1 Na em i kamap we ol i bin putim ol wasman long lukautim ol lain bilong Leman ol i bin kalabusim ol, na strongim ol long go het na planim idai bilong ol, ye, na tu idai bilong ol lain bilong Nifai ol i bin kilim, na Moronai i bin putim ol man long was long ol taim ol i wokim wok bilong ol.

2 Na Moronai i bin go long siti bilong Mulek wantaim Lihai, na kisim dispela siti na givim long Lihai. Nau lukim, dispela Lihai i wanpela man em i bin pait wantaim Moronai long bikpela bikpela pait long olgeta pait bilong em, na em i wankain olsem Moronai, na ol tupela i bin amamas long lukautim ol yet, ye, ol tupela i bin lavim ol yet gut tru, na tu olgeta pipol bilong Nifai ol i bin lavim ol gut tru.

3 Na em i kamap we bihain ol lain bilong Leman i pinis long planim idai bilong ol wantaim idai bilong ol lain bilong Nifai, ol i bin kisim i go bek long siti Planti, na Tiankum, long oda bilong Moronai, i bin mekim ol long stat long wok long brukim graun long wokim wanpela baret raunabaut long graun, o siti, Planti.

4 Na em i bin tokim ol long wokim wanpela broswok wantaim ol diwai antap long sait long baret long insait, na ol i bin kisim graun long baret na tromoi long broswok ol i bin wokim wantaim diwai, olsem na ol i bin mekim ol lain bilong Leman long wok i go inap long raunim siti bilong Planti raunabaut wantaim wanpela strongpela banis long ol diwai na graun long kamap antap stret.

5 Na dispela siti i bin kamap strongpela nogut tru long dispela taim na long bihain taim, na ol i bin lukautim kalabus lain em i ol lain bilong Leman insait long dispela siti, ye, tru tumas insait long banis ol i bin mekim ol long wokim wantaim han bilong ol yet. Nau Moronai i bin strongim ol lain bilong Leman long wok bikos em i isi long wasim ol taim ol i wok, na olsem em i bin laikim olgeta ami bilong em taim em i laik pait wantaim ol lain bilong Leman.

6 Na em i kamap we Moronai i bin winim wanpela traipela ami tru long ol ami long ol lain bilong Leman olsem, na kisim siti bilong Mulek, em i wanpela strongpela ples banis tru long ol lain bilong Leman insait long graun long ol pipol bilong Nifai, na tu em i bin wokim wanpela ples banis long lukautim ol kalabus man bilong em olsem.

7 Na em i kamap we em i no moa traim long pait wantaim ol lain bilong Leman insait long dispela krismas, tasol em i bin yusim ol man bilong em long redi long pait, ye, na long banisim graun olsem ol lain bilong Leman bai i no inap kam long pait wantaim ol, ye, na tu long seivim ol meri wantaim pikinini bilong ol long taim bilong hangre na pen, na long givim kaikai long ol ami bilong ol.

8 Na nau em i kamap we ol ami long ol lain bilong Leman long hap long solwara long hap long wes na long hap long saut, taim Moronai i bin go aut long stretim sampela samting i rong namel long ol lain bilong Nifai we tok pait i bin kamap namel long ol, ol i bin kisim sampela graun long ol lain bilong Nifai, ye, inap long ol i bin kisim sampela siti bilong ol long dispela hap long graun.

9 Na bikos long pasin nogut namel long ol yet, ye, bikos long pasin bruknabaut na rong namel long ol yet, ol lain bilong Nifai ol i stap long sindaun nogut tru inap long ol i ken kisim bagarap.

10 Na nau lukim, mi gat liklik tok long mekim long ol pipol bilong Amon, em i ol lain bilong Leman bipo, tasol Amon wantaim lain brata bilong em, o olsem ol i bin tanim bel long Bikpela wantaim pawa na toktok bilong God, na ol i bin kisim kam daun long graun bilong Jarahemla, na ol lain bilong Nifai i bin lukautim ol long dispela taim i go yet.

11 Na ol i no inap kisim ol samting bilong pait long pait wantaim ol lain brata bilong ol bikos long tok tru antap bilong ol, long wanem, ol i bin mekim tok tru antap olsem ol bai i no inap moa kapsaitim blut, na inap ol bai idai olsem long tok tru antap bilong ol, ye, inap ol bai larim ol yet long idai long han long ol lain brata bilong ol, sapos Amon wantaim ol brata bilong em i no bin sore na lavim ol nogut tru.

12 Na bikos long dispela, ol i bin kisim kam daun long graun bilong Jarahemla, na ol lain bilong Nifai i bin lukautim ol long dispela taim i go yet.

13 Tasol em i kamap we taim ol i bin lukim sindaun bilong ol i bin nogut tru inap kisim bagarap na planti pen wantaim hevi ol lain bilong Nifai i bin givim long ol, ol i bin sore na laikim long kisim ol samting bilong pait long pait long kantri bilong ol.

14 Tasol lukim, taim ol i klostu kisim ol samting bilong pait, Hilaman wantaim ol brata bilong em i bin tok strong long grisim ol olsem ol no ken wokim, long wanem, ol i bin klostu brukim tok tru antap ol i bin mekim.

15 Na Hilaman i bin poret, nogut ol bai idai sapos ol i wokim dispela, olsem na olgeta lain em ol i bin mekim promis em bin strongim ol long lukluk i stap, taim ol lain brata bilong ol i bin kisim pen, long dispela taim sindaun bilong ol i kamap nogut tru inap long ol i kisim bagarap.

16 Tasol lukim, em i kamap we ol i bin gat planti pikinini man em i no bin mekim promis olsem ol bai no inap kisim ol samting bilong pait long pait wantaim birua bilong ol long lukautim ol yet, olsem na ol i bin bungim wantaim long dispela taim, planti pikinini man bilong ol em ol i ken pait, na dispela pikinini man long ol pipol bilong Amon i bin kolim ol yet ol lain bilong Nifai.

17 Na ol i bin mekim promis long pait long fridom long ol lain bilong Nifai, ye, long lukautim graun inap long ol bai idai, ye, tru tumas ol i bin promis olsem ol bai i no inap givap fridom bilong ol, tasol ol bai pait olgeta taim long seivim ol lain bilong Nifai wantaim ol yet long kalabus.

18 Nau lukim, tu tausen yangpela man bilong ol i bin mekim dispela promis, na kisim ol samting bilong pait long pait long kantri bilong ol.

19 Na nau lukim, olsem ol i no bin givim hevi long ol lain bilong Nifai, i go inap long dispela taim, ol i bin kamap bikpela help tru tu long dispela taim long ol lain bilong Nifai, long wanem, ol i bin kisim ol samting bilong pait bilong ol, na laikim olsem Hilaman bai kamap komanda bilong ol.

20 Na olgeta yangpela man, na ol i bin strong nogut tru, na tu long strong na long wok, tasol lukim, i no dispela tasol—ol lain ol man em ol i bin wokim wok stret long olgeta taim long wanem samting i bin givim ol.

21 Ye, ol lain ol man bilong trupela toktok na gutpela pasin, long wanem, ol i bin lainim long bihainim ol lo bilong God na wokabaut stret long ai bilong em.

22 Na nau em i kamap we Hilaman i bin go long het long ol tu tausen yangpela soldia bilong em, long halivim ol pipol i stap insait long ol arere long graun long hap long saut long solwara long hap long wes.

23 Na tupela ten eit krismas long rul bilong ol jas long ol pipol bilong Nifai i pinis olsem.