ဧသာ ၈

အခန်းကြီး ၈

နိုင်ငံနှင့်စပ်လျဉ်း၍ ရန်တွေ့ခြင်းနှင့် တိုက်ခိုက်ခြင်းများရှိ၏—အာကိရှသည် မင်းကြီးကိုကွပ်မျက်ခြင်းငှာ ကျိန်ဆိုခြင်းဖြင့်ပေါင်းစည်းသည့် လျှို့ဝှက်ဂိုဏ်းကို ဖွဲ့စည်း၏—လျှို့ဝှက်ဂိုဏ်းများကို နတ်ဆိုးကတည်ထောင်၍၊ နိုင်ငံတို့၏ပျက်စီးခြင်းကို ဖြစ်စေ၏—ခပ်သိမ်းသောပြည်၊ နိုင်ငံများနှင့် တိုင်းပြည်တို့၏ လွတ်လပ်ခွင့်ကို ဖျက်ဆီးဖို့ ကြိုးစားသည့် လျှို့ဝှက်ဂိုဏ်း၏တစ်ဖက်၌ မျက်မှောက်ကာလ တပါးအမျိုးသားတို့ကို သတိပေး၏။

၁ ဤသို့အားဖြင့်အချိန်တန်လာသောအခါ၊ သူသည် ဩမဲကို ဖွားမြင်စေ၍၊ ဩမဲသည် သူ၏နေရာ၌ နန်းစံ၏။ ဩမဲသည်လည်း ယာရက်ကိုဖွားမြင်စေပြီး၊ ယာရက်သည် သားသမီးများကို ဖွားမြင်စေ၏။

၂ ယာရက်သည် သူ့အဘကို ဆန့်ကျင်၍ ပုန်ကန်ပြီး၊ ဟေသပြည်ထဲမှာ လာ၍နေ၏။ ဤသို့အားဖြင့်အချိန်တန်လာသောအခါ၊ သူသည် လူများစွာတို့ကို မြှောက်ပင့်ပြောဆိုလျက်၊ သူ၏စဉ်းလဲသောစကားများကြောင့်၊ နိုင်ငံ၏တစ်ဝက်အထိ ရရှိ၏။

၃ သူသည် နိုင်ငံ၏တစ်ဝက်ကို ရရှိပြီးလျှင်၊ သူ၏အဘကို စစ်တိုက်၍၊ သူ၏အဘကို ဖမ်းဆီးချုပ်နှောင်ခြင်းထဲသို့ သယ်ဆောင်သွားပြီး၊ ဖမ်းဆီးချုပ်နှောင်ခြင်းထဲမှာ အစေခံစေ၏။

၄ ယခုမူကား၊ ဩမဲ၏အုပ်စိုးခြင်းလက်ထက်တွင်၊ သူ့အသက်တာ၏တစ်ဝက်မှာ ဖမ်းဆီးချုပ်နှောင်ခြင်း၌ ရှိ၏။ ဤသို့အားဖြင့်အချိန်တန်လာသောအခါ၊ သူသည် သားသမီးများကို ဖွားမြင်စေပြီး၊ သူတို့အထဲ၌ ဟေဇရုံနှင့် ကော်ရန္တူမာတို့ ပါဝင်၏။

၅ သူတို့သည်လည်း အစ်ကိုယာရက်၏အကျင့်များကြောင့် လွန်စွာအမျက်ထွက်ကြရာ တပ်တစ်တပ်ကိုဖွဲ့၍ ယာရက်ကို စစ်တိုက်သည့်တိုင်အောင်ပင်တည်း။ ဤသို့အားဖြင့်အချိန်တန်လာသောအခါ၊ ညဉ့်အချိန်၌ သူ့ကို စစ်တိုက်ကြ၏။

