Wase 2

Leqa Vakacalaka se iVotavota?

Na gauna eda sotava kina na rarawa kei na mavoa ni leqa vakacalaka, kei na mate, sa dodonu me da vakararavi ga vua na Kalou

Na Bula nei Spencer W. Kimball

Ni se qai tubucake tiko o Spencer W. Kimball a sotava na rarawa ena nodra a leqa eso na nona daulomani. Ni se qai yabaki walu tiko a leqa o Mary na ganena ni oti ga na nona a sucu mai. Oti toka e dua na vula, erau sa vakila na itubutubu nei Spencer ni o Fannie e yabaki lima tiko, ka sa tauvimate bibi tiko mai ena vica na macawa, sa na vakarau leqa. A kaya vakaoqo o Spencer me baleta na siga a mate kina o Fannie: “Ena ikaciwa ni noqu siganisucu a leqa kina o Fannie ena ligai tinaqu. Keitou a yadra kece mai na gone ena bogi levu me keitou tiko kina. Au rawa ni vakananuma lesu na veika a yaco tiko ena neitou loma ni vale … , a tagi lagalaga o tinaqu ni keveta tiko na luvena lailai yabaki lima ka keitou tucake wavoki tu.”¹

Sa qai dredre cake ga vua na cauravou o Spencer na nona a ciqoma e dua na itukutuku ni oti toka e rua na yabaki ena nodratou a laki kacivi yani ki vale mai koronivuli ena dua na mataka lailai. Eratou a cici yani ki vale ka tavaki iratou tu mai o bisopi, ka kacivi iratou vua ka tukuna vei iratou ni sa leqa o tinadratou e nanoa. E vakananuma lesu o Peresitedi Kimball: “E a lutu mai me vaka na yaseyase. Au a cici yani ki tautuba ki na daku ni vale ka laki tagi lagalaga duadua tu kina. Au a sega ni laurai se rogoca e dua na ka, kau a vakatikitiki tani mai na tamata kecega. Au tagi ka baci tagi tale. Ena veigauna kece au lelevaka kina na vosa ‘Na’ e sa tasova ga mai na wai ni mataqu me yacova sara ni sa sega na kena wai. Sa mate o Na! Ia e sega ni rawa! Sa na sega ni rawa ni keitou bula.… E sa vaka me kavoro na utoqu lailai.”²

Ni oti e limasagavulu na yabaki, ka a lewe ni Kuoramu ni iApositolo tiko kina o Elder Spencer W. Kimball, e raica ni sa yawa sara mai vale o koya, ni sa mai vakabulabula tiko mai na dua na veisele levu. E a sega ni moce rawa, ka vakananuma lesu na siga a leqa kina o tinana: “Sa vaka meu luluvu mai … niu vakananuma lesu na veisiga rarawa o ya.”³

Ena nona dau sotava na rarawa bibi vakaoqo, sa dau kune vakacegu ga o Spencer W. Kimball ena masumasu kei na ivakavuvuli ni kosipeli. Ena gauna mada ga ni se qai tubucake tiko, e dau kila na vanua me kune vakacegu kina. E dua na itokani ni nodratou matavuvale a vola vakaoqo na masu nei Spencer na cauravou—“na yali nei tinana e tara sara vakabibi na yalona malumalumu ia sa dua na ka na nona valuta rawa na nona rarawa ka vakasaqara na vakacegu mai na kena ivurevure dina.”⁴

Ena gauna ni nona veiqaravi, sa itovo tu nei Peresitedi Kimball me dau laki vosa ni veivakacegui vei ira era lolositaka na yali ni nodra daulomani. E dau vakadinadinataka na ivakavuvuli tawamudu, ka vakadeitaka vei ira na Yalododonu ni mate e sega ni icavacava ni bula. Ena dua na veibulu, a kaya kina:

