1 Lukim ol brata bilong mi husat mi lavim, i luk olsem Bikpela i bin lusim mi long kam long yupela, olsem na mi traim long givim toktok bilong mi long yupela, ye, long maus bilong mi yet, na i luk olsem em i namba wan taim long mi long givim toktok bilong mi long yupela wantaim maus bilong mi yet, bikos mi bin yusim olgeta taim bilong mi long jasmen-sia, bikos long wok tumas long wokim, olsem na em i bin hat long mi long kam long yupela.

2 Na tru tumas, mi bai i no inap kam long dispela taim sapos jasmen-sia i no bin givim long narapela man, long rul long ples bilong mi, na Bikpela long bikpela marimari bilong em i bin larim mi olsem mi bai kam long yupela.

3 Na lukim, mi bin kam wantaim bikpela hop na laik olsem mi bai painim olsem yupela i bin daunim yupela yet long ai bilong God, na yupela i bin beten yet long grasia bilong em, inap long mi painim olsem yupela i nogat hevi long ai bilong God, na inap long mi long painim olsem sindaun bilong yupela i no olsem long ol lain brata bilong mipela ol i stap long Jarahemla.

4 Tasol, blesin i go long nem bilong God, bikos em i bin givim mi long save, ye, em i bin givim mi traipela amamas tru long save olsem ol i bin stretim gen long rot bilong stretpela pasin bilong em.

5 Na mi bilip Spirit bilong God i stap insait long mi i bin tok, olsem mi tu bai amamas long yupela, tasol mi no laik amamas bilong mi long yupela bai kamap wankain olsem long ol brata bilong yu long Jarahemla long wanem lukim, amamas bilong mi long ol lain i bin kamap bihain long bikpela pen tru na sore.

6 Tasol lukim, mi bilip olsem yupela i nogat bikpela pasin tru pegen olsem ol lain brata bilong yupela, mi bilip olsem yupela i no apim bel bilong yupela long hambak, ye, mi bilip olsem yupela i no putim bel bilong yupela long moni na samting nating bilong graun, ye, mi bilip olsem yupela i no lotu long ol god-giaman, tasol yupela lotu long trupela God husat i stap, na lukluk het long rausim sin bilong yupela em bai kam wantaim bilip oltaim oltaim.

7 Long wanem, lukim, mi tokim yupela planti samting bai kam, na lukim, wanpela samting i nambawan tru long olgeta—long wanem, lukim, i no long taim Ridima bai kam na i stap namel long ol pipol bilong em.

8 Lukim, mi no tok olsem em bai kam namel long yumi long taim em i stap long skin bilong idai, bikos lukim, Spirit i no tok olsem long mi. Nau long dispela, mi no save; tasol mi save olsem God Bikpela i gat pawa long wokim olgeta samting em i tok bai wokim.

9 Tasol lukim, Spirit i bin tokim mi olsem: Singaut long dispela ol pipol na tok—yupela tanim bel na redim rot bilong Bikpela, na wokabaut long rot bilong em i stret, bikos lukim, kingdom bilong God i kamap klostu, na Pikinini bilong God bai kam long pes bilong graun.

10 Na lukim, Meri bai karim em long Jerusalem, long graun bilong tumbuna papa bilong mipela, na em wanpela meri i no bin silip wantaim man, wanpela i dia tumas na skin nating God i bin makim, em pawa bilong Holi Spirit bai karamapim inap long em bai kisim bel na karim wanpela pikinini, ye, tru tumas Pikinini bilong God.

11 Na em bai go het, na pesim kainkain pen, na hevi na traim long paul, na dispela olsem long kamapim tru toktok em tok bai kisim long em yet pen na kainkain sik long pipol bilong em.

12 Na em bai kisim idai long em yet, olsem em bai slekim ol rop bilong idai husat pasin ol pipol bilong em, na em bai kisim ol malumalum bilong ol long em yet, olsem marimari bai pulapim ol insait bilong em, olsem long skin, olsem em bai sapotim ol pipol bilong em long ol malumalum bilong ol long skin.

13 Nau Spirit save olgeta samting, tasol Pikinini bilong God i kisim pen long skin olsem em bai kisim long em yet sin long ol pipol bilong em, inap long em bai rausim sin bilong ol long pawa bilong selvesen bilong em, na nau lukim, dispela i testimoni bilong mi.