၆ ဤသို့အားဖြင့်အချိန်တန်လာသောအခါ၊ သူတို့သည် ယာရက်၏တပ်ကို ကွပ်မျက်ပြီးလျှင်၊ သူ့ကိုလည်း ကွပ်မျက်တော့မည်ပြုကြ၏။ သူ့ကို မကွပ်မျက်မည့်အကြောင်း သူတို့ကို တောင်းပန်လျက်၊ သူ၏နိုင်ငံကို သူ့အဘထံသို့ ပေးမည်ဟုဆို၏။ ဤသို့အားဖြင့်အချိန်တန်လာသောအခါ၊ သူ၏အသက်ကို သူတို့ချမ်းသာပေးကြ၏။

၇ ယခုမူကား၊ ယာရက်သည် နိုင်ငံကို ဆုံးရှုံးရသောကြောင့် အလွန်ဝမ်းနည်းလာ၏။ အကြောင်းမူကား၊ သူ၏စိတ်နှလုံးကို နိုင်ငံအပေါ်နှင့် လောက၏ချီးမွမ်းမှုတို့အပေါ်မှာ ထား၏။

၈ ယခုတွင်၊ ယာရက်၏သမီးသည် အလွန်လိမ္မာသောသူဖြစ်၍၊ သူ့အဘ၏ဝမ်းနည်းခြင်းကို တွေ့မြင်ရလျှင်၊ သူ့အဘအတွက် နိုင်ငံကို ရွေးနှုတ်နိုင်မည့် အကြံကို ကြံစည်ခြင်းငှာ စဉ်းစား၏။

၉ ယခုတွင်၊ ယာရက်၏သမီးသည် အလွန်ချောမော၏။ ဤသို့အားဖြင့်အချိန်တန်လာသောအခါ၊ သူမသည် အဘကို စကားဆို၍၊ အကျွန်ုပ်၏အဘသည် အဘယ်အကြောင်းကြောင့် ထိုမျှအလွန်ဝမ်းနည်းသနည်း။ အကျွန်ုပ်တို့ဘိုးဘေးတို့ မဟာသမုဒ္ဒရာကိုဖြတ်၍ ဆောင်ယူလာသည့် မှတ်တမ်းကို မဖတ်ဖူးသလော။ ရှုလော့၊ ရှေးကလူများနှင့်စပ်လျဉ်း၍ သူတို့၏လျှို့ဝှက်သောအကြံအစည်များအားဖြင့် နိုင်ငံများနှင့် ဘုန်းကြီးခြင်းတို့ကို ရရှိရာ မှတ်တမ်းတစ်ခုမရှိသလောဟု ဆို၏။

၁၀ ယခုမူကား၊ အကျွန်ုပ်၏အဘသည် ကိမနော၏သား အာကိရှကို ခေါ်ပေအံ့။ ရှုလော့၊ အကျွန်ုပ်သည် ချောမော၏၊ သူ့ရှေ့မှာ ကပြီး၊ နှစ်သက်စေမည်ဖြစ်၍ သူသည် အကျွန်ုပ်ကို အိမ်ထောင်ဖက်ပြုလိုလိမ့်မည်။ သို့ဖြစ်၍၊ အကျွန်ုပ်ကို သူနှင့်ပေးစားပါမည့်အကြောင်း သင့်ထံတောင်းဆိုလျှင်၊ သူ့အား၊ ငါ့အဘ မင်းကြီး၏ဦးခေါင်းကို ငါ့ထံသို့ သင်ယူဆောင်လာမည်ဆိုလျှင်၊ သူမကို ပေးမည်ဟု ဆိုရမည်။

၁၁ ယခုမူကား၊ ဩမဲသည် အာကိရှ၏အဆွေခင်ပွန်းဖြစ်၏။ သို့ဖြစ်၍၊ ယာရက်က အာကိရှကို ခေါ်သောအခါ၊ ယာရက်၏သမီးသည် သူ့ရှေ့မှာ က၍၊ နှစ်သက်စေသဖြင့် သူမကို အိမ်ထောင်ဖက်ပြုလိုသည့်တိုင်အောင်ပင်ဖြစ်၏။ ဤသို့အားဖြင့်အချိန်တန်လာသောအခါ၊ သူသည် ယာရက်အား၊ ငါ့ကို သူမနှင့်ပေးစားပါလော့ဟု ဆို၏။