”Sa vakaiyalayala ga na noda rai. Eda na rai ena matada ia e sega ni vakayawa. Eda na vakarorogo ena daligada ia ena vica ga na yabaki. Eda sa vakawaqataki tu, kovuti, me vaka ga ena dua na loma ni rumu ia ena gauna sa tabogo kina na matada ena bula oqo, eda sa na qai rai basikata yani na vuravura oqo.…

“Ena kasura na ilati, sa oti na gauna ka sa takali ka yali yani na balavu ni vanua ni da sa curuma yani na bula tawamudu … ka vakasauri ga na noda butuka yani e dua na vuravura talei ka sega kina na leqaleqa vakavuravura.”⁵

iVakavuvuli nei Spencer W. Kimball

Ena dela ni Nona vuku, ena sega ni tarova kece na leqa vakacalaka na Kalou.

E tabaka vakamatailelevu na niusipepa na ulutaga: “Mate 43 ni Voca na Waqavuka. Sega ni Dua e Bula ena Leqa Vakacalaka ena Ulunivanua,” era sa qai taroga vata e udolu na tamata: “Na cava na vuna e vakatara kina na Turaga me yaco na ka vakaloloma oqo?”

Erau a coqa e rua na motoka ni a curu botea yani na cina damudamu e dua vei rau. A mate e lewe ono. A cava na vuna e sega ni tarova kina na Kalou na ka oqo?

A cava na vuna me mate kina ena kenisa e dua na tina goneyalewa ka biuta tu mai me ratou luveniyali e walu na luvena? A cava na vuna a sega ni vakabulai koya kina na Turaga?

E a luvu e dua na gone; ka dua a laucoqa mate. Baleta na cava?

A mate ni uto vakasauri e dua na tagane ni a kaba cake tiko. A qai kunei ni sa davo matemate tu ena fuloa. A tagi lagalaga o watina, “Baleta? Na cava na vuna e cakava kina vei au na Turaga na ka oqo? E sega beka ni nanumi iratou na luvequ lalai me ratou vakatamani?

E a mate e dua na cauravou ni a kaulotu tiko ka ra taroga kina vakabibi na tamata: “Na cava na vuna e sega ni taqomaka kina na Turaga na cauravou oqo ni a kaulotu tiko?

Au diva meu na sauma ena doudou na veitaro oqo, ia e sega ni rawa. Au kila ni na dua na gauna eda na qai kila kina vakavinaka ka me da lomavata kina. Ia ena gauna oqo me da tovolea me da kila vakavinaka sara na ivakavuvuli ni kosipeli.

E a kauta beka na Turaga na waqavuka o ya ki na ulunivanua me vakamatei ira era a vodo tiko kina, se e a ca beka na kena idini se cala vakatamata?

A vakavuna beka na Kalou me rau coqa na motoka ka a mate kina e ono na tamata, se a nona cala beka na draiva ka a sega ni vakamuria na lawa?

E a vakamatea beka na Kalou na tina goneyalewa se vakauqeta na gonelailai me tutubalebale yani ki na ikeli wai se vakayarayarataka yani e dua tale na gone me coqai koya kina e dua na motoka?

A vakavuna beka na Turaga me mate ni uto na tamata o ya? Sa kena gauna beka me mate kina o koya na daukaulotu? Mo sauma kevaka e rawa. E sega ni rawa vei au, e dina ga niu kila ni Kalou e vakatulewataka talega na noda bula, au sega ni kila na kena levu e a vakatara o koya me yaco kei na kena a vakadonuya walega. Se cava ga na isau ni taro oqo, e tiko tale e dua au vakabauta sara.

E a rawa beka vua na Turaga me tarova na veileqa vakacalaka oqo? Na kena isau, e Rawa. E kaukauwa sara na Turaga kei na lewa me taura na noda bula, taqomaki keda mai na mosi, tarova na vakacalaka taucoko, kavetanitaka na waqavuka kei na tolili taucoko, vakani keda, taqomaki keda, maroroi keda mai na cakacaka kaukauwa, sasaga, tauvimate, ka vakakina mai na mate, kevaka e vinakata. Ia e sega ni vinakata.

