ဧသာ ၁၁

အခန်းကြီး ၁၁

စစ်တိုက်ခြင်းများ၊ ငြင်းခုံခြင်းများနှင့် ဆိုးညစ်ခြင်းတို့သည် ယာရက်အမျိုးသားအသက်တာကို လွှမ်းမိုး၏—ယာရက်အမျိုးသားတို့ နောင်တမရလျှင်၊ သူတို့၏ ရှင်းရှင်းပျက်စီးခြင်းကို ပရောဖက်တို့က ကြိုတင်၍ဟောကိန်းထုတ်၏—လူတို့သည် ပရောဖက်တို့၏စကားများကို ငြင်းပယ်ကြ၏။

၁ ကုမ်၏လက်ထက်တွင်လည်း၊ ပရောဖက်များစွာတို့ ရောက်လာကြပြီး၊ များစွာသောလူတို့ နောင်တမရ၊ ထို့အတူ ကိုယ်တော်ရှင်ထံသို့ပြန်မလာ၊ ထို့အတူ သူတို့၏လူ့အသက်သတ်ခြင်းနှင့် ဆိုးညစ်ခြင်းတို့ကို စွန့်ပစ်ခြင်းမရှိလျှင်၊ သူတို့ပျက်စီးခြင်းအကြောင်းကို ပရောဖက်ပြု၍ဟောကြ၏။

၂ ဤသို့အားဖြင့်အချိန်တန်လာသောအခါ၊ ပရောဖက်တို့သည် လူတို့၏ငြင်းပယ်ခြင်းကို ခံရ၍၊ အကာအကွယ်အတွက် ကုမ်ထံသို့ ထွက်ပြေးကြ၏။ အကြောင်းမူကား၊ လူတို့သည် သူတို့ကို ဖျက်ဆီးခြင်းငှာ ကြိုးစားအားထုတ်ကြ၏။

၃ သူတို့သည်လည်း ကုမ်အား များစွာသောအရာတို့ကို ပရောဖက်ပြု၍ ဟောကြ၏။ သူသည်လည်း သူ့အသက်တာ၏ကျန်ကြွင်းချိန်တစ်လျှောက်လုံးတွင် ကောင်းချီးခံစားရ၏။

၄ သူသည် အသက်ကြီးရင့်သည်အထိ အသက်ရှင်ခဲ့ပြီး၊ ရှိဗလုံကို ဖွားမြင်စေ၏။ ရှိဗလုံသည်လည်း သူ၏နေရာ၌ နန်းစံ၏။ ရှိဗလုံ၏အစ်ကိုသည် သူ့ကို ဆန့်ကျင်၍ ပုန်ကန်ပြီး၊ ထိုပြည်တစ်လျှောက်လုံး၌ အလွန်ကြီးစွာသော စစ်တိုက်ခြင်းဖြစ်စပြု၏။

၅ ဤသို့အားဖြင့်အချိန်တန်လာသောအခါ၊ ရှိဗလုံ၏အစ်ကိုသည် လူတို့၏ပျက်စီးခြင်းအကြောင်းကို ပရောဖက်ပြု၍ ဟောသည့်ပရောဖက်ခပ်သိမ်းတို့ကို အသေသတ်ခံရစေ၏။

၆ ပြည်တစ်ခုလုံး၌လည်း ကြီးစွာသော ဘေးဒုက္ခဖြစ်၏။ အကြောင်းမူကား၊ သူတို့သက်သေခံကြသည်မှာ၊ ထိုပြည်အပေါ်နှင့် လူတို့အပေါ် ကြီးစွာသောကျိန်ခြင်း ကျရောက်လာမည့်အကြောင်း၊ မြေကြီးမျက်နှာပြင်ပေါ်မှာ မရှိစဖူးသည့် ကြီးစွာသောပျက်စီးခြင်း သူတို့မှာ ရှိလျက်၊ သူတို့၏ဆိုးညစ်ခြင်းမှ နောင်တမရလျှင်၊ သူတို့၏အရိုးများသည်လည်း ထိုပြည်၏မျက်နှာပြင်ပေါ်တွင် မြေကြီးအစုအပုံကဲ့သို့ဖြစ်လာမည့်အကြောင်းတို့ပေတည်း။

