ဧသာ ၆

အခန်းကြီး ၆

ယာရက်အမျိုးသားသမ္ဗန်တို့သည် လေအားဖြင့် ကတိတော်မြေသို့ တွန်းပို့ခံရကြ၏—လူတို့သည် ကိုယ်တော်ရှင်အား သူ၏ကောင်းမြတ်တော်မူခြင်းအတွက် ချီးမွမ်းကြ၏—ဩရိဟသည် သူတို့အပေါ်၌ ခန့်အပ်ထားသောရှင်ဘုရင်ဖြစ်၏—ယာရက်နှင့် သူ၏အစ်ကို သေ၏။

၁ ယခုမူကား၊ ငါ၊ မော်ရော်နိုင်းသည် ယာရက်နှင့် သူ့အစ်ကို၏မှတ်တမ်းကို ဆက်၍ရေး၏။

၂ ဤသို့အားဖြင့်အချိန်တန်လာသောအခါ၊ တောင်ပေါ်သို့ ယာရက်၏အစ်ကို သယ်ဆောင်သည့် ကျောက်ခဲများကို ကိုယ်တော်ရှင်ပြင်ဆင်တော်မူလေပြီးနောက်၊ ယာရက်၏အစ်ကိုသည် တောင်ပေါ်မှဆင်းလာပြီးလျှင်၊ ပြင်ဆင်ထားသော ကျောက်ခဲများကို သင်္ဘောများအတွင်း အစွန်းတစ်နေရာစီ၌ ချထား၏။ ရှုဦးလော့၊ ၎င်းတို့သည် သင်္ဘောများအဖို့ အလင်းကို ပေး၏။

၃ ထိုကဲ့သို့အားဖြင့်၊ ကိုယ်တော်ရှင်သည် ယောက်ျား၊ မိန်းမနှင့် ကလေးသူငယ်တို့အား ကြီးစွာသောရေတို့ကို မှောင်မိုက်ထဲ၌ မဖြတ်ကူးရစေခြင်းငှာ၊ အလင်းကိုပေးရန် ကျောက်ခဲများကို မှောင်မိုက်ထဲ၌ တောက်ပစေ၏။

၄ ဤသို့အားဖြင့်အချိန်တန်လာသောအခါ၊ သူတို့သည် သမုဒ္ဒရာပေါ်၌ အသက်ဆက်ရှင်နိုင်ကြခြင်းငှာ၊ အမျိုးမျိုးသော စားစရာတို့ကိုလည်းကောင်း၊ ထို့အတူ သူတို့နှင့်အတူ သယ်ဆောင်မည့် သူတို့၏ သိုးစု၊ နွားစုနှင့် သားရဲမှန်သမျှ၊ သို့မဟုတ်၊ တိရစ္ဆာန်သို့မဟုတ် ငှက်တို့အတွက် စားစရာတို့ကိုလည်းကောင်း ပြင်ဆင်ကြပြီးလျှင်—ဤသို့အားဖြင့်အချိန်တန်လာသောအခါ၊ ဤအရာခပ်သိမ်းတို့ကို ပြုကြပြီးလျှင်၊ သူတို့၏ သင်္ဘောများ သို့မဟုတ် သမ္ဗန်များပေါ်တက်၍၊ သူတို့ကိုယ်သူတို့ သူတို့၏ဘုရားသခင်ကိုယ်တော်ရှင်ထံသို့ အပ်နှံလျက် ပင်လယ်ထဲသို့ စ၍လွှင့်ကြ၏။

၅ ဤသို့အားဖြင့်အချိန်တန်လာသောအခါ၊ ကိုယ်တော်ရှင်ဘုရားသခင်သည် ရေမျက်နှာပြင်ပေါ်၌ ပြင်းထန်သောလေကို ကတိတော်မြေဆီသို့ တိုက်စေတော်မူ၏။ ထိုကဲ့သို့အားဖြင့်၊ သူတို့သည် ပင်လယ်လှိုင်းတံပိုးတို့အပေါ်၌ လေရှေ့မှာလွင့်ကြ၏။

