1 Na em i kamap we ol lain bilong Amalekai, ol lain bilong Amulon wantaim ol lain bilong Leman ol i stap long graun bilong Amulon, graun bilong Hilam, graun bilong Jerusalem, na long katim sot, long olgeta graun raunabaut, ol i no tanim bel na kisim nem Entai-Nifai-Lihai, we ol lain bilong Amalekai wantaim ol lain bilong Amulon ol i bin tanim bel bilong ol long belhat wantaim ol lain brata bilong ol.

2 Na belhat bilong ol long ol lain bilong Entai-Nifai-Lihai i kamap bikpela na nogut tru, inap long ol i stat long sakim tok long king bilong ol, olsem ol i les long em long kamap king bilong ol, olsem na, ol i kisim ol samting bilong pait long pait wantaim ol pipol bilong Entai-Nifai-Lihai.

3 Nau king i bin givim kingdom bilong em long pikinini man bilong em long em em i bin givim nem Entai-Nifai-Lihai.

4 Na king i bin idai long dispela wankain krismas, taim ol lain bilong Leman i stat long redi long pait wantaim ol pipol bilong God.

5 Nau taim Amon wantaim ol lain brata bilong em na tu olgeta lain em i bin kam wantaim ol lukim ol lain bilong Leman i redi long bagarapim ol lain brata bilong ol, ol i bin kam long graun bilong Midian, na Amon i bungim olgeta brata bilong em, na ol i bin lusim dispela hap i go long graun bilong Ismael olsem ol bai kibung wantaim Lamonai na brata bilong em Entai-Nifai-Lihai, wanem ol i mas wokim long banisim ol yet long ol lain bilong Leman.

6 Nau i no wanpela man namel long olgeta pipol ol i bin tanim bel long Bikpela, ol i laik long pait wantaim ol lain brata bilong ol, nogat tru, na tu ol i les long redi long pait, ye, na tu king bilong ol i bin tokim ol olsem ol noken pait o redi long pait.

7 Nau, ol toktok king i bin tokaut long ol pipol long dispela samting i olsem: Mi tok tenkyu long God bilong mi, ol pipol bilong mi em ol mi lavim, olsem nambawan God tru bilong mipela, long gutpela pasin bilong em i bin salim ol dispela brata bilong mipela, ol lain bilong Nifai long mipela long autim toktok bilong God long mipela, na winim bel bilong mipela long save long ol pasin nogut bilong ol tumbuna papa bilong mipela.

8 Na lukim, mi tok tenkyu long nambawan God tru bilong mi olsem, em i bin givim mipela sampela pawa long Spirit bilong em long mekim bel malumalum bilong mipela, inap long mipela i bin autim toktok wantaim ol dispela lain brata, ol lain bilong Nifai.

9 Na tu, lukim, mi tok tenkyu long God bilong mi, bikos mipela i bin kamap long save long ol sin bilong mipela, na long planti pasin kilim man, mipela i bin wokim taim mipela i bin autim toktok wantaim ol.

10 Na tu mi tok tenkyu long God bilong mi, ye, nambawan God tru bilong mi, olsem em i bin soim mipela olsem mipela bai tanim bel long ol dispela samting, na tu olsem em i bin pogivim mipela long ol dispela planti sin na pasin kilim man mipela i bin wokim, na rausim rong long ol bel bilong mipela, insait long gutpela pasin long Pikinini man bilong em.

11 Na nau, lukim, ol brata bilong mi, bikos em i dispela tasol yumi ken wokim (bikos mipela i ol lain ol i bin paul nogut tru long olgeta manmeri) long tanim bel long olgeta sin bilong mipela na planti pasin kilim man mipela i bin wokim, na long askim God long rausim ol kain kain pasin nogut long bel bilong mipela, long wanem, em i dispela samting tasol yumi ken wokim long tanim bel gut tru long ai bilong God olsem em bai rausim doti bilong mipela—

12 Nau, ol gutpela lain tru brata bilong mi em mi lavim, bikos God i bin rausim ol doti bilong mipela, na ol naip bilong pait bilong mipela i bin kamap klin tru, olsem na, yumi no moa mekim ol naip bilong pait bilong mipela doti wantaim blut bilong ol lain brata bilong mipela.

13 Lukim, mi tokim yupela, Nogat, yumi no inap larim ol naip bilong pait bilong mipela kamap doti wantaim blut bilong ol lain brata bilong mipela, bikos, sapos mipela mekim ol naip bilong pait bilong mipela doti gen, ol bai i no inap moa wasim long kamap klin insait long blut bilong Pikinini man bilong nambawan God tru bilong mipela, em bai kapsaitim blut long atonim ol sin bilong mipela.

14 Na nambawan God tru i gat marimari long mipela, na em i bin soim ol dispela samting long mipela, olsem mipela bai i no inap idai, ye, na em i bin soim ol dispela samting long mipela bipo, bikos em i lavim sol bilong mipela wantaim sol bilong ol lain tumbuna pikinini bilong mipela, olsem na em i visitim mipela wantaim ol ensel bilong em long marimari bilong em, inap long mipela wantaim ol tumbuna pikinini bilong mipela long bihain taim bai save long plen bilong selvesen.