၇ ထိုသူတို့သည်လည်း မိမိတို့၏ဆိုးညစ်သောဂိုဏ်းများကြောင့် ကိုယ်တော်ရှင်၏အသံကို စေ့စေ့နားထောင်ခြင်းမရှိကြ။ သို့ဖြစ်၍၊ ထိုပြည်တစ်ခုလုံး၌ စစ်တိုက်ခြင်းများနှင့် ရန်တွေ့ခြင်းများ အစပြုကြပြီး၊ ငတ်မွတ်ခေါင်းပါးခြင်းဘေးများစွာနှင့် ကာလနာတို့လည်းရှိ၍၊ မြေကြီးမျက်နှာပြင်ပေါ်၌ ထိုကဲ့သို့မတွေ့ကြုံဖူးလေသည့် ကြီးစွာသောဖျက်ဆီးခြင်း ရှိလေ၏။ ဤအရာအားလုံးသည်လည်း ရှိဗလုံ၏လက်ထက်၌ ဖြစ်လာ၏။

၈ လူတို့သည်လည်း မိမိတို့၏ဒုစရိုက်များမှ နောင်တရစပြုလျက်၊ သူတို့နောင်တရကြသမျှ၊ ကိုယ်တော်ရှင်သည် သူတို့ကို ကရုဏာထားတော်မူ၏။

၉ ဤသို့အားဖြင့်အချိန်တန်လာသောအခါ၊ ရှိဗလုံသည် ကွပ်မျက်ခံရ၏။ ရှေသသည်လည်း ဖမ်းဆီးချုပ်နှောင်ခြင်းသို့ ဆောင်ခြင်းကို ခံရပြီး၊ အသက်တာတစ်လျှောက်လုံး ဖမ်းဆီးချုပ်နှောင်ခြင်းထဲမှာ နေထိုင်၏။

၁၀ ဤသို့အားဖြင့်အချိန်တန်လာသောအခါ၊ သူ၏သား အာဟသည် နိုင်ငံကို ရရှိ၏။ သူ၏လက်ထက်တစ်လျှောက်လုံး လူတို့အပေါ် သူအုပ်စိုး၏။ သူ၏လက်ထက်တစ်လျှောက်လုံးတွင် အမျိုးမျိုးသော ဒုစရိုက်ကိုပြုခြင်းအားဖြင့်လည်း၊ အသွေးသွန်းလောင်းခြင်းများစွာကို ဖြစ်စေ၏။ သူ၏နေ့ရက်တို့သည်လည်း အနည်းငယ်မျှသာရှိ၏။

၁၁ ဧသမ်သည်လည်း အာဟ၏အမျိုးအနွယ်ဖြစ်၍ နိုင်ငံကို ရရှိ၏။ သူသည်လည်း ဆိုးညစ်သောအရာကို သူ၏လက်ထက်၌ ပြု၏။

၁၂ ဤသို့အားဖြင့်အချိန်တန်လာသောအခါ၊ ဧသမ်၏လက်ထက်တွင်၊ ပရောဖက်များစွာတို့ ရောက်လာလျက်၊ လူတို့အား တစ်ဖန်ပရောဖက်ပြု၍ဟောကြ၏။ ထိုမှတစ်ပါး၊ သူတို့၏ဒုစရိုက်များမှ နောင်တမရလျှင်၊ သူတို့ကို မြေကြီးမျက်နှာပြင်ပေါ်မှ ကိုယ်တော်ရှင် ရှင်းရှင်းဖျက်ဆီးတော်မူမည့်အကြောင်း ပရောဖက်ပြု၍ ဟောကြ၏။

၁၃ ဤသို့အားဖြင့်အချိန်တန်လာသောအခါ၊ လူတို့သည် စိတ်နှလုံးကို မာကျောစေလျက်၊ သူတို့၏စကားများကို စေ့စေ့နားမထောင်လိုကြ။ ပရောဖက်တို့သည်လည်း ငိုကြွေးမြည်တမ်း၍၊ လူတို့ထံမှ ထွက်ခွာသွားကြ၏။

၁၄ ဤသို့အားဖြင့်အချိန်တန်လာသောအခါ၊ ဧသမ်သည် သူ၏လက်ထက်တစ်လျှောက်လုံးတွင် ဆိုးညစ်ခြင်းဖြင့် တရားစီရင်ပြီး၊ မော်ရုန်ကို ဖွားမြင်စေ၏။ ဤသို့အားဖြင့်အချိန်တန်လာသောအခါ၊ မော်ရုန်သည် သူ၏နေရာ၌ နန်းစံ၏။ မော်ရုန်သည်လည်း ကိုယ်တော်ရှင်ရှေ့မှာ ဆိုးညစ်သောအရာကို ပြု၏။

