga me kakua ni rawai kemudou na tevoro.” (V&V 93:49.) ⁵

Sa gadrevi vakalevu sara e vuravura edaidai na masu me rawa kina ni da veitaratara tiko vata kei na Kalou ka dolavi tikoga na sala ni veivosaki. E sega ni rawa ni dua vei keda me sa rui osooso vakalevu ena nona bula me sega ni nanuma me masu. Sa idewadewa ni kaukauwa vakayalo na masu. ⁶

Na noda masu e dodonu me okati kina na vakavinavinaka kei na vakamamasu ena yalomalua vua na Tamada Vakalomalagi me vakalougatataki keda kei ira era tiko vakavolivoliti keda.

Na cava beka me da na kaya ena noda masu? E dodonu me da vakaraitaka ena marau kei na yalodina na vakavinavinakataki ni veivakalougatataki sa soli oti vei keda. E kaya na Turaga, “Raica sa kilikili sara mo dou vakavinavinaka vua na Kalou ena veivakauqeti ni Yalo Tabu, na isolisoli kecega sa vakalougatataki kemudou kina.” (V&V 46:32.) Sa dau yaco mai vei keda e dua na yalo vinaka ka veivakadeitaki ni da dau vakaraitaka ena yalodina vua na Tamada Vakalomalagi na noda sa vakalougatataki—me baleta na kosipeli kei na noda kila rawa na kalougata me da ciqoma, me baleta na nodra sasaga kei na cakacaka na noda itubutubu kei ira tale eso me baleti keda, me baleta na noda matavuvale kei na itokani, na veimadigi eso, na veika vinaka ka veivukei e sotavi ena gauna ni noda bula, me baleta na veivuke taucoko nei Tamada, na nona loloma kei na isau ni masumasu.

Me da dau masulaki ira na noda iliuliu. E vola kina vakaoqo o Paula:

“O koya oqo kau sa vakarota kina, me ia mada e liu na masumasu, na kerekere, na veimasulaki, na vakavinavinaka, ena vukudra na tamata kecega;

“Ena vukudra na tui, kei ira kecega era turaga.” (1 Timoci 2:1–2.)

Eda na dau tokona na matanitu kei na lawa e taqomaki keda kevaka me da na masulaka. Ka yaco me da tauyavutaka na noda lomana ka vakabauta na veiliutaki ena Lotu, ka na yaco me ra rokovi ira o ira na luveda. Ni na sega ni rawa me dua e vakalewai ira na vakailesilesi ni Lotu kevaka me ra a masulaki tiko ena yalodina. Sa dua na marau levu vei au ena noqu bula taucoko meu tokoni ira na iliuliu, ka masulaka na nodra tiko vinaka. Kei na veiyabaki sa oti oqo, au a vakila ni a yaco vei au e dua na veimasulaki vaka o ya, ka ra a vakacabori cake ki lomalagi ena vukuqu, o ira na Yalododonu.

Na cakacaka levu ni kaulotu e dodonu me umani tikoga ena noda masu. Me da masulaka me tadola na katuba ni veimatanitu me ra ciqoma na kosipeli. Me da masulaka na veimadigi kei na veidusimaki ni kena wasei yani na itukutuku ni kosipeli lagilagi vei ira na tamata. Ena gauna e masulaka kina ena nona bula e dua na gone na cakacaka ni kaulotu, ena yaco o koya me dua na daukaulotu vinaka.

… Eda masulaka na tamata eda kila ni keda meca, ni da nanuma tiko na ivakasala totoka ka kaukauwa ni noda Turaga: “Ia kau sa kaya vei kemudou sa rogoca, Lomani ira na nomudou meca, caka vinaka vei ira sa cati kemudou, vosa vinaka vei ira sa rukaki kemudou, ka masulaki ira sa vakalialiai kemudou.” (Luke 6:27–28.) Ena rawa beka vua e dua me veimecaki tiko vakabalavu ni sa masulaki ira tiko era vakavolivoliti koya ka a rairai lomacataki ira tiko?

Eda masualaka me da vakavukui, me da vakatulewa vinaka, ka kila vakavinaka. Eda masulaka me da taqomaki mai na vanua rerevaki, ka vakaukauwataki ena gauna ni veitemaki. Eda nanumi ira na noda daulomani kei ira na itokani. Eda dau masu ena noda cavuta na vosa se ena noda vakasama, ena domolevu se ena vakanomodi. Eda sa dau masu e lomada me da vakayacora vakavinaka na noda itavi qaravi ena veisiga. Ena rawa beka vua e dua me ivalavala vakatani kevaka e dau masu ena yalodina e lomana kei na tebe ni gusuna?

