1 Na em i kamap we planti pipol ol i bin bilip long toktok bilong em, na i stat long tanim bel, na long painim long skripsa bihain long Alma i bin pinisim toktok bilong em.

2 Tasol bikpela namba long ol i bin laikim long bagarapim Alma wantaim Amulek, long wanem, ol i bin belhat long Alma bikos long toktok klia tru bilong em long Sisrom, na tu ol i bin tok olsem Amulek i bin giamanim ol, na sutim tok long lo na ol loya na jas bilong ol.

3 Na tu ol i bin belhat long Alma na Amulek bikos ol i bin toktok klia tru long pasin nogut bilong ol, na ol i bin traim long kilim ol long hait.

4 Tasol em i kamap we ol i bin painim hat long wokim, tasol ol i bin kisim ol na pasim ol wantaim strongpela rop, na kisim ol i kam long het jas bilong graun.

5 Na ol pipol i bin go na witnes long birua long ol—na tok olsem ol i bin sutim tok long lo, na long ol loya wantaim jas bilong ol long graun, na tu long olgeta pipol husat i stap long graun, na tu ol i bin tok olsem em i wanpela God tasol i stap, na em bai salim Pikinini man bilong em long kam namel long ol pipol, tasol em bai no inap seivim ol, na ol pipol i bin autim planti kain samting long birua long Alma wantaim Amulek. Nau ol i bin wokim dispela long pes long het jas long graun.

6 Na em i kamap we Sisrom i bin kirap nogut long ol toktok i bin autim, na tu em i bin save olsem ol giaman toktok bilong em i bin pasim tingting bilong ol pipol, na sol bilong em i stat long pen taim em i tingim long ol rong bilong em, ye, ol pen bilong hel i stat long raunim em.

7 Na em i kamap we em i stat long singaut long ol pipol, olsem: Lukim, mi bin rong, na tupela man i klinpela tru long ai bilong God. Na em i stat long toktok long halivim ol long dispela taim i go het, tasol ol pipol ol i bin sutim tok long em, olsem: Tewel i kisim yu tu? Na ol i spet long em, and tromoim em go aut namel long ol wantaim olgeta lain ol i bilip long toktok bilong Alma na Amulek, na ol i tromoim ol go aut, na salim ol man kam long tromoim ston long ol.

8 Na ol i bin bungim ol meri wantaim pikinini, na tromoi ol long paia na ol lain ol i bilip o ol i bin lain long bilip long toktok bilong God, na tu ol i bin bringim ol rekot bilong ol i gat holi skripsa, na tromoi ol long paia, olsem paia bai kukim na bagarapim ol rekot.

9 Na em i kamap we ol i bin kisim Alma wantaim Amulek, na go long ples bilong wokman bilong lotu ol i dai, olsem ol bai witnesim bagarap bilong ol pipol ol i bin kukim ol wantaim paia.

10 Na taim Amulek i lukim ol pen bilong ol meri na pikinini ol i bin kukim wantaim paia, em tu i kisim pen, na tokim Alma: Mipela bai witnesim dispela pasin nogut tru olsem wanem? Olsem na yumi taitim han bilong yumi go aut, na yusim pawa bilong God i stap insait long mipela, na seivim ol long paia.

11 Tasol Alma i tokim em: Spirit i pasim mi olsem mi no ken taitim han bilong mi go aut, bikos lukim, Bikpela i kisim ol long em yet wantaim glori, na em i larim olsem ol bai wokim dispela, o olsem ol pipol bilong Amonaia bai wokim dispela samting long ol, bikos ol i kamapim belhat bilong ol, olsem ol jasmen em bai givim long ol long belhat bilong em bai kamap stret, na blut bilong ol pipol i nogat rong bai sanap olsem witnes long birua long ol, ye, na singaut nogut tru long birua long ol long las de.

12 Nau Amulek i tokim Alma: Lukim, i luk olsem ol bai kukim yumi tu.

13 Na Alma i bekim: Sapos em i laik bilong Bikpela. Tasol, lukim, wok bilong mipela i no pinis, olsem na ol bai no inap kukim mipela.

14 Nau em i kamap we taim ol bodi na ol rekot ol i bin tromoi long paia i kuk pinis, het jas long graun i bin kam na sanap long pes bilong Alma wantaim Amulek na paitim ol long sik bilong ol wantaim han bilong em taim ol i stap na bin pasim wantaim rop, na tokim ol: Bihain long yupela lukim wanem i bin kamap, yupela bai autim toktok bilong God gen long dispela ol pipol, olsem ol bai tromoi ol i go insait long raun wara bilong paia na salfa?

15 Lukim, yupela save olsem yupela i nogat pawa long seivim ol lain ol i bin tromoi ol i go insait long paia, na tu God i no seivim ol lain ol i wan lotu bilong yupela. Na jas i bin paitim ol gen long sik bilong ol, na askim: Yupela bai tok wanem long yupela yet?