၁၅ ဤသို့အားဖြင့်အချိန်တန်လာသောအခါ၊ အစိုးရခြင်းနှင့် အကျိုးအမြတ်ရခြင်းငှာ တည်ထောင်ထားသည့် လျှို့ဝှက်ဂိုဏ်းကြောင့်၊ လူတို့၌ ပုန်ကန်ခြင်း ရှိလာ၏။ ဒုစရိုက်၌ အားကြီးသူတစ်ဦးသည်လည်း သူတို့၌ရှိလာပြီး၊ မော်ရုန်ကိုစစ်တိုက်၍၊ ထိုတိုက်ပွဲတွင် နိုင်ငံ၏တစ်ဝက်ကို သိမ်းယူ၏။ ထိုသူသည် နိုင်ငံ၏တစ်ဝက်ကို နှစ်ပေါင်းများစွာ ထိန်းသိမ်း၏။

၁၆ ဤသို့အားဖြင့်အချိန်တန်လာသောအခါ၊ မော်ရုန်သည် ထိုသူကို အနိုင်ရပြီး၊ နိုင်ငံကို တစ်ဖန်ပြန် ရ၏။

၁၇ ဤသို့အားဖြင့်အချိန်တန်လာသောအခါ၊ တခြားသော အားကြီးသူတစ်ယောက်ရှိလာ၏။ ထိုသူသည်လည်း ယာရက်အစ်ကို၏ အမျိုးအနွယ်တစ်ဦးဖြစ်၏။

၁၈ ဤသို့အားဖြင့်အချိန်တန်လာသောအခါ၊ ထိုသူသည် မော်ရုန်ကို အနိုင်ရပြီး၊ နိုင်ငံကို ရရှိ၏။ သို့ဖြစ်၍၊ မော်ရုန်သည် သူ့အသက်တာ၏ကျန်ကြွင်းချိန်တစ်လျှောက်လုံးတွင် ဖမ်းဆီးချုပ်နှောင်ခြင်း၌ နေထိုင်၏။ ကော်ရန်တာကိုလည်း ဖွားမြင်စေ၏။

၁၉ ဤသို့အားဖြင့်အချိန်တန်လာသောအခါ၊ ကော်ရန်တာသည် သူ့အသက်တာတစ်လျှောက်လုံးတွင် ဖမ်းဆီးချုပ်နှောင်ခြင်း၌ နေထိုင်၏။

၂၀ ကော်ရန်တာ၏လက်ထက်တွင်လည်း ပရောဖက်များစွာတို့ ရောက်လာ၍၊ ကြီးမြတ်၍ အံ့ဩဖွယ်ကောင်းသောအရာတို့ကို ပရောဖက်ပြု၍ဟောလျက်၊ နောင်တရခြင်းကို လူတို့အား ဟစ်ကြော်ကြ၏။ သူတို့နောင်တမရလျှင်၊ ကိုယ်တော်ရှင်ဘုရားသခင်သည် သူတို့ကို ရှင်းရှင်းပျက်စီးသည့်တိုင်အောင် သူတို့တစ်ဖက်မှာ တရားစီရင်တော်မူလိမ့်မည့် အကြောင်းကိုလည်း ပရောဖက်ပြု၍ ဟောကြ၏။

၂၁ ကိုယ်တော်ရှင်ဘုရားသခင်ကလည်း သူတို့ဘိုးဘေးတို့ကို ဆောင်ယူတော်မူသည့်နည်းတူ၊ သူ၏တန်ခိုးတော်အားဖြင့် တခြားသောလူမျိုးအား ထိုပြည်ကို ပိုင်ဆိုင်စေခြင်းငှာ၊ လွှတ်တော်မူလိမ့်မည်၊ သို့မဟုတ်၊ ဖြစ်ပေါ်စေတော်မူလိမ့်မည်။

၂၂ သူတို့၏လျှို့ဝှက်သောအဖွဲ့နှင့် ဆိုးညစ်သောစက်ဆုပ်ရွံရှာဖွယ်အမှုများကြောင့်၊ ပရောဖက်တို့၏ခပ်သိမ်းသောစကားများကို သူတို့ငြင်းပယ်ကြ၏။

၂၃ ဤသို့အားဖြင့်အချိန်တန်လာသောအခါ၊ ကော်ရန်တာသည် ဧသာကို ဖွားမြင်စေလျက်၊ သူ၏ဘဝတစ်လျှောက်လုံး ဖမ်းဆီးချုပ်နှောင်ခြင်း၌ နေထိုင်ပြီး၊ သေ၏။