Wase 23

iVakatawa ni Qele ni Sipi

Eda na taqomaki ena noda tokoni ira ka muri ira na parofita kei ira na iliuliu tale eso ni Lotu.

Na Bula nei Spencer W. Kimball

Sa dau vakatavuvulitaka wasoma ko Peresitedi Spencer W. Kimball na bibi ni nodra tokoni na veiliutaki ni Lotu ena noda vanua kei ira na veiliutaki raraba. Ena soqoni ni matabete ena koniferedi raraba ni Epereli ena 1978, a nanuma lesu kina o koya na veika e dau nanuma ena nona gauna ni itabagone me baleti ira yadua na nona bisopi: “E dau tikoga e dua na neimami bisopi vinaka. Keimami dau lomani koya. O Bisopi Zundel kei Bisopi Moody kei Bisopi Tyler kei Bisopi Wilkins. Au lomani ira kece na noqu bisopi. Au nuitaka ni ra na dau lomani ira kece na nodra bisopi ko ira na noqu itokani gone me vakataki au.”¹

Ena dua tale na nona vosa e kaya kina: “Au nanuma na noqu lako mai vata kei tamaqu, ki na valecavu oqo [na Valecavu e Salt Lake] niu se cauravou lailai mai Arizona, me keirau tiko ena koniferedi raraba. E vakauqeti au na noqu rogoci ira na itokani iliuliu ena nodra vosa.… E vakauqeti au na nodra veimalanivosa kau taura vakabibi na nodra ivakasala ni qaqarauni, niu se cauravou. O ira na turaga oqo sai ira na parofita ni Kalou, me vakataki ira ga na parofita ena iVola i Momani kei na iVolatabu.”²

Sa dau vakaraitaka ko Peresitedi Kimball na nona vakavinavinaka vei ira na lewenilotu ena nodra lomasoli me ra dau tokoni koya kei ira na veiliutaki tale eso ni Lotu: “Ena veivanua kece au dau lako kina, sa dau kune kina na loloma kei na yalovinaka vakalevu sara, au sa vakavinavinaka kina ena yalomalumalumu ena vuku ni veika oqori. Sai koya oqori na mana ki yaloqu. Sa dau tokoni au na nomuni masu kei na nomuni loloma. Sa dau rogoca na Turaga na nomuni masu ka vakalougatataki au kei iratou na noqu iTokani ena bula vinaka kei na kaukauwa ka dusimaki keimami ena veika ni nona matanitu ena vuravura oqo. Ena vuku ni veika oqori keimami sa vakavinavinaka vakalevu sara kina.”³ A tukuna talega na loloma era dau vakila ko koya vata kei ira na iliuliu tale eso ena Lotu me baleti ira na Yalododonu: “Keimami lomani kemuni ka nuitaka ni ko ni na toso tikoga ka vakakina mo ni reki ka marau tiko, oqori keimami kila ni na rawa ga ena noda muria na ivakasala ni Kalou me vaka era sa tukuna tiko na nona parofita kei ira na iliuliu.”⁴

iVakavuvuli nei Spencer W. Kimball

Sa dusimaka tiko na Turaga na Nona Lotu mai vei ira na iliuliu ena lesilesi vakalou.

Na iVakavuvuli ka iVakabula, na Turaga ko Jisu Karisito sara ga vakataki koya, e tu ena ulu ni Lotu oqo ena nona itutu vakaturaga ka lagilagi. E liutaka na nona cakacaka mai vei ira na nona parofita era sa tokoni ka lesi vakalou.⁵

Na cakacaka ni Lotu i Jisu Karisito e liutaki tiko mai na Mataveiliutaki ni Lotu kei iratou na iApositolo Le Tinikarua, ka vakakina na nodra veivuke e vuqa tale na Vakaitutu Raraba, ka vakatalega kina mai vei ira na peresitedi ni iteki kei ira na tabana ni kaulotu kei ira na bisopi. Sai ira na turaga oqori na ivakatawa ni qele ni sipi. Sa biuti ira na tagane oqo na Turaga me ra liutaka na nona matanitu e vuravura, ka sa solia vei ira na dodonu kei na itavi, o ira yadua ena vanua era dui lesi kina. Sa solia vei ira na tamata na Matabete i Melikiseteki, sai koya na nona kaukauwa kei na nona lewa. E kila o koya ka ciqoma na nodra cakacaka na italai digitaki ka lumuti oqori.⁶