16 Nau dispela jas i wan lotu bilong Neho, em i bin kilim Gidion.

17 Na em i kamap we Alma na Amulek i no bekim em, na em i bin paitim ol gen, na givim ol long ol wokman long tromoim ol long kalabus.

18 Na bihain long ol i bin stap long kalabus long tripela de, planti loya, na jas, na tisa wantaim pris long lotu bilong Neho i bin kam insait long kalabus long lukim ol, na askim ol long planti toktok, tasol ol i no bin bekim.

19 Na em i kamap we jas i bin sanap long pes bilong ol na askim: Bilong wanem yupela i no bekim ol toktok bilong dispela pipol? Yupela i no save olsem mi gat pawa long tromoim yupela long paia? Na em i bin tokim ol long toktok, tasol ol i no bekim.

20 Na em i kamap we ol i lusim na go bek long wokim laik bilong ol, tasol ol i kam bek gen tumora, na jas i paitim ol gen long sik bilong ol, na tok: Inap yupela bai sanap gen na jasim dispela ol pipol, na kotim lo bilong mipela? Sapos yupela i gat kain pawa i bikpela tru, bilong wanem, yupela i no seivim yupela yet?

21 Na ol i bin autim planti kain samting long ol, taim ol i sapim tit bilong ol long ol, na spet long ol, na tok: Mipela bai lukluk olsem wanem taim God bai kotim mipela?

22 Na ol i bin autim planti kain samting, ye, olgeta kain kain samting long ol, na ol i bin tok pilai long ol olsem long planti de. Na ol i no givim kaikai long ol olsem ol bai hangre, na givim wara long ol olsem ol bai nek drai, na tu ol i bin rausim klos bilong ol olsem ol bai i stap as nating, na ol i bin pasim ol wantaim strongpela rop, na putim long kalabus olsem.

23 Na em i kamap we bihain long ol i bin kisim pen long planti de olsem, (na long wanpela ten tu de, long namba ten mun, long namba ten krismas long rul bilong ol jas long ol pipol bilong Nifai), het jas long graun bilong Amonaia wantaim planti tisa na loya bilong ol i bin go insait long ples we Alma wantaim Amulek i stap na bin pasim wantaim ol rop.

24 Na het jas i bin sanap long pes bilong ol, na paitim ol gen, na tokim ol: Sapos yupela i gat pawa bilong God, rausim yupela yet long ol dispela rop, na mipela bai bilip olsem Bikpela bai bagarapim dispela ol pipol olsem yupela i bin toktok.

25 Na em i kamap we olgeta i bin go het na paitim ol, na autim wankain toktok, tru tumas i go inap long laspela man, na taim laspela man i bin toktok long ol, pawa bilong God i bin kamap long Alma wantaim Amulek, na ol i kirap na sanap long lek bilong ol.

26 Na Alma i bin singautim, olsem: Hamas taim mipela bai kisim ol dispela bikpela pen tru, O Bikpela? O Bikpela, givim mipela strong long bilip bilong mipela long Krais, inap long seivim mipela. Na ol i brukim ol rop ol i bin pasim wantaim, na taim ol pipol lukim dispela, ol i stat long ronawe, bikos poret long bagarap i bin kamap long ol.

27 Na em i kamap we traipela poret tru i bin kamap long ol inap long ol pundaun long graun, na painim hat long go long dua bilong haus kalabus, na graun i bin guria nogut tru inap long ol banis bilong haus kalabus i bin bruk nabaut na pundaun long graun, na kilim het jas, na ol loya, na ol pris wantaim ol tisa ol i bin paitim Alma na Amulek.

28 Na Alma wantaim Amulek ol i bin kamaut long haus kalabus, na ol i no kisim bagarap, long wanem, Bikpela i bin givim pawa long ol olsem long bilip bilong ol long Krais. Na ol i kamaut stret long haus kalabus, na ol rop ol i bin pasim ol i bin kamap slek, na haus kalabus i bin pundaun long graun, na olgeta sol ol i stap insait long haus kalabus i bin kilim ol idai, tasol Alma wantaim Amulek i no kisim bagarap, na ol i bin wokabaut stret i go long siti.

29 Nau ol pipol taim ol i harim bikpela nois tru, ol i ron long bikpela bikpela namba long save long as bilong dispela nois, na taim ol i lukim Alma wantaim Amulek kamaut long haus kalabus, na banis long haus kalabus i bin pundaun long graun, ol i poret nogut tru na ronawe long pes bilong Alma na Amulek wankain olsem meme i save lusim ol pikinini bilong em na ronawe long ol tupela laien, na ol i bin ronawe long pes bilong Alma na Amulek olsem.