Hugna 12

Daghang mga Bahandi diha sa Kasulatan

Kon kita magsiksik sa mga kasulatan uban sa samang Espiritu diin kini gihatag, maangkon nato ang dugang pagsabut sa kabubut-on sa Dios.

Gikan sa Kinabuhi ni Wilford Woodruff

Niadtong Marso 1, 1845, si Elder Wilford Woodruff, kinsa kaniadto nag-alagad isip tigdumalang awtoridad sa Simbahan sa British Isles, nakadawat og sulat gikan sa usa ka higala sa Estados Unidos. Gilakip uban sa maong sulat ang kopya sa laing sulat, diin ang usa ka tawo naghimo og plano sa pagpaimprinta sa Doktrina ug mga Pakigsaad sa England ug pagkuha og katungod sa pagkopya didto alang sa iyang kaugalingon. Ang lihok sa maong tawo makasanta unta sa Simbahan sa pagpaimprinta sa libro didto sa England. Misulat si Elder Woodruff sa iyang journal: “Sa pagkatinuod kini usa ka mapangahasong lihok, alang sa usa nga mibiya sa kamatuoran o mga mibiya sa kamatuoran nga mopaimprinta sa mga basahon sa Simbahan ug buot kawatan ang Simbahan sa halin sa mga libro. Alang kanako kini kalooy gikan sa Dios nga mahibaw-an nako kining mga butanga. Migugol ako og panahon aron pagsuta sa balaod kon unsay akong mahibaw-an kabahin sa pagkuha og katungod sa pagkopya.”1 Misuhol siya og tig-imprinta aron pag-typeset ug pag-imprinta og 3,000 ka mga kopya sa libro.2 Dayon, kay nakasabot na sa mga balaod sa British sa katungod sa pagkopya, nagkuha siya og katungod sa pagkopya sa iyang kaugalingong pangalan niadtong Hunyo 7, 1845, “sulod sa kwarenta y otso ka oras human nga ang katapusang mga pahina nakuha gikan sa mga tig-imprinta.”3 Busa napreserbar niya ang legal nga katungod sa Simbahan sa pagpaimprinta sa libro didto sa England.

Dili kini ang unang higayon nga si Wilford Woodruff milihok aron ang mga kasulatan moabut sa mga kamot sa mga Santos sa Ulahing mga Adlaw. Sa wala pa gani maimprinta ang Doktrina ug mga Pakigsaad, gikinamot niya pagkopya ang daghan nga mga pagpadayag ug gidala kini sa iyang misyonaryong mga lakaw. Samtang nag-alagad siya sa iyang unang misyon sa England, gikan sa Enero 1840 hangtud sa Abril 1841, mitrabaho siya uban ni Presidente Brigham Young ug sa uban aron imantala ang unang edisyon sa Basahon ni Mormon gawas sa Estados Unidos. Sa wala madugay miabag siya ni Propeta Joseph Smith sa Nauvoo, Illinois, nag-typeset alang sa peryodiko sa Simbahan nga giulohan og Times and Seasons. Taliwala sa Marso 1, 1842, ug Enero 16, 1843, ang maong mga dokumento mabasa sa Times and Seasons, dugay pa una kini namantala diha sa Perlas nga Labing Bilihon: ang basahon ni Abraham; Joseph Smith—Kasaysayan; ang sulat sa Wentworth, diin naglangkob sa Mga Artikulo sa Hugot nga Pagtuo; ug tipik sa basahon ni Moises.

Kay nakatabang man sa mga Santos nga moabut sa ilang mga kamot ang mga kasulatan, si Presidente Woodruff miawhag kanila “sa pagtipig niini diha sa [ilang] mga kasingkasing.”⁴ Miingon siya: “Magkinabuhi kita sa atong relihiyon. Buhaton gyud nato sa atong mga kaugalingon og unsay atong gisangyaw. Mahalon gyud nato ang mga pulong sa kinabuhi. Mosiksik gyud kita sa mga rekord sa balaanong kamatuoran. Maninguha gyud kita nga makasabut sa panahon ug gidugayon diin kita nagpuyo. Mao kini ang akong panglantaw sa atong kahimtang karon. Wala ko magtan-aw sa mga pagpadayag nga girekord niining mga basahon, kalabut sa dispensasyon sa kahingpitan sa panahon, isip usa ka butang nga molabay nga walay katumanan.”⁵

Mga Pagtulun-an ni Wilford Woodruff

Tun-an gayud nato ang mga kamatuoran sa mga kasulatan, tipigan kini sa atong mga kasingkasing, ug buhaton kini sa atong mga kinabuhi.