Sa noqu ivakadinadina vei kemuni ni ko ira na iliuliu ena Lotu i Jisu Karisito era ilesilesi vakalou ka ra vakatikori me ra veiliutaki ena yalo ni parofisai me vaka ena veitabagauna tale eso.⁷

Ki vei ira kece na lewe ni Lotu oqo, sa solia mai na Turaga na iliuliu ena tolu na ivakatagedegede: na Bisopi se Peresitedi ni Tabana, na Peresitedi ni iTeki se na Peresitedi ni Kaulotu, kei na Vakaitutu Raraba. Era tamata nuitaki na iliuliu oqo. E dua beka vei ira ena sega soti ni kila ka, vuli se tuberi vakavinaka sara, ia sa tu vua na galala me ciqoma na ivakatakila ni Turaga me baleti ira na nona tamata ka sa tadola tu vua na sala ni veitaratara vua na Kalou vakataki koya.⁸

Me tekivu mai na gauna ni veivakamatei ena kauveilatai, sa vica vata na udolu na tamata era kacivi mai vua na iVakabula me ra vakatawana na veitutu ni veiliutaki, e sega ni duabulu vei ira me a sa taucoko tu na nona vinaka, ia era kacivi kece mai vua na Turaga ka sa dodonu me ra tutaki ka tokoni mai vei ira era na tisaipeli ni Turaga. Sai koya dina oqori na yalo ni kosipeli.⁹

O ira na iliuliu digitaki, vakadonui, ka tabaki era na taqomaki keda mai na “ilawaki ca ni tamata, ena dauveivaqaseni sa nakiti kina na veivakacalai.” [Efeso 4:14.] Ena sega ni rawa ni vakacalai e dua kevaka ena taqomaki koya tani mai vua na dauveituberi mataboko ena nona muria na Yalotabu kei ira na iliuliu kilikili ni Lotu.¹⁰

E sega ni dua e sa nanamaki vakalevu cake mai vei ira na iTokani iLiuliu era tu ena ulu ni Lotu oqo me baleta na kena ciqomi na veidusimaki ena solia mai vei ira na Turaga me ra vinaka kina na kawatamata kei ira na lewe ni Lotu.¹¹

Au kila ni Turaga e dau veitaratara vata kei ira na nona parofita, ka sa vakatakila tiko na dina nikua vei ira na nona italai me vaka a dau vakayacora ena gauna i Atama kei Eparaama kei Mosese kei Pita kei Josefa kei ira tale e vuqa ena itabagauna taucoko. Na itukutuku ni Kalou me baleta na rarama kei na dina sa soli dina ki na tamata nikua me vaka ena veitabagauna kecega.¹²

E tautauvata na itukutuku era dau vakavuvulitaka na parofita.

Eso beka era na vakataroga se cava na vuna era dau tukuna tikoga kina e dua vata na ka na Vakaitutu Raraba mai na dua na koniferedi ki na dua tale na koniferedi. Niu vulica na nodra vosa na parofita ena veisenijiuri, e matata vakavinaka sara tu ga na nodra ivakarau. Eda vakasaqaqara, ena vosa i Alama, me da vakavulici ira kina na tamata “me ra sevaka matua sara na ivalavala ca kei na itovo vakasisila.” Eda vunautaka “me ra veivutuni ka vakabauta na Turaga ko Jisu Karisito.” (Alama 37:32, 33.) Eda vakacaucautaka na yalomalua. Eda segata me da vakavulici ira na tamata “me ra vakabauta na Turaga ko Jisu Karisito me kakua ni rawai ira na vere.” (Alama 37:33.) Eda vakavulici ira na noda “me ra ia tikoga na cakacaka vinaka.” (Alama 37:34.)

