1 Na nau em i kamap we ol pikinini man bilong Alma ol i bin go het namel long ol pipol, long autim toktok long ol. Na Alma tu i les long malolo, olsem na em i bin go wantaim ol.

2 Nau mipela bai no moa toktok long wok bilong ol long autim toktok, tasol ol i bin autim toktok, na trupela toktok, olsem long spirit bilong profesi na revelesen, na ol i bin autim toktok olsem long holi oda bilong God we ol i bin makim.

3 Na nau mi go bek gen long stori long ol bikpela pait i bin kamap namel long ol lain bilong Nifai na ol lain bilong Leman, insait long wanpela ten eit krismas long rul bilong ol jas.

4 Long wanem, lukim, em i kamap we ol lain bilong Joram ol i bin kamap ol lain bilong Leman, olsem na, ol pipol long ol lain bilong Nifai ol i bin lukim olsem ol lain bilong Leman i kam long pait wantaim ol long stat long wanpela ten eit krismas, olsem na ol i bin redi long bikpela pait, ye, ol i bin bungim wantaim ami bilong ol long graun bilong Jeson.

5 Na em i kamap we ol lain bilong Leman ol i bin kam wantaim ol tausen bilong ol, na ol i bin kam long graun bilong Antionum, na dispela i graun bilong ol lain bilong Joram, na wanpela man nem bilong em Jerahemna i bin kamap lida bilong ol.

6 Na nau, bikos ol lain bilong Amalekai ol i kamap ol lain bilong pasin nogut tru na pasin kilim man na winim ol lain bilong Leman, olsem na, Jerahemna i bin makim ol long kamap ol het kepten long ol lain bilong Leman, na ol lain bilong Amalekai wantaim ol lain bilong Joram tasol i bin kamap het kepten.

7 Nau em i bin wokim dispela olsem belhat bilong ol long ol lain bilong Nifai bai i stap yet, inap long em bai bringim ol lain bilong Leman aninit long pawa bilong em olsem em bai kamapim plen tru bilong em.

8 Long wanem, lukim, plen bilong em em long sikrapim bel bilong ol lain bilong Leman long belhat wantaim ol lain bilong Nifai, na em i bin wokim dispela olsem em bai giaman long kisim moa pawa long bosim ol lain bilong Leman, na tu olsem em bai kisim pawa long winim ol lain bilong Nifai inap long kalabusim ol.

9 Na nau, plen long ol lain bilong Nifai em long lukautim graun, haus, meri wantaim lain pikinini bilong ol, olsem ol bai banisim ol long han bilong birua bilong ol, na tu olsem ol bai lukautim rait na narapela gutpela samting bilong ol, ye, na tu fridom bilong ol, olsem ol bai lotu long God olsem long laik bilong ol.

10 Long wanem, ol i save olsem ol lain bilong Leman bai bagarapim ol lain husat bai lotu long God, trupela na laip God long spirit na trupela toktok sapos ol i pundaun long han bilong ol.

11 Ye, na tu ol i save olsem ol lain bilong Leman ol i bin belhat nogut tru wantaim ol lain brata bilong ol, em ol ol pipol bilong Entai-Nifai-Lihai, ol i bin kamap ol pipol bilong Amon—na ol i no inap kisim ol samting bilong pait, ye, ol i bin mekim promis na ol i no inap brukim—olsem na, ol bai idai olgeta sapos ol i pundaun long han long ol lain bilong Leman.

12 Na ol lain bilong Nifai i no inap larim ol long kisim bagarap, olsem na ol i bin givim ol graun long kisim long ol yet.

13 Na ol pipol bilong Amon ol i bin givim long ol lain bilong Nifai bikpela kaikai tru long sapotim ami bilong ol, olsem na ol pipol bilong Nifai ol i bin sanap ol yet, long pait wantaim ol lain bilong Leman, em ol Leman, Lemuel, ol pikinini man bilong Ismael, olgeta lain ol i bin bruk long ol lain bilong Nifai, em ol lain bilong Amalekai na ol lain bilong Joram, na ol tumbuna pikinini bilong ol pris bilong Noa i bin bung wantaim.