Basaha ang Biblia, ang Basahon ni Mormon, ang Doktrina ug Mga Pakigsaad ug ang mga rekord nga gihatag sa Ginoo kanato, ug mahala kini nga mga pagpadayag ug susiha unsa ang gisaad sa Ginoo ngari kanato. Dayon kita magmahal og usa ka butang nga bililhon kanato.⁶

Ato kining katungdanan … isip mga Santos sa Ulahing mga Adlaw sa pagpamalandong, sa paghinuktok, sa pagbasa sa pulong sa Dios, ug sa pagpaninguha sa pagsabut sa atong kahimtang, sa atong gibarugan, ug sa atong kaakohan sa atubangan sa Ginoo.⁷

Ang kalibutan layo sa Ginoo. Mismo kita layo usab kaayo sa Ginoo isip mga tawo. Magpaduol gyud kita sa Ginoo, ug maningkamot sa pagbaton sa Balaang Espiritu, aron kon kita mobasa sa mga pagpadayag sa Dios mabasa nato pinaagi sa samang Espiritu diin kini gihatag. Dayon kita makasabut sa ilang [kahulogan] kon ihatag sa mga anak sa katawhan.⁸

Ang yawa anaa sa tanang bahin niini nga yuta, ug siya molingla sa kada tawo taman sa iyang mahimo. Siksika ang mga kasulatan nga anaa kanato, ingon man kadtong anaa sa Biblia, ug magkat-on sa pagsabut sa hunahuna ug kabubut-on sa Dios, nga atong mahimo pinaagi sa pagbasa niini kon ang kahayag sa Balaang Espiritu anaa kanato, ug busa moandam sa atong mga kaugalingon alang nianang manghitabo sa kinabuhi.⁹

Kining mga butanga [ang mga baruganan nga gitudlo sa mga kasulatan] tinuod. Tun-an gyud nato kini; tipigan kini sa atong mga kasingkasing, ug buhaton kini sa atong mga kinabuhi.¹⁰

Ang mga Propeta, mga Apostoles ug mga Patriyarka mibilin sa ilang dinasig nga mga sinulat nga girekord alang sa atong paggamit ug kaayohan, ug manubag gyud kita sa atong paggamit sa kabubut-on sa pamaagi sa atong pagtagad sa Pulong sa Dios nga miabut ngari kanato.¹¹

Ang Biblia ug ang Basahon ni Mormon naghiusa aron pagpahayag sa kahingpitan sa ebanghelyo.

Dili gayud ko maulaw nga moangkon sa akong kaugalingon nga usa ka lig-on nga tumutuo sa tinuod nga katumanan sa Biblia, ingon man sa kada komunikasyon sa Dios ngadto sa tawo. … Nagtuo ako nga ang balaang mga tawo sa karaan nagsulat ug nagsulti ingon nga sila natandog sa Espiritu Santo, ug nga ilang gisulti ang buot nilang ipasabut, ug nga si Apostol Pablo tinudanayng miingon, “nga walay panagna sa Kasulatan nga mahimo sa kinaugalingon nga pagsabut.” [2 Pedro 1:20.]¹²

Nagpamatuod ako nga si Joseph Smith gimatuto pinaagi sa Makagagahum nga Dios isip Propeta sa katapusang dispensasyon ug sa kahingpitan sa panahon; nga iyang napatim-aw ang Basahon ni Mormon ug mihubad niini pinaagi sa gasa ug gahum sa Dios alang sa kaayohan sa kalibutan sa ulahing mga adlaw. Nasayud ako nga ang Basahon ni Mormon tinuod ug usa ka balaanong dinasig nga talaan.¹³