Eda dau masulaka na noda bula vakawati, o ira na luveda, o ira na wekada, noda cakacaka, noda vakatulewa, noda ilesilesi vakalotu, noda ivakadinadina, na yaloda, kei na noda inaki. E dina sara, ni da sa vakamuria na ivakasala bibi nei Amuleki me da masulaka na loloma vakalou, me da masulaka na veika me da bula kina, na noda itikotiko kei na kena sabai na kaukauawa ni meca; me da masulaka “me kakua ni rawai [keda] na tevoro, o koya na meca ni ivalavala dodonu kecega,” kei na iteitei ena noda qele. Kei na gauna eda sega ni masuta kina na Turaga, “me da na vakavinavinaka tikoga vua e [lomada] ia [me da] ia tikoga na masu lo, [me da] masulaka na [noda] bula, ka masulaki ira talega na [wekada].” (Raica Alama 34:18–27.) ⁷

Eda masulaka me da veivosovosoti. Au sa vakataroga oti e vuqa me ra laki kaulotu. Au raica ni levu vei ira era sega ni daumasu, e dina ga ni ra kovuti tu ena so na cala lelevu. “A cava na vuna o sega kina ni dau masu,” au a taroga, “ni sa tu vei kemuni e dua na itavi mo ni dolea lesu? Ko ni nanuma beka mo ni sa bokoca laivi ga ka vakanadakuya ka vakaiulubaletaka ni sa kena ivakarau ga? Ko dau madua beka mo tekiduru, ka maduataka na Karisito? Ko vakatitiqataka beka na Kalou? Ko sega beka ni kila ni bula tiko ka dau loloma o koya ka dau veivosoti ni sa vakayacori na veivutuni? Ko kila tiko beka ni sega ni rawa me bokoci na ivalavala ca, ka sega ni vosoti na caka cala ena kena vakawaleni se guilecavi tu ga?”…

Eda masulaka na veika kece e gadrevi ka vinaka ka dodonu. Au a rogoca ni dua na cauravou e volekata toka na yabaki tinikava e a masuta na Turaga ena nodratou masu vakamatavuvale me taqomaka na nodratou sipi ka tiko ena delana. E a tau tiko na uca cevata ka batabata sara. Au a rogoca ni dua na matavuvale a masulaka me tau na uca ena gauna ni dravuisiga ka tu vaka ca na veika kece. Au a rogoca ni a masulaka e dua na goneyalewa me vukei na nona veitarogi ena siga o ya.

Na noda vakamamasu sa baleti ira talega na tauvimate kei ira na vakaleqai tu. Ena rogoca na Turaga na noda masu ena yalodina. Ena sega beka ni dau vakabulai ira kece sara, ia ena dau vakacegui ira se vakayaloqaqataki ira, vaqaqacotaki ira me ra vosota rawa. Eda dau sega ni guilecavi ira na matavuvale ena noda masu era gadreva na veivakalougatataki vakalevu cake mai vei ira era vakaleqai tu vakayago—o ira era lomaocaoca tu ka veilecayaki, o ira sa rawai ena veitemaki, o ira na daucaka cala, kei ira na vakaleqai tu.

Na noda masu sa baleti ira na luveda. Ni ra tubucake tiko na gone eso ena gauna e veisau kina me ca na nodra itovo se cava ga na veika kece eda tukuna se cakava. E a raica rawa o Alama ni vakawalena o luvena tagane na nona ivakasala ka a qai masulaki koya, ia e a titobu sara na nona masu. Sai koya sara ga o ya na ka era dau cakava o ira na itubutubu ena so na gauna. Na nona masu e dua na tamata dodonu e yaga vakalevu, e kaya na ivolanikalou, sa yaco vakakina eke [raica Jemesa 5:16; Mosaia 27:14].⁸

Sa dua na ka dodonu ka marautaki me da masu vua na Tamada mai Lomalagi, ka sa dua na kalougata levu vei keda. Ia e sega ni oti walega e kea me yacova ni sa vakacavari na noda masu. Sa dina sara o Amuleki: “Oi kemudou na wekaqu lomani, … kevaka dou sa [masu] dou qai sega ni vukei ira sa dravudravua, vakasulumi ira sa luvawale, ka sega ni vukei ira sa tauvimate ka rarawa tu, ka wasea na veika sa tu vei kemudou, kevaka dou sa sega ni kitaka na veika oqo, sa tawayaga na nomudou masu, ia dou sa vakataki ira ga na dau veivakaisini, ni ra sa cakitaka na ka dina.” (Alama 34:28.) Me da kakua sara ni guilecava ni dodonu me da bulataka na kosipeli me vaka ga na noda masu ena yalodina ka vagumatua.⁹

Ena noda masu vuni vakayadudua sa na rawa me da duavata kei na Kalou ka vakakina na Nona lewa.