14 Nau dispela ol tumbuna pikinini i klostu planti tumas wankain olsem ol lain bilong Nifai, olsem na asua bilong ol lain bilong Leman ol i bin mekim ol lain bilong Nifai long pait wantaim ol lain brata bilong ol, tru tumas long kapsaitim blut.

15 Na em i kamap we taim ol ami bilong ol lain bilong Leman ol i bung wantaim long graun bilong Antionum, lukim, ol ami bilong ol lain bilong Nifai ol i bin redi long bungim ol long graun bilong Jeson.

16 Nau, lida long ol lain bilong Nifai, o man ol i bin makim em long kamap het kepten long ol lain bilong Nifai—nau het kepten i bin givim oda long olgeta ami long ol lain bilong Nifai—na nem bilong em Moronai.

17 Na Moronai i bin givim olgeta oda, na ronim gavman bilong bikpela pait bilong ol. Na krismas bilong em i tupela ten faiv taim ol i bin makim em long kamap het kepten long ol ami bilong ol lain bilong Nifai.

18 Na em i kamap we em i bin bungim ol lain bilong Leman long ol arere long Jeson, na ol pipol bilong em i bin gat naip bilong pait huknaip, wantaim ol kain kain samting bilong pait.

19 Na taim ol ami bilong ol lain bilong Leman i lukim olsem ol pipol bilong Nifai, o olsem Moronai, i bin redim ol pipol bilong em wantaim ol brosplet na banis bilong pait long holim wantaim han, ye, na tu banis bilong het bilong ol na pasim ol wantaim strongpela klos—

20 Nau ami bilong Jerahemna i no bin redi wantaim wanpela kain samting, ol i bin gat naip bilong pait, huknaip, banara wantaim spia bilong banara, na ston wantaim sling bilong ol tasol, na ol i as nating, tasol ol i bin pasim skin bilong animal raun long sangana bilong ol, ye, olgeta i bin as nating, na ol lain bilong Joram wantaim ol lain bilong Amalekai tasol i bin pasim klos.

21 Tasol ol i nogat brosplet, o banis bilong pait—olsem na, namba bilong ol i bikpela tumas long ol lain bilong Nifai tasol ol i bin poret nogut tru long ol ami bilong ol lain Nifai bikos long klos pait bilong ol.

22 Lukim, nau em i kamap we ol i bin poret long pait wantaim ol lain bilong Nifai long ol arere long Jeson, olsem na ol i bin lusim graun bilong Antionum i go long ples we nogat man i stap, na wokabaut raun long ples we nogat man i stap, i go long het long wara Saidon, olsem ol bai kam insait long graun bilong Mentai na kisim dispela graun, bikos ol i no ting olsem ol ami bilong Moronai bai save we ol i bin go.

23 Tasol em i kamap we, taim ol i lusim long go long ples we nogat man i stap, Moronai i bin salim ol spai i go long ples we nogat man i stap long wasim kem bilong ol, na tu Moronai bikos em i bin save long ol profesi bilong Alma, olsem na em i bin salim sampela man long em, long laikim em long askim Bikpela we ol ami long ol lain bilong Nifai bai go long sambai long ol lain bilong Leman.

24 Na em i kamap we toktok bilong Bikpela i bin kam long Alma, na Alma i bin tok save long ol man bilong kisim toktok bilong Moronai, olsem ol ami bilong ol lain Leman i wokabaut i go raun nabaut long ples we nogat man i stap, olsem ol bai kam long graun bilong Mentai, olsem ol bai i stat long paitim ol pipol husat i no strong. Na dispela ol man bilong kisim toktok i bin go na tokim Moronai olsem.

25 Nau Moronai, bin lusim sampela ami bilong em long graun bilong Jeson, nogut sampela ami long ol lain bilong Leman bai kam long dispela graun na kisim siti long ol yet, na em i bin kisim sampela ami bilong em na wokabaut i go long graun bilong Mentai.

