1 Na em i kamap we tok pait i bin stat long kamap namel long ol pipol long stat long faipela krismas long rul bilong ol jas, long wanem, wanpela man, nem bilong em Amlisai, em i wanpela smatpela man, ye, wanpela save man long bikpela save bilong graun, em i memba long sios bilong man na husat i bin kilim Gidion wantaim naip bilong pait, em i bin kilim em i dai olsem lo i tok—

2 Nau dispela man Amlisai i bin winim bel bilong planti manmeri long bihainim em bikos long gris toktok, inap long ol i stat long kamap strongpela, na ol i stat long traim long mekim Amlisai kamap king long olgeta pipol bilong Nifai.

3 Nau ol pipol bilong sios, wantaim olgeta lain ol i no bin pulim i go awe long bihainim gris toktok bilong Amlisai, i kirap nogut long dispela samting i bin kamap, long wanem, ol i bin save olsem kain samting mas kamap wantaim maus bilong ol pipol olsem lo i tok.

4 Olsem na, sapos Amlisai em i man nogut na inap long em i kisim sapot long pipol, em bai tok nogat long ol long rait na narapela gutpela samting bilong sios, long wanem, em i laik long bagarapim sios bilong God.

5 Na em i kamap we ol pipol ol i bin bungim wantaim ol yet long olgeta hap long graun, wanwan man long laik bilong em, long wanwan bodi, long sapotim o tok nogat long Amlisai, bihain long ol i bin tok kros planti taim na pait ol i bin mekim ol kirap nogut na paul namel long ol yet.

6 Olsem na ol i bin bungim wantaim ol yet long vot long dispela samting long ai bilong ol jas.

7 Na em i kamap we maus bilong ol pipol i tok nogat long Amlisai, na em i no kamap king long olgeta pipol bilong Nifai.

8 Nau dispela i bin mekim bel bilong ol lain ol i les long em na amamas nogut tru, tasol Amlisai i tanim bel bilong ol lain ol i sapotim em long belhat wantaim ol lain ol i no sapotim em.

9 Na em i kamap we ol pipol ol i sapotim em ol i bung wantaim ol yet na dediketim em long kamap king bilong ol.

10 Nau taim Amlisai i kamap king bilong ol, em tokim ol olsem ol mas kisim ol samting bilong pait na pait wantaim ol lain brata bilong ol, na em i bin wokim dispela olsem em bai bringim ol aninit long rul bilong em.

11 Nau ol pipol bilong Amlisai kolim ol yet ol lain bilong Amlisai, long nem bilong Amlisai, na ol pipol em i no ol lain bilong Amlisai ol i kolim ol yet ol lain bilong Nifai, o ol pipol bilong God.

12 Olsem na, bikos ol pipol bilong Nifai i bin save long tingting bilong ol lain bilong Amlisai, ol i redi long bungim ol, ye, ol i bin redim ol yet wantaim naip long pait, na saimita, na banara wantaim spia bilong banara, na ston, na sling, na wantaim olgeta kainkain samting bilong pait.

13 Na ol i bin redi long bungim ol lain bilong Amlisai olsem taim ol i kam. Na ol kepten, na nambawan kepten na het kepten ol i bin makim long ol namba bilong ol.

14 Na em i kamap we Amlisai i bin redim ol man bilong em wantaim olgeta kainkain samting bilong pait, na tu makim ol bosman na hetman long lidim ol pipol bilong em long pait wantaim ol lain brata bilong ol.

15 Na em i kamap we ol lain bilong Amlisai ol i bin kamap long liklik maunten Amnaihu, i stap long is long wara Saidon, na wara Saidon i bin bihainim graun bilong Jarahemla long arere, na ol i bin stat long pait wantaim ol lain bilong Nifai long dispela hap.

16 Nau bikos Alma i het jas na gavana bilong ol pipol bilong Nifai, olsem na em i bin go antap wantaim ol pipol bilong em, ye, em i bin lidim ol ami bilong em wantaim ol kepten na ol het kepten long pait wantaim ol lain bilong Amlisai.

17 Na ol i stat long kilim ol lain bilong Amlisai long liklik maunten is long Saidon. Na ol lain bilong Amlisai ol i bin strong tru, na ol i kilim planti ol lain bilong Nifai.

18 Tasol, Bikpela i bin strongim han bilong ol lain bilong Nifai, olsem na ol kilim ol lain bilong Amlisai nogut tru, inap long ol i stat long ronawe long pes bilong ol lain bilong Nifai.

19 Na em i kamap we ol lain bilong Nifai ol i bin ronim ol lain bilong Amlisai olgeta long dispela de, na kilim planti lain bilong ol, tru tumas ol i bin kilim twelv tausen faiv handret tripela ten na tupela sol bilong ol lain bilong Amlisai, na ol lain bilong Amlisai i bin kilim sikis tausen faiv handret sikispela ten na tupela sol bilong ol lain bilong Nifai.