Eso na ka e sa gadrevi ga me masulaki ena vanua vakatikitiki ka sega ni nanumi kina na gauna se na veika e taqomaki. Na masu vakatikitiki e bulabula ka yaga vakalevu. E dau vukei keda na masu taudua me vakatakilai kina na noda madua se lasu, vakasama tani; ka vukea me da talaucaka na lomada ka vosa vakadodonu ka veidokai ena vakaraitaki ni noda inuinui kei na cakacaka.

Sa dede sara na noqu dau taleitaka na kena dau gadrevi na masu vakatikitiki vakayadudua. Ena so na gauna e sa dau dodonu vua na iVakabula me gole duadua yani ki na ulunivanua se vanua liwa lala me laki masu. Sa vakakina, vua na iApositolo o Paula ni a gole yani ki na vanua liwa lala vakataki koya ni oti na nona kacivi. E a dau laki tiko o Inosi ki na vanua vakatikitiki me laki veivosaki kei na Kalou. E a laki tiko taudua o Josefa Simici ena veikau ka sai ira ga na manumanu vuka kei na vunikau kei na Kalou era rogoca na nona masu. Vakasamataka mada eso na ka bibi ena nona italanoa: “Ia niu sa vakadeitaka meu sa vakatakekere vua na Kalou, au sa mani lako ki veikau meu masu kina.… Oqo na imatai ni gauna ena noqu bula taucoko meu qai tovolea kina meu masu votu.” (Josefa Simici—Ai Tukutuku 1:14; vakuri ena vosa kala.)

Oi keda talega, me da kunea, e dua na vanua e rawa, e dua na loqi, e dua na tikina, e dua na rumu, e dua ga na vanua ni “vakacegu” ka laki “masu votu” vakataki keda ga. Me da vakananuma ena vuqa na gauna e a vakasalataki keda kina na Turaga me da dau masu votu talega: “Au sa vakaroti iko talega mo daumasu; io mo daumasu votu, masu lo, masu e matana levu, ka masu vuni talega.” (V&V 19:28.) ¹⁰

Ia kevaka eda na masu vakaoqori, ka qai sega ni talaucaka taucoko vua na Turaga, sa na qai sega ni yaco kece vei keda na veivakalougatataki. E dina ga, ni da dau kerekere sara vagumatua vua na Tamada Vakalomalagi o koya sa kila na veika kece, sa qai cava beka eda maroroya tikoga kina eso na noda vakasama se nanuma me baleta na veika eda gadreva kei na veivakalougatataki? ¹¹

Ni da sa masu, me kakua na were ubiubi, na veivakaisini, ni sega ni vinakati na lawaki. E kila vinaka tu na Turaga na keda ituvaki dina. Eda na tukuna beka vua na Turaga ni da sa vinaka tu, se na noda malumalumu? Eda na tucake luvaiwale sa laurai vinaka tu e matana. Eda na vakamamasu beka vakadodonu, ena yalodina, kei na “yalo raramusumusu ka yalo bibivoro,” se vakataki koya na Farisi ka kaya ni sa tamata dodonu ena lawa i Mosese? [Raica Ica 4:15; Luke 18:11–12.] Eda sa na cavuta beka ga e vica na vosa kei na malanivosa e dau cavuti vakalevu, se da talaucaka na yaloda vua na Turaga ni sa gadrevi vakakina? Eda masu tiko beka ga vagauna ni sa dodonu me da masu tikoga ena kena gauna, vakawasoma, ka gugumatua tiko?¹²

Na masu sa dua na dodonu—ka sega walega ni vosa vua na Tamada Vakalomalagi, ia na ciqomi talega ni loloma kei na veivakauqeti mai vua. Ni oti na noda masu, e dodonu me da dau vakarorogo matua sara—ka vica sara mada ga na miniti. Eda masulaka me da vakasalataki ka vukei. Ia oqo me da “tiko lo, ka kila ni sa Kalou [o Koya].” (Same 46:10.)¹³

Me dau tiko na gauna ni masu vakamatavuvale ena veisiga.