၁၂ ယာရက်ကလည်း သင်သည် ငါ့အဘ မင်းကြီး၏ဦးခေါင်းကို ငါ့ထံသို့ ယူဆောင်လာမည်ဆိုလျှင်၊ သူမကို သင့်အား ငါပေးမည်ဟု ဆို၏။

၁၃ ဤသို့အားဖြင့်အချိန်တန်လာသောအခါ၊ အာကိရှသည် သူ၏ဆွေမျိုးသားချင်းခပ်သိမ်းတို့ကို ယာရက်၏အိမ်သို့ စုဝေး၏၊ သင်တို့ထံမှ ငါတောင်းဆိုသည့်အရာ၌ သစ္စာရှိကြမည်လောဟု မေး၏။

၁၄ ဤသို့အားဖြင့်အချိန်တန်လာသောအခါ၊ အာကိရှတောင်းဆိုသည့် အကူအညီမှ သွေဖည်သူ အဘယ်သူမဆို မိမိဦးခေါင်းကို ဆုံးရှုံးရမည့်အကြောင်းနှင့်၊ သူတို့အား အာကိရှဖော်ပြသည့်အရာမှန်သမျှကို ပေါက်ကြားစေသူအဘယ်သူမဆို မိမိအသက်ကို ဆုံးရှုံးရမည့်အကြောင်း၊ ကောင်းကင်ဘုံ၏ဘုရားသခင်ကို တိုင်တည်၍လည်းကောင်း၊ ကောင်းကင်တို့ကို တိုင်တည်၍လည်းကောင်း၊ မြေကြီးကို တိုင်တည်၍လည်းကောင်း၊ သူတို့၏ဦးခေါင်းများကို တိုင်တည်၍လည်းကောင်း ကျိန်ဆိုကြ၏။

၁၅ ဤသို့အားဖြင့်အချိန်တန်လာသောအခါ၊ သူတို့သည် ထိုကဲ့သို့အားဖြင့် အာကိရှနှင့် သဘောတူကြ၏။ အစိုးရခြင်းကို ရရှိဖို့ကြိုးစားအားထုတ်သူများလည်းဖြစ်သည့် ရှေးကလူများတည်ထောင်သည့်၊ ရှေးဦးစွာကတည်းကပင် လူ့အသက်ကိုသတ်သောသူဖြစ်သည့် ကာဣနမှ လက်ဆင့်ကမ်းသည့် ကျိန်ဆိုခြင်းတို့ကို အာကိရှသည် သူတို့အဖို့ စီမံဆောင်ရွက်၏။

၁၆ ဤကျိန်ဆိုခြင်းတို့ကို လူတို့အဖို့ စီမံဆောင်ရွက်ခြင်းငှာ၊ သူတို့ကို မှောင်မိုက်၌ဆက်၍ထားခြင်းငှာ၊ အစိုးရခြင်းကို ရရှိဖို့၊ ထို့အတူ လူ့အသက်ကိုသတ်ဖို့၊ ထို့အတူ လုယက်ဖို့၊ မုသားပြောဖို့၊ အမျိုးမျိုးသောဆိုးညစ်ခြင်းနှင့် မတရားသောမေထုန်အမှုတို့ကို ကျူးလွန်ဖို့ အစိုးရခြင်းကိုရရှိရန် ကြိုးစားအားထုတ်သောသူများကို ကူညီခြင်းငှာ၊ ထိုအရာတို့ကို နတ်ဆိုး၏တန်ခိုးအားဖြင့် ထိန်းသိမ်းထား၏။

၁၇ ဤရှေးကအရာများကို ရှာဖွေဖို့ သူ၏စိတ်နှလုံးထဲသို့ သွင်းပေးသောသူမှာ ယာရက်၏သမီးဖြစ်၏။ ယာရက်ကလည်း ထိုအရာကို အာကိရှ၏စိတ်နှလုံးထဲသို့ သွတ်သွင်း၏။ သို့ဖြစ်၍၊ အာကိရှသည် ထိုအရာကို သူ၏ဆွေမျိုးများနှင့် အဆွေခင်ပွန်းများအဖို့ စီမံဆောင်ရွက်ပြီး၊ သူအလိုရှိသည့်အရာမှန်သမျှကို ပြုခြင်းငှာ၊ နှစ်လိုဖွယ်သောကတိများအားဖြင့် ထိုသူတို့ကို လှည့်ဖြားခေါ်ဆောင်သွားလျက်ရှိ၏။