Era dau kaya e dua vata ga na ka na parofita me baleta ni viavia tautauvata ga na leqa eda dau sotava. Kemuni na wekaqu na iwali ni veileqa oqori era sega ni sa veisau. E sega ni valenicina vinaka na kena e dau duidui na sikinala e solia vei ira yadua na waqa era curuma yani e dua na toba. Ena sega ni dauveidusimaki vinaka ni kaba ulunivanua o koya e sa kila tu na sala vinaka, qai kauti ira era vakanuinui ki vua ena sala dredre ka rerevaki ka sega e dua e sa lesu bula mai kina.¹³

Oi keimami na iliuliu ni Lotu ena sega ni rawa, ena veigauna yadua keimami vakavulici kemuni kina, me keimami solia ki vei kemuni e dua na sala vou ka uasivi me na kauti kemuni lesu ki na iserau ni Tamada Vakalomalagi. E dua tikoga na sala. Ia, sa na dau vakayacori tikoga vakawasoma na veivakayaloqaqataki me baleta na sala oqori ka talevi tikoga na ivakasala ni qaqarauni. Ena sega ni madra mai, se sa sega mai ni dina, e dua na dina ena kena dau talevi tiko. Ia, na kena veibasai e dina.¹⁴

Au rawa ni raitayaloyalotaka ni kevaka a duri tu na Turaga ena Ulunivanua ni Veiolive ka vakaroti ira tiko na tamata, ena tukuna na veika vata ga sa tukuni oti kei na veika ena qai tukuni [ena noda koniferedi]. Au rawa ni raitayalyalotaka ni kevaka me a tucake tu ena waqa e loma ni wai ena Wasawasa mai Kalili, ka ra tu vakavolivoliti koya na tamata, ena kaya na veika vata ga: me da bulataka na ivunau kece sara sa solia vei keda na Kalou. Oqori na veika eda na kaya, ia nikua sa kaya tiko na veika vata oqori mai vei ira na nona italai.¹⁵

Era dau vakuwai ka besetaki na parofita ena nodra dui gauna.

Ni muri ira na parofita na vuravura, sa dau toso ki liu; ena gauna e sega ni via kilai ira kina, na vuana sai koya na tu vakadua, veivakabobulataki, kei na mate.¹⁶

Ena Lotu sara mada ga e vuqa era dau via ukutaka na kedra ibulubulu na parofita ni gauna makawa ia ena nodra vakasama era vakaviriki ira na parofita bula [raica Maciu 23:29–30, 34].¹⁷

Me da kakua ni cala tale ena cala vata ga era a cakava ena gauna e liu. E vuqa na veimatalotu era vakabauti ira na Eparaama, na Mosese, kei ira na Paula, ia era sega ni vinakata me ra vakabauti ira na parofita ni gauna oqo. O ira talega ena gauna e liu e rawa ni ra ciqomi ira na parofita ni gauna e liu, ia era na cakitaki ira ka vosa vakacacataki ira era a bula veimaliwai vata.¹⁸

E vuqa sara na iulubale sa dau vakayagataki ena veisenijiuri me ra vakuwai kina na italai vakalou oqo [na parofita bula]. Sa yaco na veicakitaki me baleta ni lako mai na parofita ena dua na vanua tawakilai. “E tubu rawa beka mai Nasareci e dua na ka vinaka?” (Joni 1:46.) A tarogi talega vei Jisu na taro oqo, “Sa sega li ni luve ni matai ko koya oqo?” (Maciu 13:55.) Ena kena iwalewale cava ga, na ivalavala totolo duadua ni nodra cati na parofita tabu sai koya me ra raica e dua na iulubale, se vakacava na kena lasu se lialia, me vakuwai kina na tamata me rawa ni vakuwai talega vakakina na nona itukutuku. O ira na parofita era a sega ni dau veivakauqeti ena nodra vosa, ia e dau berabera ga na nodra vosa, era sa dau beci ka vakasavi tani. Era sega ni muria na vosa nei Paula eso na tamata, eso era raica na kena ituvaki malumalumu ka beca na nona vosa [raica 2 Korinica 10:10]. De ra vakalewai Paula beka ena rorogo ni domona se na itautau ni nona vosa, ka sega ena dina e tukuna mai.

