1 Na nau em i kamap we taim Moronai i kisim dispela pas, em i bin kisim strong na amamas nogut tru bikos long strongpela bilip tru bilong Pahoran, olsem em tu i no wanpela treita bilong fridom na sindaun long kantri bilong em.

2 Tasol em tu i bin sore nogut tru bikos long pasin nogut bilong ol lain em ol i bin ronim Pahoran i go awe long jasmen-sia, ye, long katim sot bikos long ol lain em ol i bin kirapim pait wantaim kantri na God bilong ol.

3 Na em i kamap we Moronai i bin kisim liklik namba long ol man, olsem Pahoran i bin laikim, na givim Lihai wantaim Tiankum pawa long bosim ami bilong em, na em i go long graun bilong Gidion.

4 Na em i bin apim plak bilong fridom long wanem hap em i bin go, na kisim wanem ami em ken taim em i wokabaut i go long graun bilong Gidion.

5 Na em i kamap we ol tausen i bin bungim wantaim long plak bilong em, na kisim naip bilong pait bilong ol long pait long fridom bilong ol, olsem ol bai i no inap go long kalabus.

6 Olsem na, taim Moronai i bungim wantaim wanem man em ken kisim long olgeta wokabaut bilong em, em i bin kam long graun bilong Gidion, na ol ami bilong ol i kamap strongpela tumas taim em i bungim ami bilong em wantaim ami bilong Pahoran, inap long ami bilong ol i strong moa yet long ol man bilong Pakas, em i king bilong dispela lain em ol i bruk i go awe na ronim ol friman i go aut long graun bilong Jarahemla na kisim dispela graun long ol yet.

7 Na em i kamap we Moronai na Pahoran ol i bin go daun long graun bilong Jarahemla wantaim ol ami bilong ol, na ol i bin go stret long siti long bungim ol man bilong Pakas na ol i bin pait wantaim ol.

8 Na lukim, Pakas i bin kilim, na ol man bilong em i bin kalabus, na Pahoran i bin putim bek gen long jasmen-sia bilong em.

9 Na ol man bilong Pakas ol i bin kisim kot bilong ol, olsem lo i tok, na tu dispela ol king-man em ol i bin kisim na kalabus i bin kilim idai olsem lo i tok, ye, dispela ol man bilong Pakas wantaim dispela ol king-man, em i bin les long kisim ol samting bilong pait long pait long kantri bilong ol i bin kalabusim, tasol ol king-man em i laik pait wantaim kantri bilong ol i bin kilim idai.

10 Olsem na, em i kamap we, ol lain bilong Nifai ol i bin strong long bihainim dispela lo long gutpela sindaun long kantri bilong ol, ye, na husat man i tok nogat long fridom bilong em i bin kilim idai hariap tru olsem lo i tok.

11 Na tripela ten krismas long rul bilong ol jas long ol pipol bilong Nifai i pinis olsem, Moronai wantaim Pahoran ol i bin kirapim bel isi gen long graun bilong Jarahemla, namel long ol pipol bilong ol yet, bihain long kilim idai olgeta lain husat i no tru tru long wok bilong fridom.

12 Na em i kamap we long i stat long tripela ten wan krismas long rul bilong ol jas long ol pipol bilong Nifai, Moronai i givim oda hariap tru olsem ol kaikai wantaim wanpela ami long sikis tausen man mas salim i go long Hilaman, long halivim em long lukautim dispela hap long graun.

13 Na tu em i bin givim oda olsem wanpela ami long sikis tausen man wantaim inap kaikai mas salim i go long ol ami bilong Lihai na Tiankum. Na em i kamap we dispela i bin wokim pinis long banisim graun long ol lain bilong Leman.

14 Na em i kamap we Moronai na Pahoran ol i bin lusim bikpela namba tru long ol man long graun bilong Jarahemla, na wokabaut wantaim wanpela bikpela namba tru long ol man i go long graun bilong Nifaia wantaim strongpela tingting long rausim ol lain bilong Leman i stap long dispela siti.

15 Na em i kamap we, ol i bin kisim bikpela namba tru long ol man long ol lain bilong Leman, na kilim planti bilong ol, na kisim kaikai wantaim samting bilong pait bilong ol, taim ol i wokabaut i go long graun bilong Nifaia.

16 Na em i kamap we, ol i bin tokim ol long mekim promis olsem ol bai no moa kisim samting bilong pait bilong ol na pait wantaim ol lain bilong Nifai, bihain long ol i kisim ol.

17 Na ol i bin salim ol go long i stap wantaim ol pipol bilong Amon bihain long ol i mekim promis, na ol lain em ol i no bin kilim i namba klostu long foa tausen man.

18 Na em i kamap we ol i bin go het long graun bilong Nifaia bihain long ol i salim ol i go. Na em i kamap we, ol i bin sanapim haus sel bilong ol long ol ples daun bilong Nifaia, klostu long siti bilong Nifaia, bihain long ol i kamap long siti bilong Nifaia.