Sa dodonu me da kila vakavinaka na veika oqo, baleta me da na kila kina ni sega ni dodonu me da sogolati ira na gone mai na gacagaca ni bula kecega, mai na vakanuinui kara, veitemaki, rarawa, kei na vakararawataki.

Na yavu taumada ni lawa ni kosipeli sa ikoya na galala ni digidigi kei na veivakatorocaketaki tawamudu. Na noda vakasaurarataki keda me da qaqarauni se ivalavala dodonu ena tagutuva kina na lawa bibi ka na sega ni yaco rawa me da bula torocake.⁶

Ena rai tawamudu, eda sa kila vinaka kina ni veidredre sa ka bibi ki na noda torocake tawamudu.

Kevaka eda wilika na bula oqo me sai koya ga na bula, sa qai ka ca dina sara na mosi, na rarawa, na guce, kei na bula lekaleka. Ia kevaka eda na wilika na bula oqo me itekitekivu ni bula tawamudu ka curuma yani na isema ni bula taumada ka yacova yani na veisiga tawamudu ni mataka ka na yaco me tuvanaki vakadodonu na veika e yaco ena bula.

Sa tiko beka kina na vuku ena nona solia vei keda na veivakatovolei me da vorata rawa, na ilesilesi me da rawata, na cakacaka me da kaukauwa kina, na rarawa me vakatovolei kina na yaloda? Eda sa sega dina li ni rawa ni temaki me vakatovolei kina na noda qaqa, ena tauvimate me da vulica kina na vosota, na mate me rawa kina ni da tawa mate rawa ka vakalagilagi?

Kevaka me ra vakabulai kece o ira na tauvimate era masulaki, kevaka me ra taqomaki o ira kece na yalododonu ka ra vakarusai o ira na tamata ca, ena tagutuvi na parokaramu taucoko nei Tamada kei na yavu taumada ni ivakavuvuli ni kosipeli, ena bokoci laivi na galala ni digidigi. Sa na sega ni dua na tamata me na bula ena vakabauta.

Kevaka me na soli na marau kei na vakacegu kei na isau vua na tamata caka vinaka ena gauna ga o ya, sa na qai sega ni dua na ka ca—na tamata taucoko era na caka vinaka ia ena sega ni baleta na dodonu ni caka vinaka. Sa na sega ni vakatovolei na kaukauwa, sa sega na vakatorocaketaki ni itovo, sa sega na tubu cake ni kaukauwa, sa sega na galala ni digidigi, sa tu ga na veiliutaki nei Setani.

Sa dodonu beka me saumi ga mai ena gauna o ya na masu taucoko me vaka na noda yalo kocokoco kei na noda lecaika, sa na qai lailai se sega beka na vosota, na rarawa, na vakanuinui kara, se mate, kevaka era a sega na veika oqo, sa na sega talega na marau, rawa ka, tucaketale, se bula tawamudu kei na lewe ni lewetolu vakalou.

“Raica sa kilikili me tu na veibasai ni ka kecega … ivalavala dodonu … ivalavala ca … marau … rarawa … vinaka … ca.…” (2 Nifai 2:11.)

Oi keda na tamata, eda na tagutuva laivi mai na noda bula na mosi vakayago kei na lomaocaoca ka vakadeitaka vei keda na noda dau tiko vinaka kei na vakacegu, ia kevaka me da na sogolati keda mai na rarawa kei na lomaleqa, eda sa na vakatikitikitaki ira sara tikoga na wekada talei ka dau ni ivurevure. Na vakararawataki ena rawa ni ra kilai yalodra kina na yalododonu ni ra vulica na vosota na vakararawataki vakabalavu, kei na vakatulewa vakaira.…

Au taleitaka na qaqa ni sere “How Firm a Foundation”—

When through the deep waters I call thee to go,
The rivers of sorrow shall not thee o’erflow
For I will be with thee, thy troubles to bless,
And sanctify to thee thy deepest distress.

