Hugna 2

Joseph Smith: Propeta, Manalagna, ug Tigpadayag

Si Joseph Smith, ang Propeta niini nga dispensasyon, nagmatinud-anon sa mga pagpadayag nga iyang nadawat gikan sa kahitas-an, nagtuman sa iyang giordinahan nang daan nga nga calling ug mitimaan sa iyang pagpamatuod pinaagi sa iyang dugo.

Gikan sa Kinabuhi ni Wilford Woodruff

Gikan sa iyang unang mga adlaw isip bag-ong miyembro sa Ang Simbahan ni Jesukristo sa mga Santos sa Ulahing mga Adlaw, si Wilford Woodruff adunay pagpamatuod sa Propeta nga si Joseph Smith. Miingon siya: “Sigurado kaayo ako nga si Joseph usa ka Propeta bisan sa wala pa nako siya makita. Wala akoy pagduhaduha sa akong hunahuna kaniya.”¹ Niadtong Abril 1834, mga upat ka bulan human siya bunyagi, si Brother Woodruff mibiyahe ngadto sa Kirtland, Ohio, diin iyang gikahimamat si Propeta Joseph sa unang higayon. Dayon miistorya siya:

“Sa akong pagpaila sa unang higayon ngadto kaniya dili kasagaran. Nakita nako siya nga didto sa umahan uban sa iyang igsoong lalaki nga si Hyrum; nagsul-ob siya og daan na kaayo nga kalo, ug bise nga nagpunting sa usa ka [target]. Gipaila ako ngadto kaniya ug iya kong giimbitar sa ilang balay.

“Akong gidawat ang imbitasyon ug nag-obserbar pag-ayo kaniya, aron makakat-on gikan kaniya. Misulti siya, samtang miagi sa iyang balay, nga kini mao ang unang oras nga iyang gigahin sa paglingawlingaw sulod sa dugay nang panahon.

“Sa wala madugay human sa among pag-abut misulod siya sa tupad nga kwarto ug sa paggawas nagdala og panit sa lobo, ug miingon, ‘Brother Woodruff, gusto akong tabangan ako nimo sa pagtina niini,’ mao nga akong gihubo ang akong kupo, mitrabaho ug mitabang kaniya, ug mibatig dungog sa pagbuhat sa ingon. … Gusto niya nga kining panit sa lobo ibutang sa lingkuranan sa iyang karwahe. …

“Mao kini ang akong unang paghimamat sa Propeta nga si Joseph Smith, ang bantugang Manalagna niining katapusang dispensasyon.”²

Sa paghinumdom niini nga kasinatian, si Presidente Woodruff miingon nga ang ubang tawo malain gayud kon makakita nga ang usa ka lider sa simbahan miapil sa mao nga mga kalihokan. Pero ang iyang obserbasyon ni Joseph Smith, sa publiko ug sa pribado, nakapalig-on lamang sa iyang pagpamatuod sa misyon sa Propeta. Gikan niadtong unang mga adlaw sa Kirtland hangtud sa pagkamartir sa Propeta mga 10 ka tuig ang milabay, si Wilford Woodruff matinud-anong miserbisyo uban ni Joseph Smith, bisan sa dihang ang mga higala ug mga kauban sa Simbahan mibiya sa kamatuoran. Siya miingon, “Sa tanang mga pagbiya o apostasiya nga nahitabo, ug uban sa tanang mga kalisud ug mga kasakit nga among giantus, … wala gayud ako matintal sa pagduhaduha niini nga buluhaton o sa pagduhaduha nga si Joseph Smith usa ka propeta sa Dios.”³

Niadtong Marso 19, 1897, ang 90 anyos nga si Presidente Woodruff mihimo og audio recording sa iyang pagpamatuod. Siya ang unang presidente sa Simbahan nga mibuhat niini. Sa iyang mubo nga mensahe iyang gigahin ang hapit tanang panahon sa pagpamatuod sa misyon ni Propeta Joseph Smith, nga nagpakita sa tibuok kinabuhi nga paghalad ngadto sa iyang higala ug lider:

“Akong ipamatuod nga si Joseph Smith tinuod nga Propeta sa Dios, giordinahan sa Dios sa pagpahimutang sa pundasyon sa Iyang Simbahan ug gingharian sa katapusang dispensasyon ug kahingpitan sa panahon. … Si Propeta Joseph Smith mibuhis sa iyang kinabuhi alang sa pulong sa Dios ug pagpamatuod ni Jesukristo, ug siya pagakoronahan isip usa ka martir sa atubangan sa Dios ug sa Kordero [lamb]. Sa iyang tanang mga pagpamatuod ngari kanato, klaro kaayo nga ang gahum sa Dios gipakita diha ni Propeta Joseph.”⁴

Pagtulun-an ni Wilford Woodruff

Sa publiko ug pribado, si Propeta Joseph Smith manggihatagon, maloloy-on, matinud-anon, ug matinuoron.