Sa vakadreta tiko na Lotu me na dau vakayacori na masu vakamatavuvale ena veiyakavi kei na veimataka. E gadrevi kina na masu ena tekiduru vata kei ira na lewe ni matavuvale taucoko era tiko rawa.… Na lewe taucoko ni matavuvale, ka wili kina o ira na gonelalai, me ra na dau cavu masu talega, ni ra sa lesi mai vei koya e vakatulewa tiko, o ya o tama na lewe ni matabete, ia ni yali o koya ena vakatulewa o tina, ia ni rau yali ena vakatulewa o koya na gone e qase duadua.¹⁴

Sa solia vei keda na Tamada Vakalomalagi na veivakalougatataki ni masu me vukea na noda rawa ka ena itavi qaravi bibi e vale kei na bula raraba. Au kila ni kevaka eda na masu vagumatua ka dina, vakayadudua ka vaka e dua na matavuvale, ni da yadra mai ena mataka ka laki vakacegu ena bogi, kei na gauna ni kana, eda na sega walega ni vakaduavatataki vakadaulomani ia eda na tubu cake vakayalo. Eda sa dau gadreva tu ga vakalevu na veivuke ni Tamada Vakalomalagi ni da vakasaqara me da vulica na dina ni kosipeli ka qai bulataka, ka da vakasaqara na nona veivuke ena vakatulewa ni noda bula.¹⁵

E dodonu me veiraurau ka vakamatatataki vakadodonu ena masu vakamatavuvale na veika e gadrevi. Na nodrau masu e dua … na veiwatini ena duidui mai na dua na matavuvale ni gone era qase cake se matavuvale ni gone lalai. E dina sara, ena sega ni dodonu me balavu kevaka era vakaitavi kina na gone, se ena rawa ni ra datuvu ka vucesa ena masu ka yaco me ra sega ni taleitaka. Ni ra masu na gone, era na sega ni dau masu vakabalavu. Sa dua na kena ivakaraitaki, na Masu ni Turaga, ni rauta walega e 30 na sekodi ka sa rawa kina vua e dua me na vakavinavinaka ka vakatakekere ena loma ga ni dua ki na tolu na miniti, e dina ga ena so na gauna ena gadrevi me vakabalavu cake na masu.¹⁶

Ni da tekiduru ena masu vakamatavuvale, ka ra tekiduru e yasada o ira na luveda ni ra sa na vulica tiko e dua na itovo ka na tikoga ena nodra bula taucoko. Kevaka eda na sega ni dau vakayacora na noda masu, oqo na ka eda na tukuna tiko vei ira na luveda, “Ia, e sega sara ni ka bibi. Me da kakua ni leqataka. Kevaka me da na vakayacora, eda na qai masu ga, ia kevaka sa qiri na lali ni vuli ka sa gole mai na basi ka sa gauna ni cakacaka—ia na masu e sega sara ni bibi, eda na qai masu ga ni sa gadrevi vakakina.” Vakavo ga ke a nakiti taumada, ena qai sega ni vakawaleni.¹⁷

Ena sega ni dua na tina me vakauti ira wale tu ga na luvena ki koronivuli ena dua na mataka batabata ka sega ni vakasulumi iratou ena isulu katakata me itataqomaki mai na uca cevata, na uca kei na batabata. Ia era tiko eso na tama kei na tina era vakauti ira na luvedra ki vuli ka sega ni vakasulumi ira ena itataqomaki ni masu—na itataqomaki mai na veika tawa kilai, na tamata ca, kei na veitemaki ca.¹⁸

Ena gauna e liu, na kena vakayacori ga vakadua na masu vakamatavuvale ena dua na siga ena rairai sa rauta sara ga o ya. Ia ena veisiga ni mataka ena sega ni rauta o ya kevaka me da na vakabulai ira na noda matavuvale.¹⁹

Ena loma ni noda matavuvale, era na vulica na luveda na ivakarau ni veivosaki kei na Tamadra Vakalomalagi ena nodra dau vakarogoci ira na nodra itubutubu. Era na raica sara na kena dau cabori na masu ena yalodina ka savasava. Kevaka ena vakatotolotaki na masu ka vaka me dua tu ga na kena ivakarau, era na kidava rawa talega o ira na ka oqo. Ena daumaka sara me da vakayacora ga vakamatavuvale ka vakavuni me vaka e vunauca o Moronai, “Oi kemudou na wekaqu lomani, mo dou masuta na Tamada ena yalomudou taucoko.” (Moronai 7:48.) ²⁰