14 Nau mi tokim yupela olsem yupela mas tanim bel, na kamap niupela gen, bikos spirit i tok yupela i no inap kisim kingdom long heven sapos yupela i no kamap niupela gen, olsem na kam na baptais long tanim bel, olsem yupela bai kamap klin long sin bilong yupela, inap long yupela bai bilip long Pikinini Sipsip bilong God, husat rausim sin bilong graun, bikos em gat traipela pawa long seiv na klinim olgeta pasin nogut bilong ol pipol.

15 Ye, mi tokim yupela kam na noken pret, na rausim olgeta sin, em i givim pen long yupela, husat pasim yupela i go daun long bagarap, ye, kam na go het na soim long God bilong yupela olsem yupela gat laik long tanim bel long sin bilong yupela na mekim promis wantaim em long bihainim ol lo bilong em, na baptais long wara long dispela de long witnes long em olsem yupela i bin tanim bel na mekim promis wantaim em.

16 Na husat man i wokim dispela, na bihainim ol lo bilong God long dispela taim na go het, dispela man bai tingim olsem mi bin tokim em, ye, em bai tingim olsem mi bin tokim em, olsem em bai kisim laip oltaim oltaim long testimoni bilong Holi Spirit, em i tokim mi.

17 Na nau ol brata bilong mi husat mi lavim, yupela bilip long ol dispela samting? Lukim, mi tokim yupela, ye, mi save olsem yupela bilip long ol, na rot we bai mi save olsem yupela bilip long ol em Spirit em i stap insait long mi bin soim mi. Na nau bikos bilip bilong yupela i strong long dispela, ye, long ol samting mi bin autim, amamas bilong mi i bikpela.

18 Long wanem, olsem mi bin tokim yupela long i stat, olsem mi bin laikim tru olsem yupela i no bin kamap wankain olsem lain brata bilong yupela, tru tumas mi bin painim olsem ol laik bilong mi bin kamapim tru.

19 Long wanem, mi lukim olsem yupela i stap long ol rot bilong stretpela pasin, mi lukim olsem yupela i bihainim rot husat lidim i go long kingdom bilong God, ye, mi lukim olsem yupela i mekim ol rot bilong em stret.

20 Mi lukim olsem testimoni bilong toktok bilong em i bin soim yupela, olsem em i no inap wokabaut long ol krungut rot, na tu em i no inap senisim wanem em i bin toktok, na tu em i no inap tanim i go liklik long rait han na long lep han, o tanim rait i go long rong, olsem na, pasin bilong em i wanpela i save go raun oltaim.

21 Na em i no save i stap long ol doti tempel, na tu long doti samting o ol doti samting bai i no inap go insait long kingdom bilong God, olsem na mi tokim yupela taim bai kam, ye, em long las de, we man em i doti bai i stap doti yet.

22 Na nau ol brata bilong mi, mi autim ol dispela samting long yupela olsem mi bai kirapim yupela long tingim wok bilong yupela long God, olsem yupela bai nogat hevi long wokabaut long pes bilong em, na olsem yupela bai bihainim holi oda bilong God olsem yupela i bin kisim.

23 Na nau mi laikim olsem yupela mas daunim yupela yet, na kamap bel malumalum na man bilong isi pasin, kamap man em i isi long toktok, kamap man em i sanap strong long kisim pen, i no inap kros long olgeta samting, strong long bihainim ol lo bilong God long olgeta taim, na askim long wanem samting yupela nidim, sapos long spirit o long skin, givim tok-tenkyu long bekim olgeta taim long wanem samting yupela i save kisim.

24 Na yupela mas gat bilip, hop na bikpela lav inap long yupela bai wokim gutpela gutpela pasin long olgeta taim.

25 Na inap Bikpela i blesim yupela, na lukautim ol klos bilong yupela long i stap klin tru, olsem yupela bai sindaun wantaim Abraham, Aisek na Jekop wantaim olgeta holi profet ol i bin stap long stat tru long taim graun i bin stat i go long bihain taim, na olsem ol klos bilong yupela bai kamap klin tru wankain olsem bilong ol insait long kingdom long heven, no moa long go aut.

26 Na nau ol brata bilong mi, mi bin autim ol dispela toktok long yupela olsem Spirit em i stap insait long mi i tokim mi, na sol bilong mi amamas nogut tru, bikos yupela i bin strong nogut tru long harim na bihainim toktok bilong mi.

27 Na nau, inap bel isi bilong God kamap long yupela, na long haus wantaim graun bilong yupela, na long sipsip na bulmakau bilong yupela, na olgeta samting yupela i gat, na long ol meri wantaim ol pikinini bilong yupela, long bilip na gutpela pasin bilong yupela long dispela taim i go het na oltaim oltaim. Na mi bin toktok olsem. Amen.