1 Na em i kamap we long stat long tripela ten sikis krismas long rul bilong ol jas long ol pipol bilong Nifai, olsem Siblon i bin kisim long lukautim dispela ol holi samting, Alma i bin givim long Hilaman.

2 Na em i wanpela stretpela man, na em i bin wokabaut stret long ai bilong God, na em i bin wokim gutpela pasin olgeta taim, long bihainim ol lo bilong Bikpela God bilong em, na brata bilong em i bin wokim wankain tu.

3 Na em i kamap we Moronai tu idai. Na tripela ten sikis krismas long rul bilong ol jas i pinis olsem.

4 Na em i kamap we long stat long tripela ten seven krismas long rul bilong ol jas, bikpela namba tru long ol man, tru tumas em i namba long faiv tausen na foa handret long man meri na pikinini bilong ol, i bin lusim graun bilong Jarahemla long go long graun long hap long not.

5 Na em i kamap we Hagot, bikos em i wanpela smatpela man i laikim long save niupela samting, olsem na em i bin go het na wokim wanpela traipela sip tru long em yet, long arere long graun Planti, long graun Bagarap, na putim sip i go daun long solwara long hap long wes, long liklik nek graun save lidim i go long graun long hap long not.

6 Na lukim, planti lain bilong Nifai i bin go insait long dispela sip, na sel i go aut wantaim planti kaikai na tu planti meri na pikinini, na ol i bin go long hap long not. Na tripela ten seven krismas i pinis olsem.

7 Na dispela man i bin wokim ol narapela sip insait long tripela ten eit krismas. Na nambawan sip i bin go aut i kam bek gen, na planti moa pipol i bin kalap long em wantaim planti kaikai, na sel gen i go long graun long hap long not.

8 Na em i kamap we nius long ol i no moa i bin harim. Na mipela i ting olsem ol i bin dringim solwara na idai namel long solwara. Na em i kamap we narapela sip i bin sel i go aut, na mipela i no save we em i bin go.

9 Na em i kamap we planti pipol i bin go long graun long hap long not insait long dispela krismas. Na tripela ten eit krismas i pinis olsem.

10 Na em i kamap we Siblon tu idai, insait long tripela ten nain krismas long rul bilong ol jas, na Korianton i bin karim kaikai i go long ol pipol em bin go pas long graun long hap long not wantaim sip.

11 Olsem na em i kamap we Siblon, i bin givim dispela ol holi samting long Hilaman, pikinini man bilong Hilaman, em i wan nem long papa bilong em, pastaim long em idai.

12 Nau lukim, olgeta long dispela samting i bin katim long raitim taim Hilaman i bin lukautim i stap, na ol samting i bin raitim na salim i go aut namel long lain pikinini bilong ol man long olgeta hap long graun, tasol em ol dispela samting Alma i bin tambuim, i no go aut namel long ol pipol.

13 Tasol, ol dispela holi samting mas lukautim i stap gut, na givim i kam daun long wanpela jeneresen i go long narapela, olsem na, Siblon i bin givim dispela ol holi samting long Hilaman insait long dispela krismas, bipo long idai bilong em.

14 Na tu em i kamap we sampela lain i bin bruk i go awe long joinim ol lain bilong Leman insait long dispela krismas, na ol i bin tanim bel bilong ol long belhat long ol lain bilong Nifai.

15 Na tu ol i bin kam daun long dispela wankain krismas wantaim traipela tru ami long pait wantaim ol pipol bilong Moronaia o ami bilong Moronai we ami bilong Moronaia i bin winim ol na ronim ol go bek gen long graun bilong ol, na ol i bin lus nogut tru.

16 Na tripela ten nain krismas long rul bilong ol jas long ol pipol bilong Nifai i pinis olsem.

17 Na stori bilong Alma wantaim ol pikinini man bilong em, Hilaman na Siblon i pinis olsem.