19 Nau Moronai i bin laikim olsem ol lain bilong Leman bai kamaut long pait wantaim ol long ol ples daun, tasol ol lain bilong Leman, bikos ol i bin save long strong bilong ol, na ol i bin lukim bikpela namba tru bilong ol, olsem na ol i bin poret long kamaut long pait wantaim ol, na ol i no pait long dispela de.

20 Na taim nait i kam, Moronai i bin go het long tudak long nait, na kamap antap long banis long lukim wanem hap long siti ol lain bilong Leman i bin kem wantaim ami bilong ol.

21 Na em i kamap we ol i bin kem long hap long is klostu long dua, na olgeta man i silip. Na nau Moronai i bin go bek long ami bilong em, na tokim ol olsem ol mas hariap tru long redim strongpela rop wantaim leta, long lusim i go daun long antap long banis i go insait tru long banis.

22 Na em i kamap we Moronai i bin tokim ol man bilong em long go het na kalap antap long banis, na olgeta i bin go daun insait long dispela hap long siti, ye, tru tumas long hap long wes, we ol lain bilong Leman i no kem wantaim ami bilong ol.

23 Na em i kamap we ol olgeta i bin go daun insait long siti long nait wantaim strongpela rop na leta bilong ol, olsem na olgeta i stap insait long banis bilong siti taim monin i kam.

24 Na nau, taim ol lain bilong Leman i kirap na lukim ol ami bilong Moronai i stap insait long banis, ol i poret nogut tru, inap long ol i ronawe long dua.

25 Na nau taim Moronai i lukim olsem ol i ronawe long ol, em i givim oda long ol man bilong em long go bihain long ol, na kilim planti, na raunim planti narapela man na kisim ol kalabus, na sampela bilong ol i ronawe i go long graun bilong Moronai, long arere long nambis.

26 Na Moronai wantaim Pahoran i no lusim wanpela sol long kisim bek siti bilong Nifaia olsem, tasol planti long ol lain bilong Leman i bin kilim idai.

27 Nau em i kamap we planti long ol lain bilong Leman em ol i bin kalabusim i laikim long joinim ol pipol bilong Amon na kamap wanpela fri pipol.

28 Na em i kamap we planti ol i bin joinim ol pipol bilong Amon na kamap fri pipol olsem long laik bilong ol.

29 Olsem na, olgeta lain bilong Leman ol i bin kalabus na joinim ol pipol bilong Amon, na ol i stat long wok hat nogut tru, long brukim graun, long planim olgeta kain kain rais nabaut na lukautim olgeta kain sipsip, bulmakau wantaim narapela animal, na ol hevi long ol lain bilong Nifai ol i bin kamap isi olsem, ye, inap hevi ol i bin kisim long olgeta lain bilong Leman i bin kalabus i kamap isi olsem.

30 Nau em i kamap we bihain Moronai i bin kisim bek siti bilong Nifaia na kisim planti kalabusman inap long mekim namba long ol ami long ol lain bilong Leman i kamap liklik tru, na tu bihain long kisim bek planti lain bilong Nifaia i bin kalabus inap long strongim ami bilong Moronai nogut tru, olsem na Moronai i bin lusim graun bilong Nifaia na go het long graun bilong Lihai.

31 Na em i kamap we taim ol lain bilong Leman i lukim Moronai kam long pait wantaim ol, ol i poret gen na ronawe long ami bilong Moronai.

32 Na em i kamap we Moronai wantaim ami bilong em i bin ronim ol long wanpela siti i go long narapela siti, i go inap long ol i bin bungim Lihai wantaim Tiankum, na ol lain bilong Leman i ronawe long Lihai na Tiankum, i go daun long arere long nambis, inap long ol i bin kam long graun bilong Moronai.

33 Na olgeta ami long ol lain bilong Leman i bin bungim wantaim long wanpela bodi long graun bilong Moronai. Nau Amoron, king bilong ol i stap wantaim ol.

34 Na em i kamap we Moronai, Lihai wantaim Tiankum ol i bin kem raunabaut long arere long graun bilong Moronai wantaim ol ami bilong ol, inap long ol lain bilong Leman i bin raunim raunabaut long arere long graun bilong Moronai wantaim ples we nogat i stap long hap long saut na long hap long is.

35 Na ol i bin kem long nait olsem. Long wanem, lukim, ol lain bilong Nifai wantaim ol lain bilong Leman i bin skin taiet bikos long longpela wokabaut tru bilong ol, olsem na ol i no tingim long mekim wanpela plen long nait, tasol Tiankum tasol i bin kamapim wanpela plen, long wanem, em i bin belhat nogut tru long Amoron, olsem na em i bin tingim olsem em Amoron wantaim Amalikaia brata bilong em i bin kirapim dispela traipela na longpela pait namel tru long ol na ol lain bilong Leman, ye, em ol tupela husat i bin kirapim planti bikpela pait long kapsaitim blut, na kirapim planti taim bilong hangre, bikos long planti bikpela pait ol i kirapim.