Aduna kitay Biblia—ang sungkod sa Judah—naglakip sa balaod sa Dios pinaagi ni Moises ug pinaagi sa karaang mga propeta ug mga patriyarka. Napanunod kini nato sulod sa nangaging mga liboan ka katuigan. Samtang ang mga librariya, sama sa librarya ni Alexandria … nawala na, ang Biblia gipreserbar alang kanato, ug ania kini kanato aron mabasa. Naghatag kini kanato sa balaod sa Dios nga gihatag sa mga karaan. Apan walay kausaban niana nga balaod, taman sa may kalabutan ang ebanghelyo, gikan nianang adlawa hangtud karon. Ang Biblia—ang Daan ug ang Bag-ong Tugon—naghatag kanato sa balaod diin mahimo kitang mahimaya ug mobalik pag-usab sa atubangan sa Dios ug mopuyo uban Kaniya hangtud sa hangtud. Naghatag kini kanato sa dalan nga atong sundon aron makadawat og bahin sa unang pagkabanhaw, nga kita unta makita nga sinul-oban sa himaya, imortalidad ug kinabuhing dayon. Naghatag usab kini kanato sa kasaysayan, dili lamang sa unsa ang nahitabo sa mga Judeo, kon dili sa unsa unya ang mahitabo. Dayon aduna kitay Basahon ni Mormon—ang sungkod ni Jose nga anaa sa mga kamot ni Ephraim—nga gisulat diha sa kayutaan sa [America] pinaagi sa mga apostoles ug sa mga propeta. Anaa niini, lakip sa ubang mga butang, ang mga pagtulun-an ni Jesukristo sa dihang siya nagpakita, human sa iyang pagkabanhaw, sa iyang imortal ug mahimayaong lawas, ug mitudlo sa ebanghelyo dinhi. Kadto nga mga pagpadayag naglakip og daghang talagsaong mga baruganan. Nagpakita kini kanato sa katapusang mga adlaw dinhi sa yuta, ang sitwasyon sa gamhanang Babelonia ug ang mga paghukom nga mapahinabo sa katapusang mga adlaw sa dili pa moabut ang Anak sa Tawo.¹⁴

Miingon si Ezequiel nga sa katapusang mga adlaw ang sungkod ni Jose nga anaa sa mga kamot ni Ephraim ibutang gayud uban sa sungkod sa Judah, sa atubangan sa mga mata sa mga nasud diha sa mga kamot sa Ginoo, alang sa usa ka linain nga katuyoan—aron pagpundok sa balay sa Israel sa katapusang mga adlaw [tan-awa sa Ezequiel 37:15–28]. Kining duha ka mga talaan pagagamiton usab alang sa pagsangyaw sa kahingpitan sa walay katapusang ebanghelyo alang sa Judeo ug Hentil; ug sila mobarug sa hukmanan batok sa henerasyon nga nagpuyo sa yuta kon sila moabut.¹⁵

Ania ang Biblia, ang talaan sa mga Judeo, gihatag pinaagi sa pagdasig sa Ginoo ni Moises ug sa karaan nga mga patriyarka ug mga propeta. Paglingla ba kini, ug sama sa gisulti sa dili matuhoon, ang buhat sa tawo? Dili, wala gyuy gahum si bisan kinsang buhing tawo nga makahimo sa maong basahon nga walay inspirasyon sa Makagagahum. Mao usab kini sa Basahon ni Mormon—ang tanang kabatid sa tanang tawo ubos sa langit dili gayud makahimo ug makapakita sa kalibutan og usa ka basahon sama sa Basahon ni Mormon. Ang mga baruganan niini balaanon—gikan kini sa Dios. Dili gyud kini moabut sa hunahuna sa usa ka impostor, o gikan sa hunahuna sa usa ka tawo nga nagsulat og nobela. Ngano? Tungod kay ang mga gisaad ug mga panagna nga anaa niini natuman na nga nakita sa tibuok yuta.¹⁶

