ဧသာ ၁၄

အခန်းကြီး ၁၄

လူတို့၏ဒုစရိုက်က ထိုပြည်ပေါ်၌ ကျိန်ခြင်းကို ဖြစ်စေ၏—ကော်ရန္တူမာသည် ဂိလဒ်၊ ထို့နောက်တွင် လိဗ၊ ထို့နောက်တွင် ရှိဇတို့ကို ဆန့်ကျင်၍ စစ်မှုတွင် ပါဝင်ရ၏—အသွေးနှင့် သိမ်းရုံးသတ်ဖြတ်ခြင်းတို့ ထိုပြည်ကို ဖုံးလွှမ်း၏။

၁ ယခုမူကား၊ လူတို့၏ဒုစရိုက်ကြောင့်၊ ပြည်တစ်ခုလုံးပေါ်၌ ကြီးစွာသောကျိန်ခြင်း ရှိစပြုသည်မှာ၊ အကြင်လူသည် မိမိကိရိယာ သို့မဟုတ် မိမိဓားကို မိမိစင်ပေါ်သို့မဟုတ် မိမိသိမ်းဆည်းလိုသည့်နေရာ၌ထား၍၊ နက်ဖြန်နေ့တွင်၊ ထိုအရာကို ရှာ၍မတွေ့နိုင်။ ထိုပြည်ပေါ်၌ ကျိန်ခြင်းမှာ အလွန်ကြီးမား၏။

၂ သို့ဖြစ်၍၊ လူတိုင်းသည် မိမိပိုင်သည့်အရာကို မိမိလက်ဖြင့် မြဲစွာကိုင်ထားကြပြီး၊ ချေးငှားမယူလိုကြ။ မချေးငှားလိုကြ။ လူတိုင်းသည် မိမိဥစ္စာပစ္စည်း၊ ထို့အတူ မိမိအသက်၊ ထို့အတူ မိမိဇနီးနှင့် သားသမီးတို့၏အသက်ကို ကာကွယ်ခြင်းငှာ မိမိဓားရိုးကို မိမိလက်ယာလက်၌ စွဲကိုင်ကြ၏။

၃ ယခုမူကား၊ နှစ်နှစ်ကြာပြီးနောက်၊ ထို့အတူ၊ ရှာရက်သေပြီးနောက်တွင်၊ ရှုလော့၊ ရှာရက်၏ညီပေါ်လာပြီး၊ သူသည် ကော်ရန္တူမာကို စစ်တိုက်၏။ ထိုတိုက်ပွဲတွင် ကော်ရန္တူမာက နှိမ်နှင်းအောင်မြင်၍၊ အာကိရှတောရိုင်းအထိ လိုက်၏။

၄ ဤသို့အားဖြင့်အချိန်တန်လာသောအခါ၊ ရှာရက်၏ညီသည် အာကိရှတောရိုင်းထဲ၌ စစ်တိုက်၏။ တိုက်ပွဲသည်လည်း အလွန်ပြင်းထန်လာပြီး၊ ထောင်ပေါင်းများစွာသောသူတို့သည် ဓားဘေးဖြင့် ကျဆုံးကြ၏။

၅ ဤသို့အားဖြင့်အချိန်တန်လာသောအခါ၊ ကော်ရန္တူမာသည် တောရိုင်းကို ဝိုင်းထား၏။ ရှာရက်၏ညီသည်လည်း ညဉ့်အချိန်တွင် တောရိုင်းထဲမှထွက်၍ ချီတက်ပြီး၊ ကော်ရန္တူမာ၏တပ်အချို့ကို ယစ်မူးနေစဉ်တွင် ကွပ်မျက်ကြ၏။

၆ သူသည်လည်း မော်ရုန်ပြည်သို့ထွက်လာပြီး၊ သူ့ကိုယ်သူ ကော်ရန္တူမာ၏ပလ္လင်ပေါ်မှာ ထိုင်၏။

၇ ဤသို့အားဖြင့်အချိန်တန်လာသောအခါ၊ ကော်ရန္တူမာသည် သူ၏တပ်နှင့်အတူ တောရိုင်းထဲ၌ နှစ်နှစ်ကြာအောင် နေထိုင်၏။ ထိုအချိန်အတွင်း၌ သူ့တပ်အတွက် ကြီးစွာသောအင်အားကို ရရှိ၏။

