1 Na nau em i kamap we Moronai i no pinis yet long redi long bikpela pait, o long banisim ol pipol bilong em long ol lain bilong Leman, long wanem, em i bin tokim ol ami bilong em olsem, ol mas stat long wokim maunten wantaim graun raunabaut long olgeta siti, long olgeta hap long graun long ol lain bilong Nifai, long stat long tupela ten krismas long rul bilong ol jas.

2 Na em i bin tokim ol ami bilong em long putim ol plang antap long kil bilong maunten na bin wokim wantaim graun long banisim olsem long longpela bilong wanpela man, raunabaut long ol siti.

3 Na em i bin tokim ol ami bilong em long sanapim plang na ol i bin sapim antap long plang na ol i bin putim antap long kil bilong maunten ol i bin wokim wantaim graun, na ol i bin kamap strongpela na i stap antap.

4 Na em i bin tokim ol ami bilong em long sanapim ol taua antap long ol plang i bin sapim na sanapim aninit, na wokim ples banis antap long ol taua, we ol ston wantaim spia bilong banara long ol lain bilong Leman bai no inap paitim ol.

5 Na ol i bin redi olsem ol bai sanap long antap, na tromoi ston long laik na strong bilong ol, long kilim man husat bai traim long kam klostu long ol banis bilong siti bilong ol.

6 Na Moronai i bin redim ples banis long pait wantaim ol birua bilong ol olsem, raunabaut long wanwan siti long olgeta hap long graun.

7 Na em i kamap we Moronai i bin tokim ol ami bilong em long go long hap long is long ples we nogat man i stap, ye, na ol i bin go na ronim olgeta lain bilong Leman em ol i stap long ples we nogat man i stap long hap long is, na ol i bin go long graun bilong ol yet, long hap long saut long graun bilong Jarahemla.

8 Na graun bilong Nifai i bin stap stret long hap long is long solwara i go long hap long wes long solwara.

9 Na em i kamap we bihain Moronai i bin ronim olgeta lain bilong Leman i go aut long ples we nogat man i stap long hap long is, long hap long not long ol graun bilong ol yet, em i bin tokim ol lain ol i bin stap long graun bilong Jarahemla na graun raunabaut long go long ples we nogat man i stap long hap long is, tru tumas, long arere long nambis, na kisim dispela graun.

10 Na tu em i bin putim ol ami long hap long saut, long arere long graun bilong ol yet, na tokim ol long sanapim banis, olsem ol bai strongim ol ami wantaim pipol bilong ol long han long ol birua bilong ol.

11 Olsem na em i bin rausim olgeta strongpela ples long ol lain bilong Leman long ples we nogat man i stap long hap long is, ye, na tu long hap long wes, em i bin banisim long strongim olgeta ples namel stret long ol lain bilong Nifai na ol lain bilong Leman, namel long graun bilong Jarahemla na graun bilong Nifai, long solwara long hap long wes, i go inap long het wara bilong wara Saidon—Ol lain bilong Nifai ol i bin kisim olgeta graun long hap long not, ye, tru tumas olgeta graun long hap long not long graun ol i kolim Planti, olsem long laik bilong ol.

12 Olsem na, Moronai wantaim ol ami bilong em, ol i bin kamap bikpela wanwan de bikos ol i bin lukim olsem ol wok ol i bin wokim i strongim gut sindaun bilong ol, olsem ol i bin traim long rausim strong na pawa long ol lain bilong Leman long ol graun bilong ol, olsem ol lain bilong Leman ol bai nogat pawa long kisim graun long ol lain bilong Nifai.

13 Na em i kamap we ol lain bilong Nifai i stat long wokim wanpela siti ol i kolim siti Moronai, na dispela siti i bin wokim long solwara long hap long is, na em i bin stap long hap long saut stret long arere long graun long ol lain bilong Leman.