Ena masu vakamatavuvale ena levu cake sara ka sega walega ni dua na vakatakekere kei na vakavinavinaka. Sa dua na ikalawa ki liu ki na vakaduavatataki ni matavuvale kei na lomavata ni matavuvale. E tara cake na vakasama donu ni matavuvale ka tauyavutaka e dua na yalo tu vakaikoya vakamatavuvale. Oqo e dua na gauna ni bula totolo vata kei na vadugu ni voqa, rarama lailai ni cina, ka ra duavata na yalo kei na vakasama ni tamata kivei koya sa tawamudu; na gauna sa sogolati kina ko vuravura ka sa viribai ko lomalagi.²¹

Ni da masu vakailawalawa, e dodonu me da masulaka na inaki ni gauna o ya.

Ni da soqoni vata vakailawalawa ena masu, ena vuvale, ena Lotu, soqo ni marau se vakamatatamata, e dodonu me da nanuma tiko na inaki ni noda masu—o ya me da veivosaki kei na Tamada Vakalomalagi. E dau vaka me dredre, au sa raica rawa ni da masu vata kei ira na tani e dau vinaka cake na noda rai me da maqusa ena veivosaki vakavinaka ka vakadodonu vata kei na Kalou ka sega ena noda leqataka tiko na nodra vakanananu o ira era vakarorogo tiko. Io e dina sara, me dau nanumi na vanua e vakayacori tiko kina na masu, oqo e dua na vu ni masu votu, se na masu vakamatavuvale ena sega ni o koya na taucoko ni noda masu. ²²

Na masu ena matana votu me veiganiti vata ga kei na kena inaki. Ena balavu cake na masu ni veivakatabui, ia na idolamasu ena lekaleka ga. E dodonu me kerei kina na veika ga e gadrevi ena soqo o ya. Na masu ni suka ena lekaleka talega—oqo na masu ni vakavinavinaka kei na veisukayaki. Na veilumuti ena waiwai e dua ga na tiki lekaleka ni dua na cakacaka tabu vakalotu ka me kakua ni cavuta na vosa ni masu ni vauci ni veilumuti ka na tarava ka rawa ni balavu cake ni gadrevi vakakina ena kena kerei na veivakalougatataki vei koya e masulaki. Na masulaki ni kakana me kakua ni balavu, ia me vakavinavinakataki kei na kena vakalougatataki na kakana. Me kakua ni tokaruataki kina na veika sa cavuti oti ena masu vakamatavuvale. ²³

Eda sa dau rogoca beka na nodra vosa matau na tamata ena nodra masu ka vaka me ra sa vunau tiko? Era sa dau datuvu mai o ira era vakarorogo tiko ka yali na kaukauwa ni masu. ²⁴

Me baleta ga ni kilai keda ka lomani keda vakavinaka na Tamada Vakalomalagi, me da vakararavi ga ki na isau ni noda masu mai Vua.

E vakatabakidua beka ga na masu? E sega! …

Na kena kilai na ivosavosa ni masu sa dua na ka marautaki, ena veika sotavi ena gauna ni bula. Ena so na gauna e dau curuma na noda vakasama na veika eso ni da rogoca tiko na noda masu. Ena so na gauna eda dau vakauqeti sara vakaukauwa. E dua na yalo vakacegu e vakadeitaka vei keda ni daumaka tu na veika kece. Ia sa dau vakavuqa, kevaka eda dina ka gugumatua, eda na vakacegui—oqo e dua na veivakacegui loloma mai vua na Tamada Vakalomalagi kei na noda vakila na nona lomani keda. Au dau rarawataka ni so vei keda e se bera ni vulica na ibalebale ni loloma vakayalo vinaka o ya, ni sai koya o ya na ivakadinadina ni sa rogoci na noda masu. Me vaka ga ni lomani keda vakalevu sara na Tamada Vakalomalagi ena loloma e uasivi cake mai na noda, e sa kena ibalebale me da vakararavi ga ki na nona vinaka, sa rawa me da vakabauti koya; sa kena ibalebale ni kevaka eda masu tikoga ka bula dodonu tiko, ena dusimaka ka vakalougatataki keda na liga ni Kalou.