၆ ဤသို့အားဖြင့်အချိန်တန်လာသောအခါ၊ သူတို့သည် မိမိတို့အပေါ်ပြိုကျသည့် တောင်တမျှမြင့်သော လှိုင်းတံပိုးတို့ကြောင့်၊ ထို့အတူ လေ၏ပြင်းထန်ခြင်းကဖြစ်စေသည့် ကြီးစွာသောကြောက်မက်ဖွယ် မိုးသက်မုန်တိုင်းတို့ကြောင့် ပင်လယ်ရေနက်၌ အကြိမ်များစွာနစ်မြုပ်ကြ၏။

၇ ဤသို့အားဖြင့်အချိန်တန်လာသောအခါ၊ သူတို့သည် ရေနက်၌ နစ်မြုပ်ကြသောအချိန်တွင် သူတို့ကို ထိခိုက်နိုင်သည့် ရေမရှိ၊ သူတို့၏သင်္ဘောများသည် ပန်းကန်ကဲ့သို့ ရေလုံကြ၏။ ထို့အတူ နောဧ၏သင်္ဘောကြီးကဲ့သို့လည်း ရေလုံကြ၏။ ထို့ကြောင့်၊ သူတို့သည် များစွာသောရေတို့ဖြင့် ပတ်လည်ဝိုင်းထားခံရသောအခါ၊ ကိုယ်တော်ရှင်ထံသို့ တောင်းလျှောက်ကြ၏၊ သူသည်လည်း သူတို့ကို ရေပေါ်သို့ တစ်ဖန်ဆောင်ယူတော်မူ၏။

၈ ဤသို့အားဖြင့်အချိန်တန်လာသောအခါ၊ သူတို့ ရေပေါ်မှာရှိစဉ်တွင် လေသည် ကတိတော်မြေဆီသို့ တိုက်ခြင်းကို တစ်ခါမျှမရပ်တန့်။ ထိုကဲ့သို့အားဖြင့်၊ သူတို့သည် လေအားဖြင့် တွန်းပို့ ခံရကြ၏။

၉ သူတို့သည် ကိုယ်တော်ရှင်ထံသို့လည်း ချီးမွမ်းသီချင်းဆိုကြ၏။ အထူးသဖြင့်၊ ယာရက်၏အစ်ကိုသည် ကိုယ်တော်ရှင်ထံသို့ ချီးမွမ်းသီချင်းဆို၏၊ ထို့အတူ ကိုယ်တော်ရှင်အား တစ်နေ့လုံး ကျေးဇူးတော်ချီးမွမ်း၍၊ ချီးမွမ်း၏။ ညဉ့်အချိန်သို့ရောက်လာသောအခါ၌လည်း၊ သူတို့သည် ကိုယ်တော်ရှင်အား ချီးမွမ်းခြင်းကို မရပ်တန့်ကြ။

၁၀ ထိုကဲ့သို့အားဖြင့်၊ သူတို့သည် တွန်းပို့ခံရလေ၏။ အဘယ်ပင်လယ်ဘီလူးကမျှ မရိုက်ခွဲနိုင်ကြ။ ဖျက်ဆီးနိုင်သည့် ဝေလငါးလည်းမရှိ။ ရေပေါ်၌ဖြစ်စေ၊ ရေအောက်၌ဖြစ်စေ အလင်းကို အစဉ်မပြတ်ရကြ၏။

၁၁ ထိုကဲ့သို့အားဖြင့်၊ ရေပေါ်၌ သုံးရာလေးဆယ်လေးရက်ကြာအောင် တွန်းပို့ခံရကြလေ၏။

၁၂ သူတို့သည် ကတိတော်မြေ၏ကမ်းခြေသို့ ဆိုက်ရောက်ကြ၏။ ကတိတော်မြေ၏ကမ်းခြေပေါ်သို့ ခြေကိုချပြီးလျှင်၊ သူတို့ကိုယ်ကို ထိုပြည်၏မျက်နှာပြင်ပေါ်၌ ဦးညွှတ်ချလျက်၊ ကိုယ်တော်ရှင်ရှေ့၌ သူတို့ကိုယ်သူတို့နှိမ့်ချ၍၊ သူတို့အပေါ်ရှိသည့် သူ၏နူးညံ့သော ကရုဏာတော် များစွာကြောင့်၊ ကိုယ်တော်ရှင်ရှေ့၌ ဝမ်းမြောက်ခြင်းမျက်ရည်များ ကျကြ၏။