14 Na tu ol stat long wokim wanpela siti namel long siti bilong Moronai na siti bilong Eron, na dispela siti i joinim ol arere bilong Eron na Moronai, na ol i bin givim nem long dispela siti, o graun, Nifaia.

15 Na ol tu stat long dispela wankain krismas long wokim planti siti long hap long not, na wanpela narapela kain siti ol i bin kolim Lihai, ol i bin wokim long hap long not long ol arere long nambis.

16 Na tupela ten krismas i pinis olsem.

17 Na ol pipol bilong Nifai i stap gutpela tru olsem, taim ol statim tupela ten wan krismas long rul bilong ol jas long ol pipol bilong Nifai.

18 Na sindaun bilong ol i bin kamap gutpela tru, na ol i bin kamap ol pipol bilong planti moni samting, ye, na ol i bin kamap planti na kamap strong long graun.

19 Olsem na yumi lukim marimari na stretpela pasin long olgeta wok bilong Bikpela, long kamapim tru olgeta toktok bilong em long lain pikinini bilong ol man, ye, yumi ken lukim olsem ol toktok bilong em i tru, inap long dispela taim, ol toktok em i bin tokim Lihai, olsem:

20 Mi blesim yu, na ol lain pikinini bilong yu, na sapos ol lain pikinini bilong yu i bihainim ol lo bilong mi, ol bai kisim blesin, na sindaun bilong ol bai kamap gutpela long graun. Tasol tingim, sapos ol i no bihainim ol lo bilong mi, ol bai lus long pes bilong Bikpela.

21 Na yumi lukim olsem ol dispela promis i bin kamap tru long ol pipol bilong Nifai, long wanem, ol bikpela pait na bagarap i bin kam long ol bikos long tok pait na pait bilong ol, ye, bikos long pasin bilong kilim man, na pasin strong long stil bilong ol, na pasin bilong lotuim god-giaman, na pasin pamuk na pasin les nogut tru namel long ol yet.

22 Na Bikpela i save seivim olgeta taim ol lain em ol i strong long bihainim ol lo bilong em, tasol planti tausen long ol lain nogut brata bilong ol i bin salim i go long kalabus, na idai wantaim naip bilong pait, na bilip bilong ol i bin paul isi isi i go olgeta, na bin joinim ol lain bilong Leman.

23 Tasol lukim, i no wanpela taim bipo long ol de bilong Nifai we ol pipol bilong Nifai i bin amamas nogut tru olsem long ol de bilong Moronai, ye, inap long dispela taim, long tupela ten wan krismas long rul bilong ol jas.

24 Na tu em i kamap we tupela ten tu krismas long rul bilong ol jas i pinis wantaim bel isi, ye, na wankain long tupela ten tri, krismas.

25 Na em i kamap we long stat long tupela ten foa krismas long rul bilong ol jas, inap bel isi bai i stap yet namel long ol pipol bilong Nifai, sapos pait i no kamap namel long ol yet bikos long graun bilong Lihai na graun bilong Morianton, ol tupela graun i bin i stap long arere long nambis, na arere long graun bilong Morianton i joinim graun bilong Lihai.

26 Long wanem, lukim, ol pipol em i stap long graun bilong Morianton i bin tok olsem ol i gat sampela graun insait long graun bilong Lihai, olsem na ol i statim nogut tru tok pait wantaim ol pipol long graun bilong Lihai, inap long ol pipol bilong Morianton i bin kisim ol samting bilong pait long pait wantaim ol lain brata bilong ol, na ol i bin strong nogut tru long kilim ol wantaim naip bilong pait.

27 Tasol lukim, ol pipol long graun bilong Lihai i bin ronawe i go long kem bilong Moronai, na askim em long halivim, long wanem, ol i no rong.

28 Na em i kamap we taim ol pipol bilong Morianton, em i wanpela man nem bilong em Morianton i bin lidim, painim olsem ol pipol bilong Lihai i bin ronawe i go long kem bilong Moronai, ol i bin poret nogut tru nogut ami bilong Moronai bai kamap long ol na bagarapim ol.