[Raica na Serenilotu, naba 85]

E a vola vakakina o Elder James E. Talmage: “E sega ni dua na rarawa e sotava e dua na tagane se yalewa ena vuravura oqo me na sega ni yali na kena dolei ena veika vinaka—kevaka ena sotavi ena vosota.”

Ena dua tale na yasana, na veika oqo ena rawa ni qaqiraki keda ena kena kaukauwa taucoko kevaka eda na vakamalumalumu kina, vosa kudrukudru, ka vakalelewa.

“Eda na vakararawataki, na mosi kei na veivakatovolei eda sotava ena sega ni vakawaleni. Eda na vakavukui kina, ki na vakatorocaketaki ni veika yaga me vaka na vosota, vakabauta, yaloqaqa kei na yaloraramusumusu. Na veika kece eda vakararawataki kina kei na noda vosota, vakabibi na noda vosota ena yalomalua, ena bulia cake na noda itovo, vakasavasavataka na yaloda, vaqaqacotaka na noda bula, ka yaco me da vinaka cake ka dauloloma, ka kilikili sara me vakatokai me luve ni Kalou … kei na noda votai ena rarawa kei na vakararawataki, na oga kei na leqaleqa, eda na vakavukui kina ni da a lako mai eke me da mai rawata ka yaco sara me da vakataki rau na Tamada kei na Tinada mai lomalagi.…” (Orson F. Whitney)

Sa dau yaco me ra yaloca eso ni ra raica na nodra vakararawataki na nodra daulomani era sotava na mosi bibi kei na vakararawataki ni yago. Era dau beitaka eso na Turaga ena lomaca, vakayawataki ira, kei na vakalelewa. Eda sega ni rawa ni vakalelewa.…

Na kaukauwa ni matabete e sega ni vakaiyalayala ia na Kalou sa vakatikora vakavuku vei keda yadudua na yalani ni noda rawa ka. Sa na rawa meu vakatorocaketaka na kaukauwa ni matabete niu vakavinakataka tiko na noqu bula, dina ga au sega ni rawa ni vakabulai ira taucoko na tauvimate ena kaukauwa ni matabete kau sa na vakavinavinaka ga. Ena rawa beka meu na vakabulai ira era a dodonu me ra mate. Au na rawa beka ni vakacegui ira ka dodonu me ra rarawa mai na nodra vakararawataki. Au rerevaka deu na tarova na lewa ni Kalou.

Kevaka beka me tu vei au na kaukauwa tawa yalani, ka yalani tu na noqu rai kei na kila vakavinaka, keu a rawa beka ni vakabulai Apinatai mai na yameyame ni buka ena nona a vakamai bulabula, keu a vakayacora vakakina au na rairai vakamavoataki koya sara kina vakaca. E a mate o koya me vaka e dua na maritire ka dolei vua na isolisoli ni maritire—o ya na bula vakalou.

Au a vinakata sara ga meu taqomaki Paula mai vei ira na kena meca kevaka me a sega ni yalani na noqu kaukauwa. Au a rawa sara ga ni vakabulai koya mai na “voto ni kau sa vakalauti kina na lewe[na]” [2 Korinica 12:7]. Keu a vakayacora au sa na vakatanitaka na parokaramu ni Turaga. E a masu vakatolu o koya ka kerea vua na Turaga me kauta laivi na “voto ni kau” mai vua, ia a sega ni sauma na Turaga na nona masu [raica 2 Korinica 12:7–10]. Ena vuqa na gauna e a rawa vei Paula me dro tani yani kevaka beka me a dauvosa veilauti, rawati koya, rairai totoka, ka sereki mai na veika a tuvanaki koya me yalomalua.…

Au ririkotaka kevaka beka meu a tiko ena Valeniveivesu e Carthage ena ika 27 ni June, 1844, ena rawa beka meu vagolea tani na sicini ka a laubasikata na yagoi koya na Parofita kei koya na Peteriaki. Au a rawa beka ni vakabulai rau mai na rarawa kei na mosi, ia ka kauta tani mai vei rau na mate ni maritire kei na kena idole. Au marau niu sega ni vakayacora vakakina.

