ဧသာကျမ်း

မောဇိယမင်းကြီး၏လက်ထက်တွင် လင်မဟိလူမျိုးတို့ တွေ့ရှိသည့် ပုရပိုက်ပြား နှစ်ဆယ်လေးပြားတို့မှ ကောက်နှုတ်ထားသည့် ယာရက်အမျိုးသားတို့၏မှတ်တမ်း။

အခန်းကြီး ၁

မော်ရော်နိုင်းသည် ဧသာ၏စာများကို အကျဉ်းချုပ်၏—ဧသာ၏ဆွေစဉ်မျိုးဆက်မှတ်တမ်းကို ဖော်ပြ၏—ယာရက်အမျိုးသားတို့၏ဘာသာစကားသည် ဗာဗုလုန်ရဲတိုက်၌ ရှုပ်ထွေးမခံရ—ကိုယ်တော်ရှင်သည် သူတို့အား အမြတ်ဆုံးပြည်သို့ ခေါ်ဆောင်ရန်နှင့် ကြီးစွာသောလူမျိုးဖြစ်စေရန် ကတိထားတော်မူ၏။

၁ ယခုမူကား၊ ငါ၊ မော်ရော်နိုင်းသည် ဤမြောက်ပိုင်းတိုင်းပြည်၏မျက်နှာပြင်ပေါ်၌ ကိုယ်တော်ရှင်၏ လက်တော်အားဖြင့် ဖျက်ဆီးခံရသူ ရှေးမှထိုပြည်သားတို့၏ မှတ်တမ်းကို ဆက်၍ရေး၏။

၂ လင်မဟိလူမျိုးတို့ တွေ့ရှိသည့် ပုရပိုက်ပြားနှစ်ဆယ်လေးပြားမှ ဧသာကျမ်းဟု ခေါ်သည့် ငါ၏မှတ်တမ်းကိုလည်း ကောက်နှုတ်၏။

၃ ငါသည် ကမ္ဘာနှင့် အာဒံကို ဖန်ဆင်းတော်မူခြင်းအကြောင်း၊ ထိုအချိန်မှစ၍ ကြီးစွာသောရဲတိုက်ကို တည်ဆောက်သည့် အချိန်ထိဖြစ်ပျက်သောအရာများအကြောင်းနှင့် ထိုအချိန်တိုင်အောင် လူသားတို့၌ ဖြစ်ပျက်သောအရာမှန်သမျှတို့အကြောင်း မှတ်တမ်းကို ဖော်ပြသည့် ဤမှတ်တမ်း၏ပထမပိုင်းသည် ယုဒလူမျိုးတို့၌ ရှိလေပြီဟု ထင်မှတ်သဖြင့်—

၄ ထို့ကြောင့်၊ ငါသည် အာဒံ၏လက်ထက်မှစ၍ ထိုအချိန်ထိတိုင်အောင် ဖြစ်ပျက်ခဲ့သောအရာတို့ကို မရေး။ သို့ရာတွင်၊ ထိုအရာတို့သည် ပုရပိုက်ပြားများပေါ်၌ရှိ၏။ ထိုအရာတို့ကို တွေ့ရှိသူမှန်သမျှသည်လည်း ပြည့်စုံသောမှတ်တမ်းကို ရရှိနိုင်သည့် တန်ခိုးရှိလိမ့်မည်။

၅ သို့ရာတွင် ရှုလော့၊ ငါသည် ပြည့်စုံသောမှတ်တမ်းကို မရေး၊ ရဲတိုက်ကိုတည်ဆောက်သည့်အချိန်မှစ၍၊ သူတို့ဖျက်ဆီးခံရသည့် အချိန်အထိဖြစ်သည့် မှတ်တမ်း၏တစ်စိတ်တစ်ပိုင်းကိုသာ ရေး၏။

၆ ဤနည်းအားဖြင့် ငါသည် မှတ်တမ်းကို ရေး၏။ ဤမှတ်တမ်းကို ရေးသူမှာ ဧသာဖြစ်၏၊ သူသည် ကော်ရန်တာ၏အမျိုးအနွယ်တစ်ဦးလည်းဖြစ်၏။