Nakabiyahe ako og liboan ka mga milya kuyog ni Joseph Smith. Nakahibalo ako sa iyang espiritu.⁵

Dako ang akong gibati nga kalipay sa akong nakita ni brother Joseph, kay sa iyang publiko ug pribado nga paningkamot iyang gidala ang Espiritu sa Makagagahum, ug makita kaniya ang pagkabantugan nga wala sukad nako makita sa laing tawo.⁶

Ang iyang pagkatawo adunay diosnong kalooy alang sa kaayohan sa tawhanong pamilya.⁷

Masagup unta ni Brother Joseph ang kinatibuk-ang pundok sa tawhanong pamilya diha sa mga baruganan sa kaluwasan kon anaa pa niya ang gahum.⁸

Ang dispensasyon nga gitahas kaniya nga ipahiluna mao ang pinakaimportante sukad nga gihatag sa tawo; ug nanginahanglan lamang kini sa tawo nga sama kaniya sa pagpangulo niini—usa ka tawo nga matinuoron ngadto sa Dios ug sa iyang mga kaigsoonan; kinsa usa ka manalagna ug tigpadayag, ug kansang pagtuo sa Dios wala gayud mausab o magduhaduha, pero nagpadayon sa iyang kaugalingon ug miawhag sa uban sa pagpadayon sa importanting buhat nga anaa kanila.⁹

Si Joseph Smith giordinahan nang daan sa pag-establisar sa buhat sa Dios sa ulahing mga adlaw.

Si Joseph Smith nagpabilin didto sa kalibutan sa espiritu sulod sa liboan ka tuig aron matawo sa tukmang panahon, ug aron malamdagan sa Dios, aron Iyang bisitahan, ug aron mahimong sarang ug andam sa misyon nga gisangon kaniya.¹⁰

Si Joseph Smith gitudlo sa Ginoo sa wala pa siya matawo sama ni Jeremias. Ang Ginoo misulti ni Jeremias—“Sa wala pa ikaw buhata nako diha sa tiyan naila ko na ikaw; ug sa wala pa ikaw mogula sa tagoangkan gibalaan ko na ikaw, gitudlo ko ikaw nga manalagna alang sa mga nasud.” [Jeremias 1:5.] Gisugo siya sa pagpahimangno sa mga lumulupyo sa Jerusalem sa ilang pagkadautan. Mibati siya nga malisud kini nga buluhaton, pero sa katapusan iyang gibuhat unsay gisugo kaniya. Mao nga ako moingon kabahin ni Joseph Smith, iyang nadawat ang iyang pagkatudlo sa wala pa ang pundasyon sa kalibutan, ug siya natawo sa tukmang panahon sa Ginoo aron sa pag-establisar niini nga buhat sa yuta.¹¹

Gitudloan si Propeta Joseph Smith sa Dios nga Amahan, ni Jesukristo, sa Espiritu Santo, ug sa mga anhel gikan sa langit.

Si Joseph Smith sa kasagaran gihinganlan nga illiterate, tawo nga walay kabangkaagan. Anak siya sa usa ka mag-uuma, ug gamay rag kahigayunan sa edukasyon. Unsay anaa niya nga mopadayag sa kahingpitan sa ebanghelyo sa kalibutan? Wala gayud, gawas lamang kon siya natudloan pinaagi sa mga anghel gikan sa langit, pinaagi sa tingog sa Dios ug pinaagi sa inspirasyon ug gahum sa Espiritu Santo. Ang mga baruganan nga gipadayag ngadto sa kalibutan pinaagi kaniya tinuod sama sa trono sa Dios. Ang ilang impluwensya nasinati na sa yuta, ug magpadayon sa pag-usbaw hangtud sa pag-anhi sa Anak sa Tawo.¹²