Mai na kaukauwa tawayalani vakaoqo, e a rawa sara ga meu a taqomaka na Karisito ena mosi mai Kecisemani, na vosa veivakacacani, na isala vakavotona, na veivakalialiai ena veilewai, na mavoa ni yagona. E a rawa meu qarava na nona mavoa ka vakamacataka, solia vua na wainigunu batabata ka sega ni waiwiwi gaga. Au a rawa ni vakabulai koya mai na rarawa kei na mate, ka yaco me vakayali e vuravura na nona solibula ni veisorovaki.

Au na sega ni vinakata meu vakayacora na nodra vakabulai lesu mai o ira na noqu daulomani. Na Karisito vakataki koya a raica rawa na duidui ni nona lewa kei na lewa nei Tamana ni a masulaka me kauta tani mai vua na bilo ni rarawa; ia e a tomana, “Ia me kakua ni yaco na noqu lewa, me yaco ga na nomuni lewa” [Luke 22:42].⁷

E rawa ni tadolava na mate na katuba ki na veimadigi lagilagi.

Kivei koya ena mate yani, ena tomani tikoga na bula ka tomani tikoga na nona galala ni digidigi, ia na mate ka vaka tiko me dua na ka ca vei keda, ena vuki me dua na veivakalougatataki vuni.…

Kevaka eda na kaya me dua na ka ca na mate koso, na leqaleqa, se leqa vakacalaka, sa rairai tukuni tiko beka ni bula oqo e vinaka cake vakalevu kina na curuma yani vakatotolo na vuravura ni yalo ka yacova sara na veivakabulai kei na bula vakalou? Ke sa gauna uasivi duadua beka na bula oqo, sa qai ka vakatani na mate, ia na kosipeli e vakatavulica vei keda ni sega ni leqa vakacalaka na mate, ena ivalavala ca walega. “.… sa kalougata ko ira sa mate ena vuku ni Turaga.…” (Raica V&V 63:29.)

Eda sa kila vakatikina ga. Sa vakaiyalayala walega na noda lewa. Eda vakalewa na sala ni Turaga mai na qiqo ni noda rai.

Au a laki vosa ena soqo ni veibulu ni dua na cauravou gonevuli ni Brigham Young University ka a mate ena gauna ni iKarua ni iValu Levu. Era sa drau vakaudolu na cauravou era sa curudole yani ki na gauna tawamudu mai na veivaluvaluti o ya, kau tukuna vakakina niu kila ni sa kacivi yani na cauravou o ya ki na vuravura ni yalo me laki vunautaka na kosipeli kivei ira na yalo vakaleqai. Ena sega beka ni dina oqo vei ira taucoko era mate, ia au kila ni a yaco dina vei koya.

Ena nona raivotu me baleta “Na Nodra Vakabulai na Mate” a raica dina sara ga o Peresitedi Joseph F. Smith na ka oqo.… A vola kina o koya:

“… Au kila ni a sega ni lako na Turaga vei ira na tamata ca kei ira na talaidredre era a besetaka na dina … ia me da kila, ia e a vakarautaki ira na Nona ilawalawa mai vei ira na ivalavala dodonu … ka lesi ira me ra lako ka kauta yani na rarama ni kosipeli.…

“… E a taurivaka na noda Dauveivueti na Nona gauna … ena vuravura ni yalo, ka vakasalataki ka vakarautaki ira na yalo era yalodina … ka ra a vakadinadinataki Koya ena bula oqo, me rawa kina ni ra kauta na itukutuku ni veivakabulai vei ira na mate e sega ni yaco rawa kina vei ira o Koya me baleta na nodra vukitani kei na ivalavala ca.…

“Ia au a raici ira talega na qase ni lotu yalododonu ena itabagauna oqo, ia ni ra sa mate, sa ia tikoga na nodra cakacaka; io era sa vunautaka yani na itukutuku vinaka ni veivutuni kei na veivakabulai.” [raica V&V 138:29–30, 36–37, 57.]

