Buk Bilong Alma
Husat I Pikinini Bilong Alma

1 Nau em i kamap we insait long namba wan krismas long rul bilong ol jas long ol pipol bilong Nifai, long dispela taim na i go het, king Mosaia i bin idai pinis, em i bin pait long gutpela pait, na i bin wokabaut stret long ai bilong God, na i no lusim wanpela man long rul long ples bilong em, tasol em i bin kamapim ol lo, na ol pipol i bin oraitim ol lo, olsem na ol i gat dinau long bihainim ol lo em i bin mekim.

2 Na em i kamap we insait long namba wan krismas long rul bilong Alma long jasmen-sia, ol pipol i bin kisim kam long em long jasim, wanpela man em i bikpela, na ol pipol i save olsem em i strongpela man.

3 Na em i bin go nabaut namel long ol pipol, na autim long ol wanem em kolim toktok bilong God, na bagarapim sios, na tokim ol pipol olsem ol pipol mas sapotim wanwan pris na tisa, na wanwan pris na tisa i no inap wok wantaim han bilong ol, tasol ol pipol mas sapotim ol.

4 Na tu em i bin tokim ol pipol olsem olgeta manmeri bai seiv long las de, na olsem ol i noken poret o guria, tasol ol mas apim het bilong ol na amamas, bikos Bikpela i bin wokim olgeta man, na tu ridimim olgeta man, na olgeta man bai kisim laip oltaim oltaim.

5 Na em i kamap we em i bin lainim ol dispela samting planti taim inap long planti lain ol i bin bilip long ol toktok bilong em, tru tumas planti lain ol i bin bilip long ol toktok bilong em inap long ol i stat long sapotim em na givim moni long em.

6 Na em i stat long apim bel bilong em long hambak, na pasim planti moni samting klos, ye, na tru tumas, em i stat long kirapim wanpela sios olsem em i bin toktok.

7 Na em i kamap we taim em i bin go, long toktok long ol lain em ol i bilip long toktok bilong em, em bungim wanpela man em i memba long sios bilong God, ye, tru tumas, wanpela tisa bilong ol, na em i stat long tok pait wantaim em wantaim strongpela toktok, olsem em bai rausim ol pipol bilong sios, tasol dispela man i bin strong long em, inap long strongim gutpela toktok long em wantaim ol toktok bilong God.

8 Nau nem bilong dispela man i Gidion, em i bin kamap wokman long han bilong God long rausim ol pipol bilong Limhai long kalabus.

9 Nau, bikos Gidion i bin strong long em wantaim ol toktok bilong God, na em belhat long Gidion, na rausim naip long pait bilong em na i stat long paitim em. Nau bikos Gidion i bin lapun, olsem na em i no strong taim em i bin paitim em, olsem na dispela man i bin kilim Gidion wantaim naip bilong pait.

10 Na ol pipol bilong sios ol i bin kisim kam long Alma long jasim man em i bin kilim Gidion long ol rong em i bin wokim.

11 Na em i kamap we em i bin sanap long pes bilong Alma, na strong long toktok.

12 Tasol Alma i bin tokim em: Lukim, dispela giaman pasin pris i niupela samting i bin kamap nambawan taim namel long dispela ol pipol. Na lukim, rong bilong yu i no giaman pasin pris, tasol, yu bin traim long strongim wok bilong pasin giaman pris wantaim naip bilong pait, na sapos dispela kain pasin kamap namel long dispela ol pipol, em bai bagarapim olgeta.

13 Na yu bin kapsaitim blut bilong wanpela stretpela man, ye, man em i bin wokim planti gutpela wok namel long dispela ol pipol, na sapos mipela lusim yu go fri, blut bilong em bai kamap long mipela long bekim bek.

14 Olsem na, yu bin kotim em long idai, olsem lo Mosaia, laspela king bilong yumi i bin givim long yumi tok, em lo dispela pipol i bin oraitim, olsem na, dispela pipol mas bihainim lo.

15 Na em i kamap we ol pipol i bin kisim em, na nem bilong em i Neho, na ol i kisim em i go antap long liklik maunten Mentai, na ol i mekim em long autim, namel long heven na graun, olsem wanem em i bin lainim long ol pipol i no tru na wan bel wantaim toktok bilong God, na em i bin sem nogut tru long idai long dispela hap.

16 Tasol, dispela i no stopim pasin giaman pris long kamap bikpela long graun bilong Jarahemla, long wanem, planti lain ol i bin lavim ol samting nating bilong graun, na ol i bin go het long autim ol giaman doktrin, na ol i wokim dispela bikos long kisim planti moni samting na ona.

17 Tasol, ol i no traim long giaman bikos ol i poret long lo, long wanem, ol jas i bin mekim save ol lain bilong giaman, olsem na ol i bin giaman olsem ol i autim toktok long bilip bilong ol, na nau lo i nogat pawa long wanpela man bikos long bilip bilong em.