26 Na em i bin tokim olgeta pipol long dispela hap long graun long bungim wantaim ol yet long pait wantaim ol lain bilong Leman, long sambai long graun, kantri, rait wantaim fridom bilong ol yet, olsem na ol i bin redi taim ol lain bilong Leman i kam.

27 Na em i kamap we Moronai i bin tokim ol ami bilong em long hait long ples daun klostu long sait long wara Saidon, long hap long wes long wara Saidon long ples we nogat man i stap.

28 Na Moronai i bin putim ol spai raunabaut, olsem em bai save wanem taim kem long ol lain bilong Leman bai kam.

29 Na nau, bikos Moronai i bin save long tingting long ol lain bilong Leman, olsem em i plen bilong ol long bagarapim ol lain brata bilong ol, o long mekim ol kam aninit long ol na kalabusim ol inap long ol bai kirapim wanpela kingdom bilong ol yet long olgeta hap long graun;

30 Na tu em i bin save olsem laik bilong ol lain bilong Nifai em long lukautim graun, fridom, wantaim sios bilong ol tasol, olsem na em i bin ting em i no sin sapos ol i sambai long ol wantaim plen, olsem na, em i bin save long ol spai bilong em wanem rot ol lain bilong Leman bai kam.

31 Olsem na, em i bin brukim ami bilong em na putim sampela long ples daun, na haitim ol long hap long is, na long hap long wes long liklik maunten Ripla;

32 Na em i bin haitim sampela long hap long wes long ples daun, long hap long wes long wara Saidon, olsem na daun insait long ol arere long graun Mentai.

33 Olsem na bihain long em i bin putim ami bilong em long laik bilong em, Alma i bin redi long bungim ol.

34 Na em i kamap we ol lain bilong Leman i bin kam long hap long not long liklik maunten, we sampela ami bilong Moronai i bin hait i stap.

35 Na taim ol lain bilong Leman i lusim liklik maunten Ripla, na kam insait long ples daun, na i stat long brukim wara Saidon, ol ami ol i bin hait i stap long hap long saut long liklik maunten, we nem bilong man em lidim i Lihai, em i bin kisim ol ami bilong em kamaut na raunim ol lain bilong Leman long hap long is long bihain long ol.

36 Na em i kamap we ol lain bilong Leman, taim ol i lukim ol lain bilong Nifai kam long ol long bihain, ol i tanim na i stat long pait wantaim ami bilong Lihai.

37 Na wok bilong idai i stat long tupela sait, tasol ol lain bilong Leman i bin kisim nogut tru bagarap, long wanem, ol i bin as nating olsem na ol lain bilong Nifai i bin paitim ol long ples klia wantaim naip bilong pait na huknaip bilong ol, inap long ol i no abrusim long kilim idai taim ol i tromoim han.

38 Na long sait long ol lain bilong Nifai, wanwan man i bin pundaun long naip bilong pait bilong ol na long kapsaitim blut, bikos ol nambawan hap long skin i bin banisim wantaim brosplet, na banis bilong pait i bin holim, na hetplet bilong ol we ol lain bilong Leman i no inap paitim olsem na ol lain bilong Nifai i bin wokim wok bilong idai namel long ol lain bilong Leman.

39 Na em i kamap we ol lain bilong Leman i bin poret nogut tru, bikos long bikpela bagarap tru i bin kamap namel long ol, tru tumas inap long ol i stat long ronawe i go long hap long wara Saidon.

40 Na Lihai wantaim ol man bilong em ol i bin bihainim ol na ronim ol i go insait long wara Saidon, na ol i bin brukim wara Saidon na go long narapela sait. Na Lihai wantaim ol man bilong em ol i bin sanap long arere long wara Saidon, na ol i no brukim wara i go long narapela sait.

41 Na em i kamap we Moronai wantaim ami bilong em ol i bin bungim ol lain bilong Leman long ples daun, long narapela sait long wara Saidon, na i stat long paitim ol na kilim ol.

