1 Nau em i kamap we taim ol lain bilong Leman ol i bin go long pait wantaim ol lain bilong Nifai ol i painim hat long bagarapim ol bihain long planti pait bilong ol, na olsem ol i no inap bagarapim ol, ol i bin go bek gen long graun bilong Nifai.

2 Na em i kamap we ol lain bilong Amalekai, bikos ol i bin lus long pait, olsem na ol i bin belhat nogut tru. Na taim ol lukim olsem ol i no inap bekim bek long ol lain bilong Nifai, ol i stat long tanim bel bilong ol pipol long belhat wantaim ol lain brata bilong ol, ol pipol bilong Entai-Nifai-Lihai, olsem na ol i stat gen long bagarapim ol.

3 Nau dispela pipol i bin les gen long kisim ol samting bilong pait bilong ol, na larim ol birua bilong ol long kilim ol long laik bilong ol.

4 Nau taim Amon wantaim ol brata bilong em lukim dispela wok bilong bagarap namel long ol lain em ol i lavim nogut tru, na namel long ol lain ol i lavim ol nogut tru—long wanem, ol i bin lukautim ol olsem ol ensel i bin salim kam long God long seivim ol long bagarap oltaim oltaim—olsem na, taim Amon wantaim ol brata bilong em lukim dispela bikpela wok tru bilong bagarap, ol i bin sore nogut tru, na tokim king:

5 Yumi bung wantaim ol dispela pipol bilong Bikpela, na yumi go daun long graun bilong Jarahemla long ol lain brata bilong yumi, ol lain bilong Nifai, na ronawe long han bilong ol birua bilong mipela, olsem mipela bai i no inap kisim bagarap.

6 Tasol king i tokim ol: Lukim, ol lain bilong Nifai bai bagarapim mipela, bikos long planti pasin kilim man na sin mipela i bin wokim long ol.

7 Na Amon i tok: Mi bai go na askim Bikpela, na sapos em i tok, mipela bai go daun long ol lain brata bilong mi, inap yupela bai go?

8 Na king i bekim em: Ye, sapos Bikpela i tok mipela bai go, mipela bai go daun long ol lain brata bilong mipela, na mipela bai kamap ol wokman bilong ol i go inap long mipela stretim ol planti pasin kilim man na ol sin mipela i bin wokim long ol.

9 Tasol Amon i tokim em: Lo long ol lain brata bilong yumi, na papa bilong mi bin kirapim dispela lo i tambu olsem nogat wanpela wokman bai kamap namel long ol, olsem na yumi go daun na sanap long skin bilong ol lain brata bilong mipela long kisim marimari.

10 Tasol king i tokim em: Askim Bikpela, na sapos em tok mipela bai go, mipela bai go, tasol sapos nogat, mipela bai idai long dispela graun.

11 Na em i kamap we Amon i bin go na askim Bikpela, na Bikpela i tokim em:

12 Kisim dispela ol pipol i go aut long dispela graun, olsem ol bai i no inap idai, long wanem, Satan i winim bel bilong ol lain bilong Amalekai nogut tru, ol i tanim bel bilong ol lain bilong Leman long belhat wantaim ol lain brata bilong ol long kilim ol, olsem na kisim dispela pipol i go aut long dispela graun, na blesin bai kamap long dispela pipol long dispela jeneresen, long wanem, mi bai lukautim ol.

13 Na nau em i kamap we Amon i bin go na tokim king long olgeta toktok Bikpela i bin tokim em.

14 Na ol i bin bung wantaim olgeta pipol bilong ol, ye, olgeta pipol bilong Bikpela, na bungim wantaim olgeta sipsip na bulmakau bilong ol, na go aut long graun, na kamap long ples we nogat man i stap we dispela ples we nogat man i stap i bin brukim graun bilong Nifai na graun bilong Jarahemla, na ol i bin kam klostu long arere long graun bilong Jarahemla.

15 Na em i kamap we Amon i bin tokim ol: Lukim, mi wantaim ol brata bilong mi bai go pas long graun bilong Jarahemla, na yupela bai i stap hia na go inap long mipela bai kam bek, na mipela bai traim bel bilong ol lain brata bilong mipela, sapos ol bai laikim yupela long kam insait long graun bilong ol.

16 Na em i kamap we taim Amon i bin go het long graun bilong Jarahemla wantaim ol brata bilong em, ol i bungim Alma long ples we ol i bin toktok, na lukim, dispela i wanpela bung bilong amamas nogut tru.