20 Na em i kamap we taim Alma i no moa ronim ol lain bilong Amlisai, em i tokim ol pipol bilong em long sanapim ol haus sel bilong ol long ples daun bilong Gidion, dispela ples daun i wan nem long Gidion em Neho i bin kilim wantaim naip bilong pait, na ol lain bilong Nifai ol i bin sanapim ol haus sel bilong ol long dispela nait.

21 Na Alma i bin salim ol spai long bihainim wanwan lain long ol lain bilong Amlisai, olsem em bai save long plen na tingting bilong ol, we bai em wasim em yet long ol, olsem ol pipol bilong Amlisai bai i no inap bagarapim ol pipol bilong em.

22 Nau nem bilong ol lain em i bin salim i go long wasim kem bilong ol lain bilong Amlisai i Jeram, na Amno, na Mentai na Limhe. Ol dispela lain ol i bin salim i go wantaim ol man bilong ol long wasim kem bilong ol lain bilong Amlisai.

23 Na em i kamap we ol go bek hariap tru long kem bilong ol lain bilong Nifai tumora wantaim poret na kirap nogut tru, na tok olsem:

24 Lukim, mipela i bin bihainim kem bilong ol lain bilong Amlisai, na mipela kirap nogut tru long lukim planti planti lain tru bilong Leman, long graun bilong Minon, antap long graun bilong Jarahemla, long rot bilong graun bilong Nifai, na lukim, ol lain bilong Amlisai i joinim ol.

25 Na ol i kamap long ol lain brata bilong mipela ol i stap long dispela hap long graun, na ol i ronawe long ol wantaim sipsip bilong ol na meri bilong ol na lain pikinini bilong ol i go long siti bilong mipela, na sapos mipela i no go hariap, ol i bai kisim siti bilong mipela, na kilim ol lain papa bilong mipela, na meri bilong mipela na pikinini bilong mipela.

26 Na em i kamap we ol pipol bilong Nifai kisim haus sel bilong ol, na lusim ples daun bilong Gidion i go long siti bilong ol, em i siti bilong Jarahemla.

27 Na lukim, taim ol i brukim wara Saidon long go, ol lain bilong Leman wantaim ol lain bilong Amlisai, ol planti tru olsem waisan long solwara i bin kamap long ol long bagarapim ol.

28 Tasol, bikos han bilong Bikpela i bin strongim ol lain bilong Nifai, na bikos ol i bin mekim bikpela beten long em olsem em bai seivim ol long han bilong birua bilong ol, olsem na Bikpela i bin harim krai bilong ol, na strongim ol inap long ol lain bilong Leman wantaim ol lain bilong Amlisai i pundaun long pes bilong ol.

29 Na em i kamap we Alma i bin pait pes long pes wantaim Amlisai, wantaim naip bilong pait, na ol tupela i bin pait nogut tru.

30 Na em i kamap we bikos Alma em i man bilong God, olsem na em i krai wantaim strongpela bilip na tok olsem: O Bikpela, marimari long mi na seivim laip bilong mi, olsem mi bai kamap wanpela wokman long ol han bilong yu long seivim na lukautim i stap dispela pipol.

31 Nau taim Alma i autim ol dispela toktok, em pait gen wantaim Amlisai, na em i kisim strong na em i kilim Amlisai wantaim naip bilong pait.

32 Na tu em i pait wantaim king bilong ol lain bilong Leman, tasol king bilong ol lain bilong Leman i ronawe go bek long pes bilong Alma na salim ol wasman bilong em long pait wantaim Alma.

33 Tasol, Alma wantaim ol wasman bilong em ol i bin pait wantaim ol wasman bilong king bilong ol lain bilong Leman i go inap long em i kilim na ronim ol i go bek.

34 Olsem na em i bin klinim graun o olsem arere long wara Saidon long wes sait, na tromoim bodi bilong ol lain bilong Leman em i bin kilim long ol wara bilong Saidon, olsem ol pipol bilong em bai gat rot long brukim wara na pait wantaim ol lain bilong Leman, na ol lain bilong Amlisai long wes sait long wara Saidon.

35 Na em i kamap we taim ol i brukim wara Saidon na go long wes sait, ol lain bilong Leman wantaim ol lain bilong Amlisai, ol i planti tru na i no inap kaunim ol tasol ol i stat long ronawe long pes bilong ol.

36 Na ol i ronawe long ol lain bilong Nifai i go long ples we nogat man i stap, long wes na not, longwe long ol arere bilong graun, na ol lain bilong Nifai ol i bin strong nogut tru long bihainim ol na kilim ol.

37 Ye, ol lain bilong Nifai ol i bin bungim ol long olgeta hap, na kilim na ronim ol i go inap long ol i bin tromoi nabaut long wes na long not, i go inap long ol kamap long ples we nogat man i stap ol i save kolim Hemon, na dispela hap long ples we nogat man i stap i pulap long ol wail na nogut animal tru.

38 Na em i kamap we planti ol i bin idai long ples we nogat man i stap bikos long sua bilong ol, na ol dispela animal wantaim tarangau long antap ol i bin kaikaim ol, na bun bilong ol i bin painim na bungim antap long graun.