… Na ogaoga ni vuravura e sa rui levu ka rui veivesuki, o ira sara mada ga na tamata vinaka era dau vagolei tani mai na nodra muria na dina me baleta ni ra sa rui kauwaitaka vakalevu na veika ni vuravura.…

Ena so na gauna era sa rui dau vagolea vakalevu na yalodra na tamata ki na veika vakavuravura kei na kena rokovi ka ra sega kina ni rawa ni vulica na lesoni e gadrevi vakalevu sara me ra vulica. Sa dau besetaki vakavuqa na veidina rawarawa me baleta na vakasama vakatamata sega na betena, ka sai koya talega oqori e dua na vuna era dau besetaki kina na parofita.…

Era sega walega ni besetaka na parofita tabu me ra muria na ivalavala cala vakatamata, ia era sa dusia tiko na veika cala oqori. Sa rauta me sega ni dau duidui na nodra raici na parofita. E vakavuqa ni ra dau besetaki na parofita baleta ni ra a besetaka e liu na ivakarau cala ni nodra vanua.…

Era dau yavalata vakalevu na parofita na vakasama vakatamata. E vakavuqa ni ra dau tauri cala na parofita ka nanumi ni ra sa rui dau vosa kaukauwa ka ra dau gadreva me ra rokovi me rawa kina ni ra kaya, “Au sa kaya mada ga vei iko.” Au kila ni ra tamata dauloloma o ira na parofita. Ena vuku ni nodra loloma kei na nodra dina era sega kina ni rawa ni veisautaka na nona itukutuku na Turaga me ra vakayalovinakataka kina na tamata. Era sa rui yalovinaka era sega kina ni rawa ni yaloca. Au sa vakavinavinaka vakalevu ni ra sega ni dau segata na parofita me ra kilai levu.¹⁹

Me ra vakavulici ira na luvedra na itubutubu me ra dau tokoni ira ka muri ira na iliuliu ni Lotu.

O dau vakavulici ira vakacava na luvemu me ra lomani ira na vakaitutu ena Lotu? Kevaka ko na dau tukuna tiko na veika vinaka me baleta na mataveiliutaki ni tabana, na mataveiliutaki ni tikina, na mataveiliutaki ni kaulotu, kei na Mataveiliutaki ni Lotu, era na tubu cake na luvemu me ra dau lomani ira na iliuliu.²⁰

Eda dau masulaki ira na iliuliu ni Lotu. Kevaka era na dau nanumi ira na iliuliu ni Lotu ki vua na Turaga ko ira na gone ena nodra veisiga kece, ena nodra masu vakamatavuvale, ena nodra dui masu lo, ena dredre sara me ra lutu tani.…

O ira na gone era dau masulaki ira na iliuliu era na tubu cake me ra dau lomani ira, dau vosa vinaka ena vukudra, rokovi ira ka vakamurimuri ira. O ira era dau rogoca e veisiga na nodra masulaki ena yalodina na iliuliu ena yaco me ra dau vakabauta na ivunau kei na ivakasala era rogoca.

Ni ra dau vosa na cauravou vua na Turaga me baleta na nodra bisopi, ena yaco me ra dau taura vakabibi na veivakatarogi e veitalanoataki kina na veivakalougatataki ni toroicake ni itutu vakabete, na kaulotu kei na valetabu. Ko ira talega na goneyalewa era na dau vakarokorokotaka na veika kece sara vakalotu ni ra dau masulaki ira na iliuliu ni Lotu.²¹

Era na taqomaki vinaka ko ira era dau muri ira na iliuliu ni Lotu.