17 Nau Amon i bin amamas nogut tru inap long bel bilong em i pulap, ye, em i bin amamas nogut tru long God bilong em, inap long amamas bilong em i bin winim strong bilong em, na em i bin pundaun gen long graun.

18 Nau dispela i no bikpela amamas tru? Lukim, dispela amamas i nogat wanpela man ken kisim, tasol man em i bin tanim bel tru tru na man em i daunim bel long painim amamas ken kisim.

19 Nau amamas bilong Alma long bungim ol brata bilong em i bikpela tru tumas, na tu Eron, Omna na Himnai ol i bin amamas, tasol lukim, amamas bilong ol i no winim strong bilong ol.

20 Na nau em i kamap we Alma i bin kisim ol brata bilong em go bek long graun bilong Jarahemla, long haus bilong em yet. Na ol i bin go na tokim het jas long olgeta samting i bin kamap long ol long graun bilong Nifai, namel long ol lain brata bilong ol, ol lain bilong Leman.

21 Na em i kamap we het jas i bin salim wanpela tok save i go long olgeta hap long graun, na laikim maus bilong pipol long tok orait, long larim ol lain brata bilong ol, husat i ol pipol bilong Entai-Nifai-Lihai long kam insait long graun bilong Jarahemla.

22 Na em i kamap we maus bilong ol pipol i tok, olsem: Lukim, mipela bai givim graun bilong Jeson long ol, na dispela graun i stap long hap long is long solwara, na em i joinim graun ol i kolim Planti, na i stap long hap long saut long graun bilong Planti, na em i dispela graun Jeson mipela givim long ol lain brata bilong mipela long ol i kisim long ol yet.

23 Na lukim, mipela bai putim ol ami bilong mipela namel long graun bilong Jeson na graun bilong Nifai, olsem mipela bai lukautim ol lain brata bilong mipela, bikos ol i poret long kisim ol samting bilong pait na pait wantaim ol lain brata bilong ol, nogut ol bai sin, na dispela bikpela poret tru i bin kamap long ol bikos ol i bin tanim bel stret long planti pasin kil na pasin nogut tru nogut bilong ol.

24 Na nau, lukim, mipela bai wokim dispela long ol lain brata bilong mipela, olsem ol bai kisim graun bilong Jeson long ol yet, na mipela bai lukautim ol long birua bilong ol wantaim ol ami bilong mipela yet, sapos ol bai sapotim mipela wantaim kaikai bilong ol olsem mipela bai lukautim ol ami bilong mipela.

25 Nau, em i kamap we bihain long Amon harim dispela, em i bin go bek gen long ol pipol bilong Entai-Nifai-Lihai, na Alma i bin go wantaim em, na ol i bin go long ples we nogat man i stap, we ol pipol bilong Entai-Nifai-Lihai ol i bin sanapim haus sel bilong ol, na tok save long ol long olgeta samting i bin kamap. Na tu Alma i bin stori long tanim bel bilong em wantaim Amon, Eron na ol brata bilong em.

26 Na em i kamap we dispela stori i bin mekim ol amamas nogut tru namel long ol yet. Na ol i bin go daun long graun bilong Jeson, na kisim graun bilong Jeson long ol yet, na ol pipol bilong Nifai i bin kolim ol olsem ol pipol bilong Amon, olsem na ol i bin kisim dispela nem oltaim oltaim.

27 Na ol i bin stap namel long ol pipol bilong Nifai, na tu ol i bin kaunim ol wantaim ol pipol ol i bin kamap memba long sios bilong God. Na tu ol i kamap ol pipol ol i gat bikpela lav na strongpela bilip long God na long ol man, long wanem, olgeta samting ol wokim i stret na wantaim trutru bel, na ol i bin gat strongpela bilip long Krais, tru tumas i go long arere.

28 Na ol i bin les nogut tru long kapsaitim blut bilong ol lain brata bilong ol, na nogat wanpela man i inap long grisim ol long kisim ol samting bilong pait long pait wantaim ol lain brata bilong ol, na ol i no poret long idai, bikos long hop na bilip bilong ol long Krais na long kirap gen, olsem na, ol i bin bilip olsem Krais i bin winim idai.

29 Olsem na, ol i bin idai long kain kain pasin nogut tru we ol lain brata bilong ol i bin yusim long kilim ol, bipo long ol i inap long kisim naip bilong pait o huknaip long paitim ol.

30 Olsem na ol i bin kamap wanpela pipol ol i gat strongpela bilip, na em ol pipol bilong Nifai i bin lavim, wanpela nambawan pipol tru em Bikpela i bin lavim.