၁၈ ဤသို့အားဖြင့်အချိန်တန်လာသောအခါ၊ သူတို့သည် လျှို့ဝှက်ဂိုဏ်းတစ်ခုကို တည်ထောင်ကြ၏။ ထိုဂိုဏ်းသည် ရှေးကရှိခဲ့သောသူများကဲ့သို့ပင်၊ ဘုရားသခင်၏အမြင်၌ အားလုံးထက် စက်ဆုပ်ရွံရှာဖွယ်အကောင်းဆုံးနှင့် အဆိုးညစ်ဆုံးဖြစ်၏။

၁၉ အကြောင်းမူကား၊ ကိုယ်တော်ရှင်သည် လျှို့ဝှက်ဂိုဏ်းများအားဖြင့်၊ ပြုတော်မမူ။ လူသား၏အစကတည်းက အရာရာ၌ အသွေးသွန်းလောင်းခြင်းပြုစေဖို့ကိုလည်း မိန့်တော်မမူ။

၂၀ ယခုမူကား၊ ငါမော်ရော်နိုင်းသည် သူတို့၏ကျိန်ဆိုခြင်းများနှင့် ဂိုဏ်းတို့၏အမျိုးအစားကို မရေး။ အကြောင်းမူကား၊ လူမျိုးခပ်သိမ်းတို့ ၌ ထိုအရာများရှိကြောင်းကို ငါ့အား ဖော်ပြလေပြီ။ လာမန်အမျိုးသားတို့ ၌လည်း ထိုအရာများရှိ၏။

၂၁ ထိုအရာတို့သည် ငါယခုပြောလျက်ရှိသည့် လူမျိုးတို့၏ပျက်စီးခြင်းနှင့် နီဖိုင်းလူမျိုးတို့၏ပျက်စီးခြင်းတို့ကိုလည်း ဖြစ်စေပြီ။

၂၂ အစိုးရခြင်းနှင့် အကျိုးအမြတ်ကို ရရှိဖို့ ထိုကဲ့သို့သောလျှို့ဝှက်ဂိုဏ်းများကို ပြည်ပေါ်သို့ ပျံ့နှံ့သည့်တိုင်အောင် ထောက်မသည့်လူမျိုးမှန်သမျှသည်၊ ရှုလော့၊ ဖျက်ဆီးခံရလိမ့်မည်။ အကြောင်းမူကား၊ ကိုယ်တော်ရှင်သည် ထိုသူတို့အားဖြင့် သွန်းလောင်းမည့် သူ၏သန့်ရှင်းသူများ၏အသွေးက၊ ထိုသူတို့ကို လက်တုံ့ပြန်ခြင်းအတွက် သူ့ထံသို့ မြေကြီးမှနေ၍ အစဉ်အမြဲတောင်းလျှောက်မည်ကို အခွင့်ပေးတော်မူမည်မဟုတ်။ သူတို့အတွက် လက်တုံ့ပြန်ခြင်းလည်း မရှိသေး။

၂၃ သို့ဖြစ်၍၊ အို အသင် တပါးအမျိုးသားတို့၊ ဤအရာတို့ကို သင်တို့ထံသို့ ဖော်ပြခြင်းအားဖြင့်၊ သင်တို့သည် သင်တို့၏အပြစ်များမှ နောင်တရနိုင်ကြခြင်းငှာလည်းကောင်း၊ အစိုးရခြင်းနှင့် အကျိုးအမြတ်ရဖို့ တည်ထောင်ထားသည့် လူ့အသက်ကိုသတ်သော ဤဂိုဏ်းများကို သင်တို့အထက်၌ ရှိစေဖို့၊ အခွင့်ပေးခြင်းမရှိရမည်မှာ၊ ဘုရားသခင်၏ဉာဏ်ပညာတော် ဖြစ်၏—သင်တို့သည်လည်း ဤအရာများကို ဖြစ်စေဖို့ အခွင့်ပေးကြမည်ဆိုလျှင်၊ အမှု၊ အထူးသဖြင့်၊ ဖျက်ဆီးခြင်းအမှုသည် သင်တို့အပေါ် ကျရောက်လာ၍၊ ထိုမှတစ်ပါး၊ ထာဝရဘုရားသခင်၏ အပြစ်ပေးခြင်းဓားသည်ပင် သင်တို့၏ပျက်စီးခြင်းနှင့် ဖျက်ဆီးခြင်းသို့တိုင်အောင်၊ သင်တို့အပေါ် ကျရောက်လာလိမ့်မည်။