၁၃ ဤသို့အားဖြင့်အချိန်တန်လာသောအခါ၊ သူတို့သည် ထိုပြည်၏မျက်နှာပြင်ပေါ်၌ ထွက်သွား၍၊ မြေကြီးကို ထွန်ယက်စပြုကြ၏။

၁၄ ယာရက်တွင်၊ သားလေးယောက် ရှိ၏။ သူတို့ကို ယာကုမ်၊ ဂိလဂ၊ မာဟနှင့် ဩရိဟဟု ခေါ်ကြ၏။

၁၅ ယာရက်၏အစ်ကိုသည်လည်း သားသမီးများကို ဖွားမြင်စေ၏။

၁၆ ယာရက်နှင့် သူ့အစ်ကိုတို့၏ အဆွေခင်ပွန်းတို့သည် အရေအတွက်အားဖြင့် နှစ်ဆယ်နှစ်ယောက်ခန့်ရှိ၏။ သူတို့သည်လည်း ကတိတော်မြေသို့ မရောက်မီ သားသမီးများကို ဖွားမြင်ကြ၏။ ထို့ကြောင့်၊ သူတို့သည်လည်း များစွာရှိစပြု၏။

၁၇ ကိုယ်တော်ရှင်ရှေ့၌ နှိမ့်ချစွာ ကျင့်စေဖို့ကိုလည်း သွန်သင်ခံရ၏။ အထက်မှ သွန်သင်သည်ကိုလည်း ခံရကြ၏။

၁၈ ဤသို့အားဖြင့်အချိန်တန်လာသောအခါ၊ သူတို့သည် ထိုပြည်၏မျက်နှာပြင်ပေါ်၌ ပျံ့နှံ့စပြု၍၊ ပွားများကြ၏၊ မြေကြီးကို ထွန်ယက်ကြ၏။ ထိုပြည်၌ အားကြီးလာကြ၏။

၁၉ ယာရက်၏အစ်ကိုသည်လည်း အိုမင်းစပြု၍၊ မကြာမြင့်မီ သင်္ချိုင်းတွင်းသို့ ဆင်းသွားရတော့မည်ကို သိ၏။ သို့ဖြစ်၍၊ သူသည် ယာရက်ကို ဆိုသည်ကား၊ ငါတို့လူမျိုးတို့ကို ငါတို့ရေတွက်နိုင်ခြင်းငှာလည်းကောင်း၊ ငါတို့၏သင်္ချိုင်းတွင်းများသို့ ငါတို့ ဆင်းမသွားမီ၊ ငါတို့ထံမှ အဘယ်အရာကို သူတို့အလိုရှိကြောင်း သိနိုင်ကြခြင်းငှာလည်းကောင်း သူတို့ကို အတူတကွ စုဝေးကြကုန်အံ့။

၂၀ ထို့ကြောင့်၊ လူတို့သည် အတူတကွ စုဝေးကြ၏။ ယခုတွင်၊ ယာရက်အစ်ကို၏သားသမီးတို့အရေအတွက်မှာ နှစ်ဆယ်နှစ်ယောက်ရှိ၏။ ယာရက်၏သားသမီးတို့အရေအတွက်မှာ တစ်ဆယ်နှစ်ယောက်ဖြစ်၏၊ သူ့၌ သားလေးယောက်ရှိ၏။

၂၁ ဤသို့အားဖြင့်အချိန်တန်လာသောအခါ၊ သူတို့သည် သူတို့လူများကို ရေတွက်ကြ၏။ သူတို့သည် ရေတွက်ပြီးနောက်၊ သင်္ချိုင်းတွင်းများသို့၊ ဆင်းမသွားမီ ပြုစေရန်အလိုရှိသည့်အရာများကို လူတို့ထံ တောင်းဆိုကြ၏။