၈ ယခုတွင် လျှို့ဝှက်ဂိုဏ်းများကြောင့်၊ ဂိလဒ်အမည်ရှိ ရှာရက်၏ညီသည်လည်း သူ့တပ်အတွက် ကြီးစွာသောအင်အားကို ရရှိ၏။

၉ ဤသို့အားဖြင့်အချိန်တန်လာသောအခါ၊ သူ၏ယဇ်ပုရောဟိတ်မင်းသည် သူ့ကို ပလ္လင်ပေါ်မှာထိုင်စဉ်တွင် သတ်၏။

၁၀ ဤသို့အားဖြင့်အချိန်တန်လာသောအခါ၊ လျှို့ဝှက်ဂိုဏ်းတို့မှ တစ်ဦးသောသူက လျှို့ဝှက်သောလမ်းတွင် သူ့ကိုသတ်၍ သူကိုယ်တိုင်အတွက် နိုင်ငံကို ရရှိ၏။ သူ၏အမည်မှာ လိဗဖြစ်၏။ လိဗသည် လူမျိုးခပ်သိမ်း၌၊ အခြားသောသူအားလုံးထက် အရပ်အမောင်းကောင်းသူဖြစ်၏။

၁၁ ဤသို့အားဖြင့်အချိန်တန်လာသောအခါ၊ လိဗ၏ပထမနှစ်တွင်၊ ကော်ရန္တူမာသည် မော်ရုန်ပြည်သို့ ချီတက်လာပြီး၊ လိဗကို စစ်တိုက်၏။

၁၂ ဤသို့အားဖြင့်အချိန်တန်လာသောအခါ၊ သူသည် လိဗနှင့်တိုက်ခိုက်၍၊ ထိုတိုက်ပွဲ၌ လိဗက လက်ကိုခုတ်သဖြင့် ဒဏ်ရာရ၏။ သို့သော်လည်း၊ ကော်ရန္တူမာ၏တပ်က လိဗကို ပြင်းထန်စွာတိုက်ခိုက်သဖြင့်၊ ပင်လယ်ကမ်းနားရှိ နယ်နိမိတ်သို့ ထွက်ပြေး၏။

၁၃ ဤသို့အားဖြင့်အချိန်တန်လာသောအခါ၊ ကော်ရန္တူမာက လိုက်၍၊ လိဗသည် ပင်လယ်ကမ်းနား၌ သူ့ကို စစ်တိုက်၏။

၁၄ ဤသို့အားဖြင့်အချိန်တန်လာသောအခါ၊ လိဗက ကော်ရန္တူမာ၏တပ်ကို တိုက်ခိုက်ရာ၊ သူတို့သည် အာကိရှတောရိုင်းဆီသို့ တစ်ဖန်ထွက်ပြေးကြ၏။

၁၅ ဤသို့အားဖြင့်အချိန်တန်လာသောအခါ၊ အာဂေါရှလွင်ပြင်သို့ သူရောက်သည့်တိုင်အောင် လိဗက လိုက်၏။ ကော်ရန္တူမာသည်လည်း လိဗ၏ရှေ့မှ ထွက်ပြေးစဉ် ထွက်ပြေးရာ ပြည်၏ထိုအရပ်၌ လူခပ်သိမ်းတို့ကို သူနှင့်အတူ ခေါ်သွား၏။

၁၆ သူသည်လည်း အာဂေါရှလွင်ပြင်သို့ ရောက်လျှင်၊ လိဗကိုစစ်တိုက်၍ သေအောင်ခုတ်၏။ သို့သော်လည်း လိဗ၏ညီသည် သူ၏နေရာ၌ ကော်ရန္တူမာကို တိုက်ခိုက်၍၊ တိုက်ပွဲသည် အလွန်ပြင်းထန်လာ၏။ ထိုသို့ပြင်းထန်၍၊ ကော်ရန္တူမာသည် လိဗညီ၏တပ်ရှေ့မှ တစ်ဖန်ထွက်ပြေး၏။

၁၇ ယခုတွင် လိဗညီ၏အမည်မှာ ရှိဇဟု ခေါ်၏။ ဤသို့အားဖြင့်အချိန်တန်လာသောအခါ၊ ရှိဇသည် ကော်ရန္တူမာကို လိုက်၍၊ မြို့များစွာကို အနိုင်ရလျက်၊ မိန်းမများနှင့် ကလေးများကို ကွပ်မျက်၍ မြို့များကို လောင်မြိုက်စေ၏။