18 Na ol i no traim long stil, bikos ol i poret long lo, long wanem, ol jas ol i bin mekim save long ol stil lain, na tu ol i no traim long pait long stil o kilim man, bikos ol jas ol i bin kilim idai ol man ol i kilim man.

19 Tasol em i kamap we ol lain ol i no memba long sios bilong God i stat long pesekiutim ol lain ol i memba long sios bilong God, na kisim nem bilong Krais antap long ol.

20 Ye, ol i bin pesekiutim ol, na givim pen long ol wantaim olgeta kainkain toktok, na dispela bikos ol i memba long sios bilong God ol i bin daunim ol yet, bikos ol i no apim ol yet na bikos ol skelim toktok bilong God namel long ol yet, fri long moni na pe.

21 Nau wanpela strongpela lo i bin kamap namel long pipol bilong sios, olsem nogat wanpela man em i memba long sios bai kirap na pesekiutim ol lain ol i no memba long sios, na olsem pesekiusen bai i no inap kamap namel long ol yet.

22 Tasol, planti lain namel long ol, em ol i stat long hambak, na i stat long belhat na pait wantaim ol birua bilong ol, inap long ol tromoim han nabaut, ye, ol i bin pait namel long ol yet wantaim han bilong ol.

23 Nau dispela i bin kamap insait long nambatu krismas long rul bilong Alma, na dispela pasin i bin bringim bikpela pen long sios, ye, em i bin bringim bikpela hevi long sios.

24 Long wanem, planti lain ol i bin kamapim belhat bilong ol, na nem bilong ol i bin rausim long rekot bilong sios, inap long ol i no moa bin tingim namel long pipol bilong God. Na tu planti lain i bin lusim sios na go ausait.

25 Nau dispela i bin wanpela bikpela taim bilong traim long ol lain husat ol i bin sanap strong long bilip, tasol, ol i bin strong long holim pas long bihainim ol lo bilong God, na ol i bin stap strong long kisim pesekiusen ol i bin putim antap long ol.

26 Na taim ol pris lusim wok bilong ol long givim toktok bilong God long ol pipol, ol pipol tu lusim wok bilong ol long harim toktok bilong God. Na bihain pris pinis long givim toktok bilong God long ol, olgeta i bin strong long go bek gen long wok bilong ol, na pris i no apim em yet long ol lain ol i harim toktok bilong em, long wanem, man bilong autim toktok bilong God i no moabeta long man em i harim, na tu tisa i no moabeta long sumatin, olsem na ol olgeta i wankain, na olgeta ol i bin wok, wanwan man long strong bilong em.

27 Na ol i bin givim samting bilong ol, wanwan man long skel bilong em long pua, na man gat nid, na sik man na man gat pen, na ol i no bin pasim planti moni na klos samting, tasol ol klos i klinpela na gutpela.

28 Na ol i bin strongim wok bilong sios olsem, olsem na ol i stat long i stap wantaim bel isi long longpela taim gen, na olgeta pesekiusen bilong ol i no daunim ol.

29 Na nau, bikos sios i strong, ol i stat long kamap manmeri bilong planti moni samting, na gat planti long olgeta samting long wanem ol nidim—planti sipsip na bulmakau, na patpela patpela ol kainkain animal, na tu planti rais samting, na gol, na silva, na ol samting i dia tumas, na planti slika na gutpela laplap tru wantaim olgeta kainkain gutpela klos.

30 Olsem na, ol i no salim i go nating wanpela man em i bin as nating, o em i bin hangre, o em i bin nek drai, o em i bin sik o em i no bin kaikai, long taim sindaun bilong ol i bin kamap gutpela, na ol i no putim bel bilong ol long ol moni samting, olsem na olgeta i bin givim han long halivim, lapun wantaim yangpela, mangi-masta wantaim fri, man wantaim meri, sapos long ausait long sios o insait long sios, na ol i no bin wansait long ol lain ol i gat nid.

31 Olsem na, sindaun bilong ol i bin kamap gutpela na ol kamap manmeri bilong planti samting inap long winim ol lain ol i no memba long sios.

32 Long wanem, ol lain ol i no kamap memba long sios bilong ol i bin wokim sanguma, na lotu long god-giaman o i stap nating na mauswara i stap, na laikim samting bilong narapela lain na pait, pasim klos ol i baim long planti moni, na apim long ai bilong ol yet long hambak, pesekiutim, giaman, stilim, pait long stil, wokim pasin pamuk, na kilim man, na olgeta kainkain pasin nogut, tasol, ol jas i bin strongim lo long olgeta lain em ol i bin brukim lo na ol i mekim save we ol i ken.

33 Na em i kamap we taim ol jas i bin strongim lo long ol, wanwan man i bin mekim save long wanem em i bin wokim, ol i no bin wokim pasin nogut, na ol i no traim long wokim pasin nogut bikos ol poret long lo, olsem na bikpela bel isi i bin kamap namel long ol pipol bilong Nifai i go inap long faipela krismas long rul bilong ol jas.