၂၂ ဤသို့အားဖြင့်အချိန်တန်လာသောအခါ၊ လူတို့သည် သူတို့၏သားများမှ တစ်ဦးကို မိမိတို့အပေါ်၌ ရှင်ဘုရင်တစ်ပါးအဖြစ် ဆီလိမ်း၍ ခန့်အပ်ပေးပါမည့်အကြောင်း တောင်းဆိုကြ၏။

၂၃ ယခုမူကား၊ ရှုလော့၊ ဤအမှုမှာ သူတို့အဖို့ စိတ်ပူစရာဖြစ်၏။ ယာရက်၏အစ်ကိုကလည်း ဤအမှုသည် ဖမ်းဆီးချုပ်နှောင်ခြင်းသို့ ဧကန်အမှန်ပို့ဆောင်၏ဟု သူတို့ကိုဆို၏။

၂၄ သို့ရာတွင်၊ ယာရက်သည် သူ့အစ်ကိုအား၊ သူတို့၌ ရှင်ဘုရင်ရှိနိုင်စေမည့်အကြောင်း အခွင့်ပေးလော့ဟု ဆို၏။ ထို့ကြောင့်၊ သင်တို့သည် ငါတို့၏သားများထဲမှ သင်တို့ရွေးချယ်လိုသောသူကို ရွေးချယ်လော့ဟု သူဆို၏။

၂၅ ဤသို့အားဖြင့်အချိန်တန်လာသောအခါ၊ သူတို့သည် ယာရက်အစ်ကို၏သားဦးကိုပင် ရွေးချယ်ကြ၏။ ထိုသူ၏အမည်မှာ ပဂ္ဂဖြစ်၏။ ဤသို့အားဖြင့်အချိန်တန်လာသောအခါ၊ သူသည် ငြင်းပယ်၍၊ သူတို့၏ရှင်ဘုရင် မလုပ်လို။ လူတို့ကလည်း သူ၏အဘအား သူ့ကို အတင်းစေခိုင်းစေလိုကြ၏။ သို့ရာတွင်၊ သူ့အဘသည် အတင်းမစေခိုင်းလို။ သူတို့၏ရှင်ဘုရင်ဖြစ်စေဖို့ အဘယ်သူ့ကိုမျှ၊ သူတို့အတင်းမစေခိုင်းရမည့်အကြောင်းကိုလည်း မိန့်မှာ၏။

၂၆ ဤသို့အားဖြင့်အချိန်တန်လာသောအခါ၊ သူတို့သည် ပဂ္ဂ၏ညီအားလုံးကို ရွေးချယ်ကြလျှင်၊ ထိုသူတို့ကလည်း ရှင်ဘုရင်မလုပ်လိုကြ။

၂၇ ဤသို့အားဖြင့်အချိန်တန်လာသောအခါ၊ ယာရက်၏သားအပါင်းတို့သည်ပင် တစ်ဦးသောသူမှတစ်ပါး၊ ရှင်ဘုရင်မလုပ်လိုကြ။ ဩရိဟကို လူတို့အပေါ်၌ ရှင်ဘုရင်အဖြစ် ဆီလိမ်း၍ ခန့်အပ်၏။

၂၈ သူသည်လည်း အုပ်စိုးစပြုပြီး၊ လူတို့သည်လည်း အောင်မြင်စပြုလျက်၊ အလွန်ကြွယ်ဝလာ၏။

၂၉ ဤသို့အားဖြင့်အချိန်တန်လာသောအခါ၊ ယာရက်နှင့် သူ၏အစ်ကို သေ၏။

၃၀ ဤသို့အားဖြင့်အချိန်တန်လာသောအခါ၊ ဩရိဟသည် ကိုယ်တော်ရှင်ရှေ့မှာ နှိမ့်ချစွာကျင့်လျက်၊ သူ့ဘိုးဘေးတို့အတွက် အဘယ်ကြီးစွာသောအမှုများကို ကိုယ်တော်ရှင်ပြုတော်မူလေကြောင်းကို သတိရ၍၊ သူတို့၏ဘိုးဘေးတို့အတွက် အဘယ်ကြီးစွာသောအမှုများကို ကိုယ်တော်ရှင် ပြုတော်မူလေကြောင်းကိုလည်း သူ၏လူမျိုးတို့ကို သွန်သင်ပေးလေသတည်း။