Naglakip ba og lahi nga ebanghelyo ang Basahon ni Mormon nianang anaa sa Biblia? Kini dili lahi. Naghatag kini og kasaysayan sa mga tawo kinsa karaang nagpuyo sa kayutaan sa [America], nagsulti kini diin sila gikan ug giunsa nila pag-abut dinhi, nagsulti bahin sa mga pagdumala sa Dios kanila, ug sa pagtukod sa Simbahan ni Kristo taliwala kanila. Gibisitahan sila ni Jesus human sa Iyang pagkabanhaw. Busa miingon siya “Ako adunay ubang mga karnero, nga dili sakop niini nga panon: dad-on ko usab sila ug magapatalinghug sila sa akong tingog; ug usa ra ang panon ug usa ra ang magbalantay.” [Juan 10:16.] … Ang duha ka mga basahon naglakip sa samang ebanghelyo. Usa ra gyud ang ebanghelyo ug wala na gyuy lain pang gipadayag ngadto sa tawhanong pamilya.¹⁷

Ang Doktrina ug mga Pakigsaad mao ang atong testamento sa ulahing mga adlaw.

Aduna usab kitay Basahon sa Doktrina ug mga Pakigsaad, nga aduna kamo sa inyong mga balay ug nga kamo makabasa niini. Kining hinugpong nga pagpadayag gihatag pinaagi sa baba ni Propeta Joseph Smith, pinaagi sa Urim ug Thummim ug sa ubang mga paagi. Kana nga basahon naglakip sa ubang pinakamahimayaon ug pinakahalangdong mga pagpadayag nga ang Dios sukad mihatag sa tawo. Nagpakita kini ngari kanato unsa ang naghulat kanato sa unahan, unsa ang naghulat niini nga nasud ug sa mga nasud sa yuta, ug unsa ang hapit na mahitabo sa mga lumulopyo sa yuta. Klaro kining mga butanga, kini tin-aw, kini lig-on, ug kini mga pagpadayag sa Dios, ug kini pagatumanon, bisan kon ang mga tawo motuo man o dili.¹⁸

Anaa sa akong kamot ang Doktrina ug mga Pakigsaad, nga naglakip sa mga pagpadayag nga gihatag pinaagi ni Propeta Joseph Smith samtang buhi pa siya. Basaha kadto nga mga pagpadayag, ug gikan sa sinugdanan hangtud sa katapusan kini nakapahiusa sa tanang dispensasyon sa Dios dinhi sa yuta.¹⁹

Giisip nako nga ang Doktrina ug mga Pakigsaad, ang atong Testamento, naglakip og usa ka hinugpong nga pinakaligdong, sa pinaka-Diosnon nga mga pagpahayag nga nahatag ngadto sa tawhanong pamilya. Akong hisgutan ang “Panan-awon” [sa seksyon 76] lang, isip usa ka pagpadayag nga naghatag og dugang kahayag, dugang kamatuoran ug dugang baruganan kaysa bisan unsa nga pagpadayag nga anaa sa bisan unsa nga basahon nga atong nabasa. Nakapasayon kini sa atong pagsabut sa atong kahimtang karon, diin kita gikan, nganong ania kita dinhi, ug asa kita paingon. Bisan kinsang tawo mahimong masayud pinaagi niana nga pagpadayag kon unsa unya ang iyang dangatan ug kahimtang. Kay ang tanang tawo nasayud unsang mga balaod ang ilang gisunod, ug ang mga balaod nga gisunod dinhi maoy motino sa ilang kahimtang human dinhi; pagapreserbahon sila niadtong balaora ug modawat sa mga panalangin nga alang kanila.²⁰

Ang Doktrina ug mga Pakigsaad [maoy] usa ka hinugpong nga mga pagpadayag nga gihatag sa Ginoo ni Joseph Smith. Kini nga basahon naglakip sa pinakamahimayaon nga pagpadayag sa doktrina, sa baruganan, sa gobyerno, sa gingharian sa Dios ug sa nagkalahi nga mga himaya, ug sa daghang mahinungdanong mga butang nga moabut hangtud sa walay katapusang mga kalibutan.²¹

Ang Perlas nga Labing Bililhon naglakip sa mahimayaong mga kamatuoran nga gipadayag ngadto ni Propeta Joseph Smith.

Mubong sulat: Sulod sa dugayng panahon sa kinabuhi ni Wilford Woodruff, ang Perlas nga Labing Bililhon dili usa sa sumbanan nga mga basahon sa Simbahan. Hinoon, ang mga pagtulun-an niini gibasag maayo sa mga Santos, uban sa mga kinutlo nga unang gimantala sa ubang mga peryodiko sa Simbahan. Niadtong Oktubre 10, 1880, ang Perlas nga Labing Bililhon nahimong usa ka sumbanan nga basahon sa Simbahan pinaagi sa aksyon sa Unang Kapangulohan ug pinaagi sa pagbotar atol sa kinatibuk-ang komperensya.