O koya gona me da masu vakaoqo, “Me yaco ga na lomamuni”—ka lomada dina. Eda na sega ni kerea na nona ivakasala e dua na iliuliu, ka qai vakawalena. Me da kakua ni kerea na veivakalougatataki ni Turaga ka qai vakalecalecava na kena isau. Me da qai masu vakaoqo, “Kemuni na Turaga, me yaco ga na lomamuni. Ko ni sa kila na veika kecega, Tamaqu vinaka. Au na ciqoma ka muria vakavinaka na nomuni veidusimaki.” ²⁵

E dodonu me da masu ena vakabauta, ia me da kila tiko ni gauna e sauma mai kina na Turaga ena sega beka ni ka eda namaka se gadreva tiko. Na noda vakabauta sai koya na lewa ni Kalou e vinaka vei keda. ²⁶

Ni oti e dua na bula ni masumasu, au sa kila na loloma kei na kaukauwa kei na qaqa e yaco mai ena dua na masu savasava ka yalodina. Au sa kila na nona tu vakarau na Tamada, me vukea na noda bula oqo, me vakavulici keda, liutaki keda, ka dusimaki keda. O koya gona, ena loloma cecere, e kaya kina na noda iVakabula, “Raica na ka au sa vakarota vua e dua sa baleta na tamata kecega; dou dau masu tikoga.” (V&V 93:49.)

Kevaka me da na cakava vakakina, eda na qai taukena e dua na kila ka vakaikeda ni sa dau sauma ka rogoca vakaidina na Tamada Vakalomalagi na noda masu. Oqo na kila ka e vinakata o koya me da dui taukena. Kemuni na taciqu kei na ganequ, me da vakasaqara na ka oqo! Ni vakasaqara! ²⁷

Vakatutu ni Vuli kei na Veivakavulici

Vakayagataka na vakasama eso oqo ena nomuni vulica na iwase oqo se ena nomuni vakavakarau mo ni veivakavulici. Raica na tabana e v–ix, me baleta na ikuri ni veivuke.

Ena duidui vakacava na nomuni bula kevaka o ni na sega ni masu? Vakasamataka mada na vuna e vakaroti keda kina na Turaga me da masu (tabana e 56–57.)
Raica lesu na tabana e 57–61. Ena sala cava eda sa vakauqeti kina ni da dau vakavinavinaka ena noda masu? ena gauna eda nanumi ira kina na tani?
Raica lesu na ikarua ni parakaravu ena tabana e 61. A cava na vuna e sega ni taucoko kina na noda masu kevaka eda sega ni “bulataka na kosipeli me vaka ni da masu vakaidina ka vagumatua”?
E kaya o Peresitedi Kimball, “na masu vakatikitiki e bulabula ka yaga vakalevu” (tabana e 61.) Na cava me da cakava me da vakayacora kina na noda masu vakayadudua e vakaibalebale vakalevu? Na cava na vuna e veivukei kina ena so na gauna na noda dau masu vakarogolevu vakayadudua? Na cava e tiki bibi kina ni masu na noda vakarorogo?
Ena tabana e 63–65 e tukuna kina o Peresitedi Kimball na veivakalougatataki e yaco mai ena vuku ni masu vakamatavuvale. Ko ni sa sotava vakacava na veivakalougatataki oqo? Na cava me ra cakava na matavuvale me rawa kina ni ra taurivaka e dua na gauna ni masu vakamatavuvale ena mataka lailai kei na bogi?
E vakavulica o Peresitedi Kimball ni masu vakailawalawa e dodonu me baleta na inaki ni soqoni o ya (tabana e 65–66.) Ni da sureti me da vakacabo masu vaka o ya, a cava me da cakava? A cava e rawa ni da vulica me da cakava? A cava e rawa ni da vulica mai na ivakaraitaki nei koya na itabagone ni Niu Siladi ena italanoa ena tabana e 54–56?
Wilika na parakaravu ka tekivu tiko ena boto ni tabana e 65. E sa veivakauqeti vakacava na masu ena nomu veiwekani kei na Tamada Vakalomalagi?

iVolanikalou Veiwekani: Same 55:17; Maciu 6:5–15; Jemesa 1:5–6; 2 Nifai 32:8–9; 3 Nifai 18:18–21

President Kimball — “E sega ni rawa ni dua vei keda me osooso vakalevu ena noda bula me sega ni nanuma me masu.”

bishop praying — “Eda dau masulaka na noda bula vakawati, ira na luveda, o ira na wekada, noda cakacaka, noda vakatulewa, noda ilesilesi vakalotu, noda ivakadinadina, na yaloda, kei na noda inaki.”

family praying — Na masu vakamatavuvale “sa dua na ikalawa ki liu ki na vakaduavatataki ni matavuvale kei na lomavata ni matavuvale.”