O koya gona, na mate sa rawa ni kena dolavi na katuba ki na veimadigi, ka okati kina na vakavulici ni kosipeli i Karisito.⁸

Me da vakararavi ga vua na Kalou, ena gauna ni veivakatovolei.

E dina ga ni sa kilai ni mate ena dolava na veikatuba vovou, eda na sega ni vakasaqara. Eda sa vakamasuti me da masulaki ira era tauvimate ka vakayagataka na kaukauwa me da vakabulai ira.

“Me rau qai kacivi e rua se sivia na italatala qase, me rau masulaki ira ka tabaki ira e ligadrau ena yacaqu; ia kevaka era qai mate, era na mate vei au; kevaka era bula, era sa na bula talega kina vei au.

“Mo dou duavata ka veilomani; mo dou tagicaki ira era sa mate; vakabibi ko ira era sega ni vakabauta na bula tawamudu.

“Ia ko ira sa mate vei au, ena kamikamica vei ira na mate; raica era na sega sara ni mate;

“Ia ena ca ko ira sa sega ni mate vei au, ni na gaga vei ira na mate.

“Ia ko koya sa vakabauta niu na vakabulai koya, ka sa sega ni lewai me mate, ena bula ga.” (V&V 42:42–48 .)

Eda sa vakadeitaki mai vua na Turaga ni ra na vakabulai o ira na tauvimate kevaka ena vakayacori na veimasulaki, kevaka sa tiko na vakabauta e veirauti kaya, “ka vakakina ke sa sega ni lewai me mate” o koya e tauvimate. Ia e tolu na ka bibi me na vakadeitaki. E vuqa era sega ni vakayacora na veimasulaki, ka vuqa sara era sega ni lomadra se dredre ni ra vakabauta rawa. Ia sa bibi talega vakakina: Kevaka era sa sega ni lewai me ra mate.

Ena mate na tamata kecega. Na mate sa dua na tiki bibi ni bula. E dina sara, ni da sega sara ni vakavakarau ki na veivakamataliataki oqo. Eda sega ni kila na kena yaco mai, eda qai dau valu lesu me taqomaka na noda bula. Ia me da kakua ni rerevaka na mate. Me da masulaki ira na tauvimate, me da vosa vakalougatataki ira na vakararawataki, me da masuta na Turaga me veivakabulai ka veivakacegui ka tosoya na mate, me yaco vakakina, ia e sega ni baleta ni ka rerevaki na bula tawamudu.…

Me vaka ga e kaya o Dauvunau (3:2), au sa vakabauta vakaidina ni sa tikoga na gauna ni mate, ia au vakabauta talega ni vuqa sara na tamata era “mate dole” baleta ni ra sega ni qaqarauni, vakacacana na yagodra, vakatulewa cala, se soli ira ki na veika ca, vakacalaka, kei na tauvimate.…

E lewa tiko na Kalou na noda bula, e dusimaki ka vakalougatataki keda, ia e solia vei keda na galala ni digidigi. Sa rawa me da bulataka na noda bula e umanaki ena nona ituvatuva me baleti keda se da vakaveitaliataka se tagutuva koso.

Au sa vakadeitaka ena noqu vakasama ni sa tuvanaka tu na Turaga na noda icavacava. Eda sa na qai kila vakavinaka sara, ena so na gauna, ni da raica lesu mai ena gauna ni veisiga ni mataka, eda na qai marautaka e vuqa na veika e yaco ena bula oqo ka dredre sara me da kila vakavinaka.

