1 Na nau em i kamap we mi bin kisim wanpela pas kam long king Amoron olsem, em bai givim siti bilong Antipara long yumi, sapos mi bai givim long em dispela kalabus lain bilong bikpela pait mipela i bin kisim.

2 Tasol mi bin salim wanpela pas long king, olsem mipela save inap ol ami bilong mipela ken pait long kisim siti bilong Antipara, na olsem em i no gutpela tumas long mipela long givim ol kalabus lain long kisim dispela siti, bikos mipela ken givim ol kalabus lain bilong mipela long senis long ol lain bilong Nifai tasol.

3 Na Amoron i bin tok nogat long pas bilong mi, bikos em i no laik senisim ol kalabus lain, olsem na mipela i stat long redi long pait wantaim ol lain bilong Leman i stap long siti bilong Antipara.

4 Tasol ol pipol bilong Antipara i bin lusim siti, na ronawe i go long ol narapela siti, ol i bin kisim na banisim, na mipela i bin kisim siti bilong Antipara olsem.

5 Na tupela ten eit krismas long rul bilong ol jas i pinis olsem.

6 Na em i kamap we long stat long tupela ten nain krismas, mipela i bin kisim kaikai wantaim sampela moa man long antapim ami bilong mipela long graun bilong Jarahemla na long graun raunabaut, em i namba long sikis tausen man, na tu sikispela ten pikinini man bilong ol pipol bilong Amon ol i bin kam long joinim ol lain brata bilong ol, liklik tu tausen bilong mi. Na nau, lukim, mipela i kamap strong, ye, na tu mipela i bin kisim planti kaikai.

7 Na em i kamap we mipela i bin plen long kirapim wanpela bikpela pait wantaim ami em ol i bin putim long lukautim siti Kumenai.

8 Na nau lukim, mi bai soim long yu olsem mipela i bin kamapim plen tru bilong mipela hariap tru, ye, mipela i bin raunim siti Kumenai long nait, liklik taim bipo long ol i kisim kaikai i bin karim kam, wantaim strongpela ami bilong mipela, o wantaim wanpela hap long strongpela ami bilong mipela.

9 Na em i kamap we mipela i bin kem raunabaut long siti long planti nait, tasol mipela i bin silip antap long ol naip bilong pait bilong mipela, na putim ol wasman, olsem ol lain bilong Leman bai no inap kam long nait long kilim mipela, olsem ol i bin wokim planti taim, tasol ol i bin kapsaitim blut taim ol i traim planti taim.

10 Na em i kamap we, kaikai bilong ol i kam, na ol lain bilong Leman em ol i bin karim kaikai i kam klostu go insait long siti long nait. Na mipela bin sanap long ples long ol lain bilong Leman, olsem na, mipela i bin kisim ol wantaim kaikai bilong ol.

11 Na ol lain bilong Leman ol i bin lus long sapot bilong ol olsem, tasol ol i bin strong long lukautim siti, olsem na em i kamap we mipela i bin kisim dispela ol kaikai na salim i go long Judea, na salim ol kalabus lain bilong mipela i go long graun bilong Jarahemla.

12 Na em i kamap we i no planti de i go pas, na ol lain bilong Leman i stat long hangre, olsem na ol i bin lusim siti i go long han bilong mipela, na mipela i bin kamapim plen tru bilong mipela long kisim siti Kumenai olsem.

13 Tasol em i kamap we, ol kalabus lain bilong mipela i planti tumas we, inap namba bilong mipela i traipela tru, tasol mipela i bin yusim olgeta strong bilong mipela long lukautim ol, o kilim ol i dai.

14 Long wanem, lukim, ol i bin bruk long ronawe long bikpela bikpela namba, na pait wantaim ston, o stik bilong pait o wanem samting ol ken painim, inap long mipela i bin kilim tu tausen na moa long ol bihain long ol i givap olsem kalabus lain bilong bikpela pait.

15 Olsem na em i kamap we, mipela mas kilim ol i dai, o was long ol, wantaim naip bilong pait long han, na kisim ol i go daun long graun bilong Jarahemla, na tu inap mipela i bin kisim kaikai long ol lain bilong Leman tasol mipela i daun yet long kaikai long ol pipol bilong mipela yet.

16 Na nau, em i kamap hat nogut tru long taim long dispela taim nogut long wokim wanem wantaim ol dispela kalabus lain bilong bikpela pait, tasol, mipela i bin tingim long salim ol go daun long graun bilong Jarahemla, olsem na mipela i bin makim sampela man bilong mipela, na givim oda long ol long lukautim na kisim ol kalabus lain bilong mipela i go daun long graun bilong Jarahemla.

17 Tasol em i kamap we ol i bin kam bek tumora. Na nau lukim, mipela i no askim ol long kalabus lain, bikos lukim, ol lain bilong Leman i bin kam long pait wantaim mipela, na ol i bin kam bek long rait taim stret long seivim mipela long han long ol lain bilong Leman. Long wanem, lukim, Amoron i bin salim sapot bilong ol wantaim kaikai na planti ami long ol man.

18 Na em i kamap we dispela ol man mipela i bin salim wantaim kalabus lain ol i bin kam long rait taim stret long pasim ol, taim ol i klostu winim mipela.