29 Olsem na, Morianton i bin mekim ol pipol bilong em long bilip olsem ol mas ronawe i go long graun i stap long hap long not, i gat planti bikpela wara na kisim dispela graun long ol yet.

30 Na lukim, inap ol bai kamapim tru dispela plen (na dispela bai mekim ol pipol bilong Nifai sore) tasol lukim, Morianton bikos em i man bilong belhat hariap tru, olsem na em i bin belhat wantaim wanpela wok meri bilong em na paitim em nogut tru.

31 Na em i kamap we meri i bin ronawe, na kam long kem bilong Moronai, na tokim Moronai olgeta samting na tu long plen bilong ol long ronawe i go long graun i stap long hap long not.

32 Nau lukim, Moronai i bin poret olsem ol pipol em ol i bin stap long graun Planti bai harim ol toktok bilong Morianton na bung wantaim ol pipol bilong em, na kisim dispela hap long graun olsem, na dispela bai kirapim bikpela hevi namel long ol pipol bilong Nifai, ye, na dispela hevi bai wok long bagarapim fridom bilong ol.

33 Olsem na Moronai i bin salim wanpela ami, wantaim ol samting bilong ol long kem, long go pas long ol pipol bilong Morianton, long pasim ol long go long graun i stap long hap long not.

34 Na em i kamap we ol i bin go inap long ol i kam long ol arere long graun nem bilong em Bagarap, na ol i wet long liklik nek bilong graun long solwara i go long graun long hap long not, ye, long solwara long hap long wes na long hap long is.

35 Na em i kamap we ami Moronai i bin salim wantaim Tiankum, em i lida bilong ol, ol bin bungim ol pipol bilong Morianton, na ol pipol bilong Morianton i kamap ston het (bikos Morianton bin sikrapim bel bilong ol wantaim pasin nogut na gris toktok) olsem na bikpela pait i bin kamap namel long ol, we Tiankum i bin kilim Morianton na winim ami bilong ol, na kisim ol kalabus, na go bek long kem bilong Moronai. Na tupela ten foa krismas long rul bilong ol jas long ol pipol bilong Nifai i pinis olsem.

36 Na ol pipol bilong Morianton i bin kisim kam bek olsem. Na ol i bin putim bek gen long graun bilong Morianton bihain long ol i bin mekim promis long lukautim bel isi, na ol i bin wan bel wantaim ol pipol bilong Lihai, na tu ol i bin putim bek gen long ol graun bilong ol yet.

37 Na em i kamap we bel isi i bin putim bek gen namel long ol pipol bilong Nifai insait long wankain krismas, na tu Nifaia, nambatu het jas i bin idai bihain long em i bin wokim wok wantaim stretpela pasin tru long pes bilong God long jasmen-sia.

38 Tasol, em i bin les long kisim ol rekot na ol dispela samting Alma wantaim ol tumbuna papa bilong em i bin kisim olsem holi, Alma i bin askim em long kisim, olsem na Alma i bin givim ol long pikinini man bilong em, Hilaman.

39 Lukim, em i kamap we pikinini man bilong Nifaia i bin makim long kisim jasmen-sia, long ples long papa bilong em, ye, em i bin makim long kamap het jas na gavana bilong ol pipol, wantaim tok tru antap na holi odinens long jasim stret, na long lukautim bel isi na fridom bilong ol pipol, na long larim ol long lotu long Bikpela, God bilong ol olsem long bilip na laik bilong ol, ye, long sapotim na lukautim laik bilong God, long olgeta de bilong em, na long jasim stret ol pasin nogut lain long rong bilong ol.

40 Nau lukim, Pahoran i nem bilong em. Na Pahoran i bin kisim ples long papa bilong em, na em i stat long rulim ol pipol bilong Nifai long arere long tupela ten foa krismas.