Si Joseph Smith gidasig sa Espiritu Santo, ug gipangalagaran siya, agig tubag sa iyang mga pag-ampo, sa Amahan ug sa Anak; ug ang Amahan miingon ngadto kaniya, “Kini ang Akong Hinigugmang Anak, paminaw Kaniya.” [Tan-awa sa Joseph Smith—Kasaysayan 1:17.] Naminaw siya pag-ayo ngadto sa mga pulong ni Jesukristo, ug nagpadayon sa pagbuhat sa ingon hangtud nga siya, sama sa Manluluwas, gipatay.¹³

Wala pa gayud akoy nabasahan, sa nahibaloan lang nako, sa samang gahum nga gipakita sa bisan unsang dispensasyon ngadto sa mga anak sa mga tawo, nga gipakita ngadto sa Propeta sa Dios sa organisasyon niini nga Simbahan, sa dihang ang Amahan ug ang Anak nagpakita ngadto ni Propeta Joseph agig tubag sa iyang pag-ampo. … Importante kini nga pagpadayag, nga wala gayud ipakita sa samang paagi sa bisan unsang dispensasyon sa kalibutan, nga gihatag sa Dios mahitungod sa Iyang buluhaton. Mao nga sa organisasyon niini, ang Propeta sa Dios gipangalagaran sa mga anghel sa langit. Sila mao ang iyang mga magtutudlo, sila mao ang iyang tigpanudlo, ug ang tanang niyang gihimo, ug ang tanang niyang gipahigayon gikan sa pagsugod, gikan niadtong adlawa ngadto sa adlaw sa iyang pagkamartir, nahimo pinaagi sa pagpadayag ni Jesukristo.¹⁴

Moingon ako sa akong kaugalingon nga dili ako motuo nga adunay tawo … nga sobra ra ka suod ug nakigtambayayong sa Dios nga Amahan, ug sa Dios nga Anak, ug sa Dios nga Espiritu Santo, kay ni Propeta Joseph Smith. Ang gahum sa pagpadayag anaa kaniya gikan sa adlaw nga siya gitawag sa pagdawat sa Priesthood hangtud sa panahon nga siya gimartir. Ang gahum sa inspirasyon anaa kaniya kada adlaw. Sayon kining makita diha sa mga pagpadayag nga anaa sa Libro sa Doktrina ug mga Pakigsaad. Kon bation sa Ginoo nga angay niyang badlongon, si Joseph Smith, pinaagi sa iyang kaugalingong ba-ba, mobadlong sa iyang kaugalingon; ug dili magpanagana sa pagtudlo sa pulong sa Ginoo, bisan og batok kini kaniya. Nahiusa siya sa Ginoo; nahiusa siya sa Espiritu Santo; nahiusa siya sa mga anghel sa langit.¹⁵

Mga panagna, mga pagpadayag, ug mga balaod sa Makagagahum, sa ginaingon, nga anaa nianang tawhana, ug siya pagatudloan, dili pinaagi sa tawo ni pinaagi sa kabubut-on sa tawo, pero gikinahanglan nga ang mga anghel sa Dios moanhi ug motudlo kaniya; gikinahanglan ang mga pagpadayag sa Dios sa pagtudlo kaniya, ug gitudloan siya sulod sa daghang mga tuig pinaagi sa mga pagpadayag, ug pinaagi sa balaang mga anghel nga gipadala sa Dios gikan sa langit sa pagtudlo ug pag-andam kaniya sa pagpahimutang sa pundasyon niini nga simbahan.

… Si Joseph mismo sa iyang kaugalingon dili makasabut, gawas lamang kon siya pakitaan sa mga panan-awon sa kahangturan, sa kaimportante sa buluhaton nianang pundasyon nga iya nang gipahimutang. Kon iyang buksan ang iyang hunahuna iyang masabtan, ang daghang mga bahin, sa mga plano sa Dios; ug kini nga mga pagpadayag miabut kaniya ug migiya kini sa iyang mga lakang.¹⁶

Bisan pa sa mga pagsulay ug pagpanggukod, si Propeta Joseph Smith nagpabilin nga matinud-anon sa iyang pagpamatuod.