Sa mosunod nga mga kinutlo gikan sa iyang journal, si Elder Woodruff nagpadayag sa iyang pagpamatuod kalabut sa basahon ni Abraham, nga gihubad ni Propeta Joseph Smith pinaagi sa gahum sa Dios ug nga sa wala madugay gilakip sa Perlas nga Labing Bilihon.

Ang Ginoo mipanalangin ni Joseph sa gahum sa pagpadayag sa mga misteryo sa gingharian sa Dios, sa paghubad … sa daang mga rekord ug sa hieroglyphics nga ingon ka karaan ni Abraham o ni Adan, diin naghimo sa atong mga kasingkasing nga nagdilaab diha kanato samtang atong nakita ang ilang mahimayaong mga kamatuoran. Si Joseph ang Manalagna mipakita kanato sa pipila ka basahon ni Abraham, nga gisulat mismo ni [Abraham] apan gitago gikan sa kahibalo sa tawo sulod sa nangaging upat ka libo ka tuig apan karon ania na pinaagi sa kalooy sa Dios.²²

Ang mga kamatuoran sa basahon ni Abraham makapabayaw gayud, mahinungdanon, ug mahimayaon, nga apil sa daghang mga bahandi nga gipadayag kanato sa ulahing mga adlaw.²³

Ang mga panagna sa kasulatan makatabang kanato sa pagpangandam sa mga panghitabo sa katapusang mga adlaw.

Mga kaigsoonan, basahon nato ang mga pagpadayag sa Dios alang sa atong kaugalingon, ug kon mabasa na nato kini, ato kining tuhoan, ug maninguha sa pagkinabuhi sa maong paagi nga mahimo kitang andam sa bisan unsang mga dispensasyon nga gitagana sa Ginoo kanato, ug sa ingon makadawat kita sa iyang plano sama sa gihimo ni Job, ug dili mangita og sayop diha kaniya tungod sa iyang mga gipanghatag ngari kanato. Kon dili kini nato masabtan karon, masabtan ra nato kini sa dili madugay.²⁴

“Kinsa Ako, miingon ang Ginoo, nga Ako nagsugo ug Ako wala gisunod? Kinsa Ako, miingon ang Ginoo, nga Ako nagsaad ug wala magtuman?” [Tan-awa sa D&P 58:30–32.] … Miingon kita, matag higayon, ug matag tuig, nga nagpuyo kita sa lahi kaayo nga panahon, henerasyon ug dispensasyon, ug tinuod kini. Molabay ang panahon, uban sa mga panghitabo, ug mopahitabo sa mga pagpadayag sa Dios, labi na ngari kanato. Nagpuyo kita sa panahon sa kangitngit; ang ka walay pagtuo ug ang ka dili matinudanon mikatap sa tibuok yuta. … Makapatingala kini sa mga Santos sa Ulahing mga Adlaw nga makita ang gidak-on sa kangitngit ug ang ka dili matinud-anon nga mikatap sa yuta. Busa, isip mga Santos sa Ulahing mga Adlaw, nagtuo ako nga nagkinahanglan kini sa atong bahin sa pagdugang sa atong kamatinud-anon sa pagsunod sa atong relihiyon, ug sa daghang mga pagpadayag sa Dios nga anaa sa Biblia, sa Basahon ni Mormon ug sa Basahon sa Doktrina ug mga Pakigsaad.