36 Na em i kamap we Tiankum bikos em i bin belhat, olsem na em i bin go long kem long ol lain bilong Leman, na lusim em yet long go daun long banis bilong siti. Na em i bin hangamapim long rop long go long wanpela ples i go long narapela, inap long em i bin painim king, na tromoim spia long em, na kilim em klostu long bel. Tasol lukim, king i bin kirapim ol wokman bilong em pastaim long em idai, olsem na ol i bin ronim Tiankum na kilim em.

37 Nau em i kamap we taim Lihai wantaim Moronai i save olsem Tiankum idai, ol i sore nogut tru, long wanem, lukim, em i bin wanpela man em i bin strong nogut tru long pait long kantri bilong em, ye, wanpela pren tru tru bilong fridom, na em i bin pesim planti pen nogut tru. Tasol lukim, em idai na i go pinis olsem olgeta man long graun i save wokim.

38 Nau em i kamap we Moronai i bin wokabaut i go long tumora, na kam long ol lain bilong Leman, inap long em i bin kilim ol nogut tru, na ronim ol go aut long graun, na ol i ronawe i go olgeta, inap long ol i no go bek gen long pait wantaim ol lain bilong Nifai long dispela taim.

39 Na tripela ten wan krismas long rul bilong ol jas long ol pipol bilong Nifai i pinis olsem, na ol i bin gat bikpela pait, kapsaitim blut, kisim taim bilong hangre wantaim pen long planti krismas olsem.

40 Na planti pasin bilong kilim man, tok pait, bruknabaut wantaim olgeta kain kain pasin nogut namel long ol pipol bilong Nifai i bin kamap, tasol God i bin larim ol bikos long ol stretpela lain na beten bilong ol.

41 Tasol lukim, planti i bin kamapim belhat bilong ol, bikos long longpela taim long bikpela pait namel long ol lain bilong Nifai na ol lain bilong Leman, na planti i bin bel malumalum bikos long pen bilong ol long taim pait i bin kamap long longpela taim, inap long ol i bin daunim ol yet long ai bilong God, tru tumas ol i bin daunim ol yet nogut tru.

42 Na em i kamap we bihain long Moronai i banisim dispela hap long graun i stap ples klia long ol lain bilong Leman, i go inap long ol dispela graun i kamap strong, em i bin go bek long siti bilong Jarahemla, na Hilaman tu i bin go bek long ples bilong em yet, na bel isi i bin kamap gen namel long ol pipol bilong Nifai.

43 Na Moronai i bin makim pikinini man bilong em Moronaia long kamap komanda long ol ami bilong em, na em i lusim i go long haus bilong em olsem em bai i stap long bel isi i go inap long em bai idai.

44 Na Pahoran i go bek long jasmen-sia bilong em, na Hilaman i stat gen long autim toktok bilong God long ol pipol, bikos long planti bikpela pait wantaim tok pait, i bin kamap we, lo bilong lotu mas kirapim gen insait long sios.

45 Olsem na, Hilaman wantaim lain brata bilong em i bin go het, na autim toktok bilong God wantaim strongpela pawa inap long winim bel bilong planti pipol long bilip long pasin nogut bilong ol, na dispela i bin mekim ol long tanim bel long sin bilong ol, na baptais long Bikpela God bilong ol.

46 Na em i kamap we ol i bin kirapim gen sios bilong God long olgeta hap long graun.

47 Ye, na liklik lo i bin mekim long bikpela lo. Na ol i bin makim ol het jas na ol jas bilong ol.

48 Na sindaun long ol pipol bilong Nifai i stat long kamap gutpela gen, na ol i stat long kamap planti na strong nogut tru gen long graun. Na ol i stat long kamap ol pipol bilong planti moni samting.

49 Tasol inap ol i bin gat planti moni samting, o ol i bin kamap strong nogut tru, o sindaun bilong ol i bin kamap gutpela tru, tasol ol i no solapim long hambak long ai bilong ol, na tu ol i no slo long tingim Bikpela God bilong ol, tasol ol bin daunim ol yet nogut tru long ai bilong em.

50 Ye, ol bin tingim wanem bikpela samting Bikpela i bin wokim long ol, olsem em i bin seivim ol long idai, long kalabus, long haus kalabus, na long olgeta kain kain pen, na em i bin seivim ol long han long birua bilong ol.

51 Na ol i bin beten long Bikpela God bilong ol olgeta taim, inap long Bikpela i bin blesim ol, olsem long toktok bilong em, olsem na ol i bin kamap strong na sindaun bilong ol i bin kamap gutpela tru long graun.

52 Na em i kamap we olgeta long dispela samting i bin kamap olsem. Na Hilaman idai long tripela ten faiv krismas long rul bilong ol jas long ol pipol bilong Nifai.