1 Na nau em i kamap we long stat long tripela ten krismas long rul bilong ol jas, long nambatu de long nambawan mun, Moronai i bin kisim wanpela pas i kam long Hilaman, em i bin toktok long sindaun bilong ol pipol stap long dispela hap long graun.

2 Na ol toktok em i bin raitim olsem: Brata bilong mi Moronai em mi lavim tumas stret, long nem bilong Bikpela wantaim long taim bilong hevi long pait bilong mipela, lukim, brata bilong mi mi save lavim tumas, mi gat liklik toktok long tokim yu long bikpela pait bilong mipela long dispela hap long graun.

3 Lukim ol tu tausen pikinini man bilong ol man em Amon i bin kisim kam daun long graun bilong Nifai—Nau yu bin save olsem dispela ol man i ol tumbuna pikinini bilong Leman, em i nambawan pikinini man long tumbuna bilong mipela Lihai;

4 Nau i nogat as long mi long tokim yu long ol kastam o bilip bilong ol, bikos yu save olgeta long ol dispela samting—

5 Olsem na em i inap long mi long tok olsem tu tausen yangpela man bilong ol i bin kisim naip bilong pait bilong ol, na laikim mi long kamap komanda bilong ol, na mipela i bin kamaut long pait long kantri bilong yumi.

6 Na nau yu save tu long promis ol lain papa bilong ol i bin mekim, olsem ol bai no moa kisim ol samting bilong pait bilong ol na pait wantaim ol lain brata bilong ol long kapsaitim blut.

7 Tasol insait long tupela ten sikis krismas, taim ol i lukim ol pen na hevi mipela i kisim long lukautim ol, ol i klostu brukim promis ol i bin mekim na kisim ol samting bilong pait bilong ol long halivim mipela long pait.

8 Tasol mi no laikim ol long brukim promis ol i bin mekim, bikos mi bin tingim olsem God ken strongim mipela sapos yumi i no larim ol long brukim tok tru antap ol i bin mekim.

9 Tasol lukim, i gat wanpela gutpela samting long hia yumi ken amamas nogut tru. Long wanem, lukim, insait long tupela ten sikis krismas, mi, Hilaman, bin lidim ol dispela tu tausen yangpela man i go long siti bilong Judea, long halivim Antipas, em yu bin makim komanda long ol pipol em i stap long dispela hap long graun.

10 Na mi bin joinim ol tu tausen pikinini man bilong mi (long wanem, ol i inap long kolim ol pikinini man) wantaim ami bilong Antipas, na Antipas i bin amamas nogut tru long kisim strong, bikos lukim, ami bilong em i kamap liklik long namba bikos ol lain bilong Leman i bin kilim bikpela namba tru long ol man bilong mipela, na mipela gat as long sore long dispela.

11 Tasol, mipela ken kisim bel isi insait long mipela yet long dispela tingting, olsem ol i bin idai taim ol i pait long lukautim fridom long kantri bilong ol na God bilong ol, ye, na ol i amamas.

12 Na tu ol lain bilong Leman i bin kisim planti man olsem kalabus, olgeta long ol em ol het kepten, long wanem, ol i no larim wanpela i stap laip. Na mipela ting olsem ol i stap long graun bilong Nifai long dispela taim, sapos ol i no bin kilim idai.

13 Na nau ol siti ol lain bilong Leman i bin kapsaitim blut long planti strongpela man bilong mipela long kisim olsem:

14 Graun bilong Mentai, o siti bilong Mentai, siti bilong Sisrom, siti bilong Kumenai na siti bilong Antipara.

15 Na ol i bin kisim ol dispela siti taim mi kam long siti bilong Judea, na mi bin painim Antipas wantaim ol man bilong em brukim bun long banisim siti.

16 Ye, na ol i bin skin dai long bodi wantaim spirit, long wanem, ol i bin pait long san na brukim bun long wok long nait long lukautim siti bilong ol, na ol i bin kisim olgeta kain kain bikpela pen olsem.

17 Na nau tingting bilong ol stret em long win o idai long dispela ples, olsem na yu ken lukim olsem dispela liklik ami mi bin kisim kam, ye, dispela ol pikinini man bilong mi, bin givim bikpela hop tru na amamas long ol.

18 Na nau em i kamap we taim ol lain bilong Leman i lukim olsem Antipas i kisim bikpela strong tru long ami bilong em, Amoron i bin poret na givim oda long ol olsem ol noken kam long pait wantaim mipela i stap insait long siti bilong Judea.

19 Olsem na Bikpela i bin blesim mipela, long wanem, sapos ol i bin kam long pait wantaim mipela taim mipela i no strong, inap ol bai bagarapim liklik ami bilong mipela, tasol mipela i bin seivim olsem.

20 Amoron i bin givim oda long ol long lukautim ol siti ol i bin kisim. Na tupela ten sikis krismas i pinis olsem. Na long stat long tupela ten seven krismas, mipela i bin redim siti bilong mipela wantaim mipela yet long pait.