15 O, gutpela marimari tru long God bilong yumi! Na nau lukim, bikos em i dispela tasol mipela ken wokim long rausim ol doti long yumi, na ol naip bilong pait bilong mipela i bin kamap klin, yumi mas haitim ol naip bilong pait olsem ol bai i stap klin yet, olsem wanpela testimoni long God bilong yumi long las de, o long dispela de we mipela bai sanap long ai bilong em long jasim, olsem mipela i no bin mekim ol naip bilong pait bilong yumi doti wantaim blut bilong ol lain brata bilong mipela taim em i givim toktok bilong em long mipela na mekim yumi kamap klin wantaim toktok bilong em.

16 Na nau, ol lain brata bilong mi, sapos ol lain brata bilong yumi traim long bagarapim mipela, lukim, mipela bai haitim ol naip bilong pait bilong mipela, ye, tru tumas yumi ken planim ol aninit insait tru long graun, olsem ol bai i stap klin, olsem wanpela testimoni long soim olsem mipela i no bin yusim ol, long las de, na sapos ol lain brata bilong yumi bagarapim mipela, lukim, mipela bai go long God bilong yumi na kisim selvesen.

17 Na nau em i kamap we taim king i pinisim dispela toktok, na olgeta pipol i bin bung wantaim i stap, olsem na ol i kisim ol naip bilong pait bilong ol, na olgeta samting bilong pait ol i bin yusim long kapsaitim blut, na planim aninit tru insait long graun.

18 Na ol bin wokim dispela olsem wanpela testimoni long God na long ol man olsem ol i no bin yusim ol samting bilong pait gen long kapsaitim blut bilong man, na ol i bin wokim dispela, na tok antap tru na promis wantaim God, olsem ol bai idai long ples bilong kapsaitim blut, na ol bai givim long brata long ples bilong kisim, na ol bai wok wantaim han bilong ol long ples bilong i stap nating.

19 Olsem na, yumi lukim olsem, taim ol dispela lain bilong Leman i kamap long bilip na save long trupela toktok, ol i bin kamap strong, na ol i bin laikim long idai long ples bilong wokim sin, olsem na yumi lukim olsem ol i bin plani ol samting bilong pait long kirapim bel isi.

20 Na em i kamap we ol lain brata bilong ol, ol lain bilong Leman, bin redi long pait, na ol i bin kam long graun bilong Nifai long bagarapim king, na putim narapela man long ples bilong em, na tu bagarapim olgeta pipol bilong Entai-Nifai-Lihai long graun.

21 Nau taim ol pipol bilong Entai-Nifai-Lihai i lukim olsem ol i kam long pait wantaim ol, ol i bin go aut long bungim ol, na ol i pundaun long graun, na silip long bros na putim tupela han i go aut, na i stat long singaut long nem bilong Bikpela, na ol i bin wokim olsem, taim ol lain bilong Leman i stat long kam antap long ol, na i stat long kilim ol wantaim naip bilong pait.

22 Olsem, na, ol i bin kilim wan tausen na faipela bilong ol nating, na mipela i save olsem ol i bin kisim blesim, bikos ol i bin go long i stap wantaim God bilong ol.

23 Nau taim ol lain bilong Leman lukim olsem ol lain brata bilong ol i no inap ronawe long naip bilong pait, na tu ol i no inap tanim i go long rait han o lep han, tasol olsem ol laikim long silip long graun na idai, na amamasim God i go inap long idai wantaim naip bilong pait—

24 Nau taim ol lain bilong Leman i lukim dispela, ol i pasim long kilim ol, na planti lain ol i bin sore nogut tru long ol lain brata bilong ol ol i bin idai wantaim naip bilong pait, long wanem, ol i bin tanim bel long ol samting ol i bin wokim.

25 Na em i kamap we ol i bin tromoim i go daun ol samting bilong pait bilong ol, na ol i les long kisim bek, long wanem, ol i bin gat bikpela sem long pasin kilim man ol i bin wokim, na ol i bin go daun wankain olsem ol lain brata bilong ol, na sanap long skin long ol lain ol i bin apim ol samting bilong pait long kilim ol long kisim marimari.

26 Na em i kamap we bikpela namba tru long ol lain ol i wok long kilim i bin joinim ol pipol bilong God long dispela de, na ol lain ol i bin kilim em ol stretpela pipol, olsem na mipela i no tubel tasol olsem ol i bin kisim selvesen.

27 Na nogat wanpela man nogut i bin idai namel long ol, tasol moa long wan tausen pipol ol i bin kamap long save long tok tru, olsem na yumi lukim olsem Bikpela i wok long planti rot long bringim selvesen long ol pipol bilong em.

28 Nau bikpela namba tru long ol lain bilong Leman ol i bin kilim planti tru long ol lain brata bilong ol em ol lain bilong Amalekai na ol lain bilong Amulon, na bikpela namba tru long ol i memba long lotu long ol lain bilong Neho.

29 Nau, em ol tumbuna pikinini bilong Leman wantaim Lemuel ol i bin joinim ol pipol bilong Bikpela, tasol nogat wanpela long ol lain bilong Amalekai o long ol lain bilong Amulon, ol i memba long lotu long ol lain bilong Neho i bin joinim.

30 Olsem na, yumi ken lukim klia tru, olsem taim ol pipol i kisim lait na bikpela save long ol samting bilong stretpela pasin wantaim Spirit bilong God long nambawan taim na bihain pundaun long sin na brukim lo, bel bilong ol i kamap hat nogut tru, olsem na sindaun bilong ol i kamap nogut tru olsem ol i no bin save long ol dispela samting bipo.