19 Tasol lukim, ol liklik tu tausen na sikispela ten lain bilong mi bin pait nogut tru, ye, ol i bin strong long pes bilong ol lain bilong Leman, na kilim idai stret olgeta ol lain em ol i pait wantaim ol.

20 Na taim sampela ami bilong mipela i klostu surik i go bek long ai long ol lain bilong Leman, lukim, dispela tu tausen na sikispela ten ol i bin strong na ol i no kaunim man.

21 Ye, na ol i bin bihainim na strong long wokim olgeta toktok bilong oda stret tru, ye, na tru tumas ol wok ol i wokim i bin kamap olsem long bilip bilong ol, na mi bin tingim toktok bilong ol, ol i bin tokim mi olsem ol mama bilong ol i bin lainim ol.

22 Na nau lukim, mipela i givim ona bilong win i go long ol dispela pikinini man bilong mi wantaim ol man em ol i bin makim long kisim kalabus lain i go, long wanem, em ol dispela lain em ol i bin paitim ol lain bilong Leman, olsem na ol i bin ronim ol i go bek long siti bilong Mentai.

23 Na mipela i bin kisim bek siti bilong mipela Kumenai, na mipela i no bin bagarapim olgeta wantaim naip bilong pait, tasol, mipela i bin lusim bikpela namba long ol man.

24 Na em i kamap we bihain long ol lain bilong Leman i ronawe, na i no long taim long ol lain bilong Leman i ronawe mi bin givim oda olsem ol man bilong mi em ol i bin kisim sua namel long ol daiman mas karim kam na putim marasin long sua bilong ol.

25 Na em i kamap we tu handret long tu tausen na sikispela ten bilong mi bin hap idai bikos ol i bin lusim blut, tasol, olsem long gutpela pasin bilong God, mipela i bin kirap nogut tru na tu olgeta ami bilong mipela i bin amamas nogut tru, bikos nogat wanpela sol bilong ol i dai, ye, na tu nogat wanpela sol namel long ol i bin kisim planti sua.

26 Na nau, olgeta ami bilong mipela i bin kirap nogut tru bikos olgeta stap laip, ye, olsem ol i bin stap laip na wan tausen lain brata bilong mipela dai. Na mipela i bin tok stret olsem em i pawa bilong mirakel bilong God, bikos long strongpela bilip tru bilong ol long dispela samting ol i bin lainim long bilip—olsem wanpela stretpela God i stap, na olsem em bai lukautim ol lain em ol i bilip long em wantaim pawa bilong mirakel bilong em.

27 Nau dispela i bilip bilong ol dispela lain em mi bin toktok, ol i yangpela, na tingting bilong ol i strong, na ol i save bilip long God olgeta taim.

28 Na nau em i kamap we bihain long mipela i bin lukautim ol man bilong mipela i bin kisim sua, na planim daiman bilong mipela wantaim ol lain bilong Leman em ol i planti olsem, lukim, mipela i bin askim Gid long kalabus lain ol i bin kisim i go daun long graun bilong Jarahemla.

29 Nau Gid i het kepten bilong ol lain em i bin makim long wasim ol i go daun long graun bilong Jarahemla.

30 Na nau, ol toktok bilong Gid long mi i olsem: Lukim, mipela i stat long go daun long graun bilong Jarahemla wantaim kalabus lain bilong mipela. Na em i kamap we mipela i bin bungim ol spai long ol ami bilong mipela, em i bin salim i go aut long kem long ol lain bilong Leman.

31 Na ol i bin singaut long mipela long tok—Lukim, ol ami long ol lain bilong Leman i wokabaut i go long hap long siti bilong Kumenai, na lukim, ol bai paitim ol, ye, na bai bagarapim ol pipol bilong mipela.

32 Na em i kamap we kalabus lain bilong mipela i bin harim singaut bilong ol, na dispela i bin mekim ol long kisim strong, na ol i bin kirap long pait wantaim mipela.

33 Na em i kamap we bikos ol i kirap long pait, mipela i bin kilim ol wantaim naip bilong pait bilong mipela. Na em i kamap we ol i bin bung long wanpela bodi na ron i go long naip bilong pait bilong mipela, na bikpela namba bilong ol i bin kilim idai taim ol i wokim olsem, na sampela bilong ol i bin bruk i go aut na ronawe long mipela.

34 Na lukim, taim ol i ronawe na mipela i bin painim hat long kisim ol, mipela i bin wokabaut hariap tru long kam long siti Kumenai, na lukim, mipela i bin kam long rait taim stret long halivim ol lain brata bilong mipela long banisim siti.

35 Na lukim, mipela i bin seivim gen long han long ol birua bilong mipela. Na gutpela nem tru bilong God bilong mipela, bikos lukim, em i bin seivim yumi, ye, em i bin wokim dispela bikpela samting tru long yumi.

36 Nau em i kamap we taim mi, Hilaman, i harim ol dispela toktok bilong Gid, mi i bin amamas nogut tru bikos long gutpela pasin bilong God long lukautim mipela, inap long mipela olgeta i no i dai, ye, na mi bilip olsem sol bilong ol lain em ol i bin kilim idai i go insait long malolo bilong God bilong ol.