၁၈ ထိုပြည်တစ်လျှောက်လုံး၌လည်း ရှိဇကိုကြောက်ရွံ့ခြင်း ပျံ့နှံ့သွား၏။ ထိုမှတစ်ပါး၊ ဟစ်ကြွေးခြင်းသည် ထိုပြည်တစ်လျှောက် ပျံ့နှံ့သွား၏—အဘယ်သူသည် ရှိဇ၏တပ်ရှေ့မှာ ရပ်နိုင်သနည်း။ ရှုလော့၊ သူသည် သူ့ရှေ့မှမြေကြီးကို သုတ်သင်ပယ်ရှင်းလေပြီးတကား။

၁၉ ဤသို့အားဖြင့်အချိန်တန်လာသောအခါ၊ လူတို့သည် ထိုပြည်၏မျက်နှာပြင်တစ်ခုလုံးတွင် တပ်များဖြင့် အတူတကွ စုဝေးကြ၏။

၂၀ သူတို့ကိုလည်း ခွဲခြား၍၊ အချို့သည် ရှိဇ၏တပ်နှင့် ပူးပေါင်းပြီး၊ အချို့သည် ကော်ရန္တူမာ၏တပ်နှင့် ပူးပေါင်း၏။

၂၁ စစ်တိုက်ခြင်းသည်လည်း အလွန်ကြီးမားပြီး၊ တာရှည်၏။ ထို့အတူ အသွေးသွန်းလောင်းခြင်းနှင့် သိမ်းရုံးသတ်ဖြတ်ခြင်းတို့၏မြင်ကွင်းမှာ အလွန်ရှည်ကြာလှသဖြင့်၊ ထိုပြည်၏မျက်နှာပြင်တစ်ခုလုံးကို သေသူတို့၏ကိုယ်ခန္ဓာတို့ဖြင့် ဖုံးလွှမ်း၏။

၂၂ စစ်တိုက်ခြင်းသည် အလွန်လျင်မြန်ပြီး၊ မြန်ဆန်လှသဖြင့် အသေကောင်တို့ကို သင်္ဂြိုဟ်ဖို့ အဘယ်သူမျှမကျန်ရစ်ဘဲ၊ သူတို့သည် အသွေးသွန်းလောင်းခြင်းမှ အသွေးသွန်းလောင်းခြင်းသို့ ချီတက်၍၊ ယောက်ျား၊ မိန်းမနှင့် ကလေးများ၏ကိုယ်ခန္ဓာတို့ကို အသားစားသည့် ပိုးလောက်တို့၏အစာဖြစ်လာစေဖို့ ထိုပြည်၏မျက်နှာပြင်ပေါ်မှာ ပျံ့နှံ့ပြီး ကျန်ရစ်စေလျက်ရှိ၏။

၂၃ အသေကောင်တို့၏အနံ့သည်လည်း ထိုပြည်၏မျက်နှာပြင်ပေါ်မှာ၊ အကယ်စင်စစ်၊ ထိုပြည်၏မျက်နှာပြင်တစ်ခုလုံးပေါ်မှာ ပျံ့နှံ့၏။ သို့ဖြစ်၍၊ လူတို့သည် ထိုအသေကောင်တို့၏အနံ့ကြောင့် နေ့ရောညရောဒုက္ခတွေ့လာကြ၏။

၂၄ အဘယ်သို့ပင်ဖြစ်စေ၊ ရှိဇသည် ကော်ရန္တူမာအား လိုက်သည်ကို မရပ်တန့်။ အကြောင်းမူကား၊ ကွပ်မျက်ခံရသော သူ့အစ်ကို၏အသွေးအတွက် ကော်ရန္တူမာအပေါ်၌လည်းကောင်း၊ ကော်ရန္တူမာသည် ဓားဘေးဖြင့်မကျဆုံးရဟူသော ဧသာထံသို့ရောက်လာသည့် ကိုယ်တော်ရှင်၏ နှုတ်ကပတ်တော်အပေါ်၌လည်းကောင်း သူကိုယ်တိုင် လက်တုံ့ပြန်ရန် ကျိန်ဆို၏။