၇ ကော်ရန်တာသည် မော်ရုန်၏သား ဖြစ်၏။

၈ မော်ရုန်သည် ဧသမ်၏သားဖြစ်၏။

၉ ဧသမ်သည် အာဟ၏သားဖြစ်၏။

၁၀ အာဟသည် ရှေသ၏သားဖြစ်၏။

၁၁ ရှေသသည် ရှိဗလုန်၏သားဖြစ်၏။

၁၂ ရှိဗလုန်သည် ကုမ်၏သားဖြစ်၏။

၁၃ ကုမ်သည် ကော်ရန်တမ်၏သားဖြစ်၏။

၁၄ ကော်ရန်တမ်သည် အာမနိဂဒ္ဒ၏သားဖြစ်၏။

၁၅ အာမနိဂဒ္ဒသည် အာရုန်၏သားဖြစ်၏။

၁၆ အာရုန်သည် ဟေသုမ်၏သားဖြစ်သူ ဟေသ၏အမျိုးအနွယ်ဖြစ်၏။

၁၇ ဟေသုမ်သည် လိဗ၏သားဖြစ်၏။

၁၈ လိဗသည် ကိရှ၏သားဖြစ်၏။

၁၉ ကိရှသည် ကော်ရုမ်၏သားဖြစ်၏။

၂၀ ကော်ရုမ်သည် လေဝိ၏သားဖြစ်၏။

၂၁ လေဝိသည် ကိမ၏သားဖြစ်၏။

၂၂ ကိမသည် မော်ရန်တန်၏သားဖြစ်၏။

၂၃ မော်ရန်တန်သည် ရိပလာကိရှ၏သားဖြစ်၏။

၂၄ ရိပလာကိရှသည် ရှေဇ၏သားဖြစ်၏။

၂၅ ရှေဇသည် ဟေသ၏သားဖြစ်၏။

၂၆ ဟေသသည် ကုမ်၏သားဖြစ်၏။

၂၇ ကုမ်သည် ကော်ရန်တမ်၏သားဖြစ်၏။

၂၈ ကော်ရန်တမ်သည် ဧမာ၏သားဖြစ်၏။

၂၉ ဧမာသည် ဩမဲ၏သားဖြစ်၏။

၃၀ ဩမဲသည် ရှူလဲ၏သားဖြစ်၏။

၃၁ ရှူလဲသည် ကိဗ၏သားဖြစ်၏။

၃၂ ကိဗသည် ယာရက်၏သားဖြစ်သူ ဩရိဟ၏သားဖြစ်၏။

၃၃ ထိုယာရက်သည် လူတို့၏ဘာသာစကားကို ကိုယ်တော်ရှင်ရှုပ်ထွေးစေ၍၊ သူတို့ကို မြေကြီးမျက်နှာပြင်တစ်ခုလုံးပေါ်၌ ကွဲပြားပြန့်ကျဲစေကြောင်း၊ အမျက်တော်ဖြင့် ကျိန်ဆိုသည့်အချိန်၌၊ သူ့အစ်ကိုနှင့် သူတို့၏မိသားစုများနှင့်အတူ၊ အခြားသောသူများနှင့် ထိုသူတို့၏မိသားစုများနှင့်အတူ ကြီးစွာသော ရဲတိုက်ဆီမှ ထွက်လာခဲ့၏။ ကိုယ်တော်ရှင်၏နှုတ်ကပတ်တော်အတိုင်း လူတို့သည် ကွဲပြားပြန့်ကျဲကြ၏။

၃၄ ယာရက်၏အစ်ကိုသည် ကြီးမား၍ အားကြီးသောသူဖြစ်သဖြင့်၊ ကိုယ်တော်ရှင်အလွန်နှစ်သက်တော်မူသောသူလည်းဖြစ်၏၊ ညီယာရက်ကလည်း သူ့အား၊ ကိုယ်တော်ရှင်ထံ တောင်းလျှောက်လော့၊ ငါတို့၏ စကားများကို နားမလည်နိုင်စေရန် ငါတို့ကို မရှုပ်ထွေးစေတော်မူမည့် အကြောင်းပေတည်းဟု ဆို၏။

၃၅ ဤသို့အားဖြင့်အချိန်တန်လာသောအခါ၊ ယာရက်၏အစ်ကိုသည် ကိုယ်တော်ရှင်ထံသို့ တောင်းလျှောက်၏။ ကိုယ်တော်ရှင်ကလည်း ယာရက်ကို သနားခြင်း ရှိတော်မူ၏။ ထို့ကြောင့်၊ သူသည် ယာရက်၏ဘာသာစကားကို မရှုပ်ထွေးစေခဲ့။ ယာရက်နှင့် သူ့ ညီသည်လည်း မရှုပ်ထွေးကြ။

၃၆ ထို့နောက်တွင်၊ ယာရက်က သူ့အစ်ကိုအား ဆိုသည်ကား၊ ကိုယ်တော်ရှင်သည် သူ၏အမျက်တော်ကို၊ ငါတို့၏အဆွေခင်ပွန်းဖြစ်သူတို့ထံမှ လွှဲတော်မူပြီးလျှင်၊ သူတို့၏ဘာသာစကားကို ရှုပ်ထွေးစေတော်မူခြင်း မရှိစေမည့်အကြောင်း သူ့ထံသို့ တစ်ဖန် တောင်းလျှောက်ပါလော့။