Sa dihang gipresentar ni Joseph ang mga baruganan nga gihatag sa Dios kaniya ngadto sa mga Kristohanon, dihadiha nagsugod ang pagpangdaot; nakigbisog siya batok sa mga tradisyon nga napanunod nila sa ilang mga amahan nga wala makaila sa Dios ni sa iyang mga pamaagi, sa mga tradisyon nga gibilin kanila sa milabayng mga panahon, nga sukwahi sa makaluwas nga mga kamatuoran sa langit.¹⁷

Ang tibuok kalibutan nakigbatok kaniya—pari ug katawhan. Unsay nahitabo? Klaro lang nga kana si Joseph Smith sama sa ubang mga propeta ug mga apostoles. Iyang giestablisar ang dispensasyon sa ebanghelyo ni Jesukristo, nga nakasugat sa mga tradisyon sa mga tawo—mga tradisyon nga gipasa gikan sa usa ka henerasyon ngadto sa laing henerasyon.¹⁸

Ang iyang kinabuhi puno sa pakigbisog, nag-antus sa pagpanggukod gikan sa tanang tinubdan, ilabi na gikan sa mga kaparian nianang panahona; pero nakasugakod siya niini ug nagmaya pag-ayo sa iyang gibuhat hangtud nahuman ang iyang pagpamatuod dinhi sa yuta, human maghago sulod sa katorse ka mga tuig hangtud sa katapusan. Nag-antus siya og daghang mga pagsulay, pero wala gayud siya madismaya o mawad-i sa paglaum bisan pa nga kinahanglan siyang makigbatok sa mga kaaway sa gawas o sa sulod sa Simbahan. Wala siya kawad-i sa panglantaw sa kaharianon sa iyang calling, ni sa kabalaan niini nga buhat; pero namulong ug nagbudlay taliwala sa mga katawhan ubos sa tanang mga sitwasyon sa iyang pagka siya—ang propeta sa Dios, ang manalagna ug tigpadayag sa katapusang dispensasyon.¹⁹

Ang tanang mga pagbati sa iyang kalag o pagkatawo, ang tanang sentimento sa iyang hunahuna, ug ang tanang buhat sa iyang kinabuhi, nagmatuod nga siya determinado sa pagpadayon sa baruganan sa kamatuoran, bisan pa sa pagsakripisyo sa iyang kinabuhi.²⁰

Ang Ginoo misulti ni Joseph nga siya mosulay kaniya, kon siya magpadayon ba sa pagsunod sa iyang pakigsaad o dili, bisan ngadto sa kamatayon. Gisulayan gayud siya; ug, bisan og ang tibuok kalibutan nakigbatok, ug pagkamaluibon sa mini nga mga higala, bisan og ang iyang tibuok kinabuhi usa ka talan-awon sa kasamok ug kabalaka ug kahingawa, pero, sa iyang tanang mga kasakit, sa iyang pagkabinilanggo, ang kagubot ug dili maayong pagtagad nga iyang giagian, matinud-anon gayud siya sa iyang Dios, ug matinuoron sa iyang mga higala.²¹

Uban sa panan-awon sa umaabut sa Simbahan, si Propeta Joseph Smith miandam sa Napulog Duha ka mga Apostoles ug mihatag nilag gahum sa pagpadayon sa buluhaton sa Ginoo.

Ang simbahan giorganisar niadtong ika-6 sa Abril, 1830, nga adunay unom ka mga miyembro, pero si Joseph may pagtuo nga ang gingharian nga nasugdan, sama sa liso nga mustasa, mahimong bantugang simbahan ug gingharian dinhi sa yuta.²²

Si Joseph Smith mao gayud nga sama sa iyang gisangyaw, usa ka propeta sa Dios, usa ka manalagna ug tigpadayag. Iyang gipahimutang kini nga simbahan ug gingharian, ug gilugwayan ang kinabuhi igo usab nga mahatag ang mga yawe sa gingharian ngadto sa mga elders sa Israel, ngadto sa napulog duha ka mga apostoles. Iyang gigahin ang katapusang tingtugnaw [winter] sa iyang kinabuhi, mga tulo o upat ka mga bulan, uban sa korum sa napulog duha, sa pagtudlo kanila. Dili lamang pipila ka mga oras nga pagpangalagad ngadto kanila sa mga ordinansa sa ebanghelyo; pero migahin siya kada adlaw, semana, ug bulan nagtudlo kanila og sa pipila ka mga butang bahin sa gingharian sa Dios.²³

Dihay panahon sa wala pa siya mamatay si Propeta Joseph gidasig sa Ginoo sa pagpangandam sa iyang pagbiya sa mortalidad. Gipakita kini sa nagkalain-laing mga paagi; ilabi na sa dakong kabalaka nga iyang gipakita sa pagtugyan diha sa Napulog Duha ka mga Apostoles sa tanang mga yawe ug awtoridad sa Balaang Priesthood nga iyang nadawat. Iyang gideklarar sa pribado ug sa publiko nga sila andam na ug hingpit nga sarang, ug nga iyang gihatag ang responsibilidad sa gingharian ngadto sa Napulog Duha ka mga Apostoles.