Ena so na gauna eda dau via kila na veika sa tu mai liu, ia eda qai dau vakasamataka ni vinaka me da bulataka ga na noda bula ena veisiga yadua ka me da vakavinakataka ka vakalagilagia na siga o ya.…

Eda a kila taumada ni bera ni da sucu mai ni da na lako mai ki vuravura me da mai vakayago ka sotava na bula marau kei na rarawa, vakacegu ka mosi, tiko vinaka ka sotava na leqa, bula vinaka kei na tauvimate, na rawa ka vakanuinui kara, ka da a kila talega ni oti e dua na gauna ni bula eda na mate. Eda a vakaio ki na veika ni bula oqo ena yalomarau, ka maqusa me da ciqoma na veika e vinaka kei na veika ca. Eda a maqusa ena ciqoma na madigi me da lako mai ki vuravura se cava ga na kena balavu e dua na siga se dua na yabaki. E rairai beka ni da a sega sara ni kauwaitaka vakalevu na noda na mai mate ena tauvimate, ena leqa vakacalaka, se ena malumalumu ni yago. Eda a taleitaka me da ciqoma ga na ituvatuva ni bula ni yaco mai ka me da tuvanaka ka vakatulewataka vakavinaka, ka sega kina na vosa kudrukudru, vakaduiduile, se gagadre e vakatani.

Ni da sotava na leqa vakacalaka e dodonu me da vakararavi ga vua na Kalou, ka kila ni se vakacava ga na yalani ni noda rai ena sega ga ni vakadaroi rawa na nona inaki. Ena leqaleqa taucoko ni bula oqo e solia vei keda na dodonu lagilagi me da tubucake ena kila ka kei na vuku, ena vakabauta kei na cakacaka, ka vakavakarau ki na mua lesu ka laki votai ena lagilagi ni Kalou.⁹

Vakatutu ni Vuli kei na Veivakavulici

Vakayagataka na vakasama eso oqo ena nomuni vulica na iwase oqo se ena nomuni vakavakarau mo ni veivakavulici. Raica na tabana e v–ix, me baleta na ikuri ni veivuke.

Na cava na vuna e sega ni taqomaki keda kina na Turaga mai na rarawa kei na veivakararawataki kecega? Raica na tabana e 15–17.
Vulica na tabana e 18–19 ka vakasaqara na veika eda na calata kevaka e sega ni vakatara na Turaga me da sotava na veivakatovolei. Na cava me da cakava ni da dau sotava na veivakatovolei kei na veivakararawataki? E sa vakaukauwataki kemuni vakacava na Turaga ena nomuni vakatovolei?
Wilika na parakaravu “Sa dau yaco eso me ra…” ena tabana e 19. Na cava na vuna e dau dredre kina me da raici ira na noda daulomani me ra rarawa? Na cava e rawa ni da cakava me tarova na noda dau cudru se yalolailai ena gauna vakaoqori?
Raica lesu na tabana e 19–22 me na laurai na ivakavuvuli e baleta na veivakalougatataki ni matabete. Na gauna cava so o ni sa raica kina na veivakabulai se veivakacegui ni kaukauwa ni matabete? Na cava eda na cakava ni da sa vulica rawa ni sega ni lewa na Turaga me vakabulai e dua na daulomani se vakadaroi e dua na mate?
O ni na vakamacalataka vakacava na ivakavuvuli nei Peresitedi Kimball me baleta na nona mate e dua na gone?
E a vakavulica o Peresitedi Kimball, “Ni da sotava na leqa vakacalaka e dodonu me da vakararavi ga vua na Kalou” (tabana e 23. Ni tiko vua na Kalou e dua na tamata, na cava ena cakava beka o koya ena gauna ni veivakatovolei?

iVolanikalou Veiwekani: Same 116:15; 2 Nifai 2:11–16; 9:67; Alama 7:10–12; V&V 121:1–9; 122:1–9

Kimball siblings — O Spencer W. Kimball kei iratou na tacina ni vo toka e rua na yabaki me mate kina o Fannie na ganena. Tucake, imawi ki na imatau: Clare, Ruth, Gordon, kei Delbert, imawi ki na imatau: o Helen, Alice, Fannie kei Spencer, “Kevaka me yalani tu na noqu rai kei na kila vakavinaka, ka tu vei au na kaukauwa sega ni vakaiyalayala, au na rawa beka ni a vakabulai Apinatai.”

“Had I limitless power, and yet limited vision and understanding, I might have saved Abinadi.”