21 Nau mipela i bin laikim olsem ol lain bilong Leman bai kam long mipela, long wanem, mipela i no laik pait wantaim ol taim ol stap insait long ples hait bilong ol.

22 Na em i kamap we mipela i bin putim ol spai raunabaut long wasim wokabaut long ol lain bilong Leman, olsem ol bai no inap abrusim mipela long nait o long de long pait long kisim ol narapela siti bilong mipela long hap long not.

23 Bikos mipela save olsem ol dispela siti i no strongpela tumas long kisim ol, olsem na mipela i bin plenim, sapos ol i abrusim mipela, mipela bai paitim ol long bihain taim ol i bungim ol long fran. Mipela i bin tingim olsem mipela ken winim ol, tasol lukim, plen bilong mipela i no kamap tru.

24 Ol i bin poret long abrusim mipela wantaim olgeta ami bilong ol, o wanpela hap long ami bilong ol, nogut ol i no strong tumas long lus.

25 Na tu ol i bin poret long go daun long pait wantaim siti bilong Jarahemla o brukim het bilong wara Saidon i go long siti bilong Nifaia.

26 Olsem na, ol i bin tingim long lukautim ol siti ol i bin kisim wantaim ami bilong ol.

27 Na nau em i kamap we long nambatu mun long dispela krismas ol papa bilong ol tu tausen pikinini man bilong mi bin kisim kam planti kaikai long mipela.

28 Na tu mipela i bin kisim ol tu tausen man i bin salim kam long graun bilong Jarahemla. Na mipela i bin redi wantaim ol ten tausen man, na ol kaikai bilong ol, na tu ol kaikai bilong ol meri wantaim lain pikinini bilong ol.

29 Na ol lain bilong Leman, taim ol i lukim ol ami bilong mipela kamap bikpela long wanwan de, na ol kaikai i bin kam long sapotim mipela olsem, ol i stat long poret nogut tru, na stat long traim, long ol i ken pasim rot bilong mipela long kisim kaikai na strong.

30 Nau taim mipela lukim olsem ol lain bilong Leman i stat long sikrap olsem, mipela i bin kamapim wanpela plen long yusim long ol, olsem na Antipas i bin givim oda olsem mi bai go aut wantaim ol liklik pikinini man bilong mi long narapela siti i stap klostu, olsem mipela i karim kaikai go long dispela siti.

31 Na mipela i bin wokabaut i go klostu long siti bilong Antipara, tasol mipela i bin wokabaut olsem mipela bai abrusim dispela siti i go long arere long nambis.

32 Na em i kamap we mipela i bin go het, olsem mipela i kisim ol kaikai bilong mipela i go long dispela siti.

33 Na em i kamap we Antipas i bin go aut wantaim wanpela hap long ami bilong em, na lusim narapela hap long lukautim siti. Tasol em i bin wetim inap long mi wantaim liklik ami bilong mi bai kam klostu long siti Antipara pastaim.

34 Na nau, strongpela ami tru long ol lain bilong Leman i stap insait long siti Antipara, ye, planti tru tumas.

35 Na em i kamap we ol i bin kamaut wantaim ami bilong ol long pait wantaim mipela, taim ol spai bilong ol i tok save long ol.

36 Na em i kamap we, mipela i ronawe long ol i go long hap long not. Na mipela i bin lidim ol i go awe wanpela strongpela ami tru long ol lain bilong Leman olsem.

37 Ye, tru tumas long longwe stret, inap long taim ol i lukim ami bilong Antipas bihainim ol wantaim olgeta strong bilong ol, ol i no tanim long rait o long lep, tasol ol i bin bihainim mipela stret, na mipela i bin ting olsem em i laik bilong ol long kilim mipela bipo long Antipas abrusim ol, na ol i bin tingim olsem nogut ol ami bilong mipela bai raunim ol.

38 Na nau Antipas, taim em i lukim olsem inap mipela bai kisim bagarap, em i bin givim oda long ami bilong em long wokabaut hariap tru. Tasol lukim, nait i kamap, olsem na ol i no abrusim mipela, na tu Antipas i no abrusim ol, olsem na mipela i bin kem long nait.

39 Na em i kamap we, lukim, i no tulait yet na ol lain bilong Leman i ronim mipela. Nau mipela i no planti tumas long givim strong inap long pait wantaim ol, ye, mi i no laik long larim ol liklik pikinini man bilong mi long kam aninit long pawa bilong ol, olsem na mipela i bin go yet long wokabaut, na mipela wokabaut i go insait long ples we nogat man i stap.

40 Na ol i no tanim long rait o long lep nogut mipela bai raunim ol, na tu mi no tanim long rait o long lep, nogut ol bai abrusim mi, na mipela i no inap pait wantaim ol, tasol ol bai kilim mipela na ronawe, olsem na mipela i wok long ronawe olgeta long dispela ples we nogat man i stap i go inap long tudak.