Ako, si Wilford Woodruff, nga mao na lang ang nagpabiling buhi karon nga didto sa mao nga okasyon, mibati nga akong katungdanan nga utang ngadto sa Simbahan ni Jesukristo sa mga Santos sa Ulahing mga Adlaw, ngadto sa Balay ni Israel, ug ngadto sa tibuok kalibutan, sa pagsaksi niining akong katapusang pagpamatuod ngadto sa tanang mga nasud, nga sa tingtugnaw niadtong 1843–4, si Joseph Smith, ang Propeta sa Dios, mitawag sa Napulog Duha ka mga Apostoles nga magpundok sa Siyudad sa Nauvoo, ug migahin og daghang mga adlaw uban kanamo sa paghatag kanamo sa among mga endowment, ug nagtudlo kanamo niadtong mahimayaong mga baruganan nga gipadayag sa Dios ngadto kaniya. Ug usa niana ka okasyon mibarug siya sa among atubangan sulod sa tulo ka mga oras, namahayag ngari kanamo sa importante ug katapusang dispensasyon nga gipahimutang sa Dios aron mapahigayon dinhi sa yuta niining katapusang mga adlaw. Ang kwarto napuno sa kahayag; ang Propeta nakaangkon og tumang gahum sa Dios, ug ang iyang nawong misanag ug tin-aw kaayo, ug iyang gitapos kadto nga pakigpulong, nga dili-gayud-makalimtan karon o sa kahangturan, uban niining mosunod nga mga pulong:

“Mga kaigsoonan, naguol ako pag-ayo sa kahadlok nga ako kuhaon gikan sa yuta uban sa mga yawe sa gingharian sa Dios ngari kanako, nga dili matugyan diha sa mga ulo sa laing mga tawo. Ang gi-seal sa Dios sa akong ulo ang tanang mga yawe sa Gingharian nga kinahanglanon alang sa pag-organisar ug pagtukod sa Simbahan, sa Zion, ug gingharian sa Dios dinhi sa yuta, ug sa pagandam sa mga Santos alang sa pag-anhi sa Anak sa Tawo. Karon, mga kaigsoonan, nagpasalamat ako sa Dios nga ako buhi pa nga makakita sa adlaw nga ako makahimo sa paghatag kaninyo sa inyong mga endowment, ug karon akong i-seal diha sa inyong mga ulo ang tanang mga gahum sa Aaronic ug sa Melchizedek priesthood ug ang pagkaapostol, uban sa mga yawe ug mga gahum niini, nga gi-seal sa Dios ngari kanako; ug karon akong ihatag ang responsibilidad, ang kabug-at ug pag-amuma niini nga Simbahan ug gingharian sa Dios diha kaninyo, ug karon ako nagmando kaninyo sa pangalan ni Ginoong Jesukristo sa paglig-on sa inyong mga abaga, ug agaka kini nga Simbahan ug gingharian sa Dios sa atubangan sa langit ug yuta, ug atubangan sa Dios, mga anghel ug mga tawo; ug kon dili ninyo kini buhaton kamo panghimarauton.”

Ug ang mao gihapong Espiritu nga mipuno sa kwarto niadtong higayona mipainit sa akong dughan samtang nagsulat ko niini nga pagpamatuod.²⁴

Si Propeta Joseph Smith mitimaan sa iyang pagpamatuod pinaagi sa iyang dugo.

Si Joseph Smith nagpakabuhi hangtud nga iyang nahatag ang iyang testamento ngadto sa kalibutan, ug sa dihang iya nang gi-seal kining tanang mga yawe, mga gahum ug mga panalangin diha sa ulo ni Brigham Young ug sa iyang mga kaigsoonan; sa dihang iya nang natisok kini nga mga yawe dinhi sa yuta aron kini dili na pagakuhaon pa sa kahangturan; sa dihang nahimo na niya kini, ug midala niana nga rekord, niana nga libro sa pagpadayag, ang pamahayag nga naglakip sa kapalaran niining tibuok henerasyon—Judeo, Hentil, Zion ug Babelon, sa tanang mga nasud sa yuta, iya kana nga pagpamatuod pinaagi sa iyang dugo didto sa bilanggoan sa Carthage, diin ang iyang kinabuhi ug ang kinabuhi sa iyang igsoon nga si Hyrum gikutlo pinaagi sa mga kamot sa dautan ug dili diosnon nga mga tawo.²⁵

