1 Na em i kamap we long wanpela ten wan krismas long rul bilong ol jas long ol pipol bilong Nifai, long namba faiv de long namba tu mun, bihain long bel isi i bin kamap long longpela taim long graun bilong Jarahemla, na bihain long nogat bikpela pait o tok pait i bin kamap long sampela krismas i go inap long namba faiv de long namba tu mun long wanpela ten wan krismas, krai bilong bikpela pait i bin harim long olgeta hap long graun.

2 Long wanem, lukim, ol ami long ol lain bilong Leman ol i bin kamap long hap long ples we nogat man i stap, long arere long graun, tru tumas long siti bilong Amonaia na i stat long kilim ol pipol na bagarapim siti.

3 Na nau em i kamap we, bipo long ol lain bilong Nifai i bungim inap ami long ronim ol i go aut long graun, ol i bagarapim ol pipol em ol i bin stap long siti bilong Amonaia wantaim sampela lain em ol i bin stap raunabaut long arere long graun bilong Noa, na kisim narapela lain kalabus i go long ples we nogat man i stap.

4 Nau em i kamap we ol lain bilong Nifai ol i bin laikim long kisim ol lain ol i bin karim i go kalabus long ples we nogat man i stap.

5 Olsem na, ol pipol ol i bin makim wanpela man nem bilong em Joram long kamap het kepten long ol ami long ol lain bilong Nifai, na em i bin gat tupela pikinini man nem bilong ol Lihai na Aha—nau Joram wantaim ol tupela pikinini man bilong em, ol i bin save olsem Alma i hai pris long sios na harim olsem em i gat spirit bilong profesi, olsem na ol i bin go long em na laikim long save long em long wanem hap long ples we nogat man i stap ol bai go long painim ol lain brata bilong ol, em ol lain bilong Leman i bin kisim na kalabusim ol.

6 Na em i kamap we Alma i bin askim Bikpela long save. Na Alma i bin go bek na tokim ol: Lukim, ol lain bilong Leman bai brukim wara Saidon long hap long saut long ples we nogat man i stap, longwe long ol arere long graun bilong Mentai. Na lukim, yupela bai bungim ol long hap bilong is wara long Saidon, na Bikpela i bai givim long yupela ol lain brata bilong yupela em ol lain bilong Leman i bin kisim na kalabusim long dispela hap.

7 Na em i kamap we Joram wantaim ol tupela pikinini man bilong em ol i bin brukim wara Saidon wantaim ami bilong ol i go longwe long ol arere bilong Mentai long hap long saut long ples we nogat man i stap, long hap long is long sait long wara Saidon.

8 Na ol i bin painim na pait wantaim ol ami bilong ol lain bilong Leman inap long ol i bin go nabaut na ronim ol lain bilong Leman i go long ples we nogat man i stap, na ol i kisim ol lain brata bilong ol em ol lain bilong Leman i bin kisim ol na kalabusim, na nogat wanpela sol bilong ol i bin kisim na kalabusim i bin lus. Na ol brata bilong ol i bin kisim ol kam bek long kisim graun bilong ol yet gen.

9 Na wanpela ten wan krismas long rul bilong ol jas i pinis olsem, ol lain bilong Leman ol i bin ronim i go aut long graun, na ol pipol bilong Amonaia ol i bin bagarapim, ye, wanwan laip sol long ol lain bilong Amonaia ol i bin bagarapim olgeta wantaim bikpela siti tru bilong ol, we ol tok God i no inap bagarapim, bikos dispela siti i traipela tru long bagarapim.

10 Tasol lukim, dispela siti i bin bagarapim olgeta long wanpela de, na ol dok wantaim ol animal long ples we nogat man i stap i bin kaikaim bodi bilong ol.

11 Tasol bodi bilong ol i bin bungim i go antap long pes bilong graun bihain long planti de, na ol i bin karamapim wantaim liklik graun tasol. Na nau sting bilong ol lain i nogut tru olsem na ol pipol i no bin go long kisim graun bilong Amonaia long planti krismas. Na ol i kolim dispela ples Bagarap bilong ol Lain Bilong Neho, bikos ol lain i memba long sios bilong Neho, ol i bin idai olgeta, na nogat wanpela man i bin i stap long graun bilong ol.

12 Na ol lain bilong Leman i no kam gen long pait wantaim ol lain bilong Nifai i go inap long wanpela ten foa krismas long rul bilong ol jas long ol pipol bilong Nifai. Olsem na ol pipol bilong Nifai ol i bin stap wantaim bel isi long tripela krismas long olgeta hap long graun.

13 Na Alma wantaim Amulek ol i bin go het na autim tanim bel long ol pipol long tempel bilong ol, na haus lotu bilong ol na tu long ol sinagog bilong ol i bin wokim wankain olsem long ol lain bilong Juda.

14 Na ol i autim toktok bilong God long planti lain na ol i laikim long harim toktok bilong ol, na ol i no wansait long autim toktok bilong God olgeta taim.

15 Olsem na Alma wantaim Amulek ol i bin go het wantaim planti lain ol i bin makim long wok, long autim toktok long olgeta hap long graun. Na sios i bin kirapim long olgeta hap long graun, long olgeta hap raunabaut, namel long olgeta pipol long ol lain bilong Nifai.

16 Na olgeta pipol ol i kamap wankain namel long ol yet, Bikpela i bin kapsaitim Spirit bilong em long olgeta pes bilong graun long redim tingting bilong ol lain pikinini bilong ol man, o long redim bel bilong ol long kisim toktok Bikpela bai lainim namel long ol long taim em bai kam—

17 Olsem ol bai i no inap sakim toktok bilong em, olsem ol bai i no inap kamap pegen lain, na wokim pasin nogut yet long kisim bagarap, tasol olsem ol bai kisim toktok wantaim amamas, na olsem wanpela han diwai i bin join long trupela ropwain, inap long ol bai go insait long malolo bilong Bikpela God bilong ol.

18 Nau dispela ol pris husat bin go namel long ol pipol bin tokim ol long lusim olgeta pasin giaman, na pasin paul, na pasin mangal, na pasin belhat, na pasin nogut, na pasin sutim tok, na pasin stil, na pasin strong long stil, na pasin kil na pasin pamuk wantaim olgeta kain kain pasin nogut, na autim long ol olsem ol i no inap wokim ol dispela samting—

19 Na toktok long ol samting bai klostu kam, ye, ol i bin tok olsem Pikinini man bilong God bai kam, na long ol pen na idai bilong em wantaim kirap gen bilong idai manmeri.

20 Na planti pipol ol i bin askim long ples we Pikinini man bilong God bai kam, na ol i bin lainim olsem em bai kam long ol bihain long kirap gen bilong em, na ol pipol i bin harim dispela wantaim bikpela amamas tru na bel gutpela.

21 Na nau wanpela ten foa krismas long rul bilong ol jas long ol pipol bilong Nifai i pinis olsem—bihain long sios i bin kirapim long olgeta hap long graun—bihain long winim tewel, na toktok bilong God i bin autim klia tru long olgeta graun, na Bikpela i bin kapsaitim planti blesin bilong em long ol pipol.