၂၄ သို့ဖြစ်၍၊ ဤအမှုများ သင်တို့ထံသို့ ရောက်လာသည်ကို သင်တို့ မြင်ရသောအခါ၊ သင်တို့၌ ရှိမည့် ဤလျှို့ဝှက်ဂိုဏ်းကြောင့်၊ သင်တို့၏ အလွန်ဆိုးရွားသောအခြေအနေကို သိခြင်းသို့ နိုးရမည်ကို ကိုယ်တော်ရှင်မိန့်တော်မူ၏။ သို့မဟုတ်၊ ကွပ်မျက်ခံရသောသူတို့၏ အသွေးကြောင့်၊ ထိုအဖွဲ့သည် အမင်္ဂလာရှိ၏။ အကြောင်းမူကား၊ ထိုအဖွဲ့နှင့် ထိုအဖွဲ့ကိုတည်ထောင်သူတို့အပေါ် လက်တုံ့ပြန်ဖို့အတွက် သူတို့က မြေမှုန့်ထဲမှဟစ်ကြွေးကြ၏။

၂၅ အချိန်တန်လာသောအခါ၊ ခပ်သိမ်းသောပြည်၊ နိုင်ငံများနှင့် တိုင်းပြည်တို့၏ လွတ်လပ်ခွင့်ကို ဖျက်ဆီးဖို့ကြိုးစားလျက် ထိုအဖွဲ့ကို တည်ထောင်သူမှန်သမျှသည်၊ လူခပ်သိမ်းတို့၏ပျက်စီးခြင်းကို ဖြစ်စေ၏။ အကြောင်းမူကား၊ ထိုအဖွဲ့အစည်းကို မုသားခပ်သိမ်းတို့၏အဘဖြစ်သူ၊ ငါတို့၏ပထမဦးဆုံးသောမိဘများကို လှည့်ဖြားသူ၊ ထိုမုသားပြောသူ၊ အမှန်စင်စစ်၊ ရှေးဦးစွာကတည်းက လူသားကို လူ့အသက်သတ်ခြင်းကျူးလွန်စေသည့် ထိုမုသားပြောသူ၊ ရှေးဦးစွာကတည်းက လူသားတို့ ပရောဖက်များကို သတ်၍၊ ကျောက်ခဲနှင့်ပစ်၍၊ နှင်ထုတ်စေဖို့ သူတို့စိတ်နှလုံးကို မာကျောစေသူ နတ်ဆိုးအားဖြင့် တည်ထောင်ထား၏။

၂၆ သို့ဖြစ်၍၊ မကောင်းမှုရပ်စဲနိုင်စေခြင်းငှာလည်းကောင်း၊ လူသားတို့၏စိတ်နှလုံးကို စာတန်အစိုးရခြင်းမရှိသည့်အချိန် ရောက်လာ၍၊ သူတို့သည် ကောင်းမြတ်သည်ကို အစဉ်မပြတ်ပြုဖို့ ဖျောင်းဖျခံကြရ၏၊ ဖြောင့်မတ်ခြင်းခပ်သိမ်းတို့၏စမ်းရေတွင်းသို့လာ၍၊ ကယ်တင်ခြင်းသို့ ရောက်နိုင်ကြစေခြင်းငှာလည်းကောင်း ဤအရာများကို ရေးစေခြင်းငှာ ငါမော်ရော်နိုင်းကို မိန့်ထားတော်မူ၏။