Moingon ako nga para nako ingon og makapahibulong kadtong higayona ngano nga gitugutan nga mawala ang Propeta ug ang iyang igsoon nga si Hyrum sa among taliwala. Pero si Joseph Smith, pinaagi sa sugo sa Dios ug pinaagi sa gahum ug mga pagpadayag sa langit, giordinahan ug mipahimutang sa pundasyon niining importante nga dispensasyon ug kahingpitan sa mga panahon. Gidala siya nganhi sa kalibutan ug giordinahan sa pag-organisar niini nga Simbahan ni Kristo sa katapusang higayon dinhi sa yuta, sa pag-andam niini alang sa pag-anhi sa Anak sa Tawo. Human sa iyang kamatayon, samtang namalandong ako niini, nakombinser ako nga siya giordinahan nga mamatay—sa pagpaagas sa iyang dugo isip usa ka pagpamatuod niini nga dispensasyon.²⁶

Si Joseph … matinuoron, matinud-anon ug maisug sa iyang pagpamatuod ni Jesus hangtud sa adlaw sa iyang kamatayon.²⁷

Iyang gihatag ang iyang pagpamatuod, mirekord niini, ug misilyo niini pinaagi sa iyang dugo ug mitugyan sa iyang kinabuhi, ug kana nga pagpamatuod adunay kalig-unan karon sa tibuok kalibutan, ug magpabilin hangtud sa katapusan sa panahon.²⁸

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Unsa ang dili kasagaran mahitungod sa pagpaila ni Wilford Woodruff ngadto ni Joseph Smith? (Tan-awa sa mga pahina 13–16.) Unsa ang gitudlo niini nga istorya mahitungod ni Propeta Joseph Smith?
Paklia ang mga pahina 16–17, ug ribyuha ang seksyon mahitungod sa kinaiya ni Joseph Smith. Nganong makatabang man ang pagkahibalo sa kinaiya ni Joseph Smith sa pribado ingon man usab sa publiko? Sa unsa nga paagi nga ang atong pribado nga kinaiya makaapektar sa atong abilidad sa pagtudlo ug paggiya?
Unsay nakapadani ninyo kabahin sa pamaagi sa pagkat-on ni Joseph Smith mahitungod sa kahingpitan sa ebanghelyo? (Tanawa sa mga pahina 17–19).
Giunsa pag-atubang ni Propeta Joseph ang kalisdanan? (Tanawa sa pahina 21). Unsaon man nato nga makakuha og kaayohan gikan sa iyang ehemplo?
Nganong gihatag ni Propeta Joseph Smith ang mga yawe sa gingharian ngadto sa Napulog Duha ka mga Apostoles? (Tanawa sa mga pahina 21–23.) Ngano nga importante alang kanato nga makahibalo nga kini nahitabo?
Ribyuha ang mga pulong ni Presidente Woodruff mahitungod sa kamatayon ni Joseph Smith pahina 23. Unsay inyong gibati samtang naghunahuna kamo mahitungod sa sakripisyo nga gihimo nila ni Joseph ug Hyrum Smith?
Unsay nakapadani ninyo samtang nagbasa kamo sa mga pulong ni Presidente Woodruff mahitungod ni Propeta Joseph Smith?
Nganong importante man nga makadawat og pagpamatuod kabahin ni Propeta Joseph Smith? Unsay atong mabuhat sa pagpalig-on sa atong mga pagpamatuod sa Propeta?

May Kalabutan nga mga Kasulatan:2 Nephi 3:6–15; D&P 5:10; 135; Joseph Smith—Kasaysayan

Propeta Joseph Smith — Mahitungod ni Propeta Joseph, si President Woodruff miingon, “Sa iyang publiko ug pribado nga paningkamot nagauban kaniya ang Espiritu sa Makagagahum, ug makita kaniya ang pagkabantugan nga wala sukad nako makita sa laing tawo.

mantsa nga bildo — Si Joseph Smith “gipangalagaran, agig tubag sa iyang mga pag-ampo, sa Amahan ug Anak.”

Joseph Smith sa pagtudlo — Si Elder Wilford Woodruff didto usab sa dihang gihatag ni Propeta Joseph Smith ang mga yawe sa gingharian ngadto sa Korum sa Napulog Duha ka mga Apostoles.