၃၇ ဤသို့အားဖြင့်အချိန်တန်လာသောအခါ၊ ယာရက်၏အစ်ကိုသည် ကိုယ်တော်ရှင်ထံသို့ တောင်းလျှောက်၏။ ကိုယ်တော်ရှင်သည် သူတို့၏အဆွေခင်ပွန်းများနှင့် ထိုသူတို့၏မိသားစုတို့ကိုလည်း သနားတော်မူခြင်း ရှိသဖြင့် သူတို့မရှုပ်ထွေးပေ။

၃၈ ဤသို့အားဖြင့်အချိန်တန်လာသောအခါ၊ ယာရက်က သူ့အစ်ကိုအား တစ်ဖန်ဆိုလေသည်မှာ၊ ငါတို့ကို ထိုပြည်မှ ကိုယ်တော်ရှင်နှင်ထုတ်မထုတ်၊ သွား၍ မေးလျှောက်ပါလော့။ ငါတို့ကို ထိုပြည်မှ သူနှင်ထုတ်တော်မူမည်ဆိုလျှင်၊ အဘယ်အရပ်သို့ ငါတို့သွားရမည့်အကြောင်း သူ့ထံ တောင်းလျှောက်ပါလော့။ ကိုယ်တော်ရှင်သည် ငါတို့ကို မြေကြီးတစ်ခုလုံးပေါ်၌ အမြတ်ဆုံးဖြစ်သည့်ပြည်သို့ ဆောင်တော်မူမည်ကို အဘယ်သူသိမည်နည်း။ ထိုသို့ဆိုလျှင်၊ ငါတို့သည် ထိုပြည်ကို ငါတို့နေထိုင်ရာအတွက် ရရှိနိုင်ကြစေခြင်းငှာ ကိုယ်တော်ရှင်အပေါ် သစ္စာရှိကြကုန်အံ့ဟု ဆိုလေ၏။

၃၉ ဤသို့အားဖြင့်အချိန်တန်လာသောအခါ၊ ယာရက်၏အစ်ကိုသည် ယာရက်နှုတ်မှ ပြောထားသည့်အတိုင်း ကိုယ်တော်ရှင်ထံသို့ တောင်းလျှောက်၏။

၄၀ ဤသို့အားဖြင့်အချိန်တန်လာသောအခါ၊ ကိုယ်တော်ရှင်သည် ယာရက်၏အစ်ကိုအား ကြားတော်မူပြီးလျှင်၊ သနားတော်မူခြင်း ရှိ၍ မိန့်တော်မူလေသည်ကား၊

၄၁ သင်၏သိုးစုအထီးအမအမျိုးမျိုး၊ ထို့အတူ မြေကြီးမှ မျိုးစေ့အမျိုးမျိုး၊ ထို့အတူ သင်၏မိသားစုများ၊ ထို့အတူ သင့်ညီယာရက်နှင့် သူ၏မိသားစု၊ ထို့အတူ သင်၏အဆွေခင်ပွန်းများနှင့် သူတို့၏မိသားစုများ၊ ထို့အတူ ယာရက်၏အဆွေခင်ပွန်းများနှင့် သူတို့၏မိသားစုများကို သွား၍ အတူတကွ စုဝေးလော့။

၄၂ သင်သည် ဤသို့ပြုပြီးလျှင်၊ သူတို့ကိုဦးဆောင်၍ မြောက်ဘက်လားရာ၌ရှိသည့် ချိုင့်ဝှမ်းထဲသို့ ဆင်းသွားလော့။ ထိုအရပ်၌ ငါသည် သင့်ကို တွေ့တော်မူမည်၊ မြေကြီးပေါ်ရှိပြည်ခပ်သိမ်းတို့ထက် အမြတ်ဆုံးဖြစ်သည့် ပြည်ထဲသို့ သင့်ရှေ့မှ သွားတော်မူမည်။

၄၃ ထိုအရပ်၌ ငါသည် သင်နှင့် သင်၏အမျိုးအနွယ်တို့ကို ကောင်းချီးပေး၍၊ သင်၏အမျိုးအနွယ်တို့အားဖြင့်၊ ထို့အတူ သင့်ညီ၏အမျိုးအနွယ်တို့အားဖြင့်၊ ထို့အတူ သင်နှင့်အတူသွားမည့်သူတို့အားဖြင့်၊ ငါ့အဖို့ ကြီးစွာသောလူမျိုးကို ပေါ်ထွန်းစေတော်မူမည်။ ငါ့အဖို့ သင်၏အမျိုးအနွယ်တို့အားဖြင့် ပေါ်ထွန်းစေမည့်လူမျိုးထက် သာ၍ကြီးသောလူမျိုးတစ်မျိုးမျှ၊ မြေကြီးမျက်နှာပြင်တစ်ခုလုံး၌ မရှိလတ္တံ့။ သင်သည် ဤမျှအချိန်ကြာမြင့်စွာ ငါ့ထံသို့ တောင်းလျှောက်သောကြောင့်၊ ထိုကဲ့သို့အားဖြင့် ငါသည် သင်အဖို့ ပြုတော်မူမည်။