42 Na ol lain bilong Leman ol i bin ronawe gen long pes bilong ol, na go long hap long graun bilong Mentai, na ol ami bilong Moronai i bin bungim ol gen.

43 Nau long dispela taim, ol lain bilong Leman ol i bin strong nogut tru long pait, ye, nogat wanpela taim bipo we ol lain bilong Leman i bin save long strong nogut tru long pait olsem ol i pait nau, nogat, ol i no bin pait olsem bipo.

44 Na ol lain bilong Joram wantaim ol lain bilong Amalekai husat i het kepten bilong ol, o nambawan hetman na komanda bilong ol i bin sikrapim bel bilong ol, ye, ol i bin pait wankain olsem ol masalai na kilim planti long ol lain bilong Nifai, ye, long wanem, ol i bin brukim long namel planti hetplet bilong ol, na sutim planti brosplet bilong ol, na lus planti han bilong ol, na ol lain bilong Leman ol i bin pait olsem long belhat nogut tru bilong ol.

45 Tasol, gutpela as tingting i bin sikrapim bel bilong ol lain bilong Nifai, long wanem, ol i no pait long kamap king o long kisim pawa, tasol ol pait long ples na haus, fridom, meri, lain pikinini na olgeta bilong ol, ye, ol i bin pait long ol kastam bilong lotu na sios bilong ol.

46 Na ol i bin wokim wanem ol i bin bilip i duti ol i gat long God bilong ol, long wanem, Bikpela i bin tokim ol wantaim ol tumbuna papa bilong ol, olsem: Sapos ol birua bilong yupela i rong long nambawan taim na nambatu taim, yupela bai i no inap larim ol long kilim yupela.

47 Na gen, Bikpela i bin tok olsem: Yupela mas lukautim ol famili bilong yupela inap long kapsaitim blut. Olsem na, ol lain bilong Nifai ol i bin pait wantaim ol lain bilong Leman, long dispela as long banisim ol yet, ol famili bilong ol, graun bilong ol, kantri bilong ol, rait bilong ol na lotu bilong ol.

48 Na em i kamap we taim ol man bilong Moronai i lukim strong na belhat nogut tru bilong ol lain bilong Leman, ol i klostu surik i go bek na ronawe long ol. Na Moronai, taim em i lukim tingting bilong ol, em i bin autim toktok na sikrapim bel bilong ol wantaim ol dispela tingting—ye, olsem ol mas tingim long graun bilong ol, fridom bilong ol, ye, long fridom bilong ol long kalabus.

49 Na em i kamap we ol i bin tanim long pait wantaim ol lain bilong Leman, na ol i bin singautim wantaim wanpela maus long Bikpela God bilong ol, long fridom bilong ol na long fridom bilong ol long kalabus.

50 Na ol i stat long sanap strong long pait long ol lain bilong Leman wantaim pawa, na taim ol i singaut long Bikpela long fridom bilong ol, ol lain bilong Leman ol i stat long ronawe long pes bilong ol, na ol i ronawe i go, tru tumas long wara Saidon.

51 Nau, ol lain bilong Leman i bin planti tumas, ye, namba bilong ol i tutaim moa long ol lain bilong Nifai, tasol, ol i bin ronim i go inap long ol i bin bungim wantaim long wanpela bodi long ples daun long sait long wara Saidon.

52 Olsem na, ol ami bilong Moronai i bin raunim ol raunabaut, ye, tru tumas long tupela sait long wara, long wanem, lukim, ol man bilong Lihai ol i bin stap long hap long is long wara.

53 Olsem na, taim Jerahemna i lukim ol man bilong Lihai long hap long is long wara Saidon, na ol ami bilong Moronai long hap long wes long wara Saidon, olsem ol lain bilong Nifai ol i bin raunim ol, ol i bin poret nogut tru.

54 Nau Moronai, taim em i lukim poret bilong ol, em i bin tokim ol man bilong em olsem ol bai no moa kapsaitim blut bilong ol.