Makita gayud nato, sa mga katuigan, ang mga timailhan sa langit ug sa yuta, ug ang katumanan sa panagna, apan isip mga tawo unsa kadako ang pagtubo sa atong hugot nga pagtuo sa Dios? Mitubo ba kita ingon sa pagtubo sa ka dili matinud-anon sa kalibutan? Dili tingali ako huwes, apan akong makita nga wala gayud kita makasabut. Ang buhat nga atong gihimo naapil, ug ang Biblia, ang Basahon ni Mormon ug ang Basahon sa Doktrina ug mga Pakigsaad ingon ka tinuod karon sama sa baynte, traynta, o kwarenta ka tuig ang milabay. … Moingon ako nga kini nga buhat ingon ka tinuod karon sama kaniadto, ingon man sa panultihon nga akong gikutlo—”Kinsa Ako, miingon ang Ginoo, nga Ako nagsugo ug Ako wala gisunod? Kinsa Ako, miingon ang Ginoo, nga Ako nagsaad ug wala magtuman?” Nagtuo ako nga ang Ginoo motuman kon unsa ang iyang gisulti; nagtuo ako nga siya motuman sa iyang mga gisaad sa mga Santos sa Ulahing mga Adlaw ug ngadto sa kalibutan, ngadto sa Zion ug Babelon; ug kon iyang buhaton adunay usa ka butang nga naghulat, usa ka butang alang kanato, isip mga Santos sa Ulahing mga Adlaw, nga buhaton.²⁵

Buot akong moingon sa mga Santos sa Ulahing mga Adlaw: Ipakita ang hugot nga pagtuo sa Dios, ug ipakita ang hugot nga pagtuo sa Iyang mga pagpadayag, basaha kini ug hinuktuki kini ug mainitong mag-ampo nga unta kamo makabaton og hustong pagsabut sa tanang gipadayag sa Dios, aron kamo motubo diha sa kahayag ug kahibalo sa Dios, ug makita ang importansya sa pagsunod sa inyong relihiyon ug sa pagpuyo nga matarung sa Iyang atubangan.²⁶

Mga Sugyot sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Unsa sa inyong pagtuo ang gipasabut sa pagbasa sa mga kasulatan “pinaagi sa samang Espiritu diin kini gihatag”? pahina 129.
Ribyuha ang unang paragrap sa pahina 130. Sa unsa man nga paagi nga ang mga kasulatan naghatag og proteksyon gikan sa mga impluwensya sa yawa?
Sa ikaduhang paragrap sa pahina 130, mitambag kanato si Presidente Woodruff sa pagbuhat og tulo ka butang diha sa mga kasulatan. Nganong importante man kini nga mga aksyon?
Nganong importante man ang pagtuon sa Biblia ug sa Basahon ni Mormon? (Tan-awa sa mga pahina 130–32; tan-awa usab sa 1 Nephi 13:40; 2 Nephi 3:12.)
Unsay nakadani kanimo bahin sa pagpamatuod ni Presidente Woodruff ’ sa Doktrina ug mga Pakigsaad? (Tan-awa sa mga pahina 132–33 Sa unsa man nga paagi nga ang Doktrina ug mga Pakigsaad “atong Testamento”?
Si Wilford Woodruff miingon nga ang mga kamatuoran sa basahon ni Abraham “daghang mga bahandi” (pahina 135. Unsa man nga mga bahandi ang inyong nakit-an sa Perlas nga Labing Bililhon?
Sa unsa man nga paagi nga ang mga kasulatan motabang kanato sa pag-andam “alang nianang manghitabo sa kinabuhi”? (Tan-awa sa mga pahina 130, 135–36.)
Unsa man ang inyong gibuhat sa paghimo sa inyong pagtuon sa kasulatan nga makahuluganon? Unsa man ang mga tudling sa kasulatan nga partikular nga nakatabang kaninyo? Sa unsa man nga paagi kini nga mga tudling nakatabang kaninyo?
Sa unsa man nga paagi nga ang mga ginikanan, mga apohan, ug mga titser makatabang sa mga anak ug sa mga batan-on sa pagtuon sa mga kasulatan ug mogamit niini sa ilang mga kinabuhi?

May Kalabutan nga mga Kasulatan: 1 Timoteo 4:13–16; 2 Timoteo 3:16; 1 Nephi 15:24; Helaman 3:29–30; Moroni 10:3–5

woman studying scriptures — “Mahalon gyud nato ang mga pulong sa kinabuhi. Mosiksik gyud kita sa mga rekord sa balaanong kamatuoran.”

Wilford Woodruff’s signature in the Book of Commandments — Ang Basahon sa mga Sugo, ang unang hinugpong sa mga pagpadayag ni Joseph Smith. Kini nga kopya sa basahon naglakip sa pirma ni Wilford Woodruff.