41 Na em i kamap we gen, mipela i bin lukim ol lain bilong Leman kam long mipela taim tulait i kam, na mipela i ronawe long ol.

42 Tasol em i kamap we ol i no ronim mipela i go longwe na ol i lusim mipela, na dispela i monin long namba tri de long namba seven mun.

43 Na nau, mipela i no save sapos Antipas i bin abrusim ol, tasol mi bin tokim ol man bilong mi: Lukim, mipela i no save tasol ol i lusim mipela, olsem ol bai hait long kisim mipela taim mipela i kam long pait wantaim ol,

44 Olsem na yupela tok wanem, ol pikinini man bilong mi, inap yupela bai go long pait wantaim ol?

45 Na nau mi tokim yu, brata bilong mi Moronai em mi lavim tumas, olsem mi no bin lukim kain bikpela strong tru bipo, nogat, i no namel long olgeta lain bilong Nifai.

46 Long wanem, olsem mi save kolim ol olsem ol pikinini man bilong mi olgeta taim (bikos olgeta i yangpela tumas), olsem na ol i bin tokim mi: Papa, lukim God bilong mipela i stap wantaim mipela, na em i no inap larim mipela long pundaun, olsem na yumi go het, yumi bai no inap kilim ol lain brata bilong mipela nating sapos ol i lusim mipela long i stap, olsem na yumi go, nogut ol bai winim ami bilong Antipas.

47 Nau ol i no bin pait bipo, tasol ol i no pret long idai, na ol i bin ting moa long fridom bilong ol papa bilong ol na ol i no bin ting long laip bilong ol, ye, ol mama bilong ol i bin lainim ol, olsem God bai seivim ol sapos ol i no tubel.

48 Na ol i bin tokim mi ol toktok bilong ol mama bilong ol, olsem: Mipela i no tubel bikos ol mama bilong mipela i bin save long em.

49 Na em i kamap we mi bin go bek wantaim ol tu tausen bilong mi long pait wantaim dispela ol lain bilong Leman em ol i bin ronim mipela. Na nau lukim, ol ami bilong Antipas i bin abrusim ol, na wanpela nogut pait tru i bin i statim.

50 Ami bilong Antipas i bin skin taiet, bikos ol i bin wokabaut longwe hariap tru long liklik taim, na ol i klostu pundaun long han bilong ol lain bilong Leman, na inap ol bai bagarapim ol sapos mi no bin go bek wantaim ol tu tausen bilong mi.

51 Long wanem, Antipas i bin kilim wantaim naip bilong pait, na planti het kepten bilong em i bin skin dai bikos ol i bin wokabaut hariap tru long kam—olsem na ol ami bilong Antipas i bin paul na stat long surik i go bek long pes bilong ol lain bilong Leman, taim ol i lukim ol het kepten bilong ol i bin kilim.

52 Na em i kamap we ol lain bilong Leman i bin kisim strong, na stat long ronim ol, na ol lain bilong Leman i bin strong nogut tru long ronim ol olsem, taim Hilaman i bin kam long bihain long ol wantaim tu tausen bilong em, na stat long kilim ol nogut tru, inap long olgeta ami long ol lain bilong Leman i bin lusim ol man bilong Antipas na tanim i go long Hilaman.

53 Nau taim ol pipol bilong Antipas lukim ol lain bilong Leman tanim raun, ol i bungim wantaim man bilong ol na kam gen long bihain long ol lain bilong Leman.

54 Na nau em i kamap we mipela, ol pipol bilong Nifai, ol pipol bilong Antipas na mi wantaim ol tu tausen bilong mi, bin raunim ol lain bilong Leman na kilim ol, ye, na ol i bin strongim ol yet long givap long ol samting bilong pait bilong ol wantaim ol yet olsem ol kalabus man bilong bikpela pait.

55 Na nau em i kamap we taim ol i givap ol yet long mipela, lukim, mi bin kaunim namba long dispela ol yangpela man em ol i bin pait wantaim mi, nogut planti bilong ol i bin idai.

56 Tasol lukim, mi bin amamas nogut tru olsem nogat wanpela long ol i bin kilim i dai, ye, na ol i bin pait olsem long strong bilong God, ye, nogat wanpela man i bin save long pait wantaim kain pawa bilong mirakel olsem bipo, na ol i bin kilim ol lain bilong Leman inap long ol i bin poretim ol, na ol lain bilong Leman ol i bin givap ol yet olsem kalabus man bilong bikpela pait bikos long dispela.

57 Na bikos mipela i nogat ples long ol kalabusman bilong mipela, olsem mipela bai wasim na banisim ol ami long ol lain bilong Leman, olsem na mipela i bin salim ol go long graun bilong Jarahemla, wantaim sampela man bilong Antipas em ol i no bin kilim, na mi bin kisim sampela man bilong Antipas long joinim ol yangpela man long ol pipol bilong Amon bilong mi, na mipela i bin go bek long siti bilong Judea.