၂၅ ထိုကဲ့သို့အားဖြင့်၊ ငါတို့သိမြင်ကြသည်မှာ၊ ကိုယ်တော်ရှင်သည် သူ၏အမျက်တော်အပြည့်အစုံဖြင့် သူတို့ကို ဆုံးမတော်မူလေကြောင်းပေတည်း။ သူတို့၏ဆိုးညစ်ခြင်းနှင့် စက်ဆုပ်ရွံရှာဖွယ်အမှုများကလည်း သူတို့၏ထာဝရတည်မြဲသောပျက်စီးခြင်းအတွက် နည်းလမ်းကို ပြင်ဆင်ပေး၏။

၂၆ ဤသို့အားဖြင့်အချိန်တန်လာသောအခါ၊ ရှိဇသည် ကော်ရန္တူမာကို၊ အရှေ့ဘက်လားရာအရပ်၊ ပင်လယ်ကမ်းနားရှိ နယ်နိမိတ်သို့တိုင်အောင်ပင် လိုက်၍၊ ထိုအရပ်၌၊ သုံးရက်ကြာအောင် ရှိဇကို စစ်တိုက်၏။

၂၇ ရှိဇ၏တပ်များ၌ ပျက်စီးခြင်းမှာ အလွန်ကြောက်မက်ဖွယ်ကောင်းသဖြင့်၊ လူတို့သည် ကြောက်လန့်စပြုလျက်၊ ကော်ရန္တူမာ၏တပ်များရှေ့မှ ထွက်ပြေးစပြုကြ၏။ သူတို့သည် ကောရိဟောပြည်သို့ ထွက်ပြေးကြပြီး၊ သူတို့နှင့် မပူးပေါင်းလိုသည့် ထိုပြည်သားမှန်သမျှတို့ကို သူတို့ရှေ့မှ သုတ်သင်ပယ်ရှင်းကြ၏။

၂၈ ကောရိဟောချိုင့်ဝှမ်း၌လည်း သူတို့၏တဲများကို ဆောက်ကြ၏။ ကော်ရန္တူမာသည်လည်း သူ၏တဲများကို ရှူရာချိုင့်ဝှမ်း၌ ဆောက်၏။ ယခုတွင်၊ ရှုရာချိုင့်ဝှမ်းသည် ကော်မနာတောင်ကုန်းအနီးတွင် ရှိလေ၏။ သို့ဖြစ်၍၊ ကော်ရန္တူမာသည် သူ၏တပ်များကို ကော်မနာတောင်ကုန်းပေါ်၌ အတူတကွ စုဝေး၍၊ ရှိဇ၏တပ်များအား စစ်တိုက်ထွက်လာဖို့ စိန်ခေါ်ခြင်းငှာ၊ တံပိုးကို မှုတ်၏။

၂၉ ဤသို့အားဖြင့်အချိန်တန်လာသောအခါ၊ သူတို့သည် ထွက်လာကြသော်လည်း တစ်ဖန်မောင်းထုတ်ခံရ၏။ ဒုတိယအကြိမ်ထွက်လာပြီး၊ ဒုတိယအကြိမ်တစ်ဖန် မောင်းထုတ်ခံရ၏။ ဤသို့အားဖြင့်အချိန်တန်လာသောအခါ၊ သူတို့သည် တတိယအကြိမ် တစ်ဖန်ထွက်လာပြီး၊ တိုက်ပွဲသည် အလွန်ပြင်းထန်လာ၏။

၃၀ ဤသို့အားဖြင့်အချိန်တန်လာသောအခါ၊ ရှိဇက ကော်ရန္တူမာကို ခုတ်ချသဖြင့် နက်စွာသောဒဏ်ရာများစွာရစေ၏။ ကော်ရန္တူမာသည်လည်း သွေးလွန်၍ မိန်းမောသဖြင့် သေသကဲ့သို့ဖြစ်လျက် သယ်ဆောင်သွားခံရ၏။

၃၁ ယခုတွင်၊ နှစ်ဘက်စလုံး၌ ယောက်ျားများ၊ မိန်းမများနှင့် ကလေးများ၏ဆုံးရှုံးမှုမှာ အလွန်ကြီးမားလှသဖြင့်၊ ရှိဇသည် သူ၏လူတို့ကို ကော်ရန္တူမာ၏တပ်များကို မလိုက်စေရန် အမိန့်ပေး၏။ သို့ဖြစ်၍၊ သူတို့သည် မိမိတို့၏တပ်စခန်းသို့ ပြန်လာကြ၏။