Era na dau taqomaki vinaka na lewe ni Lotu kevaka era na vakamuria vakavinaka na ivakaro kei na ivakasala kei na nodra veiliutaki na vakaitutu ena Lotu.²²

O ira na vakaitutu sa lesi ira tu na Turaga ena nona Lotu, sa vakarautaki kina e dua na toba vei ira na tamata ena Lotu, e dua na ivakaruru, e dua na ivakavakacegu. E sega ni dua na tamata e dau vesuki koya vakaukauwa ki vei ira na Vakaitutu ena Lotu ka sa lesi ira tu na Turaga ena nona Lotu me na lako tani sara vakayawa mai kina. Ena sega ni lako sese na Lotu oqo; o ira ena Kuoramu ni iApositolo Le Tinikarua era na sega ni kauti kemuni ki na sala tani eso; a sega vakadua ni se bau vakakina ka na sega sega sara. Era na leqa yadua beka; ena sega ni rawa me ra cala ena dua vata ga na gauna na iwase levu cake ni Matabose ni Le Tinikarua. Sa digitaki ira na Turaga; sa solia vei ira na itavi bibi eso. Ia ko ira era tu volekati ira era na taqomaki vinaka. Ia, ni dua sa tekivu me cavuta eso na vosa ka ra vorati kina na vakaitutu, sa toka kina ena dua na sala rerevaki sara. Au na sega ni tukuna ni ra sa tamata vuku sara ko ira na iliuliu e digitaka na Turaga, era sega talega ni sa vakarautaki vakavinaka cake sara, ia sai ira era sa digitaki, ia ni ra sa digitaki mai vua na Turaga sai ira oqori na vakaitutu sa vakadonuya ko koya, ka ra na taqomaki vinaka ko ira era na volekati ira.²³

Kevaka eda na bulataka na kosipeli ka muria na nodra ivakasala na iliuliu ni Lotu, eda na vakalougatataki me da levea e vuqa na leqa sa tara tu na vuravura.²⁴

Me da vakarorogo ki vei ira eda sa tokona me ra parofita ka daurairai, ka vakakina vei ira na vo ni veiliutaki me vaka ni sa vakatau kina na noda bula tawamudu, baleta ni vaka dina kina!²⁵

Vakatutu ni Vuli kei na Veivakavulici

Vakayagataka na vakasama eso oqo ena nomuni vulica na iwase oqo se ena nomuni vakavakarau mo ni veivakavulici. Raica na tabana e v–ix, me baleta na ikuri ni veivuke.

Vakananuma na sala sa vakalougatataki kina na nomuni bula ena nomuni tokoni ira na veiliutaki ni Lotu ena tolu na ivakatagedegede sa vakamacalataka o Peresitedi Kimball (raica tabana e 293). Ni o ni vakayacora vakakina na cava beka o ni sa sotava oti e votu mai vei kemuni?
Railesuva na iwasewase e tekivu ena tabana e 294. Na cava eso na itukutuku sa dau yaco wasoma o raica rawa ena veikoniferedi raraba sa yaco oti?
Raica lesu na ikatolu kei na ikava ni parakaravu taucoko ena tabana e 295. Na cava na nomuni nanuma e dau dredre kina vei ira eso na tamata me ra vakamuri ira na paprofita bula? Na cava e dua na kena ivakaraitaki e se qai yaco wale toka e votu mai vei kemuni?
Na cava e rawa ni da cakava me da vakayaloqaqataki ira kina na gone kei ira tale eso me ra dokai ira ka muri ira na iliuliu ena Lotu? (Me baleta eso na kena ivakaraitaki, raica na tabana e 297.)
Raica lesu na iotioti ni iwasewase ena iwase. Na cava na vuna eda na taqomaki vinaka kina ni da muria na nodra ivakasala na iliuliu ni Lotu?

iVolanikalou Veiwekani: Efeso 2:19–20; 4:11–16; Ilamani 13:24–29; V&V 1:14, 38; 21:4–6; 121:16–21

President Kimball greeting people — E kidavaki ira na tamata ko Peresitedi Kimball ni curuma yani na Valecavu e Salt Lake ena koniferedi raraba.

Paul teaching — “ Era sega ni muria na vosa nei Paula eso na tamata, eso era raica na kena ituvaki malumalumu ka beca na nona vosa.”